‘Wuwor Jo Ma Tye Ka Tic Matek I Kinwu’

‘Wuwor jo ma tye ka tic matek i kinwu ma giloyo wiwu i Rwot dok gipwonyowu.’​—1 TEC. 5:12.

1, 2. (a) Kacokke me Tecalonika onongo tye nining i kare ma Paulo ocoyo waragane mukwongo botgi? (b) Paulo ocuko cwiny jo Tecalonika me timo ngo?

 KET kong ni itye i cencwari me acel i kacokke me Tecalonika, ma obedo i kin kacokke ma gikwongo cakone i Ulaya. Lakwena Paulo onongo ocwalo kare malac me dongo utmego ma kunnu. Oromo bedo ni en onongo ocimo co muteggi i yo me cwiny me telo wigi, kit ma otimo kwede i kacokke mukene. (Tic 14:23) Ento i nge cakke pa kacokke-ni, Lujudaya gucoko dano, gukelo woo matek wek giryem Paulo ki Cira woko ki i bomagi. Lukricitayo ma gudong kunnu nen calo gubedo kic kic, nyo ki lworo.

² Ngene kene ni, i nge weko Tecalonika, Paulo obedo ki par pi kacokke man ma pud tye ka dongo adonga-ni. En otemo dok cen botgi, ento ‘Catan ogenge woko.’ Pi meno en ocwalo Temceo wek ocit ocuk cwiny jo me kacokke-ni. (1 Tec. 2:18; 3:2) I kare ma Temceo odwoko ripot maber, Paulo owinyo ni myero eco waraga bot jo Tecalonika. Medo i kom jami mukene, Paulo bene ocuko cwinygi me ‘woro jo ma loyo wigi.’​—Kwan 1 Jo Tecalonika 5:12, 13.

3. Lukricitayo me Tecalonika onongo gitye ki tyen lok maber ango me keto deyo madwong i kom co muteggi i yo me cwiny?

 ³ Omege ma gitelo wi Lukricitayo me kacokke me Tecalonika onongo pe gitye ki ngec mapol calo Paulo ki lureme ma giwoto kwede; dok pe gubedo jo mucwiny i yo me cwiny calo luelda me Jerucalem. Pien kacokke meno onongo pud pe o wa mwaka acel! Kadi bed kit meno, jo me kacokke-ni onongo gitye ki tyen lok me bedo ki pwoc pi co muteggi i yo me cwiny, ma onongo gitye ka ‘tic matek,’ ma ‘giloyo wi’ kacokke dok ‘gipwonyo’ utmego. Ada, onongo gitye ki tyen lok me ‘keto deyo madwong i kom luelda, ki me marogi bene.’ I nge meno, Paulo omiyogi tira ni “wubed ki kuc i kinwu kekenwu.” Kono onongo itye i Tecalonika, mono onongo ibibedo ki pwoc madit pi tic pa luelda? In ineno “mot ma obedo dano” ma Lubanga omiyo bot kacokkewu kun wok ki bot Yecu nining?​—Ep. 4:8, NW.

‘Gitye ka Tic Matek’

4, 5. Pingo pwonyo jo me kacokke obedo tic matek bot luelda me kare pa Paulo, dok pingo tye kit meno i kare-ni?

⁴ I nge cwalo Paulo ki Cira i Berea, luelda me kacokke me Tecalonika gubedo ka ‘tic matek’ nining? Labongo akalakala mo, gin gulubu lanen pa Paulo i pwonyo jo me kacokke kun gitiyo ki Ginacoya. Iromo bedo ka penye ni, ‘Lukricitayo me Tecalonika tika onongo gitye ki pwoc pi Lok pa Lubanga?’ Pien Baibul waco ni jo me Berea onongo “kitgi beco makato jo ma i Tecalonika, . . . kun gingiyo Ginacoya ma yam gicoyo nino ducu.” (Tic 17:11) Tye ni, lok man onongo tye ka poro Lujudaya me Tecalonika ki me Berea, ento pe Lukricitayo. Jo ma gudoko luye ‘gugamo lok pa Lubanga, pe macalo lok pa dano, ento macalo lok pa Lubanga.’ (1 Tec. 2:13) Myero obed ni co muteggi i yo me cwiny gutiyo matek me pwonyo dano me kacokke meno.

⁵ I kare-ni, lagwok ot ma lagen dok maryek tye ka miyo bot romi pa Lubanga “camgi i kare ma mitte.” (Mat. 24:45) Ma lubbe ki tira pa lagwok ot, luelda gitiyo matek me pito utmego i yo me cwiny. Jo me kacokke giromo bedo ki bukkewa mapol ma jenge i Baibul dok leb mogo tye bene ki Watch Tower Publications Index ki Watchtower Library i CD-ROM. Me neno ni jo me kacokke guyeng i yo me cwiny, luelda gicwalo cawa malac i yubo pwony ma gipwonyo i cokke wek gimi i yo ma gudo cwiny dano. In tika dong itamo i kom cawa malac ma luelda jalo pi yubo pwony me cokke, gure madito, ki gure me distrik?

6, 7. (a) Lanen maber ango ma Paulo oweko pi co muteggi i yo cwiny i Tecalonika? (b) Pingo romo bedo tek pi luelda me kare-ni me lubu lanen pa Paulo?

⁶ Co muteggi i yo me cwiny i Tecalonika wigi opo i kom lanen maber ma Paulo oweko i tic me kwayo romi. En pe otimo tic man calo gin ma kidiyo en adiya iye. Kit ma kitito kwede i pwony ma man olubo, Paulo odoko “mwol . . .  acalo toto a gwoko itino mere.” (Kwan 1 Jo Tecalonika 2:7, 8; Baibul me leb Lango.) En onongo tye atera me ‘miyo’ kadi wa kwone! I ticgi me kwayo romi, co muteggi i yo me cwiny bene myero gubed kit meno.

⁷ Lukricitayo ma luelda i kare-ni gilubo lanen pa Paulo ki gwoko romi. Romi mukene pe guromo bedo lukica nyo lurem. Kadi bed kit meno, luelda gitemme me nyutu niango matut ma weko ginongo gin “maber” ki i kom romi magi. (Car. 16:20) Ada, pi bedo ki roc, laelda romo yelle ayela me bedo ki neno maber i kom ngat acel acel. Ento, ka en tye ka temme me bedo mwol bot jo ducu, mono pe omyero wapwoye pi tutene me bedo lakwat maber i te tela pa Kricito?

8, 9. I yo mapat pat ango ma luelda me kare-ni ‘gitye ka gwoko kwowa’?

 ⁸ Wan ducu watye ki tyen lok me ‘mine i te tela’ pa luelda. Kit ma Paulo ocoyo kwede, ‘gitye ka gwoko kwowa.’ (Ibru 13:17) Lok meno poyo wiwa i kom lakwat ma i kare mukene pe nino pi gwoko romine. I yo acel-lu, luelda i kare-ni giromo jalo cawagi me nino ka gitye ka konyo jo ma komgi lit, nyo gitye ki par nyo peko i yo me cwiny. Me labolle, omege ma gitiyo i Hospital Liaison Committee kare mukene kicoyogi ki i wang nino me cito ka miyo kony ka ngat mo tye marac i ot yat. Pud dong wabedo ki pwoc madit pi luelda ka watye i peko ma kit man!

⁹ Luelda ma gitye i Komitti ma Loyo Lok kom Gedo me Rijon ki komitti pi peko ma poto atura gitiyo matek pi konyo omege. Pore mada ni wami cwakwa botgi ki cwinywa ducu. Tam kong kony ma kimiyo i kare ma yamo magwar ma kilwongo ni Cyclone Nargis okelo peko i lobo Myanmar i 2008. Me o i Kacokke me Bothingone ma tye i kabedo ma kilwongo ni Irrawaddy Delta, omego ma gubino ka miyo kony gukato ka ma yamo obalo adada ma opong ki kom lyelli ma oradde ata. I kare ma omege guneno ni i kin jo mukwongo o me miyo kony i Bothingone obedo i ye laneno macon me adwolgi, gin guwacci: “Nen! Laneno me adwolwa! Jehovah olarowa!” In mono itye ki pwoc pi tic matego ma luelda gitiyo dyeceng ki dyewor-ri? Luelda mukene kicimogi me tic i komitti ma kite dok pat pi ngolo kop me bal madongo. Luelda magi pe giwakke pi tic ma gitiyo; ento jo ma ginongo kony i ticgi-ni gibedo ki pwoc madit.​—Mat. 6:2-4.

10. Tic ango ma pe waniang matut i komgi ma luelda gitimo?

¹⁰ Luelda mapol i kare-ni bene gitye ki tic me atima. Me labolle, lakub kin luelda goyo yub me cokke ma bedo tye cabit ki cabit. Karan me kacokke coko dok ribo ripot me ticwa pi dwe acel acel ki dok pi mwaka olu. Lador wi cukul keto tamme matut i yub me cukul. I nge dwe adek adek, kingiyo rekod me lim pa kacokke. Luelda gikwano waraga ma a ki i jang gang kal dok giketo i tic tira ma konyowa miyo “wadoko acel i niyewa.” (Ep. 4:3, 13) Pi tute pa luelda ma gitiyo matek, jami ducu timme “i kit maber, dok kore ki kore.”​—1 Kor. 14:40.

‘Giloyo Wiwu’

11, 12. Angagi ma giloyo wi kacokke, dok meno kwako timo ngo?

¹¹ Paulo oloko i kom co muteggi i yo me cwiny i Tecalonika ni ‘giloyo wi’ kacokke. Nyig lok ma kitiyo kwede tere gonye ni “cung i nyim” dok kiromo gonyo ni “tiro, telo yo i kin.” (1 Tec. 5:12.) Paulo owaco ni luelda magi bene ‘gitye ka tic matek.’ En onongo tye ka lok i kom luelda ducu me kacokke. I kare-ni, luelda mapol gicung i nyim kacokke ka doro pwony me cokke. Alokaloka me lwongo ma tye ni “lakub kin luelda” konyowa me neno luelda ducu calo lumemba me gurup acel.

¹² ‘Loyo wi’ kacokke pe kwako miyo pwony keken. Kitiyo ki lok acel-li i 1 Temceo 3:4. Paulo owacci laelda myero obed “ngat ma loyo ode maber kun gwoko litinone miyo gibedo ki winy bot jo madito.” Ki kany, lok man ni “loyo ode” pe kwako pwonyo lutinone keken ento bene kwako tela i ode kun “gwoko litinone miyo gibedo ki winy bot jo madito, ma giworo dano i yo ducu.” Ada, luelda gitelo kacokke, gikonyo wan ducu me bedo ki winy bot Jehovah.​—1 Tem. 3:5.

13. Pingo i kare mukene cawa malac mitte wek luelda gumok tam i cokke pa luelda?

¹³ Wek gutel wi romi i yo maber, luelda ginyamo i kingi lok ma kwako kacokke ki dok kit ma myero gikony kwede. Ka laelda acel keken aye moko tam pi kacokke kono  jami timme oyot. Ento, i lubu lanen pa lukiko madit me cencwari me acel, luelda me kare-ni ginyamo lok ma nongo gitye agonya, kun giyenyo tira ki i Ginacoya. Mitigi tye me keto Ginacoya i tic ma lubbe ki gin ma mitte pi kacokkegi. Man bedo ber loyo ka laelda acel acel yubbe pi cokke pa luelda, kun kwano Ginacoya kacel ki tira ma a ki bot lagwok ot ma lagen dok maryek. Ngene kene ni man tero cawa. Ka tamgi pe orwatte, kit ma otimme kwede i cencwari me acel i kare ma lukiko madit tye ka nyamo lok kom lirre, cawa malac kacel ki kwedo lok matut romo mitte me moko tamgi ma lubbe ki Ginacoya.​—Tic 15:2, 6, 7, 12-14, 28.

14. In tika itye ki pwoc ni luelda tiyo kacel ma gunote? Pingo iwinyo kit meno?

¹⁴ Ngo ma romo timme ka laelda acel diyo ni myero kiti ki yone nyo ni kilub tamme aye? Nyo ka ngat mo—macalo Diotrepe i cencwari me acel—okelo apokapoka kono? (3 Jon 9, 10) Kacokke kulu deno can. Ka Catan otemo kelo ayela i kacokke me cencwari me acel, ci watwero bedo labongo akalakala ni en mito balo kuc me kacokke i kareni. En romo bitowa kun tiyo ki miti maraco ma watye kwede, calo miti me bedo ladit. Pi meno, luelda myero gudong kit me mwolo dok guti kacel ma gunote. Pud dong watye ki pwoc ya pi luelda ma gitiyo kacel ma gunote!

“Gipwonyowu”

15. Miti ango ma luelda tye kwede ka gitye ka miyo tira bot omego nyo lamego mo?

¹⁵ Paulo dok omedde ki lok i kom tic mo  ma pe yot ma luelda gitimo ento pire tek: pwonyo romi. I Ginacoya me leb Grik, Paulo keken aye otiyo ki nyig lok me leb Grik ma kigonyo ni “pwony.” Lok man kiromo gonyo ni miyo tira magwar ento pe nyuto gero. (Tic 20:31) Me labolle, Paulo ocoyo bot jo Korint ni: “Pe acoyo lok man ni wek lewic omakwu, ento me pwonyowu macalo litinona ma amaro.” (1 Kor. 4:14) Tyen lok me miyogi pwony man obedo mar ma en onongo tye kwede pi jo mukene.

16. Ngo ma wi luelda myero pe owil iye ka gitye ka miyo tira bot jo mukene?

¹⁶ Wi luelda myero pe owil ni kit ma gimiyo kwede tira bot jo mukene pire tek. Gitemme me poro Paulo ki nyutu kica, mar, ki dok miyo kony. (Kwan 1 Jo Tecalonika 2:11, 12.) Ada, luelda ‘mako matek lok pa Lubanga me ada, ma miyo gitwero cuko cwiny jo ki pwony me ada.’​—Tito 1:5-9.

17, 18. Ngo ma wi myero pe owil iye ka laelda mo omiyo boti tira?

¹⁷ Tye ni luelda gire gitye ki roc dok giromo waco lok ma weko gikoko ange. (1 Luker 8:46; Yak. 3:8) Dok bene, luelda ngeyo ni nongo tira pe “obedo me yomcwiny, ento me kumo” bot omege ki lumege ma gimaro lok me cwiny. (Ibru 12:11) Pi meno, ka laelda ocito me miyo tira bot ngat mo, en nongo kong otamo matut dok olego pire. Ka kimini tira, in tika ipwoyo laelda meno pi mar ma en onyuto?

¹⁸ Ket kong ni itye ki two mo ma ocungo wi ludaktari woko. Ci dokto acel mo oniang two ma itye kwede kikome, ento in inongo tekki adada me ye ni itye ki two meno. Mono ibibedo ki akemo i kom dokto meno? Pe! Kadi bed en owacci myero kiyang in, ibiye ayango meno, kun ingeyo ni bikonyi. Kit ma dokto man oloko kwede boti oromo cwero cwinyi, ento itamo ni itwero weko meno loko tam ma ibimoko? Pe kit meno. I yo acel-lu, pe iwek kit ma kimiyo boti tira ogeng in winyo jo ma Jehovah ki Yecu tiyo kwedgi me konyi nyo gwoki i yo me cwiny.

Bed ki Pwoc Bot Jehovah pi Miyo Luelda

19, 20. I yo ango ma in itwero nyutu kwede pwoc pi “mot ma obedo dano”?

¹⁹ Ngo ma itwero timone ka inongo mot mo maber ma kiyubo piri? Tika ibinyutu pwocci ki tic kwede? Jehovah omiyo boti “mot ma obedo dano” kun wok ki i Yecu Kricito. Yo acel ma itwero nyutu pwoc pi mot magi aye me ciko iti matek me winyo pwony ma gimiyo i cokke, ki dong temme me ketone i tic. Itwero bene nyutu pwocci ki miyo lagam ma nongo ilwodo iye lok matut i cawa me cokke. Cwak kor tic ma luelda aye gitelo yo iye, calo tic me pwony. Ka ce inongo adwogi maber ki i tira ma laelda mo omini, pingo pe iwacce? Medo i kom meno, pingo pe inyut pwoc pi jo me ot pa luelda? Wi opo ni, wek laelda oti matek i kacokke, jo me ode myero gujal cawa ma gibedo kacel kwede.

²⁰ Ada, watye ki tyen lok mapol me nyutu pwoc bot luelda, ma gitiyo matek i kinwa, giloyo wiwa, dok gipwonyowa. “Mot ma obedo dano” magi gubedo mot ma Jehovah omiyowa ki mar.

Wi Tika Po?

• Lukricitayo me Tecalonika onongo gitye ki tyen lok ango me nyutu pwoc pi jo ma telogi?

• Luelda me kacokkewu mono gitiyo matek piwu nining?

• Adwogi maber ango ma inongo ki i tic pa luelda me loyo wi kacokkewu?

• Ka laelda mo omiyo boti tira, ngo ma wi myero pe owil iye?

[Peny me Kwan]

[Cal ma tye i pot karatac 31]

In tika itye ki pwoc pi yo mapol ma luelda kwayo kwede kacokke?