“Wha Sẹro Uthuru Ọghẹnẹ Nọ Orọ Owhai Obọ”
“Wha Sẹro Uthuru Ọghẹnẹ Nọ Orọ Owhai Obọ”
“Wha sẹro uthuru Ọghẹnẹ nọ orọ owhai obọ, orọnọ ọgbahọ họ rekọ onọ uno eva ze.” —1 PITA 5:2.
1. Okenọ Pita o kere ileta ọsosuọ riẹ, ebẹbẹ vẹ Ileleikristi a jẹ rẹriẹ ovao dhe?
OKEJỌ taure Nero o te ti muọ Ileleikristi họ ekpokpo evaọ Rom, Pita ukọ na o ro kere ileta ọsosuọ riẹ. Ọ gwọlọ rọ ileta na bọ ibe Ileleikristi riẹ ga. Ẹdhọ ọ jẹ gwọlọ idhere nọ o re ro gele Ileleikristi kie. Re a sai mugba kẹe, o gwọlọ nọ a rẹ “jaja aro vi” a ve je “hrẹ oma rai kpotọ họ obọ otọ ogaga Ọghẹnẹ.” (1 Pita 5:6, 8) O tẹ jẹ gwọlọ nọ a rẹ jọ okugbe ọvo. A rẹ whaha uruemu ‘omagbẹre,’ keme oyena u re ru nọ ae ohwo ọ jẹ raha ohwo.—Gal. 5:15.
2, 3. Ono ma re mugba kẹ, kọ eme ma te jọ uzoẹme nana gbe onọ o rrọ aro na ta kpahe?
2 Nẹnẹ ma rẹriẹ ovao dhe uyero utioye. Ẹdhọ ọ be gwọlọ idhere nọ ọ rẹ rọ raha omai. (Evia. 12:12) Yọ kẹle na “uye obẹbẹ ruaro o rẹ te jọ, u tioye o te jọ no emuhọ akpọ na ze” he. (Mat. 24:21) Wọhọ epanọ o gwọlọ nọ Ileleikristi ikpe-udhusoi ọsosuọ a rẹ yọroma re a siọ omoma rai ba ẹraha na, ere ma rẹ yọroma re. Re ma sai ru ere, ma gwọlọ obufihọ ekpako ukoko.
3 Joma t’ẹme kpahe epanọ ekpako ukoko a sai ro dhesẹ ovuhumuo odidi kẹ uvẹ-ọghọ nọ a kẹ rai re a “sẹro uthuru Ọghẹnẹ” na. (1 Pita 5:2) Kẹsena ma vẹ te ta kpahe emamọ edhere nọ a re ro ru iruo ẹruọsa na. Ma te jọ uzoẹme nọ o rrọ aro na ta kpahe epanọ ukoko na soso u re ro dhesẹ adhẹẹ kẹ enọ i bi ru iruo gaga jẹ be rẹrote uthuru na. (1 Tẹs. 5:12) Eware nana nọ ma te ta kpahe na i ti fi obọ họ kẹ omai dikihẹ ga je mugba kẹ Ọwegrẹ ologbo mai nọ ma bi lele họre na.—Ẹf. 6:12.
Wha Sẹro Uthuru Ọghẹnẹ
4, 5. Ẹvẹ ekpako na a re rri uthuru na? Kẹ oriruo.
4 Pita ọ tuduhọ ekpako nọ e jọ ukoko Ileleikristi ikpe-udhusoi ọsosuọ awọ re a rri uthuru nọ a muhọ ae obọ na wọhọ epanọ Ọghẹnẹ o rri rai. (Se 1 Pita 5:1, 2.) Dede nọ Pita ọ jọ ohwo nọ o wuzou gaga evaọ ukoko na, ọ jẹ hae t’ẹme kẹ ekpako ukoko avọ orivo ho. Ukpoye, o je bru ọghọ họ ae oma. (Gal. 2:9) Wọhọ Pita, Ugboma Esuo inẹnẹ na o be tuduhọ ekpako ukoko awọ re a daoma ru iruo rai orọ ẹruorote uthuru Ọghẹnẹ na.
5 Ukọ na o kere nọ ekpako na a rẹ ‘sẹro uthuru Ọghẹnẹ nọ o rrọ obọ rai.’ U wuzou gaga re ekpako na a riẹ inọ Jihova gbe Jesu Kristi họ enọ i wo uthuru na. Ekpako na a te niyẹrẹ kẹ Ọghẹnẹ kpahe oghẹrẹ nọ a rẹrote uthuru na. Dae rehọ iẹe nọ ogbẹnyusu ọkpekpe ra jọ ọ ta kẹ owhẹ nọ whọ rẹrote emọ riẹ bẹsenọ o re zihe ze. Kọ whọ gbẹ te rẹrote emọ na ziezi jẹ kẹ ae emu? Otẹrọnọ oma o ga ọjọ họ, kọ whọ gbẹ te gwọlọ umu jọ kẹe re ọ lọ? Epọvo na re, ekpako ukoko a rẹ ‘sẹro ukoko Ọghẹnẹ, onọ ọ rọ azẹ ọghaghae ọmọ riẹ rọ dẹ.’ (Iruẹru 20:28) A rẹ kareghẹhọ inọ azẹ ọghaghae Jesu Kristi a rọ dẹ igodẹ na kpobi. Nọ orọnọ ekpako na a te niyẹrẹ kẹ Ọghẹnẹ na, a rẹ ko, thọ, jẹ rẹrote uthuru na.
6. Owha-iruo vẹ ithuru-igodẹ oke anwae a wo?
6 Roro kpahe owha-iruo nọ ithuru-igodẹ oke anwae a wo. A re thihakọ ẹroro uvo gbe ekpahe aso re a sae rẹrote uthuru na. (Emu. 31:40) A re tube fi uzuazọ rai họ ọza fiki igodẹ na. Okenọ Devidi ọ jọ othuru-igodẹ, ọ thọ igodẹ riẹ no obọ okpohrokpo avọ adaka. Devidi ọ ta nọ: “Mẹ tẹ jobọ mu ẹfọ riẹ, mẹ tẹ rehọ obọ mu ei, me te kpe ei.” (1 Sam. 17:34, 35) Ọ g’udu kẹhẹ! Ababọ avro, o fi uzuazọ riẹ họ ọza! Ghele na, ọ dawo ẹgba riẹ kpobi re ọ ruẹse thọ igodẹ na.
7. Ẹvẹ ekpako na a sai ro si owhowho-uvie no unu Setan evaọ edhere ẹwoho?
7 Nẹnẹ, ekpako na a re muẹrohotọ re Ẹdhọ, ọnọ ọ wọhọ okpohrokpo na, ọ siọ ogodẹ jọ ba ekpe. Onana o sae gwọlọ nọ ekpako na a rẹ rọ aruọwha tatabọ họ si ogodẹ na no unu Ẹdhọ evaọ edhere ẹwoho. Re ekpako na a sai siwi ogodẹ na, a rẹ j’obọ họ ẹfọ arao ojihẹ na, wọhọ odẹme. A rẹ sae jiroro kugbe inievo nọ i bi rri otọ mu hu, enọ e be gwọlọ kie ruọ egbefẹ Setan. (Se Jud 22, 23.) Rekọ ababọ obufihọ Jihova, ekpako na a rẹ sai ru onana ha. Wọhọ epanọ othuru-igodẹ ọ rẹ rehọ omohọ variẹ omola ogodẹ nọ ọ nwoma na, ere ekpako na a rẹ rọ Ebaibol fi obọ họ kẹ owhowho-uvie nọ ọ nya thọ.
8. Bovẹ ekpako na a rẹ kpọ ovao uthuru na rri, kọ evaọ oghẹrẹ vẹ?
8 Othuru-igodẹ o re je su igodẹ riẹ kpohọ oria nọ ame gbe emamọ ẹbe e rrọ. Ere re, ekpako a rẹ kpọ ovao uthuru na rri ukoko na, tuduhọ ae awọ re a hai kpohọ iwuhrẹ ẹsikpobi re a sae reawere emu abọ-ẹzi ẹruoke na vọvọ. (Mat. 24:45) O sae gwọlọ nọ ekpako na a rẹ raha oke ziezi ro fi obọ họ kẹ enọ e be mọ evaọ abọ-ẹzi re a jẹ obufihọ nọ a be kẹ ae no Ebaibol ze rehọ. O sae jọnọ ohwo nọ o g’oma họ emu ọ gwọlọ zihe ziọ ukoko na. Ekpako na a rẹ wha ozọ họ iẹe ẹro ho, rekọ a rẹ rọ ẹwo ru ehri-izi Ikereakere na vẹ kẹe, je dhesẹ kẹe epanọ ọ sai ro fi ai họ iruo.
9, 10. Ẹvẹ ekpako na a sai ro fi obọ họ kẹ owhowho-uvie nọ o wo ẹbẹbẹ abọ-ẹzi?
9 Nọ whọ tẹ be mọ, oghẹrẹ edọkita vẹ whọ rẹ gwọlọ? Ọnọ ọ rẹ kezọ kẹ owhẹ tere he ọ vẹ kwa imu kẹ owhẹ rẹ ọ sai wo uvẹ ruẹ omọfa? Manikọ edọkita nọ ọ rẹ roma totọ gaviezọ kẹ owhẹ, ọ vẹ ta oware nọ o be wha ẹbẹbẹ na ze gbe oghẹrẹ imu nọ i re kpo ẹyao na?
10 Epọvo na re, ekpako na a rẹ sae gaviezọ kẹ ohwo nọ ọ be mọ ẹyao abọ-ẹzi a ve je fi obọ họ kẹe, onọ o rẹ wọhọ ẹsenọ a be rehọ “udẹ wholo iei eva odẹ Ọnowo na.” (Se Jemis 5:14, 15.) Wọhọ udẹ obọ Giliad, Ẹme Ọghẹnẹ ọ rẹ sae kẹ ọnọ ọ be mọ eri. (Jeri. 8:22; Izik. 34:16) Nọ ọnọ o whrehe no evaọ abọ-ẹzi o te fi ehrẹ Ebaibol họ iruo, u re fi obọ họ kẹe wariẹ dikihẹ ga evaọ abọ-ẹzi. Ẹhẹ, nọ ekpako na a tẹ gaviezọ ziezi kẹ ọnọ o wo ẹbẹbẹ, a tẹ jẹ lẹ kugbei, o rẹ wha ewoma ze.
Orọnọ Ọgbahọ Họ Rekọ Onọ U no Eva Ze
11. Eme ọ be wọ ekpako na rọ unevaze fi obọ họ kẹ uthuru Ọghẹnẹ?
11 Ofariẹ, Pita ọ kareghẹhọ ekpako na eware nọ a re ru gbe enọ a rẹ whaha nọ a be rẹrote uthuru na. Ekpako na a rẹ sẹro uthuru Ọghẹnẹ, “orọnọ ọgbahọ họ rekọ onọ uno eva ze.” Eme ọ rẹ wọ ekpako na rọ unevaze fi obọ họ kẹ uthuru na? Eme ọ wọ Pita sẹro jẹ ko igodẹ Jesu? Uyoyou udidi nọ o wo kẹ Olori na. (Jọn 21:15-17) Fiki uyoyou, ekpako na a rẹ gbẹ rria kẹ ‘omobọ rai hi, rekọ a rẹ rria kẹ ọnọ o whu fiki rai.’ (2 Kọr. 5:14, 15) Uyoyou nana nọ ekpako na a wo kẹ Jesu, gbe onọ a wo kẹ Ọghẹnẹ gbe inievo rai, o be wọ ae rọ ẹgba, ekwakwa, gbe oke rai fi obọ họ kẹ uthuru na. (Mat. 22:37-39) A be rọ unevaze ru onana, orọnikọ ẹgo ho.
12. Ẹvẹ Pọl o fi obọ họ kẹ inievo na te?
12 Ẹvẹ ekpako na a re fi obọ họ kẹ uthuru na te? Evaọ ẹruorote uthuru na, a rẹ rọ aro kele Pọl wọhọ epanọ ọ rọ aro kele Jesu na. (1 Kọr. 11:1) Fiki uyoyou udidi nọ a wo kẹ inievo obọ Tẹsalonika, oma o wọ Pọl avọ ibe-iruiruo riẹ nọ a ro fi uzuazọ rai họ ọza fiki rai, jẹ ta usiuwoma Ọghẹnẹ kẹ ae. A rọ oma kpotọ ru onana “wọhọ epanọ ọyọre-ọmọ ọ rẹ sẹro emọ riẹ” na. (1 Tẹs. 2:7, 8) Pọl ọ riẹ epanọ ọyewọ o re tete emọ riẹ te. O re ru oware kpobi kẹ ae, tubẹ kpama makọ udevie aso re ọ kẹ ae emu.
13. Ewha-iruo vẹ ekpako na a rẹ jọ jọ owowa?
13 O gwọlọ nọ ekpako na a rẹ jọ owowa evaọ ẹruorote ewha-iruo ukoko na gbe erọ uviuwou rai. (1 Tim. 5:8) Oke nọ ekpako a rẹ raha rọ rẹrote ewha-iruo ukoko na yọ onọ a hae raha kugbe uviuwou rai. Edhere jọ nọ a sae rọ jọ owowa evaọ ewha-iruo ivẹ nana họ, a re zizie amọfa re a kuomagbe uviuwou rai ru Uwuhrẹ Ebaibol Uviuwou evaọ ẹsejọ. Anwọ ikpe buobu ze na, ọkpako ukoko jọ nọ a re se Masanao evaọ Japan, ọ be hai zizie inievo nọ e re rọo ho gbe enọ esẹ rai e rrọ ukoko na ha ziọ uwou riẹ kẹ Uwuhrẹ Ebaibol Uviuwou. Nọ oke o be nya haro na, ejọ nọ o fi obọ họ kẹ a te ekpako ukoko, jẹ rọ aro kele emamọ oriruo Masanao.
Whaha Uvouthei —Sẹro Uthuru na Avọ Ọwhọ
14, 15. Fikieme ekpako na a jẹ yọroma kpahe ‘erere oriobọ,’ kọ ẹvẹ a sae rọ rehọ aro kele Pọl evaọ abọ nana?
14 Pita ọ tuduhọ ekpako na awọ re inọ jọ a sẹro uthuru na “orọnọ rọ kẹ erere nọ o re fou omovuọ họ, rekọ [avọ] iroro nọ e gba kiete.” Iruo ekpako na e rẹ rehọ oke gaga, ghele na a bi rẹro ugho nọ a rẹ whae he. Pita ọ ruẹ nọ o r’oja re ọ vẹvẹ ibe ekpako riẹ unu kpahe enwoma nọ e riẹ re a rọ fiki ‘erere oriobọ’ sẹro uthuru na. Whọ rẹ ruẹ enwoma nana evaọ uzuazọ akpọriọ nọ isu egagọ “Babilọn ologbo” na a bi yeri, yọ a bi fru enọ e rrọ ichọche rai re. (Evia. 18:2, 3) Ekpako na nẹnẹ a rẹ yọroma re a siọ oghẹrẹ uzuazọ utioye ba eyeri.
15 Pọl o fi uvi oriruo h’otọ kẹ ekpako na. Dede nọ ọ jọ ukọ, yọ ọ hae te jọ “owha ogbẹgbẹdẹ” kẹ Ileleikristi nọ e rrọ Tẹsalonika, ọ re emu ohwo ọvo “ọvọvẹ hẹ.” Ukpoye, ‘taso tuvo o je he ru iruo egaga.’ (2 Tẹs. 3:8) Ekpako ukoko buobu nẹnẹ te esẹro okogho avọ erọ ubrotọ a bi fi emamọ oriruo h’otọ evaọ abọ nana. Dede nọ a rẹ rehọ eware nọ amọfa a ro ru ae ọghọ, a be wọ “owha ogbẹgbẹdẹ” họ uvumọ ohwo ho.—1 Tẹs. 2:9.
16. Eme u dhesẹ re a rọ “ọwhọ” sẹro uthuru na?
16 Ekpako na a rẹ rọ “ọwhọ” sẹro uthuru na. Ọwhọ rai o bi dhesẹ oma via evaọ ẹzi omolahiẹ nọ a bi ro fi obọ họ kẹ uthuru na. Rekọ, orọnọ onana u dhesẹ nọ a rẹ gba uthuru na họ gọ Jihova ha; yọ ekpako na a rẹ tuduhọ amọfa awọ re a rọ ẹzi oma-hrowo gọ Ọghẹnẹ hẹ. (Gal. 5:26) Ekpako na a vuhumu inọ owhowho-uvie kpobi ọ rẹ ghaghae. A be rọ ọwhọ fi obọ họ kẹ inievo ukoko na re a gọ Jihova avọ evawere.
Wha Ru Oma Oruoro kẹ Uthuru na Ha, Rekọ Wha rẹ Jọ Oriruo
17, 18. (a) Fikieme o rọ jọ bẹbẹ kẹ ikọ na ẹsejọ re a roma kpotọ wọhọ epanọ Jesu o wuhrẹ i rai? (b) Ẹvẹ ẹbẹbẹ otioye ọ sae rọ roma via nẹnẹ?
17 Wọhọ epanọ ma ta no na, ekpako na a rẹ riẹ inọ uthuru nọ a be sẹro riẹ na yọ orọ Ọghẹnẹ, orọnikọ orọ obọ rai hi. A rẹ yọroma re a siọ oma ‘ba eru oruoro kẹ enọ e rrọ otọ rai.’ (Se 1 Pita 5:3.) Ẹsejọ, ikọ Jesu a jẹ họre kẹ ekwa. Wọhọ isu erẹwho na, ikọ na a jẹ gwọlọ ekwa ilogbo re ahwo a ruẹse riẹ ae odẹ.—Se Mak 10:42-45.
18 Nẹnẹ, u fo re oniọvo-ọmọzae nọ ọ “guọlọ ọkwa” ọsẹro ọ kiẹ oma riẹ riwi kpahe oware nọ ọ rọ gwọlọ owha-iruo yena. (1 Tim. 3:1) U fo re ọkpako ukoko kpobi ọ nọ oma riẹ sọ ọ be hae gwọlọ jọ ohwo ọsosuọ evaọ udevie ekpako edekọ wọhọ epanọ ikọ na jọ a ru. Otẹrọnọ ikọ na a wo ẹbẹbẹ yena, o mae gwọlọ re ekpako na a daoma whaha ekpehre uruemu nana.
19. Eme ekpako a rẹ kareghẹhọ nọ a tẹ be whọku ọnọ o ruthọ?
19 Uzẹme, ẹsejọ o rẹ gwọlọ nọ ekpako na a kru izi Ebaibol ga, maero nọ a tẹ be thọ uthuru na no obọ “erao ijihẹ imuomu.” (Iruẹru 20:28-30) Pọl ọ ta kẹ Taitọs re ọ hae “rehọ ogaga kpobi wuhrẹ jẹ whọku.” (Tait. 2:15) Ghele na, o tẹ make rọnọ ekpako a rẹ j’owọ yena, a re bru ọghọ họ enọ a be whọku na oma. A re vuhumu inọ ukpenọ a rẹ rehọ evedha t’ẹme kẹ ohwo nọ a be whọku, unu uwowolẹ nọ a rẹ rọ ta ẹme na kẹe o rẹ mai duobọ tei udu.
20. Ẹvẹ ekpako ukoko a sai ro lele oriruo Jesu evaọ emamọ oriruo nọ a re fihọ otọ?
20 Emamọ oriruo Kristi o rẹ wọ ekpako ukoko you uthuru na. (Jọn 13:12-15) Oma o rẹ were omai nọ ma te se kpahe epanọ o wuhrẹ ikọ riẹ rọkẹ iruo usiuwoma ota na. Omaurokpotọ riẹ u duobọte ilele riẹ, onọ o wọ rae rọ ‘omaurokpotọ rri amọfa ro vi ae oma rai.’ (Fil. 2:3) Ekpako ukoko nẹnẹ a re lele oriruo Jesu re, a vẹ jẹ “jọ oriruo kẹ uthuru na.”
21. Osohwa vẹ ekpako ukoko a re rẹro riẹ?
21 Nọ Pita o je ku ohrẹ nọ ọ kẹ ekpako na họ, ọ fodẹ oghale jọ nọ u ti te ai obọ. (Se 1 Pita 5:4.) Enọ a rọ ẹzi wholo na a “ti wo etu-uvie oruaro nọ ọ rẹ hiẹ hẹ” kugbe Kristi evaọ obọ odhiwu. Ekpako ukoko nọ e rrọ utu “igodẹ efa” na a ti wo uvẹ-ọghọ nọ a te rọ jọ obọ otọakpọ obonẹ rẹrote igodẹ Ọghẹnẹ evaọ otọ esuo “othuru-igodẹ oride na.” (Jọn 10:16) Evaọ uzoẹme nọ o rrọ aro na, ma te ta kpahe epanọ enọ e rrọ ukoko na a sae rọ roma kpotọ kẹ enọ a ro mu re a sẹro ukoko na.
Ọkiẹkpemu
• Fikieme u ro fo re Pita ọ hrẹ ekpako ukoko re a rẹrote uthuru Ọghẹnẹ nọ a muhọ ae obọ na?
• Eme ekpako ukoko a re ru kpahe enọ i whrehe evaọ abọ-ẹzi?
• Eme ọ rẹ wọ ekpako rẹrote uthuru Ọghẹnẹ nọ a muhọ ae obọ?
[Enọ Uwuhrẹ]
[Uwoho nọ o rrọ ẹwẹ-obe avọ 21]
Wọhọ ithuru-igodẹ oke anwae, ekpako ukoko nẹnẹ a rẹ thọ “igodẹ” nọ e rrọ otọ rai