Respekte bann ki travay dir parmi zot

“Respekte bann ki travay parmi zot, bann ki annan responsabilite pour diriz zot e ansenny zot.”​—1 TESA. 5:12.

1, 2. (a) Ki ti sityasyon kongregasyon Tesalonik ler Pol ti ekrir zot son premye let? (b) Ki Pol ti ankouraz sa kongregasyon pour fer?

METON ou ti form parti kongregasyon Tesalonik dan premyer syek, enn parmi bann premye kongregasyon Lerop. Zapot Pol ti’n pas en bon pe letan pour batir son bann frer dan sa landrwa. Kekfwa i ti’n apwent bann ansyen pour pran swen avek kongregasyon parey i ti fer dan lezot landrwa. (Akt 14:23) Me apre ki kongregasyon ti’n ganny formen, bann Zwif ti fer en rayot dan lavil pour ki Pol ek Silas i ale. I tre probab ki bann Kretyen ki ti reste dan sa kongregasyon ti santi zot tousel, petet zot ti per tou.

² I toutafe normal ki kan i ti kit Tesalonik, Pol ti enkyet pour sa nouvo kongregasyon. I ti esey retournen, me ‘Satan ti anpes’ li. Alor, i ti anvoy Timote pour ankouraz kongregasyon. (1 Tesa. 2:18; 3:2) Ler Timote ti retournen avek en bon rapor, Pol ti santi li pouse pour ekrir en let kongregasyon Tesalonik. Pol ti ankouraz zot pour ‘respekte bann ki annan responsabilite pour diriz zot.’​—Lir 1 Tesalonisyen 5:12, 13.

3. Ki rezon bann Kretyen Tesalonik ti annan pour demontre bokou lapresyasyon pour bann ansyen?

³ Bann ansyen ki ti pe pran swen avek kongregasyon Tesalonik ti napa menm leksperyans ki Pol ek bann ki ti vwayaz avek li, e zot ti napa menm leritaz spirityel ki bann  ansyen Zerizalenm. Anfet, i pa ti ankor menm fer enn an depi ki sa kongregasyon ti’n egziste. Toudmenm, bann Kretyen dan sa kongregasyon ti merit apresye bann ansyen ki ti “travay” dir, “diriz zot e ansenny zot.” Vreman alor, zot ti annan bon rezon pour “montre ki zot estim sa bann frer e kontan zot bokou.” Deplis, Pol ti osi dir: “Viv byen an-pe antre zot.” Si ou ti dan kongregasyon Tesalonik, eski ou ti pou’n montre sa menm lapresyasyon pour travay bann ansyen? Ki mannyer ou vwar sa bann “kado” ki Bondye in donnen atraver Kris pour okip ou kongregasyon?​—Efe. 4:8.

Travay dir

4, 5. Akoz bann ansyen ti bezwen travay dir pour ansenny kongregasyon dan letan Pol e akoz i le ka osi ozordi?

⁴ Apre ki Pol ek Silas ti kite pour al Bere, dan ki sans bann ansyen Tesalonik ti travay dir? Parey Pol, nou asire ki zot ti ansenny kongregasyon par servi Labib. Eski bann Kretyen Tesalonik ti annan lapresyasyon pour Parol Bondye? I vre ki Labib i dir ki bann dimoun Bere ti “annan en pli bon latitid ki bann Zwif Tesalonik.” “Toulezour zot ti etidye Lekritir.” (Akt 17:11) Toudmenm, Pol ti pe fer sa konparezon avek bann Zwif Tesalonik an zeneral, me pa avek bann Kretyen. Bann ki ti vin krwayan ti ‘aksepte parol Bondye, non pa konman parol zonm me konman parol Bondye.’ (1 Tesa. 2:13) I bezwen ki bann ansyen ti travay dir pour nouri kongregasyon spirityelman.

⁵ Ozordi, lesklav fidel e pridan i donn troupo Bondye, “manze kan i ler.” (Mat. 24:45) Anba gidans sa lesklav, bann ansyen i travay dir pour nouri bann frer ek ser spirityelman. Bann frer ek ser dan kongregasyon i annan bann piblikasyon baze lo Labib annabondans e dan serten langaz bann zouti parey Watch Tower Publications Index ek Watchtower Library lo CD-ROM. Pour nouri kongregasyon spirityelman, bann ansyen i pas en kantite letan pour prepar zot bann prezantasyon dan renyon dan en fason ki kongregasyon pou benefisye. Eski ou’n deza mazin lakantite letan ki bann ansyen i pase pour prepar bann diskour dan renyon ek diferan lasanble?

6, 7. (a) Ki legzanp bann ansyen Tesalonik ti aprann avek Pol? (b) Akoz i kapab difisil pour bann ansyen ozordi imit Pol?

⁶ Bann ansyen Tesalonik ti rapel bon legzanp ki Pol ti’n kite pour pran swen avek troupo Bondye. I pa ti pran li konman en lobligasyon oubyen routin pour vizit bann frer ek ser. Parey nou ti vwar dan lartik avan, Pol ti montre ladouser, “konman en manman, ki pran swen son zanfan.” (Lir 1 Tesalonisyen 2:7, 8.) I ti pare pour menm ‘donn son prop lavi’! Bann ansyen ti devret fer parey ler zot pe okip kongregasyon.

⁷ Bann ansyen ozordi i imit Pol, zot demontre lafeksyon anver troupo Bondye. I annan serten mouton ki kapab natirelman pa amikal oubyen pa tro kontan koz avek lezot. Toudmenm, bann ansyen i esey konpran zot e “vwar sa ki bon” dan zot. (Prov. 16:20) I vre, en ansyen i enparfe e i kapab vwar li difisil pour annan en pwennvi pozitif lo sak dimoun. Kantmenm sa, i esey fer son mye pour demontre ladouser anver tou dimoun. Pa nou devret felisit li pour son zefor pour vin en bon berze anba lotorite Kris!

8, 9. Ki serten fason bann ansyen ‘pe kontinyelman vey lo nou lam’ dan nou letan?

⁸ Nou tou nou annan rezon pour soumet avek bann ansyen. Parey Pol ti ekrir, ‘zot pe kontinyelman vey lo nou lam.’ (Ebr. 13:17) Sa lekspresyon i fer nou rapel ki bann berze pa ti dormi parler pour zot protez zot mouton. Pareyman, bann ansyen ozordi i kapab mank sonmey pour zot  kapab pran swen avek bann dimoun ki annan problenm lasante, emosyonnel oubyen spirityel. Par egzanp, bann frer lo Komite Lyezon Lopital i ganny leve dan zot sonmey pour ed dimoun ki bezwen fer fas avek bann problenm lasante grav. Pa nou vreman apresye zot servis ler nou bezwen fer fas avek bann sityasyon parey!

⁹ Bann ansyen ki lo Komite Konstriksyon Rezyonal ek komite sekour i travay dir pour ed zot bann frer ek ser. Nou merit donn zot nou sipor avek tou nou leker. Annou pran par egzanp sa travay sekour ki ti ganny fer apre ki Siklonn Nargis ti frap Myanmar an 2008. Pour ariv kot kongregasyon Bothingone, dan rezyon Irrawaddy ki ti’n ganny byen devaste, sa lekip sekour ti bezwen vwayaz dan bann landrwa vreman difisil kot ti annan lekor mor partou kote. Ler bann frer ti vwar sa premye lekip sekour ariv Bothingone avek zot ansyen sirveyan rezyonal, zot ti kriye: “Gete! Nou sirveyan rezyonal! Zeova in sov nou!” Nou apresye kan bann ansyen i travay dir lizour konman aswar, pa i vre? Serten ansyen i bezwen servi lo bann komite spesyal pour pran ka avek bann problenm disiplin grav. Sa bann ansyen pa vant zot lekor lo sa ki zot in akonplir, me bann ki benefisye avek zot led i vreman rekonesan.​—Mat. 6:2-4.

10. Ki lezot louvraz ki pa sitan evidan ki bann ansyen i fer?

¹⁰ Bokou ansyen ozordi i osi annan sa responsabilite pour ekrir let, prepar progranm, e okip rikord ek fayl kongregasyon. Par egzanp, kordinater konsey ansyen i prepar progranm pour renyon lasemenn. Sekreter kongregasyon i prepar bann rapor predikasyon tou le mwan e tou le-z-an. Sirveyan lekol i byen reflesir pour prepar progranm lekol. Tou le trwa mwan, en odit i ganny fer lo kont kongregasyon. Bann ansyen i lir bann let sorti kot biro brans e aplik gidans ki ed zot reste ‘ini ansanm’ dan lafwa. (Efe. 4:3, 13) Atraver zefor bann ansyen ki travay dir ‘tou keksoz i byen e annord.’​—1 Kor. 14:40.

“Diriz zot”

11, 12. Lekel ki diriz kongregasyon e ki sa i enplike?

¹¹ Ler Pol ti pe koz lo bann ansyen Tesalonik, i ti dir ki zot ti pe “diriz” kongregasyon. Dan langaz orizinal, sa i enplik sa lide pour “debout devan” setadir pour “donn gidans e organiz keksoz.” (1 Tesa. 5:12) Pol ti dir ki sa bann menm ansyen i “travay” dir. I pa ti pe koz lo en sel “sirveyan prezidan” ki pe diriz kongregasyon, me lo tou bann ansyen. Ozordi, laplipar ansyen pe debout devan kongregasyon pour ansennyen pandan bann renyon. “Kordinater konsey ansyen” i sa nouvo non ki ganny servi dan plas “sirveyan prezidan” e sa i fer nou rapel ki tou ansyen i ini ansanm pour pran swen avek kongregasyon.

¹² ‘Dirize’ i enplik plis ki ansenny kongregasyon. Menm lekspresyon i ganny servi dan 1 Timote 3:4. Pol ti pe koz lo en ansyen ki devret “byen diriz son lakour, e gard son zanfan dan lobeisans ek respe dan tou sort fason.” Dan sa verse, ‘dirize’ i pa zis enplik ansenny son bann zanfan me osi organiz bann aktivite an fanmir e “gard son zanfan dan lobeisans.” Vreman, bann ansyen i diriz kongregasyon, e ed zot soumet avek Zeova.​—1 Tim. 3:5.

13. Akoz i kapab pran letan pour fer en desizyon dan en renyon ansyen?

¹³ Pour diriz byen troupo, bann ansyen i diskit ansanm konman pour pran ka avek sa ki kongregasyon i bezwen. I ti’n kapab pli efikas si en ansyen tousel ti pou fer tou desizyon. Me selman, parey konsey direkter premye syek, bann konsey ansyen dan nou letan i diskit bann problenm ouvertman e rod gidans dan Labib. Zot lobzektif i pour aplik  bann prensip Labib dapre bezwen kongregasyon. I pou pli efikas si sak ansyen i prepare pour bann renyon ansyen par gete ki bann verse Labib ek gidans sorti kot lesklav fidel e pridan ki aplikab. Byensir, sa i pran letan. Ler bann ansyen pa tonm dakor, parey i ti le ka avek konsey direkter dan premye syek lo size sirkonsizyon, petet i pou neseser fer plis resers e pas plis letan pour ariv lo en desizyon final ki baze lo Labib.​—Akt 15:2, 6, 7, 12-14, 28.

14. Eski ou apresye ki konsey ansyen i travay ansanm dan linite? Akoz ou santi koumsa?

¹⁴ Ki kapab arive si en ansyen i ensiste ki desizyon i ganny fer dapre son pwennvi ouswa i esey promouvwar son prop lide? Oubyen, si parey Dyotref dan premye syek, en dimoun i senm diskord dan kongregasyon? (3 Zan 9, 10) Sirman, kongregasyon antye pou soufer. Si Satan ti senm divizyon dan kongregasyon premye syek, nou kapab asire ki i pa anvi ki kongregasyon i anpe ozordi. I kapab servi bann tandans imen egois, parey sa dezir pour vin enportan dan kongregasyon. Alor, bann ansyen i bezwen devlop limilite e travay ansanm konman en group ini. Pa nou apresye limilite bann ansyen ki korpere ansanm!

“Ansenny zot”

15. Kwa ki motiv bann ansyen kan zot averti en frer oubyen en ser?

¹⁵ Apre sa, Pol ti fer resorti en lot travay enportan ki bann ansyen i annan e sa se pour ansenny oubyen averti kongregasyon. Dan Lekritir Grek Kretyen, zis Pol ki servi sa mo Grek ki’n ganny tradwir “ansenny” dan sa verse. Sa mo i enplik donn en konsey serye, me pa dan en fason agresif. (Akt 20:31; 2 Tesa. 3:15) Par egzanp, Pol ti ekrir bann  Korentyen: “Mon ekri koumsa, se pa pour fer zot onte, me pour averti zot konman mon bann zanfan byenneme.” (1 Kor. 4:14) I ti averti zot akoz son lanmour ek konsern pour zot.

16. Ki bann ansyen i gard antet kan zot konsey lezot?

¹⁶ Bann ansyen i gard antet lenportans lafason ki zot averti oubyen konsey lezot. Zot esey imit Pol par donn konsey dan en fason zantiy, avek lanmour e zot pare pour ede dan en fason pratik. (Lir 1 Tesalonisyen 2:11, 12.) Byensir bann ansyen i ‘reste ferm dan sa mesaz sir parey zot anonse, pour ki zot kapab ansenny lezot dapre sa vre doktrin.’​—Tit 1:5-9.

17, 18. Ki ou devret gard antet kan ou ganny konseye avek en ansyen?

¹⁷ Byensir, bann ansyen i enparfe e i kapab arive ki zot dir bann keksoz ki zot regrete pli tar. (1 Rwa. 8:46; Zak 3:8) Deplis, bann ansyen i konnen ki ler bann frer ek ser i ganny konseye, sa i kapab “rann malere plito ki donn lazwa.” (Ebr. 12:11) Pour sa rezon, avan ler en ansyen i apros en dimoun pour konsey li, i pou’n sirman reflesir en bon pe e priy lo la. Si ou’n ganny konseye, eski ou apresye konsern ek lanmour sa ansyen?

¹⁸ Fer konmsi ou ti annan en problenm lasante ki ou pa kapab eksplike. Me apre sa, en dokter i idantifye ou maladi, me i difisil pour ou aksepte sa ki dokter in dir. Eski ou ti pou ankoler avek sa dokter? Non! Menm si i ti dir ou ki ou bezwen fer en loperasyon, tre probab ou ti pou aksepte sa tretman akoz ou panse ki i pour ou prop byenfe. Lafason ki sa dokter i pas sa lenformasyon avek ou i annan en lefe lo ou santiman, me eski zis sa ki ti pou enfliyans ou desizyon? Pa neseserman. Pareyman, pa les lafason ki ou ganny konseye anpes ou ekout bann ki Zeova ek Zezi pe servi pour ed e protez ou spirityelman.

Apresye bann ansyen ki Zeova in donnen

19, 20. Ki mannyer nou kapab demontre nou lapresyasyon anver bann ansyen?

¹⁹ Ki ou pou fer si ou ganny en kado ki’n ganny fer espesyalman pour ou? Eski ou pou demontre lapresyasyon par servi li? Bann zonm konman “kado” i sanmenm ki Zeova in donn ou atraver Zezi Kri. En fason pour demontre lapresyasyon pour sa bann kado i kan ou ekout atantivman bann diskour ki zot donnen e esey aplik bann pwen ki ganny mansyonnen. Ou osi kapab demontre ou lapresyasyon kan ou fer bann bon komanter dan renyon. Siport bann travay ki bann ansyen i dirize, parey predikasyon. Si ou’n benefisye avek konsey ki en ansyen in donn ou, akoz ou pa dir li? Deplis, eski ou kapab montre lapresyasyon pour fanmir bann ansyen? Mazinen ki pour sa ansyen travay dir dan kongregasyon, son fanmir i bezwen sakrifye sa letan ki zot ti pou pase avek li.

²⁰ Vreman, nou annan bokou rezon pour demontre rekonesans pour bann ansyen ki travay dir pour diriz e ansenny nou dan kongregasyon. Sa bann “kado” i vreman en bon laranzman ki Zeova in met an plas, pa i vre!

Eski ou rapel?

• Ki rezon bann Kretyen Tesalonik ti annan pour apresye bann ki ti pran swen avek kongregasyon?

• Ki mannyer bann ansyen i travay dir pour ou dan ou kongregasyon?

• Ki byenfe ou gannyen ler bann ansyen i diriz kongregasyon?

• Si ou ganny konseye par en ansyen, ki ou devret gard antet?

[Kestyon]

[Portre lo paz 31]

Eski ou apresye sa bann diferan fason ki bann ansyen i pran swen avek kongregasyon?