‘Intte Giddon Deˈiya Xoossaa Dorssaa Wudiyaa Heemmite’
‘Intte Giddon Deˈiya Xoossaa Dorssaa Wudiyaa Heemmite’
“Intte giddon de7iya Xoossaa dorssaa wudiyaa Xoossai koyiyoogaadan heemmite.”—1 PHE. 5:2.
1. PHeexiroosi koyro dabddaabbiyaa xaafiyo wode, Kiristtaanetu bolli aybi gakkiiddi deˈii?
PHEEXIROOSI, Rooma kawuwaa Neeroy Kiristtaanetu bolli yedetaa gattanaappe guuttaa kasetidi, koyro dabddaabbiyaa xaafiis. I ba mala Kiristtaaneta minttettanau koyiis. He wode Dabloosi Kiristtaaneta mittanau koyidi, eta ‘lanqqiyan yuuyees.’ Eti a eqettanau, bantta qofan ‘naagettananne’ ‘wolqqaama Xoossaa kushiyaappe garssaara banttana toochana’ koshshiis. (1 PHe. 5:6, 8) Eti bantta issippetettaakka naagana koshshiis. ‘Bantta giddon wurenna mala,’ eti ‘issoy issuwaara saxettananne meetettana’ bessenna.—Gal. 5:15.
2, 3. Nuuni oonaara olettana koshshii, kallidi ay beˈanee?
2 Ha wodiyan nu bollikka hegaa mala hanotay gakkees. Dabloosi nuna mittanau injjiyaa koyees. (Ajj. 12:12) Qassi ‘saˈay merettoosappe hachi gakkanaashin gakkibeenna iita waayee’ matattiiddi deˈees. (Maa. 24:21) Koyro xeetu layttan deˈida Kiristtaaneti issoy issuwaara ooyettennaadan naagettana koshshidoogaadan, nuunikka naagettana bessees. Hegaadan oottanau issi issitoo nuuyyo cimatu maaduwaa koshshees.
3 Gubaaˈiyaa cimati bantta “giddon de7iya Xoossaa dorssaa wudiyaa” heemmiyo maataa nashshiyoogaa waatidi dichana danddayiyaakko ane beˈoos. (1 PHe. 5:2) Hegaappe simmidi, wudiyaa suure heemmiyo ogiyaa beˈana. Gubaaˈiyaa yameti bantta ‘giddon minnidi oottiyaageetanne kaalettiyaageeta bonchana’ danddayiyo ogiyaa kaalliya huuphe yohuwan beˈana. (1 Tas. 5:12) Ha yohota akeekiyoogee, nunaara olettiiddi deˈiyaagee nu waanna Morkkiyaa gidiyoogaa hassayidi, aara baaxetiyo wode minnidi eqqanau maaddees.—Efi. 6:12.
‘Xoossaa Dorssaa Wudiyaa Heemmite’
4, 5. Cimati wudiyaa ayba ogiyan xeellana koshshii? Leemisuwaa yoota.
4 Koyro xeetu layttan deˈida gubaaˈe cimati, Xoossay etau immido wudiyaa i xeelliyo ogiyan xeellanaadan PHeexiroosi minttettiis. (1 PHeexiroosa 5:1, 2 nabbaba.) PHeexiroosi gubaaˈiyaa kaalettiyaagaa geetettidaba gidikkonne, i cimata godatidi azazibeenna. Hegaappe, ikka etaagaadan gubaaˈe cima gidiyoogaa yootidi zoriis. (Gal. 2:9) PHeexiroosaagaadan, ha wodiyan Bollaara Heemmiyaageekka, gubaaˈe cimati Xoossaa wudiyaa heemmiyo deexo aawatettaa polanau baaxetanaadan zorees.
5 PHeexiroosi, cimati ‘bantta giddon deˈiya Xoossaa dorssaa wudiyaa heemmana’ koshshiyoogaa xaafiis. Eti wudee Yihoowabanne Yesuus Kiristtoosaba gidiyoogaa akeekiyoogee keehippe koshshiyaaba. Cimati Xoossaa dorssaa heemmiyo ogiyaa xeelliyaagan oyshettoosona. Leemisuwau, intte mata laggee manddara biiddi, intte a naata naaganaadan yootidabadan qoppite. He naata loyttidi naagekketii, qassi mizekketii? Etappe issoy sakettikko, akkamissekketii? Hegaadan, gubaaˈiyaa cimatikka Xoossay Yesuusa ‘suuttan wozido gubaaˈiyaa naagana’ koshshees. (Oos. 20:28) Dorssati huuphiyan huuphiyan alˈˈo gidida Kiristtoos Yesuusa suuttan wozettidoogaa eti akeekoosona. Cimati oyshettiyo gishshau, wudiyaa mizoosona, naagoosonanne heemmoosona.
6. Beni wode dorssaa heemmiyaageeti waatiyoonaa?
6 Beni wode dorssaa heemmiyaageeti oottiyoobaa akeekite. Eti wudiyaa heemmanau gallassa suuluwaanne qamma kinchuwaa danddayidosona. (Doo. 31:40) Ubba eti dorssaa gishshau shemppo miyaabaa oottidosona. Daawiti naatettan dorssaa heemmiyo wode, gaammuwaappe, beeriyaappenne hara doˈaappe ba wudiyaa ashshiis. Hegaa xeelliyaagan Daawiti, doˈaa ‘buuchaa oyqqidi, shoci woriyoogaa’ yootiis. (1 Sam. 17:34, 35) I keehippe xala! I doˈaa doonaa oyqqidi wotti ekkees giyoogaa! Gidikkokka, i dorssaa ashshanau guyye gi erenna.
7. Cimati leemiso hanotan Seexaanaa doonaappe dorssaa wotti ekkana danddayiyoy ayba ogiyaanee?
7 Ha wodiyan, gaammuwaadan Dabloosi gattiyo qohuwaappe cimati wudiyaa naagana koshshees. Hegee leemiso hanotan Dabloosa doonaappe dorssaa wotti ekkiyoogaa mala xalatettaa koshshana danddayees. Cimati doˈaa buuchaa oyqqidi, dorssaa ashshoosona gaana danddayettees. Seexaanaa piriyan gelanau paacettiya, akeeki paccido ishata eti zorana danddayoosona. (Yihudaa 22, 23 nabbaba.) Yihoowa maadoy baynnan, cimati hegaa oottana danddayennaagee erettidaagaa. Eti meqqida dorssaa qaretan kooloosonanne Xoossaa Qaalaa zaytiyaa tiyoosona.
8. Cimati wudiyaa awu kaalettiyoonaa, hegaadan oottiyoy ayba ogiyaanee?
8 Dorssaa henttanchay qooroynne haattay deˈiyoosaa wudiyaa kaalettees. Hegaara issi mala hanotan, cimatikka wudee “qumaa koshshiyo wodiyan” demmanaadaaninne loytti maanaadan, aggennan shiiquwan beettana mala eta minttettoosonanne yaa kaalettoosona. (Maa. 24:45) Ayyaana hanotan sahettidaageeti Xoossaa Qaalaappe minttettuwaa demmanaadan maaddanau cimati daro wodiyaa goˈettana danddayoosona. Wudiyaappe shaahettida dorssay wudiyaakko simmanau baaxetiiddi deˈana danddayees. Cimati bantta ishay dungguuxanaadan oottiyoogaappe, siiquwan Geeshsha Maxaafaa baaso siraataa qonccissoosona, qassi i hegaa waatidi oosuwan peeshshana danddayiyaakko akeekissoosona.
9, 10. Ayyaanaaban sahettida uraa cimati waati oyqqana koshshii?
9 Intte sahettiyo wode, ay mala dottoree inttena akkamanaadan koyeetii? Hara asaa akkamanau qoppidi, intte giyoobaa darin siyennan, sohuwaara xaliyaa azaziya dottoriyaa koyeetiiyye, woy intte giyoobaa loytti siyiya, qassi inttena sakkidabay aybakko qonccissi yootiyaanne hegau koshshiya akkamuwaa intte akkamettanaadan oottiya dottoriyaa koyeetii?
10 Hegaara issi mala hanotan, cimati ayyaanaaban sahettida uray yootiyoobaa ezgganaunne a masunttay paxanaadan maaddanau danddayoosona; yaatiyoogan leemiso hanotan ‘Yihoowa sunttan zaytiyaa a tiyoosona.’ (Yaaqooba 5:14, 15 nabbaba.) Xoossaa Qaalay, sahettiya uraa Galaˈaade zaytiyaadan woppissana danddayees. (Erm. 8:22; Hiz. 34:16) Geeshsha Maxaafaa baaso siraataa oosuwan peeshshiyo wode, shuggida uray ayyaanaaban minnana danddayees. Ee, sahettida dorssaa qofissiyaabaa siyidoogaappe guyyiyan, cimati loˈˈo gidida darobaa oottoosona; qassi aara issippe woossoosona.
Dosaanappe Attin Wolqqan Gidenna
11. Cimati Xoossaa wudiyaa dosan heemmanaadan denttettiyaabi aybee?
11 PHeexiroosi hegaappe kaallidi, wudiyaa heemmana koshshiyoonne koshshenna ogiyaa cimata akeekissiis. Cimati Xoossaa wudiyaa heemmana koshshiyoy “dosaanappe attin, wolqqan gidenna.” Cimati bantta ishatuyyo dosan oottanaadan denttettiyay aybee? PHeexiroosi Yesuusa dorssata heemmanaadaaninne mizanaadan denttettidabay shin aybee? A denttettida waannabay Godaa dosiyoogaanne siiqiyoogaa. (Yoh. 21:15-17) Siiquwaappe denddidaagan, cimati ‘bantta gishshau hayqqidaagaayyo deˈoosonappe attin, bantta huupheyyo deˈokkona.’ (2 Qor. 5:14, 15) Hagaa mala siiqoy, qassi Xoossaa siiqiyoogeenne bantta ishantta siiqiyoogee, cimati wudiyaa heemmanau bantta wolqqaa, miishshaanne wodiyaa goˈettanaadan denttettees. (Maa. 22:37-39) Eti hegaa undduudiiddi gidennan, bantta dosan oottoosona.
12. Kiitettida PHauloosi ishatuyyo ayba xekkaa gakkanaashin oottidee?
12 Cimati hegaadan oottana bessiyoy ayba xekkaa gakkanaashiinee? Eti dorssaa heemmiyo ogiyan, Yesuusa milatida, kiitettida PHauloosa leemisuwaa kaalloosona. (1 Qor. 11:1) PHauloosinne aara issippe oottiyaageeti, Tasalonqqen deˈiya ishata keehippe siiqiyo gishshau, ‘Xoossaa wonggeliyaa etau yootiyoogaa xalaala gidennan, bantta deˈuwaakka immanau’ koyidosona. Hegaadan oottiyoogan, eti “aayyiyaa ba naata dichchiyoogaadan” ashkketettan eta oyqqidosona. (1 Tas. 2:7, 8) PHauloosi, xanttiya aayyiyaa ba naˈau ay keena qarettiyaakko erees. A ba naˈaa xanttanau bilahe denddiyoogaa gujjin, ba naˈau oottennabi baawa.
13. Cimati bessiyaagaadan kiyana koshshiyo aawatettati awugeetee?
13 Cimati wudiyaa heemmiyoonne bantta soo asaara gayttida aawatettaa bessiyaagaadan polanau naagettana koshshees. (1 Xim. 5:8) Cimati bantta soo asaara aattiyo alˈˈo wodiyaa gubaaˈiyaa oosuwau goˈettoosona. Ha naaˈˈu aawatettaa bessiya ogiyan kiyana danddayiyo issi ogee, issi issitoo bantta So Asaa Goynuwaa omarssan harata shoobbiyoogaa. Jaappaane biittan deˈiya, Masanaˈa geetettiya issi Gubaaˈe cimay, aqo oyqqibeennaageetanne ayyaanaaban maaddiya aawi baynna keettaa asaa daro layttau ba soo asaa xinaatiyaa wode shoobbees. Guyyeppe, hegeetuppe amaridaageeti gubaaˈe cima gididi, Masanaˈo loˈˈo leemisuwaa kaallidosona.
Bessenna Goˈˈaa Demmanau Gidennan, Loˈˈo Qofan Heemmite
14, 15. Cimati ‘bantta goˈˈa xalaalaa xeellennaadan’ naagettana koshshiyoy aybissee, hegaa xeelliyaagan PHauloosa leemisuwaa waani kaallana danddayiyoonaa?
14 Cimati bantta “go77a xalaalaa xeellennan, lo77o qofan” wudiyaa heemmanaadankka PHeexiroosi minttettiis. Cimati oottiyo oosuwau daro wodiyaa goˈettiyaaba gidikkokka, etau miishshi qanxxettenna. “Go77a xalaalaa” demmanau wudiyaa heemmiyoogee kaalettiyo iitabaa xeelliyaagan PHeexiroosi cimata zorana koshshiyoogaa akeekiis. Daroti hiyyeesatettan deˈiyo wode, “Gita Baabiloona” haymaanootiyaa kaalettiyaageeti keehi duretidi deˈiyoogaappe hegaa akeekana danddayoos. (Ajj. 18:2, 3) Ha wodiyan deˈiya gubaaˈe cimati hegaa malabau kaalettiya ayba qofaappenne naagettana bessiyo loˈˈo gaasoy deˈees.
15 PHauloosi gubaaˈe cimatuyyo loˈˈo leemiso gidiyaabaa oottiis. I kiitettidaagaa gidiyo gishshau, Tasalonqqen deˈiya Kiristtaanetuyyo “tooho” gidana danddayiyaaba gidikkokka, “ooppenne quma coo” mibeenna. Hegaappe dumma ogiyan, i “qamminne gallassi daafuriiddinne jaamiiddi” oottiis. (2 Tas. 3:8) Woradaanne Awuraajjaa bollaara geeddiyaageeta gujjin, ha wodiyan deˈiya daro cimati hegaa xeelliyaagan loˈˈo leemiso gidoosona. Eti bantta mala Kiristtaaneti imatuwaa mokkiyo wode eeno giyaaba gidikkokka, oonanne ‘waayissokkona.’—1 Tas. 2:9.
16. Wudiyaa “loˈˈo qofan” heemmiyoogaa giyoogee woygiyoogee?
16 Gubaaˈe cimati wudiyaa “lo77o qofan” heemmoosona. Eti bantta goˈˈaa aggiyoogan wudiyaa maaddiyoogee, heemmiyoy loˈˈo qofaana gidiyoogaa qonccees. Gidikkokka, hegaa giyoogee, eti wudee Yihoowau oottanaadan wolqqanttokkona woy harati annaacettiyoogan Yihoowau oottanaadan minttettokkona giyoogaa. (Gal. 5:26) Cimati ubba dorssatikka alˈˈo gidiyoogaa akeekoosona. Eti bantta ishati ufayssan Yihoowau oottanaadan maaddanau koyoosona.
Wudiyau Leemiso Giditeppe Attin, Wolqqan Haaroppite
17, 18. (a) Kiitettidaageeti Yesuusi ashkketettaa xeelliyaagan tamaarissidobaa akeekanau issi issitoo metootidoy aybissee? (b) Eta hanotaappe nuuni ay tamaarana danddayiyoo?
17 Kasetidi beˈidoogaadan, cimati heemmiyo wudee Xoossaagaappe attin banttaagaa gidennaagaa akeekana koshshees. Eti Xoossaabaa gididaageeta ‘wolqqan haarenna’ mala naagettoosona. (1 PHeexiroosa 5:3 nabbaba.) Issi issitoo, Yesuusi kiittidoogeeti balabaa qoppidosona. He wode deˈiya haariyaageetuugaadan, etikka xoqqa maatay deˈiyoogeeta gidanau koyidosona.—Marqqoosa 10:42-45 nabbaba.
18 Ha wodiyan gubaaˈiyaa “kaalettiyaagaa gidanau” koyiya ishantti he maataa koyiyoy aybissakko banttana loyttidi qorana koshshees. (1 Xim. 3:1) Ha wodiyan gubaaˈe cima gididi oottiyaageeti, Yesuusi kiittidoogeetuppe issoti issotuugaadan haaranau woy xoqqa maataa demmanau koyiyaakkonne banttana qorana danddayoosona. Hegaara gayttidaagan, kiitettidaageeti metootidaba gidikko, harata haaranau koyiyo alamiyaa qofaappe haakkanau cimati baaxetana koshshiyoogaa akeekoosona.
19. Cimati wudiyaa naaganau issibaa oottiyo wode ay hassayana koshshii?
19 Cimati wudiyaa ‘iita wanggireellotuppe’ naagiyoogaa mala hanotan mino gidana koshshiyo wodeti deˈiyoogee tuma. (Oos. 20:28-30) PHauloosi Tiitu ubbatoo ‘kumetta maatan zoranaadaaninne seeranaadan’ yootiis. (Tii. 2:15) SHin, cimati hegaa mala mino tangguwaa ekkana koshshiyo wodetunkka, he uraa bonchuwan haasayissanau baaxetoosona. Eti hanqquwan haasayiyoogaappe kehatettan zoriyoogee issi ura wozanaa denttettanau, qassi i suure ogiyaa kaallanaadan maaddiyoogaa akeekoosona.
20. Cimati loˈˈo leemiso gidiyoogan Yesuusa leemisuwaa kaallana danddayiyoy ayba ogiyaanee?
20 Kiristtoosa loˈˈo leemisoy cimati wudiyaa siiqanaadan denttettees. (Yoh. 13:12-15) I ba erissiyo ashkkarata, sabbakiyoogaanne erissiyo ashkkara oottiyoogaa tamaarissido ogiyaa nabbabiyo wode keehippe ufayttoos. Yesuusi ba huuphiyaa kawushidi oottidobay, erssiyo ashkkarati harati banttappe gitatiyoogaa qoppidi ‘bantta huuphiyaa kaushshiyoogaa’ bessiyaabaa oottanaada denttettiis. (Pili. 2:3) Ha wodiyan deˈiya cimatikka hegaadan Yesuusa leemisuwaa kaallanau koyoosona; qassi hegaadan oottiyoogan eti ‘dorssaa wudiyau leemiso gidanau’ koyoosona.
21. Cimati sinttappe ayba anjjuwaa demmanaagaa hidootana danddayiyoonaa?
21 PHeexiroosi cimata zorido zoriyaa, sinttappe eti demmanabaa yootiyoogan kuuyiis. (1 PHeexiroosa 5:4 nabbaba.) Ayyaanan tiyettida cimati Kiristtoosaara saluwan “moorettenna bonchcho akiliiliyaa” ekkana. Garssaara heemmiya ‘hara dorssaa’ yametussi ‘heemmiyaageetu halaqaa’ haaruwaa garssan, saˈan Xoossaa dorssaa wudiyaa heemmiyo maatay deˈana. (Yoh. 10:16) Kaalliyaa huuphe yohoy gubaaˈiyaa yameti kaalettanaadan sunttettidaageeta kaafana danddayiyo ogiyaa qonccissees.
Zaarettanau
• Bantta giddon deˈiya Xoossaa dorssaa wudiyaa heemmanaadan PHeexiroosi ba mala cimata zoriyoogee bessiyaaba gididoy aybissee?
• Ayyaanaaban sahettida uraa cimati waati heemmana koshshii?
• Cimati bantta giddon deˈiya Xoossaa dorssaa wudiyaa heemmanaadan denttettiyay aybee?
[Oyshata]
[Sinttaa 23n deʼiya misiliyaa qonccissuwaa]
Beni wode henttanchatuugaadan, ha wodiyan deˈiya cimati bantta giddon deˈiya “dorssaa” naagana bessees
