Menniniiti Ätekkewe mi Angang Weires Ngenikemi
Menniniiti Ätekkewe mi Angang Weires Ngenikemi
“Oupwe meniniti ätekewe mi angang ngenikemi, ir mi emwenikemi o öüröürakemi.”—1 TES. 5:12.
1, 2. (a) Met pworausen ewe mwichefelin Tesalonika atun Paul a makkeei ngeniir nöün we äechöön taropwe? (b) Ifa än Paul kapasen pesepes ngeniir?
ANCHANGEI pwe en chon ewe mwichefelin Tesalonika, eü me lein ekkewe mwichefel mi akkomw fförütä lon Iurop le atun ekkewe aposel. Ewe aposel Paul a fokkun apöchökkülatä pwiin kewe ikkena ie. Eli a filatä mwän mi äsimaü le emmweniir, usun met a pwal föri lon ekkoch mwichefel. (Fof. 14:23) Nge mwirin chök fförütään ena mwichefel, ekkewe chon Jus ra rangoto pwe repwe asüwou Paul me Sailas seni ena telinimw. Iwe, eli chon ena mwichefel ra meefi pwe ra attong me niuokkus.
2 Ese mwääl Paul a lolilen ren ewe mineföön mwichefel atun a lo seni Tesalonika. A achocho an epwe liwinsefäl nge ‘Satan a pinei.’ Iwe, a tinalo Timoti an epwe apöchökküler. (1 Tes. 2:18; 3:2) Lupwen Timoti a liwin fän eü pworaus pwe iir mi achocho, a amwökütü Paul an epwe mak ngeniir. Iwe, a peseer ar repwe ‘meniniti ätekewe mi emweniir.’—Älleani 1 Tesalonika 5:12, 13.
3. Ikkefa ekkewe popun ekkewe Chon Kraist lon Tesalonika repwe pwäratä watteen süföl me chen ngeni ekkewe mwän mi äsimaü?
3 Ekkewe mwän mi fil le emmweni ewe mwichefelin Tesalonika rese kon sipeöch usun Paul me chienan kewe chon afalafal mi säifetäl, rese kon pwal lien äsimaü usun ekkewe elter lon Jerusalem. Ena mwichefel a arapakkan chök eü ierin! Nge, a wor popun chon ena mwichefel repwe kilisou ngeni ekkewe mwän mi äsimaü, iir kewe mi “angang” weires, ‘emweniir’ me ‘öüröürar.’ Pwüngün a wor popun ar repwe “asamoluur fän watten suföl me chen.” Paul a pwal peseer pwe repwe ‘kinamwefengen lefiler.’ Ika ka nom lon Tesalonika kopwe pwal pwäratä om enletin aücheani minne ekkewe elter ra föri? Ifa om ekiek ren ewe ‘liffang,’ ekkewe elter, Kot a awora ren Kraist ngeni om mwichefel?—Ef. 4:8.
Ra Angang Weires
4, 5. Pwata ewe angangen asukula mwichefel lon fansoun Paul we pwal lon ei fansoun a eü angang mi weires ngeni ekkewe elter?
4 Mwirin än Paul me Sailas lo ngeni Perea, ifa usun ekkewe mwän mi äsimaü lon Tesalonika ra ‘angang’ weires? Ra äppirü Paul, ese mwääl ra asukula ewe mwichefel ren ar nöünöü Paipel. Eli kopwe eis: ‘Ekkewe Chon Kraist lon Tesalonika ra aücheani än Kot Kapas?’ Pun ewe Paipel a apasa pwe ekkewe chon Perea ra “tipemecheres seni ekewe aramasen Tesalonika, . . . Iteiten rän ra kaiö lon ekewe Toropwe mi Pin.” (Fof. 17:11) Iwe nge, ei apöpö a apöpööi ekkewe chommong chon Jus lon Perea mi etiwa ewe enlet me ekkewe chommong chon Jus lon Tesalonika rese etiwa ewe enlet. Ekkewe chon Jus lon Tesalonika mi wiliti Chon Kraist ra etiwa ewe Kapasen Kot, ‘rese ekieki pwe kapasen aramas, nge ra etiwa pwe iei wesewesen kapasen Kot.’ (1 Tes. 2:13) Ese mwääl ekkewe elter ra angang weires le asukula ewe mwichefel usun Kot.
5 Ikenäi, ewe chon angang mi alükülük o tipatchem a awora “mongö lon fansoun fich” ngeni nöün Kot kewe siip. (Mt. 24:45) Fän an emmwen, ekkewe elter lon eü me eü mwichefel ra angang weires le amöngööni pwiir kewe lon pekin lükü. Chon ekkewe mwichefel ra tongeni nöünöü ekkewe chommong puken älillisin Paipel, me ekkewe Watch Tower Publications Index me Watchtower Library lon CD-ROM mi kawor lon ekkoch fosun fönü. Ekkewe elter ra awora watteen fansoun le ammolnatä ar kinikin pwe minne repwe äiti ngeni ewe mwichefel epwe älillisöch ngeniir. Ka fen ekieki ika fite aua ekkewe elter ra nöüni le föri ar kinikin fän iten ekkewe mwich me mwichelap?
6, 7. (a) Ifa än Paul leenien äppirü ekkewe elter lon Tesalonika repwe chechchemeni? (b) Pwata a weires ngeni ekkewe elter ikenäi ar repwe äppirü Paul?
6 Ekkewe mwän mi äsimaü lon Tesalonika ra chechchemeni än Paul leenien äppirü ren tümünün ewe mwichen siip. Ese chök föri ei angang pokiten ina wisan, nge usun sia fen käeö lon ewe lesen mwen ei, Paul a ‘tipepwetete, usun eman in a tümwünü püsin nöün.’ (Älleani 1 Tesalonika 2:7, 8.) A pwal mwo nge mmolnetä le “fang” ngeniir pwisin manauan! Lupwen ekkewe mwän mi äsimaü ra tümünü ekkewe siip itä repwe pwal usun chök Paul.
7 Ekkewe elter ikenäi ra äppirü Paul ren ar aücheani ekkewe siip nge eli ekkoch siip rese kon lien chiechiöch me kirekiröch. Iwe nge, ekkewe elter ra achocho le pwäratä mirit me “menin.” (SalF. 13:15) Pwüngün, pokiten ekkewe elter rese unusöch mi weires ar repwe eäni ekiek mi öch usun emön me emön. Nge, ren ar achocho le angepwetete ngeni meinisin itä sipwe apünga ar angang weires le wiliti emön chon mas mi mürinnö fän Kraist.
8, 9. Ifa usun ekkewe elter ikenäi ra ‘mamasakich’?
8 Mi lamot kich meinisin sipwe älleasochisi ekkewe elter. Usun met Paul a makkeei pwe ra ‘mamasakich.’ (Ipru 13:17) Ena kapas a ächema ngenikich usun ewe wesewesen chon masen siip, a pennüküolo an möür pwe epwe tümünü nöün kewe siip. Pwal ina usun ekkewe elter ikenäi, eli ra pennüküolo ar möür atun ra tümünü ekkewe mi osukosuk lon pekin inis, memmeef are pekin lükü. Ren chök äwewe, ekkewe elter lon ewe Kümiin Chon Älisi mi Semwen ra fen nelo seni ar möür pwe repwe ataweei osupwangen pwiir kewe mi semwen. Sia fokkun kilisou ren ar älisikich atun sia küna ekkeei esin osukosuk!
9 Ekkewe elter lon ewe Mwichen Chon Kaü Imw me kümien chon älisi chokkewe mi feiengaw ren taifun me met kan ra angang weires le älisi pwiich kewe. A fich ach sipwe unusen älisiiretä! Nengeni met a fis mwirin ewe watteen taifun lon ewe fönü Myanmar lon 2008. Eü kümiin pwiich mi awora älillis ra säi lon ewe leeni mi tatakkis me chommong somä mi itifetäl ie pwe repwe tori ewe mwichefelin Bothingone, ikewe a kon tangaw ren ewe taifun. Lupwen pwiich kewe lon ena leeni ra küna ena kümien chon älillis nge nöür we circuit overseer me loom mi fitiir, ra kechiwen pwapwa me apasa: “Nengeni, nöüch we circuit overseer! Jiowa a selänikich!” Ka aücheani än ekkewe elter angang weires le rän me le pwiin? Ekkoch elter ra kefilitä pwe repwe angang woon ekkewe kapwüngün tipis mi kon chou lon ewe mwichefel. Ekkeei elter rese esika met ra föri, nge iir kewe ra küna feiöch seni ar angang, ra fokkun kilisou.—Mt. 6:2-4.
10. Menni angang ekkewe elter ra föri nge chommong rese silei?
10 Chommong elter ra pwal föri sokkopaten angang. Äwewe chök ewe sou akkot lon mwichen elter a ammolnatä ewe kokkotun mwich a fis iteiten wiik. Ewe seketeri a ioni ekkewe repotun angangen afalafal iteiten maram me föri repotun eü ier. Me ewe chon emmweni ewe Sukulen Afalafal a akkotaöchü kokkotun. Iteiten mwirin ülüngät maram, ra cheki monien ewe mwichefel. Ekkewe elter ra älleani ekkewe taropwe seni ewe kisin ofes me apwönüetä ekkewe emmwen pwe epwe tümünü ewe “eufengen lon ach lükü.” (Ef. 4:3, 13) Pokiten än ekkewe elter angang weires, ‘mettoch meinisin a fis fän pwüng me kokotöch.’—1 Kor. 14:40.
Ra Emmwenikemi
11, 12. Iö a emmweni ewe mwichefel, me met a kapachelong lon ena angang?
11 Paul a apasa pwe ekkewe mwän mi äsimaü lon Tesalonika mi angang weires ra “emmweni” ewe mwichefel. (1 Tes. 5:12) Lon ewe popun fosun Krik ena kapas a pwal tongeni wewe ngeni “ütä mwän.” Lon ekkoch afföün Paipel Paul a kapas usun ekkena elter mi angang weires. A fos usun meinisin ekkewe elter lon mwichefel. Ikenäi, lap ngeni ekkewe elter ra ütä mwen chon mwichefel me emmweni ekkewe mwich. Ewe siwil a kerän fis ren ewe it “sou akkot lon ewe mwichen elter” a älisikich le weweiti pwe ekkewe elter meinisin ra usun chök kifetin eü inis mi tipeeüfengen.
12 Ewe angangen emmweni mwichefel ese chök wewe ngeni ar repwe asukul. Ena itiitin kapas a pwal mak lon 1 Timoti 3:4. Paul a apasa pwe emön sou emmwen “epwe emwenöchü püsin chon an famili o aörüni ngeni nöün kana ar repwe aleasochis ngeni fän menin.” Lon ei kapas “emwenöchu” a ffat pwe ese chök wewe ngeni an epwe asukula nöün kewe semirit, nge epwe pwal emmweni an famili me “nöün kana ar repwe aleasochis.” Pwüngün pwe ekkewe elter ra emmweni chon ewe mwichefel me älisi meinisin pwe repwe älleasochisi Jiowa.—1 Tim. 3:5.
13. Pwata ese mwittir än ekkewe elter apwüngalo och mettoch lon ar kewe mwich?
13 Ekkewe elter ra pwüngüpwüngfengen ren ifa usun repwe ataweei osupwangen ewe mwichefel pwe repwe emmweniöchü. Eli epwe fen öch me mwittir ika emön chök elter epwe apwüngalo meinisin. Nge, ekkewe mwichen elter ikenäi ra pwüngüpwüng me kütta älillisin ewe Paipel usun chök ewe mwichen sou pwüngüpwüng le atun ekkewe aposel. Ra achocho le apwönüetä ekkewe emmwen lon Paipel fän iten osupwangen ewe mwichefel. A fisöch ena ika iir meinisin ra mmolnetä ngeni ar kewe mwich, ekieki ekkewe wokisin me kapasen emmwen seni ewe chon angang mi alükülük o tipatchem. Ewer, a lamot fansoun. Ika a wor met rese tipeeüfengen woon, iwe repwe fokkun küttaöchü ekkewe pworaus epwe älisiir le apwüngalo ena mettoch fän tipeeü mi longolong woon Paipel. Ina met ekkewe sou pwüngüpwüng le atun ekkewe aposel ra föri lupwen a wor tipefesen woon ewe mettoch sirkumsais.—Fof. 15:2, 6, 7, 12-14, 28.
14. Ka kilisou ren ewe mwichen elter mi angangfengen fän tipeeü? Pwata a ina usun meefiom?
14 Met epwe fis ika emön elter a pöchöü me mochen chök letipan epwe pwönütä? Met epwe fis ika emön a efisi tipefesen usun Tiotrefes lon fansoun Paul we? (3 Jon 9, 10) Unusen ewe mwichefel epwe fokkun weires. Ika Setan a sotun aosukosuka ewe popun mwichefelin Kraist, iwe epwe pwal mochen atai kinamween ewe mwichefel ikenäi. Epwe tongeni etipetipa aramas ar repwe chök ekieki pwisin iir usun ar mochen iteföülo. Ina minne, a lamot ngeni ekkewe elter repwe ämääraatä tipetekison me angangfengen usun eü chök inis. A ifa me kilisouch ren än ekkewe elter tipetekison le angangfengen usun eü inis!
Ra Öüröürakemi
15. Pwata ekkewe elter ra öüröüra pwiir kewe?
15 Paul a pwal menlapei ewe angangen öüröüra ewe mwichen siip, eü angang mi weires nge mi lamot. Lon ewe Tesin Krik, Paul chök a nöünöü ewe kapasen Krik mi afföü ngeni “öüröür.” A tongeni wewe ngeni fön mi pöchökkül nge ese fiti song. (Fof. 20:31; 2 Tes. 3:15) Äwewe chök, Paul a ereni chon Korint: “Üa makei ekei kapas ngenikemi, sap pokiten üa mochen asäwakemi, nge fän iten ai mochen öüröürakemi usun püsin nei mi achengicheng.” (1 Kor. 4:14) Ewe popun a öüröüra pwiin kewe pokiten a tonger.
16. Met ekkewe elter repwe chechchemeni atun ra öüröüra pwiir kewe?
16 Ekkewe elter ra chechchemeni lamoten ar repwe öüröüra pwiir kewe lon eü napanap mi mürinnö. Ra achocho le kirekiröch, tong, me älillisöch usun chök Paul. (Älleani 1 Tesalonika 2:11, 12.) Nge, ra ‘fokun kamwöchünük won ewe Kapasen Kot mi allükülük, pwe repwe tongeni apöchöküla ekewe souläng ren ar afalafala ewe kapas mi let.’—Tait. 1:5-9.
17, 18. Met kopwe chechchemeni ika emön elter a öüröürak?
17 Pwüngün, ekkewe elter rese unusöch me ra tongeni apasa och mettoch repwe niamamsefäl ren. (1 King 8:46; Jem. 3:8) Ra pwal silei pwe ika ra fönöü pwiir kewe chon lükü, iwe lap ngeniir repwe ‘letipeta ren, nge resap pwapwa.’ (Ipru 12:11) Iwe, lupwen emön elter epwe öüröüra emön, ese mwääl a fen akkomw ekiekiöchü me iotek usun. Ika emön elter a öüröürak, ka aücheani an tongeok?
18 Äwewe chök, a toruk eü semwen nge esor mi tongeni äwewe ngonuk pwata ka samau. Iwe, emön tokter a affata ngonuk om osukosuk nge a weires om kopwe etiwa alon. Itä kopwe song ngeni ewe tokter? Aapwi! Ikaamwo a apasa pwe kopwe reirei, ese mwääl kopwe tipeeü ngeni pwe ka lükü pwe kopwe chikar ren. Eli napanapen än ewe tokter fos ngonuk a ämetekuk are äletipechouk nge itä ina met epwe eppeti met ka filatä? Aapw. Pwal ina chök usun, kosap mut ngeni napanapen än ekkewe elter öüröürak epwe eppeti om aüseling ngeniir, chokkana Jiowa me Jises ra nöünöü pwe repwe älisuk le ririöch ngeni I.
Aücheani Ekkewe Elter Iir Liffang Seni Jiowa
19, 20. Ifa usun sipwe pwäratä ach kilisou ren ei ‘liffang’ me ren Kot?
19 Met ika emön a ngonuk och liffang a pükün föri fän itom chök? Kopwe pwäratä om aücheani ren om äkkäeä? Ekkewe mwän mi äsimaü iir ekkewe ‘liffang’ Jiowa a awora ngonuk ren Jises Kraist. Ka tongeni pwäratä om kilisou ren ekkeei liffang ren om aüselingaöchü ar afalafal me achocho le apwönüretä. Ka pwal tongeni kilisou ren om uwawu meefiom lon ekkewe mwich. Älisatä ekkewe angang elter ra kan emmweni, äwewe chök ren ewe angangen afalafal. Ika ka fen feiöch seni än emön elter fönok, pwata kese ereni? Pwal och, pwata kese pwäratä om kilisou ngeni än ekkewe elter famili? Chechchemeni, ren än emön elter epwe angang weires lon ewe mwichefel an famili a fen pennüküolo ewe fansoun itä epwe nonnom rer.
20 Ewer, mei wor chommong popun sipwe kilisou ngeni ekkewe elter, iir kewe ra angang weires, emmwenikich me öüröürakich. Ekkeei elter, iir ‘liffang’ seni Jiowa mi pwäratä enletin an tong!
Ka Chechchemeni?
• Ikkefa ekkewe popun chon ewe mwichefelin Tesalonika repwe aücheani ekkewe chon emmweniir?
• Ifa usun ekkewe elter lon om mwichefel ra angang weires fän itom?
• Ifa usun ka feiöch ren än ekkewe elter emmwenuk?
• Ika emön elter a öüröürak, met kopwe chechchemeni?
[Kapas Eis fán Iten ewe Lesen]
[Sasing lon pekin taropwe 26]
Ka aücheani än ekkewe elter angang pwe repwe tümünü ewe mwichefel?
