“Makikichikpi kaq Diospa ovejankunatayá michiychik”

“Makikichikpi kaq Diospa ovejankunatayá michiychik. Chaytaqa ruraychik Diospa munasqanman hinayá, amayá obligasqa hinachu.” (1 PED. 5:2.)

1. ¿Imaynam cristianokunaqa tarikurqaku punta kaq cartanta Pedro qellqaptin?

PUNTA kaq cartanta Pedro qellqaptinmi, Nerón sutiyoq kamachikuq Romapi cristianokunata qatikachananpaqña kachkarqa. Pedroqa iñiqmasinkunatam kallpanchayta munarqa, Diablom yarqasqa leon hina muyuriqninpi purichkarqa pitapas millpurunanpaq. Iñiyninkupi takyanankupaqqa ‘listollam’ otaq rikchanllam kananku karqa hinaspa ‘Diospa atiyniyoq makinman’ churakunanku karqa (1 Ped. 5:6, 8). Huñullataqmi kananku karqa. Manam ‘kachunakuspa mikunakuspa’ hinachu. Mana chayqa ‘kikinkupuram tukunakurunmanku’ (Gal. 5:15).

2, 3. ¿Piwanmi peleayninchikqa hinaspa imamantam yachasun kaypiwan qatiqnin yachachikuypi?

² Kunanpas Diabloqa tukuytam rurachkan millpuruwananchikpaq (Apo. 12:12). Chaymantapas hichpaykamuchkanñam ‘llumpa-llumpay ñakariy punchawkuna, manam chaynaqa Dios kay pachata unanchasqanmantapas kunankamaqa karqachu’ (Mat. 24:21). Punta cristianokuna hinam ñoqanchikpas kallpanchakunanchik iñiqmasinchikkunawan hawkalla kanapaq. Chaypaqqa ancianokunawanmi yanapachikunanchik.

³ ¿Imataq ancianokunata yanapanqa ‘makinkupi kaq Diospa ovejankuna michisqankuta’ chaninchanankupaq? (1 Ped. 5:2.) ¿Imaynatam chayta rurananku? Chaykunamantam kay estudiopi yachasun. Qatiqninpiñataqmi qawasun imaynatam lliw cristianokuna Bibliapa kayna nisqanta kasukunmanku: “Qamkuna ukupi llamkaqkunapaqyá kachun reqsikuynikichik, paykunaqariki Señorpa rantinpim kamachisuchkankichik”, nispa (1 Tes. 5:12). Kay yachachikuymi yanapawasun Satanasta atipanapaq hinaspa paywan peleasqanchikta mana qonqanapaq (Efe. 6:12).

“Diospa ovejankunatayá michiychik”

4, 5. Willamuy, ¿imaynatam ancianokunaqa Diospa ovejankunata qawananku?

⁴ Pedrom ancianomasinkunata nirqa Diospa ovejankunata imayna michinankumanta (leey 1 Pedro 5:1, 2). Congregacionpi ancha rurayniyoq kaspanpas, manam hatun tukuspanchu chaytaqa nirqa, aswanqa ancianomasin hinallam (Gal. 2:9). Chaynallataqmi Diospa Llaqtanpi Punta Apaqkunapas ancianokunata ninku Diospa ovejankunata michiq kasqankuwan allinta cumplinankupaq.

⁵ Pedrom ancianokunata qawachirqa ‘Diospa ovejankuna’ makinkupi kasqanta. Yachanankum karqa ovejakunaqa Diospawan Jesucristopa kasqanta hinaspa imayna michisqankumanta cuentata qonankumantapas. Kaypi yuyaymanasun: huk amistadniki illaspan churinkunata qawanaykipaq saqesuptikiqa, ¿manachu kallpanchakuwaq allinta cuidanaykipaq hinaspa mikuchinaykipaq? Mayqanninpas onqoruptinqa yaqachá utqayllaman doctorman apachwan. Chaynataqmi ancianokunapas yachanku Jesucristopa yawarninwan rantisqan iñiqkunata cuidanankupaq Dios saqesqanta (Hech. 20:28, NM). Manam qonqanankuchu sapa ovejakuna Jesucristopa yawarninwan rantisqa kasqanta. Cuenta qonankumanta yachaspankum iñiqkunata mikuchinku hinaspa waqaychanku.

6. ¿Imaynam ñawpaqpi oveja michiy karqa?

 ⁶ Ancianokunapa rurasqankuqa rikchakunmi ñawpaq tiempopi ovejakunata imayna michisqankuwan. Michispankum punchawpi rupaytawan tutapi chirita aguantaqku (Gen. 31:40). Wakinpiqa wañuy patanpim tarikuqku ovejankunarayku. Chaytam Davidpas rurarqa, payqa mozollaraq kaspanmi leonmantawan ukumarimanta ovejankunata lluptichirqa. Kikinmi willakurqa kakichunmanta hapiruspan maqachkaspallan wañuchisqanta (1 Sam. 17:34, 35). ¡Mana manchakuqchá karqa chayta rurananpaqqa! Ovejankunata salvananpaqqa qarinchakuspanmi tukuyta rurarqa.

7. ¿Imatam ancianokunaqa ruranku sichu pi cristianopas Satanaspa toqllanpi wichiykuptinqa?

⁷ Kunan ancianokunapas rikchan-rikchanllam kachkanku Satanaspa toqllankunamantaqa. Chay toqllanpi pi cristianopas wichiykuptinqa, mana manchakuspam David hina chaylla yanapanku. Iñiqmasinku mana allin tarikusqankuta qawaspanku hinaspa Diablopa toqllanpi wichiykunanpaqña kaptinqa, chayllam paywanqa rimanku (leey Judas 22, 23). Pipas onqosqa hina tarikuptinqa, balsamo nisqa hampiwan hampichkaq hinam Diospa Palabranwan hampinku. Tukuy chaykuna ruraytaqa atinku Diospa yanapayninllanwanmi.

8. ¿Maymanmi ancianokunaqa ovejakunata pusan hinaspa imaynatam chayta ruranku?

⁸ Imaynam michiqkuna ovejankunata sumaq pastoman hinaspa yakuman pusaqku, chaynam ancianokunapas iñiqmasinkunata congregacionman pusanku. ¿Imaynatam ruranku? Kallpanchankum huñunakuyman rinankupaq, chaypim ‘horallanpi mikuyta’ chaskinku hinaspa allin tarikunku (Mat. 24:45). Chaymantapas iñiyninkupi mana allin kaqkunapaqmi tiempochakunku hinaspa pacienciawan kallpanchanku Diospa Palabranwan yanapachikunankupaq. Ichaqa, ¿Imatam ruranku sichu pi cristianopas Diospa llaqtanman kutimuyta munaptinqa? Hukmanyachinankumantaqa, kuyakuywanmi rimanku hinaspa Bibliapa nisqanta imayna kasukunankumanta qawachinku.

9, 10. ¿Imaynatam ancianokunaqa iñiyninpi mana allin tarikuqkunata yanapananku?

 ⁹ Onqospaqa, ¿imayna doctortam maskanchik? ¿Yaqachu mana pacienciawan uyariqta hinaspa utqayllamanña atiendekuqta? ¿Icha pacienciawan uyarikuqta hinaspa imawan onqosqanchikta chaynataq imawan hampikunapaq niwaqninchik doctortachu? Sutillamá kachkan mayqenman rinanchikmanta.

¹⁰ Kay rikchanachiyqa ancianokunatam kayta yachachin: iñiyninpi mana allin tarikuq cristianota yanapaspankuqa atencionwanmi uyarinanku hinaspa Diospa sutinpi mañakunanku yanapanankupaq (leey Santiago 5:14, 15). Bibliawan yanapasqankum, Galaad lawpi balsamo hampi hina nanayninta samaykachinqa (Jer. 8:22; Eze. 34:16). Bibliapa nisqanta kasukuspanqa kaqmantam iñiyninpi kallpanchakunqa. Mana allin tarikuqkunata ancianokuna uyarisqanku hinaspa paykunawan mañakusqankuqa allinpunim.

Amayá obligasqa hinachu llamkaychikqa

11. ¿Imam ancianokunata kallpanchan iñiqmasinkunata kusikuywan yanapanankupaq?

¹¹ Qatiqninpim Pedro ancianokunata yuyarichirqa iñiqkunata yanapaspanku ima ruranankumanta hinaspa imata mana ruranankumantapas. Qallarispanmi kallpancharqa ‘ama obligasqa hina’ llamkanankupaq aswanqa ‘tukuy sonqonkuwan’. ¿Imam ancianokunata yanapanan iñiqmasinkunata kusikuywan servinankupaq? ¿Imam Pedrota kallpancharqa Jesuspa ovejankunata michinanpaq hinaspa mikuchinanpaqpas? puntataqa Jesusta kuyasqanmi (Juan 21:15-17). Kuyakuq kaspankum, ancianokunapas ‘manaña kikillankupaq kawsaspanku Cristopaqña kawsanku’ (2 Cor. 5:14, 15). Diostawan iñiqmasinkunata kuyasqankum ancianokunata tanqan kapuqninkuta, tiemponkuta hinaspa kallpankuta servichikunankupaq (Mat. 22:37-39). Chaytaqa ruranku kusikuywanmi, manam mana munastinchu.

12. ¿Imaynatam Pabloqa iñiqmasinkunata yanaparqa?

¹² Ancianokunaqa Diospa ovejankunatam michinku Pablo hina, payqa Jesustam allintapuni qatipakurqa (1 Cor. 11:1). Pablowan yanapaqninkunapas Tesalonicapi iñiqkunata anchata kuyaspankum, ‘kikinkupa vidankuta’ qoyta munarqaku, manam ‘Diosmanta allin noticiallatachu’. Paykunaqa “wawankuna uywachkaq mama hinam” haykapipas kuyakuywan yanapaqku (1 Tes. 2:7, 8). Pabloqa yacharqam, mamakuna wawachankuta anchata kuyasqankuta, chaymi paykunaqa tutapas hatarispanku ñuñuchinku.

13. ¿Imaynatam ancianokunaqa rurayninkunata qawananku?

¹³ Ichaqa ancianokunam allinta tupachinanku congregacionpi rurayninkunata familianpi rurayninkunawan (1 Tim. 5:8). Amam kayta qonqanachu: iñiqkunata yanapasqanku tiempoqa familianwan kuska kananpaq kaq tiempom. Ancianokunataqa yanapanmanmi wakin kutipi huk iñiqmasinkunata Familiawan Diosta Yupaychanapaq Tutapi kanankupaq nisqanku. Chaytam ruran Masanao sutiyoq anciano familianpiwan. Japonmanta kay cristianoqa unay watañam soltero cristianokunatawan mana Testigo tayta-mamayoqkunata, wasinman rinankupaq nin. Tiempopa risqanman hinam wakinkuqa anciano karqaku hinaspa paykunapas Masanao hina ruranku.

Amayá qollqellaraykuchu llamkaychikqa

14, 15. ¿Imanasqam ancianokunaqa mana qollqeraykuqa imatapas ruranankuchu hinaspa imaynatam Pablopa rurasqanta qatipakunmanku?

¹⁴ Pedropas ancianokunatam nirqa Diospa ovejankunata michispanku qollqellarayku mana ruranankupaq, aswanqa sonqomanta. Tukuy ima rurasqanku achka tiempopaq kaptinpas manam qollqepaqchu ruranku. Chaywanpas Pedroqa nirqam chaykunamanta cuidakunankupaq. Qollqerayku ovejakuna michiyqa qawakunmi ‘hatu-hatun Babiloniapa’ otaq pantasqa religionkunapa umalliqninkunapi,  paykunaqa apu hinam kawsakunku qatiqninkunañataqmi wakchayaypi (Apo. 18:2, 3). Ancianokunaqa kallpanchakunankum mana chayna kanankupaq.

¹⁵ Chaypaqqa Pablotam qatipakunanku. Apostol kaspanpas Tesalonicapi iñiqkunataqa ‘manam gastachirqachu’. Aswanqa ‘tuta-punchaw pisipaspam llamkarqa’, ‘manam pipa mikuynintapas mañakurqachu debaldellaqa’ (2 Tes. 3:8). Kunan ancianokunawan congregacionkunata watukuq ancianokunapas qatipakunapaqmi kanku. Iñiqmasinkupa qosqanta chaskikuspankupas manam pitapas gastachinkuchu (1 Tes. 2:9).

16. ¿Ima ninantaq ‘tukuy sonqowan’ ovejakunata michiyqa?

¹⁶ Ancianokunaqa rurayninkutam ‘tukuy sonqowan’ rurananku. Arí, kusisqamá llamkanku hinaspam anchata kallpanchakunku iñiqmasinkunapa allinninpaq. Yanapayta munaspankupas manam kallpanchankuchu atipanakuypi hina imatapas ruranankupaqqa (Gal. 5:26). Yachankum sapa oveja mana chaynalla kasqankuta hinaspam kallpanchakunku Diosta lliw kusisqa yupaychanankupaq.

“Amayá michiychikqa munaychakuq hinachu, aswanqa ejemplonyá kaychik”

17, 18. a) ¿Imanasqataq apostolkunaqa anchata sasachakurqaku humilde kayta qawachinankupaq? b) ¿Imatam yachanchik apostolkunapa chayna pantasqankumanta?

¹⁷ Qawasqanchikman hinaqa, ancianokunaqa yuyarinankum ovejakunaqa Jehová Diospa kasqanta, manam paykunapachu. Chayraykum “Diospa akllasqan runankunataqa” mana hatunchakuspa qawananku (1 Ped. 5:3, NM). Wakin kutipim Jesuspa apostolninkunapas hatunchakuyta munarqaku kikillankupaq imatapas munasqankurayku. Yaqachusmi tiemponkupi kamachikuq runakuna hina atiyniyoq kay munaywan aysachikuchkarqaku (leey Marcos 10:42-45).

¹⁸ Kay tiempopi ‘allin oficiota’ otaq umalliq kayta munaq cristianoqa tapukunanmi imarayku chay haypay munasqanta (1 Tim. 3:1). Anciano kaqkunapas sonqomantam tapukunanku: “¿Apostolkuna hinachu hatunchakuyta munachkani?”, nispa. Apostolkunapas sasachakurqakum hatunchakuy kay munayta saqenankupaq, chaynallataqmi kanman ancianokunapaqpas. Chaymi rikchan-rikchanlla kasqankutaqa mana saqenankuchu.

19. ¿Imatam ancianokunaqa yuyarinanku Diospa ovejankunata waqaychaspanku?

¹⁹ Wakin kutipim ancianokunaqa mana manchakuspanku imam kaqta rimananku. Chaynaqa kananku Diospa ovejankunata “yarqasqa atoqkuna” Diosmanta karunchachiyta munaptinku (Hech. 20:28-30). Chayna kasqankuqa allinpunim, Titoman Pablopa kayna nisqanta kasukunankupaqpas: “Kallpanchay, anyaytaqyá mana kasukuqkunatapas”, nispa (Tito 2:15). Ichaqa pitapas huchanrayku anyaspankuqa respetowanmi rurananku. ¿Imanasqa? Ancianokunaqa yachankum sonqonkuman chayanankupaq hinaspa mana allin rurasqankuta saqechinankupaqqa, manam nanay simiwanchu rimapayananku aswanqa kuyakuywan yanapaspam.

20. ¿Imanasqam ancianokunapaq ancha allin Jesuspa imayna kasqanmanta yachayninkuqa?

²⁰ Jesuspa imayna kasqanmi allintapuni yanapakun. Jesuspa vidanmanta willakuq 4 librokunamanta ancianokuna yachaspankuqa kallpanchasqam tarikunku Diospa ovejankunata kuyakuywan yanapanankupaq (Juan  13:12-15). Qatiqninkunata imayna yachachisqanmi llumpayta admirachiwanchik. Jesuspa humilde kasqanmi sonqonkuman chayarqa, chaymi payta qatipakuspanku ‘aswan allinpaqraq wakinkunata hapirqaku’ (Fili. 2:3). Kunanpas ancianokunaqa kallpanchasqam tarikunku Jesuspa imayna kasqanta qatipakunankupaq, chaynapi iñiqmasinkupaq ‘ejemplo kanankupaqpas’.

21. ¿Ima suyakuymi kachkan ancianokunapaq?

²¹ Pedrom nisqankunata tukurqa hamuq tiempopi ima chaskinankumanta rimaspa (leey 1 Pedro 5:4). Hanaq pachaman rinankupaq suyakuyniyoq ancianokunam ‘chaskinqaku suma-sumaq mana tukuq premiota’ Jesucristowan kuska kanankupaq. ‘Sapaq ovejakunamanta’ kaq ancianokunañataqmi Diospa ovejankunata kay Pachapi michinqaku, ‘michiqkunapa kamachiqnin Jesucristo kamachimuptin (Juan 10:16). Qatiqnin yachachikuypim qawasunchik congregacionpi umalliqkunata imayna yanapananchikmanta.

Yuyarisun

• ¿Imanasqam ancianokunata Pedro kallpancharqa makinkupi kaq Diospa ovejankunata michinankupaq?

• ¿Imaynatam ancianokunaqa iñiyninkupi mana allin tarikuq cristianokunata qawananku?

• ¿Imataq ancianokunata kallpanchan makinkupi kaq Diospa ovejankunata michinankupaq?

[Kay yachachikuypa tapukuyninkuna]

[21 kaq paginapi dibujo]

Ñawpaq tiempopi michiqkuna hinam, ancianokunapas Diospa ovejankunata waqaychanku