“In Zînga Pathian Berâmte Chu Enkawl Ṭha Rawh U”
“In Zînga Pathian Berâmte Chu Enkawl Ṭha Rawh U”
“In zînga Pathian berâmte chu enkawl ṭha rawh u, tihluih ngai lovin . . . châk taka tiin.”—1 PET. 5:2, C.L. Re-edited.
1. Engvângin nge Petera’n a lehkha thawn hmasa zâwk ziaka a unaute tihchak a duh?
NERO-A’N Rom khuaa Kristiante tihduhdahna a chawh chhuah hma kum engemaw zâtah, tirhkoh Petera chuan a unaute tihchak a duh avângin a lehkha thawn hmasa zâwk chu a ziak a. Chutih lai chuan Diabola chu Kristiante ei tumin “a phi ruai” a ni. A laka ding nghet thei tûr chuan, “ngaihven” renga an awm leh ‘Pathian kut chak tak hnuaia an intihhnuai’ a ngai a. (1 Pet. 5:6, 8) Tin, inlungrual taka an awm a ngai bawk. Anni chu ‘inseh a, inei tawn’ thei ziazâng an ni lo; ‘intihboral tawnna’ a ni dâwn si a.—Gal. 5:15.
2, 3. Tu nge kan buan ber tûr chu ni a, he mi leh a dawtah thuziakah eng thu nge kan ngaihtuah dâwn?
2 Tûn laiah pawh chutiang dinhmun chu kan tâwk a. Diabola chuan min ei theihna tûr hun remchâng a zawng reng a ni. (Thup. 12:12) Kan hma lawkah ‘leilung pian tirh ata tûn thleng pawha la awm ngai lo hrehawmna nasa tak’ a lo thleng thuai dâwn bawk si. (Mt. 24:21) Kum zabi khatnaa Kristiante ang bawkin, thil ho tê têa inhnial buaina lakah kan invêng tûr a ni. Chutianga invêng thei tûr chuan, upate ṭanpuina mamawh châng kan nei ṭhîn.
3 Upate’n ‘Pathian berâmte enkawl’ tûra chanvo an neih an ngaih hlut lehzual theih dân lo ngaihtuah ila. (1 Pet. 5:2) Chutah, berâmte enkawl dân tûr dik kan ngaihtuah leh ang. A dawta thuziakah chuan, kohhrana mite’n berâmte tâna ‘thawkrim leh, [enkawl tûra] hotua awmte an ngaihhlut’ theih dân kan bih chiang ang. (1 Thes. 5:12, 13) Hêng thute ngaihtuahna chuan kan Hmêlma lian ber laka ding nghet tûr leh kan buan chu amah ngei a ni tih hre tûrin min ṭanpui ang.—Eph. 6:12.
Pathian Berâmte Enkawl Rawh U
4, 5. Engtin nge upate chuan berâmte chu an thlîr ang? Entîrna pe rawh.
4 Petera chuan kum zabi khatnaa Kristiante zînga upate chu an kuta kawltîr berâmte thlîr dân dik nei tûrin a fuih a. (1 Petera 5:1, 2 chhiar rawh.) Kohhran nghahchhan ban ang tluka ngaih mah ni se, Petera chuan upa dangte hnuaichhiah zâwngin thu a sawi lo va, a fuih zâwk a ni. (Gal. 2:9) A rilru put hmang ang neiin, tûn laia Governing Body chuan kohhran upate chu Pathian berâmte enkawl tûra an mawhphurhna sâng tak hlen tum hrâm hrâm tûrin a fuih a ni.
5 Tirhkoh chuan upate chu “Pathian berâmte enkawl ṭha” tûr an nih thu a ziak a. An tân chuan berâmte chu Jehova leh Isua Krista ta an ni tih hriat chu a pawimawh ber a ni. Upate chuan Pathian berâmte an vên dânah chanchin sawi tûr an nei a ni. I ṭhian ṭha takin a kal bo hlâna a fate lo enkawl tûrin ti ta che se la, ṭha taka lo enkawlin, i lo châwm dâwn lâwm ni? An zînga pakhat chu dam lo ta se, a mamawh ang enkawlna chu i dawntîr ngei dâwn lâwm ni? Chutiang bawkin, kohhrana upate chu ‘Pathian kohhranho, ama [Fapa] thisena a leite châwm tûr’ an ni a. (Tirh. 20:28) Anni chuan berâm tinte chu Krista Isua thisen hlu taka lei an ni tih an hre reng a ni. Chanchin sawi tûr an nih angin, upate chuan berâmte chu an châwmin, an vênghim a, an enkawl bawk a ni.
6. Hmân laia berâm tak tak vêngtute mawhphurhna chu eng nge ni?
6 Bible hun laia berâm tak tak vêngtute mawhphurhna chu han ngaihtuah teh. Berâmte vêng tûrin chhûn ni sa leh zân khaw vâwt an tuar a. (Gen. 31:40) Chu bâkah, berâmte tân an nun an thâp hial bawk. Davida chuan berâm a vên laiin, sakeibaknei leh savawm pawh tiamin ramsa lak ata a berâm rualte a chhan chhuak a. Chûng ramsate chungchângah “a bak hmulah ka man a, ka bei a, ka tihlum ṭhîn” tiin a sawi. (1 Sam. 17:34, 35) A va huaisen tak êm! Ramsa chuan a va seh teuh dâwn êm! Chuti chung pawhin, berâmte chhanhim nân theihtâwp a chhuah a ni.
7. Engtin nge upate chuan Setana kâa berâm awm chu an chhuhsak theih?
7 Tûn laiah, upate chu sakeibaknei anga Diabola beihna laka an harhvân a ngai a. Chutah chuan Diabola kâ aṭanga berâmte chhuhsak ang maia sawi theih tûr huaisen taka thiltih a tel thei a ni. Ramsa a bak hmula man ang maia thil tiin, upate chuan berâmte chu an chhan chhuak thei a. Anni chuan Setana thang hîpa awm bum awlsam unaute chu an dinhmun hlauhawm dân an chhûtpui thei a ni. (Juda 22, 23 chhiar rawh.) Mahse, upate chuan Jehova ṭanpuina tel lovin chutiang chuan an ti thei lo. Hliam tuar berâmte chu dimdâwi taka enkawlin, tidam sawng sawng thei Pathian Thu hnawihin, an tuamsak a ni.
8. Upate chuan berâm rual chu khawi lamah nge an hruai a, engtin nge an hruai?
8 Berâm tak tak vêngtu chuan a berâm rual chu hlobet hring awmna leh tui tamna hmunah a hruai ṭhîn. Chutiang bawkin, upate chuan berâm rual chu kohhran lamah hruaiin, berâmte’n “a hun apianga an chaw chan tûr” dawnga an châwm theih nân inkhâwm ziah tûrin an fuih ṭhîn a ni. (Mt. 24:45) Upate tân Pathian Thu aṭanga châwmna dawng tûra thlarau lama dam lote ṭanpui nân hun tam tak hman a ngai thei a. Berâm kal bo pawh chuan lo kîr leh a tum reng pawh a ni thei. Upate chuan an unaute vau aiin, Bible thu bulte chu dimdâwi taka hrilhfiahin, an nunpui theih dân an kawhhmuh zâwk ṭhîn a ni.
9, 10. Engtin nge upate chuan thlarau lama dam lo chu an ngaihsak ang?
9 I dam loh hian eng ang doctor nge pan i duh? I thusawi rei lo tê a ngaihthlâk hnua dam lo dang a en theihna tûra damdawi chawh nghâl zung zungtu chu em ni pan i duh? Nge ni a, i thusawi zawng zawng ngaithla a, thil fel lo ni thei âwmte a hrilhfiah hnua a enkawl theih dân kawng awmte hrilhtu doctor chu pan i duh zâwk dâwn?
10 Chutiang bawkin, upate chuan thlarau lama dam lo thusawi chu ngaihthlâksakin, a hliam tidam tûrin an ṭanpui thei a; chutiang chuan ‘Jehova hmingin hriak an hnawih’ a ni. (Jakoba 5:14, 15 chhiar rawh.) Gilead-a balsam thinghnai damdawi angin, Pathian Thu chuan dam lo chu a thawi dam thei a. (Jer. 8:22; Ezek. 34:16) Bible thu bulte nunpuina chuan chutiang mi chu thlarau lama inbûk tâwk leh tûrin a ṭanpui thei a ni. Ni e, berâm dam lo tibuaitu thilte an ngaihthlâk hnua upate ṭawngṭaisakna chuan thil ṭha tak a thlen thei a ni.
Tihluih Ngai Lova Châk Taka Tiin
11. Engin nge upate chu Pathian berâmte châk taka enkawl tûra chêttîr?
11 A dawtah Petera chuan upate chu berâm enkawlna kawnga an tih tûr leh tih loh tûrte a hriattîr a. Upate chuan Pathian berâmte chu ‘tihluih ngai lovin, châk takin’ an enkawl tûr a ni. Engin nge upate chu châk taka an unaute rawngbâwlsak tûra chêttîr? Awle, engin nge Petera chu Isua berâmte enkawl tûr leh châwm tûra chêttîr? Lalpa a hmangaihna leh a ngainatnain a chêttîr a ni. (Joh. 21:15-17) Hmangaihna avângin, upate chu ‘mahni tâna nung tawh lovin, an thih aia thia tân’ an nung a. (2 Kor. 5:14, 15) Pathian leh an unaute an hmangaihna inkawp chu hmangaihna chuan upate chu berâmte rawng bâwlsak nâna an tha leh zung te, sum leh pai te, leh an hunte pe tûrin a chêttîr a. (Mt. 22:37-39) Anni chu tihluhna vâng ni lovin, châk tak zâwkin an inpe a ni.
12. Eng ang khawpin nge Paula chu a inpêk?
12 Eng ang khawpin nge upate chu an inpêk ang? Berâmte enkawlna kawnga tirhkoh Paula’n Isua a entawn angin, anni chuan Paula chu an entawn a ni. (1 Kor. 11:1) Paula leh a ṭhiante chuan Thessalonika khuaa unaute an hmangaih avângin ‘Pathian chanchin ṭha chauh ni lovin, an nun hial pawh pêk’ an duh a. Chu mi avângin, “nu, nau pawmin ama fate a duat angin” an chungah nunnêm takin an awm a ni. (1 Thes. 2:7, 8) Paula chuan nu nau pawmin a fa a duat a; zan laia hnutê pe tûra thawh pawh tiamin, a tân engpawh a tihsak ṭhîn tih a hria a ni.
13. Upate tân eng mawhphurhna nge lâk kawp thiam ngai?
13 Upate tân berâmte enkawl tûr leh mahni chhûngkaw enkawl tûra an mawhphurhna la kawp thiam tûra fîmkhur a ngai a. (1 Tim. 5:8) Upate’n kohhran tâna hun an hmante chu an chhûngte tâna an hman theih tûr hun hlu tak a ni. Chu mawhphurhna pahnihte an inbûk tâwktîr theih dân kawng khat chu Chhûngkuaa Pathian Biakna an neih zâna mi dangte sâwm tel châng neih hi a ni. Japan rama upa pakhat, Masanao-a chuan, kum kalta chhûngte khân kohhrana nupui pasal nei lote leh ringtu nu leh pa nei lote chu an chhûngkuaa Pathian thu an zirnaah a sâwm ṭhîn a. A hnuah chuan, chutianga a ṭanpuina dawngtute zînga ṭhenkhat chu upa an lo ni ve ta a, a entîrna ṭha tak chu an entawn a ni.
Hlêpna Bawlhhlawh Hnâwlin, Rilrua Duh Takin Berâmte Enkawl Rawh U
14, 15. Engvângin nge upate chu “hlêpna bawlhhlawh” duhna lakah an invên ang a, he mi chungchângah engtin nge Paula an entawn theih?
14 Petera chuan upate chu ‘hlêpna bawlhhlawh duh vâng ni lovin, rilrua duh tak zâwka’ berâmte enkawl tûrin a fuih bawk a. Upate hnathawh chuan hun a la hnem ang reng a; mahse, chu mi atâna sum hmuh an inbeisei lo. Petera chuan ‘hlêpna bawlhhlawh duh vânga’ berâm enkawl a hlauhawmzia chungchângah a ṭhian upa dangte vaukhân a ngai tih a hria a ni. Chu thil hlauhawm chu mi dang tam takte rethei taka an awm laia ‘Babulon Khaw Ropuia’ sakhaw hruaitute hausa leh nuamsa taka an nun dânah hian a lang a. (Thup. 18:2, 3) Tûn laia upate chuan chutianga nun ve duhna eng pawh do chhan tûr ṭha tak an nei a ni.
15 Paula chuan Kristian upate tân entawn tûr ṭha tak a hnutchhiah a. Tirhkoh a nih angin, Thessalonika khuaa Kristiante ‘tihautak’ zâwnga khawsa thei reng mah ni se, ‘a thlâwnin an chhang a ei ngai lo.’ Chu ai mahin, ‘achhûn azânin hah tak leh rim takin hna a thawk zâwk a ni.’ (2 Thes. 3:8) Bial kantute pawh tiamin, tûn laia upa tam tak chuan he mi chungchângah entawn tûr ṭha tak an siam a. Unaute khualchhâwn thiamna chu dawng ṭhîn mah se, tumah an ‘tihautak lo.’—1 Thes. 2:9.
16. ‘Rilrua duh takna’ nêna berâmte enkawl tih awmzia chu eng nge ni?
16 Upate chuan berâmte chu “rilrua duh tak zâwkin” an enkawl a. Chutianga an duhna chu berâmte ṭanpuina kawnga mahni an inpêkna rilru put hmangah a lang a ni. Chu chu, Jehova rawngbawl tûrin berâmte an tilui tihna a ni lo va; hmangaihna nei upate chuan inelna rilru nêna Pathian rawngbâwl tûrin mi dangte chu an fuih hek lo. (Gal. 5:26) Upate chuan berâmte chu an inang lo ṭheuh tih an hria a. Jehova rawng hlim taka bâwl tûra an unaute ṭanpui chu an duh hle a ni.
Berâmte Chunga Intilal Lovin, Entawnan Insiam Rawh U
17, 18. (a) Engvângin nge tirhkohte chuan inngaihtlâwmna chungchânga Isua zirtîrna hriatthiam loh châng an neih? (b) Keini pawh eng dinhmun hnuaiah nge kan awm ve theih?
17 Kan sawi tawh angin, upate chuan an enkawl berâmte chu anmahni ta ni lovin, Pathian ta a ni tih an hre reng tûr a ni a. Pathian kawltîr ‘an chante chunga intilal’ lo tûrin an fîmkhur a ni. (1 Petera 5:3 chhiar rawh.) A châng chuan, Isua tirhkohte chuan rilru put hmang dik lo neiin hotu nih an tum a. Jentailte chunga rorêltute angin, dinhmun sâng leh langsâr tak chelh chu an duh a ni.—Marka 10:42-45 chhiar rawh.
18 Tûn laia ‘kohhran hotua ṭang duhte’ chuan ṭan an duh chhan chu an bih chiang tûr a ni a. (1 Tim. 3:1) Tûna upa ni mêkte pawhin tirhkoh ṭhenkhatte neih ang thu neih duhna emaw, challan duhna emaw an neih leh neih loh inenfiah chu an duh ngei ang. Tirhkohte mahin he mi chungchânga harsatna an neih si chuan, upate chuan mi dangte chunga thu neih duhna khawvêl rilru put hmang pumpelh tûrin an thawh rim a ngai tih an hre thiam a ni.
19. Upate chuan berâmte vênhim nâna zilhna an pêk hunah eng nge an hriat reng ang?
19 “Chinghne kawlhte” laka berâmte vênhim a ngaih hun ang chi-ahte chuan upate tân zilhna khauh tak pe tûra an thu neihna hman a ngaih châng a awm thei ngei mai. (Tirh. 20:28-30) Paula pawhin Tita chu ‘thunei taka fuih a, zilh’ zêl tûrin a hrilh a ni. (Tit. 2:15) Mahse, chutianga tih a ngaih hunah pawh upate chuan zilh ngaite chu zahawm taka cheibâwl an tum a. Mi dangte sawisêl vak ai chuan, dimdâwi taka thlêmna chuan mi rilru a khawih zâwkin, kawng dik zawh tûrin a chêttîr thei zâwk tih an hria a ni.
20. Engtin nge upate chuan entawn tûr ṭha siamna kawngah Isua an entawn theih?
20 Krista entawn tûr siam ṭha tak chuan upate chu berâmte hmangaih tûrin a chêttîr a. (Joh. 13:12-15) A zirtîrte hnêna thu hrilh leh zirtîr siam dân a zirtîr dân chanchin kan chhiarna chuan kan rilru a tihlim a ni. A inngaihtlâwmna chuan a zirtîrte thinlung a khawih hle a, ‘inngaitlâwm taka mahni aia mi dang ṭha zâwka ruat’ tûrin anni chu a chêttîr a ni. (Phil. 2:3) Chutiang bawkin, tûn laia upate pawh Isua entîrna siam zui tûra chêttîr an ni a, berâmte “entawnan insiam” lehchhâwn chu an duh a ni.
21. Upate chuan eng lâwmman nge an beisei theih?
21 Petera chuan upate a fuihna chu nakina an hmuh tûr thutiam hmangin a titâwp a. (1 Petera 5:4 chhiar rawh.) Hriak thih upate chuan vânah Krista rualin ‘ropuina lallukhum vuai thei lo chu an hmu ang.’ “Berâm dang” zînga upate chuan “Berâm Vêngtu Lalber” rorêlna hnuaia Pathian berâmte vên theihna chanvo an nei ang. (Joh. 10:16) A dawta thuziakah chuan kohhrana mite’n hma hruaitu tûra ruat upate an thlâwp theih dân kawngte sawiho a ni ang. (w11-E 06/15)
Ennawn Nân
• Pathian kawltîr berâmte enkawl tûra Petera’n a ṭhian upa dangte a fuihna chu engvângin nge inâwm tak a nih?
• Engtin nge upate chuan thlarau lama dam lote an enkawl ang?
• Engin nge upate chu Pathian kawltîr berâmte enkawl tûra chêttîr?
[Zirlai Atâna Zawhnate]
[Phêk 25-naa milem]
Hmân laia berâm vêngtute angin, tûn laia upate chuan an enkawlna hnuaia awm “beramte” chu an vênghim tûr a ni
