“Ipastoranyo ti Arban ti Dios nga Adda iti Aywanyo”

“Ipastoranyo ti arban ti Dios nga adda iti aywanyo, saan a mapilpilit, no di ket situtulok.”​—1 PED. 5:2.

1. Ania ti mapaspasaran dagiti Kristiano idi inlanad ni Pedro ti umuna a suratna?

 INLANAD ni apostol Pedro ti umuna a suratna sakbay nga inrugi ni Nero ti panangidadanesna kadagiti Kristiano idiay Roma. Kayatna a pabilgen dagiti kapammatianna. “Agsursursor” ti Diablo nga agsapsapul kadagiti Kristiano nga alun-onenna. Tapno masarangetda ti Diablo, masapul nga ‘agtalinaedda a sipupuot’ ken ‘agpakumbabada iti sidong ti mannakabalin nga ima ti Dios.’ (1 Ped. 5:6, 8) Masapul met nga agkaykaysada. Napeggad no ‘agkikinnagat ken agiinnalun-onda’ ta mabalin nga agbanag dayta iti ‘panagtitinnalipuposda.’​—Gal. 5:15.

2, 3. Asino ti rumbeng a pakidangadangantayo, ken ania dagiti usigentayo kadagitoy agsaruno nga artikulo?

² Kasta met ti kasasaadtayo ita. Agsapsapul ti Diablo iti gundaway a mangalun-on kadatayo. (Apoc. 12:12) Ken mapaspasungadantayo ti “dakkel a rigat a dayta ket saan pay a napasamak nanipud idi pangrugian ti lubong.” (Mat. 24:21) Kas kadagiti Kristiano idi umuna a siglo, masapul met a ditay agaapa. Tapno maaramidantayo dayta, kasapulantayo no dadduma ti tulong dagiti kualipikado a panglakayen.

³ Usigentayo no kasano nga ad-adda a maipateg dagiti panglakayen ti pribilehioda a mangipastor iti ‘arban ti Dios nga adda iti aywanda.’ (1 Ped. 5:2) Kalpasanna, usigentayo ti umiso a pamay-an ti panagipastor. Maadaltayo met iti sumaganad nga artikulo no kasano a maaddaan ti kongregasion iti ‘panagraem kadagidiay agtartrabaho a sipipinget ken mangidadaulo’ iti arban. (1 Tes. 5:12) Dagitoy ti tumulong kadatayo a mangsaranget iti kangrunaan a Kabusor, ti rumbeng a pakidangadangantayo.​—Efe. 6:12.

Ipastoranyo ti Arban ti Dios

4, 5. Ania ti rumbeng a panangmatmat dagiti panglakayen iti arban? Iyilustraryo.

⁴ Pinaregta ni Pedro dagiti panglakayen idi umuna a siglo a tuladenda ti panangmatmat ti Dios iti arban a naitalek kadakuada. (Basaen ti 1 Pedro 5:1, 2.) Nupay maibilang ni Pedro a sadiri ti kongregasion, saanna a tinagibassit dagiti panglakayen. Imbes ketdi, pinabilegna ida kas padana a papanglakayen. (Gal. 2:9) Kas ken Pedro, ti Bagi a Manarawidwid parparegtaenna ita dagiti panglakayen iti kongregasion nga ikagumaanda nga itungpal ti nadagsen a responsabilidadda a mangipastor iti arban ti Dios.

⁵ Insurat ti apostol a dagiti panglakayen ‘ipastoranda ti arban ti Dios nga adda iti aywanda.’ Nagpateg a bigbigenda a ti arban ket kukua ni Jehova ken ni Jesu-Kristo. Dagiti panglakayen manungsungbatda iti pamay-an a panangaywanda kadagiti karnero ti Dios. Kas pagarigan, kiniddaw ti nasinged a gayyemmo nga aywanam dagiti annakna bayat ti kaawanna. Dimo kadi aywanan a naimbag ken pakanen ida? No adda agsakit kadakuada dimo kadi agasan wenno ipaagas? Umasping iti dayta, dagiti panglakayen ‘ipastoranda ti kongregasion ti Dios, a ginatangna babaen ti dara ti bukodna nga Anak.’ (Ara. 20:28) Laglagipenda a nagatang ti tunggal karnero babaen ti napateg a dara ni Kristo Jesus. Gapu ta manungsungbat dagiti panglakayen, taraonan, salakniban, ken aywananda ti arban.

6. Ania ti responsabilidad dagiti nagkauna a pastor?

 ⁶ Usigentayo ti responsabilidad dagiti literal a pastor idi tiempo ti Biblia. Masapul nga anusanda ti pudot ti init ken lamiis ti rabii tapno maaywananda ti arban. (Gen. 31:40) Irisgoda pay ti biagda para kadagiti karnero. Ti ubing a pastor a ni David sinalaknibanna ti arban manipud kadagiti atap nga animal, kas iti leon ken oso. Maipapan iti tunggal animal, kinuna ni David a ‘ginammatanna ti barbas ti animal, kinabilna ket pinapatayna.’ (1 Sam. 17:34, 35) Anian a kinaturedna! Dandanin sakmalen ti atap nga animal! Kaskasdi, saan a nagbuteng a nangispal iti karnero.

7. Kasano a dagiti panglakayen ispalenda dagiti karnero manipud iti arigna panangsakmal ni Satanas?

⁷ Dagiti panglakayen ita masapul met a naridamda iti arig leon nga iraraut ti Diablo. Agkalikagum dayta iti kinatured tapno maispal ti karnero manipud iti panangsakmal ti Diablo. Babaen ti arigna pananggammatda iti barbas ti atap nga animal, maispal dagiti panglakayen ti karnero. Mabalin a balakadanda dagiti di naannad a kakabsat a masulsulisog kadagiti silo ni Satanas. (Basaen ti Judas 22, 23.) Siempre, saan a maaramidan dayta dagiti panglakayen no awan ti tulong ni Jehova. Sidudungngo nga asikasuenda ti nadangran a karnero, bedbedanda, ken sapsapuanda iti makapabang-ar a Sao ti Dios.

8. Sadino ti pangiturongan dagiti panglakayen iti arban, ken kasano?

⁸ Ti literal a pastor iturongna met ti arban iti maitutop a disso a pagaraban ken paginuman. Umasping iti dayta, dagiti panglakayen iturongda ti arban iti kongregasion, a paregtaenda ida a regular a makigimong tapno mataraonanda a naimbag ken umawatda iti ‘taraon iti umiso a tiempo.’ (Mat. 24:45) Mabalin a mangbusbos dagiti panglakayen iti kanayonan nga oras a mangtulong kadagidiay masakit iti naespirituan tapno mataraonanda manipud iti Sao ti Dios. Ti nayaw-awan a karnero mabalin nga ikagkagumaanna ti agsubli iti arban. Imbes nga ungtanda ti kabsatda, sidudungngo nga ilawlawagda dagiti prinsipio iti Biblia ken ipakitada no kasanona nga iyaplikar dagita.

9, 10. Kasano ti rumbeng a panangaywan dagiti panglakayen iti maysa a masakit iti naespirituan?

 ⁹ No agsakitka, ania a doktor ti piliem? Daydiay kadi agap-apura sa resetaannaka a dagus tapno isarunonan ti sabali a pasiente? Wenno daydiay umimdeng a naimbag, ilawlawagna ti sakitmo, ken ibagana no kasanoka a maagasan?

¹⁰ Umasping iti dayta, imdengan dagiti panglakayen ti maysa a masakit iti naespirituan ken tulonganda nga umimbag babaen ti ‘panangsapsapoda iti lana iti nagan ni Jehova.’ (Basaen ti Santiago 5:14, 15.) Kas iti balsamo iti Galaad, makapabang-ar ti Sao ti Dios iti maysa a masakit. (Jer. 8:22; Ezeq. 34:16) Ti panangyaplikar kadagiti prinsipio ti Biblia tulonganna ti nakapuy a bumileg manen iti naespirituan. Wen, dakkel ti maitulong dagiti panglakayen no denggenda dagiti pakaseknan ti masakit a karnero ken makipagkararagda kenkuana.

Situtulok, Saan a Mapilpilit

11. Ania ti mangtignay kadagiti panglakayen a situtulok a mangipastor iti arban ti Dios?

¹¹ Impalagip pay ni Pedro kadagiti panglakayen no kasano ti rumbeng ken saan a rumbeng a panangipastor. “Saan a mapilpilit, no di ket situtulok” nga ipastoran dagiti panglakayen ti arban ti Dios. Ania ti mangtignay kadagiti panglakayen a situtulok nga agserbi kadagiti kakabsatda? Bueno, ania ti nangtignay ken Pedro a mangipastor ken mangtaraon kadagiti karnero ni Jesus? Ti panagayat ken panangipategna iti Apo. (Juan 21:15-17) Gapu iti ayat, dagiti panglakayen ‘saandan nga agbiag agpaay iti bagbagida, no di ket agpaay kenkuana a natay maipaay kadakuada.’ (2 Cor. 5:14, 15) Dayta nga ayat agraman ti panagayatda iti Dios ken kadagiti kakabsatda ti mangtignay kadagiti panglakayen nga agserbi iti arban, nga usarenda ti pigsa, sanikua, ken tiempoda. (Mat. 22:37-39) Agserbida a situtulok saan ket a mapilpilit.

12. Kasano kadakkel ti panagsakripisio ni apostol Pablo?

¹² Kasano kadakkel ti panagsakripisio dagiti panglakayen? Iti panangaywanda iti arban, tuladenda ni apostol Pablo, a nangtulad met ken Jesus. (1 Cor. 11:1) Ni Pablo ken dagiti kakaduana ipatpategda dagiti kakabsat a taga-Tesalonica isu a naragsakanda a nangiburay agpadpada iti ‘naimbag a damag ti Dios ken iti bukodda a kararua.’ Siaalumamay nga inaramidda dayta ‘kas iti panangtaripato ti agtagtagibi nga ina iti annakna.’ (1 Tes. 2:7, 8) Ammo ni Pablo no kasano ti panangipateg ti agtagtagibi nga ina iti maladagana. Aramidenna ti amin, nga uray la bumangon iti tengnga ti rabii tapno pasusuenna ti anakna.

13. Ania a responsabilidad ti masapul a taginayonen dagiti panglakayen a balansien?

¹³ Masapul nga agannad dagiti panglakayen tapno mabalanseda ti responsabilidadda nga agipastor ken ti obligasionda iti pamiliada. (1 Tim. 5:8) Ti tiempo a busbusbosenda iti kongregasion ket nagpateg a tiempo para iti pamiliada. Ti maysa a pamay-an tapno mabalanseda ti dua a responsabilidadda ket ti sagpaminsan a panangawisda iti sabsabali a tumabuno iti Panagdaydayaw ti Pamiliada. Iti naglabas a tawtawen, ni Masanao a panglakayen idiay Japan, aw-awisenna a makikadua iti panagadal ti pamiliada dagiti awanan assawa ken dagiti pamilia a saan a manamati ti ammada. Idi agangay, dadduma kadakuada ti nagbalin a panglakayen ken tinuladda ti nagsayaat nga ulidan ni Masanao.

Liklikanyo ti Nakusit a Gunggona​—Sigagagar nga Ipastoranyo ti Arban

14, 15. Apay a rumbeng nga agannad dagiti panglakayen iti “panagayat iti nakusit a gunggona,” ken kasanoda a matulad ni Pablo iti daytoy a banag?

¹⁴ Pinaregta met ni Pedro dagiti panglakayen a sigagagar nga ipastoranda ti arban ‘saan ket a maigapu iti panagayat iti nakusit a gunggona.’ Ti trabaho dagiti panglakayen ket agkalikagum iti adu a tiempo, ngem saanda a mangnamnama iti aniaman a pinansial a gunggona. Nakita ni Pedro a masapul a pakdaaranna dagiti padana a panglakayen maipapan iti peggad ti panangipastor iti arban maigapu iti “panagayat iti nakusit a gunggona.” Nabatad dayta a peggad  iti naluho a panagbiag dagiti lider ti relihion ti “Babilonia a Dakkel” idinto ta adu a tattao ti napanglaw. (Apoc. 18:2, 3) Masapul nga agannad dagiti panglakayen iti dayta a pagannayasan.

¹⁵ Nangipasdek ni Pablo iti nagsayaat nga ulidan kadagiti panglakayen. Nupay maysa nga apostol ken mabalin met koma a maysa a “dadagsen” kadagiti Kristiano a taga-Tesalonica, saan a ‘nangan iti taraon nga awan bayadna manipud iti asinoman.’ Imbes ketdi, ‘nagbannog ken nagrigat iti rabii ken aldaw.’ (2 Tes. 3:8) Mapagulidanan iti dayta a banag ti adu a panglakayen ita, agraman dagiti agdaldaliasat a manangaywan. Nupay makidagusda kadagiti kapammatianda, saanda nga agbalin a “dadagsen” iti asinoman.​—1 Tes. 2:9.

16. Ania ti kayat a sawen ti “sigagagar” a panangipastor iti arban?

¹⁶ “Sigagagar” koma nga ipastoran dagiti panglakayen ti arban. Nabatad ti kinagagarda iti panagsakripisioda a mangtulong iti arban. Ngem dina kayat a sawen a pilitenda ti arban nga agserbi ken Jehova wenno paregtaenda ti sabsabali nga agsisinnalisal iti panagserbida iti Dios. (Gal. 5:26) Ammo dagiti panglakayen nga agduduma ti tunggal karnero. Magagaranda a mangtulong kadagiti kakabsatda nga agserbi ken Jehova a siraragsak.

Saanyo nga Iturayan ti Arban, Agbalinkayo a Mapagulidanan

17, 18. (a) Apay nga adda dagiti gundaway a narigatan dagiti apostol a mangtarus iti isursuro ni Jesus maipapan iti kinapakumbaba? (b) Ania nga umasping a kasasaad ti mabalin a pakaipasanguantayo?

¹⁷ Kas nausigtayon, masapul a laglagipen dagiti panglakayen a saanda a kukua ti arban nga ipaspastoranda no di ket kukua ti Dios. Saanda koma nga ‘iturayan dagidiay tawid ti Dios.’ (Basaen ti 1 Pedro 5:3.) Adda dagiti gundaway a saan nga umiso ti motibo dagiti apostol ni Jesus a rumagpat iti pribilehio. Kas kadagiti agturay iti nasnasion, kayatda ti prominente a saad.​—Basaen ti Marcos 10:42-45.

¹⁸ Nasayaat a sukimaten dagiti kakabsat a lallaki ita a ‘rumagragpat iti akem a manangaywan’ no ania ti motiboda. (1 Tim. 3:1) Dagidiay agserserbin a panglakayen masapul nga isaludsodda iti bagida no adda tarigagayda nga agbalin a naturay wenno prominente kas iti dadduma nga apostol. No narigatan idi dagiti apostol, rumbeng laeng a bigbigen dagiti panglakayen a nasken nga ikagumaanda a liklikan ti aniaman a nailubongan a pagannayasan a mangituray iti sabsabali.

19. Ania ti masapul a laglagipen dagiti panglakayen no mangaramidda iti addang a mangsalaknib iti arban?

¹⁹ Pudno nga adda dagiti gundaway a masapul a natibker dagiti panglakayen, kas koma no salaknibanda ti arban manipud kadagiti “manangirurumen a lobo.” (Ara. 20:28-30) Kinuna ni Pablo ken ni Tito nga itultuloyna ti ‘mamagbaga ken mangtubngar buyogen ti naan-anay nga autoridad.’ (Tito 2:15) Ngem ikagumaan dagiti panglakayen a raemen ti maysa no aramidenda dayta. Ammoda a ti naalumamay a panangguyugoy ket naep-epektibo a mangdanon iti puso ti maysa ken mangtignay kenkuana nga agaramid iti umiso ngem iti nagubsang a panangkritikar.

20. Kasano a matulad dagiti panglakayen ti panagbalin ni Jesus a mapagulidanan?

²⁰ Ti nagsayaat nga ulidan ni Kristo tignayenna dagiti panglakayen a mangayat iti arban. (Juan 13:12-15) Matukay ti pusotayo bayat a basbasaentayo ti panangisurona kadagiti adalanna a mangasaba ken mangaramid kadagiti adalan. Natukay ti puso dagiti adalan gapu iti kinapakumbaba ni Jesus ken natignayda a  mangipakita met iti ‘kinapakumbaba iti isip nga ibilangda a ti dadduma nangatngato ngem kadakuada.’ (Fil. 2:3) Matignay met ita dagiti panglakayen a mangtulad iti ulidan ni Jesus ken kayatda met ti agbalin a “pagulidanan ti arban.”

21. Ania a gunggona ti segseggaan dagiti panglakayen?

²¹ Ingngudo ni Pedro ti balakadna kadagiti panglakayen babaen ti panangdakamatna iti kari iti masanguanan. (Basaen ti 1 Pedro 5:4.) Dagiti napulotan a manangaywan makikaduadanto ken Kristo idiay langit ket ‘awatendanto ti di agkupas a korona ti kinadayag.’ Dagiti katulongan a papastor ti “sabsabali a karnero” pribilehiodanto nga ipastoran ti arban ti Dios ditoy daga iti sidong ti turay “ti panguluen a pastor.” (Juan 10:16) Usigen ti sumaganad nga artikulo dagiti pamay-an no kasano a dagiti kameng ti kongregasion masuportaranda dagiti nadutokan a mangidaulo.

Kas Repaso

• Apay a maitutop a balakadan idi ni Pedro dagiti padana a panglakayen nga ipastoranda ti arban ti Dios nga adda iti aywanda?

• Kasano ti rumbeng a panangipastor dagiti panglakayen kadagiti masakit iti naespirituan?

• Ania ti mangtignay kadagiti panglakayen a mangipastor iti arban ti Dios nga adda iti aywanda?

[Salsaludsod]

[Ladawan iti panid 21]

Kas kadagiti nagkauna a pastor, dagiti panglakayen masapul a salaknibanda dagiti aywanda a “karnero”