‘Nutonda Awana Befuntukanga Vovo Nwina’
‘Nutonda Awana Befuntukanga Vovo Nwina’
‘Nutonda awana befuntukanga vovo nwina, yo kunusilw’e kiyekwa muna Mfumu, yo kunulukisa.’—1 TES. 5:12.
1, 2. (a) Nkia diambu diabwa muna nkutakani a Tesalonika vava Paulu kabasonekena nkand’andi antete? (b) Paulu adieyi kakasakesa esi Tesalonika mu vanga?
YINDULA vo u mpangi muna nkutakani yantete yasikidiswa muna mbanz’a Tesalonika muna tandu kiantete. Paulu wa ntumwa ntangwa yayingi kaviokesa mu kasakesa ampangi muna nkutakani yayi. Wasola akuluntu bavitang’o ntu, nze una kavanga muna nkutakani zakaka. (Mav. 14:23) Kansi, vava nkutakani yayi yasikidiswa, Ayuda bakubika buka kia yimpumbulu kimana bayinga Paulu ye Sila muna mbanza. Akristu ana basala mo, nanga kinsona yo wonga bamona.
2 Vava Paulu kasisa e mbanz’a Tesalonika, watokana mu kuma kia nkutakani yayi yampa. Wavanga mawonso mu vutuka ko, kansi ‘Satana wakakidila’ ngyend’andi. Muna kuma kiaki, wafila Timoteo kenda kasakesa e nkutakani. (1 Tes. 2:18; 3:2) Vava Timoteo kantwasila nsangu zambote, ediadi diafila Paulu mu soneka nkanda kwa esi Tesalonika. Vana ntandu, Paulu wabakasakesa mu ‘tonda awana bafuntukanga mu kuma kiau.’—Tanga 1 Tesalonika 5:12, 13.
3. Nkia kuma kiasikila bakala kiau Akristu kuna Tesalonika mu zitisa akuluntu?
3 Ampangi ana bavitang’o ntu muna nkutakani ya Tesalonika ke bazaya mayingi ko nze Paulu y’akundi andi a salu, ngatu kala yo umbakuzi wafwana nze akuluntu muna Yerusaleme. Vana ntandu, e nkutakani yayi ke yalungisa mvu mosi ko tukamena yasikidisilwa. Kana una vo i wau, awana bakala muna nkutakani yayi bavutulanga matondo kw’akuluntu ana “bafuntukanga” yo ‘vit’o ntu’ muna ‘ludika’ ampangi muna nkutakani. Kieleka, bakala ye kuma kiasikila mu ‘zitisa kikilu [akuluntu] yo kubasonga o zola.’ Paulu wakudikila vo ‘bakadila kuna ungudi muntu yo nkw’andi.’ Kele vo wakala muna nkutakani ya Tesalonika, nga wadi songa luyangalalu muna salu basalanga akuluntu? Aweyi obadikilanga ‘tukau twa wantu’ kevananga Nzambi muna nkutakani aku muna lusadisu lwa Kristu?—Ef. 4:8.
“Befuntukanga”
4, 5. Ekuma akuluntu muna lumbu ya Paulu bafuntukilanga mu longa ampangi muna nkutakani? Ekuma bevangilanga diau adimosi o unu?
4 Vava Paulu yo Sila bayenda kuna mbanz’a Beroya, aweyi akuluntu muna Tesalonika ‘bafuntukilanga?’ Muna tanginina Paulu, akuluntu basadilanga Diambu dia Nzambi muna longa e nkutakani. Nanga lenda kiyuvula vo: ‘Nga Akristu muna Tesalonika basonganga luyangalalu muna Diambu dia Nzambi?’ Nkand’a Nzambi uvovanga vo esi Beroya “basundidi o luzitu ke mu awana bena muna Tesalonika ko, . . . e lumbu yawonso bafimpidinge e sono.” (Mav. 17:11) Muna mvovo miami, Paulu Ayuda awonso esi Tesalonika kayika, ke Akristu ko. Kadi, awana bakituka Akristu, ‘batambula Diambu dia Nzambi, ke nze diambu dia wantu ko, kansi nze diambu dia Nzambi kaka.’ (1 Tes. 2:13) Ka lukatikisu ko vo akuluntu bafuntukanga muna longa ampangi muna nkutakani.
5 O unu, ntaudi akwikizi ye lulungalalu ovananga “madia muna ntangw’andi” kw’ekambi dia Nzambi. (Mat. 24:45) Muna lusadisu lwa ntaudi yayi, akuluntu befuntukanga mu dikila mpangi zau muna mwanda. Ampangi muna nkutakani, bavwidi ulolo wa nkanda misasilanga Nkand’a Nzambi. Muna ndinga zakaka bavwidi nkanda nze Índice das Publicações da Torre de Vigia ye Watchtower Library mu CD-ROM. Muna lungisa e nsatu za mwanda za nkutakani, akuluntu ntangwa yayingi bevaulanga mu kubika malongi ma tukutakanu kimana bafila mo mu mpila yambote. Nga wayindula kala mu kuma kia ntangwa akuluntu bevaulanga mu kubika malongi mevewanga mu tukutakanu twakete ye twampwena?
6, 7. (a) Aweyi Paulu kakadila se mbandu ambote kuna kw’akuluntu muna Tesalonika? (b) Ekuma dilenda kadila diampasi kw’akuluntu mu tanginina Paulu o unu?
6 Akuluntu kuna Tesalonika basungamenanga mbandu ambote kasisa Paulu muna mpila kavungulwilanga ekambi. Wavanganga wo kuna mvevo wawonso lembi komekenwa. Nze una twalongokele mun’elongi diavioka, Paulu ‘wakala yo lulembamu . . . , nze ndezi iwonzakene wan’andi.’ (Tanga 1 Tesalonika 2:7, 8.) Wazola mpe ‘kawulwila’ moyo andi mu kuma kia mpangi zandi. Akuluntu bafwete tanginina mbandu andi vava bevungulanga ekambi.
7 Avungudi Akristu o unu betangininanga Paulu muna lunga-lunganga ekambi. Vena ye mameme ke belendanga kala akwa ngemba ko. Kana una vo i wau, akuluntu besianga ngolo mu kadila yau kuna umbakuzi yo ‘solola edi diambote’ muna yau. (Nga. 16:20) Wau vo tu asumuki, nkuluntu olenda tá esakuba mu mpila kebadikilanga akaka. Kansi, nga kalendi tondwa ko mu ngolo kesianga mu kala mvungudi ambote muna mfil’a Kristu?
8, 9. Mu nkia mpila akuluntu o unu ‘beyingidilanga mu kuma kia mioyo mieto’?
8 Yeto awonso tuna ye kuma mu ‘sakalela’ akuluntu. Nze una kasoneka Paulu, akuluntu ‘beyingilanga mu kuma kia mioyo mieto.’ (Ayib. 13:17) O mvovo wau ukutusungamesanga o mvungudi, ona olembi lekanga kimana katanina ekambi diandi. Diau adimosi mpe, ezak’e ntangwa akuluntu o unu ke belekanga ko ekolo belungisanga e nsatu z’awana bena ye kimbevo yovo ye nkakalakani mu sadila nkanikinu mia Nkand’a Nzambi. Kasikil’owu, ampangi besadilanga muna Comissões de Ligação com Hospitais, ezak’e ntangwa besikameswanga mu singika diambu mu kuma kia mpangi una kuna lupitalu. Kieleka, tuyangalelanga e salu besalanga vava tunwananga ye mambu mama.
9 Akuluntu bena muna Comissões Regionais de Construção ye buka kia vana lusadisu kw’awana bebwilwanga e sumbula, befuntukanga mu sadisa ampangi. Diamfunu kikilu twabavananga e moko. Badika e ngolo bavanga ampangi vava tembwa kiangolo kiayikilwa vo Nargis, kiakala kuna Myanmar muna mvu wa 2008. Muna lwaka kuna nkutakani ya Bothingone kuna Irrawaddy Delta, ampangi muna buka kia asadisi bakangala muna zunga kiafwasakana kiazala ye mavimbu ma wantu. Vava ampangi ana babwila sumbula bamona e buka kiantete kialwaka kun’evata dia Bothingone kumosi yo nkengi a zunga, bavova vo: “Nutala nkengi a zunga kieto wizidi! Yave utuvulwizi.” Nga oyangalelanga e salu kiangolo besalanga akuluntu fuku yo mwini? Akuluntu akaka besolwanga mu fundisa mambu mampasi mebwanga muna nkutakani zakaka. Akuluntu awaya ke bekuyisananga ko mu kuma kia dina bevanganga. Kansi, awana betambulanga lusadisu lwau bevutulanga matondo mu kuma kia salu kiau.—Mat. 6:2-4.
10. Nkia salu yakaka besalanga akuluntu?
10 Akuluntu ayingi mpe o unu besalanga e salu kia soneka mambu. Kasikil’owu, mfidi a buka kia akuluntu osonekanga programa za tukutakanu konso lumingu. O nsoneki a nkutakani osonekanga e nsangu za salu kia umbangi mu konso ngonde ye konso mvu. Mfidi a sikola otoma sianga e sungididi muna nkubika za sikola. Muna konso ngonde tatu, akuluntu bevanganga mbalu wa nzimbu za tukau twa nkutakani. Akuluntu betanganga e nkanda mitukanga kun’evula yo sadila luludiku lukubasadisanga mu kwamanana kala “muna untwadi wa lukwikilu.” (Ef. 4:3, 13) Mu kuma kia ngolo besianga akuluntu awaya, ‘mambu mawonso, mevangilwanga muna nsongi yo wete.’—1 Kor. 14:40.
“Kunusilw’e Kiyekwa”
11, 12. Aki nani befilanga e nkutakani? Adieyi divavanga muna wo vanga?
11 Paulu wayikila akuluntu ana basalanga kwayingi kuna Tesalonika vo ‘ana basiwa kiyekwa’ muna nkutakani. Muna Kingerekia, e mvovo wau una ye nsasa vo “telama vana ndose ya.” Ulenda mpe sekolwa vo “fila; vit’o ntu vana vena.” (1 Tes. 5:12) Wavova diaka vo akuluntu awaya funtuka “befuntukanga.” Paulu kayika kaka nkuluntu mosi ko, kansi wayika akuluntu awonso muna nkutakani. O unu, akuluntu ayingi betelamanga vana ndose a nkutakani mu fila malongi. E nkubika yampa ya sadila o mvovo “mfidi a buka kia akuluntu” ikutusadisanga mu badikila akuluntu awonso nze wantu besalanga entwadi mu buka kimosi.
12 Mayingi mevavwanga muna ‘fila’ e nkutakani ke longa kaka ko. O mvovo ‘fila’ una ye nsasa imosi yo mvovo ‘ludika’ una wasadilwa muna 1 Timoteo 3:4. Muna sono kiaki Paulu wavova vo o mfidi kafwete ‘toma ludikanga nzo a yandi kibeni, wina yo wan’andi alemvo yo zitu.’ O mvovo “ludikanga” wasadila mu sono kiaki ke uyikanga kaka longa wana ko kansi uyikanga mpe fila esi nzo yo ‘kala yo wana belemvokanga.’ Elo, akuluntu bevitang’o ntu muna nkutakani yo sadisa ampangi basakalela Yave.—1 Tim. 3:5.
13. Ekuma divavanga vo akuluntu bavaula ntangwa yayingi muna bak’e nzengo muna lukutakanu lwau?
13 Muna toma fila ekambi, akuluntu bemokenanga mambu mavwilu o mfunu muna nkutakani ye una balenda sadisila e nkutakani. Ke dilendi twasa nluta miambote ko kele vo nkuluntu mosi kaka obakanga e nzengo zawonso. Elo, muna landanga e mbandu a selo yambuta muna tandu kiantete, buka ki’akuluntu o unu besongaziananga e ngindu yo landa luludiku lwa Nkand’a Nzambi. Ekani diau i lemvokela nkanikinu mia Nkand’a Nzambi muna lungisa e nsatu za nkutakani. Ediadi ditwasanga nluta vava konso nkuluntu kekubamanga vitila kenda ku lukutakanu lw’akuluntu yo badika sono ya Nkand’a Nzambi ye luludiku bevewanga kwa buka kia ntaudi akwikizi yo lulungalalu. Kieleka, ediadi ntangwa yayingi divavanga. Vava bekalanga ye ngindu zaswaswana, nze una diavangama muna tandu kiantete vava selo Yambuta babadikanga e diambu dia zengwa, akuluntu bevaulanga e ntangwa mu vavulula yo bak’e nzengo zina ngwizani ye Nkand’a Nzambi.—Mav. 15:2, 6, 7, 12-14, 28.
14. Nga oyangalalanga wau vo e buka ki’akuluntu besalanga kumosi kuna ungudi? Ekuma?
14 Adieyi dilenda bwa avo nkuluntu mosi ozolele vangila mambu muna mpil’andi yovo komekena ngindu zandi kw’akaka? Adieyi tuvova avo vena ye nkuluntu nze Dioterefe muna tandu kiantete, ona wakala ye fu kia fila e mpaka? (3 Yoa. 9, 10) Ampangi zawonso muna nkutakani mpasi bemona. Avo Satana wavava fwasa nkutakani a tandu kiantete, o unu mpe tulenda kala ye ziku vo ozolele fwasa luvuvamu lweto muna nkutakani. Olenda sadila zolele yeto ya nitu, nze luzolo lwa kala ye tunda. Muna kuma kiaki, akuluntu bafwete songanga lulembamu yo sala kumosi nze yikwa ya to kimosi. Kieleka, tuyangalelanga lulembamu besonganga akuluntu besalanga kumosi nze to kimosi.
‘Bekunulukisanga’
15. Akuluntu nki’ekani bekalanga diau vava belukisanga mpangi eyakala yovo ankento?
15 I bosi, Paulu wayika salu kiampasi besalanga akuluntu, kansi kiamfunu kikilu: lukisa ekambi. Muna Sono ya Kingerekia ya Kikristu, Paulu kaka wasadila mvovo wasekolwa vo ‘temwenwa’ yovo lukisa. Una ye nsasa vo ludika, ke tumba ko. (Mav. 20:31; 2 Tes. 3:15) Kasikil’owu, Paulu wasonekena Akristu kuna Korinto vo: “Omama, kisonekene mo yanufusula nsoni ko, temwena kaka inutemonwene, nze wan’ame anzolwa.” (1 Kor. 4:14) Wabalukisa kadi wete diau katokanenanga.
16. Akuluntu nkia diambu bafwete sungamenanga vava belukisanga akaka?
16 Akuluntu besungamenanga ekani ye mpila ina belukisilanga ampangi. Besianga e ngolo mu tanginina fu ya Paulu nze zola, ngemba yo luzolo lwa sadisa akaka. (Tanga 1 Tesalonika 2:11, 12.) Kieleka, akuluntu ‘betatidilang’e diambu diakwikizi kimana bakala y’owu wa wondelelela mun’elongi diavimpi.’—Tito 1:5-9.
17, 18. Adieyi ofwete sungamena vava ovewanga elongi kwa nkuluntu?
17 Dialudi vo akuluntu wantu alembi lunga, ezak’e ntangwa balenda vova diambu dilenda kubafila mu kuyibanza. (1 Nti. 8:46; Yak. 3:8) Akuluntu bazeye wo mpe vo kuna kwa mpangi z’akala ye z’akento, otambula elongi ezak’e ntangwa ke ‘dikalanga dia kiese ko, dia ntantu kaka.’ (Ayib. 12:11) Muna kuma kiaki, vitila nkuluntu kalukisa mpangi, oteka badikanga e diambu diadi yo samba. Vava ovewanga elongi kwa nkuluntu, nga osonganga luyangalalu muna zola kekusonganga?
18 Yindula vo obakamene kimbevo kansi ke kizayakene ko. I bosi, dotolo dimosi osolwele kimbevo kiaki, kansi nlongo miandi miampasi mu nua mio. Nga ofungila dotolo makasi? Ve. Kana nkutu uvovese vo wapasulwa, tonda otonda dio, kadi una ye vuvu vo wete diaku kazolele. E mpila dotolo kekuvovesela nanga ilenda kukendeleka, kansi nga oyambula vo e mvovo miandi miasoba e nzengo zaku? Ve kikilu! Diau adimosi mpe, kuyambwidi ko vo e mpila ina akuluntu bavanini elongi yasimba mu lembi wila awana Yave yo Yesu besadilanga mu kusadisa watatidila e ngwizani aku yo Yave.
Yangalela Nkubika Kavanga Yave ya Akuluntu
19, 20. Aweyi olenda songela luyangalalu muna ‘tukau twa wantu’?
19 Adieyi olenda vanga avo otambwidi lukau lwamfunu? Osonga luyangalalu lwaku muna toma lo lunga-lunga. O Yave muna Yesu Kristu wavana ‘tukau twa wantu.’ Imosi muna mpila olenda songela luyangalalu lwaku muna tukau twatu, i toma tambang’o matu muna malongi befilanga akuluntu yo sadila mana belonganga. Olenda mpe songa luyangalalu lwaku muna vananga mvutu za lukasakeso muna tukutakanu. Yikamanga akuluntu ekolo bevitang’o ntu muna salu kia umbangi. Avo nkuluntu uvene elongi ditwasidi e nluta, ekuma olembi kunzayisila wo? Vana ntandu, ekuma olembi songela luyangalalu lwaku kwa esi nzo ya nkuluntu? Sungamena dio vo, vava nkuluntu kesalanga kwayingi muna wete dia nkutakani, esi nzo andi ntangwa bekumvananga muna lungisa kiyekwa kiandi.
20 Kieleka, tuvwidi kuma yayingi muna songa luyangalalu kw’akuluntu ana befuntukanga mu kuma kieto, bekutufilanga yo kutuludika. Akuluntu bena vo ‘tukau twa wantu’ i nkubika isonganga o zola kwa Yave.
Nga Osungamene?
• Nkia kuma bakala kiau Akristu kuna Tesalonika mu songa luyangalalu lwau kw’awana bavitang’o ntu?
• Akuluntu a nkutakani aku aweyi befuntukilanga mu kuma kiaku?
• Nkia nluta obakanga kw’akuluntu ana bekufilanga?
• Avo nkuluntu uvene elongi, nkia diambu ofwete sungamena?
[Yuvu ya Longoka]
[Mvovo mia Fwaniswa mina muna lukaya lwa 27]
Nga osonganga luyangalalu
muna mpila ina akuluntu
bevungulwilanga e nkutakani?
