“Mì Yìn Lẹngbọpa Jiwheyẹwhe Tọn He Yin Zizedo Alọmẹ Na Mì”
“Mì Yìn Lẹngbọpa Jiwheyẹwhe Tọn He Yin Zizedo Alọmẹ Na Mì”
“Mì yìn lẹngbọpa Jiwheyẹwhe tọn he yin zizedo alọmẹ na mì, e yin po mananọmawà po blo, ṣigba sọn ojlo mẹ wá.”—1 PITA 5:2.
1. Etẹlẹ wẹ Klistiani lẹ to pipehẹ to whenue Pita wlan wekanhlanmẹ etọn tintan?
APỌSTELI Pita wlan wekanhlanmẹ etọn tintan to ojlẹ de mẹ wayi whẹpo Néron do dohomẹkẹn Klistiani lẹ to Lomu. E jlo na hẹn yisenọ hatọ etọn lẹ lodo. Lẹgba “to dindanpe” bo to Klistiani he e na tlẹndu lẹ dín. Eyin yé na nọavùnte sọta ẹ, yé dona “gbọṣi lẹnpọn dagbenọ-yinyin mẹ” bo ‘whiwhẹ yede to alọ hlọnhlọnnọ Jiwheyẹwhe tọn glọ.’ (1 Pita 5:6, 8) Yé sọ dona hẹn pọninọ go. Yé ma dona ‘to adúhẹn bosọ to ode awetọ yetọn tlẹndu,’ na yé ‘nikaa hù ode awetọ yetọn sudo.’—Gal. 5:15.
2, 3. Mẹnu wẹ mí dona to ahidi hẹ, podọ etẹwẹ mí na gbadopọnna to hosọ debọdo-dego ehelẹ mẹ?
2 Mí nọ pehẹ ninọmẹ dopolọ to egbehe. Lẹgba to dotẹnmẹ hundote lẹ dín nado tlẹ́n mí dù. (Osọ. 12:12) Podọ to sọgodo he tin to yakẹ de mẹ, “nukunbibia daho de na tin ehe nkọ ma ko jọ pọ́n sọn bẹjẹeji aihọn tọn gbọ́n.” (Mat. 24:21) Kẹdẹdile Klistiani owhe kanweko tintan tọn lẹ dona họ́ yede sọta wiwọ́ to yede ṣẹnṣẹn do, mọ wẹ mílọsu dona wà. Nado wà ehe, mí nọ tindo nuhudo alọgọ tọn sọn sunnu mẹho he pegan lẹ dè to whedelẹnu.
3 Mì gbọ mí ni gbadopọnna lehe mẹho lẹ sọgan do pinpẹn-nutọn-yinyọnẹn yetọn hia na lẹblanulọkẹyi lọ nado yìn ‘lẹngbọpa Jiwheyẹwhe tọn he yin zizedo alọmẹ na yé’ dogọ do. (1 Pita 5:2) Enẹgodo, mí na dọhodo aliho dagbe he mẹ azọ́n lẹngbọhọtọ tọn lọ sọgan yin hinhẹndi te ji. To hosọ he bọdego mẹ, mí na gbadopọnna lehe agun lọ sọgan ‘nọ na sisi mẹhe to azọ́n sinsinyẹn wà bo to nukunpedo’ lẹngbọpa lọ go lẹ do. (1 Tẹs. 5:12) Dogbigbapọnna whẹho ehelẹ na gọalọna mí nado nọavùnte sọta Kẹntọgán mítọn, na mí yọnẹn dọ ewọ wẹ mí to ahidi hẹ.—Efe. 6:12.
Mì Yìn Lẹngbọpa Jiwheyẹwhe Tọn
4, 5. Pọndohlan tẹwẹ sunnu mẹho lẹ dona tindo gando lẹngbọpa lọ go? Na apajlẹ.
4 Pita na tuli sunnu mẹho Klistiani owhe kanweko tintan tọn lẹ nado tindo pọndohlan Jiwheyẹwhe tọn gando lẹngbọpa he yin zizedo alọmẹ na yé lọ go. (Hia 1 Pita 5:1, 2.) Dile etlẹ yindọ Pita nọ yin pinpọnhlan di dòtin de to agun lọ mẹ, e ma de mẹho lẹ pò to hodidọ etọn mẹ. Kakatimọ, e dotuhomẹna yé taidi mẹho hatọ lẹ. (Gal. 2:9) Taidi Pita, Hagbẹ Anademẹtọ lọ nọ na tuli mẹho agun tọn lẹ nado dovivẹnu bo hẹn azọngban sinsinyẹn yetọn nado yìn lẹngbọpa Jiwheyẹwhe tọn di.
5 Apọsteli lọ wlan dọ sunnu mẹho lẹ dona ‘yìn lẹngbọpa Jiwheyẹwhe tọn he yin zizedo alọmẹ na yé.’ Nujọnu wẹ e yin na yé nado yọnẹn dọ Jehovah po Jesu Klisti po tọn wẹ lẹngbọpa lọ yin. Mẹho lẹ na dogbè lehe yé basi hihọ́na lẹngbọ Jiwheyẹwhe tọn lẹ do tọn. Mí ni dọ dọ họntọn towe vivẹ́ de biọ to asi we nado penukundo ovi etọn lẹ go to whenue e ma to whégbè. Be hiẹ ma na penukundo yé go ganji bo na núdùdù yé ya? Eyin dopo to ovi lọ lẹ mẹ jẹazọ̀n, be hiẹ ma na hẹn ẹn diun dọ e mọ nukunpedomẹgo dotowhé tọn he sọgbe yí ya? Mọdopolọ, mẹho agun tọn lẹ dona “nọ yìn agun Jiwheyẹwhe tọn, ehe e yí ohùn Visunnu etọn titi tọn do họ̀.” (Owalọ 20:28) Yé nọ hẹn do ayiha mẹ dọ lẹngbọ dopodopo yin hihọ̀ po ohùn họakuẹ Klisti Jesu tọn po. Na yé na dogbè wutu, mẹho lẹ nọ na núdùdù, basi hihọ́na, bo nọ penukundo lẹngbọpa lọ go.
6. Azọngban tẹwẹ lẹngbọhọtọ hohowhenu tọn lẹ tindo?
6 Yí nukun homẹ tọn do pọ́n azọngban lẹngbọhọtọ paa lẹ tọn to ojlẹ Biblu tọn mẹ. Yé dona doakọnna yozò to okle podọ fifá to ozán mẹ nado sọgan penukundo lẹngbọ lẹ go. (Gẹn. 31:40) Yé tlẹ nọ ze ogbẹ̀ yetọn do owù mẹ na lẹngbọ lẹ. Davidi he yin lẹngbọhọtọ jọja de basi hihọ́na lẹngbọpa etọn sọn gbekanlin lẹ si, etlẹ yin kinnikinni po beali po. Davidi dọ gando dopodopo yetọn go dọ emi “wle e gbọn ogbì etọn dali, bo hò e, bosọ hù i.” (1 Sam. 17:34, 35) Adọgbigbo nankọ die! Lehe e na ko sẹpọ onù gbekanlin lọ tọn do sọ! Etomọṣo, e wà nuhe go e pé lẹpo nado whlẹn lẹngbọ lọ.
7. Nawẹ mẹho lẹ sọgan gbì lẹngbọ lẹ yí sọn onù Satani tọn mẹ to yẹhiadonu-liho gbọn?
7 To egbehe, mẹho agun tọn lẹ dona nọavùnte sọta mẹgbeyinyan kinnikinni tọn nkọ Lẹgba tọn. Ehe sọgan bẹ adọgbigbo yíyí do gbì lẹngbọ lẹ sọn onù Lẹgba tọn mẹ to yẹhiadonu-liho hẹn. To linlẹn de mẹ, mẹho agun tọn lẹ sọgan whlẹn lẹngbọ lẹ gbọn ogbì gbekanlin lọ tọn wiwle dali. Yé sọgan yihojlẹdohogo hẹ mẹmẹsunnu he ma tindo numimọ bo yin whiwhlepọn gbọn omọ̀ Satani tọn dali lẹ. (Hia Juda 22, 23.) Na nugbo tọn, mẹho lẹ ma sọgan wà ehe matin alọgọ Jehovah tọn. Yé nọ yí sọwhiwhe do penukundo lẹngbọ he gbleawu de go gbọn Ohó Jiwheyẹwhe tọn yíyí do blá apà na ẹn dali.
8. Fie wẹ mẹho lẹ nọ deanana lẹngbọpa lọ hlan, podọ gbọnna?
8 Lẹngbọhọtọ paa de sọ nọ deanana lẹngbọpa lọ yì fihe ogbé dagbe po osin po tin te. Mọdopolọ, mẹho lẹ nọ deanana lẹngbọpa lọ hlan agun lọ mẹ, gbọn tulinina yé nado nọ yì opli lẹ to gbesisọ mẹ dali na lẹngbọpa lọ nido sọgan dùnú ganji bo mọ “núdùdù yetọn [yí] to ojlẹ sisọ mẹ.” (Mat. 24:45) E sọgan biọ dọ mẹho lẹ ni yí whenu susu zan nado gọalọna mẹhe to azọ̀n jẹ to gbigbọ-liho lẹ na yé nido kẹalọyi núdùdù sọn Ohó Jiwheyẹwhe tọn mẹ. Lẹngbọ he danbú de sọgan to vivẹnudo nado lẹkọwa lẹngbọpa lọ mẹ. Kakati nado hẹn homẹgble mẹmẹsunnu yetọn, mẹho lẹ nọ yí sọwhiwhe do basi zẹẹmẹ nunọwhinnusẹ́n Owe-wiwe tọn lẹ tọn bo nọ do lehe ewọ sọgan yí yé zan to gbẹzan etọn mẹ do hia ẹ.
9, 10. Nawẹ mẹho lẹ dona penukundo mẹhe to azọ̀njẹ to gbigbọ-liho lẹ go gbọn?
9 Eyin a to azọ̀njẹ, doto nankọ wẹ a na jlo dọ ni penukundo gowe? Be doto he na yí whenu vude do dotoaina we bo yawu kàn amasin lẹ nado sọgan yí awutunọ devo wẹ ya? Kavi doto he na dotoaina we ganji, basi zẹẹmẹ nuhe sọgan to wiwà we tọn, bo dọ aliho nukunpedomẹgo tọn voovo he tin-to-aimẹ lẹ na we?
10 To aliho dopolọ mẹ, mẹho lẹ sọgan dotoaina mẹhe to azọ̀njẹ to gbigbọ-liho lọ bo gọalọ nado hù apà lọ gbọn “amisisa na ẹn to oyín Jehovah tọn mẹ” to yẹhiadonu-liho dali. (Hia Jakọbu 5:14, 15.) Taidi nusisá he wá sọn Giliadi, Ohó Jiwheyẹwhe tọn sọgan hẹnazọ̀ngbọna awutunọ lọ. (Jel. 8:22; Ezek. 34:16) Eyin madogánnọ lọ yí nunọwhinnusẹ́n Biblu tọn lẹ do yizan mẹ, ewọ sọgan lodo to gbigbọ-liho whladopo dogọ. Mọwẹ, mẹho lẹ nọ wà dagbe taun to whenue yé dotoaina ahunmẹdunamẹnu lẹngbọ he to azọ̀njẹ lọ tọn bo hodẹ̀ hẹ ẹ.
E Yin po Mananọmawà po Blo Ṣigba sọn Ojlo mẹ Wá
11. Etẹwẹ nọ whàn mẹho lẹ nado yìn lẹngbọpa Jiwheyẹwhe tọn sọn ojlo mẹ wá?
11 Enẹgodo, Pita flin sunnu mẹho lẹ lehe azọ́n lẹngbọhọtọ tọn dona yin wiwà podọ ma dona yin wiwà do. Mẹho lẹ dona yìn lẹngbọpa Jiwheyẹwhe tọn lọ, ‘e ma yin po mananọmawà po, ṣigba sọn ojlo mẹ wá.’ Etẹwẹ nọ whàn mẹho lẹ nado wadevizọn na mẹmẹsunnu yetọn lẹ sọn ojlo mẹ wá? Tintan whẹ́, etẹwẹ whàn Pita nado yìn lẹngbọ Jesu tọn lẹ bo na núdùdù yé? Owanyi sisosiso he e tindo na Oklunọ lọ wẹ. (Joh. 21:15-17) Owanyi nọ hẹn mẹho lẹ “ma nado nọgbẹ̀ na yede ba, ṣigba na omẹ lọ he kú na yé.” (2 Kọl. 5:14, 15) Owanyi ehe, to pọmẹ hẹ owanyi he mẹho lẹ tindo na Jiwheyẹwhe po mẹmẹsunnu yetọn lẹ po, wẹ nọ whàn yé nado wadevizọn na lẹngbọpa lọ, bo nọ ze yede, nutindo, po whenu yetọn po jo nado wàmọ. (Mat. 22:37-39) Yé nọ ze yede jo, e ma yin po mananọmawà po gba, ṣigba sọn ojlo mẹ wá.
12. Obá tẹ mẹ wẹ apọsteli Paulu ze ede jo jẹ?
12 Obá tẹ mẹ wẹ mẹho lẹ dona ze yede jo jẹ? To nukunpipedo lẹngbọ lẹ go mẹ, yé nọ hodo apajlẹ apọsteli Paulu tọn, yèdọ dile ewọ hodo Jesu tọn do. (1 Kọl. 11:1) Na Paulu po gbẹdohẹmẹtọ etọn lẹ po tindo owanyi sisosiso na mẹmẹsunnu Tẹsalonika tọn lẹ wutu, homẹ yetọn hùn tlala nado na yé ‘e ma yin wẹndagbe Jiwheyẹwhe tọn kẹdẹ gba, ṣigba alindọn yetọn titi lẹ.’ To whenue yé to mọwà, yé wà dẹẹdẹ, “taidi lehe onọ̀ he tindo ovi to anọ́nù nọ wleyẹyina ovi etọn titi lẹ do.” (1 Tẹs. 2:7, 8) Paulu yọ́n numọtolanmẹ he onọ̀ he tindo ovi to anọ́nù de nọ tindo na ovi etọn lẹ. E sọgan wà nudepope na yé, etlẹ yin nado fọ́n to zánhomẹ bo na núdùdù yé.
13. Jlẹkajininọ tẹ go wẹ mẹho lẹ dona hẹn?
13 Mẹho lẹ dona tin to aṣeji nado hẹn jlẹkajininọ go to azọngban lẹngbọhọtọ tọn po azọngban whẹndo tọn yetọn lẹ po ṣẹnṣẹn. (1 Tim. 5:8) Whenu he mẹho lẹ nọ yizan hẹ agun lọ yin whenu họakuẹ he yé sọgan yizan hẹ whẹndo yetọn. Aliho dopo he mẹ yé sọgan yin jlẹkajinọ te to azọngban awe lọ lẹ ṣẹnṣẹn wẹ oylọ-bibasina mẹdevo lẹ wá sinsẹ̀n-bibasi whẹndo tọn yetọn to whedelẹnu. Na owhe susu lẹ, Masanao, he yin mẹho de to Japon, nọ basi oylọna tlẹnnọ lẹ po whẹndo he otọ́ yetọn ma to agun mẹ lẹ po nado wá oplọn whẹndo tọn etọn tẹnmẹ. Dile ojlẹ to yìyì, mẹhe mọ alọgọ yí delẹ lẹzun mẹho agun tọn bo hodo apajlẹ dagbe Masanao tọn.
Mì Dapana Ale Mawadodo Tọn—Mì Yìn Lẹngbọpa lọ po Jejejininọ Po
14, 15. Naegbọn mẹho lẹ dona họ́ yede sọta “owanyi na ale mawadodo tọn,” podọ nawẹ yé sọgan hodo apajlẹ Paulu tọn to whẹho ehe mẹ gbọn?
14 Pita sọ na tuli mẹho lẹ nado nọ yìn lẹngbọpa lọ, ‘e ma yin po owanyi na ale mawadodo tọn po, ṣigba po jejejininọ po.’ Azọ́n he mẹho lẹ nọ wà nọ yí whenu susu to yé si, etomọṣo yé ma nọ donukun dọ yè ni sú akuẹ etọn yé gba. Pita mọdọ e jẹ nado na avase sunnu mẹho hatọ etọn lẹ gando owù lọ nado yí “owanyi na ale mawadodo tọn” do yìn lẹngbọpa lọ go. Owù ehe nọ sọawuhia to gbẹzan fẹẹmẹninọ tọn he nukọntọ sinsẹ̀n “Babilọni Daho lọ” tọn lẹ nọ zan to whenue mẹsusu tin to dandannu glọ nado zan gbẹzan ohẹ́n tọn mẹ. (Osọ. 18:2, 3) To egbehe, mẹho lẹ tindo whẹwhinwhẹ́n dagbe nado nọ họ́ yede sọta mẹwhinwhàn mọnkọtọn depope.
15 Paulu ze apajlẹ dagbe dai na mẹho agun tọn lẹ. Dile etlẹ yindọ ewọ yin apọsteli de bo sọgan ko “doagban pinpẹn” na Klistiani he tin to Tẹsalonika lẹ, e ma “dùnú sọn mẹdepope dè vọnu.” Kakatimọ, e nọ yí “tuklajijẹ po magbọjẹ po [do wazọ́n] to ozán po okle po.” (2 Tẹs. 3:8) Susu to mẹho egbehe tọn lẹ mẹ, gọna nugopọntọ tomẹyitọ lẹ, nọ ze apajlẹ dagbe dai to whẹho ehe mẹ. Dile etlẹ yindọ yé nọ kẹalọyi johẹmẹ yisenọ hatọ yetọn lẹ tọn, yé ma nọ “doagban pinpẹn” na mẹdepope.—1 Tẹs. 2:9.
16. Etẹwẹ e zẹẹmẹdo nado yìn lẹngbọpa lọ “po jejejininọ po”?
16 Mẹho lẹ nọ yìn lẹngbọpa lọ “po jejejininọ po.” Jejejininọ yetọn nọ sọawuhia to gbigbọ mẹde-yido-sanvọ́ tọn he yé do nọ gọalọna lẹngbọpa lọ mẹ. Ṣigba, enẹ ma zẹẹmẹdo dọ yé nọ hẹn lẹngbọpa lọ gánnugánnu nado sẹ̀n Jehovah gba; mọjanwẹ mẹho owanyinọ lẹ ma nọ na tuli mẹdevo lẹ nado sẹ̀n Jiwheyẹwhe po gbigbọ agbàwhinwhlẹn tọn po do. (Gal. 5:26) Mẹho lẹ yọnẹn dọ lẹngbọ lẹ gbọnvo na yede. Yé nọ to jejeji nado gọalọna mẹmẹsunnu yetọn lẹ na yé nido sẹ̀n Jehovah po ayajẹ po.
Mì Duklunọ Do Lẹngbọpa lọ Ji Blo Ṣigba Mì Yin Apajlẹ Na Ẹn
17, 18. (a) Naegbọn e do vẹawuna apọsteli lẹ to ojlẹ delẹ mẹ nado mọnukunnujẹ nuplọnmẹ Jesu tọn gando whiwhẹ go mẹ? (b) Ninọmẹ dopolọ tẹwẹ mí sọgan pehẹ?
17 Dile mí ko dọ do wayi, mẹho lẹ dona hẹn do ayiha mẹ dọ Jiwheyẹwhe tọn wẹ lẹngbọpa he yé to yìnyìn lọ, e ma yin yetọn gba. Yé nọ tin to aṣeji ma “nado duklunọ do mẹhe yin ogú Jiwheyẹwhe tọn lẹ ji.” (Hia 1 Pita 5:3.) To ojlẹ delẹ mẹ, apọsteli Jesu tọn lẹ tindo mẹwhinwhàn agọ̀. Yé jlo na diyin taidi mẹhe to gandu do aihọn ji lẹ.—Hia Malku 10:42-45.
18 To egbehe, mẹmẹsunnu he to “vivẹnudo na azọ́ntẹn nugopọntọ tọn” lẹ na wà dagbe nado gbadopọnna yede nado yọ́n nuhewutu yé to vivẹnudo. (1 Tim. 3:1) Mẹho lẹ sọgan yí ahundopo do kanse yede eyin ojlo yetọn wẹ nado nọ paṣẹ kavi diyin dile apọsteli delẹ jlo do. Eyin apọsteli lẹ tindo nuhahun to whẹho ehe mẹ, be mẹho lẹ dona yọnẹn dọ yé dona wazọ́n sinsinyẹn nado dapana ayilinlẹn aihọn tọn depope he na hẹn yé nado paṣẹ do mẹdevo lẹ ji.
19. Etẹwẹ mẹho lẹ dona hẹn do ayiha mẹ to whenue yé to afọdide ze nado basi hihọ́na lẹngbọpa lọ?
19 Na nugbo tọn, mẹho lẹ dona yin nujikudonọ to ojlẹ delẹ mẹ, taidi to whenue yé to hihọ́-basina lẹngbọpa lọ sọn “ohla kanylantọ lẹ” si. (Owalọ 20:28-30) Paulu dọna Titu nado nọ to “tudohomẹnamẹ bosọ nọ yí aṣẹpipa . . . do nọ wọhẹmẹ.” (Titu 2:15) Etomọṣo, eyin etlẹ biọ dọ mẹho lẹ ni ze afọdide mọnkọtọn, yé nọ tẹnpọn nado yinuwa hẹ mẹhe go e gando lẹ po sisi po. Yé yọnẹn dọ kakati nado mọhodọdomẹgo, linlẹndiọnamẹ to aliho he jọmẹ mẹ nọ tindo kọdetọn dagbe nado jẹ ahun gbẹtọ tọn mẹ bo nọ whànmẹ nado gbọn aliho he sọgbe lọ.
20. Nawẹ mẹho lẹ sọgan hodo afọdòmẹ Jesu tọn to apajlẹ dagbe zizedai mẹ gbọn?
20 Apajlẹ dagbe Klisti tọn nọ whàn mẹho lẹ nado yiwanna lẹngbọpa lọ. (Joh. 13:12-15) Mí nọ yin whinwhàn eyin mí hia lehe e plọnnu devi etọn lẹ to azọ́n yẹwhehodidọ po mẹhẹnzun devi po tọn mẹ do. Whiwhẹ etọn yinuwado ahun devi etọn lẹ tọn ji, bo whàn yé nado ‘gbọn mẹdezewhè dali do pọ́n mẹdevo lẹ dọ yé yiaga hú yé.’ (Flp. 2:3) Mọdopolọ to egbehe, mẹho lẹ nọ yin whinwhàn nado hodo apajlẹ Jesu tọn, podọ yelọsu nọ tẹnpọn nado yin “apajlẹ na lẹngbọpa lọ.”
21. Ahọsumẹ tẹwẹ mẹho lẹ sọgan donukun?
21 Pita dotana tudohomẹnamẹ etọn hlan sunnu mẹho lẹ gbọn alọdindlẹndo opagbe sọgodo tọn de dali. (Hia 1 Pita 5:4.) Nugopọntọ he yin mẹyiamisisadode lẹ “na mọ jẹgbakun gigo tọn he ma nọ kupẹ́ lọ yí” hẹ Klisti to olọn mẹ. Lẹngbọhọtọ pẹvi he tin to “lẹngbọ devo lẹ” mẹ lẹ na tindo lẹblanulọkẹyi nado yìn lẹngbọpa Jiwheyẹwhe tọn to aigba ji to aṣẹpipa “ogán lẹngbọhọtọ tọn lọ” tọn glọ. (Joh 10:16) Hosọ he bọdego na dọhodo lehe hagbẹ agun tọn lẹ sọgan nọgodona mẹhe yin dide nado yin nukọntọ lẹ do ji.
Dogbapọn
• Naegbọn e do sọgbe dọ Pita ni dotuhomẹna mẹho hatọ etọn lẹ nado yìn lẹngbọpa Jiwheyẹwhe tọn he yin zizedo alọmẹ na yé?
• Nawẹ mẹho lẹ dona penukundo mẹhe to azọ̀njẹ to gbigbọ-liho lẹ go gbọn?
• Etẹwẹ nọ whàn mẹho lẹ nado yìn lẹngbọpa Jiwheyẹwhe tọn he yin zizedo alọmẹ na yé?
[Kanbiọ Oplọn tọn lẹ]
[Yẹdide to weda 21]
Taidi lẹngbọhọtọ hohowhenu tọn lẹ, mẹho lẹ dona basi hihọ́na “lẹngbọ” he yin zizedo alọmẹ na yé lẹ