Le maʼalob péektsil jach kʼaʼabéettoʼonoʼ
Le maʼalob péektsil jach kʼaʼabéettoʼonoʼ
«Le maʼalob péektsiloʼ, [...] u páajtalil Jajal Dios utiaʼal [salvación].» (ROM. 1:16)
1, 2. ¿Baʼaxten k-kʼaʼaytik u «maʼalob péektsil[il] le [reinooʼ]», yéetel máakalmáak tiʼ le baʼaxoʼob ken u beet k-maas kʼaʼaytikoʼ?
MAʼ XAANEʼ tsʼoʼok k-aʼalik, wa tsʼoʼok k-tuklik: «Jach uts tin wich in kʼaʼaytik le maʼalob péektsil sáamsamaloʼ». Toʼoneʼ k-ojel jach kʼaʼabéet u kʼaʼaytaʼal u «maʼalob péektsil[il] le [reinooʼ]». Maʼ xaaneʼ k-ojel de memoriail le baʼax tu yaʼalaj Jesús yoʼolal le kʼaʼaytajoʼ (Mat. 24:14).
2 U jaajileʼ ken k-kʼaʼayt u «maʼalob péektsil[il] le [reinooʼ]», táan k-seguertik le meyaj tu káajsaj Jesusoʼ (xokaʼak Lucas 4:43). Junpʼéel tiʼ le baʼaxoʼob k-maas kʼaʼaytikoʼ letiʼe bix kun luʼsbil tumen Dios le baʼaxoʼob beetik u muʼyaj máakoʼ. Ken taalak le «táaj yaʼab muʼyaj[oʼ]», yaan u xuʼulsaʼal le religionoʼob maʼatech u kaʼanskoʼob u jaajiloʼ, bey túunoʼ mix máak kun beetik baʼax kʼaas way Luʼumeʼ (Mat. 24:21). K-kʼaʼaytik xaneʼ u Reino Dioseʼ yaan u sutik paraísoil tuláakal le Luʼumaʼ yéetel yaan u beetik u yantal jeetsʼelil yéetel kiʼimak óolaliʼ. U «maʼalob péektsil[il] le [reinooʼ]» táakaʼan ichil le baʼax tu «tsʼáaj Jajal Dios u yojéelt Abrahán, maʼiliʼ úuchkeʼ», letiʼeʼ tu yaʼalajtiʼ: «Tuláakal kaajoʼob yaan u kiʼikiʼtʼantaʼaloʼob [ta woʼolal]» (Gal. 3:8).
3. ¿Baʼaxten jeʼel u páajtal k-aʼalikeʼ Pabloeʼ jach tʼaanaj tiʼ le maʼalob péektsil tu cartail Romailoʼoboʼ?
3 Baʼaleʼ, maʼ xaaneʼ yaan junpʼéel baʼax táakaʼan ichil le maʼalob péektsil maʼatech k-jach aʼalik tiʼ le máakoʼob kex kʼaʼabéet u yojéeltikoʼoboʼ. Teʼ carta tu tsʼíibtaj Pablo tiʼ le Romailoʼoboʼ, ich griegoeʼ doce u téenel meyajnajtiʼ le tʼaan «maʼalob péektsil[oʼ]», baʼaleʼ chéen juntéen tu chʼaʼchiʼitaj le Reinooʼ (xokaʼak Romailoʼob 14:17). Baʼaleʼ ¿tiʼ baʼax ku tʼaan le maʼalob péektsil tu sen chʼaʼchiʼitoʼ, yéetel baʼaxten jach unaj k-naʼatik? ¿Baʼaxten maʼ unaj u tuʼubultoʼon ken k-kʼaʼayt «u maʼalob péektsil[il] u [reino] Jajal Dios[iʼ]»? (Mar. 1:14; Rom. 15:16; 1 Tes. 2:2.)
¿Baʼax kʼaʼabéet kaʼach tiʼ le romailoʼoboʼ?
4. ¿Tiʼ baʼax maas tʼaanaj Pablo le ka kʼaʼaytajnaj le ka yáax kʼaʼal tu kaajil Romaoʼ?
4 Junpʼéel baʼax jeʼel u yáantkoʼon k-naʼat lelaʼ, letiʼe k-jach ilik le baʼax tu yaʼalaj Pablo le ka yáax kʼaʼal tu kaajil Romaoʼ. Le Bibliaoʼ ku yaʼalikeʼ, le ka bin xíimbaltbil tumen u jaats judíoʼobeʼ tu beetaj kaʼapʼéel baʼal. Yáaxeʼ tu tsikbaltaj «u [reino] [...] Jajal Dios tiʼob». U kaʼapʼéeleʼ, joʼopʼ u yáantkoʼob u yiloʼob máax Jesús. ¿Baʼax túun úuch ka tsʼoʼoki? «Tsʼeʼetsʼek tiʼobeʼ tu kʼamoʼob baʼax tu yaʼalaj [...], baʼaleʼ uláakʼoʼobeʼ maʼ.» Ka tsʼoʼokeʼ Pabloeʼ «tu kʼamaj xan tuláakal le máaxoʼob» bin xíimbaltikoʼ yéetel táanileʼ tu kʼaʼaytajtiʼob, «u [reino] Jajal Dios», tsʼoʼoleʼ tu «kaʼansaj[tiʼob] tu yoʼolal Yuumtsil Jesucristo» (Hch. 28:17, 23-31). Jeʼex túun k-ilkoʼ, letiʼeʼ suuk u tʼaan kaʼach tiʼ u Reino Dios. Baʼaleʼ ¿tiʼ baʼax maas ku tʼaan kaʼachi? Tiʼ junpʼéel baʼax jach kʼaʼabéet tiʼ u gobierno Dios: tiʼ le meyaj ken u beet Jesús utiaʼal u béeykuntik le baʼax u tukultmaj Diosoʼ.
5. ¿Tiʼ baʼax jach tʼaanaj Pablo teʼ carta tu tsʼíibtaj tiʼ le Romailoʼoboʼ?
5 Tuláakal máakeʼ unaj u kʼaj óoltik Jesucristo yéetel u tsʼáaik u fe tiʼ letiʼ. Teʼ carta tu tsʼíibtaj Pablo tiʼ le Romailoʼoboʼ, tu yaʼalaj u kʼaʼabéetil u beetik máak beyoʼ. Tu káajbaleʼ ku yaʼalik: «Kin meyajtik yéetel tuláakal in puksiʼikʼal ikil in [kʼaʼaytik] u maʼalob péektsil u Paal». Tsʼoʼoleʼ ku yaʼalik xan: «Maʼ tin chʼaʼik suʼtal tu yoʼolal le maʼalob péektsiloʼ, tumen leloʼ u páajtalil Jajal Dios utiaʼal u [salvartik] tuláakal le máax [yaan u fejoʼ]». Yéetel ku yaʼalikeʼ «le kʼiin ken pʼis óoltaʼak tumen Jajal Dios u taʼakbil baʼaloʼob tuláakal máak tu yoʼolal Jesucristoeʼ, jeʼel bix ku yaʼalik le maʼalob péektsil[oʼ]». Tu tsʼookeʼ ku yaʼalik: «In láaj chupmaj yéetel [u] maʼalob péektsil[il] [salvación] ku tsʼáaik Cristooʼ, u káajbal Jerusalén yéetel tuláakal tuʼuxoʼob tak tu luʼumil Ilírico» (Rom. 1:9, 16; 2:16; 15:19). * ¿Baʼaxten Pabloeʼ jach tʼaanaj yoʼolal Cristo tiʼ le romailoʼoboʼ?
6, 7. ¿Bix káajik le múuchʼulil yaan kaʼach Romaoʼ, yéetel tuʼux u taal le sukuʼunoʼob yanoʼob kaʼachoʼ?
6 Maʼ k-ojel bix úuchik u káajal le múuchʼulil yanchaj Romaoʼ. Maʼ xaaneʼ káajsaʼab tumen jujuntúul tiʼ le judíoʼob wa le máaxoʼob tu kʼamaj u religión le judíoʼob joʼopʼ u tsaypachtikoʼob Jesús tu kʼiiniloʼob le Pentecostés tiʼ u jaʼabil 33 tiʼ le yáax siglo, suunajoʼob kajtal Romaoʼ (Hch. 2:10). Wa maʼ xaaneʼ letiʼe j-koonoloʼob bis le maʼalob péektsiloʼ wa le yáax disipuloʼob binoʼob Romaoʼ. Jeʼel bixak káajikeʼ, le ka tu tsʼíibtaj Pablo le carta tiʼob tu jaʼabil 56, tsʼoʼok u chan xáantal káajak le múuchʼuliloʼ (Rom. 1:8). ¿Tuʼux u taal kaʼach le sukuʼunoʼob yanoʼoboʼ?
7 Yanoʼobeʼ judíoʼob. Tumen le ka tu túuxtaj saludos Pablo tiʼ Andrónico yéetel Juniaseʼ, tu yaʼaleʼ u yéet kʼiʼikʼeloʼob, maʼ xaaneʼ tumen junpʼéeliliʼ familia tuʼux u taaloʼob wa tumen u yéet kaajaloʼob. Áquila yéetel Priscila, kajaʼanoʼob yéetel ku meyajoʼob Romaeʼ, judíoʼob xan kaʼachi (Rom. 4:1; 9:3, 4; 16:3, 7; Hch. 18:2). Baʼaleʼ yaʼab tiʼ le sukuʼunoʼob tu túuxtaj saludos tiʼoboʼ yaanal kaaj u taaloʼob. Maʼ xaaneʼ yaan tiʼ letiʼobeʼ «u yotochnáaloʼob Cesar», lelaʼ u kʼáat u yaʼaleʼ, letiʼe palitsiloʼob yéetel le soldadoʼob ku meyajoʼob tu yotochoʼ (Fili. 4:22; Rom. 1:6; 11:13).
8. ¿Baʼax talamil tu muʼyajtaj xan le romailoʼoboʼ?
8 Le sukuʼunoʼob yanoʼob Romaoʼ láayliʼ ku muʼyajtikoʼob kaʼach junpʼéel talamil, jeʼex le k-muʼyajtik teʼ kʼiinoʼobaʼ. Pabloeʼ ku yaʼalik: «Tuláakloʼob tsʼoʼok u kʼebantaloʼob yéetel náach yaniloʼob tiʼ u nojbeʼenil Jajal Dios» (Rom. 3:23). Jeʼex túun k-ilkoʼ, le sukuʼunoʼob yanoʼob Romaoʼ, jach kʼaʼabéet u naʼatkoʼob letiʼobeʼ kʼeban wíinikoʼob yéetel kʼaʼabéet u kʼamikoʼob yéetel fe le áantaj ku tsʼáaik Diosoʼ.
Unaj k-kʼamik tuláakloʼon kʼebanoʼon
9. Jeʼex u yaʼalik Pablooʼ, ¿baʼax utsil ku tsʼáaik le maʼalob péektsiloʼ?
9 Teʼ yáax versiculoʼob tu tsʼíibtaj Pablooʼ, tu yaʼalajtiʼob yaʼab u téenel le utsil jeʼel u taasiktiʼob le maʼalob péektsiloʼ: «Maʼ tin chʼaʼik suʼtal tu yoʼolal le maʼalob péektsiloʼ, tumen leloʼ u páajtalil Jajal Dios utiaʼal u [salvartik] tuláakal le máax [yaan u fejoʼ], le judíoʼob yáax táaniloʼ, bey xan le maʼ judíoʼoboʼ». Jeʼex úuchik u yaʼalik Pablooʼ, tuláakloʼob, kex judíoʼob wa maʼeʼ, tsʼaʼan u páajtalil u salvarkubaʼob. Baʼaleʼ kʼaʼabéet u yeʼeskoʼob fe, jeʼex úuchik u yaʼalik Pablo le ka tu chʼaʼchiʼitaj le baʼax ku yaʼalik Habacuc 2:4: «Le máax tsʼaʼan tumen Jajal Dios maʼalobil tu táaneʼ bíin kuxlak tu yoʼolal le [fejoʼ]» (Rom. 1:16, 17; Gal. 3:11; Heb. 10:38). Baʼaleʼ ¿baʼax yaan u yil le maʼalob péektsil ku tsʼáaik salvación yéetel le tʼaan tuláakal máak «tsʼoʼok u kʼebantaloʼ»?
10, 11. ¿Baʼaxten yaan máakeʼ séeb u naʼatik le baʼax ku yaʼalik Romailoʼob 3:23 yéetel yanoʼobeʼ maʼatech?
10 Utiaʼal u yantal tiʼ máak le fe tsʼáaik salvacionoʼ, táanileʼ kʼaʼabéet u kʼamik letiʼeʼ kʼeban wíinik. Le máaxoʼob úuch joʼopʼok u creertikoʼob Dios yéetel ku xokikoʼob le Bibliaoʼ ku naʼatkoʼob bey yaniloʼ (xokaʼak Eclesiastés 7:20). Teʼ tuʼuxoʼob beyoʼ, tak le máaxoʼob ku yaʼalikoʼob maʼ maʼalob úuchik u yaʼalik Pablo «tuláakloʼob tsʼoʼok u kʼebantaloʼob[oʼ]» ku wéej naʼatkoʼob baʼax tu yóotaj u yaʼale (Rom. 3:23). Baʼaleʼ yaan tuʼuxeʼ le sukuʼunoʼoboʼ ku tʼaanoʼob yéetel máakoʼob jach junpuliʼ maʼatech u naʼatkoʼob le baʼax tu yaʼalaj Pablooʼ.
11 Yaan tuʼuxeʼ le máakoʼoboʼ maʼ u yojloʼob wa ken síijik máakeʼ kʼeban, mix wa máansbil u beetaʼal tiʼ le paalaloʼob tumen u taataʼoboʼ. Baʼaleʼ u yojloʼob yaan baʼaloʼob maʼ maʼalobtak ku beetik máakiʼ, yaan modos maʼ maʼalobtak tiʼiʼ yéetel ku beetik baʼaloʼob kʼaastak. Tsʼoʼoleʼ ku yilkoʼobeʼ tuláakal máak beetik beyoʼ. Yoʼolal le baʼaxoʼob suukaʼan u beetaʼal tuʼux kajaʼanoʼoboʼ, maʼ tu páajtal u naʼatkoʼob baʼaxten. Tsʼoʼoleʼ le idioma ku tʼanik máakoʼ, maʼ xaaneʼ ku tsʼáaik naʼatbileʼ, chéen le máaxoʼob maʼatech u yuʼubikoʼob tʼaan yéetel ku beetkoʼob baʼaloʼob kʼaastak kʼebanoʼoboʼ. Teʼ tuʼuxoʼob beyoʼ maʼatech u naʼatkoʼob le baʼax tu yaʼalaj Pablooʼ, yéetel ku tuklikoʼobeʼ minaʼan u kʼebanoʼob.
12. ¿Baʼaxten yaʼab máakeʼ maʼatech u creertik wa kʼebanoʼon?
12 Tak le máakoʼob yanoʼob ichil u maasil religionoʼoboʼ, yaʼabeʼ maʼatech u creerkoʼob wa kʼebanoʼon. ¿Baʼaxten? Tumen kex ku binoʼob cada wa baʼax kʼiin tu iglesiaʼobeʼ, maʼatech u creertikoʼob wa jach tu jaajil yanchaj Adán yéetel Eva, jeʼex u kaʼansik le Bibliaoʼ. Yanoʼob xaneʼ ku líikʼloʼob ichil junpʼéel familia minaʼan u religión. Ku yaʼalikoʼobeʼ mix máak beet le baʼaxoʼob yanoʼ, le oʼolal maʼatech u kʼamkoʼob wa yaan juntúul Máax aʼalik baʼax unaj u beetik máak yéetel wa kʼeban u pʼáatal maʼ u beetaʼal baʼax ku yaʼalik. Jeʼel u páajtal u yaʼalaʼaleʼ, beyoʼob jeʼex le máaxoʼob aʼalaʼab tumen Pablo teʼ yáax siglo kuxaʼanoʼob «kaʼach tu yóokʼol le luʼumaʼ x-maʼ [esperanzail] yéetel x-maʼ [Diosil]» (Efe. 2:12).
13, 14. 1) ¿Baʼaxten tak le máaxoʼob maʼatech u creertikoʼob Dios láayliʼ kʼebanoʼoboʼ? 2) ¿Baʼaxoʼob ku beetik yaʼab máakoʼob tumen maʼatech u creertikoʼob Dios?
13 Tu cartail Romailoʼobeʼ, Pabloeʼ tu yaʼalaj kaʼapʼéel baʼax oʼolal maʼ unaj u tuukul máak beyoʼ. Yáaxeʼ tuláakal le baʼaxoʼob yanoʼ ku yeʼesik yanchaj juntúul Máax beetmil tuláakal baʼal (xokaʼak Romailoʼob 1:19, 20). Lelaʼ letiʼe baʼax tu tsʼíibtaj xan tu cartail Hebreob desde tu kaajil Romaoʼ: «Tuláakal najeʼ unaj u beetaʼal tumen wa máax; baʼaleʼ Jajal Dios máax beet tuláakal baʼax yaan» (Heb. 3:4). Lelaʼ ku yeʼesikeʼ yanchaj juntúul Máax beet tuláakal le baʼaxoʼob yanoʼ.
14 Le oʼolal le ka tsʼíibnaj Pablo tiʼ le romailoʼoboʼ, tu yaʼaleʼ minaʼan baʼax oʼolal u yaʼalik le israelitaʼob yéetel u maasil máakoʼob «minaʼan u siʼipiloʼob» ikil u adorartikoʼob diosoʼob maʼ kuxaʼanoʼobiʼ. Lelaʼ bey xan u yaʼalaʼal yoʼolal le máaxoʼob ku núupkʼebankuntikubaʼob yéetel ku beetkoʼob uláakʼ baʼaloʼob kʼaastak, maʼ unaj u beetaʼal tumen juntúul xiib yéetel juntúul koʼoleliʼ (Rom. 1:22-27). Pabloeʼ ku seguer u yaʼalikeʼ «le judíoʼob jeʼel bix xan le maʼ judíoʼoboʼ tiʼ yanoʼob tu yáanal u páajtalil le kʼebanoʼ» (Rom. 3:9).
Le concienciaoʼ ku takik «u pooloʼob»
15. ¿Máaxoʼob tsʼaʼan u concienciaʼob, yéetel baʼax ku beetkoʼob yoʼolal lelaʼ?
15 U cartail Romailoʼobeʼ ku yeʼesik uláakʼ baʼax oʼolal tuláakal unaj u kʼamik kʼeban wíinik yéetel kʼaʼabéet u jáalkʼabtaʼal tiʼ le kʼebanoʼ. Ka tʼaanaj Pablo tiʼ le leyoʼob tu tsʼáaj Dios tiʼ u kaajil Israeloʼ, tu yaʼalaj: «Le máaxoʼob ku kʼebantaloʼob kex yaan u yaʼalmajtʼaan Moisés tiʼobeʼ, yaan u pʼis óoltaʼaloʼob yéetel le aʼalmajtʼaanoʼ» (Rom. 2:12). Tsʼoʼoleʼ tu yaʼaleʼ, tak le máaxoʼob maʼ u kʼaj óoloʼob le ley tu tsʼáaj Diosoʼ ku beetkoʼob «tu juunal u yóoloʼob le baʼax ku yaʼalik le aʼalmajtʼaanoʼ». Le oʼolal maʼ maʼalob u yilkoʼob u tsʼoʼokol u beel máak yéetel juntúul u láakʼtsiliʼ, u kíimsik máak u yéet wíinikil mix u yookol máak. ¿Baʼaxten? Tumen jeʼex u yaʼalik Pabloeʼ, tuláakal máak tsʼaʼan u conciencia (xokaʼak Romailoʼob 2:14, 15).
16. ¿Baʼaxten maʼ u kʼáat u yaʼal maʼ kun kʼebantal máak kex yaan u concienciaiʼ?
16 Baʼaleʼ kex le conciencia ku yaʼaliktoʼon baʼax uts yéetel baʼax kʼaasoʼ, maʼ u kʼáat u yaʼal wa k-beetik mantatsʼ baʼax ku yaʼaliktoʼoniʼ. Tuukulnakoʼon tiʼ le baʼax tu beetaj le israelitaʼob úuchjeakiloʼ. Letiʼobeʼ yaʼab u téenel maʼ tu chaʼaj u nuʼuktaʼaloʼob tumen le conciencia tsʼaʼantiʼob tumen Jéeobaoʼ mix tumen le baʼax ku yaʼalik le Ley utiaʼal maʼ u yookoloʼob yéetel maʼ u núupkʼebantaloʼoboʼ (Rom. 2:21-23). Bey túunoʼ kaʼapʼéel baʼax oʼolal maʼ kʼaʼamoʼob tumen Diosiʼ. U jaajileʼ kʼebanoʼob, tumen maʼ béeychaj u beetkoʼob tuláakal le baʼaxoʼob ku yaʼalik le leyoʼ mix le baʼax uts tu tʼaan Jéeobaoʼ. Bey túunoʼ maʼ páajchaj u biskubaʼob tubeel yéetel Jéeobaiʼ (Lev. 19:11; 20:10; Rom. 3:20).
17. ¿Baʼax ku yaʼalik Romailoʼob jach ku líiʼsik k-óol?
17 Yoʼolal le baʼaxoʼob tsʼoʼok k-ilkoʼ, maʼ xaaneʼ yaan máax jeʼel u tuklikeʼ u cartail Romailoʼobeʼ ku yeʼesik maʼ maʼalob yaniloʼon tu táan Diosiʼ. Baʼaleʼ maʼ chéen letiʼe baʼax tu yaʼalaj Pablooʼ. Ka tu chʼaʼchiʼitaj le baʼax tu yaʼalaj David teʼ Salmo 32:1 yéetel 2, tu yaʼalaj: «Kiʼimak u yóoloʼob le máaxoʼob ku saʼatsaʼal [le baʼaloʼob kʼaastak u beetmoʼob] tumen Jajal Diosoʼ, yéetel ku tuʼubsaʼal u kʼebanoʼoboʼ. Kiʼimak u yóol le máak maʼ tu tsʼaʼabal u siʼipil u kʼeban tu yóokʼol tumen Yuumtsil» (Rom. 4:7, 8). Jeʼex túun k-ilkoʼ, Dioseʼ ku perdonartik u kʼeban máak, tumen tsʼoʼok u tsʼáaik le baʼax kʼaʼabéet utiaʼal u beetkoʼ.
Maʼalob péektsiloʼob ku tʼaanoʼob tiʼ Jesús
18, 19. 1) ¿Tiʼ baʼax ku tʼaan le maʼalob péektsiloʼob tu chʼaʼchiʼitaj Pablo tu cartail Romailoʼoboʼ? 2) ¿Baʼax unaj k-beetik utiaʼal k-kʼamik le utsiloʼob ken u tsʼáa le Reinooʼ?
18 ¿Máasaʼ lelaʼ jach ku líiʼsik k-óol? Lelaʼ ku beetik k-tuukul tiʼ le baʼax táakaʼan ichil le maʼalob péektsil tu yaʼalaj Pablo tu cartail Romailoʼoboʼ. Jeʼex tsʼoʼok k-ilkoʼ, Pabloeʼ tu yaʼalaj: «Maʼ tin chʼaʼik suʼtal tu yoʼolal le maʼalob péektsiloʼ, tumen leloʼ u páajtalil Jajal Dios utiaʼal u [salvar]» (Rom. 1:15, 16).
19 Teʼ jaats jeʼelaʼ, le maʼalob péektsiloʼ ku tʼaan tiʼ le meyaj ku beetik Jesús utiaʼal u beetik Jéeoba le baʼax u tukultmoʼ. Pabloeʼ ku yaʼalikeʼ «jeʼel bix ku yaʼalik le maʼalob péektsil[oʼ]», yaan u kʼuchul «le kʼiin ken pʼis óoltaʼak tumen Jajal Dios u taʼakbil baʼaloʼob tuláakal máak tu yoʼolal Jesucristo» (Rom. 2:16). Le ka tu yaʼalaj lelaʼ maʼ táan u mixbaʼalkúuntik «le [reino] u tiaʼal Cristo yéetel u tiaʼal Jajal Diosoʼ», mix le baʼax ken u beet Jéeoba yéetel u yáantaj le gobiernoaʼ (Efe. 5:5). Le baʼax ku yaʼalikoʼ, tuláakal máax u kʼáat u kʼam le utsiloʼob ken u taas le Reinooʼ, unaj u beetik kaʼapʼéel baʼal: yáaxeʼ, unaj u kʼamik kʼeban tu táan Dios, u kaʼapʼéeleʼ, unaj u tsʼáaik u fe tiʼ Jesucristo utiaʼal u perdonartaʼal u kʼebanoʼob. Ken k-naʼat yéetel ken k-kʼam lelaʼ, k-ilik jach jatsʼuts le baʼax ku taal u kʼiinoʼ, le oʼolal ku taaktal k-aʼalik xan: «¡Jach túun tu jaajil maʼalob péektsiloʼob!».
20, 21. ¿Baʼaxten jach unaj k-chʼaʼik en cuentail le maʼalob péektsil ku yaʼalik Romailoʼob ken kʼaʼaytajnakoʼonoʼ, yéetel baʼax utsiloʼob jeʼel kʼamkeʼ?
20 Ken kʼaʼaytajnakoʼoneʼ unaj k-tuukul tiʼ lelaʼ, tumen táakaʼan ichil le maʼalob péektsiloʼ. Ka tu chʼaʼchiʼitaj Pablo le baʼax tu yaʼalaj Isaíasoʼ, tu yaʼalaj: «Tuláakal le máax ku yoksik u yóol tiʼ [Cristoeʼ] mix bikʼin bíin paʼajak u suʼtal» (Rom. 10:11; Isa. 28:16). Teʼ tuʼuxoʼob ojéelaʼan tuláakal máax kʼeban, jeʼex u kaʼansik le Bibliaoʼ, maʼ jelaʼan u yuʼubaʼal le maʼalob péektsil ku tʼaan tiʼ Jesusoʼ. Baʼaleʼ maʼ bey u yúuchul teʼ tuʼuxoʼob maʼatech u kʼaʼamal wa maʼ kʼaj óoltaʼan le baʼax ku kaʼansik le Bibliaoʼ. Le oʼolal ken creertaʼak Dios bey xan le baʼax ku yaʼalik le Biblia tumen le máakoʼoboʼ, unaj u tsoʼolol tiʼob baʼax meyajil ku beetik Jesús. Tuláakʼ xookoʼ yaan u tsolik bix u táakpajal ichil le maʼalob péektsil le baʼax ku yaʼalik le capítulo 5 tiʼ Romailoʼoboʼ. Maʼ xaaneʼ lelaʼ jach jeʼel u yáantkoʼon teʼ kʼaʼaytajoʼ.
21 Jeʼex tsʼoʼok k-ilkoʼ, u cartail Romailoʼobeʼ yaʼab u téenel ku tʼaan tiʼ le maʼalob péektsiloʼ yéetel ku yaʼalikeʼ «leloʼ u páajtalil Jajal Dios utiaʼal u [salvartik] tuláakal le máax [yaan u fejoʼoboʼ]» (Rom. 1:16). ¿Máasaʼ jach ku kiʼimaktal k-óol k-kʼamik le maʼalob péektsil yéetel k-áantik u maasil u kʼamoʼob xanoʼ? Jach ku kiʼimaktal k-óol k-ilik le máaxoʼob u yaabiltmoʼob u jaajiloʼ, ku yaʼalikoʼob xan le baʼax ku yaʼalik Pablo teʼ Romailoʼob 10:15: «¡Bukaʼaj jatsʼutsil u yookoʼob le máaxoʼob taaskoʼob u péektsilil jeetsʼel óolal, yéetel ku [kʼaʼaytikoʼob] le maʼalob péektsiloʼ!» (Isa. 52:7).
[Tsolajil]
^ xóot’ol 5 Le tekstoʼobaʼ ku tʼaanoʼob xan tiʼ le maʼalob péektsiloʼ (Mar. 1:1; Hch. 5:42; 1 Cor. 9:12; Fili. 1:27).
¿Kʼajaʼantoʼon wa le baʼaloʼobaʼ?
• ¿Baʼax táakaʼan ichil le maʼalob péektsil ku sen chʼaʼchiʼitaʼal tu cartail Romailoʼoboʼ?
• ¿Baʼax kʼaʼabéet k-áantik u naʼat le máakoʼoboʼ?
• ¿Baʼax utsiloʼob ken u tsʼáatoʼon u «maʼalob péektsil[il] [...] Cristo»?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
Le maʼalob péektsil ku yaʼalik u cartail Romailoʼoboʼ yaan yil yéetel le meyaj ku beetik Jesús utiaʼal u béeychajal le baʼax u tukultmaj Diosoʼ
[U tsolajil le oochel teʼ táan juʼun 9]
Tuláakloʼon kʼebanoʼon ken síijikoʼon
