“Magkaigwa Kamo nin Paggalang sa mga Nagpapagal Dian sa Saindo”
“Magkaigwa Kamo nin Paggalang sa mga Nagpapagal Dian sa Saindo”
“Magkaigwa kamo nin paggalang sa mga nagpapagal dian sa saindo asin nangengenot sa saindo sa Kagurangnan asin naghahatol sa saindo.”—1 TES. 5:12.
1, 2. (a) Ano an kamugtakan kan kongregasyon sa Tesalonica kan enot sindang suratan ni Pablo? (b) Ano an dinagka ni Pablo na gibohon kan mga taga Tesalonica?
IMAHINARA na miembro ka kan kongregasyon sa Tesalonica kan enot na siglo, na saro sa pinakaenot na naestablisar sa Europa. Harohalawig na panahon an ginamit ni apostol Pablo sa pagpakosog sa mga tugang duman. Posibleng nagnombra sia nin kamagurangan tanganing mangenot, arog kan sa iba pang kongregasyon. (Gibo 14:23) Alagad pagkaestablisar kan kongregasyon, an mga Judio nag-organisar nin grupo tanganing pahaleon si Pablo asin Silas sa siudad. An natadang mga Kristiano tibaad nakamate na sinda pinabayaan asin posibleng natakot pa ngani.
2 Masasabotan niato kun taano ta pagkahale sa Tesalonica, nahadit si Pablo dapit sa bagong kongregasyon. Naghingoa siang bumalik, alagad ‘inolang sia ni Satanas’ sa dalan. Kaya isinugo nia si Timoteo tanganing pakosogon an kongregasyon. (1 Tes. 2:18; 3:2) Kan bumalik si Timoteo na may marahay na bareta, napahiro si Pablo na suratan an mga taga Tesalonica. Kabilang sa mga sinambit ni Pablo iyo an sadol na ‘magkaigwa nin paggalang sa mga nangengenot sa sainda.’—Basahon an 1 Tesalonica 5:12, 13.
3. May anong mga dahelan an mga Kristiano sa Tesalonica na magtao nin ekstraordinaryong konsiderasyon sa kamagurangan?
3 An mga nangengenot kaidto sa mga Kristiano sa Tesalonica bako pang eksperyensiado na arog ni Pablo asin kan kairiba niang nagbibiahe; asin bagohan sinda kun ikokomparar sa kamagurangan sa Jerusalem. Bako iyan makangangalas huling dai pa sarong taon an kongregasyon! Pero, may dahelan na magpasalamat an mga miembro kan kongregasyon na iyan huli sa saindang kamagurangan, na “nagpapagal” saka “nangengenot” sa kongregasyon asin “naghahatol” sa mga tugang. Tunay nanggad, may marahay sindang dahelan na “may pagkamoot na tawan [an kamagurangan] nin orog kisa sa ekstraordinaryong konsiderasyon.” An pakiolay na ini sinundan kan konseho ni Pablo na “magin mapagpatoninong sa lambang saro.” Kun yaon ka kaidto sa Tesalonica, magpapaheling ka daw nin hararom na pag-apresyar sa mga ginigibo kan kamagurangan? Paano mo minamansay an “balaog na mga lalaki” na itinao nin Dios sa saindong kongregasyon paagi ki Cristo?—Efe. 4:8.
“Nagpapagal”
4, 5. Taano an pagtokdo sa kongregasyon ta sarong pagpapagal para sa kamagurangan kan panahon ni Pablo, asin taano ta arog man kaiyan ngonyan?
4 Kan si Pablo asin Silas isugo na sa Berea, paano “nagpapagal” kaidto an kamagurangan sa Tesalonica? Bilang pag-arog ki Pablo, daing duda na tinokdoan ninda an kongregasyon gamit an Kasuratan. ‘Naaapresyar daw kan mga Kristiano sa Tesalonica an Tataramon nin Dios?’ an tibaad maisip mo. Total, sinasabi kan Biblia na an mga taga Berea ‘mas noble an isip kisa sa mga nasa Tesalonica, huling maingat nindang sinisiyasat an Kasuratan aroaldaw.’ (Gibo 17:11) Minsan siring, ikinokomparar sinda bako sa mga Kristiano, kundi sa mga Judiong taga Tesalonica sa pangkagabsan. ‘Inako kan mga nagtubod an Tataramon nin Dios, bakong bilang tataramon nin tawo, kundi bilang tataramon nin Dios.’ (1 Tes. 2:13) Seguradong nagpagal an kamagurangan tanganing pakakanon sinda sa espirituwal.
5 Ngonyan, an grupong maimbod asin mapagmansay na oripon nagtatao sa aripompon nin Dios nin “kakanon sa tamang panahon.” (Mat. 24:45) Sa pagdirehir kan oripon, an kamagurangan sa kada kongregasyon nagpapagal tanganing pakakanon sa espirituwal an saindang mga tugang. An mga miembro kan kongregasyon tibaad may dakol na literaturang basado sa Biblia, asin sa nagkapirang lenguahe may makukuang mga pantabang arog kan Watch Tower Publications Index asin Watchtower Library sa CD-ROM. Tanganing mapanigoan an espirituwal na pangangaipo kan kongregasyon, dakol na oras an ginagamit kan kamagurangan sa pag-andam nin mga kabtang sa mga pagtiripon tanganing ikapresentar ninda an impormasyon sa makahulogan na paagi. Naisip mo na daw kun gurano kadakol na panahon an ginagamit kan kamagurangan sa pag-andam kan mga kabtang ninda sa mga pagtiripon, asamblea, asin kombension?
6, 7. (a) Nagin anong halimbawa si Pablo para sa kamagurangan sa Tesalonica? (b) Taano ta tibaad depisil para sa kamagurangan ngonyan na arogon si Pablo?
6 Nagirumdoman kan kamagurangan sa Tesalonica an marahay na halimbawa na itinao ni Pablo sa pagpastor sa aripompon. Bako idtong mekanikal o mayo sa boot na mga pagsongko. Arog kan tinokar sa sinundan na artikulo, si Pablo “nagin maboot . . . , arog kan pagpadangat nin nagpapasusong ina sa saiyang mga aki.” (Basahon an 1 Tesalonica 2:7, 8.) Andam pa ngani siang ‘itao an saiya mismong kalag’! Dapat na arogon sia kan kamagurangan kun sinda nagpapastor.
7 Inaarog si Pablo kan Kristianong mga pastor ngonyan paagi sa pagpadangat sa aripompon. May mga karnero na tibaad bakong natural na karakteristiko an pagigin maboot asin makikatood. Pero, naghihingoa an kamagurangan na magpaheling nin pakarorop asin ‘makanompong nin marahay’ sa sainda. (Tal. 16:20) Totoo, huling bakong perpekto, tibaad depisil sa sarong magurang sa kongregasyon na magkaigwa nin positibong pagmansay sa kada tugang. Pero, mientras na ginigibo nia an saiyang pinakamakakaya tanganing magin maboot sa gabos, bako daw na maninigo siang komendaran sa paghihingoa niang magin marahay na pastor sa pangengenot ni Cristo?
8, 9. Ano an nagkapirang paagi na an kamagurangan sa presenteng panahon ‘nagbabantay sa satong kalag’?
8 Gabos kita may dahelan na “magin mapagpasakop” sa kamagurangan. Arog kan isinurat ni Pablo, ‘nagbabantay sinda sa satong kalag.’ (Heb. 13:17) An pananaram na iyan nagpapagirumdom sa sato kan literal na pastor na nagpupuyat tanganing protehiran an saiyang aripompon. Kaagid kaiyan, an kamagurangan ngonyan tibaad nagpupuyat sa pag-asikaso sa pangangaipo kan mga maluya an salud o may mga problema sa emosyon o sa espirituwal. Halimbawa, pinupukaw an mga tugang na miembro nin Hospital Liaison Committee tanganing asikasohon an medikal na emerhensia. Pero, kun napapaatubang kita sa siring na situwasyon, inaapresyar nanggad niato an saindang paglilingkod!
9 An kamagurangan na kabilang sa mga Regional Building Committee asin komite sa pag-ayuda nagpapagal tanganing tabangan an mga tugang. Maninigo sinda sa satong bilog na pusong suporta! Isip-isipa an ginibong pag-ayuda pagkatapos na tumama an Bagyong Nargis sa Myanmar kan 2008. Tanganing maabot an Kongregasyon nin Bothingone na yaon sa nadestrosong marhay na rehion nin Irrawaddy Delta, an grupo sa pag-ayuda nag-agi sa mga lugar na nakawararak an mga bangkay. Kan maheling kan mga tugang duman na an saindang dating paraataman nin sirkito kaiba sa enot na grupo sa pag-ayuda na nakaabot sa Bothingone, sinda nagkurahaw: “Helinga! An satong paraataman nin sirkito! Ilinigtas kita ni Jehova!” Inaapresyar daw nindo an pagpapagal kan kamagurangan aldaw asin banggi? An nagkapirang magurang sa kongregasyon iinaasignar sa espesyal na mga komite tanganing asikasohon an magagabat na hudisyal na kaso. Dai ninda ipinaghahambog an saindang mga nagibo; pero nagpapasalamat nanggad an mga nakikinabang sa paglilingkod ninda.—Mat. 6:2-4.
10. Ano an daing gayo naririsa na mga ginigibo kan kamagurangan?
10 Dakol na magurang sa kongregasyon ngonyan an may iba pang gibohon. Halimbawa, an parakoordinar kan grupo nin kamagurangan nag-aandam kan iskedyul para sa semanal na mga pagtiripon. An sekretaryo kan kongregasyon nag-aasikaso kan bulanan asin taonan na mga report nin paglilingkod sa langtad. Maingat na iinaandam kan paraataman kan paadalan an iskedyul kan paadalan. Kada tolong bulan, ginigibo an pag-audit sa account kan kongregasyon. Binabasa kan kamagurangan an mga surat hale sa sangang opisina asin iinaaplikar an instruksion na nakakatabang na mapagdanay an “pagkasararo sa pagtubod.” (Efe. 4:3, 13) Paagi sa paghihingoa kan siring na mahihigos na magurang, ‘an gabos na bagay nangyayari sa disente asin aregladong paagi.’—1 Cor. 14:40.
“Nangengenot sa Saindo”
11, 12. Sairisay an nangengenot sa kongregasyon, asin ano an kalabot dian?
11 Ilinadawan ni Pablo an mahigos na kamagurangan sa Tesalonica bilang “nangengenot” sa kongregasyon. An tataramon na ini sa orihinal na lenguahe nagpaparisa nin “pagtindog sa enotan” asin puedeng itradusir na “nagdidirehir.” (1 Tes. 5:12; nota sa ibaba) An iyo man sanang kamagurangan ilinadawan ni Pablo na “nagpapagal.” An sinasabi nia bakong manongod sa sarong “nangengenot na paraataman,” kundi sa gabos na magurang sa kongregasyon. Ngonyan, an kadaklan na magurang nagtitindog sa enotan kan kongregasyon asin namamayo sa mga pagtiripon. An dai pa sana nahahaloy na pagliliwat tanganing gamiton an apod na “parakoordinar kan grupo nin kamagurangan” nakakatabang sa sato na mansayon an gabos na magurang bilang mga miembro nin nagkakasararong grupo.
12 Bako sanang pagtotokdo an kalabot sa ‘pangengenot’ sa kongregasyon. Ginamit man an tataramon na iyan sa 1 Timoteo 3:4. Sinabi ni Pablo na an sarong paraataman maninigong magin “sarong lalaki na nangengenot sa saiyang kasararo sa harong sa marahayon na paagi, na nagpapasakop an mga aki na may lubos na pagkaseryoso.” Sa tataramon digdi na “nangengenot,” malinaw na kaiba bako sanang an pagtotokdo sa saiyang mga aki kundi an pangengenot man sa pamilya asin ‘pagpapasakop nin mga aki.’ Iyo, an kamagurangan nangengenot sa kongregasyon, na tinatabangan an gabos na magpasakop ki Jehova.—1 Tim. 3:5.
13. Taano ta tibaad nangangaipo nin panahon bago makadesisyon sa sarong miting nin kamagurangan?
13 Tanganing makapangenot sa aripompon sa marahay na paagi, pinag-oorolayan kan kamagurangan kun paano aasikasohon an pangangaipo kan kongregasyon. Tibaad mas marikas kun saro sanang magurang an magibo kan gabos na desisyon. Pero, huling sinusunod an halimbawa kan namamahalang grupo kan enot na siglo, buelong nag-oorolay an mga grupo nin kamagurangan sa presenteng panahon, na nagpapagiya sa Kasuratan. Pasohan ninda na iaplikar sa pangangaipo kan saindang kongregasyon an mga prinsipyo sa Kasuratan. Pinakaepektibo ini kun an kada magurang nag-aandam para sa mga miting kan kamagurangan, na pinag-aadalan an Kasuratan asin an mga regulasyon hale sa grupong maimbod asin mapagmansay na oripon. Siempre, nangangaipo ini nin panahon. Kun nagkakalaenlaen an opinyon, arog kan nangyari kan pinag-oolayan kan namamahalang grupo kan enot na siglo an dapit sa pagturi, tibaad kaipuhan an dugang na panahon asin pagsiyasat tanganing magkasararo sa desisyon basado sa Kasuratan.—Gibo 15:2, 6, 7, 12-14, 28.
14. Inaapresyar mo daw na an grupo nin kamagurangan nagtatarabangan na may pagkasararo? Taano?
14 Ano an puedeng mangyari kun ipipirit nin sarong magurang sa kongregasyon an gusto nia o papalakopon an sadiri niang mga ideya? O paano kun may saro—arog ni Diotrefes kan enot na siglo—na nagpapalakop nin dai pagkaoroyon? (3 Juan 9, 10) Siertong maaapektaran an bilog na kongregasyon. Kun hiningoa ni Satanas na ribokon an kongregasyon kan enot na siglo, makakasierto kita na gusto man niang raoton an katoninongan kan kongregasyon ngonyan. Tibaad pukawon nia an maimot na mga tendensia nin tawo, arog kan pagmawot na magin prominente. Kaya, kaipuhan kan kamagurangan na pataluboon an kapakumbabaan asin magtarabangan bilang nagkakasararong grupo. Inaapresyar nanggad niato an kapakumbabaan kan kamagurangan na nagtatarabangan bilang sarong grupo!
“Naghahatol sa Saindo”
15. Ano an motibo kan kamagurangan kun naghahatol sa sarong tugang?
15 Pagkatapos, idinoon ni Pablo an sarong magabat pero mahalagang gibohon kan kamagurangan: an pagtao nin hatol sa aripompon. Sa Kristianong Griegong Kasuratan, si Pablo sana an naggamit kan termino sa Griego na trinadusir na “hatolan.” Puedeng nanonongod iyan sa mapuersang konseho alagad dai iyan nagpaparisa nin pagkaongis. (Gibo 20:31; 2 Tes. 3:15) Halimbawa, nagsurat si Pablo sa mga taga Corinto: “Isinusurat ko an mga bagay na ini, bakong tanganing supogon kamo, kundi tanganing hatolan kamo bilang namomotan kong mga aki.” (1 Cor. 4:14) An motibo nia sa paghatol iyo an mamomoton na pagmakolog sa iba.
16. Ano an marahay na isaisip kan kamagurangan kun naghahatol?
16 Isinasaisip kan kamagurangan an kahalagahan kan paagi nin paghatol. Nagmamaigot sindang arogon si Pablo paagi sa pagigin maboot, mamomoton, asin matinabang. (Basahon an 1 Tesalonica 2:11, 12.) Siempre, an kamagurangan ‘marigon na nangangapot sa maimbod na tataramon tanganing makapagsadol sinda paagi sa katokdoan na nakakarahay.’—Tito 1:5-9.
17, 18. Ano an maninigo mong isaisip kun hinahatolan ka nin sarong magurang sa kongregasyon?
17 Siempre, an kamagurangan bakong perpekto asin tibaad may mga masabi na pagbabasolan ninda sa huri. (1 Ha. 8:46; Sant. 3:8) Aram man kan kamagurangan na kun sinasadol an mga tugang, natural sana na dai iyan “nakakagayagaya, kundi nakakamondo” para sa mga ini. (Heb. 12:11) Kaya bago magdolok an sarong magurang sa saro tanganing hatolan ini, posibleng marhay na pag-iisipan nia ngunang marhay iyan asin ipapamibi iyan. Kun tinawan ka nin hatol, inaapresyar mo daw an mamomoton na pagmakolog kan magurang na iyan?
18 Ipamugtak na may problema ka sa salud pero dai pa ikapaliwanag kun ano iyan. Dangan, naaraman nin sarong doktor kun ano talaga an problema, alagad masakit akoon an diagnosis na iyan. Magkakaigwa ka daw nin raot nin boot sa doktor na iyan? Dai! Dawa kun irekomendar niang operaran ka, posible nanggad na maoyon ka dian huling aram mo na para iyan sa ikakarahay mo. An paagi nin pagsabi kaiyan kan doktor tibaad makaapektar sa saboot mo, alagad dian mo daw ibabasar an saimong desisyon? Posibleng dai. Kaagid kaiyan, dai pagtogotan an paagi nin paghatol sa saimo na makaolang sa saimo na maghinanyog sa mga tibaad ginagamit ni Jehova asin ni Jesus tanganing maaraman mo kun paano mo matatabangan o mapoprotehiran sa espirituwal an saimong sadiri.
Pahalagahan an Probisyon ni Jehova na Kamagurangan
19, 20. Paano mo ikakapaheling an pag-apresyar para sa “balaog na mga lalaki”?
19 Ano an gigibohon mo kun makaresibi ka nin regalo na espesyalmenteng ginibo para sa saimo? Ipapaheling mo daw an saimong pag-apresyar paagi sa paggamit kaiyan? An “balaog na mga lalaki” iyo an itinao sa saimo ni Jehova paagi ki Jesu-Cristo. An sarong paagi na ikakapaheling mo an saimong pagpasalamat sa mga balaog na ini iyo an atentong paghinanyog sa mga pahayag kan mga magurang sa kongregasyon asin paghihingoang iaplikar an mga puntong sinambit ninda. Ikakapaheling mo man an pag-apresyar paagi sa saimong makahulogan na mga komento sa mga pagtiripon. Suportaran an gibohon na pinangengenotan kan kamagurangan, arog kan ministeryo sa langtad. Kun nakinabang ka sa konseho nin sarong magurang, taano ta dai iyan sabihon sa saiya? Apuera dian, taano ta dai ipaheling an saimong pag-apresyar sa pamilya kan mga magurang sa kongregasyon? Girumdoma na tanganing makapaglingkod na nagpapagal an sarong magurang sa kongregasyon, isinasakripisyo kan saiyang pamilya an panahon na kutana kaiba ninda sia.
20 Iyo, may dakol kitang dahelan na ipaheling an pagpasalamat huli sa kamagurangan, na nagpapagal asin nangengenot saka naghahatol sa sato. Mamomoton nanggad na probisyon ni Jehova an “balaog na mga lalaki” na ini!
Nagigirumdoman daw Nindo?
• May anong mga dahelan an mga Kristiano sa Tesalonica tanganing apresyaron an mga nangengenot sa sainda?
• Paano an kamagurangan sa saindong kongregasyon nagpapagal para sa saindo?
• Paano kamo nakikinabang sa pangengenot sa saindo kan kamagurangan?
• Kun kamo hinahatolan nin sarong magurang sa kongregasyon, ano an maninigo nindong isaisip?
[Mga Hapot Para sa Pag-adal]
[Ritrato sa pahina 27]
Inaapresyar mo daw an dakol na paagi na pinapastoran kan kamagurangan an kongregasyon?
