‘Ilungersorlutik akornassinni sulisut qujamasuutigisigit’

“Ilungersorlutik akornassinni sulisut Naalakkamilu akornassinni siulersuisut ilitsersuisuusullu [qujamasuutigisigit].” — 1 THESSALONIKAMIUT 5:12.

1, 2. (a) Paulusi qatanngutinut Thessalonikamiittunut allagaqaqqaarmat pissutsit ilagiit tassaniittut atugaat qanoq ippat? (b) Paulusip Thessalonikamiittut sunissaannut kajumissaarpai?

TAKORLOORIARUK ukiuni hundredelinni siullerni ilagiinnut Thessalonikamiittunut, ilagiinnut Europami pilersinneqaqqaartut ilaannut, ilaallutit. Apustili Paulusi qatanngutinut tassaniittunut ineriartuutaajumalluni sivisungaatsiartumik Thessalonikamiissimavoq. Utoqqaanertanik siulersuisussanik toqqaasimasinnaavoq, soorluttaaq ilagiinni allani taamaaliorsimasoq. (Apustilit Suliaat 14:23) Ilagiilli pilersinneqareermata juutit inunnik ajortunik katersuutsitsipput Paulusi Silasilu illoqarfimmit anisikkumallugit. Kristumiut illoqarfimmiiginnartut qimagaasutut misigisimasinnaapput allaallu annilaangasimasinnaallutik.

² Paulusip Thessalonikamit aallareerluni ilagiit pilersinneqarlaat tassaniittut isumaalugimmagit paasinarpoq. Taavunga uterniartaraluarpoq, ‘Saatanilli akornusersorpaa’. Taamaattumik Paulusip Timotheusi aallartippaa ilagiit taakku qiimmassarniassammagit. (1 Thessalonikamiut 2:18; 3:2) Timotheusi ilagiit taakku pillugit nuannersunik tusarliussassaqarluni utermat, Paulusip tamanna taakkua allaffiginissaannut kajumississutigaa. Taakkununnga kajumissaarutigisaasa ilagaat ‘akunnerminni siulersuisunik qujamasuutiginninnissaat’. — Atuakkit 1 Thessalonikamiut 5:12, 13.

3. Kristumiut Thessalonikamiittut utoqqaanertanik ‘asanningaarnissaminnut’ sunik pissutissaqarpat?

³ Qatanngutit angutit kristumiunik Thessalonikamiunik siulersuisut Paulusitut taassumalu angalaqataasut misilittagaqartiginngillat. Aamma utoqqaanertanit Jerusalemimiittunit sivikinnerusumik kristumiuusimapput. Ilagiit Thessalonikamiittut ukioq ataasiunngitsorluunniit tamatuma siorna pilersinneqarsimapput. Taamaakkaluartorli ilagiinniittut pissutissaqarluarput utoqqaanertanik, ‘ilungersorlutik sulillutillu’ ‘siulersuillutillu ilitsersuisunik’, qujamasuutiginninnissamut. Taakkuninnga ‘asanningaarnissaat’ pissusissamisoorpoq. Aamma Paulusip kajumissaarpai ‘eqqisseqatigeeqqullugit’. Illit Thessalonikamiissimasuuguit utoqqaanertat suliaat qujamasuutigisimassagaluarpigit?  Illit ‘inuit tunissutaasut’ Guutip Kristusi aqqutigalugu ilagiinni najukkanniittunut tunniussai qanoq isigaagit? — Efesosimiut 4:8, NV.

‘Ilungersorlutik sulisut’

4, 5. Sooq Paulusip nalaani utoqqaanertaasut ilagiinnik ilinniartitsiniarlutik ilungersortariaqarpat, aamma sooq ullumikkut utoqqaanertat taamatut ilungersortariaqarpat?

⁴ Sooq oqartoqarsinnaava utoqqaanertat Thessalonikamiittut ‘ilungersorlutik sulisut’ Paulusi Silasilu Berøamut aallartereeramikkit? Qularnanngitsumik taakku Paulusi ilaarlugu Allakkat iluaqutigalugit ilagiinnik ilinniartitsipput. Immaqali eqqarsarputit kristumiut Thessalonikamiittut Guutip oqaasianik ilumut pingaartitsisimanersut. Biibilimimi allassimavoq juutit Berøamiittut ‘juutinit Thessalonikamiittunit iluasaarnerusut, ullut tamaasa Allakkat misissuiffigisarlugit’. (Apustilit Suliaat 17:11) Matumanili eqqaaneqartut tassaapput Thessalonikamiut juutiusut, kristumiuunngitsut. Kristumiunngortut Guutip oqaasia “inuit oqaasiattut [ilassinngilaat], kisianni pissusiviatut, tassa Guutip oqaasiatut.” (1 Thessalonikamiut 2:13) Utoqqaanertat ilagiinnik anersaakkut inuussutissaqartitsiniarlutik ilungersorsimassaqaat.

⁵ Ullumikkut inussiap aalajaallunilu silatuup Guutip savaatai ‘piffissaq eqqorlugu nerisassanik tunisarpai’. (Matthæusi 24:45) Utoqqaanertat najukkatsinniittut inussiap siulersuineratigut ilungersorlutik sulisarput qatanngutitik anersaakkut inuussutissaqartinniarlugit. Imaassinnaavoq ilagiinniittut tamarmik Biibililersaarutaaterpassuaqartut, aamma oqaatsini arlalinni ujarliutit soorlu Register til Vagttårnets publikationer aamma Watchtower Library cd-rommimiittoq pineqarsinnaapput. Utoqqaanertat ilagiit anersaakkut pisariaqartitaannik matussusiiniarlutik ataatsimiinnerni saqqummiussassaminnik piareersaanermut nalunaaquttap-akunnerpassui atortarpaat, paasissutissat inussiaqatigiinneersut paasiuminartumik ingerlateqqissinnaajumallugit. Eqqarsaatiginikuuiuk  utoqqaanertat piffissaq qanoq atsigisoq ataatsimiinnerni ataatsimeersuarnernilu saqqummiussassanut atortarneraat?

6, 7. (a) Paulusi utoqqaanertanut Thessalonikamiittunut qanoq maligassiuiva? (b) Sooq Paulusimik ilaarsinissaq ullumikkut utoqqaanertanut unamminiarnartuusinnaava?

⁶ Utoqqaanertat Thessalonikamiittut Paulusip savaatinik paarsisuunermut tunngatillugu maligassiuilluarnera eqqaamavaat. Taassuma pisussaaffittut isigiinnarlugu qatanngutit pulaapallaannarneq ajorpai. Soorlu allaaserisap matuma siuliani ersertoq, Paulusi qajassuussivoq, “soorlu anaanap qitornani paaqqisarai”. (Atuakkit 1 Thessalonikamiut 2:7, 8). Allaat ‘inuunini tunniukkumavaa’! Utoqqaanertat paarsisutut kiffartornerminni taassuma maligassiaa ilaartussaavaat.

⁷ Ullumikkut paarsisut kristumiut Paulusi ilaarsinnaavaat savaatinik sernissuillutillu paaqqinninnermikkut. Imaassinnaavorli ‘savaatit’ ilaat ilakkuminarpianngitsuusut. Utoqqaanertalli paasinnittuuniartarput taakkualu ajunngitsortaat isiginiarnerusarlugit. Utoqqaanertat ilaasa naammalluinnanngitsuunertik pissutigalugu savaatit tamarmik immikkut ajunngitsumik isumaqarfiginissaat sapernartissinnaavaat. Kristusimilli paarsisuutitaasoq kikkunnut tamanut saamaniarluni sapinngisani tamaat iliuuseqartarpat, taava taanna paarsisuulluartuuniarluni iliuuseqarnera pillugu nersortariaqarparput, ilaa?

8, 9. Ilaatigut qanoq utoqqaanertat ‘tarnitsinnik pigaassisarpat’?

⁸ Tamatta utoqqaanertanut ‘pitseriartuunissatsinnut’ (NV) pissutissaqarluarpugut. Soorlu Paulusi allattoq, ‘taakkua tarnivut pigaappaat’. (Hebræerit 13:17) Oqaatsit taakku tusarlugit immaqa savanik paarsisoq savaatini sernissorniarlugit sininngiinnartoq eqqarsaatigilerparput. Ullumikkut utoqqaanertat tamatumunnga assingusumik immaqa sininngiinnartarput peqqiilliortunik, misigissutsikkut naalliuuteqartunik najoqqutassianilluunniit Biibilimiittunik maleruaruminaatsitsisunik isumassuiniarlutik. Assersuutigalugu Napparsimmavinnut Attaveqartitanut ilaasut ajornartoortoqartillugu unnuaannakkut itersarneqartarsimapput. Ikiorneqartariaqartilluta taakkua ikiuisarnerat qujamasuutigisaqaarput, ilaa?

⁹ Utoqqaanertat sanaartortitsinermik ataatsimiititalianut ikiuiniaqatigiinnulluunniit ilaasut uppeqatiminnik ikiuiniarlutik suleruloortarput. Uagut taakku uummatikkut iluunngarluta tapersersortigit! Ulussaarsuaq Nargis Myanmarimi 2008-mi pitoraatereermat ikiuiniartoqarpoq. Ikiuiniaqatigiit ilagiit Bothingonemi Irrawaddymiittut ikioriartorniarlugit nunap ilaa aserugaasimaqisoq toqusimasut timaannik ulikkaartoq aqqusaarlugu angalasariaqarput. Qatanngutit tamaaniittut ilagiinnik nakkutilliisorisimasartik ikiuiniaqatigiinnut Bothingonemut apuuttunut siullernut ilaasoq takugamikku suaartarput: “Ilagiinnik nakkutilliisorput aajinnga! Jehovap annaappaatigut!” Illit utoqqaanertat ulloq unnuarlu uagut pilluta iliuuseqangaatsiartarnerat qujamasuutigaajuk? Utoqqaanertat ilaat ataatsimiititalianut immikkut ittunut inatsisitigut ajornartorsiutinik aaqqiiniarfiusartunut ilaasussatut toqqagaasarput. Utoqqaanertat taakkua naammassisatik kakkanniutigineq ajorpaat, iliuuserisaannilli iluaqutiginnittut qujamasungaartarput. — Matthæusi 6:2-4.

10. Utoqqaanertat malunnannginnerusunik sunik suliaqartarpat?

¹⁰ Ullumikkut utoqqaanertat ilarpassui pappiaralerisarput. Assersuutigalugu utoqqaanertaqatigiinnik ataqatigiissaarisoq ataatsimiinnernut pilersaarusiortarpoq. Ilagiinnut allattaasup oqaluussinermik nalunaarusiat qaammammoortut ukiumoortullu suliarisarpai. Ilinniarfimmik nakkutilliisoq Teokratiimik Ilinniarfimmut pilersaarusiortarpoq. Qaammatit pingasukkaarlugit ilagiit naatsorsuutaat kukkunersiorneqartarput. Utoqqaanertat immikkoortortaqarfinnit allagarsiatik atuartarpaat iliuusereqquneqartullu malittarlugit. Tamanna ilagiit ‘uppernermi ataasiujuarnissaannut’ iluaqutaasarpoq. (Efesosimiut 4:3, 13) Utoqqaanertat eqiasuitsut sulilluartarmata ‘suut tamarmik ippinnanngitsumik torersumillu ingerlasarput’. — 1 Korinthimiut 14:40.

“Akornassinni siulersuisut”

11, 12. Kikkut ilagiinnik siulersuippat, siulersuinermullu suut ilaappat?

¹¹ Paulusi utoqqaanertat Thessalonikamiittut sulilluartut pillugit allappoq taakku ilagiinniittut ‘akornanni siulersuisuusut’. (1 Thessalonikamiut  5:12) Aamma taakku pillugit allappoq ‘ilungersorlutik sulisut’. Matumani utoqqaanertat ilagiinniittut tamaasa pivai. Ullumikkut utoqqaanertat ilagiinniittut amerlanersaat ilagiinnik ‘siulersuisarput’ ataatsimiinnernik aqutseqataasarnermikkut. Taaguut “utoqqaanertaqatigiinnik ataqatigiissaarisoq” qanittukkut atortaleratsigu utoqqaanertat tamaasa peqatigiissutut isigiuminarnerutilerpavut.

¹² Utoqqaanertat ilagiinniittunik tamanik ‘siulersuinerat’ ilinniartitsinerinnaanngilaq. Oqaatsip tamatuma isumaa oqaatsimut ‘aqutsineq’-mut Timotheusimut allakkani siullerni 3:4-mi atorneqartumut assinguvoq. Paulusi allappoq nakkutilliisoq ‘inoqutiminik aqutsisinnaasuussasoq qitornaminillu naalatsitsisinnaassalluni ataqqineqartuullunilu’. Erseqqippoq oqaaseq ‘aqutsineq’ matumani atorneqartoq meeqqanik ilinniartitsinermut tunngassuteqaannarani aamma ilaqutariinnik siulersuinermut ‘qitornanillu naalatsitsinermut’ tunngassuteqartoq. Aap, utoqqaanertat ilagiinni siuttuupput taamaalillutillu ilagiinniittut tamaasa Jehovamut naalatsigitinnissaannut ikiortarlugit. — 1 Timotheusi 3:5.

13. Sooq utoqqaanertat ataatsimiinneranni aalajangiiumalluni piffissaqarnerunissaq pisariaqarsinnaava?

¹³ Ilagiinnik siulersuilluarsinnaajumallutik utoqqaanertat savaatit pisariaqartitaannik eqqartuisarput ilagiinnillu pitsaanerpaamik qanoq ikiuisinnaanertik oqaloqatigiissutigisarlugu. Immaqa eqqarsartoqarsinnaavoq utoqqaanertap ataatsip aalajangigassat tamaasa aalajangiiffigisarpagit ajornannginnerussagaluartoq. Ullumikkulli utoqqaanertaqatigiit ukiuni hundredelinni siullerni siulersuisoqatigiit maligassiaannik malinnipput. Ilagiinnut tunngasut ammasumik oqaloqatigiissutigisarpaat Guutillu oqaasiani siunnersuutaasinnaasunik misissuisarlutik. Najoqqutassiat Biibilimiittut ilagiit najukkaminniittut pisariaqartitaannut tulluartumik atornissaat anguniagaraat. Anguniagartik tamanna angulluarsinnaanerussavaat utoqqaanertat tamarmik immikkut Biibilimi allassimasunik inussiallu aalajaallunilu silatuup maleruagassiaanik eqqarsaatiginniitigalutik utoqqaanertaqatigiit ataatsimiinnissaannut piareersartarunik. Soorunami tamanna piffissartornartarpoq. Isumaqatigiinngitsoqarpat — soorlu ukiuni hundredelinni siullerni siulersuisoqatigiit kipineqartarneq oqaloqatigiissutigigamikku isumaqatigiinngissimasut — aalajangersimasumut tunngatillugu Guutip oqaasianik tunngaveqartumik tamarmik isumaqatigiilerumallutik piffissaqarnerusariaqarlutillu misissuilluarnerusariaqarsinnaapput. — Apustilit Suliaat 15:2, 6, 7, 12-14, 28.

14. Illit utoqqaanertaqatigiit isumaqatigiillutik suleqatigiinnerat pingaartippiuk? Akissutit tunngavilersoruk.

¹⁴ Utoqqaanertat ilaat qalliuniarpat namminerluunniit isummaminik siuarsaappat qanoq pisoqarsinnaava? Imaluunniit, ukiuni hundredelinni siullerni Diotrefesip pisimaneratut, qatanngutinik isumaqatigiikkunnaarsitsiniaasoqarpat tamanna qanoq kinguneqarsinnaava? (3 Johannesi 9, 10) Qularnanngitsumik ilagiinniittut tamarmik tamanna ajoqutigissavaat. Saatani ukiuni hundredelinni siullerni ilagiinnik akornusersuiniartarmat, qularutiginngilluinnarsinnaavarput ullumikkuttaaq taama iliorumaartoq. Imaassinnaavoq inuit namminissarsioqqajaasuunerannik, soorlu ataqqisaarusussusiannik, atornerluiniartoq. Taamaattumik utoqqaanertat maniguunnermik ineriartortitsisariaqarput ataasiussuseqarlutillu suleqatigiittariaqarlutik. Utoqqaanertat maniguullutik suleqatigiinnerat pingaartingaarparput.

‘Ilitsersuisut’

15. Utoqqaanertat suna kajumississutigalugu qatanngummik oqaaqqissaarisarpat?

¹⁵ Tamatuma kingorna Paulusip utoqqaanertat suliassaat ajornakusoortoq, pingaaruteqartorujussuarli, manna erseqqissarpaa: savaatinik ilitsersuinissaq. Kristumiut Allagaataanni Grækerisuuni apustili Paulusi oqaatsimik grækerisuumik matumani ‘ilitsersuineq’-mik nutserneqarsimasumik atuisutuaavoq. Oqaaseq taanna akeqqersimaarnani oqaaqqissaarinermik isumaqarsinnaavoq. (Apustilit Suliaat 20:31; 2 Thessalonikamiut 3:15) Assersuutigalugu Paulusi Korinthimiunut ima allappoq: “Taama allanngilanga kanngusulersinniarlusi, kisianni qitornattut asasattut ilitsersorniarlusi.” (1 Korinthimiut 4:14) Asannittumik isumassuinini kajumississutigalugu ilitsersuivoq, imaluunniit oqaaqqissaarivoq.

16. Utoqqaanertat oqaaqqissaarigaangamik suna eqqumaffigisarunikku silatusaassappat?

 ¹⁶ Utoqqaanertat qanoq oqaaqqissaareriaaseqarnertik eqqumaffigaat. Paulusip maligassiaanik malinninniartarput inussiarnersuullutillu asannittuullutillu ikiuiumatunermikkut. (Atuakkit 1 Thessalonikamiut 2:11, 12). Soorunami ‘oqaaserineqartut ilumoortut aalajangiussimasarpaat ajoqersuut peqqissinartoq malillugu oqaaqqissaarisinnaaqqullutik’. — Titusi 1:5-9.

17, 18. Illit utoqqaanertamit oqaaqqissaarneqassagaluaruit suna eqqaamassaviuk?

¹⁷ Soorunami utoqqaanertat naammalluinnanngitsuupput kingusinnerusukkullu peqqissimissutigisaminnik oqartoorsinnaallutik. (1 Kunngit 8:46; Jaaku 3:8) Aamma nalunngilaat siunnersorneqarneq qatanngutinut anersaakkut ittunik pingaartitsisunut ‘iluaaginartuusartoq nuannersortaqarnani’. (Hebræerit 12:11) Taamaammat utoqqaanertaq oqaaqqissaariniarluni qatanngummik saaffiginnikkaangami, qularnanngitsumik eqqarsaatiginnilluareernermi qinoreernermilu kingorna taamaaliortarpoq. Illit oqaaqqissaarneqarsimaguit, taava utoqqaanertap asannittumik isumassuilluni taamaaliornera qujamasuutigaajuk?

¹⁸ Takorlooriaruk peqqiilliuuteqalersutit nakorsat nassuiaruminaatsitaannik. Nakorsalli ilaata peqqiilliorninnut pissutaasoq paasivaa, illilli taassuma paasisaa akueriuminaatsippat. Nakorsaq taanna kamaatilissagaluarpiuk? Soorunami naamik! Suliaritinnissat siunnersuutigigaluarpaguluunniit qularnanngitsumik taassuma siunnersuutigisaatut katsorsartinnissannut akuersissagaluarputit, tamatuma ilinnut iluaqutaanerpaanera qularutiginnginnakku. Imaassinnaavoq nakorsap tamakkuninnga ilinnut paasissutisseeriaasia narrujuummissutigigit, tamannali aalajangigassannut sunniuteqartissaviuk? Ilimananngilaq. Taamatuttaaq illit qanoq oqaaqqissaarneqarnerit utoqqaanertanut tusarnaarnissannut akornutaateqinagu, taakkumi atorlugit Jehovap Jiisusillu illit paasitittarpaatsit imminut qanoq ikiorsinnaasutit, imaluunniit anersaakkut imminut qanoq illersorsinnaasutit.

Utoqqaanertaqatigiinnik aaqqissuussaq qujamasuutigiuk

19, 20. Illit “inunnik tunissutaasunik” qujamasuutiginninnerit qanoq ersersissinnaaviuk?

¹⁹ Illit eqqarsaatigalutit sananeqarsimasumik tunissutisisuuguit qanoq iliussagaluarpit? Tunissutisiavit atorneratigut tamatuminnga qujamasuutiginninnerit ersersissagaluarpiuk? Jehovap Jiisusi Kristusi aqqutigalugu illit “inunnik tunissutaasunik” tunivaatit. Tunissutinik taakkuninnga qujamasuutiginninnerit ersersissinnaavat utoqqaanertat saqqummiussaannik oqalugiaataannillu tusarnaaqqissaartarnikkut taakkualu siunnersuutaannik malinninniarnikkut. Aamma qujamasuutiginninnerit ersersissinnaavat ataatsimiinnerni isumaqarluartunik akissuteqartarnikkut. Sulianik utoqqaanertat siuttuuffigisaannik, soorlu oqaluussinermik, tapersersuigit. Utoqqaanertap ilinnut siunnersuutigisimasaa iluaqutigisimagukku, soormi tamanna pillugu taanna oqaluttuukkukku? Tamatuma saniatigut pitsaassaaq utoqqaanertat ilaqutaannik qujamasuutiginninnitsinnik ersersitsigutta. Eqqaamajuk utoqqaanertaq ilagiinni ilungersorluni sulisinnaaniassammat taassuma ilaqutaasa taanna pisarnermittut ilagitigisannginnissaa akuerisaraat.

²⁰ Aap, utoqqaanertat ilungersorlutik akornatsinni sulisut, akornatsinni siulersuillutillu oqaaqqissaarisartut qujamasuutiginissaannut pissutissaqarluarpugut. ‘Inuit tunissutaasut’ taakku Jehovap asannilluni aaqqissuussisimaneranut ilumut ersiutaapput. (w11 06/15-E)

Eqqaamavigit?

• Kristumiut Thessalonikamiittut qatanngutinik akunnerminni siulersuisunik qujamasuutiginninnissamut sunik pissutissaqarpat?

• Utoqqaanertat ilagiinni ilissi najukkassinniittut ilissi pillusi ‘ilungersorlutik qanoq sulippat’?

• Utoqqaanertat ilissinnik siulersuinerat illit nammineq qanoq iluaqutigaajuk?

• Illit utoqqaanertamit oqaaqqissaarneqarsimaguit suna eqqaamasariaqarpiuk?

[Atuaqqissaarnermi apeqqutit]

[Qupp. 26-mi assiliartaq]

Utoqqaanertat ilagiinnik paarseriaasii assigiinngitsorpassuit qujamasuutigisarpigit?