Mì “Nọ Na Sisi Mẹhe to Azọ́n Sinsinyẹn Wà to Mì Ṣẹnṣẹn Lẹ”
Mì “Nọ Na Sisi Mẹhe to Azọ́n Sinsinyẹn Wà to Mì Ṣẹnṣẹn Lẹ”
Mì “nọ na sisi mẹhe to azọ́n sinsinyẹn wà to mì ṣẹnṣẹn lẹ bo to nukunpedo mì go to azọ́n Oklunọ tọn mẹ lẹ bosọ to tudohomẹna mì lẹ.”—1 TẸS. 5:12.
1, 2. (a) Ninọmẹ tẹ mẹ wẹ agun Tẹsalonika tọn tin te to whenue Paulu wlan wekanhlanmẹ etọn tintan hlan yé? (b) Etẹwẹ Paulu na tuli Tẹsalonikanu lẹ nado wà?
MÍ NI dọ dọ hiẹ yin hagbẹ agun Tẹsalonika owhe kanweko tintan tọn, yèdọ dopo to agun tintan he yin didoai to Europe lẹ mẹ. Apọsteli Paulu ko yí whenu susu zan nado hẹn mẹmẹsunnu he tin to finẹ lẹ lodo. Ewọ sọgan ko de sunnu mẹho lẹ nado yin nukọntọ, dile e te do to agun devo lẹ mẹ. (Owalọ 14:23) Ṣigba to whenue agun lọ yin didoai godo, Ju lẹ fọ́n gbẹtọgun de dote nado yàn Paulu po Sila po tọ́n sọn tòdaho lọ mẹ. Klistiani he to tòdaho lọ mẹ lẹ sọgan ko jẹflumẹ, kavi tlẹ dibu.
2 E họnwun dọ, ninọmẹ agun he ṣẹṣẹ yin didoai lọ tọn duahunmẹna Paulu to whenue e tọ́n sọn Tẹsalonika godo. E tẹnpọn nado lẹkọwa, ṣigba “Satani sú” ali do e. Enẹwutu, e do Timoti hlan nado na tuli agun lọ. (1 Tẹs. 2:18; 3:2) To whenue Timoti hẹn linlin dagbe wá na ẹn, Paulu yin whinwhàn nado kanwehlan Tẹsalonikanu lẹ. To nuhe Paulu dọ lẹ mẹ, e na tuli yé nado ‘nọ na sisi mẹhe to nukunpedo yé go lẹ.’—Hia 1 Tẹsalonikanu lẹ 5:12, 13.
3. Whẹwhinwhẹ́n tẹlẹ wẹ Klistiani Tẹsalonika tọn lẹ tindo nado nọ na sunnu mẹho lẹ sisi tlala?
3 Mẹmẹsunnu he yin nukọntọ to Klistiani Tẹsalonika tọn lẹ mẹ lẹ ma tindo numimọ sọ Paulu po gbẹdohẹmẹtọ tomẹyitọ etọn lẹ po gọna mẹho he tin to Jelusalẹm lẹ. To popolẹpo mẹ, e ma pé owhe dopo he agun lọ yin didoai! Etomọṣo, mẹhe tin to agun lọ mẹ lẹ tindo whẹwhinwhẹ́n nado yọ́n pinpẹn sunnu mẹho yetọn lẹ tọn, mẹhe “to azọ́n sinsinyẹn wà” bo “to nukunpedo” agun lọ go bosọ “to tudohomẹna” mẹmẹsunnu lẹ. Na nugbo tọn, yé tindo whẹwhinwhẹ́n dagbe nado “nọ na [mẹho lẹ] sisi tlala to owanyi mẹ.” To obiọ ehe godo, Paulu na yé ayinamẹ nado “nọ nọ̀ jijọho mẹ hẹ ode awetọ.” Eyin hiẹ tin to Tẹsalonika to ojlẹ enẹ mẹ, be hiẹ na do pinpẹn-nutọn-yinyọnẹn sisosiso hia na azọ́n he wà mẹho lẹ te ya? Nukun tẹwẹ hiẹ nọ yí do pọ́n ‘sunnu he yin ninamẹ di nunina lẹ’ he Jiwheyẹwhe gbọn Klisti gblamẹ wleawuna to agun mìtọn mẹ?—Efe. 4:8.
Yé “to Azọ́n Sinsinyẹn Wà”
4, 5. Naegbọn mí sọgan dọ dọ azọ́n sinsinyẹn wẹ e yin na sunnu mẹho lẹ nado plọn agun lọ to azán Paulu tọn gbè, podọ to egbehe?
4 To whenue Paulu po Sila po yin didohlan Belea godo, nawẹ sunnu mẹho Tẹsalonika tọn lẹ “to azọ́n sinsinyẹn wà” gbọn? Matin ayihaawe, to apajlẹ Paulu tọn hihodo mẹ, yé plọn agun lọ gbọn Owe-wiwe lẹ yiyizan dali. Hiẹ sọgan kanse dewe dọ ‘be Klistiani Tẹsalonika tọn lẹ yọ́n pinpẹn Ohó Jiwheyẹwhe tọn ya?’ Biblu dọ dọ Belea-nu lẹ yin “ayiha dagbenọ hú omẹ Tẹsalonika tọn lẹ, . . . bo nọ yí sọwhiwhe do gbadopọnna Owe-wiwe lẹ egbesọegbesọ.” (Owalọ 17:11) Ṣigba, nuyijlẹdonugo ehe gando Ju Tẹsalonika tọn lẹ go to paa mẹ, e ma yin Klistiani lẹ, na mẹhe lẹzun yisenọ lẹ ‘kẹalọyi ohó Jiwheyẹwhe tọn, e ma yin taidi ohó gbẹtọ tọn gba, ṣigba taidi ohó Jiwheyẹwhe tọn.’ (1 Tẹs. 2:13) Sunnu mẹho lẹ dona ko wazọ́n sinsinyẹn nado na núdùdù omẹ enẹlẹ to gbigbọ-liho.
5 To egbehe, pipli afanumẹ nugbonọ podọ nuyọnẹntọ lọ tọn nọ “na núdùdù” lẹngbọpa Jiwheyẹwhe tọn “to ojlẹ sisọ mẹ.” (Mat. 24:45) To anademẹ afanumẹ lọ tọn glọ, mẹho lẹ nọ wazọ́n sinsinyẹn nado na núdùdù mẹmẹsunnu yetọn lẹ to gbigbọ-liho. Mẹhe to agun lọ mẹ lẹ sọgan tindo owe sinai do Biblu ji susugege, podọ yé sọgan tindo nuyizan delẹ taidi Index des publications Watch Tower po Watchtower Library to CD-ROM ji po to ogbè delẹ mẹ gọna Alọdlẹndonu Hosọ Atọ̀họ̀-Nuhihọ́ lọ Tọn he nọ sọawuhia to zinjẹgbonu décembre tọn lẹ mẹ. Nado hẹn pekọ wá na nuhudo gbigbọmẹ tọn agun lọ tọn, mẹho lẹ nọ yí whenu susu zan nado wleawuna adà opli tọn lẹ nado sọgan ze azọ́n he yin didena yé donukọnnamẹ po kọdetọn dagbe po. Be hiẹ ko lẹnnupọndo whenu he mẹho lẹ nọ yizan nado wleawuna adà he nọ yin didena yé to opli po plidopọ lẹ po ji ya?
6, 7. (a) Apajlẹ tẹwẹ Paulu zedai na sunnu mẹho Tẹsalonika tọn lẹ? (b) Naegbọn e sọgan vẹawuna mẹho lẹ to egbehe nado hodo apajlẹ Paulu tọn?
6 Sunnu mẹho Tẹsalonika tọn lẹ flin apajlẹ dagbe he Paulu zedai to lẹngbọpa lọ yìnyìn mẹ. E ma yin nado yìn lẹngbọpa lọ to aliho mọmọ tọn kavi yamakinanu tọn mẹ gba. Dile e yin hodọdeji to hosọ he jẹnukọn mẹ do, Paulu “to dẹẹdẹ wà . . . taidi lehe onọ̀ he tindo ovi to anọ́nù nọ wleyẹyina ovi etọn titi lẹ do.” (Hia 1 Tẹsalonikanu lẹ 2:7, 8.) Ewọ tlẹ tindo ojlo ‘nado na yé alindọn etọn titi’! Sunnu mẹho lẹ dona nọ hodo apajlẹ etọn to whenue yé to lẹngbọpa lọ yìn.
7 To egbehe, Klistiani lẹngbọhọtọ lẹ nọ hodo apajlẹ Paulu tọn gbọn yẹyi wiwle na lẹngbọpa lọ dali. To jọwamọ-liho lẹngbọ delẹ sọgan nọma yọ́n dọnsẹpọ kavi ma nọ gbàwu do gbẹtọ mẹ. Etomọṣo, mẹho lẹ nọ tẹnpọn nado yí zinzin zan nado “mọ dagbe” he to yé mẹ. (Howh. 16:20) Na nugbo tọn, mapenọ-yinyin sọgan hẹn ẹn vẹawuna mẹho de nado tindo pọndohlan dagbe gando mẹdopodopo go. Ṣigba, dile ewọ to vivẹnudo nado nọ wà dẹẹdẹ hẹ mẹlẹpo, be e ma jẹ dọ mí ni pà ẹ na vivẹnudido etọn nado yin lẹngbọhọtọ dagbe de to Klisti glọ ya?
8, 9. Etẹwẹ yin delẹ to aliho he mẹ mẹho egbezangbe tọn lẹ ‘to alindọn mítọn họ́’ te lẹ mẹ?
8 Mímẹpo wẹ tindo whẹwhinwhẹ́n nado “nọ litai” na mẹho lẹ. Dile Paulu wlan do, ‘yewlẹ to alindọn mítọn họ́.’ (Heb. 13:17) Hogbe enẹ flin mí lẹngbọhọtọ paa lẹ he nọ gọ̀n amlọndọ nado sọgan basi-hihọ́na lẹngbọpa yetọn. Mọdopolọ, mẹho lẹ to egbehe sọgan yí amlọn yetọn delẹ do sanvọ́ to whenue yé to nukunpedo nuhudo mẹhe to azọ̀njẹ kavi mẹhe tindo nuhahun to numọtolanmẹ-liho kavi to gbigbọ-liho lẹ tọn go. Di apajlẹ, mẹmẹsunnu he tin to Wedegbẹ́ Whẹgbọtọ Dotowhé tọn mẹ lẹ nọ yin finfọn sọn amlọn mẹ nado yì penukundo whẹho dotowhé tọn de go. Lehe mí nọ yọ́n pinpẹn azọ́n yetọn tọn to whenue mí pehẹ ninọmẹ mọnkọtọn de do sọ!
9 Mẹho agun tọn he tin to Wedegbẹ́ Họ̀gbigbá Tòpọnla tọn po wedegbẹ́ kọgbọ tọn po mẹ lẹ nọ wazọ́n sinsinyẹn nado gọalọna mẹmẹsunnu lẹ. Yé jẹna godonọnamẹ ahundopo tọn mítọn! Lẹnnupọndo azọ́n kọgbọ tọn he yin wiwà to whenue jẹhọn sinsinyẹn de he nọ yin Nargis gbànú to Birmanie to 2008 ji. Whẹpo azọ́nwatọ kọgbọ tọn lẹ nado jẹ agun Bothingone tọn mẹ, to Irraouaddi, yèdọ lẹdo ohù tọn he mẹ jẹhọn lọ gbànú te hugan, yé zingbejizọnlin gbọn fihe ko yin hinhẹngble bo gọ́ na oṣiọ lẹ. To whenue mẹmẹsunnu lẹdo lọ tọn lẹ mọdọ nugopọntọ lẹdo tọn yetọn dai tọn tin to pipli kọgbọ tọn tintan he wá Bothingone lọ mẹ, yé dawhá dọmọ: “Mì pọ́n! Nugopọntọ mítọn niyẹn! Jehovah ko whlẹn mí!” Be hiẹ nọ yọ́n pinpẹn azọ́n sinsinyẹn he mẹho lẹ nọ wà to okle po ozán po tọn ya? Mẹho delẹ nọ yin dide do wedegbẹ́ vonọtaun lẹ mẹ nado penukundo whẹho sinsinyẹn lẹ go. Mẹho ehelẹ ma nọ yigo na nuhe yé wadotana lẹ gba; amọ́ mẹhe mọaleyi sọn nuhe yé wà mẹ lẹ nọ yọ́n pinpẹn etọn taun.—Mat. 6:2-4.
10. Azọ́n he ma nọ saba yin ayidego tẹwẹ mẹho lẹ nọ wà?
10 Mẹho susu to egbehe sọ nọ wazọ́n he gando wekinkan go lẹ. Di apajlẹ, anadenanutọ to pipli mẹho lẹ tọn mẹ nọ wleawuna tito-to-whinnu opli sẹmẹsẹmẹ tọn lẹ tọn. Wekantọ agun tọn nọ basi lẹndopọ linlin sinsẹ̀nzọn kunnudegbe tọn to sunmẹsunmẹ podọ to whemẹwhemẹ. Nugopọntọ wehọmẹ tọn nọ na ayidonugo sọwhiwhe tọn tito-to-whinnu wehọmẹ tọn. Akuẹzinzan agun tọn nọ yin gbigbejepọn to osun atọ̀n atọ̀n mẹ. Mẹho lẹ nọ hia wekanhlanmẹ he wá sọn wekantẹn alahọ tọn mẹ lẹ bo nọ yí anademẹ lẹ do yizan mẹ nado sọgan hẹn “dopo-yinyin to yise mẹ” go. (Efe. 4:3, 13) Vivẹnudido mẹho agun tọn azọ́n sinsinyẹnwatọ enẹlẹ tọn nọ zọ́n bọ “onú lẹpo . . . nọ yin wiwà dile e jẹ do podọ to titoji.”—1 Kọl. 14:40.
Yé “to Nukunpedo Mì Go”
11, 12. Mẹnu lẹ wẹ nọ penukundo agun lọ go, podọ etẹwẹ mọwiwà bẹhẹn?
11 Paulu basi zẹẹmẹ sunnu mẹho azọ́n sinsinyẹnwatọ Tẹsalonika tọn lẹ tọn taidi mẹhe “to nukunpedo” agun lọ go. (1 Tẹs. 5:12) Paulu dlẹnalọdo mẹho dopolọ lẹ taidi mẹhe “to azọ́n sinsinyẹn wà.” Sunnu mẹho he tin to agun lọ mẹ lẹpo go wẹ ewọ to hodọ gando. To egbehe, suhugan mẹho lẹ tọn nọ nọte to agun lọ nukọn nado deanana opli lẹ. Vọjlado he yin bibasi to agọe nado nọ yí tẹnmẹ-yinkọ lọ “anadenanutọ to pipli mẹho lẹ tọn mẹ” zan gọalọna mí nado nọ pọ́n mẹho lẹpo taidi hagbẹ pipli dopo tọn.
12 Nado “to nukunpedo” agun lọ go bẹ nususu hẹn hugan mẹpinplọn kẹdẹ. Hogbe dopolọ yin yiyizan to 1 Timoti 3:4 mẹ. Paulu dọ dọ nugopọntọ de dona yin “mẹhe nọ penukundo whédo etọn titi go to aliho dagbe mẹ, he ovi etọn lẹ nọ yí wunza lẹpo do litai.” Tofi, e họnwun dọ hogbe lọ “to nukunpedo” ma bẹ ovi lẹ pinplọn kẹdẹ hẹn gba, ṣigba e sọ bẹ nukọntọ-yinyin to whẹndo mẹ po ‘ovi lẹ hinhẹn nado litai’ po hẹn. Mọwẹ, mẹho lẹ nọ yin nukọntọ to agun lọ mẹ gbọn alọgigọna mẹlẹpo nado litaina Jehovah dali.—1 Tim. 3:5.
13. Naegbọn e sọgan yí whenu to mẹho lẹ si nado basi nudide de to opli yetọn whenu?
13 Nado penukundo lẹngbọpa lọ go, mẹho lẹ nọ dọho to yede ṣẹnṣẹn do lehe yé sọgan penukundo nuhudo agun lọ tọn lẹ go do ji. E sọgan hẹn kọdetọn dagbe wá eyin mẹho dopo basi nudide lẹpo. Ṣogan, to apajlẹ hagbẹ anademẹtọ owhe kanweko tintan tọn hihodo mẹ, pipli mẹho lẹ tọn to egbehe nọ dọhodo whẹho lẹ ji po awuvivo po, bo nọ dín anademẹ sọn Owe-wiwe lẹ mẹ. Yanwle yetọn wẹ nado yí nunọwhinnusẹ́n Owe-wiwe tọn lẹ zan nado penukundo nuhudo agun lọ tọn go. Ehe nọ tindo kọdetọn dagbe to whenue mẹho dopodopo wleawuna opli mẹho lẹ tọn, gbọn dogbigbapọnna Owe-wiwe lẹ po anademẹ pipli afanumẹ nugbonọ podọ nuyọnẹntọ lọ tọn lẹ po dali. Na nugbo tọn, ehe nọ yí whenu. Eyin linlẹn voovo lẹ wẹ fọndote, dile e yin do to whenue hagbẹ anademẹtọ owhe kanweko tintan tọn lẹnnupọndo whẹho adàgbigbo tọn ji, e sọgan biọ dọ yé ni yí whenu susu zan dogọ bo basi dodinnanu nado wá gbèta dopo kọ̀n sọgbe hẹ Owe-wiwe lẹ.—Owalọ 15:2, 6, 7, 12-14, 28.
14. Be hiẹ yọ́n pinpẹn etọn dọ pipli mẹho lẹ tọn nọ wazọ́n to kọndopọ mẹ ya? Naegbọn hiẹ do tindo numọtolanmẹ enẹ?
14 Etẹwẹ sọgan jọ eyin mẹho de tẹdo pọndohlan etọn go kavi tẹnpọn na mẹlẹpo nido kẹalọyi linlẹn etọn? Kavi etẹwẹ sọgan jọ eyin mẹde—taidi Diotlefe owhe kanweko tintan tọn—fọ́n gbemanọpọ dote? (3 Joh. 9, 10) Matin ayihaawe, agun lọ blebu wẹ na jiya. Eyin Satani tẹnpọn nado hẹn bẹwlu wá agun owhe kanweko tintan tọn mẹ, mí sọgan kudeji dọ ojlo etọn wẹ nado hẹn jijọho agun lọ tọn gble to egbehe ga. Ewọ sọgan yí ayilinlẹn ṣejannabi gbẹtọvi tọn lẹ zan, taidi ojlo yindidi tọn. Enẹwutu, mẹho lẹ dona wleawuna whiwhẹ bo wazọ́n dopọ taidi pipli dopo. Lehe mí nọ yọ́n pinpẹn whiwhẹ mẹho he nọ kọngbedopọ taidi pipli dopo lẹ tọn do sọ!
Yé “to Tudohomẹna Mì”
15. Etẹwẹ nọ whàn mẹho lẹ nado dotuhomẹna mẹmẹsunnu kavi mẹmẹyọnnu de?
15 Paulu sọ zinnudo azọ́n sinsinyẹn podọ titengbe he sunnu mẹho lẹ nọ wà de ji: enẹ wẹ nado dotuhomẹna lẹngbọpa lọ. To Owe-wiwe Glẹki tọn lẹ mẹ, Paulu kẹdẹ wẹ yí hogbe Glẹki tọn he yin lilẹdo “dotuhomẹna” zan. E sọgan dlẹnalọdo ayinamẹ sinsinyẹn, ṣigba e ma do kanyinylan hia. (Owalọ 20:31; 2 Tẹs. 3:15) Di apajlẹ, Paulu kanwe hlan Kọlintinu lẹ dọmọ: “Yẹn to onú ehelẹ kàn, e ma yin nado dowinyan mì gba, ṣigba nado dotuhomẹna mì taidi ovi yiwanna ṣie lẹ.” (1 Kọl. 4:14) Mẹtọnhopọn owanyi tọn he e tindo na mẹdevo lẹ wẹ whàn ẹn nado wlan ohó tudohomẹnamẹ tọn enẹ.
16. Etẹwẹ mẹho lẹ na wà dagbe nado hẹn do ayiha mẹ dile yé to tudohomẹna mẹdevo lẹ?
16 Mẹho lẹ nọ hẹn do ayiha mẹ dọ aliho he mẹ yé nọ dotuhomẹna mẹdevo lẹ te yin nujọnu. Yé nọ tẹnpọn nado hodo apajlẹ Paulu tọn gbọn nuhe go yé pé lẹpo wiwà nado jọmẹ, do owanyi hia, bo gọalọ dali. (Hia 1 Tẹsalonikanu lẹ 2:11, 12.) Na nugbo tọn, mẹho lẹ nọ ‘tẹdo ohó nugbo lọ go gligli na yé nido sọgan penugo nado nọ dotuhomẹnamẹ gbọn mẹpinplọn he pegan lọ dali.’—Titu 1:5-9.
17, 18. Etẹwẹ hiẹ dona hẹn do ayiha mẹ eyin mẹho de dotuhomẹna we?
17 Na nugbo tọn, mapenọ wẹ mẹho lẹ yin podọ yé sọgan dọ onú delẹ he nọ wá vẹna yé to godo mẹ. (1 Ahọ. 8:46; Jak. 3:8) Mọdopolọ mẹho lẹ yọnẹn dọ, na mẹmẹsunnu po mẹmẹyọnnu lẹ po to paa mẹ alọkikẹyi ayinamẹ ma nọ ‘yin ayajẹnu adavo awublanu.’ (Heb. 12:11) Enẹwutu, to whenue mẹho de dọnsẹpọ mẹde nado dotuhomẹna ẹn, e sọgan ko lẹnnupọn bo hodẹ̀ do whẹho lọ ji whẹpo do wàmọ. Eyin mẹho de dotuhomẹna we, be hiẹ nọ do pinpẹn-nutọn-yinyọnẹn hia na owanyi mẹtọnhopọn tọn etọn ya?
18 Mí ni dọ dọ hiẹ to azọ̀n de jẹ he e taidi dọ doto lẹ ma sọgan basi zẹẹmẹ etọn. To nukọn mẹ, doto de wá yọ́n azọ̀n lọ, ṣigba e vẹawuna we nado yise dọ hiẹ to azọ̀n mọnkọtọn jẹ. Be hiẹ na gbẹwanna doto enẹ wẹ ya? Lala! Eyin ewọ tlẹ biọ nado wazọ́n mẹzizẹ tọn na we, hiẹ na kẹalọyi nukunpedomẹgo lọ po linlẹn lọ po dọ ehe na hẹn pọngbọ wá na we. Aliho he mẹ doto lọ dọ nuhe to wiwà we te sọgan yinuwado numọtolanmẹ towe ji, ṣigba be hiẹ na dike enẹ ni yinuwado nudide towe ji ya? E na vẹawu. Mọdopolọ, ma dike aliho he mẹ yè dotuhomẹna we te ni hẹn we ma nado dotoaina mẹhe Jehovah po Jesu po to yiyizan nado gọalọna we na hiẹ nido yọ́n lehe a sọgan yinukọn to nugbo lọ mẹ kavi basi hihọ́na haṣinṣan towe hẹ Jiwheyẹwhe do lẹ blo.
Yọ́n Pinpẹn Awuwledainanu Jehovah Tọn He Yin Mẹho Lẹ
19, 20. Nawẹ hiẹ sọgan do pinpẹn-nutọn-yinyọnẹn hia ‘sunnu he yin ninamẹ di nunina lẹ’ gbọn?
19 Etẹwẹ hiẹ na wà eyin mẹde na we nunina vonọtaun de? Be hiẹ na do pinpẹn-nutọn-yinyọnẹn hia gbọn yíyí i zan dali ya? Jehovah wleawu ‘sunnu he yin ninamẹ di nunina lẹ’ tọn na we gbọn Jesu Klisti gblamẹ. Dopo to aliho he mẹ hiẹ sọgan do pinpẹn-nutọn-yinyọnẹn hia na nunina ehelẹ te mẹ wẹ nado nọ dotoai po sọwhiwhe po na hodidọ he mẹho lẹ nọ na lẹ bo nọ dovivẹnu nado yí nuagokun he go yé donù lẹ do yizan mẹ. Hiẹ sọgan sọ nọ na gblọndo he whèwhín to opli lẹ ji nado do pinpẹn-nutọn-yinyọnẹn towe hia. Nọ nọgodona azọ́n he mẹho lẹ nọ yin nukọntọ na, taidi lizọnyizọn kunnudegbe tọn. Eyin hiẹ mọaleyi sọn ayinamẹ he mẹho de na we mẹ, naegbọn hiẹ ma na dọna ẹn? Humọ, naegbọn hiẹ ma na do pinpẹn-nutọn-yinyọnẹn hia whẹndo mẹho lẹ tọn. Flindọ, eyin mẹho de na wazọ́n sinsinyẹn to agun lọ mẹ, whẹndo etọn nọ yí whenu he ewọ dona yizan hẹ yé do sanvọ́.
20 Mọwẹ, mí tindo whẹwhinwhẹ́n susu nado nọ do pinpẹn-nutọn-yinyọnẹn hia mẹho lẹ, yèdọ mẹhe to azọ́n sinsinyẹn wà to ṣẹnṣẹn mítọn, bo to nukunpedo mí go, bosọ to tudohomẹna mí lẹ. Na nugbo tọn, awuwledainanu owanyi tọn sọn Jehovah dè wẹ ‘sunnu he yin ninamẹ di nunina lẹ’ yin!
Be Hiẹ Flin Ya?
• Naegbọn Klistiani Tẹsalonika tọn lẹ dona yọ́n pinpẹn mẹhe to nukọntọ yin to ṣẹnṣẹn yetọn lẹ tọn?
• Aliho tẹlẹ mẹ wẹ mẹho agun mìtọn tọn lẹ nọ wazọ́n sinsinyẹn do ota mìtọn mẹ te?
• Nawẹ hiẹ nọ mọaleyi sọn mẹho he to nukunpedonugo to ṣẹnṣẹn mìtọn lẹ dè gbọn?
• Eyin mẹho de dotuhomẹna we, etẹwẹ hiẹ ma dona wọn?
[Kanbiọ Oplọn tọn lẹ]
[Yẹdide to weda 27]
Be hiẹ nọ yọ́n pinpẹn aliho he mẹ mẹho lẹ nọ penukundo agun lọ go te lẹ tọn ya?