„Luku den skapu fu Gado di a gi unu fu sorgu”

„Luku den skapu fu Gado di a gi unu fu sorgu, èn no du dati neleki na dwengi wan sma dwengi unu, ma du dati nanga prisiri.”​—1 PETR. 5:2.

1. Sortu situwâsi den Kresten ben de na ini di Petrus skrifi a fosi brifi fu en?

WAN pisi ten bifo Nero bigin frufolgu den Kresten na ini Rome, na apostel Petrus ben skrifi a fosi brifi fu en. A ben wani tranga a bribi fu den Kresten brada nanga sisa fu en. Didibri ben e „waka lontu” e suku fu swari Kresten. Fu man kakafutu gi en, dan den ben o abi fu „tan nanga krin frustan” èn den ben o abi fu ’saka densrefi na ondro a makti anu fu Gado’ (1 Petr. 5:6, 8). Boiti dati, den ben o abi fu tan na ini wánfasi. Den no ben musu ’tan beti èn tan swari makandra leki meti’, fu di dati ben kan meki taki den „kiri makandra”.​—Gal. 5:15.

2, 3. Nanga suma wi musu feti, èn san wi o luku na ini den artikel disi?

² Na ini a ten disi, wi de na ini wan srefi sortu situwâsi. Didibri e suku okasi fu swari wi (Openb. 12:12). Èn heri esi wan „bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mat. 24:21). Neleki den Kresten fu a fosi yarihondro, wi musu luku bun tu taki wi no e feti nanga makandra. Fu man sorgu taki disi no e pasa, dan son leisi wi abi yepi fanowdu fu lepi owruman.

³ Meki wi luku fa owruman kan kon abi moro warderi gi a grani di den abi fu ’luku den skapu fu Gado di a gi den fu sorgu’ (1 Petr. 5:2). Baka dati, wi sa luku fa owruman kan tyari a frantwortu fu den na a yoisti fasi. Na ini a tra artikel, wi sa luku fa a gemeente kan ’sori lespeki gi den sma di e wroko tranga na den mindri èn di e teki fesi’ (1 Tes. 5:12). Te wi o luku den tori disi, dan dati sa yepi wi fu kakafutu gi wi moro bigi Feanti, èn wi o frustan taki nanga en wi e feti.​—Ef. 6:12.

Luku na ipi fu Gado

4, 5. Fa den owruman musu si den skapu? Gi wan eksempre.

⁴ Petrus ben gi Kresten owruman fu a fosi yarihondro a deki-ati fu si den skapu di den musu sorgu, na a srefi fasi fa Gado ben e si den. (Leisi 1 Petrus 5:1, 2.) Aladi sma ben e si Petrus leki wan pilari fu a gemeente, toku Petrus no ben e gi den owruman a firi taki a ben prenspari moro den. Na presi fu dati, a ben e si den leki brada di ben e wroko makandra nanga en (Gal. 2:9). Neleki Petrus, a Tiri Skin na ini a ten disi e gi gemeente owruman a rai fu tyari a bigi frantwortu di den abi fu luku den skapu fu Gado na wan yoisti fasi.

⁵ Na apostel ben skrifi taki den owruman ben musu ’luku den skapu fu Gado di A ben gi den fu sorgu’. Den ben musu frustan krin taki den skapu na fu Yehovah nanga Yesus Krestes. Den owruman ben musu gi frantwortu fu a fasi fa den ben e luku den skapu fu Gado. Kon meki wi taki dati wan bun mati fu yu e aksi yu fu luku den pikin fu en te a no de. A no de fu taki dati yu ben o sorgu den pikin bun, èn yu ben o gi den nyanyan, a no so? Efu wan fu den pikin ben o kon siki, dan seiker yu ben o tyari en go na datra, a no so? Na so a de tu taki den owruman na ini a gemeente musu „luku a gemeente fu Gado di a bai nanga a brudu fu en eigi Manpikin” (Tori. 20:28). Den musu hori na prakseri taki ibri skapu bai nanga a warti brudu fu Krestes Yesus. Fu di den owruman de frantwortu gi den skapu, meki na agersi fasi  den e gi den nyanyan, den e kibri den, èn den e sorgu gi den.

6. San ben de a frantwortu fu den skapuman fu owruten?

⁶ Prakseri den frantwortu di skapuman ben abi na ini Bijbel ten. Den ben e luku den skapu na ini a faya son te deiten, èn na ini a kowru te neti (Gen. 31:40). Den ben e sorgu gi den skapu, awansi ogri ben kan miti den. Di David ben de wan yongu skapuman, dan a ben e kibri den skapu fu en gi ogri meti, sosrefi gi wan lew nanga wan beer. David ben taki dati ’a ben grabu a lew nanga a beer na den neki, a naki den trowe, èn a kiri den’ (1 Sam. 17:34, 35). A no de fu taki dati David ben abi deki-ati! Kande a lew ben de kaba fu kiri David! Ma toku dati no tapu David fu kibri den skapu fu en.

7. Fa owruman kan hari wan skapu puru fu Satan di e suku fu swari en?

⁷ Na ini a ten disi, owruman musu luku bun nanga Didibri di e kon na sma tapu leki wan lew. A kan taki na agersifasi den musu hari wan skapu puru fu Didibri di e suku fu swari en. Na agersifasi, owruman musu grabu na ogri meti na en neki, fu man kibri a skapu. Kande den e taki-go-taki-kon nanga wan brada di no de na ai gi den triki fu Satan. (Leisi Yudas 22, 23.) A no de fu taki dati owruman no man du disi sondro a yepi fu Yehovah. Te wan skapu kisi mankeri, dan den e handri na wan switifasi nanga en, den e tai den soro fu en, èn den e dresi en nanga yepi fu Gado Wortu di de leki wan oli di e meki sma firi bun.

8. Pe den owruman e tyari den skapu go, èn fa den e du dati?

⁸ Wan skapuman ben e tyari den skapu go tu na wan weigron pe den ben o feni nofo nyanyan nanga nofo watra fu dringi. Na so a de tu taki owruman e tyari den skapu go na a gemeente, fu di den e gi den deki-ati fu kon na den konmakandra doronomo. Drape den sa kisi bun nyanyan, èn sosrefi „nyanyan na a reti ten” (Mat. 24:25). Kande den owruman e gebroiki furu fu den ten fu gi den wan di abi wan swaki bribi a deki-ati fu gi yesi na den rai na ini Gado Wortu, so taki a bribi fu den kan  kon tranga. Kande wan skapu di lasi e pruberi fu drai kon baka na a ipi. Na presi taki den owruman e suku fu tapu skreki gi a brada fu den, den musu yepi en na wan switi fasi fu kon frustan Bijbel gronprakseri, èn den musu sori en fa a kan fiti den gronprakseri dati na ini en libi.

9, 10. Fa owruman musu sorgu gi den swakiwan?

⁹ Te yu siki, dan fu sortu datra yu wani kisi yepi? Yu ben o wani kisi yepi fu wan datra di no abi ten fu arki yu, ma di e hasti ensrefi fu skrifi wan dresi gi yu, soso fu yu kan gowe so taki wan tra sikisma kan kon na en? Noso yu ben o go na wan datra di e sori yu krin san e du yu, èn sortu dresi kan yepi yu?

¹⁰ Na so a de tu taki den owruman kan arki a sma di kon swaki, èn den kan dresi a soro fu en. Te owruman e du dati, dan a sa de neleki den e „lobi oli gi en na ini a nen fu Yehovah”. (Leisi Yakobus 5:14, 15.) Neleki a balsem-oli fu Gilead, a rai fu Gado Wortu kan yepi a sikisma fu firi moro bun (Yer. 8:22; Esek. 34:16). Te a sma di kon swaki e hori ensrefi na den gronprakseri fu Bijbel, dan dati kan yepi en fu kon abi wan tranga bribi baka. Iya, den owruman de wan bigi yepi te den e teki ten fu kon sabi san e du a swaki skapu, èn te den e begi nanga en.

No du en nanga dwengi, ma nanga prisiri

11. San e meki taki owruman e luku den skapu nanga prisiri?

¹¹ Petrus ben memre den owruman tu fa den musu du a skapuman wroko èn fa den no musu du en. Owruman ’no musu luku den skapu fu Gado neleki na dwengi wan sma dwengi den, ma den musu du en nanga prisiri’. San e meki taki owruman e dini den brada fu den nanga prisiri? We, san ben meki taki Petrus luku den skapu fu Yesus? San ben meki taki a gi den nyanyan? Wan prenspari sani, na taki a ben lobi Masra (Yoh. 21:15-17). Fu di owruman abi lobi, meki den ’no e libi gi densrefi moro, ma gi a sma di dede gi den’ (2 Kor. 5:14, 15). Fu di den abi lobi gi Yesus, gi Gado, èn gi den Kresten brada nanga sisa fu den, meki den de klariklari fu gebroiki den krakti, den moni, nanga den ten fu dini na ipi (Mat. 22:37-39). Den e gi densrefi fu dini den skapu, èn den no e du dati neleki na dwengi sma e dwengi den, ma den e du en nanga prisiri.

12. San na apostel Paulus ben de klariklari fu du fu man dini den skapu?

¹² San owruman musu de klariklari fu du fu man dini den skapu? Te den e sorgu gi den skapu, dan den e teki na eksempre fu na apostel Paulus, neleki fa Paulus ben teki na eksempre fu Yesus (1 Kor. 11:1). Fu di Paulus ben e firi gi den brada nanga sisa fu Tesalonika, meki en nanga den brada di ben e wroko makandra nanga en ben e prisiri fu fruteri den ’a bun nyunsu fu Gado èn fu gi den eigi libi fu a bun fu den’. Na so den sori switifasi gi den brada, ’neleki te wan mama e gi den pikin fu en bobi èn e sorgu gi den’ (1 Tes. 2:7, 8). Paulus ben sabi fa wan mama di abi nyofi pikin ben e firi gi den pikin fu en. A ben o du iniwan sani gi den, èn a ben o de klariklari fu opo na mindrineti srefi fu gi den nyanyan.

13. Gi sortu sani owruman musu luku bun?

¹³ Den owruman musu luku bun taki a frantwortu di den abi fu luku den skapu no e tapu den fu tyari den frantwortu di den abi na ini na osofamiri fu den (1 Tim. 5:8). A ten di den owruman e gebroiki gi a gemeente, na prenspari ten di den ben kan gebroiki gi na osofamiri fu den. Wán fasi fa den kan tyari den tu frantwortu disi na a yoisti fasi, na te den e kari trawan fu kon teki prati na a Osofamiri Anbegi fu den wawan leisi. Na ini den yari di pasa, Masanao, wan owruman na ini Yapan, kari Kresten brada nanga sisa di no trow, èn sosrefi Kresten osofamiri di no ben abi wan papa, fu kon teki prati na a osofamiri studie fu en. Bakaten, wan tu fu den brada di a ben yepi, tron owruman èn den teki a moi eksempre fu Masanao.

 No suku fu kisi wini na wan fasi di no fiti—Luku den skapu fu di yu e angri fu du dati

14, 15. Fu san ede owruman musu luku bun taki den no e „kon lobi fu kisi wini na wan fasi di no fiti”? Fa den kan teki na eksempre fu Paulus na ini a tori disi?

¹⁴ Petrus ben taigi den owruman tu taki te den ben e luku den skapu, dan ’den no ben musu suku fu kisi wini na wan fasi di no fiti, ma den ben musu tiri den fu di den ben e angri fu du dati’. A wroko fu den owruman e teki furu ten, ma toku den no e fruwakti fu kisi pai. Petrus ben feni en fanowdu fu warskow den owruman fu no luku den skapu ’fu di den lobi fu kisi wini na wan fasi di no fiti’. Wi kan si taki a sani dati no bun te wi e luku fa den kerki fesiman fu „Babilon a Bigiwan” e libi wan gudu libi, aladi furu sma pôti (Openb. 18:2, 3). Na ini a ten disi, owruman abi bun reide fu luku bun taki den no e kisi na angri fu libi wan gudu libi.

¹⁵ Paulus ben de wan bun eksempre gi Kresten owruman. Leki wan apostel a ben kan de ’wan hebi na moni sei’ gi den Kresten na ini Tesalonika, ma a no ben e „nyan a nyanyan fu sma fu soso”. Na presi fu dati, a ’ben e wroko bun tranga dei nanga neti’ (2 Tes. 3:8). Furu owruman na ini a ten disi, sosrefi den kring-opziener, de wan moi eksempre te a abi fu du nanga a tori disi. Aladi den e kisi wini fu a switifasi di trawan e sori gi den, toku den no de ’wan hebi na moni sei’ gi nowan sma.​—1 Tes. 2:9.

16. San a wani taki dati owruman e luku den skapu ’fu di den e angri fu du dati’?

¹⁶ Den owruman e luku den skapu ’fu di den e angri fu du dati’. Wi kan si dati te wi e luku fa den de klariklari fu gi densrefi fu yepi na ipi. Ma dati no wani taki dati den e dwengi den skapu fu dini Yehovah. Boiti dati, lobi-ati owruman no e gi sma deki-ati tu fu strei nanga trawan suma e dini Gado nanga moro faya (Gal. 5:26). Owruman sabi taki ibri skapu de tra fasi. Den e angri fu yepi den brada nanga sisa fu dini Yehovah nanga prisiri.

No basi den skapu, ma de bun eksempre

17, 18. (a) Fu san ede a ben muilek gi den apostel son leisi fu gi yesi na a rai di Yesus ben gi den fu abi sakafasi? (b) Nanga sortu denki wi musu luku bun?

¹⁷ Soleki fa wi si kaba, dan den owruman musu hori na prakseri taki den skapu di den e luku no de fu den, ma fu Gado. Den e luku bun taki den no e ’prei basi gi den wan di de wan gudu fu Gado’. (Leisi 1 Petrus 5:3.) Son leisi, den apostel fu Yesus ben e suku fu kisi moro frantwortu, ma den no ben e du dati nanga a yoisti denki. Neleki den tiriman fu grontapu, den ben wani abi wan hei posisi.​—Leisi Markus 10:42-45.

¹⁸ Na ini a ten disi, den brada di e ’suku fu tron opziener’ musu ondrosuku densrefi fu kon sabi fu san ede den wani kisi a grani dati (1 Tim. 3:1). Den brada di de owruman kaba musu aksi densrefi krin efu den de leki sonwan fu den apostel fu owruten di ben e angri fu kisi hei posisi noso biginen. Efu den apostel ben abi problema nanga a sani disi, dan owruman kan frustan taki den musu du tranga muiti fu no kisi na angri fu basi trawan, neleki fa a de nanga grontapusma.

19. San owruman musu hori na prakseri te den e handri fu kibri den skapu?

¹⁹ A no de fu taki dati den owruman musu gi krakti rai son leisi te den musu kibri den skapu gi „ogri busidagu” (Tori. 20:28-30). Paulus ben taigi Titus fu ’tan frumane sma èn piri-ai gi den, bika a ben abi ala reti fu du dati’ (Tit. 2:15). Awinsi den owruman musu handri na a  fasi dati, toku den e pruberi fu sori lespeki gi den sma di den e gi rai. Den e frustan taki fu man doro na ati èn fu man gi sma deki-ati fu du san reti, dan a moro bun fu taki-go-taki-kon na wan switi fasi nanga a sma, na presi fu krutu a sma hebi.

20. Fa owruman kan de wan bun eksempre gi trawan, neleki Yesus?

²⁰ A moi eksempre fu Krestes e gi owruman deki-ati fu lobi den skapu (Yoh. 13:12-15). A e naki wi ati te wi e leisi fa a ben e leri den disipel fu en fu du a preikiwroko èn fu meki tra disipel. A fasi fa a sori sakafasi ben naki na ati fu den disipel fu en, èn a gi den deki-ati fu sori ’sakafasi èn fu si trawan moro hei leki densrefi’ (Fil. 2:3). Owruman na ini a ten disi e kisi deki-ati tu fu na eksempre fu Yesus, èn dati meki den wani de wan „eksempre gi den skapu”.

21. Sortu pai den owruman kan fruwakti fu kisi?

²¹ Leki lasti, Petrus e poti prakseri na wan blesi di den ben o kisi. (Leisi 1 Petrus 5:4.) Den salfu opziener sa kisi „glori di no e lasi gowe”, makandra nanga Krestes na ini hemel. Den skapuman di de fu „den tra skapu” sa kisi a grani fu luku den skapu fu Gado na grontapu, na ondro a tiri fu „a gran skapuman” (Yoh. 10:16). Na ini a tra artikel wi sa luku na sortu fasi den memre fu a gemeente kan horibaka gi den owruman di e teki fesi.

Luku baka san wi leri

• Fu san ede a ben fiti taki Petrus gi den tra owruman a rai fu luku den skapu di Gado ben gi den fu sorgu?

• Fa owruman musu yepi den wan di kon abi wan swaki bribi?

• San e gi owruman deki-ati fu luku den skapu di Gado gi den fu sorgu?

[Aksi fu a tori disi]

[Prenki na tapu bladzijde 21]

Neleki den skapuman fu owruten, owruman fu a ten disi musu kibri den „skapu” di den kisi fu sorgu