ʼE ʼi Ai Te Logo Lelei ʼe ʼAoga Ke Logo Kiai Te Hahaʼi Fuli
ʼE ʼi Ai Te Logo Lelei ʼe ʼAoga Ke Logo Kiai Te Hahaʼi Fuli
“[Ko] te logo lelei . . . ʼe ko te mālohi ʼaia ʼo te ʼAtua ʼo ʼuhiga mo te fakamaʼuli.”—LOMA 1:16.
1, 2. He koʼē ʼe kotou fakamafola ia te “logo lelei ʼo te puleʼaga,” pea ko te ʼu faʼahi fea ʼo te logo lelei ʼaē ʼe kotou fakahā tāfito ki te hahaʼi?
‘ ʼE AU fiafia ʼi te tala ʼo te logo lelei ʼi te ʼaho fuli.’ ʼE lagi neʼe kua kotou maʼu te taʼi manatu ʼaia, pe neʼe kua lagi kotou fai pē lā ia te ʼu taʼi palalau ʼaia. ʼI tokotou ʼuhiga kau Fakamoʼoni ʼa Sehova faʼafai, ʼe mahino kiā koutou te maʼuhiga tāfito ʼaē ke kotou fakamafola “te logo lelei ʼaenī ʼo te puleʼaga.” ʼE lagi kotou lava lau fakaʼatamai ia te lea fakapolofetā ʼaē neʼe fai e Sesu ʼo ʼuhiga mo te gāue ʼaia, ʼaē ʼe tou lolotoga fakahoko nei.—Mat. 24:14.
2 ʼAki takotou fakamafola ia te “logo lelei ʼo te puleʼaga,” ʼe kotou hoko atu te gāue ʼaē neʼe kua kamata fai e Sesu. (Lau ia Luka 4:43.) ʼE mahino ia, ʼe lagi kotou fakahā tāfito ki te hahaʼi te logo ʼaē kua vave fakagata pē e te ʼAtua te ʼu fakatuʼutuʼu ʼa te tagata. ʼI “te mamahi lahi,” ʼe ina fakaʼauha anai ia te ʼu lotu hala pea mo pulihi te agakovi ʼaē ʼi te kele. (Mat. 24:21) ʼE lagi kotou toe fakahā age ki te hahaʼi, ko te Puleʼaga ʼo te ʼAtua ʼaē kā ina toe fakatuʼu te Palatiso ʼi te kele, ke feala ai te mafola ʼo te tokalelei pea mo te fiafia. ʼE mahino ia, ko te “logo lelei ʼo te puleʼaga” ʼe ko “te logo lelei . . . [ʼaē neʼe tala fakatomuʼa] kiā Apalahamo: ‘ ʼAki ia koe ʼe tapuakina ai anai te ʼu puleʼaga fuli.’ ”—Kal. 3:8.
3. He koʼē ʼe feala ke kotou ʼui neʼe talanoa tāfito ia te ʼapositolo ko Paulo ki te “logo lelei” ʼi tana tohi ʼaē ki te kau Loma?
3 Kae ʼe lagi ʼe ʼi ai te faʼahi maʼuhiga ʼo “te logo lelei” ʼe mole tou faʼa talanoa kiai, kae ʼe ko he faʼahi ia ʼe toe ʼaoga pē foki ke mahino kiai te hahaʼi. ʼI tana tohi ʼaē neʼe ina fai ki te kau Loma, neʼe tuʼa tahi pē te talanoa ʼa te ʼapositolo ko Paulo ki te Puleʼaga, kae neʼe tuʼa 12 ia tana fakaʼaogaʼi te kupusiga palalau “logo lelei.” (Lau ia Loma 14:17.) Ko te faʼahi fea ʼo “te logo lelei” neʼe tuʼa lahi te talanoa ʼa Paulo kiai ʼi te tohi ʼaia? He koʼē ʼe maʼuhiga ʼaupitō ia te faʼahi ʼaia ʼo te “logo lelei”? Pea he koʼē ʼe lelei ke tou manatuʼi ia te faʼahi ʼaia mokā tou fakamafola ia “te logo lelei ʼo te ʼAtua” ki te hahaʼi ʼo totatou telituale?—Mko. 1:14; Loma 15:16; 1 Tes. 2:2.
Te Faʼahi ʼAē Neʼe ʼAoga Ke Mahino Kiai Te Kau Kilisitiano ʼo Loma
4. Lolotoga te temi ʼaē neʼe ʼuluaki pilisoniʼi ai ʼi Loma, ko te ʼu faʼahi fea ʼaē neʼe fakamafola e Paulo?
4 ʼE lelei ke tou vakaʼi age muʼa te ʼu manatu ʼaē neʼe talanoa kiai ia Paulo ʼi te temi ʼaē neʼe ʼuluaki pilisoniʼi ai ia ia ʼi Loma. ʼE tou lau ʼi te Tohi-Tapu, ʼi te temi ʼaē neʼe ʼomai ai ʼihi kau Sutea ʼo ʼaʼahi ia ia, neʼe ina ‘fakamafola age kiā nātou (1) te puleʼaga ʼo te ʼAtua pea mo ina fakalotoʼi nātou ke natou mahino lelei (2) kiā Sesu.’ Neʼe koteā tona fua? “Ko ʼihi neʼe natou kamata tui ki te ʼu meʼa ʼaē neʼe [natou logo kiai]; ko ʼihi atu neʼe mole natou tui.” Ki muli age, ko Paulo neʼe ina ‘fakatalitali lelei nātou ʼaē neʼe ʼomai kiō ia, ʼo ina fakamafola age (1) te puleʼaga ʼo te ʼAtua pea mo akoʼi age kiā nātou te ʼu meʼa ʼo ʼuhiga mo (2) te ʼAliki ko Sesu Kilisito.’ (Gāue 28:17, 23-31) ʼE hā lelei mai, ko te faʼahi ʼaē neʼe fakamaʼuhigaʼi tāfito e Paulo ʼe ko te Puleʼaga ʼo te ʼAtua. Kae koteā te tahi faʼahi ʼaē neʼe ina fakamaʼuhigaʼi? Ko te faʼahi ʼaia neʼe ko te tafitoʼaga ʼo te Puleʼaga, ʼe ko te gāue ʼa Sesu ʼi te fakatuʼutuʼu ʼa te ʼAtua.
5. Koteā te faʼahi tāfito ʼaē neʼe talanoa kiai Paulo ʼi tana tohi ʼaē ki te kau Loma?
5 ʼE ʼaoga ki te hahaʼi fuli pē ke natou ʼiloʼi pe ko ai ia Sesu pea ke natou tui kiā te ia. ʼI te tohi ʼo Loma, neʼe fakamahino ai e Paulo te faʼahi ʼaē neʼe ʼaoga ki te hahaʼi fuli ke natou ʼiloʼi. ʼI te kamata ʼo tana tohi, ʼe ina ʼui ko te “ ʼAtua ʼaē ʼe au foaki ki ai he tauhi taputapu ʼaki toku ʼatamai ʼo ʼuhiga mo te logo lelei ʼo ʼuhiga mo tona ʼAlo.” Neʼe ina toe ʼui fēnei: “[ʼE] mole au ufiufi ki te logo lelei; heʼe ko te mālohi ʼaia ʼo te ʼAtua ʼo ʼuhiga mo te fakamaʼuli ʼo te hahaʼi fuli ʼaē ʼe tui.” Ki muli age ʼo tana tohi, neʼe talanoa ki te temi ʼaē “kā fakamāuʼi [ai] anai e te ʼAtua ʼaki ia Kilisito Sesu te ʼu meʼa fakalilo ʼa te hahaʼi, ʼo mulimuli ki te logo lelei ʼaē ʼe au tala.” Pea neʼe ina fakamatala fēnei: “Mai Selusalemi, ʼo au foli ʼo aʼu ki Ilikume, neʼe au fakamafola kātoa ia te logo lelei ʼo ʼuhiga mo Kilisito.” * (Loma 1:9, 16; 2:16; 15:19) ʼI takotou manatu, he koʼē neʼe talanoa tāfito ia Paulo ʼo ʼuhiga mo Sesu Kilisito ki te kau Loma?
6, 7. Koteā ʼaē ʼe feala ke tou ʼui ʼo ʼuhiga mo te kamata fakatuʼutuʼu ʼaē ʼo te kōkelekāsio ʼo Loma pea ko ai ia nātou ʼaē neʼe natou faʼufaʼu te kōkelekāsio ʼaia?
6 ʼE mole tou ʼiloʼi pe neʼe kamata fakatuʼu feafeaʼi te kōkelekāsio ʼo te kau Kilisitiano ʼo Loma. Neʼe ʼi ai koa ni kau Sutea peʼe ko he kau poloselite ʼi Selusalemi ʼi te Penikositē ʼo te taʼu 33 neʼe natou toe liliu ki Loma ʼi tanatou tafoki ʼaē ki te lotu Fakakilisitiano? (Gāue 2:10) Pe neʼe ko he kau Kilisitiano faifakatau koloa pea mo he kau Kilisitiano fai folau, ʼaē neʼe fakalaka ʼi Loma, pea natou fakamafola ai te moʼoni? Tatau aipē pe koteā ʼaē neʼe hoko, kae ʼi te temi ʼaē neʼe fai ai e Paulo tana tohi, ʼi te teitei taʼu 56 ʼo totatou temi, neʼe kua fualoa atu te fakatuʼu ʼo te kōkelekāsio. (Loma 1:8) Ko ai ʼaē neʼe natou faʼufaʼu ia te kōkelekāsio ʼaia?
7 Ko ʼihi iā nātou ʼaia neʼe ko te kau Sutea. Neʼe talaʼofa ia Paulo kiā Atoloniko pea mo Suniasi, ʼo ina ʼui ko “tona ʼu kāiga,” lagi fakaʼuhiga ko tona ʼu kaumeʼa Sutea. Ko Akila, ʼaē neʼe ʼi Loma mo tona ʼohoana, ia Pilisika, neʼe ko te ʼu Sutea mo nāua. (Loma 4:1; 9:3, 4; 16:3, 7; Gāue 18:2) Kae tokolahi te ʼu tehina mo tuagaʼane ʼaē neʼe talaʼofa ki ai ia Paulo, neʼe lagi ko te ʼu Senitile. Lagi ko ʼihi iā nātou ʼaia neʼe gāue “ ʼi te ʼapi ʼo Sesale,” neʼe lagi fakaʼuhiga ki te ʼu hahaʼi kaugana ʼa Sesale pea mo he kau gāue ʼe mole natou maʼu tuʼulaga maʼuhiga ʼi tona loto fale.—Filp. 4:22; Loma 1:6; 11:13.
8. Koteā te ʼaluʼaga fakaʼofaʼofa ʼaē neʼe tau mo nātou ʼaē ʼi Loma?
8 Ko te kau Kilisitiano fuli ʼi Loma neʼe natou tau mo he ʼaluʼaga fakaʼofaʼofa, pea ʼe toe fēia pē mo tātou. Neʼe ʼui fēnei e Paulo: “Ko tātou fuli neʼe tou agahala pea mole tou aʼu ki te kolōlia ʼo te ʼAtua.” (Loma 3:23) ʼE hā lelei mai, neʼe ʼi ai te faʼahi maʼuhiga neʼe tonu ke mahino fuli kiai ia nātou ʼaē neʼe faitohi ki ai ia Paulo. Neʼe tonu ke mahino kiā nātou ia tonatou ʼuhiga agahala pea ke natou tui ki te ʼu fakatuʼutuʼu ʼaē neʼe fai e te ʼAtua moʼo fakatokatoka ia tonatou ʼaluʼaga fakaʼofaʼofa ʼaia.
Ke Mahino Ki Te Hahaʼi Tonatou ʼUhiga Agahala
9. Koteā te lelei ʼaē neʼe feala ke maʼu e te kau Kilisitiano ʼi Loma mai te logo lelei ʼaē neʼe fakahā e Paulo?
9 ʼI te kamataʼaga ʼo tana tohi ʼaē ki te kau Loma, neʼe fakahā lelei e Paulo te tapuakina lahi ʼaē ʼe feala ke natou maʼu ʼaki te logo lelei ʼaē neʼe ina lolotoga fakamafola, ʼi tana ʼui fēnei: “[ʼE] mole au ufiufi ki te logo lelei; heʼe ko te mālohi ʼaia ʼo te ʼAtua ʼo ʼuhiga mo te fakamaʼuli ʼo te hahaʼi fuli ʼaē ʼe tui, ʼuluaki ki te Sutea pea mo te Keleka.” ʼEī, neʼe feala ke natou maʼu ia te maʼuli. Kae neʼe tonu ke natou tui, ohagē pē ko tona ʼui ʼaenī iā Hapakuke 2:4: “Ki ʼaē ʼe faitotonu, ʼe maʼuli anai ia ʼuhi ko te tui.” (Loma 1:16, 17; Kal. 3:11; Hep. 10:38) Kae koteā te pikipikiga ʼo te “logo lelei” ʼaē ʼe ina taki ki te maʼuli, pea mo te ʼui ʼaē “ko tātou fuli neʼe tou agahala”?
10, 11. He koʼē ki ʼihi ko te manatu ʼaē iā Loma 3:23, ʼe mole foʼou kiā nātou kae ki ʼihi ia ʼe ko he manatu foʼou?
10 ʼI muʼa ʼo te fakatuputupu e he tahi te tui ʼaē ʼe ina foaki te maʼuli, ʼe tonu muʼa ke mahino kiā ia ia tona ʼuhiga agahala. Kiā nātou ʼaē neʼe lahilahi ake kae neʼe natou tui ki te ʼAtua pea mo natou ako te Tohi-Tapu, ʼe mole foʼou kiā nātou ia te manatu ʼaē ʼo ʼuhiga mo te ʼuhiga agahala ʼo te tagata. (Lau ia Tagata Tānaki 7:20.) Peʼe natou tali te manatu ʼaia peʼe natou lotolotolua ki te moʼoni ʼo te manatu ʼaia, kae ko te faʼahi ʼaē ʼe lelei, heʼe natou mahino siʼisiʼi pē ki te ʼu palalau ʼaenī neʼe fai e Paulo: “Ko tātou fuli neʼe tou agahala.” (Loma 3:23) Kae kā tou fai fakamafola, ʼe lagi feala ke tou felāveʼi mo te hahaʼi tokolahi ʼe mole natou mahino ki te ʼu palalau ʼaia.
11 ʼI ʼihi fenua, ʼi te lahilahi ake ʼa te hahaʼi neʼe mole akoʼi age kiā nātou te manatu ʼaē neʼe tou tuputupu fuli ake ʼe tou agahala, ʼe ko te agahala ʼaia neʼe tuku holo mai iā Atama. ʼE lagi ʼiloʼi e he tahi ʼe ina fai ni ʼu hala, pea ʼe ʼi ai tona ʼu vaivaiʼaga, pea lagi ina fai he ʼu aga ʼe kovi. Pea ʼe ina tokagaʼi ʼe toe fēia mo te agaaga ʼo ʼihi. Kae ʼuhi ko te faʼahi ʼaē neʼe natou lahilahi ake ai, ʼe feala ke mole mahino ki ʼihi pe koʼē ʼe fēia tonatou ʼulugaaga pea mo ʼihi. ʼI ʼihi lea, kapau ʼe kotou ʼui ʼe agahala he tahi, pea ʼe lagi natou mahino anai ʼe kotou talanoa ki he tahi ʼe faifakapō peʼe ko he tahi ʼe ina maumauʼi te ʼu lao. Koia, ko he tahi ʼe lahilahi ake mo te taʼi manatu ʼaia, ʼe lagi mole mahino anai ia mo ia totonu pē lā ʼe ko te tagata agahala, ohagē pē ko te manatu ʼaē neʼe talanoa kiai Paulo.
12. Koteā ʼaē ʼe mole tui ai te tokolahi ʼi te mālamanei ʼe ko tātou ko te hahaʼi agahala?
12 Māʼiapē lā mo te ʼu fenua ʼaē ʼe lahi ai te ʼu lotu ʼo te Keletiate, tokolahi ʼe mole natou tui ki te ʼui ʼaē ʼe ko tātou ko te hahaʼi agahala. Koteā tona tupuʼaga? Logolā tanatou ʼolo ʼaē ʼi ʼihi temi ʼo misa, kae kiā nātou ia, ko te fakamatala ʼaē ʼi te Tohi-Tapu ʼo ʼuhiga mo Atama pea mo Eva, ʼe ko he fāgana pē ia. Ko ʼihi neʼe natou lahilahi ake ʼi he loto fale neʼe mole natou tui ki te ʼAtua. ʼE mole natou tui ʼe maʼuli moʼoni te ʼAtua, koia lā ʼaē ʼe mole natou ʼiloʼi ai neʼe fai e te Māʼoluga te ʼu lao maʼa te tagata, pea ʼi tanatou mole mulimuli ʼaē ki te ʼu lao ʼaia, ʼe fakaʼuhiga ai leva ʼi te temi ʼaia ʼe natou agahala. ʼE natou hagē ko te hahaʼi ʼo te ʼuluaki sēkulō ʼaē neʼe ʼui e Paulo ʼe ‘mole ʼi ai honatou ʼamanaki’ pea ʼe ‘mole honatou ʼAtua ʼi te mālamanei.’—Efe. 2:12.
13, 14. (a) Koteā he ʼaluʼaga ʼaē ʼe mole feala ai ki te hahaʼi ke natou takuʼaki ʼe mole feala ke natou tui ki te ʼAtua pea mo te agahala? (b) Koteā te ʼu aga neʼe fai e te tokolahi ʼi tanatou mole tui ʼaē ki te ʼu faʼahi ʼaia?
13 ʼI te faitohi ʼaē ʼa Paulo ki te kau Loma, neʼe ina fakahā kiā nātou ia te ʼu ʼaluʼaga e lua ʼaē ʼe mole feala ai ke natou takuʼaki tanatou mole tui ki te ʼAtua ʼuhi ko te faʼahiga maʼuli ʼaē neʼe natou lahilahi ake ai, pea ʼe toe fēia pē lā mo tātou iā ʼaho nei. Ko te ʼuluaki manatu ʼaē ʼe tonu ai ke kita tui ki te ʼAtua, heʼe ko te ʼu meʼa fuli ʼaē neʼe ina fakatupu ʼe fakamoʼoni ʼaki ai, ʼe ʼi ai te Tupuʼaga. (Lau ia Loma 1:19, 20.) ʼE ʼalutahi te faʼahi ʼaia mo te manatu ʼaē neʼe ʼui e Paulo ʼi tana faitohi ʼaē mai Loma ki te kau Hepeleo, ʼo ina ʼui fēnei: “Ko te fale fuli pē neʼe ʼi ai tona tufuga, kae ko ia ʼaē neʼe ina faʼu ia meʼa fuli ʼe ko te ʼAtua.” (Hep. 3:4) Kā tou lau te ʼu vaega ki muʼa atu pea ki muli age ʼo te kāpite 3 ʼo te tohi ʼo Hepeleo, neʼe talanoa ia Paulo ʼo ʼuhiga mo te kau Iselaele, peʼe ko te kōkelekāsio ʼo Iselaele, ʼaē neʼe fakaʼuhiga ko te “fale” ʼo te ʼAtua. Kae ko te fakatā ʼaia ʼaē neʼe ina fakaʼaogaʼi, ʼe feala pē ke fakahā ʼaki ai, ʼe ʼi ai te Tupuʼaga neʼe ina faʼu ia meʼa fuli ʼi te ʼatulaulau kātoa.
14 Koia neʼe ʼi ai te tafitoʼaga mālohi ʼa Paulo ke ina tohi ki te kau Loma, ko he tahi pē ʼe tauhi ki te ʼu fakatātā mate, ʼo kau kiai mo te kau Iselaele ʼo te temi muʼa, neʼe mole hanatou ‘takuʼaki’ moʼo ʼui ʼe mole ʼi ai he ʼAtua peʼe ko he Tupuʼaga ʼo te ʼatulaulau. ʼE toe ʼaoga mo te ʼu palalau ʼaē neʼe fai e Paulo kiā nātou ʼaē neʼe natou fakaʼaogaʼi ʼonatou sino, peʼe fafine peʼe tagata, ke natou fai ni ʼu felāveʼi fakasino heʼeʼaoga mo he tahi age pē ʼu fafine peʼe ko he tahi age ʼu tagata. (Loma 1:22-27) Koia leva ʼaē ʼo ʼuhiga mo te taʼi manatu ʼaia neʼe natou maʼu, neʼe ʼui fēnei ai leva e Paulo, ko “te kau Sutea ʼo fēia mo te kau Keleka ʼe puleʼi nātou e te agahala.”—Loma 3:9.
He “Fakamoʼoni” Ki Te Agahala
15. Koteā ʼaē ʼe maʼu e te hahaʼi fuli, pea koteā te gāue ʼaē ʼe ina fai maʼa nātou?
15 ʼE fakahā ʼi te tohi ʼo Loma te tahi ʼaluʼaga ʼaē ʼe tonu ai ki te hahaʼi ke natou mahino ki tonatou ʼuhiga agahala pea ʼe ʼaoga ke haofaki nātou mai te ʼaluʼaga fakaʼofaʼofa ʼaia. ʼO ʼuhiga mo te ʼu lao ʼaē neʼe foaki e te ʼAtua ki te kau Iselaele, neʼe tohi fēnei e Paulo: “Ko nātou fuli ʼaē neʼe agahala ʼi te lao, ʼe fakamāuʼi anai nātou e te lao.” (Loma 2:12) ʼI tana hoko atu tana ʼu fakamahino ʼi tana tohi ʼaia, neʼe talanoa ki te hahaʼi ʼo te ʼu puleʼaga fuli pē ʼaē neʼe mole Sutea, neʼe mole natou ʼiloʼi ia te ʼu lao ʼaia ʼa te ʼAtua, kae ʼi te temi fuli pē ‘ ʼe natou fakalogo ki te lao.’ He koʼē ʼi te agamāhani ko nātou ʼaia ʼe natou tapuʼi te fai ʼo he ʼu felāveʼi fakasino mo hokita kāiga totonu, mo te fai fakapō pea mo te kaihaʼa? Neʼe fakahā e Paulo ʼi tana tohi ʼaia ia te tupuʼaga ʼaē ʼo tanatou tapuʼi ia te ʼu aga ʼaia, heʼe ʼi ai tonatou leʼo ʼo loto.—Lau ia Loma 2:14, 15.
16. Logolā ʼe tou tahi maʼu fuli tona leʼo ʼo loto, kae he koʼē ʼe feala pē ke kita agahala?
16 Kae lagi neʼe kua kotou tokagaʼi, tatau aipē peʼe kita maʼu hokita leʼo ʼo loto ʼe ina fakatokagaʼi mai kiā kita te meʼa ʼaē ʼe lelei pea mo te meʼa ʼaē ʼe kovi, kae ʼe mole fakaʼuhiga leva ʼe fakalogo anai ia ia ʼaē ʼo ʼona te leʼo ʼo loto ʼaia ki tana takitaki. ʼAki te ʼu meʼa ʼaē neʼe hoko ki Iselaele ʼe fakamoʼoni ʼaki ai te faʼahi ʼaia. Logolā ko te ʼAtua ʼaē neʼe ina akoʼi te leʼo ʼo loto ʼo te kau Iselaele pea mo natou maʼu te ʼu lao mai te ʼAtua ke mole natou kaihaʼa pea mo tono, kae neʼe lahi age te ʼu lakaga ʼaē neʼe mole natou fakalogo ai ki ʼonatou leʼo ʼo loto pea mo te Lao ʼa Sehova. (Loma 2:21-23) Neʼe ko faʼahi ʼaia e lua neʼe natou lakahala ai, koia neʼe natou agahala ai ʼi tanatou mole fakalogo ki te ʼu lēkula ʼa te ʼAtua pea mo fai ia tona finegalo. Ko he faʼahi neʼe fakatupu kovi ʼaupitō ki tanatou ʼu felōgoi ʼaē mo tonatou Pule.—Lev. 19:11; 20:10; Loma 3:20.
17. Koteā te fakatuʼutuʼu fakalotomālohi ʼaē ʼe tou maʼu ʼi te tohi ʼo Loma?
17 Ko te ʼu manatu ʼaenī neʼe tou vakaʼi ʼi te tohi ʼo Loma, ʼe hā ʼaki mai ai te ʼaluʼaga fakaʼofaʼofa ʼaē ʼe nofo ai te tagata iā muʼa ʼo te Māfimāfi, ʼo toe fēia aipē mo totatou maʼuli ʼaē ʼo tātou totonu. Kae neʼe toe talanoa Paulo ki te puleʼaki moʼo fakatokatoka tokita ʼaluʼaga ʼaia. Neʼe talanoa ki te ʼu palalau neʼe fai e Tavite iā Pesalemo 32:2, ʼo ʼui fēnei e te ʼapositolo: “Fiafia ia nātou ʼaē kua fakamolemole tanatou ʼu aga heʼe faitotonu pea kua ʼuʼufi tanatou ʼu agahala; fiafia te tagata ʼaē ʼe mole kei lau e Sehova ia tana agahala.” (Loma 4:7, 8) ʼEī, neʼe fai e te ʼAtua te ʼu puleʼaki ʼo mulimuli pē ki tana ʼu lao moʼo fakamolemole te ʼu agahala.
Ko Te Logo Lelei ʼAē ʼe Tou Fakamafola ʼe Talanoa Tāfito Kiā Sesu
18, 19. (a) Koteā te faʼahi ʼo “te logo lelei” ʼaē neʼe talanoa tāfito kiai ia Paulo ʼi tana tohi ki te kau Loma? (b) Ke tou maʼu te ʼu tapuakina ʼaē kā foaki mai e te Puleʼaga, koteā ʼaē ʼe tonu ke tou mahino kiai?
18 ʼE lagi kotou ʼui fēnei anai: “ ʼE ko he logo lelei moʼoni ʼaia!” ʼE ko te logo lelei ʼaia, ʼaē neʼe talanoa tāfito kiai Paulo ʼi te tohi ʼo Loma ʼi te kamataʼaga ʼo te ʼalatike ʼaenī. Ohagē ko tatatou kua vakaʼi ʼi te kamata ʼo te ʼalatike, neʼe ʼui fēnei e Paulo: “[ʼE] mole au ufiufi ki te logo lelei; heʼe ko te mālohi ʼaia ʼo te ʼAtua ʼo ʼuhiga mo te fakamaʼuli.”—Loma 1:15, 16.
19 Ko “te logo lelei” ʼaia ʼe fakaʼuhiga tāfito ki te tuʼulaga ʼaē ʼo Sesu ʼi tana fakahoko te fakatuʼutuʼu ʼa te ʼAtua. Neʼe feala kiā Paulo ke fakatalitali fakafiafia ki “te ʼaho ʼaē kā fakamāuʼi [ai] anai e te ʼAtua ʼaki ia Kilisito Sesu te ʼu meʼa fakalilo ʼa te tagata, ʼo mulimuli ki te logo lelei” ʼaē neʼe tala e Paulo. (Loma 2:16) ʼI te fai ʼaē e Paulo ʼo tana ʼu palalau ʼaia, neʼe mole fakaʼuhiga leva neʼe ina meʼa noaʼi ia “te puleʼaga ʼo Kilisito pea mo te ʼAtua” peʼe ko te ʼu gāue ʼaē kā fai anai e te ʼAtua ʼaki te Puleʼaga. (Efe. 5:5) Kae neʼe ina fakahā, kapau ʼe tou fia maʼuli pea mo maʼu te ʼu tapuakina ʼi te takitaki ʼa te Puleʼaga ʼo te ʼAtua, ʼe tonu ke mahino kiā tātou (1) ʼe tou agahala iā muʼa ʼo te ʼAtua pea (2) ʼe ʼaoga ke tou tui kiā Sesu Kilisito ke feala ai he fakamolemole ʼo tatatou ʼu agahala. Kā mahino he tahi ki te ʼu faʼahi kehekehe ʼaia ʼo te fakatuʼutuʼu ʼa te ʼAtua pea mo ina tali, pea mo mahino ki te ʼamanaki ʼaē kā ina maʼu ai anai, ʼe feala anai ke ina ʼui fēnei: “ ʼEī, ʼe moʼoni, ʼe ko he logo lelei ʼaia!”
20, 21. ʼI totatou minisitelio, he koʼē ʼe tonu ke tou manatuʼi tuʼumaʼu te faʼahi ʼo “te logo lelei” ʼaē ʼe talanoa tāfito kiai Paulo ʼi te tohi ʼo Loma, pea koteā anai tona ʼu fua?
20 ʼE tonu anai ke tou manatuʼi tuʼumaʼu ia te faʼahi ʼaia ʼo te logo lelei mokā tou fai fakamafola. ʼO ʼuhiga mo Sesu, neʼe toe talanoa ia Paulo ki te ʼu palalau ʼaenī neʼe fai e Isaia: “Ko ʼaē ʼe tui kiā te ia ʼe mole mamahi ai anai ia.” (Loma 10:11; Isa. 28:16) ʼE lagi mole mata faikehe anai ia te logo ʼo ʼuhiga mo Sesu ki te hahaʼi ʼaē iā ʼaho nei ʼe natou ʼiloʼi te manatu ʼa te Tohi-Tapu ʼo ʼuhiga mo te agahala. Kae ki ʼihi, ʼe foʼou anai te logo ʼaia, heʼe ko he manatu ʼaia ʼi tonatou fenua ʼe mole ʼiloʼi e te hahaʼi peʼe mole natou tui kiai. Ko nātou ʼaia kā natou tui anai ki te ʼAtua pea mo tui ki te ʼu manatu ʼaē ʼe tuʼu ʼi te Tohi-Tapu, pea ʼe tonu anai ke tou fakamahinohino age kiā nātou te tuʼulaga ʼaē ʼo Sesu ʼi te fakatuʼutuʼu ʼa te ʼAtua. ʼI te ʼalatike ʼaē kā hoa mai, ʼe tou vakaʼi ai anai te kāpite 5 ʼo te tohi ʼo Loma, peʼe koteā ʼaē ʼe fakamahino ai ʼo ʼuhiga mo te faʼahi ʼaia ʼo te logo lelei. ʼE mahino ia, ʼe ʼaoga atu anai te ako ʼaia kiā koutou ʼi tokotou minisitelio.
21 ʼI meʼa fakafiafia hakita tokoni ki te hahaʼi fakamālotoloto, ke natou mahino ki te logo lelei ʼaē ʼe talanoa liuliuga kiai ʼi te tohi ʼo Loma, te logo lelei ʼaē ʼi tona fakahagatonu, “[ʼe] ko te mālohi ʼaia ʼo te ʼAtua ʼo ʼuhiga mo te fakamaʼuli ʼo te hahaʼi fuli ʼaē ʼe tui.” (Loma 1:16) ʼO toe hilifaki mai ki te fakapale ʼaenī, ʼe tou toe sisio anai ki te tali ʼaē e ʼihi te ʼu palalau ʼaenī neʼe fai e Paulo iā Loma 10:15: “ ʼE matalelei te ʼu vaʼe ʼo nātou ʼaē ʼe natou tala te ʼu logo lelei ʼo te ʼu meʼa lelei!”—Isa. 52:7.
[Nota]
^ pal. 5 ʼE tou toe maʼu te ʼu kupuʼi palalau fēia ʼi te tahi ʼu vaega neʼe tohi ʼaki te takitaki ʼa Sehova.—Mko. 1:1; Gāue 5:42; 1 Ko. 9:12; Filp. 1:27.
ʼE Kei Kotou Manatuʼi Koa?
• Koteā te faʼahi ʼo “te logo lelei” ʼaē ʼe talanoa tāfito kiai te tohi ʼo Loma?
• Koteā te faʼahi ʼe ʼaoga ke tou mahino kiai ke feala ai hatatou tokoni ki te hahaʼi ke natou mahino kiai?
• ʼE feafeaʼi ki “te logo lelei ʼo ʼuhiga mo Kilisito” hana liliu ko he ʼu tapuakina kiā tātou pea mo ʼihi?
[ʼU fehuʼi ʼo te ako]
[Fakamatala ʼo te pāsina 12]
Ko te logo lelei ʼaē ʼe talanoa tāfito kiai ʼi te tohi ʼo Loma, ʼe fakaʼuhiga ki te ʼu gāue maʼuhiga ʼaē ʼe fai e Sesu ʼi te fakatuʼutuʼu ʼa te ʼAtua
[Paki ʼo te pāsina 13]
Neʼe tou tutupu fuli ake mo te meʼa ʼe kovi ʼi totatou sino, ʼe ko te agahala