“Mu Lise Mutapi Wa Mulimu O Ku Mina”

“Mu lise mutapi wa Mulimu o ku mina, isi ka ku hapelezwa, kono ibe ka ku lata.”—1 PIT. 5:2.

1. Bakreste ne ba talimana ni butata mañi Pitrosi ha naa ñozi liñolo la hae la pili?

MUAPOSITOLA Pitrosi naa ñozi liñolo la hae la pili kuli a tiise balumeli ka yena. Diabulosi naa ‘nzaa zamaya-zamaya’ kuli a ce Bakreste. Kuli ba mu hanele ka ku tiya, ne ba swanela ku “no iswala” ni ku ‘ikokobeza mwatasaa lizoho la Mulimu le li na ni maata.’ (1 Pit. 5:6, 8) Hape ne ba tokwa ku swalisana. Ne ba sa swaneli ku ‘lumana ni ku celana’ kakuli ku eza cwalo ne ku ka tahisa kuli ba ‘felisane.’ (Magal. 5:15) Liñolo la Pitrosi hape ne li ñozwi ka nako ye lukela kakuli hamulahonyana wa fo, Nero a kalisa ku lwanisa Bakreste ba mwa Roma.

2, 3. Ki mañi ye lu swanela ku lwana ni yena, mi lu ka nyakisisañi mwa taba ye ni ye tatama?

² Ni luna lu talimana ni butata bo bu swana. Diabulosi u bata ku lu ca. (Sin. 12:12) Mi kwapili ku ka ba ni “ñalelwa ye tuna” ye si ka bonwa kale ku zwa kwa simuluho ya lifasi. (Mat. 24:21) Bakreste ba pili ne ba swanela ku tokolomoha likomano, mi ni luna lu swanela ku eza cwalo. Kuli lu ambuke likomano, fokuñwi lu tokwa ku tusiwanga ki baana-bahulu.

³ Ha lu boneñi ka mo maeluda ba kona ku boniseza kuli ba itumela hahulu ku ba ni tohonolo ya ku ‘lisa mutapi wa Mulimu o ku bona.’ (1 Pit. 5:2) Ku zwa fo, lu ka ituta ka mo ba swanela ku petela musebezi wa ku lisa mutapi. Mi mwa taba ye tatama, lu ka nyakisisa ka mo puteho i kona ku ‘kutekela ba ba sebeza ka taata ni ku zamaisa’ mutapi. (1 Mates. 5:12, NW) Ku nyakisisa litaba zeo ku ka lu tusa ku hanela Sila sa luna se situna ka ku tiya, lu nze lu ziba kuli ki sona se lu lwana ni sona.—Maef. 6:12.

Mu Lise Mutapi wa Mulimu

4, 5. Baana-bahulu ba swanela ku nga cwañi mutapi? Mu fe mutala.

⁴ Pitrosi naa susuelize baana-bahulu mwahalaa Bakreste ba pili kuli ba lise mutapi wa Mulimu hande. (Mu bale 1 Pitrosi 5:1, 2.) Pitrosi niha naa ngiwa kuli ki musumo mwa puteho, naa si ka bulela ka ku ipahamisa fahalimu a maeluda. Kono naa ba susuelize ka ku bulela kuli ne li maeluda sina yena. (Magal. 2:9) Sina mwa naa ezelize Pitrosi, Sitopa se si Etelela kacenu ni sona si susuezanga maeluda ba mwa liputeho kuli ba ikataze ku peta buikalabelo bwa bona bwa ku lisa mutapi wa Mulimu.

⁵ Muapositola yo naa ñozi kuli baana-bahulu ne ba swanela ku ‘lisa mutapi wa Mulimu o ku bona.’ Ne ba tokwa ku lemuha kuli mutapi ki wa Jehova ni Jesu Kreste. Maeluda ne ba na ni ku ikalabela ka mo ne ba babalelela lingu za Mulimu. Mu nahane kuli mulikanaa mina u mi kupa kuli mu babalele bana ba hae ka nako ya ka ba siyo. Kana ne mu si ke mwa ba babalela hande ni ku ba fepa? Haiba yo muñwi ku bona a kula, kana ne mu si ke mwa mu batela likalafo? Kamukwaoswana, maeluda ba mwa liputeho ba swanela ku ‘lisa puteho ya Mulimu, ya itekezi ka mali a Mwanaa hae.’ (Lik. 20:28, NW) Ba ziba kuli ngu ni ngu ne i lekilwe ka mali a butokwa a Kreste Jesu. Bakeñisa kuli ba ka  ikalabela, maeluda ba swanela ku fepa mutapi, ku u sileleza, ni ku u babalela.

6. Ki bufi buikalabelo bo ne ba na ni bona balisana ba kwaikale?

⁶ Mu kengeyele buikalabelo bo ne ba na ni bona balisana ba kwaikale. Ne ba babalelanga lingu niha ne ba ciswa ki lizazi musihali, ni ku shwa silami busihu. (Gen. 31:40) Ne ba itombolanga bupilo bwa bona bakeñisa lingu. Davida ha na li mulisana naa yangwelanga lingu za hae kwa libatana. Ha ne ku taha tau kamba bere, Davida naa ize ‘a i swala kwa mutahali wa kwatasi, a i nata, mi a i bulaya.’ (1 Sam. 17:34, 35) Bo ne li bundume luli! Kakuli libatana zeo ne li ka kona ku mu holofaza. Nihakulicwalo, naa ikatalize ku sileleza lingu za hae.

7. Maeluda ba kona ku yangwela cwañi lingu mwa mulomo wa Satani ka swanisezo?

⁷ Maeluda kacenu ba tokwa ku sileleza lingu ha li lwaniswa ki Diabulosi ya swana sina tau. Ba kona ku eza cwalo ka ku yangwela ngu mwa mulomo wa Diabulosi ka swanisezo, ili nto ye tokwa bundume. Ba kona ku ambolisana ni mizwale ba ba sa tokomeli, ili ba ba wezi mwa malaba a Satani. (Mu bale Juda 22, 23.) Kono maeluda ha ba koni ku sileleza mutapi ba tusiwi ki Jehova. Ba tusa ngu ye holofezi ka musa, ili ku i toba ka mulyani o mwa Linzwi la Mulimu.

8. Maeluda ba susuezanga lingu kuli li ye kai, mi ki ka mukwa ufi?

⁸ Mulisana hape naa isanga lingu kwa mafulisezo ni manwelo a mande. Kamukwaoswana, maeluda ba susuezanga lingu kuli li yange kwa mikopano ya puteho kamita ilikuli li yo fepiwa hande ni ku fiwa “lico ka nako ye lukela.” (Mat. 24:45) Maeluda ba tokwa ku tusa ba ba kula kwa moya kuli ba fepiwe ka Linzwi la Mulimu. Ngu ye keluhile i kona ku ikataza ku kutela mwa mutapi. Maeluda ha ba swaneli ku sabisa muzwale ya cwalo, kono ba swanela ku talusa ka musa likuka za mwa Mañolo ni ku mu bonisa mwa kona ku li sebeliseza.

9, 10. Maeluda ba swanela ku tusa cwañi lingu ze kula?

⁹ Ha mu kula, ki mualafi ya cwañi ye mu  kona ku tabela kuli a mi alafe? Kana ne mu ka tabela mualafi ya mi teeleza feela ka nakonyana ni ku mi ñolela mulyani kapili-pili kuli a kone ku bona mukuli yo muñwi? Kamba kana ne mu ka tabela mualafi ya mi teeleza ka tokomelo, ya mi taluseza butuku bo mu kula, ni ku mi bulelela likalafo ze kona ku mi tusa?

¹⁰ Kamukwaoswana, maeluda ba kona ku teeleza ku mutu ya kula kwa moya ni ku mu tusa kuli a fole, ili “ku mu toza oli ka Libizo la Mulena” ka swanisezo. (Mu bale Jakobo 5:14, 15.) Sina mafula a mulyani a kwa Giliadi, Linzwi la Mulimu ni lona la kona ku omba-omba mutu ya kula. (Jer. 8:22; Ezek. 34:16) Mutu ya fokola ha latelela likuka za mwa Bibele, wa kona ku kalisa ku sebeleza Jehova hape ka mukwa o munde. Kaniti maeluda ba ka eza hande hahulu haiba ba teeleza ngu ye kula ha i ba bulelela butata bwa yona, ni ku lapela ni yona.

Isi ka ku Hapelezwa, Kono Ibe ka ku Lata

11. Ki nto mañi ye susumeza maeluda ku lisa mutapi wa Mulimu ka ku lata?

¹¹ Pitrosi hape naa hupulisize baana-bahulu ka mo ba swanela ku liseza mutapi ni mo ba sa swaneli ku u liseza. Maeluda ba lukela ku lisa mutapi wa Mulimu, “isi ka ku hapelezwa, kono ibe ka ku lata.” Ki nto mañi ye susumeza maeluda ku sebeleza mizwale ba bona ka ku lata? Ba susuezwa ki nto ye ne susumelize Pitrosi ku lisa lingu za Jesu ni ku li fepa. Nto yeo ne li lilato la ku lata Mulena. (Joa. 21:15-17) Bakeñisa lilato, maeluda ‘ba lisela ku ipilela, kono ba pilela ya ba shwezi.’ (2 Makor. 5:14, 15) Lilato leo, ku beya cwalo ni lilato la ku lata Mulimu ni mizwale ba bona, li susumeza maeluda ku sebeleza mutapi ka mo ba konela kaufela, ka ku itusisa nako ya bona ni ze ba na ni zona. (Mat. 22:37-39) Ba ifana ka ku lata, isi ka ku hapelezwa.

12. Muapositola Paulusi naa ifanile ka mukwa ufi?

¹² Maeluda ba swanela ku ifana ka mukwa ufi? Ha ba babalela mutapi, ba likanyisa muapositola Paulusi, sina yena ha naa likanyisize Jesu. (1 Makor. 11:1) Bakeñisa sishemo se ne ba na ni sona kwa mizwale ba mwa Tesalonika, Paulusi ni balikani ba hae ne ba lakalize ku ba fa ‘isi Evangeli ya Mulimu feela, kono ni bupilo bwa bona.’ Ha ne ba nze ba eza cwalo, ne ba bile ni musa, “sina muanyisi mwa babalelela bana ba hae ka lilato.” (1 Mates. 2:7, 8) Paulusi naa utwisisa ka mo me ya anyisa a ikutwela ka za bana ba hae. Wa kona ku ba ezeza nto ifi kamba ifi, mane nihaiba ku zuha fahalaa busihu kuli a ba fepe.

13. Maeluda ba tokwa ku peta cwañi buikalabelo bwa bona?

¹³ Maeluda ba tokwa ku tokomela kuli ba pete hande buikalabelo bwa bona bwa ku lisa mutapi ni ku babalela mabasi a bona. (1 Tim. 5:8) Maeluda ba itombolanga nako ye ba swanela ku ina ni mabasi a bona kuli ba sebeleze puteho. Ye ñwi ya linzila ze ba kona ku peta hande ka zona buikalabelo bo, ki ka ku memelanga ba bañwi kwa tuto ya bona ya lubasi. Halaa lilimo, eluda ya pila mwa Japan ya bizwa Masanao, naa memelanga makwasha ni mabasi a si na bashemi ba ba li balumeli kwa tuto ya lubasi lwa hae. Hamulaho wa nako, ba bañwi be ne ba memiwanga ba ba maeluda mi ba likanyisa mutala o munde wa bo Masanao.

Mu Ambuke Bufumu bo bu Maswe—Mu Lise ka Pilu ye Lata

14, 15. Ki kabakalañi maeluda ha ba swanela ku tokolomoha “bufumu bo bu maswe,” mi ba kona ku likanyisa cwañi Paulusi mwa taba ye?

¹⁴ Pitrosi hape naa susuelize maeluda ku lisa mutapi, “isi kabakala bufumu bo bu maswe, kono ibe ka pilu ye lata.” Musebezi o ba eza maeluda u nganga nako ye ñata kono ha ba libeleli ku lifiwa kabakala musebezi wo.  Pitrosi naa lemusize baana-bahulu kuli ku fosahalile ku lisa mutapi “kabakala bufumu bo bu maswe.” Baeteleli ba bulapeli bwa “Babilona yo mutuna” ba eza bufosi bo kakuli bona ba fuma ka bubotana bwa batu ba bañata. (Sin. 18:2, 3) Maeluda kacenu ba swanela ku tokomela kuli ba si ke ba ba ni mukwa o cwalo.

¹⁵ Paulusi naa tomezi maeluda mutala o munde. Nihaike kuli naa li muapositola mi naa kona ku “imeza” Bakreste ba mwa Tesalonika, ‘ha ku na buhobe bwa mutu bwa naa cile feela.’ Kono naa “sebelize ka taata ni ka mukatala, busihu ni musihali.” (2 Mates. 3:8) Maeluda ba bañata kacenu, ku beya cwalo ni baokameli ba maeto, ba toma mutala o munde mwa taba ye. Niha ba tabelanga ku amuhelwa ki balumeli ka bona, ha ba ‘imezangi’ mutu ufi kamba ufi.—1 Mates. 2:9.

16. Ku lisa mutapi “ka pilu ye lata” ku talusañi?

¹⁶ Maeluda ba lisanga mutapi “ka pilu ye lata.” Ba bonisanga ku lata kwa bona ka ku itombola ku tusa mutapi. Kono ha ba hapelezangi mutapi ku sebeleza Jehova mi ha ba susuezangi ba bañwi ku sebeleza Mulimu ka moya wa kangisano. (Magal. 5:26) Maeluda ba ziba kuli ngu ni ngu ha i swani ni ye ñwi. Ba lata ku tusa mizwale ba bona kuli ba sebeleze Jehova ka tabo.

Isi ka ku Busa Mutapi, Kono ka ku U Ezeza Mutala

17, 18. (a) Ki kabakalañi baapositola ka linako ze ñwi ha ne palelwanga ku utwisisa tuto ya Jesu ya ku ba ni buikokobezo? (b) Lu itutañi kwa taba yeo?

¹⁷ Sina mo lu itutezi, maeluda ba swanela ku hupulanga kuli mutapi o ba lisa ki wa Mulimu, haki wa bona. Ba tokolomoha ku ‘busa mutapi ka taata.’ (Mu bale 1 Pitrosi 5:3.) Ka linako ze ñwi, baapositola ba Jesu ne ba banga ni milelo ye fosahezi. Sina babusi ba macaba, ni bona ne ba batanga ku ba ni litulo.—Mu bale Mareka 10:42-45.

¹⁸ Kacenu, mizwale ba ba “lata ku kena fa buluti” ba swanela ku itekula kuli ba bone libaka ha ba bata ku eza cwalo. (1 Tim. 3:1) Ba ba se ba li maeluda ni bona ba kona ku ipuza haiba ba lakaza ku ba ni maata kamba libubo sina mo ne ba ezelize baapositola. Haiba baapositola ne ba na ni butata bo, u zibe maeluda ba swanela ku sebeza ka taata kuli ba si ke ba ba ni moya wa lifasi wa ku lata ku zamaisa ba bañwi.

19. Maeluda ba swanela ku hupulangañi ha ba bata ku sileleza mutapi?

¹⁹ Ki niti kuli fokuñwi maeluda ba tokwa ku sebelisa maata a bona ha ba fa likelezo, inge cwalo ha ba tokwa ku sileleza mutapi kwa “litongwani ze buhali.” (Lik. 20:28-30) Paulusi naa bulelezi Tite kuli a zwelepili ku “kutaza ni ku siulula batu ka maata kaufela.” (Tite 2:15) Kono maeluda niha ba tokwa ku eza cwalo, ba likanga ku kuteka batu be ba tusa. Ba ziba kuli ku omanya mutu ya fosize ha ku tusi se siñwi, kono ba tokwa ku ambola hande ni yena kuli ba mu fite kwa pilu ni ku mu susueza ku eza ze lukile.

20. Maeluda ba kona ku likanyisa cwañi Jesu?

²⁰ Mutala o munde wa Kreste u susueza maeluda ku lata mutapi. (Joa. 13:12-15) Lwa susumezwanga ha lu bala ka mwa naa lutezi balutiwa ba hae musebezi wa ku kutaza ni ku tusa batu ku ba balutiwa. Bakeñisa kuli naa ikokobeza, naa ba susumelize ku pila ‘ka  buikokobezo inze ba hupula kuli ba bañwi ba ba fita.’ (Mafil. 2:3) Kamukwaoswana, maeluda kacenu ba susuezwa ku likanyisa mutala wa Jesu, mi ni bona ba swanela “ku ezeza mutapi mutala.”

21. Ki mupuzo ufi o ba libelezi maeluda?

²¹ Kwa mafelelezo a manzwi a hae kwa baana-bahulu, Pitrosi naa bulezi ka za sepiso ye ñwi. (Mu bale 1 Pitrosi 5:4.) Baokameli ba ba tozizwe ba “ka amuhela kuwani ya bulena, ya kanya, ye sa sinyehi” hamoho ni Kreste mwa lihalimu. Baokameli ba ba balelwa kwa “lingu ze ñwi” ba ka ba ni tohonolo ya ku lisa mutapi wa Mulimu fa lifasi mwa puso ya “Mulisana yo mutuna.” (Joa. 10:16) Taba ye tatama i ka bonisa ka mo ba ba mwa puteho ba kona ku tuseza ba ba etelela.

Lundululo

• Ki kabakalañi Pitrosi ha naa elelize maeluda ka yena kuli ba lise mutapi wa Mulimu o ne ba filwe?

• Maeluda ba swanela ku lisa cwañi batu ba ba kula kwa moya?

• Ki nto mañi ye susumeza maeluda ku lisa mutapi wa Mulimu o ba filwe?

[Lipuzo za Tuto]

[Siswaniso se si fa likepe 21]

Sina balisana ba kwaikale, maeluda kacenu ni bona ba swanela ku sileleza “lingu” ze ba filwe