‘Pemombaʼe umi ombaʼapo jejopývape pende apytépe’

‘Pemombaʼe umi ombaʼapo jejopývape pende apytépe, penesãmbyhýva Ñandejára rapére ha oñemoñeʼẽva peẽme.’ (1 TES. 5:12)

1, 2.a) Mbaʼe situasiónpepa oĩvaʼekue umi Tesalonicaygua Pablo ohaírõ guare chupekuéra? b) Mbaʼe konséhopa omeʼẽ chupekuéra Pablo?

ÑAPENSAMÍNA ñaimeha síglo primérope kongregasión Tesalónicape. Apóstol Pablo heta tiémpo oĩvaʼekue upépe omombarete ha omokyreʼỹ hag̃ua umi ermánope. Ha oiméne ojapo haguéicha ambue hendápe, onombra avei ansiáno oñangareko hag̃ua Jehová siervokuérare (Hech. 14:23). Péro upe rire umi hudío ombyaty heta hénte ha omosẽ Pablo ha Sílaspe upe távagui. Oiméne piko okyhyjetéraʼe ha oñeñandu haʼeño umi ermáno Tesalonicaygua.

² Pablo ojepyʼapyeterei rupi ko kongregasión pyahúre ohomoʼã jey upe távape, péro ‘Satanás ohapejoko’ chupe. Upémarõ omondo Timotéope omombarete hag̃ua umi ermánope (1 Tes. 2:18; 3:2). Upégui ou jeývo Timoteo omombeʼu heta mbaʼe porã ha Pablo oguerahauka umi Tesalonicayguápe peteĩ kárta oporomokyreʼỹva. Upépe omeʼẽ chupekuéra ko konsého: ‘Pemombaʼe umi penesãmbyhývape Ñandejára rapére’ (elee 1 Tesalonicenses 5:12, 13).

3. Mbaʼérepa oñemombaʼevaʼerã umi ansiáno Tesalonicayguápe?

³ Umi ansiáno Tesalonicaygua ndaikatupyrýi  añete Pablo ha iñirũnguéraicha, ni ndohasái gueteri heta mbaʼe umi ansiáno Jerusalenpeguáicha. Un áño ramónte voi ningo oñepyrũ hague upe kongregasión. Upéicharõ jepe Pablo ohechauka umi ermánope mbaʼérepa omombaʼevaʼerã umi ansiánope heʼívo: ‘Haʼekuéra ombaʼapo jejopy pende apytépe, penesãmbyhy Ñandejára rapére ha oñemoñeʼẽ peẽme’. Ha heʼive: ‘Pehayhuvaʼerã chupekuéra umi mbaʼeta ojapóvare’. Omokyreʼỹ avei umi ermánope ‘oiko hag̃ua pyʼaguapýpe oñondive’. Ha nde reimérire upépe, remombaʼevaʼerãmoʼã piko umi ansiáno Tesalonicayguápe? Remombaʼépa koʼág̃a umi ansiáno oĩva ne kongregasiónpe? Rehechápa chupekuéra peteĩ jopóiramo Ñandejára omeʼẽva ndéve Cristo rupive? (Efe. 4:8.)

‘Ombaʼapo jejopy’

4, 5. Mbaʼérepa Pablo heʼirakaʼe umi ansiáno Tesalonicaygua ombaʼapo jejopy hague, ha mbaʼépa ikatu jaʼe ansianokuéra koʼag̃aguáre?

⁴ Mbaʼépa ojaporakaʼe umi ansiáno Tesalonicaygua Pablo ha Silas oho rire Beréape? Ombaʼapo jejopy hikuái osegívo Pablo ehémplo ha oñehaʼã oiporu Ñandejára Ñeʼẽ omboʼe hag̃ua ermanokuérape. Umi Bereayguáre katu la Biblia heʼi ‘ipyʼaporãveha umi Tesalonicayguakuéragui, [...] ha koʼẽ koʼẽre ohesaʼỹijoha Ñandejára Ñeʼẽ’ (Hech. 17:11, NM). Heʼisépa upéva umi ermáno Tesalonicaygua nomombaʼeiha Ñandejára Ñeʼẽ? Nahániri, Pablo koʼápe noñeʼẽi umi ermánore, síno umi hudío oikóvare Tesalónicape. Haʼe voi heʼivaʼekue umi ‘ohendúva Ñandejára ñeʼẽ omog̃uahẽha ipyʼapýpe Ñandejára marandúramo, ndahaʼéi yvypóra marandúramo’ (1 Tes. 2:13). Upévare jaʼekuaa umi ansiáno ombaʼapo jejopy hague omboʼe hag̃ua upe kongregasiónpe.

⁵ Koʼág̃a rupi pe ‘tembiguái jeroviaha ha iñarandúva’ omeʼẽ Ñandejára siervokuérape ‘hembiʼurã hiʼoraitépe’ (Mat. 24:45, NM). Ha umi ansiáno ombaʼapo jejopy ipoguýpe omombarete hag̃ua ermanokuéra jerovia. Heta idiómape ojeguereko hetaiterei puvlikasión vívlika, oĩ orekóva pe Índice de las publicaciones Watch Tower ha pe prográma Watchtower Library. Ansianokuéra oiporu heta tiémpo oprepara hag̃ua umi diskúrso oipytyvõ, ohekomboʼe ha omokyreʼỹtava ermanokuérape. Oĩ avei ojapóva diskúrso umi aty guasuhápe. Ha ñande, ñamombaʼépa chupekuéra ñapensávo mboy tiémpopa oiporu ojapo hag̃ua koʼã mbaʼe?

6, 7.a) Mbaʼépa omboʼe Pablo ehémplo umi ansiáno Tesalonicayguápe? b) Mbaʼérepa sapyʼánte ijetuʼu umi ansiáno koʼag̃aguápe osegi hag̃ua Jesús ehémplo?

⁶ Umi ansiáno Tesalonicaygua oñangareko porã hag̃ua kongregasiónre osegi Pablo ehémplo. Haʼe ohomivaʼerã ovisita umi ermánope oipytyvõ hag̃ua chupekuéra, ndahaʼéi okumpli hag̃uánte. Pe ótro artíkulope jahechákuri Pablo otrata hague mborayhúpe ermanokuérape, ‘peteĩ sy omongakuaa ha oñangarekóvaicha imemby teére’ (elee 1 Tesalonicenses 2:7, 8). Haʼe oĩvaʼekue voi omeʼẽ hag̃uáicha opa mbaʼe ermanokuéra rehehápe. Ha upéicha avei ojapovaʼekue umi ansiáno Tesalonicaygua oñangarekóvo kongregasiónre.

⁷ Koʼág̃a rupi umi ansiáno oñangarekovaʼerã ermanokuérare pyʼaporã ha mborayhúpe, Pablo ojapo haguéicha. Haʼekuéra oñehaʼãvaʼerã ohecha iporãva enterovére, oĩramo jepe iñeʼẽrendu ha imbaʼeporãvéva ótrogui (Pro. 16:20). Umi ansiáno ningo iñimperfékto, upévare sapyʼánte ijetuʼu opensa porã hag̃ua umi naiñeʼẽrenduguasúivare. Péro haʼekuéra oñehaʼãmbaite osegi pe Ovecharerekua Ijojahaʼỹva ehémplo ha mborayhúpe otrata enterovépe. Ajépa ñamombaʼete koʼã ermánope oñehaʼã haguére upéicha!

8, 9. Mbaʼéichapa umi ansiáno ‘oñangareko ñanderehe kaneʼõʼỹre’?

⁸ Iñimportanteterei ningo enterove ñañemoĩ umi ansiáno ‘poguýpe, haʼekuéra oñangarekógui ñanderehe kaneʼõʼỹre’ (Heb. 13:17). Umi ovecharerekua sapyʼánte ndokéi  pyharekue oñangareko porã hag̃ua hymbakuérare, upéicha avei ansianokuéra ndokéi jepi oñangareko hag̃ua umi ermáno ijerovia kangývare, ndovyʼavéi térã hasykatúvare. Pór ehémplo umi oĩva Comité de Enlace con los Hospitálespe opuʼã jepi pyhare rei oipytyvõ hag̃ua umi ermáno hasyetévape. Ajéiko jaagradesete koʼã ermánope ñanepytyvõ haguére ñaikotevẽve jave hesekuéra!

⁹ Avei ñamombaʼevaʼerã umi ansianokuéra ombaʼapóvape oñemopuʼã hag̃ua Salón del Reino ha oĩva umi comité oipytyvõvape oiko jave sarambi. Pór ehémplo, ñapensamína mbaʼéichapa ermanokuéra oipytyvõvaʼekue ou rire pe torménta guasu Nargis áño 2008-pe, Myanmárpe (yma Birmania). Rrío Irauadi gotyo pe torménta rapykuerépe opyta heta sarambi, ha upépe oĩ kongregasión Pothigon. Peteĩ grúpo ohóva oipytyvõ ermanokuérape, ohasa oiko hague rupi sarambi ha oĩhápe atýra teʼõngue. Peteĩ superintendénte, upérõ ovisita ramoitéva upe sirkuíto, pyaʼe avei oho hendapekuéra. Umi ermáno ohechávo chupe heʼi: “Maʼéna, ou ñane superintendénte de sirkuíto! Jehová ñandesalváma!”. Ha ñande, ñamombaʼépa koʼãichagua ansiáno ombaʼapóvape ára ha pyhare? Oĩ avei umi ansiáno ojeporavóva ohusga hag̃ua umi hembiapo vaietereívape, péro haʼekuéra ndaijejapói ojapo haguére koʼã mbaʼe (Mat. 6:2-4). Oñemombaʼe chupekuéra péicha oporopytyvõ haguére!

10. Mbaʼeichagua tembiapópa ojapo jepi umi ansiáno kongregasiónpe?

¹⁰ Umi ansiáno ombaʼapo avei ojejapo hag̃ua hekopete opa mbaʼe kongregasiónpe. Pe coordinador del cuerpo de ancianos ojapo prográma káda semanarã. Pe secretario ombyaty kongregasión infórme káda més ha áño. Eskuéla omoakãva katu ohecha máva mávapa orekóta párte eskuélape. Avei diferénte ermáno orrevisa kuénta kongregasionpegua káda tres mése. Ha enterove ansiáno oleevaʼerã umi kárta omondóva chupekuéra sukursál ha ojapo heʼíva upépe oĩmba hag̃ua peteĩ ñeʼẽme (Efe. 4:3, 13). Koʼã mbaʼe oipytyvõ ‘ojejapo hag̃ua opa mbaʼe hekopete ha hendaitépe’ (1 Cor. 14:40, ÑÑB).

‘Penesãmbyhy’

11, 12. Máva mávapa oisãmbyhy kongregasión, ha mbaʼépa ojapo hikuái?

¹¹ Pe kárta Pablo ohaivaʼekuépe umi Tesalonicayguápe heʼi umi ansiáno ‘oisãmbyhyha’ chupekuéra. Griégo ñeʼẽme upéva heʼise “oñemboʼyha henondepekuéra”, ha avei “omoakã” ha “omotenondeha” (1 Tes. 5:12; nóta). Koʼã ansiánore Pablo heʼimavaʼekue voi ‘ombaʼapo jejopyha’. Upévare jaʼekuaa enterove ‘oisãmbyhyha’ kongregasión, ha ndahaʼéi peteĩnte. Koʼág̃a rupi avei umi ansiáno “oñemboʼy” ermanokuéra renondépe omoakã jave umi rreunión. Ha ndojeʼevéima “superintendente presidente”, síno “coordinador del cuerpo de ancianos”, upéva ñanepytyvõ jahecha hag̃ua chupekuéra peteĩchapa.

¹² Péro umi oisãmbyhýva kongregasión ndahaʼéi oporomboʼentevaʼerã. Apóstol Pablo oiporu avei upe ñeʼẽ 1 Timoteo 3:4-pe heʼírõ guare ansianokuérape ‘oisãmbyhy porã vaʼerãha hóga, ha itaʼyrakuéra iñeʼẽrendu ha hekoporãvaʼerãha’. Jaikuaaháicha oisãmbyhy hag̃ua hogapy ndahaʼéi omboʼentevaʼerã ifamíliape, síno tekotevẽ oreko ipoguýpe ha omoakã entéro hogayguápe. Upéicha avei umi ansiáno omoakãvaʼerã kongregasión ha oipytyvõ entéro ermánope oñemoĩ hag̃ua Jehová poguýpe (1 Tim. 3:5).

13. Mbaʼérepa sapyʼánte ijetuʼu umi ansiánope odesidi hag̃ua peteĩ mbaʼe?

¹³ Umi ansiáno oisãmbyhy porã hag̃ua kongregasión, ohechavaʼerã oñondivepa mbaʼépa oikotevẽ ermanokuéra ha mbaʼéichapa ikatu oñepytyvõ chupekuéra. Ha ikatu oĩ opensáva iporãvetaha peteĩnte odesidírõ opa mbaʼe. Péro ansianokuéra koʼag̃agua osegínte umi ansiáno síglo primeropegua ehémplo. Oñembyaty jave umi ansiáno, ohendu enterove opensáva ha ohesaʼỹijo la Biblia ohecha  hag̃ua mbaʼéichapa ikatu oipytyvõ kongregasiónpe. Ha ikatu hag̃uáicha osẽ porã umi rreunión, káda ansiáno oñembyaty mboyve ohechavaʼerã mbaʼépa heʼi Ñandejára Ñeʼẽ ha pe tembiguái jeroviaha. Koʼã mbaʼe oiporuhína chuguikuéra heta tiémpo. Sapyʼánte ijetuʼu chupekuéra og̃uahẽ hag̃ua peteĩ ñeʼẽme, oiko haguéicha síglo primérope umi ansiáno oñeʼẽrõ guare pe sirkunsisión rehe. Péicha jave, ansianokuéra ohekave ha ohesaʼỹijo umi informasión oipytyvõtava chupekuéra odesidi hag̃ua la Biblia heʼiháicha (Hech. 15:2, 6, 7, 12-14, 28).

14. Mbaʼérepa jaagradese umi ansiáno ombaʼapo haguére oñondive?

¹⁴ Péro, mbaʼépa oikóta peteĩ ansiáno mbaretépe oipotáramo oñepensa haʼe opensaháicha? Térã ivaiveha, oporomoingovaiséramo Diótrefes ojapo haguéicha síglo primérope? (3 Juan 9, 10.) Ohasa asýta opavave ermáno oĩva upe kongregasiónpe. Satanás ningo ndoipotaivaʼekue oiko pyʼaguapýpe umi kristiáno síglo primeropegua, ha upéicha avei koʼág̃a. Mbaʼépa ojapo? Omoñuhãse chupekuéra opensa hag̃ua ijehénte ha oiko ikatupyryvévaramo. Upévare umi ansiáno oñehaʼãvaʼerã hekomirĩ ha ombaʼapo oñondivepa peteĩ ñeʼẽme. Ha ñaiméva guive kongregasiónpe jaagradese chupekuéra ojapo haguére upéicha.

‘Oñemoñeʼẽ peẽme’

15. Mbaʼérepa umi ansiáno oñemoñeʼẽ ermanokuérape?

¹⁵ Pablo heʼivaʼekue avei umi ansiáno Tesalonicayguápe tekotevẽha oñemoñeʼẽ kongregasiónpe, ijetuʼúramo jepe upéva. Escrituras Griegas Cristiánaspe apóstol Pablo  añoite oiporu pe ñeʼẽ ojetradusíva “ñemoñeʼẽ”, ha heʼise ñameʼẽ konsého ha japorokorrehi, péro jajaheiʼỹre (Hech. 20:31; 2 Tes. 3:15). Pe apóstol heʼivaʼekue voi umi Corintoyguápe: ‘Ndahaíri niko peẽme pomotĩ hag̃ua, añemoñeʼẽ hag̃uánte pohayhúgui che raʼýicha’ (1 Cor. 4:14, JMP). Péicha Pablo oñemoñeʼẽ iñermanokuérape ohayhu ha ojepyʼapýgui hesekuéra.

16. Mbaʼéichapa umi ansiáno tekotevẽ oñemoñeʼẽ ermanokuérape?

¹⁶ Umi ansiáno oñemoñeʼẽta jave tekotevẽ oporotratakuaa. Pablo ojapo haguéicha, ansianokuéra oñehaʼãvaʼerã oñemoñeʼẽ mborayhu ha pyʼaguapýpe, ha heʼi umi mbaʼe oipytyvõtava ermanokuérape (elee 1 Tesalonicenses 2:11, 12). Tekotevẽ avei ‘oiko hekópe Ñandejára Ñeʼẽ heʼiháicha, upéicha ikatúta oporomboʼe porã’ (Tito 1:5-9, ÑÑB).

17, 18. Mbaʼe rehépa ñanemanduʼavaʼerã peteĩ ansiáno oñemoñeʼẽ jave ñandéve?

¹⁷ Ansianokuéra ningo iñimperfékto ha sapyʼánte heʼi umi mbaʼe ombyasýva upe rire (1 Rey. 8:46; Sant. 3:8). Oikuaa hikuái oimeraẽ ermánope ojekorrehíramo ‘ndovyʼamoʼãiha, síno hasytaha chupe’ (Heb. 12:11, BNP). Upévare oñemoñeʼẽ mboyve peteĩ ermánope, heta ojepyʼamongeta ha oñemboʼe. Upéicharõ, peteĩ ansiáno omeʼẽramo ñandéve konsého, ñapensavaʼerã ojapoha upéva ojepyʼapýguinte ñanderehe.

¹⁸ Ñapensamína ko ehémplore, ñamoĩ chupe ñanderasykatuha ha ndajaikuaái mbaʼépa ojehu ñandéve. Upéi jaha doktórpe ha heʼi ñandéve mbaʼeichagua mbaʼasýpa ñandejagarra, péro nañandegustapái pe heʼíva. Ñandepochýtapa hese? Nahániri, heʼíramo jepe jajoperavaʼerãha ñahendúta chupe, jaikuaágui upéva ikatuha ñanemonguera. Ha ñandepochýtapa heʼi vai guasúramo ñandéve? Ikatu ñandepochy sapyʼami, péro upéva ndeʼiséi ndajajapomoʼãiha upe heʼivaʼekue. Upéicha avei peteĩ ansiáno oñemoñeʼẽramo ñandéve nañamboguapyivaʼerã ñandejehe heʼi lája, iporãvéta hína ñaneñeʼẽrendúramo chupe. Ñanemanduʼavaʼerã Jehová ha Jesús ikatuha ojevale hese ñanepytyvõ térã oñangareko hag̃ua ñanderehe.

Umi ansiáno ningo peteĩ jopói oúva Jehovágui

19, 20. Mbaʼéichapa ikatu jahechauka jaagradeseha pe jopói Jehová omeʼẽva ñandéve?

¹⁹ Oñemeʼẽramo ñandéve peteĩ jopói jahechaukáta jaagradeseha jaiporúramo, ajépa? Jehová ningo, Jesucristo rupive, omeʼẽhína ñandéve jopóiramo umi ansiáno. Mbaʼéichapa jahechaukáta jaagradeseha Jehovápe? Heta hendáicha, pór ehémplo umi ansiáno ojapo jave peteĩ diskúrso, jajapysaka porã ha jajapo heʼíva. Ojerure jave oñekomenta hag̃ua, kyreʼỹme ñakomenta. Ha akóinte ñamoirũ chupekuéra predikasiónpe térã ambue mbaʼe oñekotevẽvape. Avei jaʼe chupekuéra mbaʼeichaitépa ñanepytyvõ umi konsého omeʼẽvaʼekue ñandéve. Ha jaagradese avei hogayguakuérape oheja haguére chupe oipytyvõ kongregasiónpe, ohasaverangue tiémpo hendivekuéra.

²⁰ Ajéiko jaagradesete koʼã ansiáno ombaʼapo jejopy, ñanesãmbyhy ha oñemoñeʼẽ haguére ñandéve! Upévare jaʼekuaa ansianokuéra añetehápe haʼeha peteĩ jopói oúva Jehovágui.

Nemanduʼápa?

• Mbaʼérepa umi Tesalonicaygua tekotevẽvaʼekue omombaʼe umi ansiáno ikongregasionguápe?

• Mbaʼéichapa umi ansiáno koʼag̃agua ombaʼapo jejopy ñanderehehápe?

• Mbaʼépa jahupytýta ñande umi ansiáno ñanesãmbyhy porãramo?

• Mbaʼe rehépa ñanemanduʼavaʼerã peteĩ ansiáno oñemoñeʼẽ jave ñandéve?

[Porandu ñahesaʼỹijóva]

[Nóta oĩva taʼanga ndive páhina 27]

Ñamombaʼépa opa mbaʼe ojapóva ansianokuéra kongregasión rehehápe?