«Chabiic me li xchijtac Dios ti acʼbil aventainique»
«Chabiic me li xchijtac Dios ti acʼbil aventainique»
«Chabiic me li xchijtac Dios ti acʼbil aventainique. Mu me ta sujeluc xapasic; yutsiluc me avoʼnton xapasic.» (1 PED. 5:2)
1. ¿Kʼusi yakal tsnuptanik yajtsʼaklomtak Cristo kʼalal la stsʼiba sbaʼyel karta li Pedroe?
KʼALAL la stsʼiba sbaʼyel karta li Pedroe jutuk xaʼox skʼan xlik snuts yajtsʼaklomtak Cristo ta Roma li ajvalil Nerone. Li jtakbole tskʼan ox tstsatsubtasbe yoʼonton skotol li yermanotake, yuʼun li Diabloe te xjoyet noʼox jech kʼuchaʼal leon ti tskʼan chtiʼvane. Sventa xkuch yuʼunike xi-albatike: «Bijanic me», xchiʼuk xtok albatik: «Biqʼuit me xavacʼ abaic ta stojol li Dios ti echʼem stsatsale» (1 Ped. 5:6, 8). Jech xtok, skʼan ox lek jun yoʼontonik ta skotolalik. Albatik: «Me te noʼox atiʼtiʼ abaic, atʼol-tʼol aba atuquique, [...] atuquic noʼox chamil abaic», x-utatik (Gál. 5:15).
2, 3. ¿Buchʼu skʼan jkontraintik, xchiʼuk kʼusitik sjakʼobiltak ta jchantik li ta xchanobil liʼe xchiʼuk li ta yan xemanae?
2 Jaʼ jech chkʼot ta pasel li avi eke. Li Diabloe yakal tsaʼ kʼusitik xuʼ tspas sventa tslajesutik (Apo. 12:12). Jech xtok, nopol xa tajek chtal jun «tsots vocol [ti] muʼyuc onoʼox jech cʼalal ilic li banamile xchiʼuc cʼalal to tana» (Mat. 24:21). Jech kʼuchaʼal li yajtsʼaklomtak Cristo ta baʼyel sigloe skʼan mu jtsak jbatik ta kʼop li ta jchiʼil jbatik ta chʼunolajele. Sventa spas kuʼuntik taje, bakʼintike ta jkʼantik ti akʼo xiskoltautik li moletik ta tsobobbaile.
3 Pe ¿kʼusi chkoltaatik-o li moletik sventa mas xakʼ ta yoʼontonik «[ch]chabiic [...] li xchijtac Dios ti acʼbil [s]ventainique»? (1 Ped. 5:2.) ¿Kʼu yelan skʼan spas li yabtelike? Li ta xchanobil liʼe ta jchantik li xchibal sjakʼobil taje. Li ta yan xchanobile ta jchantik kʼuxi xuʼ xakʼ ta xkuxlejal jcholmantaletik li mantal ti xi chale: «Ichʼic ta mucʼ ti buchʼutic [«tsots», NM] ta xʼabtejic ta atojolic ta sventa ti Cajvaltique, ti buchʼutic ta sbijubtasoxuque, ti ta stojobtasoxuque» (1 Tes. 5:12, Ch). Li xchanobil liʼe tskoltautik sventa jtsaltik li kajKontratike xchiʼuk sventa mu xchʼay ta joltik ti jaʼ ti buchʼu skʼan jkontraintike (Efe. 6:12).
«Chabiic me li xchijtac Dios[e]»
4, 5. Alo jun skʼelobil ti kʼuyelan skʼan xchabiik chijetik li moletike.
4 Li Pedroe la stojobtas moletik ta baʼyel siglo sventa jechuk xilik li chijetik jech kʼuchaʼal chil li Diose (kʼelo 1 Pedro 5:1, 2). Manchuk mi yoyal tsobobbail li Pedroe, muʼyuk la stoy sba ti kʼuyelan la skʼopon batel xchiʼiltak ta molale (Gál. 2:9). Li Jtsop Jbeiltasvaneje jech tskʼananbe ek li moletik ta tsobobbail ti akʼo jaʼ jech xchabiik li xchijtak Diose.
5 Li jtakbole laj yal ti jaʼ oy ta sbaik «xchijtac Dios» li moletike. Skʼan xaʼibeik smelolal ti jaʼ yuʼun Jeova xchiʼuk Jesucristo li chijetike xchiʼuk ti chichʼik chapanel ta skoj ti kʼuyelan chichʼik ta ventae. Kakʼtik junuk skʼelobil: kaltik noʼox ti oy jun avamigo ti chalbot ti akʼo xachabibe xnichʼnab ta skoj ti oy bu chbat jayibuk kʼakʼale. ¿Mi mu tauk xachabi lek xchiʼuk chavakʼbe sveʼel li ololetike? Mi i-ipaj junuke, ¿mi mu tauk xavikʼ batel ta doktor ta anil? Li moletik ta tsobobbail eke snaʼojik ti jaʼ oy ta sventaik li steklumal Dios «[ti] smanojan ta xchʼichʼal [li xNichʼone]» (Hech. 20:28). Mu xchʼay ta sjolik ti laj yichʼ manel ta xchʼichʼel Jesucristo li chijetike. Ta skoj ti snaʼoj ti chichʼik chapanel ta skoj ti kʼuyelan chichʼik ta venta li chijetike, chchabiik lek, tskʼelik xchiʼuk tsmakʼlinik lek.
6. ¿Kʼusitik toʼox oy ta sbaik spasel li melel jchabichijetik ta skʼakʼalil Vivliae?
6 Nopo li kʼusi oy ta sbaik li melel jchabichijetik ta skʼakʼalil Vivliae. Kʼalal chikʼik batel ti bu oy yaxaltik li xchijike, tstsʼikik xkʼuxul kʼakʼal xchiʼuk sikil akʼobal (Gén. 31:40). Jech xtok, bateltike xibal sba kʼusi xuʼ snup ta xkuxlejalik ta skoj li xchijike. Jaʼ jech ikʼot ta stojolal li Davide, ta skeremale la spas leto xchiʼuk jkot leon xchiʼuk jkot oso sventa tspoj. Laj yal stuk ti laj la stsakbe sbakil ye, laj yakʼbe lek yaʼi ta skʼob, vaʼun icham yuʼun li chonbolometik taje (1 Sam. 17:34, 35). ¡Tsots yoʼonton laj yakʼ ta ilel kʼalal inopaj batel ta ye li jtiʼval chonbolometik taje! Jamal ta ilel ti mu xiʼ kʼalal la spoj li xchijtake.
7. Mi ipʼaj ta skʼob Satanás jkotuk chije, ¿kʼusi tspasik li moletike?
7 Li moletik avi kʼakʼal eke, skʼan lek vikʼil satik ta skoj ti kʼuyelan xuʼ chtal tiʼvanuk li Satanase. Mi ipʼaj ta skʼob jtiʼvanej leon jkotuk chije, jaʼ jech tspasik kʼuchaʼal la spas li Davide, chbat spojik lokʼel manchuk mi oy xaʼox ta ye li Satanase. Kʼalal chakʼik venta ti oy jun yajtsʼaklom Cristo ti kʼunibem ta mantal xchiʼuk ti jutuk xa skʼan xpʼaj ta spetsʼ Diabloe, chbat xchiʼinik ta loʼil sventa x-och ta rason yuʼunik (kʼelo Judas 22, 23). Mi oy jkot uni chij ti yayijeme, ta xpixbeik li syayijemale xchiʼuk chjaxbeik poxil ti jaʼ li sKʼop Diose. Li moletike melel onoʼox ti mu spas yuʼun stukik mi muʼyuk koltabilik yuʼun li Jeovae.
8. ¿Bu ta sbeiltasik batel chijetik li moletike xchiʼuk kʼu yelan tspasik?
8 Jun melel jchabichij ta voʼnee ta xikʼ batel xchijtak ta lekil yaxaltik xchiʼuk ti bu xuʼ staik voʼe. Jech kʼuchaʼal taje, li moletik eke ta sbeiltasik batel ta tsobobbail li chijetike. ¿Kʼu yelan tspasik? Tstijbeik yoʼonton sventa akʼo xbatilanik ta tsobajeletik, ti jaʼ te tstaik makʼlinel «cʼalal yorail ta xveʼique» xchiʼuk ti jaʼ te lek akʼbil sveʼelike (Mat. 24:45). Jech xtok, ta slekil yoʼontonik chchʼakbeik mas yorail li buchʼutik ipik ta mantale xchiʼuk chakʼik persa tsmakʼlinik ta sKʼop Dios. Pe mi oy jkotuk chij tskʼan tsut talel ta slumal Diose, ¿kʼusi tspasik li moletike? Muʼyuk ta sibtasik. Li kʼusi tspasike jaʼ ti chakʼbeik ta ilel slekil yoʼontonike xchiʼuk chakʼbeik ta ilel kʼuxi xuʼ xakʼ ta xkuxlejalik li beiltaseletik ta Vivliae.
9, 10. Li moletike, ¿kʼu yelan skʼan skʼelik li buchʼutik ipik ta mantale?
9 ¿Kʼu yelan stalel doktor ta jkʼantik kʼalal iputike? ¿Mi jaʼ van ta jkʼantik junuk ti jech mechuk noʼox chchikintabutik xchiʼuk ti anil noʼox chakʼ jpoxiltik ta skoj ti oy ep jchameletike? ¿O jaʼ ta jkʼantik ti buchʼu lek chchikintabutik li kʼusitik chkalbetike xchiʼuk ti chalbutik kʼusi jaʼ li jchameltike xchiʼuk ti kʼuxi xuʼ xichʼ poxtaele? Jnaʼojtik li stakʼobil taje.
10 Li ta skʼelobil taje oy kʼusitik lek xuʼ xchanik li moletik ta tsobobbaile. Kʼalal chchiʼinik ta loʼil jun ermano ti kʼunibem ta mantale, skʼan xchikintaik li kʼusi ch-albatike xchiʼuk skʼan skoltaik sventa stsatsub ta mantal, sventa taje skʼan «acʼo [xjaxbeik] aceite ta sbi li Cajvaltique», jaʼ xkaltik li Jeovae (kʼelo Santiago 5:14, 15). Jech taje, li mantaletik ta sKʼop Diose chkʼot ta yoʼontonik kʼuchaʼal jun jaxbil poxil, jech kʼuchaʼal li valsamo o poxil ta Galaade (Jer. 8:22; Eze. 34:16). Kʼalal chakʼ ta xkuxlejal beiltaseletik ta Vivlia li buchʼu ipe, ta xchaʼtsak yip. Li moletike, ¡toj lek kʼalal ta xchikintabeik kʼusi chal li chijetik ti yayijemike xchiʼuk lek ti koʼol tskʼoponik Diose!
«Mu me ta sujeluc xapasic; yutsiluc me avoʼnton xapasic»
11. ¿Kʼusi chtijbat yoʼontonik sventa yutsiluk yoʼonton xchabiik chijetik li moletike?
11 Li Pedroe laj yalbe xtok li kʼusi skʼan spasik xchiʼuk li kʼusi mu stakʼ spasik li moletik ta tsobobbail kʼalal tskʼelbeik xchijtak Diose. Baʼyele, la stijbe yoʼonton sventa mu ta sujeluk spasik, ti yutsiluk yoʼonton spasike. ¿Kʼusi skʼan xtijbat yoʼontonik li moletik sventa jun yoʼonton xtunik ta stojolal yermanotakike? Veno, ¿kʼusi itijbat yoʼonton Pedro sventa skʼel xchiʼuk smakʼlin li xchijtak Jesuse? Li kʼusi mas ikoltaate jaʼ ti skʼanoj xchiʼuk ti xkʼuxubinoj tajek li Kajvaltike (Juan 21:15-17). Ta skoj ti jech skʼanojik ek li moletike «muc xa cuxuluc ta sventa stu[kik]. Jaʼ xa cuxulic ta stojol li Cristo ti icham» ta skojike (2 Cor. 5:14, 15). Ta skoj ti skʼanojik Dios, Jesús xchiʼuk li yermanotakike, chtijbat yoʼontonik sventa chtunik ta stojolal li chijetik xchiʼuk sventa xchʼak yipik, kʼusitik oy yuʼunik xchiʼuk skʼakʼalik (Mat. 22:37-39). Taje tspasik ta sjunul yoʼontonik, maʼuk ti ta ilinel xa tspasike.
12. ¿Kʼu toʼox yelan chtun ta stojolal yermanotak li Pabloe?
12 ¿Bu to kʼalal oy ta yoʼonton mu sjalan sbaik li moletike? Li moletike, jaʼ jech chchabiik chijetik jech kʼuchaʼal la spas li Pabloe, ti jaʼ la xchanbe li Jesús eke (1 Cor. 11:1). Li jtakbol xchiʼuk li xchiʼiltake la skʼanik tajek li yermanotakik ta Tesalonicae, jech oxal xi laj yalanbee: «Mu jaʼuc noʼox oy ta coʼntoncutic ta jcholbotcutic li Lequil Aʼyeje; oy ta coʼntoncutic chcacʼ jbecʼtalcutic ta acojic noxtoc», xi. Xchiʼuk la xkʼuxibinik «jech chac cʼu chaʼal jun meʼil ti lec ta xcʼuxubin yole» (1 Tes. 2:7, 8). Li jtakbole lek snaʼoj ti jun meʼile lek skʼanoj li sneneʼe, jech oxal, mu ventauk kʼusi tspas sventa tskʼel, akʼo mi chlik yakʼbe xchuʼ ta oʼlol akʼobal.
13. ¿Kʼusi oyuk noʼox smelolal skʼan spasik li moletike?
13 Jech xtok, skʼan me skʼelik lek ti oyuk noʼox smelolal spasik li yabtelik ta skʼel li chijetike, yuʼun oy me yabtelik xtok li ta yutsʼ yalalike (1 Tim. 5:8). Li kʼu sjalil chchʼakbeik skʼakʼal sventa li yermanotakike, jaʼ lek yorail xuʼ stunesik jechuk li ta yutsʼ yalalike. Li kʼusi xuʼ xkoltaatik sventa oyuk noʼox smelolal tspasik li yabtelik ta tsobobbail xchiʼuk li ta snaike, jaʼ ti xikʼik bakʼintikuk ermanoetik li ta yichʼel ta mukʼ Jeova ta yutsʼ yalalike. Taje jaʼ jech tspasik li Masanao xchiʼuk li yutsʼ yalale. Li mol taje ti likem ta Japone oy xa jayibuk jabil chikʼ ta sna yajtsʼaklomtak Cristo ti muʼyuk snup xchiʼilike xchiʼuk utsʼ-alaliletik ti maʼuk yajrextiko Jeova li stot smeʼike. Ta mas tsʼakale, jlom li buchʼutik chikʼanan toʼox batel ta snae ochemik xa ta mol ek xchiʼuk jech xa tspasik ek kʼuchaʼal li Masanaoe.
«Mu me jaʼuc ta scoj ti xpichʼet avoʼntonic yuʼun taqʼuine. Scotoluc avoʼnton xapasic li avabtelique»
14, 15. ¿Kʼu yuʼun skʼan mu jaʼuk xlik xpichʼ yoʼontonik ta takʼin li moletike, xchiʼuk kʼuxi xuʼ xchanbeik li Pabloe?
14 Li Pedroe xi to laj yalbe moletik kʼalal chchabiik li chijetike: «Mu me jaʼuc ta scoj ti xpichʼet avoʼntonic yuʼun taqʼuine. Scotoluc avoʼnton xapasic li avabtelique», xut. Ta skoj ti ep chchʼak skʼakʼalik sventa tspas yabtelike, muʼyuk bu smalaojik ti ch-akʼbatik takʼine. Akʼo mi jech, li jtakbole tsots skʼoplal laj yil tspʼijubtas ti akʼo mu xlik xpichʼ yoʼontonik ta takʼine. Ta skoj ti chchabiik chijetike, li moletike xuʼ van xlik snopik ti xuʼ te sta stakʼinike, li kʼusi taje lek xvinaj li ta jnitvanejetik ta mukʼta Babilonia. Li stukike ep skʼulejalike, yan li buchʼutik sventainojik ta alele abol sbaik tajek (Apo. 18:2, 3). Li moletik ta tsobobbaile skʼan me mu stikʼ ta sjol ta yoʼontonik mi jsetʼuk taje.
15 Ta sventa taje, jaʼ me lek ti xchanbeik li Pabloe. Ta skoj ti jaʼ jtakbole xuʼ van laj yakʼbe svokolik li ermanoetik ta Tesalónica ti jechuke. Pe muʼyuk jech la spas, «ta cʼacʼal ta acʼubal muʼyuc bu la [xkuxik]; tsots [i-abtejik]» sventa mu «jecheʼ noʼox la [skʼan sveʼel]» (2 Tes. 3:8). Li avi kʼakʼale, ep moletik, jech kʼuchaʼal li jkʼelvanejetik ta sirkuito xchiʼuk distritoe, lek ta chanbel stalelalik ek. Akʼo mi chchʼamik li slekil yoʼonton chakʼik ta ilel li ermanoetike, «muc [s]cʼan [xakʼbe] [s]vocolic» (1 Tes. 2:9).
16. ¿Kʼusi smakojbe skʼoplal sventa skotol yoʼonton chchabiik chijetik li moletik ta tsobobbaile?
16 Ta yan xtoke, li moletik ta tsobobbaile ta skotol yoʼonton spasik li yabtelike. Jech ta melel, ta sjunul yoʼonton ch-abtejik xchiʼuk mu sjalan sbaik sventa li yermanotakike. Akʼo mi oy ta yoʼontonik tskolta li yermanotakike, pe muʼyuk tsujik xchiʼuk muʼyuk chchanubtasik sventa tstsal sbaik xchiʼuk ermanoetik (Gál. 5:26). Snaʼojik ti jelel jujukot li chijetike, jech xtok oy ta yoʼontonik skoltael ti akʼo xtunik ta sjunul yoʼontonik ta stojolal li Jeovae.
«Mu xanopic ti ajvalil xa xavaʼi abai[ke]. Jaʼ ta scʼan ti [xavakʼik] persa ta yaqʼuel iluc ti cʼusi lec ta pasel ta stojol ti chijetique»
17, 18. 1) ¿Kʼu yuʼun tsots laj yaʼiik yakʼel ta ilel ti skʼan manxo xakʼ sbaik li jtakboletike? 2) ¿Kʼusi skʼan mu jchanbetik li jtakboletike?
17 Jech kʼuchaʼal laj xa kiltike, skʼan svules ta sjolik ti jaʼ yuʼun Jeova li chijetike, ti maʼuk yuʼunike. Jaʼ yuʼun skʼan mu stoy sbaik ta stojol li «chijetic ti [s]bainojic ta sqʼuelele» (kʼelo 1 Pedro 5:3, Ch). Bateltike, li yajtakboltak Jesuse oy ox ta yoʼontonik tspasik li kʼusi tskʼan yoʼontonike. Yileluke jech xaʼox chlik spasik kʼuchaʼal li ajvaliletik ta skʼakʼalilike, ti jaʼ noʼox tskʼan staik sjuʼelik o tskʼan ti bankilal ta xkʼotike (kʼelo Marcos 10:42-45).
18 Li ta jkʼakʼaltike, «me oy bochʼo [junuk yajtsʼaklomtak Cristoe] tscʼan ta xʼoch ta jqʼuelvanej yuʼun jcholcʼopetique», skʼan sjakʼbe sba kʼu yuʼun ti jech oy ta yoʼonton tspase (1 Tim. 3:1). Li buchʼutik chtunik xa ta mole skʼan xi sjakʼbe sbaike: «¿Mi oy van jech ta koʼonton ek ti kʼuchaʼal la spasik li jtakboletike?». Mi vokol laj yaʼiik stsalel ti tskʼan sjuʼelik o tskʼan chkʼotik ta bankilal li jtakboletike xuʼ van jech chkʼot ta pasel ta stojolal li moletik eke. Jamal ta ilel ti skʼan vikʼiluk lek satike.
19. Kʼalal oy xa kʼusi chlik pasbatuk li chijetike, ¿kʼusi skʼan spasik li moletike?
19 Bateltike skʼan onoʼox tsots yoʼonton xakʼik ta ilel li moletike. Jech kʼuchaʼal kʼalal tskʼan tstikʼ sba ta tsobobbail li «jtiʼval oqʼuileti[ke]» (Hech. 20:28-30). Jech xtok skʼan tsots yoʼontonik sventa spasik li kʼusi laj yalbe Tito li Pabloe: «Jaʼ me jech xachanubtas, jaʼ me jech xataqʼui, yuʼun oy avabtel ta stojol Dios» (Tito 2:15). Manchuk mi jech, skʼan xkichʼtik ta mukʼ xchiʼuk oyuk sbalil chilik li buchʼutik jech tspasike. ¿Kʼu yuʼun? Yuʼun snaʼojik ti kʼusi mas tsots skʼoplal sventa xkʼot ta oʼontonal li mantal chakʼike xchiʼuk sjel stalelal li jun krixchanoe, maʼuk ti tsots xa chtakʼivanike, moʼoj, jaʼ lek ti ta slekil yoʼonton chakʼbeik snope.
20. ¿Kʼu yuʼun ep sbalil xuʼ staik li moletik mi chchanik kʼuyelan echʼ xkuxlejal li Jesuse?
20 Lek xuʼ xchanbeik stalel Jesús li moletike. Kʼalal chchanik Evanjelioetik li moletike, mas chtijbat yoʼontonik sventa oyuk slekil yoʼonton chchabiik li chijetike (Juan 13:12-15). Yuʼun tstij koʼontontik kʼalal chkiltik kʼuxi la xchanubtas yajtsʼaklomtak kʼalal la xchol mantal ta Balumile. Ikʼot tajek ta yoʼontonik ti bikʼit chakʼ sba li Jchanubtasvanej yuʼunike, jech oxal, jech la xchanbeik xchiʼuk bikʼit lik yakʼ sbaik, ayaj ta yoʼontonik ti tsots skʼoplal laj yilik li xchiʼilike (Fili. 2:3). Li avi eke, li moletike chtijbat yoʼontonik ta xchanbel stalelal li Jesuse, vaʼun jech lek xa «[chakʼik] iluc ti cʼusi lec ta pasel ta stojol ti chijetique».
21. ¿Kʼusi smoton tstaik li moletike?
21 Li ta stsutseb sloʼil li Pedroe laj yalbe skʼoplal jun matanal ti chtal ta tsʼakale (kʼelo 1 Pedro 5:4). Li moletik ti tʼujbil chbatik ta vinajele ta xichʼ «[s]motonic ti toj jun yutsile ti mu snaʼ xlaj oe», yuʼun chkuxiik sbatel osil ta vinajel xchiʼuk Cristo. Li moletik ta yan chijetike, li smoton tstaike jaʼ ti chchabiik li xchijtak Dios ta Balumil kʼalal ch-ajvalilaj xaʼox li «Banquilal yuʼun jchabichijetique» (Juan 10:16). Li ta yan xchanobile ta jchantik jaytosuk kʼusitik xuʼ jpastik sventa jkoltatik li moletik ta tsobobbaile.
Svulesobil ta joltik
• Li Pedroe, ¿kʼu yuʼun lek sta-o ti laj yalbe moletik ti skʼan xchabiik li chijtak Dios ti akʼbilik ta sventainike?
• Li moletike, ¿kʼu yelan skʼan xchabiik li chijetik ti ipik ta mantale?
• Li moletike, ¿kʼusi chtijbat-o yoʼontonik sventa xchabiik li xchijtak Dios ti akʼbilik ta sventainike?
[Sjakʼobiltak sventa xchanobil]
[Lokʼol ta pajina 21]
Jech kʼuchaʼal li jchabichijetik ta voʼnee, li moletike chchabiik li chijetik ti oy ta sbaike
