“An nian Nyanmiɛn i bua fa b’ɔ fa be mannin amun’n be lika”
“An nian Nyanmiɛn i bua fa b’ɔ fa be mannin amun’n be lika”
“An nian Nyanmiɛn i bua fa b’ɔ fa be mannin amun’n be lika. Nán an yo i mianlɛ su, an yo i kɛ Nyanmiɛn klo kɛ an yo’n sa.”—1 PIƐ. 5:2.
1. ?Kɛ Piɛli klɛ́ i fluwa klikli’n nn sa benin yɛ ɔ o Klistfuɛ’m be su ɔ?
KƐ BLƐ nga Nerɔn wá fá ɲrɛnnɛn’n yí i Klistfuɛ nga be o Rɔmu lɔ’n be su’n wá jú’n, yɛ akoto Piɛli klɛli i fluwa klikli’n niɔn. Ɔ kunndɛli kɛ ɔ́ wlɛ́ i wiengu Klistfuɛ’m be fanngan. Afin mmusu’m be si Satan ‘wlan-wlan’ kunndɛ Klistfuɛ mun kɛ ɔ́ núnnún be. Sɛ be waan bé kwlá jrɛ́n i ɲrun kekle’n, ɔ fata kɛ ‘be sasa be wun’ naan ‘be yo be wun aenvuɛfuɛ’m Nyanmiɛn b’ɔ kwla sa kwlaa yo’n i nyrun.’ (1 Piɛ. 5:6, 8) Asa ekun’n ɔ fata kɛ be bo yo kun. Nán blɛ li yɛ be nin be wiengu’m bé wá kpɛ́ ndɛnngan ɔn. Afin sɛ be yo sɔ’n be nin Ɲanmiɛn be afiɛn’n kwla saci, yɛ be wiengu’m be nin Ɲanmiɛn be afiɛn’n kwla saci wie.—Gal. 5:15.
2, 3. ?Wan yɛ ɔ fata kɛ e nin i e kun ɔn? ?Ngue yɛ é wá wún i ɔ?
2 Andɛ’n sa kunngba’n o e su wie. Mmusu’m be si Satan su kunndɛ kɛ ɔ́ sáci e. (Ngl. 12:12) Kpɛkun ɔ cɛ kaan sa’n, “nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nian yo-man le.” (Mat. 24:21) Wafa nga ɔ nin i fatali kɛ Klistfuɛ klikli’m be nian be wun naan ndɛ w’a tɔman be nin be wiengu’m be afiɛn’n ngbɛnngbɛn’n, i kunngba’n wie yɛ ɔ fata kɛ e yo ɔ. Kɛ ɔ ko yo naan y’a kwla yo sɔ’n, ɔ ju wie’n, ɔ fata kɛ kpɛnngbɛn nga be o asɔnun’n nun mɔ be sa w’a tɔ Ɲanmiɛn junman’n nun’n be uka e.
3 Maan e nian wafa nga asɔnun kpɛnngbɛn’m be kwla kle kɛ be wun ‘Nyanmiɛn i bua fa b’ɔ fa be mannin be’n’ i lika nianlɛ junman’n i wlɛ kpa naan be si su ye’n. (1 Piɛ. 5:2) I sin’n, wafa nga be kwla di asɔnun sunianlɛ junman’n i kpa’n, é wá bú su akunndan. Like suanlɛ ng’ɔ́ bá lɔ’n nun’n, é wá wún wafa nga asɔnun’n nunfuɛ’m be kwla ‘bu be nga be di junman be afiɛn bɔ e Min’n fa be sieli be su kɛ be tu be fɔ’n be akunndan’n.’ (1 Tɛs. 5:12) I sɔ ndɛ’m be akunndan bulɛ’n, ɔ́ úka e naan y’a kwla jran e kpɔfuɛ’m be ti’n i ɲrun kekle. Afin e wun i wlɛ kɛ e nin i yɛ e kun ɔn.—Efɛ. 6:12.
An nian Ɲanmiɛn i bua fa’n i lika
4, 5. ?Wafa sɛ yɛ ɔ fata kɛ asɔnun kpɛnngbɛn’m be bu Ɲanmiɛn i bua fa’n niɔn? An fa sunnzun ase kun be yiyi nun.
4 Klistfuɛ klikli’m be blɛ su’n, Piɛli wlali asɔnun kpɛnngbɛn’m be fanngan kɛ be bu Ɲanmiɛn i bua ng’ɔ fa wlali be sa nun’n be su nianlɛ junman’n i kɛ nga Ɲanmiɛn bɔbɔ fa bu i’n sa. (An kanngan 1 Piɛr 5:1, 2 nun.) Kannzɛ Piɛli o be nga be suan asɔnun’n i bo’n be nun wie’n, sanngɛ i ndɛ kanlɛ’n nun’n w’a bumɛn i wun i kɛ ɔ ti kpa tra asɔnun kpɛnngbɛn mun. I kpa’n, ɔ kannin ndɛ kleli be kɛ i wiengu mun sa. (Gal. 2:9) Kɛ nga Piɛli fa yoli’n sa’n, junman dan mɔ yɛle Ɲanmiɛn i bua fa’n i lika nianlɛ’n, andɛ’n e Ɲrun dinfuɛ’m be anuannzɛ’n wla asɔnun kpɛnngbɛn’m be fanngan kɛ be mian be ɲin be di i kpa.
5 Akoto Pɔlu klɛli i kɛ ɔ fata kɛ asɔnun kpɛnngbɛn’m be ‘nian Nyanmiɛn i bua fa b’ɔ fa be mannin be’n be lika.’ Ɔ ti cinnjin kpa kɛ be wun i wlɛ kɛ bua fa’n ti Zoova nin Zezi Klist be liɛ. Wafa nga be nian Ɲanmiɛn i bua’m be lika’n, bé kɛ́n i su ndɛ klé Ɲanmiɛn. ?Sɛ amun janvuɛ kpa wie su tu ajalɛ naan ɔ srɛ amun kɛ amun niɛn i mma’m be lika’n, amun su nianman be lika kpa? ?Yɛ amun su manman be aliɛ? ?Sɛ be nun kun tɔ tukpacɛ’n, amun su fɛmɛn i kɔman dɔɔtrɔ naan b’a yo i are ng’ɔ nin i fata’n? I wafa kunngba’n, ɔ fata kɛ asɔnun kpɛnngbɛn’m be “nian Nyanmiɛn i Asɔnun’n b’ɔ fɛ i bɔbɔ wa’n toli’n i lika.” (Yol. 20:28) Be wla fiman su le kɛ Ɲanmiɛn fali Klist Zezi i mmoja’n toli bua sɔ mun kunngunngun. Kɛ mɔ asɔnun kpɛnngbɛn’m bé kán bua fa’n i su nianlɛ’n i su ndɛ klé Ɲanmiɛn’n ti’n, be man be aliɛ, be sasa be kpɛkun be nian be lika.
6. ?Laa’n, junman benin yɛ ɔ fata kɛ bua sunianfuɛ’n di ɔ?
6 Laa’n, junman ng’ɔ fata kɛ nnɛn sunianfuɛ’m be di’n, maan amun bu i akunndan nian. Bua’m be lika nianlɛ’n ti’n, wia’n bo be yɛ arɛ’n kun be lele. (Bob. 31:40) Bua’m be ti’n be kɔ lele ju wie’n nuan bɔbɔ. Davidi m’ɔ ti bua sunianfuɛ i kaan nun’n, ɔ deli i bua mun blo nnɛn’m be sa nun. Nnɛn sɔ’m be nun wie yɛle asɔmɔli nin nnɛn ngble nga be flɛ i ursu’n. Davidi kɛnnin i sɔ m’ɔ yoli’n i ndɛ kɛ ɔ ‘sɔ i kɔmin nun ndrɛ’n, ɔ bo i lele ɔ kun i.’ (1 Sam. 17:34, 35) Nanwlɛ, ɔ yoli yakpafuɛ dan! Atrɛkpa’n ɔ mantannin nnɛn sɔ’n i nuan kokoko! Sanngɛ ɔ yoli like kwlaa ng’ɔ kwla yo’n naan w’a de i bua’n.
7. ?Sɛ é kwlá sé’n, wafa sɛ yɛ asɔnun kpɛnngbɛn’m be kwla de Ɲanmiɛn i bua kun Satan i nuan’n nun ɔn?
7 Andɛ’n, wafa nga Satan kunndɛ trá Ɲanmiɛn i sufuɛ mun kɛ asɔmɔli fa tra nnɛn sa’n, ɔ fata kɛ asɔnun kpɛnngbɛn’m be nian be wun i lika. Maan be yo yakpafuɛ naan sɛ é kwlá sé’n, b’a de Ɲanmiɛn i bua wie Satan i nuan’n nun. Wie liɛ’n, ɔ fata kɛ be nin aniaan nga be siman kɛ be su wa tɔ Satan i aya’n nun’n be koko yalɛ naan be wun i wlɛ. (An kanngan Zid 22, 23 nun.) I yo, Zoova uka asɔnun kpɛnngbɛn mun naan b’a kwla yo i sɔ liɛ’n. Be yo Ɲanmiɛn i bua nga like w’a yo i’n i cɛcɛ, sɛ é kwlá sé’n, be miɛnmiɛn i kannin’n yɛ be fa Ɲanmiɛn Ndɛ’n m’ɔ ti kɛ kannin are sa’n be gua nun.
8. ?Nin yɛ asɔnun kpɛnngbɛn’m be fa Ɲanmiɛn i bua fa’n be kɔ ɔ? ?Yɛ wafa sɛ yɛ be yo i sɔ ɔ?
8 Nnɛn sunianfuɛ’n ɔ fɛ i bua mun kɔ lika nga ijre nɔnman nin nzue ba’m be o lɛ’n nun. I kunngba’n, asɔnun kpɛnngbɛn’m be kle Ɲanmiɛn i sufuɛ mun asɔnun’n i atin’n. Be wla be fanngan kɛ be ɔ aɲia’m be bo titi, i liɛ’n Ɲanmiɛn Ndɛ’n m’ɔ ti kɛ aliɛ’n sa’n, bé kwlá ɲán wie bé dí i kpa. Kpɛkun bé ɲɛ́n i sɔ ‘aliɛ’n blɛ ng’ɔ ti i nuan su’n i su.’ (Mat. 24:45) Wie liɛ’n, ɔ fata kɛ asɔnun kpɛnngbɛn’m be fa blɛ uflɛ be uka be nga be nin Ɲanmiɛn be afiɛn’n w’a ti nun kan’n naan be sɔ Ɲanmiɛn Ndɛ’n nun be fa ta be wun. Kɛ bua kun nin bua fa’n be afiɛn’n ko ti nun’n, ɔ kwla miɛn i ɲin naan ɔ́ sɛ́ i sin. Ɔ maan ɔ fataman kɛ asɔnun kpɛnngbɛn’m be wlanwlan be niaan ng’ɔ nin Ɲanmiɛn be afiɛn tili nun kan’n. Ɔ fata kɛ be yiyi Ɲanmiɛn mmla nun amanniɛn su be kle i, yɛ be kle i wafa ng’ɔ kwla nanti be su i mɛn dilɛ’n nun’n.
9, 10. ?Wafa sɛ yɛ asɔnun kpɛnngbɛn’m be kwla nian be nga Ɲanmiɛn ninnge’m be nun’n be kpinndinman’n be lika ɔ?
9 ?Sɛ amun kpinndinman’n, dɔɔtrɔfuɛ benin yɛ amún kúnndɛ ɔ? ?Nga m’ɔ faman blɛ timan amun nuan ndɛ m’ɔ klɛ are man amun naan w’a ɲɛn i ti w’a wun sran uflɛ’n, yɛ amún kúnndɛ ɔ? ?Annzɛ kusu, nga m’ɔ sie i su amun nuan bo m’ɔ yiyi tukpacɛ nga ɔ o amun su’n i nun kle amun, kpɛkun ɔ kle amun are fanunfanun mun’n, yɛ amún kó wún i wun ɔn?
10 I kunngba’n, asɔnun kpɛnngbɛn be kwla sie be su sran nga sɛ é kwlá sé’n, Ɲanmiɛn ninnge’m be nun’n ɔ kpinndinman’n i nuan bo. Kpɛkun be ukɛ i naan w’a yo kpa. Ɔ ti kɛ nn be su “guɛ i su ngo e Min’n [Zoova] i dunman nun” sa. (An kanngan Zak 5:14, 15 nun.) Ɲanmiɛn Ndɛ’n ti kɛ Galaadi lɔ kannin are’n sa. Ɔ kwla yo maan sran m’ɔ kpinndinman’n i wun fɛ i feke. (Zer. 8:22; Eze. 34:16) Sɛ sran kun nanti Biblu’n nun mmla’m be su’n, i sɔ’n úkɛ i naan w’a fa ajalɛ nga bé úkɛ i naan w’a su Zoova kpa ekun’n. Nanwlɛ, kɛ asɔnun kpɛnngbɛn’m be ko ti Ɲanmiɛn i bua ng’ɔ kpinndinman’n i nuan ndɛ’n mɔ be nin i be srɛ Ɲanmiɛn’n, i sɔ’n yo sa ye kpa.
Nán amun yo i mianlɛ su
11. ?Ngue yɛ ɔ su asɔnun kpɛnngbɛn’m be bo naan b’a nian Ɲanmiɛn i bua fa’n i lika be klunklo su ɔ?
11 Wafa ng’ɔ fata kɛ asɔnun kpɛnngbɛn’m be di asɔnun sunianfuɛ junman’n, Piɛli fa kpɛnnin be wla wie. Kɛ asɔnun kpɛnngbɛn’m bé nían Ɲanmiɛn i bua fa’n i lika’n, ɔ fataman kɛ be “yo i mianlɛ su.” ?Ngue yɛ ɔ su asɔnun kpɛnngbɛn’m be bo mɔ be klunklo su be nian be niaan Klistfuɛ’m be lika ɔ? ?Ngue yɛ ɔ suli Piɛli i bo m’ɔ niannin Zezi i bua’m be lika m’ɔ mannin be aliɛ ɔ? Like cinnjin ng’ɔ suli i bo’n yɛle klolɛ m’ɔ kloli e Min’n i dan’n. (Zan 21:15-17) Zezi i klolɛ’n ti’n, asɔnun kpɛnngbɛn’m be “olɛ nga be o lɛ’n, nán be bɔbɔ be olɛ yɛ be wo-ɔ, sanngɛ sran ng’ɔ wuli [...] be ti’n, i dunman nun yɛ be wo-ɔ.” (2 Kor. 5:14, 15) Zezi i klolɛ sɔ’n ɔ nin Ɲanmiɛn nin be wiengu klolɛ’n, ɔ yo maan asɔnun kpɛnngbɛn’m be nian Ɲanmiɛn i bua fa’n i lika. Be fa be wunmiɛn’n nin be sa nun ninnge mun ɔ nin be blɛ’n be di i sɔ junman’n. (Mat. 22:37-39) Kɛ bé dí junman’n be ijɔman be konviabo sanngɛ be di i be klunklo su.
12. ?Wafa sɛ yɛ akoto Pɔlu niannin aniaan’m be lika ɔ?
12 ?Wafa sɛ yɛ ɔ fata kɛ asɔnun kpɛnngbɛn’m be di be asɔnun sunianfuɛ junman’n niɔn? Ɲanmiɛn i bua fa’n i lika nianlɛ’n nun’n, be sɔnnzɔn akoto Pɔlu mɔ i bɔbɔ’n niannin Zezi liɛ’n su yoli’n. (1 Kor. 11:1) Pɔlu nin i wiengu junman difuɛ’m be kloli be niaan Klistfuɛ nga be o Tɛsaloniki lɔ’n be kpa. I sɔ’n ti’n, ‘nán Nyanmiɛn jasin fɛ’n ngunmin yɛ be fa mannin be ɔ, sanngɛ be fa be bɔbɔ be wun nannannin su.’ I sɔ yolɛ’n yoli be fɛ kpa. Kɛ bé yó sɔ’n kusu’n, be yoli wɛtɛɛfuɛ “kɛ bla ta b’ɔ yɛyɛ i mma mun’n sa.” (1 Tɛs. 2:7, 8) Wafa nga niɛn kun fa klo i mma mun’n, Pɔlu wunnin i wlɛ. Like kwlaa nga bla sɔ’n kwla yo mɛn i mma mun’n, ɔ yo. Sɛ ɔ fata kɛ ɔ jaso kɔnguɛ afiɛn kunndɛ aliɛ man be’n, ɔ jaso.
13. ?Ngue nun yɛ ɔ fata kɛ asɔnun kpɛnngbɛn’m be si ngwlɛlɛ ɔ?
13 Asɔnun sunianfuɛ junman’n i dilɛ’n nin be awlobo’n i lika nianlɛ’n nun’n, maan asɔnun kpɛnngbɛn’m be fa ngwlɛlɛ. (1 Tim. 5:8) Blɛ nga asɔnun kpɛnngbɛn’m be fa nian asɔnun’n i lika’n, ɔ ti blɛ cinnjin kpa mɔ be kwla fa nian be awlobo’n i lika ɔ. Like kun mɔ be kwla yo naan b’a yo ninnge nɲɔn sɔ’m be ngwlɛlɛ su’n, yɛle kɛ maan be yia sran uflɛ mun be awlobofuɛ’m be Ɲanmiɛn sulɛ’n i bo. Masanao m’ɔ ti asɔnun kpɛnngbɛn Zapɔn lɔ’n, ɔ yiali be nga be nin a jaman bla annzɛ bian’n annzɛ awlobo nga siɛ’n timan Zoova i Lalofuɛ’n i awlobofuɛ’m be Ɲanmiɛn sulɛ’n i bo. Ɔ yoli sɔ cɛli kpa. Kɛ lika’n kɔ́ i ɲrun’n, be ng’ɔ ukali be sɔ’n be nun wie’m be kacili asɔnun kpɛnngbɛn. Kpɛkun be niannin Masanao i ajalɛ klanman su.
Nán an yo i kɛ amún wá ɲán like ti, sanngɛ an tu amun klun yo
14, 15. ?Kɛ asɔnun kpɛnngbɛn’m bé nían Ɲanmiɛn i bua fa’n i lika’n, ngue ti yɛ ɔ fata kɛ be nian be wun naan b’a ‘yomɛn i kɛ bé wá nyán like ti’ ɔ? ?I sɔ yolɛ nun’n, wafa sɛ yɛ be kwla fa Pɔlu i ajalɛ’n su ɔ?
14 Piɛli wlali asɔnun kpɛnngbɛn’m be fanngan ekun kɛ, kɛ bé nían Ɲanmiɛn i bua fa’n i lika’n ‘nán be yo i kɛ bé wá nyán like ti, sanngɛ be tu be klun yo.’ Asɔnun kpɛnngbɛn junman’n fa blɛ kpanngban. Sanngɛ be kunndɛman kɛ be man be i ti sika. Piɛli wunnin kɛ ɔ fata kɛ ɔ se i wiengu asɔnun kpɛnngbɛn’m be kɛ be nian be wun, naan kɛ bé nían Ɲanmiɛn i bua fa’n i lika’n, b’a ‘yomɛn i kɛ bé wá nyán like ti.’ I sɔ’n ti aya dan kpa kun. Afin e wun wafa nga asɔnun kpɛnngbɛn nga be o “Babilɔni klɔ dan’n” nun’n be le aɲanbeun ninnge kpanngban’n. Kusu nn yalɛ’n w’a di sran kpanngban’n. (Ngl. 18:2, 3) Andɛ’n, ɔ le like kpa kun mɔ i ti’n ɔ fata kɛ asɔnun kpɛnngbɛn’m be nian be wun i sɔ aeliɛ’n i lika ɔ.
15 Pɔlu kleli asɔnun kpɛnngbɛn’m be ajalɛ kpa kun. Kannzɛ bɔbɔ ɔ ti Zezi i akoto naan ɔ kwla kaci Klistfuɛ nga be o Tɛsaloniki lɔ’n be “ti su trɔ’n,” sanngɛ w’a “di-man sran wie like ngbɛn.” I kpa’n, ɔ ‘dili junman wia nun nin kɔnguɛ, ɔ fɛli.’ (2 Tɛs. 3:8) E blɛ liɛ nga nun’n, asɔnun kpɛnngbɛn kpanngban mɔ wie’m be ti akpasua annzɛ nvle sunianfuɛ’n be kle ajalɛ klanman i sɔ’n nun wie. Kannzɛ bɔbɔ be kplin su kɛ be wiengu Klistfuɛ’m be sɔ be nun’n, sanngɛ be “kaci-man trɔ” sran fi ti su.—1 Tɛs. 2:9.
16. ?Kɛ be se kɛ asɔnun kpɛnngbɛn’m be ‘tu be klun’ be nian Zoova i bua fa’n i lika’n, i bo’n yɛle benin?
16 Asɔnun kpɛnngbɛn’m be ‘tu be klun’ be nian Ɲanmiɛn i bua fa’n i lika. E wun i sɔ liɛ’n be wun nga be klɛn naan b’a uka be’n i nun. Sanngɛ i sɔ’n kleman kɛ be mian aniaan’m be kɛ be su Zoova. Yɛ kusu asɔnun kpɛnngbɛn nga be klo sran’n, be wlawlaman aniaan’m be kɛ be si Ɲanmiɛn i sulɛ’n nun akplowa. (Gal. 5:26) Be wun i wlɛ kɛ ɔ le Ɲanmiɛn sufuɛ kun nin i su sa. Ɔ maan be tu be klun be uka be niaan Klistfuɛ mun naan b’a su Zoova aklunjuɛ nun.
Nán an tin be su, sanngɛ an yo sa ng’ɔ ti kpa’n maan be nian su
17, 18. (a) ?Ngue ti yɛ blɛ wie nun’n, be wun ase kanlɛ’n i su like nga Zezi kleli i akoto mun’n, i wlɛ wunlɛ’n yoli kekle mannin be ɔ? (b) ?Ngue yɛ be su sa sɔ’n kle e ɔ?
17 Kɛ nga e fa wunnin i lɛ’n, nán maan asɔnun kpɛnngbɛn’m be wla fi su le kɛ bua fa nga be niɛn i lika’n ɔ ti Ɲanmiɛn liɛ. Nán be bɔbɔ be liɛ ɔ. I ti’n, maan be nian be wun ‘nán be tin be nga be [Nyanmiɛn] fa be mannin be kɛ be nian be su’n be su.’ (An kanngan 1 Piɛr 5:3 nun.) Blɛ wie nun’n, Zezi i akoto’m be yoli like ng’ɔ timan su’n. Kɛ nga nvle siefuɛ’m be fa yo’n sa’n, be kunndɛli kɛ bé ɲán ɲrun.—An kanngan Mark 10:42-45 nun.
18 Andɛ’n, aniaan nga be ‘klo kɛ bé yó asɔnun sunianfuɛ’n,’ ɔ fata kɛ be bu like nga ti yɛ be waan bé dí i sɔ junman’n i akunndan. (1 Tim. 3:1) Be nga be ti asɔnun kpɛnngbɛn dɔ nga su’n, ɔ fata kɛ be di be wun nanwlɛ. ?Be kunndɛ kɛ bé yó be wun dandan be wiengu’m be su kɛ nga akoto’m be kunndɛli’n sa? Sɛ i sɔ’n sa’n juli akoto’m be su’n, nn ɔ fata kɛ asɔnun kpɛnngbɛn’m be wun i wlɛ kɛ, ɔ ti mɔ be mian be ɲin kpa naan b’a buman mɛn’n nunfuɛ’m be akunndan’n wie. Yɛle kɛ be mian be ɲin naan b’a kloman kɛ bé síe be wiengu.
19. ?Kɛ asɔnun kpɛnngbɛn’m bé fá ajalɛ naan b’a sasa Ɲanmiɛn i bua fa’n, ngue yɛ ɔ fataman kɛ be wla fi su ɔ?
19 I yo, ɔ ju wie’n kɛ asɔnun kpɛnngbɛn’m bé mán afɔtuɛ’n, ɔ fata kɛ be jran su kpa. Kɛ bé sásá Ɲanmiɛn i bua fa’n “gboklo wlɛfuɛ’m” be lika’n, yɛ be kwla yo sɔ ɔ. (Yol. 20:28-30) Pɔlu seli Titi kɛ: “Tu be fɔ, sran ng’ɔ yo sa’n, ijɔ i, maan be si kɛ Nyanmiɛn yɛ ɔ sieli wɔ kɛ a di junman sɔ nin-ɔn.” (Tit 2:15) Sanngɛ sɛ ɔ fata kɛ asɔnun kpɛnngbɛn’m be man sran i afɔtuɛ kɛ ngalɛ’n sa annzɛ be jran su be di ndɛ wie’n, maan be bu be nga be kan ndɛ kle be’n be sran. Be wun i wlɛ kɛ sɛ be yiyi ndɛ’n nun weinwein amanniɛn su’n, ɔ flunman tra kɛ be tutu sran sɔ’n. Afin i sɔ’n wluwlu sran i wun kpɛkun ɔ su i bo maan ɔ fa ajalɛ kpa.
20. ?Wafa sɛ yɛ asɔnun kpɛnngbɛn’m be kwla nian Zezi i liɛ’n su be yo like ng’ɔ ti kpa’n, naan be wiengu Ɲanmiɛn sufuɛ’m b’a nian su wie ɔ?
20 Klist i ajalɛ klanman’n, ɔ uka asɔnun kpɛnngbɛn mun naan b’a klo Ɲanmiɛn i bua fa’n. (Zan 13:12-15) Wafa ng’ɔ kleli i sɔnnzɔnfuɛ’m be jasin fɛ’n i bolɛ’n nin sran’m be ukalɛ’n naan b’a kaci i sɔnnzɔnfuɛ’n, kɛ e kɛnngɛn i su’n ndɛ’n, ɔ luwlu e wun dan. I wun ase kanlɛ’n kɛnnin i sɔnnzɔnfuɛ’m be awlɛn’n, ɔ maan be nantilɛ’n nun’n b’a ‘tuman be wun, sanngɛ be buli sran wie’m be sran trali be bɔbɔ.’ (Fil. 2:3) Andɛ kusu’n, asɔnun kpɛnngbɛn’m be fa Zezi i ajalɛ’n su wie. Ɔ maan be kusu be kunndɛ kɛ ‘bé yó sa ng’ɔ ti kpa’n maan Ɲanmiɛn i sufuɛ’m be nian su yo.’
21. ?Ngue yɛ asɔnun kpɛnngbɛn’m bé ɲɛ́n i be ɲrun lɔ ɔ?
21 Piɛli i afɔtuɛ ng’ɔ mannin asɔnun kpɛnngbɛn mun’n i atabo’n nun’n, ɔ kannin like kpa kun m’ɔ o be ɲrun lɔ’n i ndɛ. (An kanngan 1 Piɛr 5:4 nun.) Asɔnun sunianfuɛ nga be kpali be sieli be ngunmin’n, be nin Klist bé trán ɲanmiɛn su lɔ yɛ ‘dunman nga bé nyɛ́n i’n, ɔ su wie-man mlɔnmlɔn.’ Asɔnun sunianfuɛ nga be o “bua’m be wie” mun be nun’n, bé ɲán cenjele like dan kun. Yɛle kɛ “Bua Tafuɛ Dan’n” i famiɛn dilɛ blɛ nun’n, bé nían Ɲanmiɛn i bua fa’n su asiɛ’n su wa. (Zan 10:16) Wafa nga asɔnun’n nunfuɛ’m be kwla suan be nga be sieli be kɛ be dun be ɲrun mmua’n be bo’n, like suanlɛ ng’ɔ́ bá lɛ’n wá yíyí nun.
I nun flanlɛ
• ?Ngue ti yɛ ɔ yoli kpa kɛ Piɛli wlɛ i wiengu asɔnun kpɛnngbɛn’m be fanngan kɛ be nian Ɲanmiɛn i bua fa ng’ɔ fa mannin be’n i lika ɔ?
• ?Wafa sɛ yɛ asɔnun kpɛnngbɛn’m be kwla nian be nga be nin Ɲanmiɛn be afiɛn’n w’a ti nun’n be lika ɔ?
• ?Ngue yɛ ɔ su asɔnun kpɛnngbɛn’m be bo naan b’a nian Ɲanmiɛn i bua fa ng’ɔ fa mannin be’n i lika ɔ?
[Kosan mun]
[Foto, bue 25]
Kɛ laa bua sunianfuɛ’m be sa’n, andɛ’n ɔ fata kɛ asɔnun kpɛnngbɛn’m be sasa Ɲanmiɛn i “bua” fa’n.