“Tiaki i te Anana a te Atua e Akono ra Kotou”

“Kia tiaki i te anana a te Atua e akono ra kotou, auraka e maro, kia inangaro puareinga ra.”​—1 PETE. 5:2, NW.

1. Eaa te au turanga ta te au Kerititiano i aro atu i te tuatau i tata ei a Petero i tana reta mua?

KUA tata te apotetoro ko Petero i tana reta mua i tetai tuatau i mua ua ake ka takinokino ei a Nero i te au Kerititiano i Roma. Kua inangaro aia i te akamaroiroi i tona au taeake irinaki. No te mea, ‘te aaere ra’ te Tiaporo i te kimi i te akapou i te au Kerititiano. Kia patoi ketaketa atu iaia, ka anoanoia ratou kia “akono meitaki” e kia ‘akamoraro ia ratou uaorai i raro ake i te rima mana o te Atua.’ (1 Pete. 5:6, 8) Te anoano katoaia ra kia vai taokotai ua ratou. Kare ratou e tau ‘kia aae e kia akapou ia ratou uaorai,’ no te mea ka ‘akapou takiri ratou ia ratou uaorai.’​—Gala. 5:15.

2, 3. Koai ta tatou e kukumi nei, e eaa ta tatou ka akamanako i roto i teia nga atikara?

² I teia tuatau, ka aro atu tatou i tetai turanga mei te reira rai. Te kimi nei te Tiaporo i te au atianga i te akapou ia tatou. (Apo. 12:12) E i mua ia tatou, te vaitata maira te ‘mate maata, kare ïa mei muatangana mai o teianei ao.’ (Mata. 24:21) Mei te au Kerititiano o te anere mataiti mua tei paruru ia ratou mei te taumaro anga i rotopu ia ratou uaorai, kia akapera katoa rai tatou. Ei akatupu i teia, tetai taime ka inangaro tatou i te tauturu a te aronga pakari tukatau.

³ Ka akamanako tatou akapeea te aronga pakari me ariki maata i te tikaanga ngateitei no te tiaki anga i te ‘anana a te Atua e akono ra ratou. (1 Pete. 5:2, NW) E oti, ka akamanako tatou i te mataara tau no te rave anga i te angaanga tiaki. I roto i te atikara ka aru mai, ka akara tatou akapeea te putuputuanga ‘te akamanako anga i te aronga e angaanga pakari ra e te akaaere ra’ i te anana. (1 Tesa. 5:12, NW) Na te akamanako anga i teia au mataara e tauturu ei ia tatou kia patoi pakari atu i to tatou Enemi maata, no te mea koia ta tatou e kukumi nei.​—Ephe. 6:12.

Tiaki i te Anana a te Atua

4, 5. Akapeea te aronga pakari te akamanako anga i te anana? Akatutu mai.

⁴ Kua akamaroiroi a Petero i te aronga pakari o te au Kerititiano i te anere mataiti mua kia akamanako i te anana e akono ra ratou mei ta te Atua e manako ra ia ratou. (E tatau ia 1 Petero 5:1, 2. *) Noatu kua manakoia aia ei pou i roto i te putuputuanga, kua tuatua akangateitei a Petero ki te aronga pakari. Kua ako ra aia ia ratou ei au taeake aronga pakari. (Gala. 2:9) Mei ia Petero rai, te ako maira te Pupu Akaaere o teia tuatau i te aronga pakari o te putuputuanga kia tauta i te rave i te apainga teiaa no te tiaki anga i te anana a te Atua.

⁵ Kua tata te apotetoro e kia tiaki te aronga pakari ‘i te anana a te Atua e akono ra ratou.’ Puapinga tikai kia kite ratou e na Iehova e Iesu Karaiti te anana. Ka akaari te aronga pakari e te akara meitaki ra ratou i te anana a te Atua. Penei ka pati mai toou oa piri vaitata kia akono koe i tana tamariki me kare aia i reira. Kare ainei e ka akono meitaki koe ia ratou e ka angai ia ratou? Me makiia tetai tamaiti, kare ainei ka kimi koe i te tauturu pae rapakau? Mei te reira rai te aronga pakari i roto i te putuputuanga te tiaki anga i te putuputuanga ‘a te Atua, tana i oko mai i te toto  o tana uaorai Tamaiti.’ (Anga. 20:28) Kia akamanako ua rai ratou e kua okoia mai te mamoe tataki tai ma te toto oko maata o Iesu Karaiti. No reira e apainga na te aronga pakari i te angai, paruru, e te akono i te anana.

6. Eaa te apainga a te au tiaki mamoe i taito ra?

⁶ Akamanako ana i te au apainga a te au tiaki mamoe i te tuatau Pipiria. Kua akakoromaki ratou i te vera o te ra e te anu i te po kia akono i te anana. (Gene. 31:40) Kua akaatinga katoa ratou i to ratou oraanga no te au mamoe. Kua akaora mai te tamaiti tiaki mamoe ko Davida i tana anana mei te au puaka taae, e te riona e te tapa. No runga i te manu taae tataki tai, kua karanga a Davida e “kua opu au i te uru tanga ra, e kua ta, e kua mate rava.” (1 Samu. 17:34, 35) E tu toa tikai te reira! Kua vaitata rava aia ki te tanga o te puaka taae! Noatu rai, kua tauta aia i te akaora mai i te mamoe.

7. Akapeea te aronga pakari me akaora mai i te au mamoe mei ia Satani?

⁷ Teia tuatau, ka anoanoia te aronga pakari kia matakite i te takino anga a te Tiaporo mei te riona rai. Penei ka o mai te tu mataku kore te akaora mai anga i te mamoe mei te Tiaporo. Penei ka uriuri manako ratou ki te au taeake kare e matakite ana, tei mareiia e te au ereere a Satani. (E tatau ia Iuda 22, 23.) Kare e rauka i te aronga pakari i te rave i teia me kare ta Iehova tauturu. Ka akono maru ratou i te mamoe tei takinoia, te paruru anga iaia e te taangaanga anga i te Tuatua akapumaana a te Atua.

8. Ka arataki te aronga pakari i te anana kiea e ka akapeea?

⁸ E arataki ana te tiaki mamoe i te anana ki tetai ngangaere meitaki e e vai tetai. Ka arataki katoa te aronga pakari i te anana ki te putuputuanga, te akamaroiroi anga ia ratou kia tae putuputu, kia angai meitaki i te anana e kia rauka ia ‘ratou te kai i te ora mou.’ (Mata. 24:45) Penei ka akapou te aronga pakari i te taime i te tauturu i tei maki i te pae vaerua kia ariki i te akamaroiroi anga a te Tuatua a te Atua. Penei te tauta ra tetai mamoe tei aere ke i te oki mai ki te anana. No reira eiaa ratou e tamatakutaku atu i te taeake, kia akamarama maru ra te aronga pakari i te au kaveinga Tuatua Tapu e kia akaari kiaia akapeea me taangaanga i teia i roto i tona oraanga.

9, 10. Akapeea te aronga pakari te akono anga i te aronga maki i te pae vaerua?

 ⁹ Me makiia koe, ko teea taote taau ka inangaro? Ko te taote ainei ka akarongo kia koe no tetai manga tuatau ua, e ka oronga viviki mai i te vairakau kia aravei atu aia i te tangata maki ka aru mai? Me ko te taote ainei te ka akarongo mai kia koe, ka akamarama mai i toou maki, e ka akakite mai i te au rapakauanga tau?

¹⁰ Pera katoa, ka akarongo te aronga pakari ki te tangata maki i te pae vaerua e ka tauturu iaia kia meitaki tona maki, ‘te akatainu anga iaia ki te manongi i te ingoa o Iehova.’ (E tatau ia Iakobo 5:14, 15.) Mei te vairakau rai no Gileada mai, ka akamaroiroi te Tuatua a te Atua i te tangata maki. (Iere. 8:22; Eze. 34:16) Me taangaangaia, ka tauturu te au kaveinga Pipiria i te tangata paruparu kia meitaki akaou mai i te pae vaerua. Ae, maata te meitaki a te aronga pakari me akarongo ratou ki te au manako o te mamoe tei makiia e te pure kapiti anga kiaia.

Auraka e Maro kia Inangaro Puareinga Ra

11. Eaa tei akakeu i te aronga pakari kia tiaki puareinga ua i te anana a te Atua?

¹¹ Kua akamaara a Petero ki te aronga pakari e akapeea me rave i te angaanga tiaki. E tiaki te aronga pakari i te anana a te Atua, “auraka e maro, kia inangaro puareinga ra.” Eaa te akakeu ra i te aronga pakari kia tavini puareinga ua i to ratou au taeake? Eaa tei akakeu ia Petero kia tiaki e kia angai i ta Iesu au mamoe? Ko tona aroa e tona anoano i te Atu. (Ioa. 21:15-17) No to ratou aroa kare te aronga pakari ‘e akono akaou ia ratou uaorai i te ora anga nei, ka akono ra iaia i tei mate.’ (2 Kori. 5:14, 15) No teia aroa, e to ratou aroa i te Atua e te au taeake, i akakeuia ai te aronga pakari kia tavini i te anana, te oronga anga i to ratou maroiroi, au apinga e te taime i te rave i te reira. (Mata. 22:37-39) Te oronga puareinga ua ra ratou ia ratou uaorai, ma te karapii kore.

12. Mei teaa te maata te oronga anga te apotetoro ko Paulo iaia uaorai?

¹² Mei teaa te maata me oronga te aronga pakari ia ratou uaorai? Te akono anga i te mamoe mei ia Paulo rai te aru anga ia Iesu, te aru ra ratou i te apotetoro ko Paulo. (1 Kori. 11:1) No te aroa maata i te au taeake i Tesalonia, mataora tikai a Paulo e tona au oa i te oronga atu ‘i te evangelia a te Atua kia ratou, e ia ratou katoa uaorai.’ Kua rave ratou i te reira ma te tu maru, “mei te metua [vaine] i matuapuru i tana tamariki.” (1 Tesa. 2:7, 8) Kua marama a Paulo i te manako o te metua vaine no tana tamariki. Ka rave aia i tetai ua atu mea no ratou, pera katoa te tu mai anga i te turuaipo i te angai ia ratou.

13. Eaa te tu parani e anoanoia ra te aronga pakari kia akono tamou?

¹³ Ka anoano te aronga pakari kia akono tau i ta ratou apainga ei tiaki e ta ratou apainga ki to ratou uaorai pamiri. (1 Timo. 5:8) Te taime ta te aronga pakari e akapou ra ki te putuputuanga, e taime puapinga tikai te reira no to ratou uaorai pamiri. Tetai mataara e parani ei nga apainga e rua, kia pati atu i tetai ke kia aere mai ki ta ratou Akamorianga a te Ngutuare i te aiai i tetai taime. Te au mataiti i aereia, kua pati atu tetai tangata pakari i Tiapani ko Masanao, i te aronga kare i akaipoipo e te au pamiri kare e metua tane kia kapiti mai ki te apii a tona ngutuare. Aere ua rai, kua riro mai tetai pae ei aronga pakari e kua aru i to Masanao akaraanga meitaki.

Kopae i te Apinga Tika Kore​—Tiaki i te Anana ma te Inangaro Tikai

14, 15. Eaa ra te aronga pakari ka matakite ei i “te inangaro kia rauka mai te apinga tika kore,” e akapeea ratou me aru ia Paulo i roto i teia turanga?

¹⁴ Kua akamaroiroi katoa a Petero i te aronga pakari kia tiaki i te anana, “auraka no te inangaro kia rauka mai te apinga tika kore, no te inangaro tikai ra.” Maata te taime o te aronga pakari e pou ana ki ta ratou angaanga, inara kare ratou e tapapa ana kia tutakiia mai ratou. Kua akamatakite atu a Petero i tona au taeake aronga pakari i te kino no te tiaki anga i te anana “no te inangaro kia rauka mai te apinga tika kore.” Ka kiteaia taua kino ra i roto i te oraanga puapinga o te au arataki akonoanga o  “Babulonia maata” i te maataanga o te au tangata e noo putaua ra. (Apo. 18:2, 3) E tumuanga meitaki no te aronga pakari o teia tuatau kia matakite i taua turanga ra.

¹⁵ Kua akanoo a Paulo i te akaraanga meitaki no te aronga pakari Kerititiano. Noatu e apotetoro aia e ka rauka iaia i te ‘akateiaa’ i te au Kerititiano i Tesalonia, kare aia “i kai ua i ta etai ke ra kai.” Mari ra, kua ‘angaanga aia ma te roiroi i te po e te ao.’ (2 Tesa. 3:8) Maata te aronga pakari i teia tuatau, e te aronga i roto i te angaanga tutaka, e akanoo ra i te akaraanga meitaki no teia turanga. Noatu kua ariki ratou i te tu akamanuiri anga a te au taeake irinaki, kare ratou i ‘akateimaa’ i tetai ke.​—1 Tesa. 2:9.

16. Eaa te aiteanga kia tiaki i te anana ma “te inangaro tikai”?

¹⁶ Ka tiaki te aronga pakari i te anana “no te inangaro tikai.” Ka kiteaia to ratou inangaro tikai i roto i ta ratou akaatinga anga uaorai, te tauturu anga i te anana. Inara, kare te aiteanga e ka maro ratou i te anana kia tavini ia Iehova; e kare te aronga pakari aroa e akamaroiroi i tetai ke kia tavini i te Atua ma te manako akarere. (Gala. 5:26) Te marama ra te aronga pakari e e tuke te tu o te mamoe tataki tai. Te inangaro ra ratou i te tauturu i to ratou au taeake kia tavini mataora ia Iehova.

Auraka e Akaueue i te Anana kia Riro ra ei Au Akaraanga

17, 18. (a) Eaa ra i ngata ei i te au apotetoro i tetai au taime i te marama i ta Iesu e apii maira no runga i te tu akaaka? (e) Eaa te turanga aiteite ta tatou ka kite mai?

¹⁷ Mei ta tatou i uriuri ana, kia maara ua rai i te aronga pakari e ko te anana ta ratou e tiaki ra, kare na ratou, na te Atua ra. Kia matakite ratou e auraka “e akaueue pakari i te aronga tei orongaia mai e te Atua.” (E tatau ia 1 Petero 5:3. *) Tetai au taime, kua manako te au apotetoro a Iesu i te au akakoroanga tarevake. Mei te aronga e tutara ra i te iti tangata, kua inangaro katoa ratou i tetai taoonga teitei.​—E tatau ia Mareko 10:42-45.

¹⁸ Teia tuatau, te au taeake e ‘inangaro ra i tetai taoonga ei akaaere’ kia akara meitaki ia ratou uaorai i te tumu i inangaro ei ratou i te reira. (1 Timo. 3:1) Penei e ui te aronga pakari kia ratou uaorai e me te inangaro ra ratou i te mana akaaere me kore te taoonga teitei mei tetai rai o te au apotetoro. Me kua manamanata ana te au apotetoro i roto i teia turanga, ka ariki te aronga pakari e ka anoanoia ratou kia angaanga pakari kia kopae i tetai ua atu tu o teianei ao i te akaaere ki rungao i tetai ke.

19. Eaa ta te aronga pakari ka akamaara me paruru i te anana?

¹⁹ E tika, te vai ra tetai au taime ka anoanoia te aronga pakari kia vai ketaketa i te paruru anga i te anana mei te “luko taae.” (Anga. 20:28-30) Kua akakite a Paulo kia Tito kia ‘ako ua atu, e kia akakite ua atu’ ma te mana katoa. (Tito 2:15) Noatu ka raveia taua takainga ra, ka tauta te aronga pakari i te akangateitei i te aronga ka akoia atu. Eiaa e akaapa kino atu, meitaki atu ra i te itae i te ngakau e te akakeu anga i tetai kia aru i te arataa tika.

20. Akapeea te aronga pakari me aru ia Iesu te akanoo anga i te akaraanga meitaki?

²⁰ Te akakeu ra to Karaiti akaraanga meitaki i te aronga pakari kia aroa i te anana. (Ioa. 13:12-15) Ka akapumaanaia tatou me tatau tatou akapeea aia te apii anga i tana au pipi i roto i te angaanga tutuanga e te akariro anga i te  tangata ei pipi. Kua tukia te ngakau o tana au pipi no tona tu akaaka, te akakeu anga ia ratou kia aru i te tu te akaari maira i te ‘ngakau akaaka, te akamanako anga e e meitaki atu tetai ke ia ratou.’ (Phili. 2:3) Te akakeu katoaia ra te aronga pakari o teia tuatau kia aru i to Iesu akaraanga, e kia inangaro ratou kia riro mai “ei au akaraanga no te anana.”

21. Eaa te tutaki ka tapapa atu te aronga pakari a te tuatau ki mua?

²¹ Kua taopenga a Petero i tana akoanga ki te aronga pakari na te taiku anga i tetai taputou no te tuatau ki mua. (E tatau ia 1 Petero 5:4.) Ka orongaia ‘te korona kakā tei kore rava e maemae’ ki te au akaaere akatainuia e tutara kapiti ra e Karaiti i te rangi. E tikaanga ngateitei to te aronga pakari o te “mamoe ke atu” i te tiaki i te anana a te Atua i te enua nei i raro ake i te tutaraanga a te ‘tiaki maata.’ (Ioa. 10:16) Ka uriuri te atikara ka aru mai i te au mataara ka turuturu te au mema o te putuputuanga i te aronga tei ikiia ei arataki.

[Au Tataanga Rikiriki i Raro]

Na te Akamanako Akaou Anga

• Eaa ra i tau ei kia ako atu a Petero i te au taeake pakari kia tiaki i te anana a te Atua e akono ra ratou?

• Akapeea te aronga pakari te tiaki anga i te aronga maki i te pae vaerua?

• Eaa te akakeu ra i te aronga pakari kia tiaki i te anana a te Atua e akono ra ratou?

[Au Uianga Apii]

[Tutu i te kapi 21]

Mei te au tiaki i te tuatau taito, kia paruru te aronga pakari o teia tuatau i te “mamoe” e akono ra ratou