“[Kuentˈattë] yëˈë jäˈäyëty diˈibë Dios të mdukëdëkëdë. Tundë dëˈën xondaˈakyˈää xondaˈakyjyot, [...] es kyaj mët ko të myajtukˈanaˈamdë.” (1 PEED. 5:2)

1. ¿Ti jotmayë naty wyinguwäˈkëdëp ja Dios mëduumbë diˈibë Pedro tyunijäˈäyë ja nyeky?

KO Pedro tjääy ja tim jawyiimbë nyeky, tamë naty ja yajkutujkpë Nerón tpajëdijttsondäˈäganë ja Dios mëduumbëty diˈib Roma. Päätyë Pedro yëˈë naty jyotmëkwingäjpxëyaampy ja myëguˈuktëjk, pesë Mëjkuˈu duˈunë naty jyëdity extëmë kää diˈib tsuˈutsäämp. Ets parë tjëjpkuwäˈägëdët, tsojkëbë naty “jyiky[attët] wijy” ets nyaybyëjtäˈägëdët yuunk naxypy “Dios wyindum” (1 Peed. 5:6, 8). Nan tsojkëbë naty yˈittët tuˈugyë. Kyaj naty ttiempëty ets nyaygyay nyaytsyuˈutsëdët, pes mbäädë naty nyayajkëxëdë ak yëˈëjëty (Gal. 5:15).

2, 3. ¿Pën diˈib nmëtsipˈäjtëm, ets tijaty yajtëˈëwën yaˈˈatsoojëmbitäämp mä tyäˈädë artikulo ets mä ja tuˈukpë?

² Tyam nanduˈun nyajpatëm. Mëjkuˈu yˈëxtaabyë winmäˈäny wiˈix mbäät xytsyuˈtsëm (Diˈibʉ Jat. 12:12). Nan wingoomp ja “mëk ayoˈon, extëm ni näˈänëm kyajaty [kyakëbety] axtë mä naxwinyëdë tsyondaky” (Mat. 24:21). Ets duˈun extëm ja Dios mëduumbë diˈib tëëyëp, nan kyaj yˈoyëty ntsiptuˈunëm ak ëtsäjtëm. Parë kyaj duˈun njäjtëm, tsojkëp etsë mëjjäˈäytyëjk xypyudëjkëm diˈib mä naymyujkën.

³ ¿Ti mbäät pyudëkëdë mëjjäˈäytyëjk parë tmëjpëjtäˈäktët ja tuunk mä tkuentˈattë jäˈäy diˈibë Dios të tyukëdëkëdë? (1 Peed. 5:2.) ¿Wiˈix mbäät ttundë tyäˈädë tuunk? Mä tyäˈädë artikulo nˈatsoojëmbitäˈänëmë tyäˈädë yajtëˈëwën. Ets mä ja tuˈukpë, nnijawëyäˈänëm wiˈix mbäät nmëmëdoˈojëm ko nyaˈˈanmäˈäyëm: “Xymyayˈat xywyintsëˈëgëdët ja diˈibaty tuundëp mët miitsëty, es mˈëwij mgäjxwijëdë” (1 Tes. 5:12). Tyäˈädë ëxpëjkën xypyudëkëyäˈänëm wiˈix mbäät nwinguwäˈkëmë Nmëtsipˈäjtëm ets kyaj njäˈäytyëgoˈoyëm ko yëˈë mëët ntsiptuˈunëm (Éfe. 6:12).

Kuentˈattë ja “jäˈäyëty diˈibë Dios të mdukëdëkëdë”

4, 5. ¿Wiˈix mbäädë mëjjäˈäytyëjk tˈixtë jäˈäy diˈibë Dios të tyukëdëkëdë? Nimaytyäˈäk mët tuˈugë ijxpajtën.

⁴ Pedro tˈanmääy ja mëjjäˈäytyëjk ets kyaj mëj këjxm nyayajnaxëdët mä tkuentˈattë ja jäˈäy diˈibë Dios të tyukëdëkëdë (käjpxë 1 Peedrʉ 5:1, 2). Oyë natyë Pedro nan mëj yˈity mä ja naymyujkën, kyaj mëj këjxm nyayajnäjxë ko ojts tmëgajpxy ja myëguˈuktëjk, duˈun nyayajnäjxë extëm ja diˈib nanduˈun tuundëp mëjjäˈäy (Gal. 2:9). Nan yëˈë duˈumbë jäˈäyˈäjtën yaˈijxëdëp Diˈib wyooyoˈoytyëbë Jyobaa tyestiigëty, ko tˈanëëmëdë mëjjäˈäytyëjk ets tmëjpëjtäˈäktëdë tadë tuunk mä tkuentˈattët ja jäˈäy diˈibë Dios të tyukëdëkëdë.

⁵ Tyäˈädë apostëlë jyënany ko mëjjäˈäytyëjk, yëˈë kyuentˈäjttëp ja jäˈäyëty diˈibë Dios të tyukëdëkëdë. Tsojkëbë naty tjaygyukëdët ko yëˈë Jyobaa jyaˈäjttëp mëdë Jesukristë, ets ko kuentëkëyakandëp wiˈixë naty tkuentˈattë. Nˈokpëjtakëm tuˈugë ijxpajtën: Tuˈugë mmëtnaymyaayëbë tsyoony ets mduknipekyëty xykyuentˈatëdë yˈuˈunk yˈënäˈk. ¿Këdii mguentˈatëp yajxon ets myajkay myaˈuuktëp? Ets ko niduˈuk pyäˈämbatët, ¿këdii netyë xymyënëjkxët mä doktoor  parë tsyoybyatët? Nanduˈun jyaty mëdë mëjjäˈäytyëjk, nyijäˈädëp ko të yajtuknipëktë “nidëgekyë ja jäˈäy diˈibë pyojpëty të tkë[bety] yëˈë Nintsënˈäjtëm Jesukristë mët ja kyëˈëm neˈpyny” (Apos. 20:28). Yaˈijttëp wyinmäˈänyoty ko tuˈuk tuˈugë borreegë të yajkujuy mëdë Jesukristë nyeˈpyny. Ets kom nyijäˈädëp ko kuentëkëyakandëp, pääty dyajjëˈkx dyajpëktë, tˈijxˈit tkuentˈattë ets tkuwäˈändë.

6. ¿Wiˈix ijty tyuny ja borreegë kuentˈäjtpë?

⁶ Mbäät njënäˈänëm ko tyamë mëjjäˈäytyëjk nanduˈunë tyuunk extëm ijty ja borreegë kuentˈäjtpë. Ko ijty twojptsoondë ja byorreegë, ta dyajnaxtë ambë etsë mëk xux koots o tëtykypyë (Gén. 31:40). Nan pyëjtaktëp ijtyë jyukyˈäjtën oˈkën jëjpˈam mët yëˈëgyëjxm ja byorreegëty. Extëmë David diˈibë naty jeˈeyënëm yaˈkpëtsemy, ojts twinguwäˈägë tuˈugë kää etsë osë parë ojts dyaˈˈawäˈätspëtsemy ja byorreegë. Yëˈë jyënany ko yoˈkˈakmëmäjtsë ja jëyujk, tnaxkujëduˈujë ets ta dyaˈoˈky (1 Sam. 17:34, 35). ¡Yaˈijxë jotmëkˈäjtën ko tmëwingoony ja awäˈän jëyujk! Nitii tkatsëˈk tkajäˈäwë parë ja byorreegë dyaˈˈawäˈätspëtseemy.

7. ¿Ti tyuundëbë mëjjäˈäytyëjk ko tuˈugë borreegë myatsyëtyë Satanás?

⁷ Tyam, nan listë yˈittë mëjjäˈäytyëjk ko Satanás dyajkäˈäjäˈänyë Dios mëduumbë. Pën tuˈugë borreegë mäjtsëbë tyäˈädë awäˈän gää, ta nanduˈun dyaˈixëdë jotmëkˈäjtënë extëmë David ko netyë ttukˈawoˈonduˈuttë. Ko tˈixtë tuˈugë Dios mëduumbë të nyaygyujäˈäytyëgoyëty ets tamë Mëjkuˈu yajkäˈäjanënë, ta netyë ttukjaygyukëdë (käjpxë Juudʉs 22, 23). Ets ko tuˈugë borreegë tsyayuty, ta tpit tmotstë ets ttukjääxtë aseytë diˈib yajtsoybyajtp, o ja tuk peky njënäˈänëm, tyukpudëjkëdëbë Diosë yˈAyuk. Ets ttundë duˈun mëdë Jyobaa nyaybyudëkë.

8. ¿Mä mëjjäˈäytyëjk twoonëjkxtë ja borreegë ets wiˈix?

⁸ Ja borreegë kuentˈäjtpë jam ijty twoonëjkxy ja byorreegë mä jyamëtyë jeˈxy etsë nëë. Nanduˈun tyamë mëjjäˈäytyëjk ttuˈumoˈoytyë Diosë kyäjpn ko tˈanëëmëdë ets xëmë nyëjkxtët mä naymyujkën mä mbäät tˈaxäjëdë ja käˈäy ukën diˈib tsojkëp parë yˈittët oy mëk (Mat. 24:45). Nan jyuˈttëbë  tiempë parë tpudëkëdë maˈkxtujkën myëët ja diˈib kyaj oy mëk yajpäättë Dios windum ets tˈaxäjëdët ja käˈäy ukën diˈib tsoˈomp mä Biiblyë. ¿Ets ti tyuundëp ko tuˈugë borreegë jyëmbitäˈäny diˈib të tyuˈudëgoy? Kyaj tˈatsëˈëk tˈajawëdë, niˈigyë mëdë oyjyaˈayˈäjtën ttukmëtmaytyäˈäktë Diosë yˈAyuk ets ttukˈixtë wiˈix mbäät tkuytyuny.

9, 10. ¿Wiˈix mbäädë mëjjäˈäytyëjk dyajtsoybyattë ja diˈib yajpattëp päˈäm mëët?

⁹ Ko mijts mbäˈämbety, ¿diˈibë doktoor mninëjkxaampy? ¿Waˈan yëˈë xynyinëjkxäˈänët ja diˈib kyaj tmëdooˈitët yajxon wiˈix mbekyëty, ets pojënë tjantsy nyasjayët ja mtsooy mët ko tapë wiink jäˈäy dyajnaxäˈäny? ¿O ja diˈib yajxon myëdooˈitëp ets mdukmëtmaytyäˈägëdët ti päˈäm mmëdäjtypy ets wiˈix mbäät mtsoybyety?

¹⁰ ¿Wiˈixë mëjjäˈäytyëjk pyudëkëdë tyäˈädë ijxpajtën? Tsojkëp tmëdooˈitët yajxon wiˈix yaˈixy yajpääty ja diˈib kyaj yˈoy myëkëty, ets tpudëkët parë jatëgok nyiwij nyikajët ko ttukjääxëdë aseytë “xyëëgyëjxmë Jyobaa” (käjpxë Santiago 5:14, 15, Traducción del Nuevo Mundo). Duˈuntsoo ja Diosë yˈAyuk nëjkxëp dyajnayjawëty oy ja jäˈäy extëm ja aseytë diˈib Galaad (Jer. 8:22; Eze. 34:16). Ko tpadunët extëmë Diosë yˈAyuk jyënaˈany, ta nëjkx tpeky ja jyot myëjää. ¡Jantsy oy nyayjawëtyë borreegë diˈib të tsyayuty ko mëjjäˈäytyëjk tmëdooˈittë wiˈix yaˈixy yajpääty ets ko mëët nyuˈkxtäˈäktë!

Tundë xondaˈakyˈää xondaˈakyjyot ets kyaj aguanë

11. ¿Ti pudëjkëdëbë mëjjäˈäytyëjk parë tkuentˈattë mëbëjkpëtëjk xondaˈakyˈää xondaˈakyjyot?

¹¹ Pedro, ta net tˈanmääy ja mëjjäˈäytyëjk diˈib kyuentˈäjttëp ja mëbëjkpëtëjk ti mbäät ttundë ets ti kyaj. Tim jawyiin tˈanmääytyë: “Tundë dëˈën xondaˈakyˈää xondaˈakyjyot, [...] es kyaj mët ko të myajtukˈanaˈamdë”. ¿Ti mbäät pyudëkëdë mëjjäˈäytyëjk parë duˈun tmëdundët ja myëguˈuktëjk? ¿Ti pudëjkë Pedro parë tkuentˈäjty ets tmooyë jyeˈxy pyeky ja Jesusë byorreegë? Yëˈë mët ko ttsejky ja Wyintsën (Fwank 21:15-17). Nanduˈunë mëjjäˈäytyëjk, mët ko tmëdattë tsojkën kyaj nyekyjukyˈattë parë yëˈë këˈëm, yëˈë duˈun parë “Jesukristë diˈibë oj xykyuˈoˈkëm” (2 Kor. 5:14, 15). Ko ttsoktë Dios etsë myëguˈuktëjk, yëˈë pudëjkëdëp parë dyajtundë jyot myëjää, xyëë tiempë etsë myeeny syentääbë (Mat. 22:37-39). Xondaˈakyˈää xondaˈakyjyot duˈun tyundë, kyaj atsip aˈˈakë.

12. ¿Wiˈixë Pablo tkuentˈäjty ja myëguˈuktëjk?

¹² ¿Axtë nuˈunën nyayoxëdë mëjjäˈäytyëjk? Duˈun tkuentˈattë borreegë extëmë Pablo diˈib nyiˈˈijxtutë Jesus (1 Kor. 11:1). Tyäˈädë apostëlë mëdë jyamyëëdëty mëk ttsojktë ja myëguˈuktëjk diˈib Tesalónica, diˈib kyaj jeˈeyë ttuknijawëyandë “ja oybyë ayuk”, nanduˈunën axtë tkuˈoogëyany. Ets xëmë tsuj yajxon tkuentˈäjty “extëm tuˈugë uˈunktääk tˈijxˈity tkuentˈaty ja yˈuˈunk” (1 Tes. 2:7, 8). Pablo nyijäˈäbë naty wiˈix tuˈugë uˈunktääk ttsekyë yˈuˈunk, ets ko tyunëp oytyim tiijëty, extëm tnibëdëˈëgët koots parë dyajtsiˈitsët.

13. ¿Wiˈix mbäädë mëjjäˈäytyëjk ttundë tijaty nyikëjxmˈäjttëp, duˈun mä naymyujkën ets mä fyamilyë?

¹³ Jëjpˈam etsë mëjjäˈäytyëjk ttundët tijaty nyikëjxmˈäjttëp, duˈun mä naymyujkën ets mä fyamilyë (1 Tim. 5:8). Ja tiempë diˈib yajtuundëp mä naymyujkën, yëˈë diˈib kyaj dyajnaxtë mëdë fyamilyë. Pääty tuk peky wiˈix mbäät dyajtundë tiempë duˈun mä fyamilyë ets mä nmëguˈukˈäjtëm, yëˈë ko twowdët näˈä ganäˈätyë nmëguˈukˈäjtëm mä Diosˈawdattë mëdë Fyamilyë. Duˈun kanäk jëmëjt kujk ttunyë Masanao mëdë fyamilyë diˈib tsënaapy Japón. Tyäˈädë mëjjäˈäy yëˈë wyoobyë naytyuˈukˈënäˈktëjk etsë familyë mä ja uˈunkteety kyaj Tyestiigëty. Ets ko tiempë nyaxy, ta näägë tyäˈädë nmëguˈukˈäjtëm tyuundëkëdë mëjjäˈäy ets tpanëjkxtë Masanao kyostumbrë.

Kyaj mët ko myeenyˈookˈattë

14, 15. ¿Tiko kyaj mbäädë mëjjäˈäytyëjk myeenyˈookˈattët, ets wiˈix mbäädë Pablo yˈijxpajtënë tpanëjkxtë?

¹⁴ Pedro nanduˈun jyënany ko ja mëjjäˈäytyëjk  kyaj tkuentˈattët ja mëbëjkpëtëjk mët ko myeenyˈookˈattë. Oy mëjwiin kajaa xyëë tiempë dyajtundë, kyaj tˈawixtë ets pënë meeny sentääbë myoˈoyëdët. Pedro tˈanmääy ja mëjjäˈäytyëjk ets kyaj myeenyˈookˈattët mët ko kujotmayë tyäˈädë, extëm nˈijxëmë wintsëndëjk diˈib mä mëj “Babilonyë” nyayajmëkjäˈäytyäˈägëdë myentrës ja jyaˈayëty oˈktëyë xyëë tiempë dyajnaxtë (Diˈibʉ Jat. 18:2, 3). Yëˈë mëjjäˈäytyëjk tsojkëp tyam nyaygyuentˈatëdët mëdë duˈumbë jäˈäyˈäjtën.

¹⁵ Pablo pyëjtakë ijxpajtën parë pënaty tuundëp mëjjäˈäy. Kom apostëlë naty tyuny ojtsxyëp aduˈuk ttukˈijxpety ja myëguˈuktëjk diˈib Tesalónica. Per yëˈë jyënany: “Es ni ngakääy ngaˈuktëts nadëˈënyë. Niˈigyëts nduuny nˈayooy xëëny koots” (2 Tes. 3:8). Tyam, mayë mëjjäˈäytyëjk etsë sirkuitë yäjktëbë oybyë ijxpajtën, kyupëjktëp tijatyë myëguˈujktëjk mooyëdëp, per kyaj tˈamdowdë diˈib ja myëguˈuk myëkjawëp (1 Tes. 2:9).

16. ¿Wiˈixë mëjjäˈäytyëjk dyaˈixëdë ko jyotmooytyëbë tyuunk?

¹⁶ Mëjjäˈäytyëjk diˈib mä naymyujkën yaˈijxëdëp ko jyotmooytyëbë tyuunk. Ets ja dyaˈixëdë ko nyayoxëdë mä ja myëguˈuktëjk tpudëkëdë. Pyudëkëyandëp, per kyaj ttukˈaguanëˈattë parë tmëdundëdë Jyobaa ets nan kyaj tmëjämoˈoytyë parë tˈijxkijpxyëdët tijaty tyuundëp (Gal. 5:26). Nyijäˈädëp ko tëgatsyaty tuˈuk tuˈugë borreegë ets pyudëjkëdëp niˈamukë parë tmëdundëdë Jyobaa xondaˈakyˈää xondaˈakyjyot.

Kyaj nyayajmëjpëtsëmëdë mä ja borreegë, niˈigyë dyaktë ijxpajtën

17, 18. 1) ¿Tiko ojts tsyiptakxëdë ja apostëlëtëjk dyaˈixëdëdët ja yujyˈäjt tudaˈakyˈäjtën? 2) ¿Ti xytyukniˈˈijxëm ko duˈumbë jotmay tpattë?

¹⁷ Extëm të nˈijxëm, yëˈë mëjjäˈäytyëjk tsojkëp tjamyatstët ko ja borreegë diˈib kyuentˈäjttëp, yëˈë Diosë jyaˈa. Päätykyëjxm yaˈˈanëëmëdë ets kyaj nyayajmëjpëtsëmëdët mä jäˈäyëty diˈibë Dios të tyukëdëkëdë (käjpxë 1 Peedrʉ 5:3). Ja Jesusë yˈapostëlëtëjk ojts näˈäty tjaˈˈatsoktë kutujkën, per kyaj naty yˈoyëty ja tsojkën diˈib myëdäjttë. Waˈanë naty të nyinaxëdë ja jäˈäyˈäjtën diˈib myëdäjttëp ja anaˈambëtëjk, diˈib jeˈeyë jyantsy tsyojktëp ja kutujkën (käjpxë Markʉs 10:42-45).

¹⁸ Mä tyäˈädë tiempë, pën ja pën tyunäˈäny “mëbëjkpëtëjk kuentˈäjtpë” oy ko nyayajtëwëdët tiko duˈun tyunäˈäny (1 Tim. 3:1). Ets pënaty duˈun tuundëp, oy ko nyayajtëwëdët pën jeˈeyë ttsoktë kutujkën o mëjˈäjt këjxmˈäjtën extëm nääk ja apostëlë. Pën yëˈëjëty myëdäjttë duˈumbë jotmay, nan mbäät duˈun jyattë mëjjäˈäytyëjk, pääty jyëjpˈamëty ets nyaygyuentˈatëdët.

19. ¿Wiˈix mbäädë mëjjäˈäytyëjk tjëjwijtsëmbittët ja borreegë parë tkuwäˈändët?

¹⁹ Näˈäty, tsojkëbë mëjjäˈäytyëjk dyajtundëdë kyutujkën ko dyaktëdë mëkpë käjpxwijën. Extëm ko tkuwäˈändë ja borreegë mä “waxkäˈuk diˈibë awäˈän” (Apos. 20:28-30). Pablo tˈanmääyë Tito: “Jotmëkmoˈoytyë es jëjwijtsëmbit mët tëgekyë mˈanaˈamën” (Titʉ 2:15). Per mä tjëjwijtsëmbittë, wyintsëˈëgëdëp ja myëguˈuk ets myëjˈijxtëp. ¿Tiko? Yëˈko nyijäˈädëp ko parë jyäˈtët mä jyot kyorasoon ets nyayaˈoyëdët, jëjpˈam ets tmëtmaytyäˈägët tsuj yajxon, kyaj niˈigyë tmëkmëgäjpxët.

20. ¿Wiˈix mbäädë mëjjäˈäytyëjk tpanëjkxtë Jesusë yˈijxpajtën?

²⁰ Jesus yäjk tuˈugë oybyë yˈijxpajtën, pääty ko tuˈugë mëjjäˈäy tkajpxy mä Biiblyë tijatyë  Jesus tyuun, yëˈë pudëjkëp parë ttsokët ja borreegë (Fwank 13:12-15). Jäjtp mä jot korasoon ko nnijäˈäjëm wiˈixë Jesus ttukniˈˈijxë ja yˈëxpëjkpëty. Mëjwiin kajaa jyotjäjtëdë wiˈix ja Wyintsën tyudaˈagyëty ets pääty ojts tpanëjkxëdë yˈijxpajtën etsë net tˈijxtë ko niˈigyë “myëjëty ja [wiink jäˈäy]” (Fili. 2:3). Jesusë yˈijxpajtën nan yëˈë tyam pudëjkëdëbë mëjjäˈäytyëjk, duˈuntsoo yˈittët “extëmë ijxpajtën”.

21. ¿Ti kumäˈäyën yˈawijxtëbë mëjjäˈäytyëjk?

²¹ Ko Pedro tkäjpxwijtääy ja mëjjäˈäytyëjk, ta net tmaytyaky ja kumäˈäyën diˈib yˈaxäjëyandëp (käjpxë 1 Peedrʉ 5:4). Yëˈë mëjjäˈäytyëjk diˈib nëjkxandëp tsäjpotm, yëˈë yˈaxäjëyandëp ja “koronë” diˈib “ijtp winë xëë winë tiempë”. Ets diˈib jukyˈatandëp yä Naxwiiny, yëˈë kyuentˈatandëp ja Diosë byorreegë ko naty yˈaneˈemy ja “borreegë kuentˈäjtpë wyintsën” (Fwank 10:16). Mä ja tuˈukpë artikulo, kanäk peky nnijawëyäˈänëm wiˈix mbäät nbudëjkëmë mëjjäˈäytyëjk diˈib tuundëp mä naymyujkën.

Nˈokjamyajtsëm

• ¿Tiko naty tsyekyëty etsë Pedro tkäjpxwijët ja mëjjäˈäytyëjk parë tkuentˈattët ja jäˈäy diˈibë natyë Dios të tyukëdëkëdë?

• ¿Wiˈix mbäädë mëjjäˈäytyëjk tkuentˈattë ja borreegë diˈib kyaj oy mëk yajpäättë Dios windum?

• ¿Ti mëjämooyëdëbë mëjjäˈäytyëjk parë tkuentˈattëdë jäˈäy diˈibë Dios të tyukëdëkëdë?

[Yajtëˈëwën]

[Letrë diˈib miimp mä dibujë mä pajina 25]

Duˈun extëm ja borreegë kuentˈäjtpë diˈib tëëyëp, nanduˈun tyamë mëjjäˈäytyëjk tkuentˈattë ja borreegë diˈib të yajtuknipëktë