“Mongedmokl er Sel Moterekokl er Kemiu el Delebechel el Sib ra Dios”

“Bo mongedmokl er sel moterekokl er kemiu el delebechel el sib ra Dios, el kele morimel, e bai di le kemiu el mo uaisei.”​—1 PETRUS 5:2.

1. Ngera el blekeradel a blo lechelebangel er ngii a Rekristiano er sel taem er a loluches er a kot el babilengel a Petrus?

SESEI el taem er a uchei er a bo loldechelakl er a Rekristiano er a beluu er a Rom a emperor el Nero, e a apostol el Petrus a lilechesii a kot el babilengel. Ngmle soal el melisiich er a rekldemel er a klaumerang. A Diabelong a ‘mirrael el meliuekl,’ el melasem el mengitechut er a klaumerang er a Rekristiano. Me a lsekum e ngsorir el dechor el mtekengelii, e ngmle kirir el mo melemolem el ‘ulserechakl’ e mo ‘ngariou a rengrir er cheungel a misisiich el chimal a Dios.’ (1 Petrus 5:6, 8) Ngdirrek el mle kirir el melemolem el dmak el ta rengrir. Ngkmal mle kirir el mo kerekikl me lak ‘bo lekabengbangch’ e le tia mle sebechel el mo uchul e te “dul nguemed.”​—Galatia 5:15.

2, 3. Ngtecha ngike el kired el mo mesisiich el omtok er ngii, e ngera el tekoi a bo dosaod er ngii?

² Kede dirrek el chelebangel er a osisiu el blekeradel er chelecha el taem. A Diabelong a osiik a bek el techall el mo mengitechut er a klaumerang er kid. (Chocholt 12:12) Ngdirrek el kmal di kmedung “e ngduubech a kloul ringel, el direkak le borngii ra uchelel a belulechad.” (Matteus 24:21) Ngkired el mo uai tirke el Kristiano er a kot el dart el rak el mle kirir el kerekikl me lak lebo er ngii a klautoketok er a delongelir. Me a bo doruul er tia el tekoi e a lebebil el taem e kede ousbech a ngeso er a remechuodel er a ongdibel.

³ Ka me bo dosaod el kmo te mekerang a remechuodel e mo oba klou el omereng el saul el kirel a techellir el omekerreu er a “delebechel el sib ra Dios.” (1 Petrus 5:2) E a uriul, e kede mo mesaod el kirel a melemalt el rolel a loruul er tia el ureor el omekerreu er a delebechel el sib er a Dios. Ngar er a ongingil el suobel, e kede mo merriter el kmo ngmekerang a ongdibel e sebechel el mo ‘mengull er tirkel meringel loureor ra delongeliu, e [dirrek el] mengeteklel’ a delebechel el sib er a Dios. (1 Thesalonika 5:12) A bo dekerekikl el melatk aika el tekoi e ngsebechel el ngosukid el mo mesisiich el dechor el omtok er ngike el kot el ngarbab el Cheraro, e le kede medengei el kmo ngii a ngike el kired el mo blak a rengud el oltngakl er ngii.​—Efesus 6:12.

Omekerreu er a Delebechel er a Dios

4, 5. Ngkirel el mo ua ngerang a osengir a remechuodel el mo er a delebechel el sib er a Dios? Ka momekesiu.

⁴ A Petrus a millisiich er a remechuodel er a delongelir a Rekristiano er a kot el dart el rak el mo oba osengel a Dios el kirel a delebechel el mla moterekokl er tir. (Monguiu er a 1 Petrus 5:1, 2.) Me alta e te ulemes er a Petrus el ua ta er a klisichel a ongdibel, engdi ngii a dimlak longedecheduch er a remechuodel el ua lengarbab er tir. Ngbai milengelechel er tir el kirel a urerir el mechuodel el kldemel. (Galatia 2:9) Me ngua Petrus, a Chelechad er a Ruungerachel er chelechang a melisiich er a remechuodel er a bek el ongdibel el mo blak a rengrir el meruul er a ngerechelir el omekerreu e dirrek el omekrael er a delebechel er a Dios.

⁵ Ngika el apostol a milluches el kmo a remechuodel a mo ‘mengetmokl er sel moterekokl er tir el delebechel el sib er a Dios.’ Me ngkmal diak el kirir el obes el kmo a delebechel el sib a kloklel a Jehovah me a dirrek el Jesus Kristus. Me a leuaisei, e a remechuodel a kmal kirir el di tir el mo mesaod er tir el kirel a rolel a lomekerreu er a sib er a Dios. Oleko a kmal kmeed el sechelim a olengit er kau el mo omekerreu er a rengelekel el telkib el taem e le ngmo dibus, e ngmo ua ngerang a ulekerreuim el mo er tirka el ngalek? Me a lsekum a ta er tir a mo smecher, e ke ulterekokl el osiik a rolel e nguu el mo er a ukeruul. Me ngdi osisiu, a remechuodel el ngar er a ongdibel a dirrek el ‘klekar er ngiil delebechel, el kirir lomeka ra eklesia ra [Jehovah], el lulecherar ra di rsechel a [Ngelekel  el Jesus.]’ (Rellir 20:28) Tirka el mechuodel a kmal diak el kirir el obes el kmo a derta el sib a mlochar er a kmal mekreos el rsechel a Kristus Jesus. Me te mla moterekokl er a klou el ngerachel el kirir el omekang, e omekerreu e mengetmokl er a delebechel el sib er a Dios.

6. Ngerang a mle ngerechelir a remengkerengel a sib er a irechar?

⁶ Ka di molatk aike el ngerechelir a remengkerengel a sib er a taem er a omelechesel a Biblia. Ngmle kirir el mengard er a kleald a lemellomes e dirrek el kmal mo mekerasem a leklebesei me bo el sebechir el omekerreu a delebechel. (Genesis 31:40) Ngdirrek el mle kirir el mo ocherur a kodall el kirel a sib. A ngeasek el David el mengkerengel a sib a milsebechakl a delebechel el sib er a meklou el tebelik el charm, el uldimukl er a laion me a kuma. Ngii el David a milsaod er ngii el omeruul el kmo: “E ak urekedii a chiklel e olebedii e mekodir.” (1 Samuel 17:34, 35) Ngkmal mle bekeu a David! Ngulterekokl el mlo orreked er a ngerel a tebelik el charm! Me nguaisei, ngriruul aike el rokui el sebechel el olsobel er a sib er ngii.

7. Te mekerang e mo sebechir a remechuodel el omekerreu er a delebechel el sib me lak lemekesuseu er a chelebeldil a Satan?

⁷ Chelecha el taem e a remechuodel a dirrek el kirir el mo kerekikl el kirel aike el odelecheklel a Diabelong el ua laion. Tiang a sebechel el uldimukl er ngii a omeruul el uai a chad a bo lolai er a sib er a ngerel a Diabelong. Ngsebeched el omekesiu er a rolel a remechuodel a lomekerreu er a delebechel el sib, el ua bo lorekedii a chiklel a tebelik el charm e lechelebedii el mekodir. Te dirrek el kerekikl el omeklatk er a rudam er tir me lak lemekesuseu er a bedeklel a Satan. (Monguiu er a Judas 22, 23.) Tia el ngerachel a mo sebechir a remechuodel el mo ungil el kutmeklii el okiu a ngelsuil a Jehovah. Te mengetmokl e omekerreu er a mla metemall el sib, el oeak sel lolechet a telemall er a bedengel el omkar er ngii lousbech er a ungil el kar el ngii a Tekingel a Dios el Biblia.

8. Ngkirir a remechuodel el omekrael er a delebechel el bedul ker, e mekerang a loruul er tia el tekoi?

⁸ A remengkerengel a sib a dirrek el omekrael a delebechel el mo er a mellekulek el chudel me aike el basio el ngar ngii a ralm. Me ngdi osisiu, a remechuodel a dirrek el omekrael er a rechedal a ongdibel el mo blechoel el ngar er a bek el temel a miting me bo el sebechir el melisiich a klaumerang er tir e dirrek el mo sebechir el melai a mla ‘mekedmokl el kelir el mechii a blsechel.’ (Matteus 24:45) Me a remechuodel a kirir el mengoit a klou el temir el olengeseu er tirke el mo mechitechut a rengrir me bo el sebechir el lmuut el mo mesisiich el oeak a Tekingel a Dios. A sib el mla mo cheroid er a delebechel a locha melasem el lmuut  el mo teloi er a delebechel. Me a le uaisei, e a remechuodel a diak lomekringel er a odam er tir, e bai mo oba kllourreng el mesaod a omellach er a Bades e dirrek el ochotii a rolel e ngii el odam a sebechel el oltaut aika el tekoi er a klengar er ngii.

9, 10. Ngoeak a ngera el rolel e ngmo sebechir a remechuodel el omekerreu e melisiich er a remechitechetong er a tekingel a Dios?

⁹ Sel bo msecher, e ngtecha el toktang a soam el omes er ngii? Ngike el toktang el di mengedecheduch er kau el di telkib el taem e lmuches a kerum el meskau me bo el sebechel el mereched el mo omes er a kuk ta er a smecher? Me a lechub e ngsoam el omes er ngike el toktang el mengoit er a temel el orrenges er kau, e dirrek el ungil el mesaod er a rekdem me aike el rokui el ungil rolel a ukeruul el sebechel el omekungil er a rekdem?

¹⁰ Me ngdi osisiu, a remechuodel a sebechir el mo ungil el orrenges er a chad el osiik a ngeso, e dirrek el ngosuir el melisiich er a rengul, el sebeched el omekesiu er a omerellir el ua “loba ngklel a [Jehovah] el choiltii ra cheluch.” (Monguiu er a Jakobus 5:14, 15.) Me a Tekingel a Dios a sebechel el mengelaod er a chad el mechitechut a rengul el ua kar er a beluu er a Gilead. (Jeremia 8:22; Esekiel 34:16) Me a otutel a omellach er a Biblia er a chelsel a klengar a kmal sebechel el ngosuir a chad el mla mo mechitechut a rengul el lmuut el mo mesisiich e mo ulterekokl a rengul el kirel a omesiungel el mo er a Jehovah. Nguaisei, a remechuodel a kmal sebechir el remuul a betok el ungil el tekoi el mo melisiich e mengelaod e dirrek el meluluuch el obengkel a chad el mechitechetong a rengul.

Lak Morimel, e Bai Mkengei el Meruul a Tekoi

11. Ngera el tekoi a rulleterir a remechuodel el mo kongei el omekerreu er a delebechel er a Dios?

¹¹ A uriul e a Petrus a kuk ulemeklatk er a remechuodel er a rolel a loruul er tia lureor el mengkar er a delebechel, me a dirrek aike el tekoi el dimlak el kirir el meruul. Me a remechuodel a kirir el omekerreu er a delebechel er a Dios, ‘el kele lemorimel e bai di le tir el mo uaisei.’ Ngera el tekoi a rulleterir a remechuodel el kongei el mo olengeseu er a rudam er tir? E ngera el tekoi a rirellii a Petrus el mo kerekikl el omekerreu e dirrek el omekang er a delebechel el sib er a Jesus? Ngsel bltkil a rengul el mo er a Rubak. (Johanes 21:15-​17) Me ngoeak a bltikerreng, e a remechuodel a ‘dikea le ngar el di kirir, e te bai ngar el kirel ngikel mlad el kirir.’ (2 Korinth 5:14, 15) Me tiakid el rolel a bltikerreng, el lobengkel sel bltkil a rengrir el mo er a Dios me a rudam er tir, a rulleterir a remechuodel el mo blak a rengrir el omekerreu er a delebechel el mengoit er a klou el temir me aike el rokui el ngar ngii er tir el meruul er tia el ngerechelir. (Matteus 22:37-​39) Misei e te kongei el meruul er tia el ureor el diak el lemorimel er a kmung ngtechang el meruul er ngii.

12. Ngmle ua ngerang a klungel me a klemengetel a bltkil a rengul a Paulus el mo er a delebechel?

¹² A remechuodel ngmo ua ngerang a klungel me a klemengetel el loruul er tia el tekoi? Ngkirir el oukerebai er a apostol el Paulus el ngii a uluukerebai er a Jesus er a rolel a lomekerreu er a sib er ngii. (1 Korinth 11:1) A klou el bltkil a rengul a Paulus me a rekldemel el mo er a rudam er tir er a beluu er a Thesalonika a rirelleterir el mo sorir el tonget a klengar er tir ‘el diak di le evangkelio ra Dios e lemerekong, le ngmlo betik a rengrir er tir.’ Me ngkmal mle medemedemek e ungil a omerellir el mo er tir el di ua “oltut el redil a lomekeroul rar ngelekel.” (1 Thesalonika 2:7, 8) Me a Paulus a mle ungil el medengei el kmo ngua ngerang a bltkil a rengul a oltut el chedil el mo er a rengelekel. A chedil a kongei el mo meruul a ngii di el tekoi el mo uchul a klungiolir a rengelekel, me ngdirrek el kongei el mekiis er a metuda klebesei el oltut er a rengelekel.

13. A remechuodel, ngkirir el mo tabesul a osengir er a ngera el tekoi?

¹³ A remechuodel a kmal kirir el mo kerekikl el oba tabesul el osengir el kirel a ngerechelir el omekerreu er a delebechel er a Dios me a dirrek el telungalek er tir. (1 Timoteus 5:8) Aike el taem el lousbech el kirel a ongdibel a kmal mekreos el taem el tir a cheroid er a telungalek er tir. Me a ta er a rolel e ngmo sebechir el loba tabesul el tekoi el kirel aika el eru el ngerachel a sebechir el mengemedaol er a rebebil el mo teloi er tir el ngar er a Omengull el Telungalek. A Masanao el ngii a ta er a remechuodel er a beluu er a Siabal, a mla mo betok el rak el le blechoel el mengemedaol er a remesobil me a rediak a redemerir me a rederrir el me teloi er ngii me a telungalek er ngii el mesuub. Me ngoeak tiaikid el rolel e a rebebil er tirke el mlo mesuub er a blil a dirrek el mlo mechuodel e dirrek el mlo oukerebai er a omerellel ngii el Masanao.

Mkikidemiu er a Demerur er Ngii el Klungiaol​—El Blak a Rengmiu el Omekerreu er a Delebechel

14, 15. Ngera uchul me a remechuodel a kmal kirir el mo kerekikl me lak ‘longedmokl el kirel a de merur er ngii el tekoi,’ e te mekerang e mo sebechir el oukerebai er a Paulus el kirel tia el tekoi?

¹⁴ A Petrus a dirrek el millisiich er a remechuodel  el mo omekerreu er a delebechel ‘el diak longedmokl el kirel a demerur er ngii el klungiaol, e bai lokiu a blakerreng.’ Me nguaisei, a ngerachel el mloterekokl er a remechuodel alta e ngkmal ousbech er a klou el temir, e ngdi ngdiak el uduudel el kirel a taem el lechoit el meruul er tia el ureor. Me a Petrus a mle medengelii a klungel a ultutelel a longelechel er a remechuodel el kldemel el kirel a bo lekerekikl el omekerreu er a delebechel ‘el diak longedmokl el kirel a de merur er ngii el klungiaol.’ Tiaikid el kdekudel el blekeradel a kmal bleketakl el chemolt er a ungilbesul el klengar er a remengeteklel a klsuul el klechelid er a “Kloul Babilon” el mo uchul me a rebetok el chad a morimel el mo kiei el kmal chebuul a klengar er tir. (Chocholt 18:2, 3) Me a remechuodel er chelecha el taem a ngar ngii a ungil el uchul me ngkirir el kmal mo kerekikl me lak el bo loruul a tekoi el ngii a sebechel el mo uchul a chouaitia el mekngit el tekoi.

¹⁵ A Paulus a ulechotii a kmal ungil el kerebai el kirir a remechuodel el Kristiano. Alta e ngmle apostol e dirrek el mla er ngii a techellel el rulleterir a Rekristiano er a Thesalonika el mo “meringel loureor” el di mo uchul a klungiolel, engdi dimlak loruul el uaisei, ‘ngdimlak di lolengit a kelel er a ngii di el chad.’ Ngbai ‘mle meringel loureor el ulturk a klisichel er a llomes me a klebesei.’ (2 Thesalonika 3:8) Me a rebetok el mechuodel er chelecha el taem, el uldimukl er tirke el odam el merael el oldingel a ongdibel, a dirrek el olecholt er a ungil kerebai el kirel tia el tekoi. Me alta e te kongei er a rekldemir er a klaumerang el oltuchakl er tir el mo er a rekeblirir, engdi te kerekikl me lak bo ‘lomekberaod er a ngii di lechad.’​—1 Thesalonika 2:9.

16. Ngera belkul sel tekoi el kmo a remechuodel a ‘kongei’ el mo omekerreu er a delebechel er a Dios?

¹⁶ A remechuodel a kmal ‘kongei’ el omekerreu er a delebechel er a Dios. Tia el blakerreng er tir a kmal bleketakl el chemolt er a meringel el urerir el loruul el olengeseu el omekerreu er a delebechel er a Dios. Me nguaisei, engdi tiang a diak el belkul a kmo te mo orrimel er a delebechel el mo mesiou er a Jehovah, me a lechub e tirka el betik a rengrir el odam a mo melisiich er a rebebil el mo kaiuechit el mesiou er a Dios. (Galatia 5:26) Tirka el mechuodel a ungil el medengei el kmo a bek el sib a kmal kakerous a blekerdelir. Me te kmal kongei el olengeseu er a rudam er tir el mo dmeu a rengrir el mesiou er a Jehovah.

Lak Bo Mesisiich el Mengedereder er a Delebechel e Bai Bo Mungil el Kerebai

17, 18. (a) Ngera uchul me a rechapostol a mle meringel er tir el mo medengelii a belkul a osisecheklel a Jesus el kirel a klengariourreng? (b) E kid, kede melechesuar a ngera el osisiu el blekeradel er chelecha el taem?

¹⁷ El ua dulsaod er a uchei, a remechuodel a kmal diak el kirir el lobes el kmo a delebechel el mloterekokl er tir a diak el delebechel er tir e ngbai delebechel er a Dios. Me ngkmal kirir el mo kerekikl me lak el bo lemesisiich el mengedereder er ‘tirikel mloterekokl’ er tir el kloklel a Dios. (Monguiu er a 1 Petrus 5:3.) Ngmla er ngii a taem el rechapostol er a Jesus a dirrek el mlo sorir a deruchall el cheleuid e mekngit el uldesuir a uchul. El di ua blekerdelir tirke el milengedereder aike el renged er sel taem, el kmal mle sorir el mo melai a ngarbab el deruchall er a beluu.​—Monguiu er a Markus 10:42-​45.

¹⁸ Me chelecha el taem e tirke el rudam el ‘oureng a urerir a remechuodel er a ongdibel’ a kmal kirir el mo ungil el merriter er sel uchul me te oureng el mo meruul aika el ureor. (1 Timoteus 3:1) Me tirke el mechuodel er chelechang a dirrek el kirir el di tir el merriter a uldesuir el kmo kele bla bo loureng a ngarbab el deruchall me a dirrek el chetengakl el ua blekerdelir tirke el mle apostol er a irechar. Me a lsekum a rechapostol a mle meringel er tir tiaikid el blekeradel, e a remechuodel a kirir el mo medengei el kmo ngkirir el mo meringel el oureor el mengikiid er tir er a ngii di el uldasu el lolisiich er ngii tia el beluulechad el sorir el mengedereder er a rebebil.

19. Ngera el tekoi a kmal kirir a remechuodel el mo kerekikl el melatk er ngii er sel taem el mocha kirir el omekerreu er a delebechel er a Dios?

¹⁹ A lebebil er a taem e a remechuodel a kirir el mo  mesisiich el meruul a tekoi el ileakl sel taem el mo kirir el omekerreu er a delebechel el sib er a “kdekudel chokami.” (Rellir 20:28-​30) A Paulus a dilu er a Titus el kmo: “Moba klisichel chomerreder lolisechakl a ikal tekoi, e mongelechel e mollach rar chad.” (Titus 2:15) Me nguaisei, engdi sel taem el lollach e lomeklatk e ngdirrek el kirir el olecholt a omengull el bedul tirka el chad el lollach er tir. Te medengei el kmo ngdiak el kirel el kmal mo meringel a tekingir, e bai kirir el ousbech a ungil el rolel a cheldecheduch me bo el sebechir remutech a rengrir e ngosuterir el mo oltirakl er a melemalt el rael.

20. Te mekerang a remechuodel e mo sebechir el oukerebai er a Jesus el kmal mle ungil el kerebai?

²⁰ A ungil el kerebil a Kristus a melisiich er a remechuodel el mo betik a rengrir er a delebechel. (Johanes 13:12-​15) Ngkmal melisiich a rengud sel donguiu el kirel sel rolel er a Jesus er a lolisechakl er a redisaiplo er ngii el mo meduch el meruul er tia el ureor el olisechakl e dirrek el meruul er a rechad el mo disaiplo er ngii. Sel blekerdelel el mle ngariou a rengul a kmal rirutech a rengrir a redisaiplo er ngii, e dirrek el millisiich er tir el ‘moba ngariourreng el dul ousbech el kmo, a chad a ngarbab er tir.’ (Filipi 2:3) Me a remechuodel er chelechang a dirrek el kmal kirir el mo oukerebai er a Jesus, e dirrek el osisiu el taem e ngkmal kirir el mo ungil el “kerebai ra delebechel.”

21. Me a remechuodel te omes el beduluchei el kirel a ngera el sengk?

²¹ A Petrus a dilung a ulebongel el cheldechedechal el mo er a remechuodel el kirel a telbiil el kirel a ngar medad el taem. (Monguiu er a 1 Petrus 5:4.) Me tirke el ngellitel a mo nguu a “diak bo le moalech el krone ra klebkall” el obengkel a Kristus el ngar er a eanged. E tirke el kuk mengkar er a “ngodech el sib” a mo nguu a ileakl el techall el mo omekerreu er a delebechel er a Dios el ngar tia el chutem el ngar cheungel a omengederederel “ngikel Bderrir ar klekerengel a sib.” (Johanes 10:16) Sel ongingil el suobel a mo mesaod a bebil el rolel e ngsebechir a rechedal ongdibel el melemolem el olengeseu er tirke el mla metutk el mo omekrael er tir.

Rolel a Domelekl a Suobel

• Ngera uchul me ngmle kirel a Petrus el mengelechel er tirke el kldemel el mechuodel er a ongdibel el mo omekerreu er a delebechel er a Dios el mla moterekokl er tir?

• Ngoeak a ngera el rolel e ngmo sebechir a remechuodel el omekerreu er a remechitechetong er a tekingel a Dios?

• Ngerang a rulleterir a remechuodel el mo kerekikl el omekerreu er a delebechel er a Dios el mla moterekokl er tir?

[Aike el Ker er a Suobel]

[Siasing el ngar er a 21 el llel]

A remechuodel er chelecha el taem a kmal kirir el omekerreu er a “sib” er a Dios el di ua tirke el klekerengel a sib er a irechar