“Pran byen swen troupo Bondye”
“Pran byen swen troupo Bondye”
“Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte.”—1 PYER 5:2.
1. Ki ti sityasyon bann Kretyen ler Pyer ti ekrir son premye let?
EN PE letan avan ki Nero ti konmans persekit bann Kretyen Ronm, zapot Pyer ti ekrir son premye let. I ti oule fortifye son bann konpanyon Kretyen. Dyab ti pe “pas partou,” pe rod bann Kretyen pour li devore. Pour reisi tenir ferm devan li, zot ti bezwen “reste vizilan” e “avek limilite plas zot anba kontrol pisans Bondye.” (1 Pyer 5:6, 8) Zot ti osi bezwen reste ini. Zot pa ti pou kapab “morde e devor kanmarad” si non zot ti ava’n “detri kanmarad.”—Gal. 5:15.
2, 3. Avek lekel nou bezwen lalit e ki nou pou egzaminen dan sa de lartik?
2 Ozordi sityasyon i en pe parey. Dyab i rod loportinite pour devor nou. (Rev. 12:12) Deplis, en gran ladetres “pli terib ki tou sa ki’n deza annan avan, depi konmansman lemonn ziska konmela“ pa lwen. (Mat. 24:21) Zis parey i ti le ka pour bann Kretyen dan premye syek, i pa devret annan dispit parmi nou. Pour ed nou fer sa, parler nou bezwen led bann ansyen kalifye.
3 Annou gete ki mannyer bann ansyen i kapab annan plis lapresyasyon pour sa privilez ki zot in gannyen pour pran byen swen “troupo Bondye ki’n ganny konfye avek zot.” (1 Pyer 5:2) Dan sa lartik, nou pou reflesir lo sa fason apropriye pour desarz sa responsabilite konman berze. Dan lot lartik, nou pou egzaminen ki mannyer kongregasyon i kapab “respekte bann ki travay parmi zot [e] bann ki annan responsabilite pour diriz zot.” (1 Tesa. 5:12) Sa de lartik pou ed nou reziste nou pli gran lennmi ki nou bezwen lalit avek.—Efe. 6:12.
Pran swen avek troupo Bondye
4, 5. Ki mannyer bann ansyen i devret konsider troupo? Donn en legzanp.
4 Pyer ti ankouraz bann ansyen dan kongregasyon Kretyen dan premye syek pour annan menm pwennvi avek Bondye lo sa troupo ki zot ti ganny konfye. (Lir 1 Pyer 5:1, 2.) Menm si i ti ganny konsidere konman en kolonn dan kongregasyon, Pyer pa ti koz avek bann ansyen dan en fason ki abes zot. Plito, i ti ankouraz zot konman bann ansyen ki travay ansanm avek li. (Gal. 2:9) Avek menm leta lespri ki Pyer, Konsey Direkter ozordi pe ankouraz bann ansyen dan kongregasyon pour fer zot mye pour desarz sa gro responsabilite pour pran swen avek troupo Bondye.
5 Zapot Pyer ti ekrir bann ansyen ki zot ti devret ‘pran swen troupo Bondye ki’n ganny konfye avek zot.’ I ti vreman enportan pour zot rekonnet ki sa troupo i pour Zeova ek Zezi Kri. Bann ansyen ti bezwen rann kont lo lafason ki zot ti vey lo bann mouton Bondye. Meton ou bon zanmi i demann ou pour vey son zanfan letan i pa la. Pa ou ti pou vey zot byen e nouri zot? Si enn ti tonm malad, pa ou ti pou fer sir ki i ganny lasistans medikal neseser? Pareyman, bann ansyen i bezwen “pran swen” avek kongregasyon “ki Bondye in gannyen par disan son prop Garson.” (Akt 20:28) Zot mazinen ki sak mouton in ganny aste avek disan presye Kris Zezi. Lefet ki zot santi zot responsab, bann ansyen i nouri, protez e pran swen avek troupo.
6. Ki responsabilite bann berze dan letan lontan ti annan?
6 Zis mazin bann responsabilite ki en berze ti annan dan letan lontan. Zot ti bezwen siport lasaler pandan lazournen ek lafreser aswar pour zot kapab okip zot troupo. (Zen. 31:40) Zot ti menm riske zot lavi pour zot mouton. David ki ti ankor en zenn garson ler i ti berze, ti bezwen lager avek en lyon ek en lours pour protez son troupo. Konsernan zot tou le de, David ti dir: “Mon ti tyonbo son labarb, tap li e touy li.” (1 Sam. 17:34, 35) Pa David ti vreman brav! I ti’n kapab ganny morde avek sa bebet, pa i vre! Me kantmenm sa, i pa ti per pour sov sa mouton.
7. Ki mannyer bann ansyen i kapab sov en mouton ki’n ganny tyonbo par Satan?
7 Ozordi, bann ansyen i bezwen vey bann latak Dyab ki parey en lyon. Sa i kapab enplik demontre kouraz pour sov en mouton ki pe al ganny devore avek Dyab. Dan en sans, i kapab neseser pour zot tyonbo labarb sa bebet sovaz pour sov sa mouton. Petet, zot bezwen rezonn avek en dimoun enpridan ki pe ganny tante pour tonm dan latrap Satan. (Lir Zid 22, 23.) Byensir, bann ansyen i annan led Zeova pour fer sa. Avek tandres, zot okip sa mouton ki’n ganny blese, ler zot bann son blesir e servi Parol Bondye konman en latizann ki kapab ede geri son boubou.
8. Ver kote bann ansyen i gid troupo e ki mannyer zot fer sa?
8 En berze ti osi bezwen gid son troupo kot i ti annan zerb ek delo. Pareyman, bann ansyen i gid troupo ver kongregasyon par ankouraz zot pour asiste renyon regilyerman afen ki zot ganny byen nouri avek “manze kan i ler.” (Mat. 24:45) Parfwa, bann ansyen i bezwen pas plis letan pour ed bann ki malad spirityelman avek douser pour zot aksepte konsey sorti dan Parol Bondye. En mouton egare i kapab pe esey retourn dan troupo. Olye fer li per, avek tandres bann ansyen i eksplik li bann prensip Labib e montre li konman pour met zot an pratik dan son lavi.
9, 10. Ki mannyer bann ansyen i kapab pran swen avek bann dimoun ki malad spirityelman?
9 Ler ou malad, ki kalite dokter ou pli kontan? Enn ki pa ni pran letan pour get ou, ki deswit donn ou latizann pour li okip en lot pasyan? Oubyen ou pli kontan en dokter ki pran letan pour ekout ou, eksplik ou ki ou gannyen e ki tretman i kapab donn ou?
10 Pareyman, bann ansyen i kapab ekout sa dimoun ki malad spirityelman e esey ed li pour geri son boubou par pas “delwil lo li o non” Zeova. (Lir Zak 5:14, 15.) Parey sa latizann sorti Gilead, Parol Bondye i kapab apez douler sa enn malad. (Zer. 8:22; Ezek. 34:16) Bann prensip Labib i kapab ed sa dimoun ki’n elwannyen pour reganny son lekilib spirityel ler i aplik konsey. Vreman, bann ansyen i kapab fer bokou ler zot ekout en mouton malad e priy avek li.
Pa fer li kontreker me avek bonn volonte
11. Kwa ki pous bann ansyen pour pran swen avek troupo avek bonn volonte?
11 Apre sa, Pyer ti fer bann ansyen rapel lafason ki zot devret e pa devret pran swen avek troupo. Ler bann ansyen i okip troupo Bondye, zot bezwen “pa fer li kontre-ker me avek bonn volonte.” Kwa ki pous bann ansyen pour servi zot bann frer ek ser avek bonn volonte? Kwa ki ti motiv Pyer pour pran swen e nouri mouton Zezi? En laspe enportan ti son lanmour ek lafeksyon pour Senyer. (Zan 21:15-17) Akoz sa lanmour, bann ansyen “nepli viv pour zot menm, me pour li ki’n mor e resisite pour zot.” (2 Kor. 5:14, 15) Lanmour pour Bondye, Zezi ek zot bann frer ek ser i pous bann ansyen pour servi troupo par fer bokou zefor, donn zot resours ek letan pour kongregasyon. (Mat. 22:37-39) Zot pa tike pour donnen, zot donn volonterman.
12. Ziska ki degre zapot Pol ti ofer son lekor pour kongregasyon?
12 Ziska ki degre bann ansyen i devret ofer zot lekor pour kongregasyon? Zot imit Pol parey i ti imit Zezi. (1 Kor. 11:1) Avek tandres ek lafeksyon pour son bann frer Tesalonik, Pol ek son bann konpanyon ti kontan pour donn ‘non selman Levanzil Bondye me osi donn menm zot prop lavi.’ Zot ti demontre ladouser zis parey “en manman, ki pran swen son zanfan.” (1 Tesa. 2:7, 8) Pol ti konnen ki mannyer en manman i santi anver son pti baba. I ti pou pare pour fer nenport kwa pour li, menm leve dan milye lannwit pour nouri li.
13. Ki mannyer bann ansyen i devret gard zot lekilib?
13 Bann ansyen i bezwen balans zot responsabilite konman ansyen e sef lafanmir. (1 Tim. 5:8) Letan ki zot donn kongregasyon i en letan presye ki zot pa pe pas avek zot fanmir. En fason pour balans tou le de, i kan zot envit serten pour asiste Ladorasyon an fanmir parler. Pour bokou lannen, Masanao, en ansyen Zapon in envit bann selibater ek bann fanmir ki napa en papa spirityel pour asiste son letid an fanmir. Avek letan, serten ki ti ganny ede in vin ansyen e swiv bon legzanp Masanao.
Pa pran swen troupo pour ganny larzan me fer li avek devouman
14, 15. Akoz bann ansyen i devret veye ki zot pa pe pran swen avek troupo “pour ganny larzan” e ki mannyer zot kapab imit Pol?
14 Pyer ti osi ankouraz bann ansyen pour pran swen avek troupo, pa “pour ganny larzan me avek devouman.” Travay bann ansyen i pran en kantite zot letan, toudmenm zot pa ekspekte okenn peyman an retour. Pyer ti vwar li neseser pour rapel bann ansyen parey li menm lo danze pour pran swen avek troupo “pour ganny larzan.” Sa danze i evidan atraver lavi deliks ki bann sef relizye dan “Gran Babilonn” pe viv, menm si bokou dimoun i oblize viv dan lamizer. (Rev. 18:2, 3) I byen pour bann ansyen ozordi veye ki zot pa devlop sa tandans pour fer parey.
15 Pol ti donn en bon legzanp pour bann ansyen dan kongregasyon. Menm si i ti en zapot e i ti’n kapab vin en “fardo” pour bann Kretyen Tesalonik, i pa ti “manz manze personn san peye.” O kontrer, i ti “travay dir, aswar konman lizour.” (2 Tesa. 3:8) Bann ansyen konmela, ki enkli bann sirveyan rezyonal e distrik i donn en bon legzanp dan sa laspe. Menm si zot aksepte lospitalite zot bann frer ek ser, zot pa met okenn “fardo” lo personn.—1 Tesa. 2:9.
16. Ki savedir pran swen avek troupo avek “devouman”?
16 Bann ansyen i okip kongregasyon avek “devouman.” Sa i evidan atraver bann sakrifis ki zot pare pour fer pour ed kongregasyon. Toudmenm, sa pa vedir ki zot fors kongregasyon pour servi Zeova. Zot pa osi promouvwar leta lespri konpetitif dan kongregasyon. (Gal. 5:26) Bann ansyen i konnen ki sak mouton i diferan. Zot vreman anvi ed zot bann frer ek ser pour servi Zeova avek lazwa.
Pa domin lo troupo, me vin en model pour zot
17, 18. (a) Akoz bann zapot ti vwar li difisil parler pour konpran bann konsey Zezi lo limilite? (b) Dan ki sityasyon parey nou ti kapab ladan?
17 Parey nou’n vwar pli boner, bann ansyen i gard antet ki troupo pa pour zot me i pour Bondye. Zot veye ki zot pa “domin lo bann ki’n ganny konfye dan zot responsabilite.” (Lir 1 Pyer 5:3.) Parler, bann zapot Zezi ti oule annan plis privilez, me move motivasyon. Parey sef bann nasyon, zot ti anvi en o pozisyon.—Lir Mark 10:42-45.
18 Ozordi, bann frer ki pe fer zefor pour kalifye pour vin ansyen dan kongregasyon i byen bezwen egzamin rezon akoz zot anvi fer sa. (1 Tim. 3:1) Bann ki deza ansyen i devret demann zot lekor fransman si zot annan en dezir pour annan en lotorite ouswa o pozisyon parey serten zapot ti annan. Si bann zapot ti vwar li difisil dan sa domenn, alor bann ansyen osi i kapab rekonnet ki zot bezwen travay dir pour evit okenn tandans pour kontan domin lezot.
19. Ki bann ansyen i bezwen rapel ler zot pe pran aksyon pour protez troupo?
19 I vre ki parler bann ansyen i bezwen ferm, par egzanp pour kapab protez troupo avek bann ‘lelou feros.’ (Akt 20:28-30) Pol ti demann Tit pour ‘ansenny e ankouraz avek lotorite.’ (Tit 2:15) Toudmenm, menm ler zot bezwen fer sa, bann ansyen i fer zot mye pour respekte dinyite bann ki ganny konseye. Zot realize ki persyad lezot avek ladouser, plito ki kritik lezot severman, i pli bon pour tous leker e motiv en dimoun pour arive fer sa ki byen.
20. Ki mannyer bann ansyen i kapab donn en bon legzanp parey Zezi?
20 Bon legzanp Kris i motiv bann ansyen pour kontan kongregasyon. (Zan 13:12-15) I vreman tousan ler nou lir lafason ki Zezi ti ansenny son bann disip pour prese e fer disip. Son legzanp limilite ti tous leker son bann disip e motiv zot pour viv “avek limilite” par ‘konsider lezot pli enportan ki zot.’ (Fili. 2:3) Pareyman, bann ansyen i annan sa dezir pour swiv legzanp Zezi e dan sa fason zot vin “en model pour troupo.”
21. Ki mannyer bann ansyen pou ganny rekonpanse?
21 Pour konklir, Pyer ti fer bann ansyen mazin en promes pour lavenir. (Lir 1 Pyer 5:4.) Bann Kretyen swazir ki ansyen pou “resevwar kouronn laglwar ki pa zanmen terni” avek Kris dan lesyel. Anba direksyon Kris “sef Berze,” bann ansyen ki form parti ‘lezot mouton’ pou annan sa privilez pour pran swen avek troupo Bondye lo later. (Zan 10:16) Sa lot lartik pou montre ki mannyer bann frer ek ser dan kongregasyon i kapab siport bann ki pran swen avek kongregasyon.
Revizyon
• Akoz i ti apropriye pour Pyer konsey bann ansyen parey li pour pran swen avek troupo Bondye?
• Ki mannyer bann ansyen i devret pran swen avek bann ki malad spirityelman?
• Kwa ki motiv bann ansyen pour pran swen avek troupo Bondye?
[Kestyon]
[Portre lo paz 25]
Parey bann berze dan letan lontan, bann ansyen ozordi i devret protez bann “mouton” ki zot pran swen avek