“Biñenu Mukanka Wanyikoku Yanzambi Wudi Mukachi Kenu”
“Biñenu Mukanka Wanyikoku Yanzambi Wudi Mukachi Kenu”
“Biñenu mukanka wanyikoku yaNzambi wudi mukachi kenu, nakuyitala; bayi chakukanjikijaku, chiña nakutiya kuwaha mwaya muchima waNzambi.”—1 PET. 5:2.
1. Muloñadi Petulu chakeñeleñayi kukolesha akwawu akwakwitiya hampinji yasonekeliyi mukanda windi watachi?
KUMPINJI yakunyima henohu Nero kanda yatachiki kukabisha akwaKristu muRoma, kapostolu Petulu wasonekeli mukanda windi watachi. Wakeñeleña kukolesha akwawu akakwitiya. Diyabolu wadiña ‘nakuya nakutambatamba,’ nakukeñakeña akwaKristu akudyayi. Hakwila adikañi nindi, ateleleli ‘kwikala ababala’ ‘nikudizoza mwishina dachikasa chaNzambi chañovu.’ (1 Pet. 5:6, 8) Ateleleli cheñi kwikala anuñañana. Hiyadiña mpinji ‘yakudisumona nakudidya wumu namukwawuku,’ muloña chadi kuyileñela ‘kudijilumuna wumu namukwawu.’—Ŋal. 5:15.
2, 3. Hinyi itwalwishaña nindi, nawa yumanyi yitukuhanjekahu muniyi yibaaba?
2 Makonu, tunakumona kukala kwokumu. Diyabolu nakukeña kuwana hakutudyila. (Chim. 12:12) Nawa kumbidi yetu kudi “lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi.” (Mat. 24:21) Anetu nawa twatela kuleka kuditobwesha wumu namukwawu neyi chocheliluwu akwaKristu amuyaaka nkulakaji yatachi. Hakwila nawu tutweshi kwila mwenimu, mpinji yikwawu chiña atukwashaku kudi aeluda.
3 Tushinshikenu aeluda chatela kusweja kulemeshawu mudimu wakubiña ‘mukanka wanyikoku yaNzambi wayinkawu mukachi kawu.’ (1 Pet. 5:2) Kuhiñahu, tukushinshika hanjila yayiwahi yakuzatilamu mudimu wakubiña. Muchibaaba chinalondeluhu, tukadiza chipompelu chichatela ‘kulemesha akalakalaña nañovu nikulombola’ anyikoku. (1 Tesa. 5:12) Kushinshika haniyi nsañu kukutukwasha kudikaña chikupu naMukwankunyi netu, nikwiluka netu diyi itwalwishaña nindi.—Efwes. 6:12.
Biñenu Mukanka Wanyikoku yaNzambi
4, 5. Indi akulumpi muchipompelu atela kumona ñahi anyikoku? Shimunenu chakutalilahu.
4 Petulu wayikolesheli akulumpi adiña mukachi kawakwaKristu muyaaka nkulakaji yatachi kumona anyikoku ayinkeluwu kuhemba neyi chayimonañayi Nzambi. (Tañenu 1 Petulu 5:1, 2.) Hela chakwila amumweneña muchipompelu nawu hichishimi, Petulu hahosheleña chatama hadi aeluda, nakudimona neyi yena wabadikaku. Ilaña, wayikonkomweneni chachiwahi nindi hiyakwawu aeluda. (Ŋal. 2:9) Hakwikala nayililu neyi yadiña naPetulu, Izaza Dalombolaña makonu dakoleshaña aeluda muchipompelu kuzata nañovu kulonda akalakali mudimu walema wakubiña nyikoku yaNzambi.
5 Kapostolu wasonekeli nindi akulumpi ateleleli ‘kubiña mukanka wanyikoku yaNzambi wayinkawu.’ Chadiña chalema nankashi kwiluka nawu mukanka wanyikoku wambala waYehova niYesu Kristu. Aeluda adi kulumbulula kumesu aNzambi chahembeleñawu nyikoku yaNzambi. Twili netu ibwambu denu imwakeñesha yayileja nindi mumuhembeluku anyanindi neyi nafumuhu. Komana himukuyihemba chachiwahi nikuyidyishaku? Neyi mwana wumu yakata, himwatela kumutwala kuchipatela kulonda amuukiku? Munjila yoyimu, aeluda muchipompelu atela ‘kubiña chachiwahi chipompelu chaNzambi chalandiliyi namashi Amwanindi yomweni.’ (Yil. 20:28) Anukaña nawu mukoku wejima amulandili namashi alema aKristu Yesu. Chineli amba kalumbulula, aeluda adiishaña, kukiña nikwakamena anyikoku.
6. Atubiña akushankulu adiña namudimwinyi?
6 Toñojokenu hanyidimu yazatileña atubiña akumujimba kumpinji yakunyima. Nampinji yamwaana nkanza yayocheleña nawa chishika chayibabileña nawufuku hakufwila kwakamena anyikoku. (Kutach. 31:40) Ashileña niwumi wawu hakatoña kukola anyikoku. Davidi kabiña wakansi wapulwishili nyikoku yindi kutunwa twawanyama amwisaña, mutupa nibera. Davidi wahosheli hadi awa atunyama nindi, “Nimukwata nikuwevu windi hinukumutapa nimujaha nikumujaha.” (1 Sam. 17:34, 35) Wadiña nawulobu chikupu! Washikili chikupu kwakwihi nakumaji achisumi! Hela chochu, wadinkeluku chikupu kulonda yapulwishi anyikoku.
7. Indi aeluda anateli kuhukula ñahi anyikoku kumaji aSatana, muchifwikija?
7 Makonu, aeluda atela kwikala asoñama kulonda akiñi anyikoku kukulukuka kwaDiyabolu kudi neyi kwamutupa. Kwikala asoñama kunateli kubombelamu kwikala ahamuka nakuhukula mukoku kumaji aDiyabolu muchifwikija. Kuhitila mukukwata kuwevu wakanyama, dikwila nawu, aeluda anateli kupulwisha anyikoku. Anateli kuhanjeka nawamana kwetu anazeyi anaholokeli munyihetu yakweseka kwaSatana. (Tañenu Yuda 22, 23.) Hela chochu, aeluda hiyazataña iwu mudimu chakadi wukwashu waYehovaku. Akamenaña mukoku wunadikatishi, nakukasa hachitu chindi nikumuuka nachuma chakuwundisha nachu muchima chekala Mwizu daNzambi.
8. Aeluda alombolaña anyikoku kudihi, nawa munjilanyi?
8 Kabiña wawanyikoku walombweleña cheñi anyikoku kumunyenvu wawuwahi nikwiluña kudi menji. Chochimu, aeluda alombolaña anyikoku muchipompelu, nikuyikolesha apompeña mpinji yejima kulonda anyikoku aheteleñamu chachiwahi nawa atambwileña ‘yakudya yawu hampinji yatelela.’ (Mat. 24:45) Aeluda atela kwikala nampinji yeneni yakukwasha akata kuspiritu kulonda atambwili yakudya yekala Mwiizu daNzambi. Hadaha mukoku wajimbala nakufwila kufunta kumukanka wawanyikoku. Chatela amutiyisheña woma, aeluda akumulumbulwila chachiwahi nshimbi yamuNsona nikumuleja chatela kuyizatishayi muchihandilu chindi.
9, 10. Aeluda atela kwakamena ñahi antu akata kuspiritu?
9 Neyi munakati, mwakeñaña ndotolu wamuchidinyi? Komana mwakeñaña ndotolu wukutiyilila hadi mpinji yantesha nakunyakala kushimuna yitumbu kulonda yanyakali kutala muyeji mukwawu? Tahindi mwakeñaña ndotolu wukuyitiyilila chikupu, nakuyilumbulwila kukala kumukweti, nikuyinka yitumbu yatela kuyuuka?
10 Chochimu, aeluda atela kutiyilila muntu wakata kuspiritu nakumukwasha kulonda yakoli, muchifwikija dikwila nawu “amuwayishi manji mwijina daMwanta.” (Tañenu Yakoba 5:14, 15.) Neyi chokileña yitumbu yabalsamu yakuGiliyadi, Izu daNzambi dinateli kuwundisha muchima wamuntu wakata. (Yere. 8:22; Ezek. 34:16) Neyi muntu wakata kuspiritu yazatisha nshimbi yamuBayibolu, yikumukwasha kufuukulahu cheñi kutachika kumukalakela Yehova chikupu. Eñañi, aeluda elaña chuma chachiwahi chikupu neyi atiyilila chinakulumbulula mukoku wakata nikulomba nindi hamu.
Bayi Chakukanjikijaku Chiña Nakutiya Kuwaha
11. Chumanyi chayisañumunaña aeluda kubiña nyikolu yaNzambi mukudikeñela?
11 Petulu wayanukishili cheñi akulumpi chatela kuzatawu mudimu wakubiña niyuma yatela kubula kwilawu. Aeluda atela kubiña nyikolu yaNzambi, “bayi chakukanjikijaku, chiña nakutiya kuwaha.” Chumanyi chaleñelaña aeluda akalakeleña amana kwawu nakutiya kuwaha? Chumanyi chamuleñeleli Petulu yabiñi nikudyisha nyikoku yaYesu? Muloña wamukeñeli chikupu Mwanta. (Yow. 21:15-17) Hamuloña wakwikala nakukeña, aeluda ‘hiyadihandilaña cheñi awenawuku, amuhandilaña yena wayifwilili.’ (2 Kor. 5:14, 15) Iku kukeña, nikumukeña Nzambi niamana kwawu, kwayileñelaña kukalakela anyikoku, kuzatisha ñovu yawu, maheta awu, nimpinji. (Mat. 22:37-39) Adihanaña awenawu, bayi chakuyikanjikijaku, ilaña mukudikeñela.
12. Munjilanyi mwadihaniniyi kapostolu Pawulu?
12 Aeluda atela kudihana ñahi? Hakwakamena anyikoku, embujolaña kapostolu Pawulu, wamwimbujoleleña Yesu. (1 Kor. 11:1) Hamuloña wakukeña amana kwindi amuTesalonika, Pawulu nialunda nindi atiyili kuwaha ‘kuyishimwina nsañu yayiwahi yaNzambi hohuku, ilaña ayinkeli niwumi wawu.’ Hakwila mwenimu, ekalili amwovu “neyi chalelañayi nleli anyanindi yomweni.” (1 Tesa. 2:7, 8) Pawulu welukili chatiyañayi nleli hadi anyanindi. Wayikoñelaña yuma yejima yinakukeñawu, nawa wahindukaña mukachi kawufuku nakuyidisha.
13. Aeluda atela kuzata ñahi nyidimu yachipompelu?
13 Aeluda atela kwiluka chikupu mwakuzatila nyidimu yakubiña ninyidimu yamuchisaka chawu. (1 Tim. 5:8) Mpinji yazatishañawu aeluda hakukalakala nyidimu yachipompelu himpinji yalema yatela kuzatishawu kuchisaka chawu. Njila yimu yayiwahi yakuzatilamu iyi nyidimu yidi yakutambika antu amakwawu mumpinji mumpinji haKudifukula kwaChisaka kwamelela. Masanao eluda wakuJapan wahosheli nindi hadi yaaka yayivulu watambikileña ajiki niyisaka yabula atata jawu apompaña kwinza kukudiza kwachisaka chindi. Chimwahitili mpinji, antu amakwawu ayikwashili kwikala aeluda nawa embujoleli chakutalilahu chachiwahi chaMasanao.
Tondolwelenu Kuheta Kwatama, Biñenu Anyikoku naMuchima Wumu
14, 15. Muloñadi aeluda chatelelawu kutondolwela ‘kuheta kwatama,’ nawa anateli kumwimbujola ñahi Pawulu?
14 Petulu niyena wakolesheli aeluda kubiña anyikoku, “bayi nakulonda kuheta kwatamaku, chiña namuchima wakukeñamu.” Mudimu wazatañawu aeluda wasendaña mpinji yeneni nankashi, ilaña hiyakuhwelelaña kuyifweta maliku. Petulu wasoñamishili akwawu akulumpi muloña welukili wubanji wekala mukubiña anyikoku namuchima ‘wakukeña kuheta kwatama.’ Chihandilu chawakulumpi jansakililu ‘amuBabiloni Muneni’ chakufwila maheta chamwekeshaña wubanji weniwu muloña antu amavulu ayileñelaña kushakama muwuzweñi. (Chim. 18:2, 3) Aeluda makonu atela kwikala asoñama kulonda atondolweli chaaku chamuchidiwu.
15 Pawulu wayimikilili aeluda akwaKristu chakutalilahu chachiwahi. Chineli wadiña kapostolu mutenowu chiña wekalili ‘chiteli chalema wuseya’ kudi akwaKristu muTesalonika, ‘hayidiilili yakudya yawu chamukunkuluku.’ Ilaña, ‘wakabakeni nakukalakala wufuku nimwaana.’ (2 Tesa. 3:8) Aeluda amavulu makonu, kushilahu niankoñi ekala mumudimu wakwenda, emikaña chakutalilahu chachiwahi. Hela chakwila ahamekaña chisambu chayimwekeshelañawu kudi akwawu akwakwitiya, ‘hiyatambulaña yuma kudi’ antuku.—1 Tesa. 2:9.
16. Indi kubiña anyikoku “namuchima wakukeñamu” kwatalisha mudihi?
16 Aeluda abiñaña anyikoku “namuchima wakukeñamu.” Muchima wawu wakukeña wamwekenaña muyililu yawu yakudihana hakukwasha anyikoku. Hela chochu, hichinatalishi mukwila nawu akanjikijaña anyikoku kumukalakela Yehovaku; nawa aeluda akweti kukeña hiyakoleshaña akwawu kulonda amukalakelaña Nzambi nayililu yakudibechaku. (Ŋal. 5:26) Aeluda eluka nawu anyikoku ejima alema. Afwilaña kukwasha amana kwawu kulonda amukalakeleña Yehova namuzañalu.
Bayi Mwikala Anyanta Hadi Anyikokuku, Chiña Mwikala Akutalilahu
17, 18. (a) Muloñadi apostolu mpinji yikwawu chakañenyeñawu kwiluka nsañu yatañishileñayi Yesu kutalisha hakudizoza? (b) Kukalanyi kwadifwanaku kutwatela kumona?
17 Neyi chitunahanjekuhu, aeluda atela kwiluka nawu anyikoku abiñañawu ambala aNzambi, bayi neyi awuku. Atela kuzata chiwahi kulonda ‘abuleña kwikala anyanta anawa ayishililuwu kuhemba kudi Nzambi.’ (Tañenu 1 Petulu 5:3.) Mpinji yikwawu, apostolu aYesu akeñeleña yifulu munjila yaheña. Kufwana anyanta ayulileña nyuza, akeñeleña yifulu yahewulu.—Tañenu Maku 10:42-45.
18 Makonu, amana kwetu anakukeña “mudimu wakutala akwawu” atela kudishinshika aweni kulonda eluki muloña wunakukeñelawu iwu mudimu. (1 Tim. 3:1) Aeluda makonu atela kudishinshika chikupu kulonda amoni neyi adi namuchima wakufwila wanta hela kutiyakana mpuhu neyi cheliluwu apostolu amakwawu. Neyi chakwila apostolu akeñeleña wanta nikutiyakana mpuhu, dikwila nawu aeluda atela kuzata nañovu kulonda atondolweli chaaku chamukaayi chakukeña kwikala anyanta hadi akwawu.
19. Chumanyi chatela kwilukawu aeluda hampinji yinakufwilawu kukiña anyikoku?
19 Mpinji yikwawu, aeluda atela kwikala akola, chidi neyi hampinji yinakukiñawu anyikoku kudi “atuñwidi azuwa.” (Yil. 20:28-30) Pawulu walejeli Titusa kutwalekahu “nakukonkomwena nikukonkolola nañovu yejima.” (Tit. 2:15) Hela tuhu hampinji yinakukonkomwenawu, aeluda atela kulemesha antu anakufumbawu. Eluka nawu chatela ayisawuleña anyikoku chikupu, atela kuyishinjila chachiwahi kukuyikwasha kuyishika hanyichima nikukwasha muntu kulonda yalondeli njila yayiwahi.
20. Indi aeluda anateli kumwimbujola ñahi Yesu hakwimika chakutalilahu chachiwahi?
20 Chakutalilahu chaYesu chasañumunaña aeluda kukeña anyikoku. (Yow. 13:12-15) Twazañalalaña neyi tutaña nsañu yashimunaña chatañishileñayi atumbanji twindi mumudimu wakushimwina nikwila atumbanji. Kudizoza kwindi kwayikwashili atumbanji twindi, nawa kwayisañumwini kulondela njila yamwekesheleña nawu adiña ‘nayitoñojoka yakudizoza, nakutoñojoka nawu akwawu, ayibadikili kuwaha.’ (Fwi. 2:3) Aeluda makonu niwena afwilaña kulondela chakutalilahu chaYesu, nawa akeñaña “kwikala akutalilahu anyikoku.”
21. Wulokwinyi watela kutalilawu aeluda?
21 Petulu wakunkulwili kukonkomwena kwindi kudi akulumpi kuhitila mukushimuna chikaninu chakumbidi. (Tañenu 1 Petulu 5:4.) Ankoñi awayishewa ‘akatambula nichibaaba chakulema chakalepukaña’ naKristu mwiwulu. Atubiña anyanya amwizanvu ‘danyikoku yacheñi’ akekala nakukooleka kwakubiña nyikoku yaNzambi heseki muchiyuulu ‘chaKabiña muneni.’ (Yow. 10:16) Chibaaba chinahiñuhu chikalumbulula njila antu amuchipompelu mwatela kukwashilawu antu atondawu kulombola.
Tuhitulukenumu
• Muloñadi Petulu chayikonkomweneniyi akwawu aeluda kubiña anyikoku aNzambi ayinkawu kuhemba?
• Aeluda atela kubiña ñahi antu akata kuspiritu?
• Chumanyi chayisañumunaña aeluda kubiña nyikoku yaNzambi ayinkawu kuhemba?
[Malwihu aKuzatisha haKudiza]
[Mwevulu wudi hefu 21]
Kufwana atubiña akunyaka, aeluda makonu atela kukiña “anyikoku” ayinkawu kuhemba