“Ke Fai Koutou mo Tausi Mamoa o te Lafu a te Atua”

“Ke fai koutou mo tausi mamoe o te lafu a te Atua telā ne tuku atu ne ia ki a koutou, kae tausi faka‵lei ki ei mo te loto fia‵fia.”—1 PETELU 5:2.

1. Ne a tulaga ne fakafesagai atu ki ei a Kelisiano i te taimi ne tusi ei ne Petelu a tena tusi muamua?

A KOITUAI o fakasaua ne Nelo a Kelisiano i Loma, ne tusi atu ne te apositolo ko Petelu a tena tusi muamua. Ne manako a ia o fakamalosi aka ana taina tali‵tonu. Ne ‘fano sāle’ eiloa te Tiapolo o ‵sala a Kelisiano ke kai ne ia i se auala fakatusa. Ke ‵teke atu ki a ia, ne ‵tau o ‘matapula‵pula latou’ kae ke ‘loto maulalo mai lalo i lima ‵mafi o te Atua.’ (1 Petelu 5:​6, 8) Ne ‵tau o ‵kau fakatasi foki latou. Ne seki mafai ne latou o “fai taua” te suā tino ki te suā tino, me e mafai o iku atu a te faiga tenā ki te “fakamasei” o te suā tino ki te suā tino.​​—Kalatia 5:​15.

2, 3. Ko oi te tino e ‵tau o taua atu tatou ki ei, kae ne a mea ka sau‵tala tatou ki ei i te mataupu tenei?

² I aso nei, e fakafesagai atu tatou ki se tulaga tai ‵pau. E salasala eiloa te Tiapolo ki avanoaga ke kai ne ia tatou i se auala fakatusa. (Fakaasiga 12:12) Kae ka isi se “fakalavelave e tupu i te taimi tenā, e tafa sili i te masei i fakalavelave katoa ko oti ne ‵tupu mai i te kamataga o te lalolagi.” (Mataio 24:21) E pelā eiloa mo Kelisiano i te senitenali muamua kolā ne ‵tau o matapula‵pula ke mo a ma faitaua latou i a latou eiloa, e ‵tau foki o fai tatou penā. Ke fai te mea tenei, e ma‵nako tatou i nisi taimi ki se fesoasoani mai toeaina kolā e fetaui ‵lei.

³ Ke na onoono nei tatou ki te auala e ati aka ei ne toeaina a te lotou loto fakafetai mō te tauliaga ke tausi faka‵lei atu a “te lafu a te Atua.” (1 Petelu 5:2) Mai tua ifo, ka onoono tatou ki te auala ‵tau ke fai ei te galuega ko te tausiga o mamoe. I te suā mataupu, ka suke‵suke eiloa tatou ki te auala e mafai ei ne te fakapotopotoga o ‘fakaasi atu te āva ki a latou kolā e ga‵lue malosi kae tausi atu’ ki te lafu. (1 Tesalonia 5:​12) A te saga tonu atu ki mea konei ka fesoasoani mai ki a tatou ke tu ‵mautakitaki i te ‵teke atu ki te ‵tou Fili, mai te iloa ne tatou me ko ia telā e taua mo tatou.​​—Efeso 6:​12.

Tausi te Lafu a te Atua

4, 5. E ‵tau o pefea te kilokiloga a toeaina ki te lafu? Fakamatala mai.

⁴ Ne fakamalosi atu a Petelu ki toeaina Kelisiano i te senitenali muamua ke maua ne latou se kilokiloga fakaatua e uiga ki te lafu telā ne tuku atu ke tausi ne latou. (Faitau te 1 Petelu 5:​1, 2.) E tiga eiloa ne fai a ia e pelā me se pou malosi o te fakapotopotoga, ne seki faipati atu a Petelu ki toeaina, e pelā me se tino fia maluga. Kae ne fakamalosi atu a ia ki a latou e pelā me ne taina toeaina. (Kalatia 2:9) E pelā mo te agaga telā ne maua ne Petelu, e fakamalosi mai eiloa te Potukau Pule ki toeaina i te fakapotopotoga ke taumafai o fai olotou tiute ‵mafa i te tausi atu ki te lafu a te Atua.

⁵ Ne tusi mai a te apositolo me e ‵tau mo toeaina o ‘tausi faka‵lei te lafu a te Atua.’ E tāua ‵ki eiloa ke lavea ne latou me i a Ieova mo Iesu Keliso a te lafu. E ‵tau o avatu ne toeaina a tala e uiga ki te auala e tausi atu ei latou ki mamoe a te Atua. Mafaufau la me ne fai atu sou taugasoa ke tausi ne koe ana tama‵liki i te taimi e galo ei a ia. E mata, ka se tausi faka‵lei ne koe kae fagai latou? Kafai e masaki se tamaliki, e mata, ka se fakamautinoa aka ne koe me e maua ne ia a vailakau kolā e manakogina? I se auala tai ‵pau, e ‵tau mo toeaina i te fakapotopotoga o tausi atu “te ekalesia a te Atua, telā ne fakatu i te mate o tena tama tonu.” (Galuega 20:28) E masaua ne latou me ne ‵togi a mamoe takitasi ki te toto tāua o Keliso Iesu. Ona ko te fakatāua ne latou, e fagai, puipui kae tausi atu latou ki te lafu.

6. Se a te tiute ne maua ne tausi mamoe i aso mua?

⁶ Mafaufau la ki tiute ne ‵tau o fai ne tausi mamoe ‵tonu i taimi o te Tusi Tapu. Ne ‵tau o fa‵ki latou i te ‵vela o te aso mo te ‵moko o te po ko te mea ke tausi atu ki te lafu. (Kenese 31:40) Ne ‵tu atu foki olotou ola i se tulaga fakamataku ona ko mamoe. Ne faka‵sao ne te tausi mamoe ko Tavita ana mamoe mai manu fe‵kai, e aofia i ei te leona mo te ulosa. E uiga ki mea takitasi konei, ne fai mai a Tavita me ne “puke fātu au o ‵kumi te ua, kae pago ke mate.” (1 Samuelu 17:​34, 35) Ma‵faga la o loto toa! Toeitiiti eiloa ko kai a ia ne te ulosa! Kae ne fai ne ia so se mea e mafai ne ia o fai ke faka‵sao ei a mamoe.

7. E mafai pefea o ‵fao keatea ne toeaina a mamoe mai i gutu o Satani i se auala fakatusa?

⁷ I aso nei, e ‵tau o matapula‵pula a toeaina ki osomaiga a te Tiapolo e pelā me se leona. E mafai o aofia i ei se faifaiga loto toa ke ‵fao keatea a te mamoe mai gutu o te Tiapolo i se auala fakatusa. Mai te puke atu o ‵kumi te ua o te ulosa fekai tenā i se auala fakatusa, e mafai eiloa o faka‵sao ne toeaina a mamoe. E mafai o fakasako‵sako atu latou ki taina vāi‵vai kolā ne tofotofogina e auala i malei a Satani. (Faitau te Iuta  22, 23.) E tonu, e se mafai o fai ne toeaina a te mea tenei e aunoa mo te fesoasoani o Ieova. E atafai eiloa latou ki mamoe kolā e pa‵kia, mai te fusi kae fakagalue a te Muna fakamafanafana loto a te Atua.

8. E takitaki atu ki fea ne toeaina a te lafu, kae pefea la?

⁸ Ne ‵tau foki o takitaki ne te tausi mamoe tonu a te lafu ki se koga moukuā kae isi ne vai i ei. E penā foki, e takitaki ne toeaina a te lafu ki te fakapotopotoga, mai te fakamalosi ke ‵kau faeloa ki fakatasiga ko te mea ke mafai o fagai faka‵lei a te lafu kae ke maua ne latou a “meakai i te taimi tonu.” (Mataio 24:45) E mafai o fakaaoga ne toeaina olotou taimi ke fesoasoani atu ki tino kolā e ma‵saki i te feitu faka-te-agaga ke talia ne latou a mea‵kai mai te Muna a te Atua. Kāti e isi se mamoe ne galo ko taumafai ke foki mai ki te lafu. I lō te fakamatakutaku atu ki te lotou taina, e fakamatala atu ne toeaina mo te atafai a fakatakitakiga faka-te-Tusi Tapu kae fakaasi atu ki a ia a te auala e mafai ei o fakagalue ne ia a mea konei i tena olaga.

9, 10. E tausi atu pefea a toeaina ki tino ma‵saki i te feitu faka-te-agaga?

⁹ Kafai koe e masaki, se vaegā tokita fea e manako koe ki ei? E mata, ko te tokita telā e fakalogologo atu ki a koe i se taimi toetoe, kae fai fakavave ne ia ou vailakau ko te mea ke āsi atu a ia ki te suā tino masaki? Io me e manako koe ki se tokita telā e fakalogologo ki a koe, e fakamatala ne ia te mea e tupu ki a koe, kae fakaasi atu a togafiti kolā e mafai o maua ne koe?

¹⁰ I se auala tai ‵pau, e mafai o fakalogo‵logo a toeaina ki se tino masaki i te feitu faka-te-agaga kae fesoasoani atu ke mafu tena pakiaga, mai te “‵mili te sinu ki luga i a ia i te igoa o te Aliki [ko Ieova]” i se auala fakatusa. (Faitau te Iakopo 5:​14, 15.) E pelā mo te vailakau mai Kileata, e mafai o fai ne te Muna a te Atua ke mafu te pakiaga o se tino. (Ielemia 8:​22; Esekielu 34:16) Kafai ko fakagalue aka ne ia, e mafai o fesoasoani atu a fakatakitakiga i te Tusi Tapu ki te tino vāivāi ke toe malosi i te feitu faka-te-agaga. E tonu, e fai eiloa ne toeaina a mea ‵lei māfai e lagona ne latou a mea e manavase ki ei te mamoe masaki kae ‵talo atu mō ia.

E sē i te Fai Fitoi Kae ko te Loto Fiafia

11. Se a te mea e fakamalosi atu ki toeaina ke tausi atu ki te lafu a te Atua mo te loto fiafia?

¹¹ Kae ne toe fakamasaua atu ne Petelu ki toeaina e uiga ki te auala e ‵tau ei o fai te lotou galuega mo te auala e se ‵tau o fai i ei. E ‵tau mo toeaina o tausi atu ki te lafu a te Atua, ‘e se i te fai fitoi, kae i te loto fiafia.’ Se a te mea e fai ei ke tavini atu a toeaina ki olotou taina mo te loto fia‵fia? Se a te mea ne fakamalosi atu ki a Petelu ke tausi kae fagai ne ia a mamoe a Iesu? A te kī tāua ko tena alofa mo tena amanaia ki te Aliki. (Ioane 21:​15-​17) Ona ko te alofa, e se ola eiloa a toeaina “mō latou, kae . . . mō ia telā ne mate kae toetu ake.” (2 Kolinito 5:​14, 15) A te alofa tenei, e fusi fakatasi mo te lotou a‵lofa ki te Atua mo olotou taina, e fakamalosi atu ki toeaina ke tavini atu ki te lafu, mai te tuku katoatoa atu olotou malosi, kope, mo olotou taimi ke fai penā. (Mataio 22:​37-​39) E se tuku atu ne latou a latou eiloa i se auala fai fitoi, kae mo te loto fiafia.

12. E pefea te lasi o te fesoasoani ne tuku atu ne Paulo?

¹² E pefea te lasi o te fesoasoani e tuku atu ne toeaina? Mai te tausi atu ki mamoe, e fakaakoako eiloa latou ki te apositolo ko Paulo, me e fakaakoako foki a ia ki a Iesu. (1 Kolinito 11:1) Ona ko te loto alofa ki taina i Tesalonia, ne ma‵nako eiloa a Paulo mo ana taugasoa ke fakaoko atu ki a latou a ‘te tala ‵lei mai i te Atua, e pelā foki mo olotou ola.’ Mai te faiga penā, ne loto a‵lofa latou, “e pelā eiloa mo te alofa o te mātua manafai e tausi ana tama‵liki.” (1 Tesalonia 2:​7, 8) Ne malamalama a Paulo i lagonaga o se mātua ki tena tamaliki. E fai eiloa ne tou fafine so se mea mō latou, e aofia i ei te ala aka i te valuapo ke fagai latou.

13. Ne a mea e ‵tau o fakapaleni faka‵lei aka ne toeaina?

¹³ E ‵tau foki o fakatumau ne toeaina a te paleni ‵lei i te va o tiute e pelā me se tausi mamoe mo tiute o latou ki olotou kāiga. (1 Timoteo 5:8) A te taimi telā e fakaaoga ne toeaina fakatasi mo te fakapotopotoga se taimi tāua telā ne ‵tau o fakamāumāu ne ia fakatasi mo tena kāiga. A te auala e tasi ke fakapaleni faka‵lei aka a tiute e lua konā ko te ‵kami mai o nisi tino ki Tapuakiga a Kāiga i afiafi i nisi taimi. I tausaga ko ‵teka, ne ‵kami eiloa ne se toeaina i Tiapani, ko Masanao a tino ‵nofo taka mo kāiga faka-te-agaga kolā e seai ne tamana i ei ki te sukesukega a tena kāiga. Fakamuli ifo, ne fai eiloa a nisi tino kolā ne fesoasoani a ia ki ei e pelā me ne toeaina kae ne tau‵tali eiloa latou i te fakaakoakoga gali a Masanao.

‵Kalo Keatea Mai te Galue ke Maua se ‵Togi​​—Tausi te Lafu mo te Fakamaoni

14, 15. Kaia e ‵tau ei o fakaeteete a toeaina mai te ga‵lue “ke maua fua se ‵togi,” kae e mafai pefea o fakaakoako latou ki a Paulo i te feitu tenei?

¹⁴ Ne fakamalosi atu foki a Petelu ki toeaina ke tausi te lafu, “e se mo te manatu fua ke maua te ‵togi kae mai te loto lagona o tavini atu mo te fakamaoni.” E fakaaoga eiloa ne toeaina a taimi e uke i te galuega tenei, kae e se fakamoe‵moe latou ki se ‵togi. Ne lavea ne Petelu a te tāua ke fakailoa atu ki taina toeaina e uiga ki te fakamataku o te tausi atu ki te lafu “mo te manatu fua ke maua te ‵togi.” E fakamaoni mai a te fakamataku o te mea tenā i te olaga fia mau‵mea telā ne maua ne takitaki lotu o “Papelonia takutakua” faitalia me ne tokouke a tino ne iku atu ki se tulaga mativa. (Fakaasiga 18:​2, 3) E isi eiloa ne pogai ‵lei ke matapula‵pula a toeaina ki so se manakoga i te feitu tenā i aso nei.

¹⁵ Ne tuku mai ne Paulo se fakaakoakoga ‵lei mō toeaina Kelisiano. E tiga eiloa ne fai a ia e pelā me se apositolo kae ne mafai foki o fai e pelā me se “amoga ‵mafa” ki luga i Kelisiano i Tesalonia, ne seki kai a ia i so se meakai mai so se tino “e aunoa mo te ‵togi.” Kae ne ‘galue eiloa a ia i ao mo po.’ (2 Tesalonia 3:8) E tokouke a toeaina i aso nei, e aofia i ei a latou kolā e ga‵lue e pelā me ne tino faima‵laga, e tuku mai ne latou se fakaakoakoga ‵lei i te feitu tenei. E tiga eiloa e talia ne latou te uiga talimālō mai taina tali‵tonu, e se avatu ne latou se “amoga ma‵fa” ki luga i so se tino.​​—1 Tesalonia 2:9.

16. Se a te uiga ke tausi atu ki te lafu mo te “fakamaoni”?

¹⁶ E tausi eiloa ne toeaina a te lafu mo te “fakamaoni.” E lavea atu a te lotou fakamaoni mai te taliaga ne latou o mea faiga‵ta ke fesoasoani atu ki te lafu. Kae e se fakauiga i ei me e faimālō ne latou a te lafu ke tavini atu ki a Ieova; io me fakamalosi atu ne toeaina a‵lofa a nisi tino ke tavini atu ki te Atua mo se uiga fakatau‵fai. (Kalatia 5:​26) E malamalama a toeaina me e kese‵kese eiloa a mamoe taki tokotasi. E loto finafinau eiloa latou ke fesoasoani atu ki olotou taina ke tavini atu ki a Ieova mo te fia‵fia.

Ke mo a e Pule Fakasaua ki Luga i te Lafu Kae ke Fai mo Fakaakoakoga

17, 18. (a) Kaia e faigata ei ki apositolo i nisi taimi ke malamalama i te akoakoga a Iesu e uiga ki te loto maulalo? (e) Ne a tulaga e mafai o ‵tai ‵pau ei tatou i te feitu tenā?

¹⁷ E pelā mo te mea ne sau‵tala tatou ki ei, e ‵tau o masaua ne toeaina me i te lafu telā e tausi ne latou i a te Atua, kae e sē i a latou. E fakaeteete eiloa latou ke mo a e ‘pule atu e pelā me ne aliki ki luga i a latou kolā e fai mo tofi o te Atua.’ (Faitau te 1 Petelu 5:3.) I nisi taimi, ne kausaki atu a apositolo a Iesu ki se mea mo se kilokiloga ‵se. E pelā mo latou kolā e pule atu ki malo, ne ma‵nako latou ke maua se tulaga fia maluga.​​—Faitau te Maleko 10:​42-​45.

¹⁸ I aso nei, a taina kolā e “fia fai . . . mo takitaki” e ‵tau o iloilo ifo ne latou a latou eiloa ki te pogai e ‵tau o kausaki atu ei latou ki ei. (1 Timoteo 3:1) E ma‵nako eiloa a latou kolā ko fai nei mo toeaina ke ‵sili ifo ki a latou eiloa me e mata, e maua ne latou se manakoga mō se tulaga pule io me ko te fia maluga e pelā mo te mea ne fai ne nisi apositolo. Kafai ne faigata ki apositolo i te feitu tenei, e fia‵fia eiloa toeaina ke ga‵lue latou ke ‵kalo keatea mai so se manakoga faka-te-lalolagi ke pule atu ki nisi tino.

19. Se a te mea e ‵tau o masaua ne toeaina māfai ko gasue‵sue o puipui a te lafu?

¹⁹ E tonu, e isi ne taimi e ‵tau ei mo toeaina o ‵mautakitaki, māfai ko puipui ne latou a te lafu mai “luko” fe‵kai. (Galuega 20:​28-​30) Ne fai atu a Paulo ki a Tito ke tumau eiloa i te “fakamalosi atu kae polopoloki atu a tino fakalogo‵logo.” (Tito 2:15) Kae kafai e ‵tau o fai ne fakamasinoga ki vaegā faifaiga penā, e taumafai eiloa a toeaina ke āva atu ki tino kolā ne aofia i ei. E malamalama latou me i lō te fakaasi atu o te sē fia‵fia, a te tuku atu o se fakaakoakoga ‵lei e fai ei ke oko atu ki te loto o te tino kae fai ei ke tautali atu a ia i te auala tonu.

20. E mafai pefea o fakaakoako atu a toeaina ki a Iesu i te tukuatuga o se fakaakoakoga ‵lei?

²⁰ A te fakaakoakoga ‵lei a Keliso e fakamalosi atu ki toeaina ke a‵lofa ki te lafu. (Ioane 13:​12-​15) E fakamafanafana mai ki ‵tou loto māfai ko fai‵tau tatou ki te auala ne akoako ei a soko ke talai kae fai ne latou a soko. A tena uiga loto maulalo ne otia i ei a loto o ana soko, kae fakamalosi ei latou ke tau‵tali i se auala telā e fakaata mai ei ‘te loto maulalo mai te mafau‵fau me e tāua atu a nisi tino i a latou.’ (Filipi 2:3) E fakamalosi atu eiloa ki toeaina i aso nei ke tau‵tali i te fakaakoakoga a Iesu, kae e ma‵nako latou ke fai mo “fakaakoakoga ki te lafu mamoe.”

21. Se a te taui e mafai o olioli ki ei a toeaina?

²¹ Ne fakaoti ne Petelu a tena fakamalosiga ki toeaina mai te fakasino atu ki se folafolaga e tasi mō aso mai mua. (Faitau te 1 Petelu 5:4.) Ka maua ne ovasia fakaekegina “te palealiki ‵malu telā e se mafai o gata tena malapulapu” fakatasi mo Keliso i te lagi. Ka maua ne tausi mamoe lagolago o ‘nisi mamoe’ a te tauliaga ke tausi atu ki te lafu a te Atua i te lalolagi mai lalo i te pulega a te “Tausi Mamoe Sili.” (Ioane 10:16) Ka sau‵tala eiloa tatou i te suā mataupu ki auala e mafai o ‵lago atu a tino i te fakapotopotoga ki a latou kolā e filifili ke fai ne latou te takitakiga.

Ke Toe Mafaufau ki ei

• Kaia ne ‵tau ei mō Petelu ke fakamalosi atu ki taina toeaina ke tausi atu faka‵lei a te lafu a te Atua?

• E ‵tau o tausi pefea ne toeaina a tino ma‵saki i te feitu faka-te-agaga?

• Se a te mea e fakamalosi atu ki toeaina ke tausi atu faka‵lei a te lafu a te Atua?

[Fesili mo te Sukesukega]

 [Ata i te itulau e 23]

E pelā mo tausi mamoe i aso mua, e ‵tau eiloa mo toeaina i aso nei o puipui a “mamoe”