“Rĩithagiai Wega Rũũru Rũa Ngai Rũrĩa Mũrĩ Naruo”
“Rĩithagiai Wega Rũũru Rũa Ngai Rũrĩa Mũrĩ Naruo”
“Rĩithagiai wega rũũru rũa Ngai rũrĩa mũrĩ naruo, . . . to ũndũ wa kũringĩrĩrio, no tondũ wa kwĩendera.”—1 PET. 5:2.
1. Nĩ maũndũ marĩkũ Akristiano maacemanagia namo hĩndĩ ĩrĩa Petero aandĩkire marũa make ma mbere?
MŨTŨMWO Petero aandĩkire marũa make ma mbere ihinda inyinyi Nero atanambĩrĩria kũnyarira Akristiano thĩinĩ wa Roma. Muoroto wake warĩ gwĩkĩra hinya aarĩ na ariũ a Ithe witũ. Mũcukani ‘aacangaga,’ agĩcaria gũtambura Akristiano. Nĩguo mahote kũregana nake biũ, maabataraga gũikara ‘materigĩtwo’ na ‘menyihĩtie magĩathĩkaga nĩ guoko kwa Ngai kũrĩa kwĩ hinya.’ (1 Pet. 5:6, 8) Ningĩ nĩ maabataraga gũikara na ũrũmwe. ‘Kũrũmana na kũrĩana o ene’ kũngĩarĩ ũgwati tondũ moimĩrĩro mangĩarĩ ‘kũninana o ene.’—Gal. 5:15.
2, 3. Twagĩrĩirũo gũkorũo tũkĩrũa naũ, na nĩ maũndũ marĩkũ tũkwarĩrĩria icunjĩ-inĩ ici?
2 Ũmũthĩ nĩ tũcemanagia na maũndũ o ta macio. Mũcukani acaragia mĩeke ya gũtũtambura. (Kũg. 12:12) Na ica ikuhĩ nĩ gũgũkorũo na “thĩna mũnene ũtarĩ wonwo taguo gwata kĩambĩrĩria gĩa thĩ nginya rĩu.” (Mat. 24:21) O ta ũrĩa Akristiano acio a tene maabataraga kwĩgitĩra ngũĩ gatagatĩ-inĩ kao noguo o na ithuĩ tũrabatara gwĩka. Nĩguo tũhote kũhingia ũndũ ũcio, rĩmwe na rĩmwe nĩ tũbataraga ũteithio wa athuri a kĩũngano.
3 Rekei twarĩrĩrie ũrĩa athuri mangĩagĩria mũrutĩre wao wa wĩra ũrĩa maheetwo wa kũrĩithia ‘rũũru rwa Ngai rũrĩa marĩ naruo.’ (1 Pet. 5:2) Thutha-inĩ nĩ tũkuona njĩra ĩrĩa yagĩrĩire ya kũruta wĩra ũcio wa ũrĩithi. Thĩinĩ wa gĩcunjĩ kĩrĩa kĩrũmĩrĩire, nĩ tũgũthuthuria ũrĩa kĩũngano ‘kĩngĩtĩa andũ arĩa menogagia makĩrora’ rũũru. (1 Thes. 5:12) Kwarĩrĩria maũndũ macio gũgũtũteithia kũregana biũ na Thũ iitũ ĩrĩa nene, tũkĩmenyaga atĩ nĩyo tũrũaga nayo.—Ef. 6:12.
Rĩithagiai Rũũru rwa Ngai
4, 5. Athuri a kĩũngano magĩrĩirũo nĩ kuona rũũru atĩa? Heana ngerekano.
4 Hĩndĩ ya Akristiano a tene Petero eekĩrire athuri ngoro magĩe na mawoni ta ma Ngai kwerekera rũũru rũrĩa meehokeirũo. (Thoma 1 Petero 5:1, 2.) O na gũtuĩka Petero onagwo atariĩ ta gĩtugĩ thĩinĩ wa kĩũngano-rĩ, ndaaragĩria athuri arĩa angĩ ta arĩ mũnene wao. Ithenya rĩa ũguo, aamekagĩra ngoro marĩ arutithania wĩra hamwe nake. (Gal. 2:9) Kĩama kĩrĩa Gĩtongoragia, gĩkagĩra athuri a kĩũngano ngoro, kĩrĩ na mwerekera ta wa Petero, merutanĩrie kũhingia wĩra wao mũritũ wa kũrĩithia rũũru rwa Ngai.
5 Mũtũmwo ũcio aandĩkire atĩ athuri a kĩũngano ‘maagĩrĩirũo nĩ kũrĩithia rũũru rwa Ngai rũrĩa mehokeirũo.’ Waarĩ ũndũ wa bata mũno harĩ o kũmenya atĩ rũũru rũu nĩ rwa Jehova na Jesu Kristo. No mũhaka athuri mangĩoririo nĩ Ngai ũrĩa maaroraga ng’ondu ciake. Ta tua atĩ mũrata waku wa hakuhĩ nĩ agũtigĩra ciana ciake ũmũroragĩre. Na githĩ to ũcimenyagĩrĩre mũno na ũciheage irio? Ũmwe angĩrwara-rĩ, na githĩ to ũtigĩrĩre atĩ nĩ arigitwo ũrĩa kwagĩrĩire? Ũguo no taguo o nao athuri magĩrĩirũo nĩ ‘kũrĩithagia kĩũngano kĩa Ngai kĩrĩa eegũrĩire na thakame ya Mũrũ wake.’ (Atũm. 20:28, New World Translation) Nĩ maririkanaga atĩ o ng’ondu yagũrirũo na thakame ya goro ya Jesu Kristo. Tondũ nĩo mehokeirũo rũũru rũu, athuri marũrĩithagia, makarũgitĩra na makarũmenyerera.
6. Wĩra wa arĩithi a tene warĩ ũrĩkũ?
6 Ta wĩcirie wĩra ũrĩa arĩithi a mahiũ maarĩ naguo mahinda-inĩ ma Bibilia. No mũhaka mangĩomĩrĩirie ũrugarĩ wa mũthenya na heho ya ũtukũ nĩguo marĩithie ndũũru ciao. (Kĩam. 31:40) O na nĩ meingĩragia ũgwati-inĩ nĩ ũndũ wa ng’ondu. Rĩrĩa Daudi aarĩ kahĩĩ, nĩ aahonokirie rũũru rũrĩa aarĩithagia kuuma kũrĩ nyamũ ndĩani, ta mũrũthi na nduba. Akĩaria ũhoro wacio, Daudi oigire ũũ: “ngamĩnyita nderu ciayo, ngamĩgũtha, ngamĩũraga.” (1 Sam. 17:34, 35) Na githĩ ũcio ndwakĩrĩ ũcamba mũnene! Na githĩ to mũhaka akorũo nĩ ang’eng’anaga mũno nayo! O na kũrĩ ũguo, ndaigana gwĩtigĩra kũhonokia ng’ondu.
7. Athuri mangĩhota atĩa kũhonokia ng’ondu na njĩra ya ngerekano kuuma magego-inĩ ma Shaitani?
7 Ũmũthĩ, athuri a kĩũngano marabatara kwĩhũga tharĩkĩro cia Mũcukani itariĩ ta cia mũrũthi. Na njĩra ya ngerekano no mabatare kuoya ikinya rĩa ũcamba rĩa kũruta ng’ondu kuuma magego-inĩ ma Mũcukani. Mangĩnyita nderu cia nyamũ ĩyo ndĩani, athuri no mahonokie ng’ondu. No mateithie ariũ a Ithe witũ arĩa mangĩgerio nĩ mĩtego ya Shaitani nĩ ũndũ wa kwaga kwĩmenyerera. (Thoma Judasi 22, 23.) Hatarĩ nganja, athuri matingĩhota gwĩka ũguo matarĩ na ũteithio wa Jehova. Matumberagia ng’ondu ĩrĩa ĩgurarĩtio, makamĩoha, na makamĩhaka maguta ma Kiugo kĩa Ngai.
8. Athuri merekagĩria rũũru kũ, na mekaga ũguo atĩa?
8 Ningĩ mũrĩithi wa mahiũ nĩ aarĩithagia rũũru rwake kũndũ kũrĩ na maĩ na nyeki nduru. No taguo athuri nao merekagĩria rũũru kĩũngano-inĩ, makarwĩkĩra ngoro gũkoragwo mĩcemanio-inĩ nĩguo rũheagwo “irio hĩndĩ ĩrĩa yagĩrĩire.” (Mat. 24:45) Athuri no mabatare kũhũthĩra mahinda mangĩ gũteithia arĩa arũaru kĩĩroho metĩkĩre ũteithio wa Kiugo kĩa Ngai. Ng’ondu yũrĩte no ĩkorũo ĩkĩgeria gũcoka rũũru-inĩ. Handũ ha kũhahũra Mũkristiano ũcio, athuri mageragia na ũhoreri kũmũhe mootaro moimĩte Maandĩko-inĩ na makamuonia ũrĩa angĩmahũthĩra ũtũũro-inĩ wake.
9, 10. Athuri magĩrĩirũo nĩ gũteithia atĩa arĩa arũaru kĩĩroho?
9 Hĩndĩ ĩrĩa ũrĩ mũrũaru-rĩ, ũngĩenda ndagĩtarĩ wa mũthemba ũrĩkũ? Hihi no wende ndagĩtarĩ ũkũhũthĩra o mahinda manini gũgũthikĩrĩria acoke akwandĩkĩre ndawa na ihenya atĩ nĩguo one mũrũaru ũrĩa ũrũmĩrĩire? Kana ũngĩenda kuonwo nĩ ndagĩtarĩ ũgũgũthikĩrĩria, agakwĩra thĩna waku, na agacoka agagũtaarĩria ũrĩa egũgũthondeka?
10 O ũndũ ũmwe na ũcio-rĩ, athuri no mathikĩrĩrie mũndũ mũrũaru kĩĩroho na mamũteithie kũhonia kĩronda, kwoguo na njĩra ya mũhaano ‘mamũhake maguta rĩĩtwa-inĩ rĩa Jehova.’ (Thoma Jakubu 5:14, 15.) O ta mũthaiga wa Gileadi, Kiugo kĩa Ngai no kĩhoorerie mũndũ mũrũaru kĩĩroho. (Jer. 8:22; Ezek. 34:16) Mootaro ma Bibilia mangĩhũthĩrũo-rĩ, no mateithie mũndũ mwagagu kĩĩroho acokererie. Ĩĩni, athuri nĩ mekaga wega mũno rĩrĩa mathikĩrĩria mĩtangĩko ya ng’ondu ndũaru na makahoya hamwe nake.
To Ũndũ wa Kũringĩrĩrio no Tondũ wa Kwĩyendera
11. Nĩ kĩĩ gĩtindĩkaga athuri marĩithie rũũru rwa Ngai na mwĩyendero?
11 Petero nĩ aacokire akĩririkania athuri ũrĩa magĩrĩirũo nĩ gwĩka na ũrĩa matagĩrĩirũo nĩ gwĩka makĩruta wĩra wa ũrĩithi. Athuri magĩrĩirũo kũrĩithia rũũru rwa Ngai “to ũndũ wa kũringĩrĩrio, no tondũ wa kwĩendera.” Nĩ kĩĩ gĩtindĩkaga athuri matungatĩre aarĩ na ariũ a Ithe witũ marĩ na mwĩyendero? Hihi nĩ kĩĩ gĩatindĩkaga Petero arĩithie na ahe ng’ondu cia Jesu irio? Nĩ wendo wake harĩ Mwathani. (Joh. 21:15-17) Nĩ ũndũ wa wendo, athuri ‘matitũũraga nĩ ũndũ wa bata wao ene, no matũũraga nĩ ũndũ wa bata wa ũcio wakuire ithenya rĩao.’ (2 Kor. 5:14, 15) Wendo ũcio hamwe na wendo wao harĩ Ngai na harĩ ariũ a Ithe witũ, nĩ ũteithagia athuri kũhũthĩra hinya wao, indo ciao, na mahinda mao gũtungatĩra rũũru rũu. (Mat. 22:37-39) Merutagĩra nĩ ũndũ wa kwĩyendera.
12. Mũtũmwo Paulo eerutagĩra atĩa?
12 Athuri magĩrĩirũo kwĩheana atĩa? Makĩrora ng’ondu, megerekanagia na mũtũmwo Paulo, o ta ũrĩa nake eegerekanirie na Jesu. (1 Kor. 11:1) Nĩ ũndũ wa wendo harĩ Akristiano a Thesalonike, Paulo hamwe na arĩa maarutithanagia wĩra nake nĩ maakenaga kũgaĩra Akristiano acio ‘Ũhoro-ũrĩa-Mwega wa Ngai na makĩria o na mĩoyo yao o nayo.’ Meekaga ũguo marĩ na ũhoreri “o ta ũrĩa mũreri amenyagĩrĩra ciana ciake mwene.” (1 Thes. 2:7, 8) Paulo nĩ aamenyaga ũrĩa mũtumia ũrarera aiguaga igũrũ rĩa ciana ciake. Hatirĩ ũndũ atangĩka nĩ ũndũ wa ciana ciake nginya o na gũũkĩra ũtukũ gatagatĩ gũcihe irio.
13. Athuri mekũbatara gũkorũo na ũigananu ũrĩkũ?
13 Athuri nĩ mekũbatara kũgĩa na ũigananu harĩ wĩra wa ũrĩithi na mawĩra marĩa mehokeirũo famĩlĩ-inĩ ciao. (1 Tim. 5:8) Mahinda marĩa athuri mahũthagĩra na kĩũngano nĩ ma goro mũno tondũ nĩ marĩa mangĩhũthĩra na famĩlĩ ciao. Njĩra ĩmwe ya kũrutanĩria mawĩra macio merĩ hamwe nĩ kũnyita arĩa angĩ ũgeni rĩmwe na rĩmwe hĩndĩ ya hwaĩ-inĩ wa Ũthathaiya wa Famĩlĩ ciao. Kwa ihinda rĩa mĩaka mĩingĩ Masanao, mũthuri wa kĩũngano thĩinĩ wa Japani, nĩ eetaga andũ arĩa matahikanĩtie, na famĩlĩ cia athuri arĩa matarĩ etĩkia wĩruti-inĩ wa famĩlĩ yake. Thutha ũcio, amwe nĩ maateithirio magĩtuĩka athuri a kĩũngano, na makĩrũmĩrĩra kĩonereria kĩu kĩega kĩa Masanao.
Wĩthemei Mbia Itamwagĩrĩire—Rĩithagiai Rũũru na Kwĩyendera na Ngoro
14, 15. Athuri magĩrĩirũo nĩ kwĩmenyerera ‘matikerirĩrie mbia itamagĩrĩire’ nĩkĩ, na mangĩĩgerekania na Paulo atĩa ũndũ-inĩ ũcio?
14 Ningĩ Petero nĩ eekĩrire athuri ngoro marĩithagie rũũru, ‘ti ũndũ wa kwĩrirĩria mbia itamagĩrĩire, no makĩria nĩ ũndũ wa kwĩyendera na ngoro.’ Wĩra wa athuri nĩ woyaga mahinda maingĩ, no matiĩrĩgagĩrĩra kũrĩhwo na njĩra o na ĩrĩkũ. Petero nĩ onire harĩ bata kũhe athuri a kĩũngano mũkaana wĩgiĩ ũgwati wa kũrĩithia rũũru nĩ ũndũ wa ‘kwĩrirĩria mbia itamagĩrĩire.’ Ũgwati ũcio wonekaga wega mĩikarĩre-inĩ ya ũtonga ya atongoria a ndini a ‘Babuloni ũrĩa mũnene,’ rĩrĩa andũ aingĩ maratũũra marĩ athĩni. (Kũg. 18:2, 3) Hakĩrĩ bata ũmũthĩ athuri memenyerere matigakũrie mĩerekera ta ĩyo.
15 Paulo nĩ aaigĩire athuri Akristiano kĩonereria kĩega. O na gũtuĩka aarĩ mũtũmwo na nĩ angĩahotire “kũritũhĩra” Akristiano a Thesalonike, ndaigana ‘kũrĩa irio cia mũndũ o na ũrĩkũ tũhũ.’ Ithenya rĩa ũguo-rĩ, ‘aarutaga wĩra wa hinya ũtukũ na mũthenya akĩĩnogagia.’ (2 Thes. 3:8) Athuri aingĩ a mahinda-inĩ maya maitũ, hamwe na arori arĩa mathiũrũrũkaga nĩ kĩonereria kĩega ũndũ-inĩ ũcio. O na gũtuĩka matiregaga ũtaana wa Akristiano arĩa angĩ-rĩ, ‘matiritũhagĩra’ mũndũ o na ũrĩkũ.—1 Thes. 2:9.
16. Kũrĩithia rũũru na ‘ngoro ya kwĩyendera’ nĩ kuuga atĩa?
16 Athuri marĩithagia rũũru nĩ ũndũ wa “kwĩendera na ngoro.” Wendo wao wonanagio nĩ mwerekera wao wa kwĩima magĩteithia rũũru. O na kũrĩ ũguo, ti kuuga atĩ mahatagĩrĩria rũũru rũtungatĩre Jehova na hinya; o na ningĩ athuri nĩ ũndũ wa wendo matiĩkagĩra ngoro andũ matungatĩre Ngai marĩ na roho wa gũcindana. (Gal. 5:26) Athuri nĩ moĩ atĩ gũtirĩ ng’ondu ĩhaana ta ĩrĩa ĩngĩ. Nĩ makoragwo na wendi wa gũteithia andũ arĩa angĩ matungatĩre Jehova marĩ na gĩkeno.
Mũtigetuage Anene, no Mũtuĩke Kĩonereria Harĩ Rũũru
17, 18. (a) Nĩ kĩĩ gĩatũmaga rĩmwe atũmwo maage kũnyita ũrutani wa Jesu wĩgiĩ wĩnyihia? (b) Nĩ ũndũ ũrĩkũ ũtariĩ ta ũcio tũngĩbatara kũhiũrania naguo?
17 O ta ũrĩa twarĩrĩria-rĩ, athuri nĩ magĩrĩirũo nĩ kũririkana atĩ rũũru rũrĩa marĩithagia nĩ rwa Ngai, no ti rwao. Nĩ memenyagĩrĩra ‘matigetuage anene a andũ a Ngai arĩa matigĩirũo marorage.’ (Thoma 1 Petero 5:3.) Kũrĩ hĩndĩ Atũmwo a Kristo maakinyagĩra mĩeke ya ũtungata marĩ na muoroto ũtagĩrĩire. O ta arĩa maathanaga ndũrĩrĩ-inĩ, no taguo nao meendaga ũnene.—Thoma Mariko 10:42-45.
18 Ariũ a Ithe witũ arĩa ũmũthĩ ‘mendaga gũtuwo arori a maũndũ ma kĩũngano’ nĩ wega methuthurie o ene kĩrĩa gĩtũmaga mende gũtuĩka arori. (1 Tim. 3:1) Arĩa nao maratungatĩra marĩ athuri no mabatare kwĩyũria kana hihi marĩ na merirĩria ma ũnene kana igweta ta ũrĩa atũmwo amwe meekaga. Angĩkorũo atũmwo maarĩ na thĩna ũndũ-inĩ ũcio-rĩ, athuri no makĩone bata wa kwĩrutanĩria gwĩthema mwerekera o wothe wa thĩ wa gũkenera gũkorũo na ũnene igũrũ rĩa arĩa angĩ.
19. Nĩ ũndũ ũrĩkũ Athuri magĩrĩirũo nĩ kũririkana rĩrĩa maroya ikinya rĩa kũgitĩra rũũru?
19 Ma nĩ atĩ, kũrĩ hingo athuri mangĩbatara ũcamba, ta rĩrĩa maragitĩra rũũru kuumana na “njũi ndĩani.” (Atũm. 20:28-30) Paulo eerire Tito ‘ahatanagĩrĩrie, agĩkananagia arĩ na wathani wothe.’ (Tit. 2:15) Ĩndĩ o na rĩrĩa athuri marabatara kuoya ikinya ta rĩu, nĩ mageragia gũtĩa mũndũ ũrĩa marateithia. Nĩ moĩ atĩ kũrũnga mũndũ na ũhoreri kaingĩ nĩ gũkinyagĩra ngoro makĩria na gũgatũma arũmĩrĩre njĩra ĩrĩa yagĩrĩire gũkĩra kũmũruta mahĩtia.
20. Athuri mangĩĩgerekania na Jesu atĩa harĩ kũiga kĩonereria kĩega?
20 Kĩonereria kĩega gĩa Kristo gĩtũmaga athuri makorũo na wendo harĩ rũũru. (Joh. 13:12-15) Ngoro ciitũ nĩ icanjamũkaga rĩrĩa twathoma ũrĩa aarutire arutwo ake kũhunjia na kũrutana. Kĩonereria gĩake kĩa wĩnyihia nĩ kĩahutirie ngoro cia arutwo ake, gĩgĩtũma maikarage ‘menyihĩtie, o mũndũ agĩtuaga ũrĩa ũngĩ mwega kũrĩ we mwene.’ (Afil. 2:3) Athuri ũmũthĩ o nao maiguaga o kũrũmĩrĩra kĩonereria kĩa Jesu, nĩguo nao matuĩke ‘kĩonereria harĩ rũũru.’
21. Nĩ kĩheo kĩrĩkũ Athuri magĩrĩirũo nĩ gũtanya?
21 Petero aarĩkĩrĩirie mĩario yake harĩ athuri na njĩra ya kũgweta kĩĩranĩro kĩa ihinda rĩũkĩte. (Thoma 1 Petero 5:4.) Arori arĩa aitĩrĩrie maguta ‘nĩ makaheo thũmbĩ ĩrĩ riri, o ĩrĩa ĩtagacoka kũũma,’ hamwe na Kristo kũrĩa igũrũ. Nao athuri a “ng’ondu ingĩ” makaaheo wĩra wa kũrĩithia rũũru rwa Ngai thĩinĩ wa thĩ rungu rwa wathani wa “mũrĩithi ũrĩa mũnene.” (Joh. 10:16) Gĩcunjĩ kĩrĩa kĩrũmĩrĩire nĩ kĩarĩrĩirie nĩ na njĩra irĩkũ andũ thĩinĩ wa kĩũngano mangĩnyita mbaru arĩa mamũrĩtwo gũtongoria.
Gũcokera na Njĩra Nguhĩ
• Waarĩ ũndũ wa bata nĩkĩ Petero gwĩkĩra athuri arĩa angĩ ngoro kũrĩithia rũũru rwa Ngai rũrĩa meehokeirũo?
• Athuri magĩrĩirũo kũrĩithia arĩa arũaru kĩĩroho atĩa?
• Nĩ kĩĩ gĩtindĩkaga athuri kũrĩithia rũũru rwa Ngai rũrĩa mehokeirũo?
[Ciũria cia wĩruti]
[Mbica karatathi ka 25]
O ta arĩithi a hĩndĩ ya tene, ũmũthĩ athuri nĩ magĩrĩirũo nĩ kũgitĩra “ng’ondu” iria mehokeirũo