“Kura Nen Ikyumuile I Aôndo I I Lu Hen Ven la”
“Kura Nen Ikyumuile I Aôndo I I Lu Hen Ven la”
“Kura nen ikyumuile i Aôndo i i lu hen ven la, er ka sha ci u Aôndo nahan, i̱ de lu er i kighir ne a kighir ga, kpa i̱ lu sha asema a en.”—1 PET. 5:2.
1. Ka mlu u nyi Mbakristu lu ker shighe u Peteru nger washika na u hiihii laa?
APOSTOLI PETERU yange nger washika na u hiihii la shighe wa karen cii ve tor Nero hii u tôvon Mbakristu a ican ken Roma ye. Peteru soo u taver mbananjighjigh a na imôngo asema. Diabolo lu “zenden,” keren ér una ya Mbakristu. Nahan gba u vea ‘lu geng ge geng’ shi vea ‘hide a ayol a ve ijime er uwegh ku Aôndo ku ageegh lu sha a ve’ la ve, vea kôrcio u tilen dông hendan a na ye. (1 Pet. 5:6, 8) Shi gba u vea lu gungur môm. Shighe ne lu shighe u vea lu ‘nyuman ayol a ve’ ga, sha ci u vea er nahan yô, vea ‘mena ayol a ve.’—Gal. 5:15.
2, 3. Ka an i gbe u se hendan a nana, man kanyi se lu timen sha mini?
2 Nyian kpa, se mba ken imba mlu la. Diabolo ngu keren aan a una ya se yô. (Mpa. 12:12) Man ica a gba ga tsô, “zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga” yô. (Mat. 24:21) Er yange gba u Mbakristu mba sha derianyom u hiihii la vea palegh u gban iyongo ayol a ve nahan, se kpa kape i gbe u se er keng je la. Ashighe agen yô, a gba u anmgbianev mba vian ken jijingi vea wase se ve se er kwagh ne ye.
3 De se nenge nen kwagh u mbatamen vea er ve vea seer lun a iwuese sha ian i civirigh i kuran ‘ikyumuile i Aôndo i i lu hen ve’ la yô. (1 Pet. 5:2) Shi se time sha gbenda u vough u vea er tom ve u kuran ilev la yô. Ken ngeren u a dondo sha ngun ne, se time sha gbenda u tiônnongo una ‘lumun mbara mba ve eren tom her a na sha gbashima mba ve hemen’ iyôngo la. (1 Tes. 5:12) Se timen sha akaa ne yô, se fa er i lu Orihyom wase u hemban la se lu nôngon ityav a na yô, nahan kwagh ne una wase se u tilen dông hendan a na.—Ef. 6:12.
Kura Nen Ikyumuile i Aôndo
4, 5. Gba u mbatamen vea nengen ikyumuile nena? Tese ikyav.
4 Peteru taver Mbakristu mba sha derianyom u hiihii, mba ve lu mbatamen la ishima ér ve lu a mnenge u Aôndo sha kwagh u ikyumile i í we ve sha ikyev la. (Ôr 1 Peteru 5:1, 2.) Shin er i nengen Peteru ér ngu ityuunugh ken tiônnongo nahan kpa, a lam a ve sha gbenda u tesen ér un hemba ve ga. Kpa a lam a ve sha inja i ve kpa mba mbatamen a na imôngo. (Gal. 2:9) Nyian kpa, Mbahemenev Mba Shin Tine ka ve wa mbatamen mba ken tiônnongo kwagh sha imba gbenda i Peteru wa mbatamen kwagh la, ér ve er tom ve u kuran iyôngo i Aôndo la.
5 Apostoli ne wa mbatamen kwagh ér ve ‘kura ikyumuile i Aôndo i i lu hen ve la.’ U̱ kaven ér ikyumile ka i Yehova man i Yesu Kristu la yange hemba lun ve kwagh u hange hange cii. Lu u mbatamen vea pase Aôndo kwagh sha gbenda u ve nengen sha iyôngo na la. Aluer ma ijende you i sôngo sôngo kaa ér we u nenge nan sha uôn shighe u nan yem zende nahan, u nenge sha ônov mbara dedoo shi u koso ve ga he? Aluer mô ken ve nan va gba angev nahan, u ker gbenda u a sôr nan tsembelee gaa? Kape mbatamen mba ken tiônnongo kpa kwagh ve a lu je la, gba u vea “koso nongo u Kristu u Aôndo, u A yem sha awambe a sha iyol [i Wan] Na la.” (Aer. 20:28) Ka ve umbur er hanma iyôngo yô, yange i yam i sha awambe a Kristu Yesu yô. Er i gbe u mbatamen vea va pase kwagh u ikyumuile yô, mba koson i shi mba kor i shi mba nengen sha i doo doo kpaa.
6. Lu tom u nyi mbakuranilev mba sha ayange a tsuaa la lu a mini?
6 Hen sha tom u mbakuranilev mba sha ayange a tsuaa la yange ve lu a mi la. Yange i gba u vea wa ishima a oo u tan atetan kua mdôhôrom tugh, sha er vea nenge sha iyôngo ve yô. (Gen. 31:40) Yange ve ver uma ve sha zongo je kpaa, sha ci u iyôngo. Shighe u Davidi lu wanyekwaor, lu kuran ilev la, a war mbi sha ikyev i inyamkyume, kua anyam man dwem kpaa. Davidi ôr kwagh u inyamkyume ne ér yange a̱ lu begha shin dwem kpaa, un ‘kôr un sha indyer, un hemba un, un wua.’ (1 Sam. 17:34, 35) Nenge imba kpaver la sha wono! Shi nenge imba er yange kar a ku kôôsôô la sha wono! Nahan cii kpa, a er kwagh sha afatyô na cii sha u yiman iyôngo na.
7. Mbatamen vea tsue iyôngo sha zwa u Satan kera nena?
7 Nyian kpa, doo u mbatamen vea lu tsevaa sha u kuran iyôngo sha ikyev i Diabolo, u a te num sha i er begha nahan la. Alaghga a gba u vea er kwagh sha ishimataver, u a lu inja er mba tsuen ma iyôngo sha zwa u Diabolo kera nahan yô. Mbatamen vea kôron inyamkyume sha indyer sha imba gbenda ne yô, vea fatyô u waren iyôngo. Vea fatyô u wan anmgbianev mba Satan a lu meen ve sha uhôn nav la kwagh. (Ôr Yuda 22, 23.) Nahan kpa, mbatamen mba eren kwagh ne a iwasen i Yehova shio ga. Ma iyôngo i i vihi iyol yô, ka ve eren a i sha uee, ve kange i shi ve shighe i mkurem ma sha Mkaanem ma Aôndo, sha u wanger imba iyôngo la.
8. Mbatamen ka ve kumba iyôngo ve za a i hana, man ka ve er kwagh ne nena?
8 Kwagh ugen u orkuranilev yange nan er yô, i lu u zan a iyôngo i nan hen ape toho u hem, man ape mngerem ma lu yô. Mbatamen kpa, ka ve kumba iyôngo ve va a i ken tiônnongo, ve taver i ishima ér i zaan mbamkombo hanma shighe sha er ia zuan a “kwaghyan sha ashighe ashighe,” shi ia ya kwagh a mor ambusu yô. (Mat. 24:45) Alaghga a gba u mbatamen vea tôô shighe gôgônan vea wase mba ve lu uange ken jijingi la ve, vea ya kwaghyan u ken Mkaanem ma Aôndo la ye. Alaghga iyôngo i̱ i̱ tsum yô, ia lu nôngon u hiden va kohol ikyumuile. Mbatamen mba te imba anmgbian la mciem iyol ga, kpa ka ve wa nan kwagh kundu kundu sha u pasen nan atindiakaa a ken Ruamabera shi tesen nan er nana dondo a ken uma u nan yô.
9, 10. Gba u mbatamen vea nenge sha mba ve lu uange ken jijingi la nena?
9 Ka wea gba angev nahan, ka hanma ortwer ka u hemba soon wer nana nenge u we? Ka ortwer u ka nan kegh ato a we coosa maa nan ôr u imba twer i a er u la kpase, sha er ian i̱ due nan u nengen a oruange ugen laa? Shin ka u hemba soon wer i lu ortwer u ka nan kegh ato a we tsembelee, nan pase kwagh u nan nenge ér ngu zan we iyol la, cii ve nan mase ôron we imba twer i a fatyô u eren we laa?
10 Mbatamen kpa, vea fatyô u keghen ato a or u nan lu uange ken jijingi la, shi vea wase u kangen nan avav, nahan a lu inja er ve “shighe nan mkurem ken iti i Ter” nahan. (Ôr Yakobu 5:14, 15.) Mkaanem ma Aôndo maa fatyô u wanger or u nan lu uange la, er balsem u ken Giliadi nahan. (Yer. 8:22; Esek. 34:16) Aluer or u i kpe nan iyol ga la nan dondo akaawan a Bibilo yô, aa wase nan, nana hide a tile vough ken mcivir u Yehova. Sha kpôô yô, mbatamen ka ve wase kpishi zum u ve kegh ato a or u i kpe nan iyol ga la, shi ve er msen vea nan yô.
I̱ De Lu Er i Kighir Ne a Kighir Ga, Kpa I̱ Lu sha Asema a En
11. Kanyi ka i mgbegha mbatamen u kuran iyôngo i Aôndo sha asema a ve?
11 Peteru maa umbur mbatamen gbenda u vea er tom u kuran ilev la man gbenda u i doo u vea er u ga la kpaa. Gba u mbatamen vea kuran iyôngo i Aôndo, a ‘lu sha mkighir ga, kpa a lu sha asema a ve.’ Kanyi ka i mgbegha mbatamen ve er tom sha ci u anmgbianev vev a mkighir shio? Man lu nyi jim i mgbegha Peteru u kuran iyôngo i Yesu shi koson i? Kwagh u vesen yô, yange lu mdoo u Ter doo un ishima la. Ka dooshima ngu a na ve mbatamen ve ‘kera lu uma sha ci ve ayol a ve ga, kpa i lu sha ci u Un u A kpe sha ci ve’ la ye. (2 Kor. 5:14, 15) Dooshima ne, man mdoo u Aôndo a doo ve ishima kua anmgbianev vev la, ngu a mgbegha mbatamen u eren tom sha ci u ikyumuile, man ka ve er kwagh ne sha agee a ve man akaa a ve lu a mi kua shighe ve kpaa. (Mat. 22:37-39) Ka ve na ayol a ve zunguluu ga, kpa ve na sha asema a ve.
12. Apostoli Paulu yange na iyol na sha u eren tom sha ci u anmgbianev nav za kighir nena?
12 Gba u mbatamen vea na ayol a ve a kighir nena? Shighe u ve lu nengen sha mbamgbe mba iyôngo yô, ka ve kav apostoli Paulu, er un kpa kaven Kristu nahan. (1 Kor. 11:1) Er anmgbianev mba ken Tesalonika doo Paulu ishima kua mba ve eren tom a na imôngo la yô, lu kwagh u doon ve u ‘nan anmgbianev mbara Loho u Dedoo u Aôndo tseegh ga, kpa zan zan kua uma ve je kpaa.’ Zum u ve lu eren nahan la, ve lu eren kwagh hen atô ve sha uee, “er ngô ka a uve sha ônov nav nahan.” (1 Tes. 2:7, 8) Paulu yange kav er ka i lu ngô ken ishima sha kwagh u ônov mba nan yô. Ngô nana er hanma kwagh u i gbe u nana er sha u ônov mba nan ve lu ken mkpeyol cii, aluer gba u nana tôndo mnyam tugh, nana koso ve je kpaa.
13. Gba u mbatamen vea nenge sha ityom i ve lu a mi ken tiônnongo la kua sha tsombor ve nena?
13 Doo u mbatamen vea wa ikyo sha er vea er tom u kuran ikyumuile la shi tsombor ve kpa vea ver ishima sha u yô. (1 Tim. 5:8) Shighe u mbatamen ka ve na sha u eren akaa ken tiônnongo la, ka i lu shighe u injaa u ma ve lu vea icombor ve yô. Gbenda môm u vea fatyô u nan ishima sha ityom i ihiar ne cii vough yô, ka u lôhôn mbagenev ér ve va er Mcivir u hen Tsombor u aikighe la a ve imôngo. Ortamen ugen ken tar Japan, u i yer iti na ér Masanao yô, yange a lôhô mbaukwaav man mba ve lu civir Yehova a mbamaren vev shio yô, ér ve va nyôr kwaghhenen a tsombor na. A er kwagh ne anyom imôngo. Mbagenev mba yange wase ve la, ve va hingir mbatamen ken tiônnongo, nahan ve kpa ve dondo ikyav i Masanao la.
Palegh Nen Mtsera u Dang, Kura Nen Ikyumuile sha Gbashima
14, 15. Gba u mbatamen vea wa ikyo sha kwagh u “mtsera u dang” sha ci u nyi, man vea fatyô u kaven Paulu sha gbaa ne nena?
14 Peteru shi wa mbatamen kwagh ér ve kuran ikyumuile, “i̱ de lu sha ci u mtsera u dang ga, kpa i̱ lu sha gbashima.” Tom u mbatamen ve eren la ka u tôô ve shighe kpen kpen, nahan kpa, mba veren ishima ér i kimbi ve inyaregh sha mi ga. Peteru nenge ér doo u una ta mbatamen mbagenev icin sha kwagh u kuran ikyumuile sha ci u “mtsera u dang” la. Imba ieren ne due tseer tseer ken uma u mbahemenev mba kwaghaôndo mba ken “Zegebabilon” mba ka ve ombo uyôughyôughmbaakaav poo, kpa ior vev kpishi ve kungu ican puung la. (Mpa. 18:2, 3) Doo u mbatamen vea wa ikyo sha er imba isharen la ia jile ken a ve ga yô.
15 Paulu yange ver mbatamen mba ken Kristu ikyav i dedoo. Shin er lu apostoli shi yange ma “za” Mbakristu mba ken Tesalonika “iyol” nahan kpa, mayange “ya kwaghyan hen ma or gbilin kpaa ga.” A gema a er “tom u sha ican man u sha gbashima tugh man tetan.” (2 Tes. 3:8) Mbatamen kpishi nyian ne, kua mba ve eren tom u ningir sha la kpaa, ve ver ikyav i dedoo sha gbaa ne kpen kpen. Shin er or ka nana er a ve doo doo ve ve wuese kpishi nahan kpa, mba ‘ze mô or iyol’ ga.—1 Tes. 2:9.
16. Inja i u kuran ikyumuile “sha gbashima” la ér nyi?
16 Mbatamen ka ve kura ikyumuile “sha gbashima.” Se fatyô u nengen a gbashima ve ne wang, sha mne u ka ve na iyol ve u wasen iyôngo la. Nahan kpa, mba kighir ikyumuile ér i civir Yehova ga, shi mbatamen mba lun a dooshima mba we mbagenev kwagh ér ve gbaan ikpilan ken mcivir u Aôndo ga. (Gal. 5:26) Mbatamen fa er hanma iyôngo i lu kposo yô. Ka i girim ve iyol u wasen anmgbianev vev u civir Yehova saan saan.
De Eren Nen Tahav sha Ikyumuile Ga, kpa Lu Nen Ikyav
17, 18. (a) Er nan ve ashighe agen yange i taver mbaapostoli mba Yesu u kaven atesen na sha kwagh u iyol i hiden a mi ijime? (b) Alaghga se kpa se lu ken imba mlu la nena?
17 Er se vande ôron nahan, mbatamen ve umbur ér ikyumuile i ve lu kuran la ka i Aôndo, ka i ve ayol a ve ga. Gba u vea ‘eren tahav sha ikyumuile’ i í we ve sha ikyev la ga. (Ôr 1 Peteru 5:3.) Ashighe agen mbaapostoli mba Yesu yange ve ker u lun sha aan a tom, a awashima u kpeegh. Yange ve soo u lun sha aan a tagher tagher er utor mba ken atôatyev nahan.—Ôr Marku 10:42-45.
18 Nyian ne kpa, anmgbianev mba ve lu “keren u lun orkuran” yô, ve hen sha ityôkyaa i í ne ve ve lu keren tom shon la. (1 Tim. 3:1) Doo u mba ve lu mbatamen hegen la kpa, vea tôv ayol a ve sha mimi vea fa, aluer mba a isharen i lun a tahav shi lun tagher tagher er mbaapostoli mbagenev yange ve er nahan yô. Aluer mbaapostoli mbara je kpa tagher a mtaver sha gbaa ne yô, doo u mbatamen vea kav er i gbe u vea nôngo kwagh kpoghuloo sha u palegh ma isharen i taregh i eren tahav sha mbagenev la yô.
19. Shighe u mbatamen ve lu eren kwagh sha u kuran ikyumuile yô, kanyi i gbe u vea umburu?
19 Ka mimi, ashighe agen nga a ka i gba u mbatamen vea ôr kwagh tsoomoo yô, er shighe u ve lu kuran ikyumuile sha ikyev i “ugbaseela mba vihin asema” nahan. (Aer. 20:28-30) Paulu yange wa Titu kwagh ér ‘a ôron akaa ne, a waan kwagh man shi a yangen kwagh sha utaha cii.’ (Titu 2:15) Nahan cii kpa, shighe u i gbe u mbatamen vea er imba kwagh la a or je kpa, ka ve er kwagh a nan sha icivir. Ve kav ér aluer ve puu a puu or kpoghuloo yô, a wase nan kpishi ga, kpa aluer ve ver nan ikyav i dedoo yô, ikyav ve la ia kôr nan ken ishima shi ia wase nan u hiden sha gbenda u vough.
20. Mbatamen vea kav Yesu sha u veren ikyav i dedoo nena?
20 Ikyav i Kristu i dedoo la ka i mgbegha mbatamen u tesen ikyumuile dooshima. (Yoh. 13:12-15) Ka sea ôr er yange tese mbahenen nav tom u pasen kwagh shi geman ior hingir mbahenen la nahan, i saan se iyol kpishi. Ieren na i hiden a iyol ijime la, yange i bende a asema a mbahenen nav, shi i mgbegha ve u ve kpa lun a ieren i ‘hiden a ayol a ve ijime, nengen ér mbagenev hemba ve’ la. (Fil. 2:3) Nyian kpa, asema mgbegha mbatamen u dondon ikyav i Yesu la, nahan geman ‘lun ikyumuile ikyav.’
21. Ka injar i nyi mbatamen vea fatyô u veren ashe a mini?
21 Peteru maa kure kwaghwan na u hen mbatamen la sha u teren ityendezwa i sha kwagh u ken hemen. (Ôr 1 Peteru 5:4.) Mbakuran mba i shigh ve mkurem la vea za ngohol “tsar u engem u sha ityou u usen mayange ga” la sha vea Yesu imôngo. Mbakuran mba ve lu ken “iyôngo igen” la vea lu a ian i civirigh i kuran ikyumuile i Aôndo shin tar ne sha hemen u “Orkuranilev u tamen” la. (Yoh. 10:16) Ngeren u dondon ne una time sha igbenda i mba ken tiônnongo vea fatyô u suen mba i tsough ve ér ve lu mbahemen la yô.
U Hiden Saven a Sav
• Kwaghwan u Peteru wa mbatamen mbagenev ér ve kuran ikyumuile i Aôndo, i i lu hen ve la lu u doon sha ci u nyi?
• Gba u mbatamen vea nenge sha mba i kpe ve iyol ken jijingi ga la nena?
• Kanyi ka i mgbegha mbatamen u kuran ikyumuile i Aôndo, i i lu hen ve laa?
[Mbampin mba ngeren u henen]
[Foto u sha peeji 21]
Gba keng u mbatamen vea kura “ikyumuile” i i lu hen ve la, er mbakuranilev mba sha ayange a tsuaa la nahan