Mu Kuteke Ba Ba Sebeza Ka Taata Mwahalaa Mina

“Mu zibe ba ba sebeza ku mina, ba ba mi zamaisa ku Mulena ni ku mi eleza.”—1 MATES. 5:12.

1, 2. (a) Ki muinelo mañi o ne ba li ku ona ba mwa puteho ya Tesalonika muta Paulusi naa ba ñolezi liñolo la pili? (b) Paulusi naa susuelize Matesalonika kuli ba ezeñi?

MU NGE kuli mu ba bañwi ba puteho ya mwa Tesalonika, ili ye ñwi ya liputeho za pili ze ne tomilwe mwa Europe. Muapositola Paulusi naa tandile nako ye ñata inzaa yaha mizwale ba mwa puteho yeo. Mwendi naa ketile baana-bahulu kuli ba etelele, sina mo ku ezezwa mwa liputeho ze ñwi. (Lik. 14:23) Kono puteho ha se i tomilwe, sikwata sa Majuda sa lwanisa Paulusi ni Silasi kuli ba tunuhe mwa munzi. Bakreste be ne ba siyezi mwendi ne ba ikutwile kuli ne ba yubekilwe, kamba mane ne ba sabile hahulu.

² Paulusi ha sa zwile mwa Tesalonika, naa iyakatwile za puteho ye ne sa zo tomwa mwateñi. Naa likile ku kutela kwateñi, kono Satani naa mu “hanisize.” Kabakaleo, a lumela kwateñi Timotea kuli a yo tiisa puteho yeo. (1 Mates. 2:18; 3:2) Timotea ha naa bulezi ze nde ka za puteho yeo, Paulusi a ñolela Matesalonika liñolo. Mwa liñolo leo, Paulusi naa ba susuelize kuli ba kuteke ‘be ne ba ba zamaisa.’—Mu bale 1 Matesalonika 5:12, 13. *

3. Ki kabakalañi Bakreste ba mwa Tesalonika ha ne ba swanela ku kuteka hahulu baana-bahulu?

³ Mizwale be ne ba etelela mwahalaa Bakreste ba kwa Tesalonika ne ba si na yeloseli ya naa na ni yona Paulusi ni basindeketi ba hae, mi ne ba sa swani ni maeluda ba kwa Jerusalema  kakuli bona ne ba sa li ba banca mwa tumelo. Mane silimo ne si si ka kwana kale ku zwa fo ne i tomezwi puteho ya bona! Nihakulicwalo, ba mwa puteho yeo ne ba swanela ku itumela kabakala baana-bahulu be ne ba “sebeza ka taata,” ku “zamaisa” puteho, ni ku “eleza” mizwale. Mi ne ba swanela ku ‘kuteka hahulu maeluda, ka lilato.’ Paulusi a mano ba kupa kuli ba eze cwalo, a ba eleza kuli ba “pilisane mwa kozo.” Kambe ne mu li teñi mwa Tesalonika, kana ne mu ka bonisa buitumelo kabakala musebezi o ne ba eza maeluda? Mu nga cwañi baana ba ba li “limpo” ba mi file Mulimu mwa puteho ya mina ka Kreste?—Maef. 4:8.

“Ba ba Sebeza ka Taata”

4, 5. Ki kabakalañi baana-bahulu ba mwa miteñi ya Paulusi ha ne ba tokwa ku sebeza ka taata, mi ki kabakalañi maeluda ha ba tokwa ku eza cwalo kacenu?

⁴ Baana-bahulu ba mwa Tesalonika ne ba sebeza cwañi ka taata ba mano lumela Paulusi ni Silasi kwa Berea? Ku bonahala kuli ne ba lutanga puteho ka ku itusisa Mañolo, sina mwa naa ezezanga Paulusi. Kana Bakreste ba mwa Tesalonika ne ba lata hahulu Linzwi la Mulimu? Bibele i bulela kuli batu ba mwa Berea “ne ba na ni lipilu ze nde ku fita ba ba mwa Tesalonika . . . mi [ne] ba batisisa mwa Mañolo, ka mazazi kaufela.” (Lik. 17:11) Fo kikuli, ne ba shutana ni Majuda ba bañata ba mwa Tesalonika, isiñi Bakreste. Matesalonika be ne ba bile balumeli ‘ne ba amuhezi Linzwi la Mulimu, isi sina linzwi la mutu, kono sina Linzwi la Mulimu.’ (1 Mates. 2:13) Kacwalo, ku bonahala kuli baana-bahulu ne ba sebelize ka taata kuli ba lute puteho.

⁵ Kacenu sitopa sa mutanga ya sepahala, ya na ni kutwisiso si fanga mutapi wa Mulimu “lico ka nako ye lukela.” (Mat. 24:45) Maeluda ba sebezanga ka taata ku fepa mizwale ba bona kwa moya, ka ku latelela zamaiso ya sitopa sa mutanga. Ba bañwi mwa puteho ba na ni lihatiso ze ñata ze tomile fa Bibele, ze cwale ka buka ya Watch Tower Publications Index ni Watchtower Library ye fa CD-ROM ili ze fumaneha mwa lipuo ze ñwi. Maeluda ba itukisezanga likalulo za mikopano ka nako ye ñata ilikuli ba kone ku luta hande puteho. Kana mu kile mwa nahana ka za nako ye ba tandanga maeluda kuli ba itukiseze likalulo za bona za mikopano ya puteho, ya mipotoloho, ni ya likiti?

6, 7. (a) Paulusi naa tomezi baana-hahulu ba mwa Tesalonika mutala o cwañi? (b) Ki kabakalañi ha ku kona ku ba taata kuli maeluda ba likanyise Paulusi?

⁶ Baana-bahulu ba mwa Tesalonika ne ba hupuzi mutala o munde wa naa tomile Paulusi ka ku lisa mutapi. Naa sa ezangi cwalo ka ku ikapeleza. Mwa taba ye felile ne lu itutile kuli Paulusi naa bile “ni musa . . . sina muanyisi mwa babalelela bana ba hae ka lilato.” (Mu bale 1 Matesalonika 2:7, 8.) Mane naa lata ‘ku ba fa bupilo bwa hae’! Baana-bahulu ne ba swanela ku mu likanyisa ha ne ba lisa mutapi.

⁷ Balisana ba Sikreste kacenu ba swanela ku likanyisa Paulusi ka ku lata mutapi. Lingu ze ñwi li kona ku ba ze kuzize. Kono maeluda ba likanga ku li utwisisa ni ku fumana ze nde ku zona. Kaniti bakeñisa kuli maeluda ha ba si ka petahala, ku kona ku ba bela taata ku bona bunde bo i na ni ngu ni ngu. Kono ba lukelwa ku babazwa ha ba nze ba lika ku ba ni musa kwa lingu kaufela, kuli ba be balisana ba bande ba ba ipeya kwatasaa Kreste.

8, 9. Ki lifi linzila ze ñwi zeo maeluda ‘ba tonela mioya ya luna’ ka zona?

⁸ Kaufelaa luna lwa swanela ku “ipeye kwatasaa” maeluda. Paulusi naa ñozi kuli ‘ba tonela mioya ya luna.’ (Maheb. 13:17) Manzwi ao a lu hupulisa mulisana ya tona busihu kuli a sileleze mutapi wa hae. Kamukwaoswana, maeluda fokuñwi ha ba bonangi hande buloko bakeñisa ku bata ku tusa ba ba kula kamba ba ba lembwalile kamba ba ba palelwa ku sebelisa likuka za Bibele.  Ka mutala, mizwale ba ba mwa Tutengo Twa Kutwano ni ba Sipatela ba zusiwanga fa buloko kuli ba tuse ba ba mwa butata. Lu itumela hahulu ku bona kabakala ze ba lu ezeza ha lu li mwa miinelo ye cwalo!

⁹ Maeluda ba ba talima za ku yahiwa kwa Mandu A Mubuso ni ba ba mwa tutengo to tuñwi ba sebezanga ka taata kuli ba tuse mizwale. Lu swanela ku ba tusa ka lipilu za luna kaufela. Ha mu kengeyele musebezi o no ezizwe wa ku tusa batu ba mwa Myanmar hamulaho wa sinyeho ye ne tisizwe ki liñungwa le lituna mwa 2008. Sikwata za batusi ne si pululelize mwa libaka mo ne ku tanakani litupu kuli si kone ku yo fita mwa sibaka se ne si sinyizwe hahulu mo ku fumaneha Puteho ya Bothingone. Mizwale ba mwa sibaka seo ha ne ba boni kuli mwa sikwata sa pili sa batusi ne ku na ni muzwale ya naa banga muokameli wa mupotoloho wa bona, ba kalumuka, ba li: “A mu bone! Ki muokameli wa mupotoloho wa luna! Jehova u lu pilisize!” Kana mwa itumela kabakala musebezi o ba eza maeluda busihu ni musihali? Maeluda ba bañwi ba banga mwa tutengo to tu ipitezi to tu talimanga litaba ze taata za buatuli. Maeluda bao ha ba ikuhumusangi kabakala ze ba petile, kono ba ba tusiwa ki bona ba itumelanga hahulu.—Mat. 6:2-4.

10. Ki musebezi ufi o ba ezanga maeluda o sa bonwangi ki puteho?

¹⁰ Maeluda ba bañata kacenu ba ezanga musebezi wa ku ñola-ñola. Ka mutala, muswalisanisi wa sitopa sa maeluda u lukisanga tomahanyo ya mikopano ya mwa sunda ni sunda. Muñoli wa puteho u kopanyanga lipiho za kweli ni za silimo za sebelezo ya mwa simu. Muokameli wa sikolo u nahanisisanga za mwa ku abela likalulo za mwa tomahanyo ya sikolo. Hamulaho wa likweli ze talu, ze ñozwi ze ama mali a puteho za tatubiwanga. Maeluda ba balanga mañolo a zwa kwa ofisi ya mutai mi ba latelelanga ze ñozwi ku ona ilikuli ba zwisezepili “buñwi bwa tumelo.” (Maef. 4:3, 13) Buikatazo bo ba eza maeluda bao bu tahisa kuli “linto kaufela li ezwe ka swanelo, ni ka mulao.”—1 Makor. 14:40.

“Ba ba mi Zamaisa”

11, 12. Ki bo mañi ba ba zamaisa puteho, mi ba i zamaisanga cwañi?

¹¹ Paulusi naa bulezi kuli baana-bahulu ba mwa Tesalonika ne ba “zamaisa” puteho. (1 Mates. 5:12) Hape naa talusize kuli maeluda ba ba swana bao ne ba “sebeza ka taata.” Naa sa buleli ka za “muokameli ya zamaisa” a li muñwi kono naa bulela ka za baana-bahulu kaufela ba mwa puteho. Kacenu maeluda ba bañata ba yemanga fapilaa puteho ni ku zamaisa mikopano. Muokameli ya zamaisa cwale sa bizwa “muswalisanisi wa sitopa sa maeluda.” Cinceho ye sa zo eziwa yeo i lu tusa ku lemuha kuli maeluda kaufela ki lilama za sitopa si li siñwi.

¹² Ku “zamaisa” puteho ha ku talusi feela ku i luta. Linzwi la ku “busa” le li itusisizwe kwa 1 Timotea 3:4 ni linzwi la ku “zamaisa” li talusa nto ye swana. Paulusi naa bulezi kuli muokameli u swanela ku “busa ba ndu ya hae hande, a utwiwe ki bana ba hae, ba be ni kutwisiso.” Linzwi leo la ku “busa” li bonisa kuli muuna u swanela ku luta bana ba hae ni ku ba etelela mi bona ba swanela ku mu ‘utwa.’ Kaniti, maeluda ba zamaisanga puteho ka ku tusa bote kuli ba utwe Jehova.—1 Tim. 3:5.

13. Ki kabakalañi ha ku kona ku nga nako kuli maeluda ba eze katulo ha ba kopani hamoho?

¹³ Kuli maeluda ba zamaise hande mutapi, ba ikambotanga ka za butokwi bwa puteho ni ka mo ba kona ku i tuseza. Ku kona ku bonahala hande eluda a li muñwi ha naa ka ezanga likatulo kaufela. Kono maeluda ba latelelanga mutala wa sitopa se si etelela sa mwa miteñi ya baapositola ka ku ikambota litaba inze ba batisisa mwa Mañolo. Mulelo wa bona ki wa kuli ba latelele likuka za mwa Mañolo  ha ba nze ba ambola ka za butokwi bwa puteho. Mulelo wo u ka petiwa hande haiba eluda ni eluda a itukisezanga mikopano ye ba banga ni yona maeluda ka ku nyaka Mañolo ni litaelo ze zwa kwa sitopa sa mutanga ya sepahala, ya na ni kutwisiso. Ku eza cwalo ku nganga nako. Haiba maeluda ba sa lumelelani ka za taba ye ñwi, sina mo ne ku ezahezi mwahalaa sitopa se si etelela sa mwa miteñi ya baapositola ha ne si nyaka taba ya mupato, ba tokwa ku eza lipatisiso ze ekezehile kuli ba fite fa tumelelano ye tomile fa Mañolo.—Lik. 15:2, 6, 7, 12-14, 28.

14. Kana mwa tabanga ha mu bona sitopa sa maeluda inze si sebelisana hamoho? Ki kabakalañi ha mu ikutwa cwalo?

¹⁴ Ku kona ku ezahalañi haiba eluda a li muñwi a tundamena kuli lika li ezwe ka mwa latela kamba haiba a ñañelela fa mihupulo ya hae, kamba haiba a tisa lifapano sina mwa naa ezelize Diotrefi? (3 Joa. 9, 10) Puteho mukatumbi i ka ba mwa butata. Haiba Satani naa likile ku ngundunganya puteho ya mwa miteñi ya baapositola, u zibe u bata ku tisa lifapano mwa puteho kacenu. U kona ku lu susueza kuli lu latelele litakazo za butu, ze cwale ka ku bata ku ipahamisa. Kabakaleo, maeluda ba swanela ku ba ni buikokobezo ni ku sebelisana hamoho sina sitopa si liñwi. Lu tabiswa hahulu ki buikokobezo bo ba bonisa maeluda ha ba nze ba swalisana hamoho sina sitopa si li siñwi!

Ba ba mi “Eleza”

15. Ki kabakalañi maeluda ha ba elezanga mizwale ni likaizeli?

¹⁵ Paulusi hape naa koñomekile musebezi o taata kono ili o butokwa o ba na ni ona  baana-bahulu—ona wa ku eleza mutapi. Ku eleza ha ku talusi ku hanyaukela ba bañwi. (Lik. 20:31; 2 Mates. 3:15) Ka mutala, Paulusi naa ñolezi Makorinte kuli: “Ha ni ñola zeo hasi ku mi swabisa, kono ki ku mi lemusa [“ku mi eleza,” NW] sina bana ba ka, ba ba latwa.” (1 Makor. 4:14) Paulusi naa ba elelize bakeñisa kuli naa ba lata.

16. Maeluda ba swanela ku ezangañi ha ba eleza ba bañwi?

¹⁶ Maeluda ba lukela ku nahanisisanga mo ba eleleza ba bañwi. Ba swanela ku ikataza ku likanyisa Paulusi ka ku tusa ba bañwi ni ku ba eza ka musa ni ka lilato. (Mu bale 1 Matesalonika 2:11, 12.) Kono ha ba nze ba eza cwalo, ba tokwa ku ‘kumalela tuto ya niti kuli ba kone ku kutaza ka tuto ye pilisa.’—Tite 1:5-9.

17, 18. Mu swanela ku hupulangañi ha mu elezwa ki eluda?

¹⁷ Kaniti, maeluda ha ba si ka petahala mi ba kona ku bulela lika ze ba kona ku inyaza ka zona hasamulaho. (1 Mal. 8:46; Jak. 3:8) Maeluda hape ba ziba kuli mizwale ni likaizeli ha ba elezwa, ha ba bangi ni tabo kono ba utwanga maswabi. (Maheb. 12:11) Kacwalo eluda ha eleza muzwale kamba kaizeli, u ezanga cwalo ha sa kengeyezi ni ku lapela ka za teñi. Haiba ne mu elelizwe ki eluda, kana mwa itumela ku yena bakeñisa kuli naa iyakatwa mina?

¹⁸ Mu nge kuli mu na ni butuku bo bu sa zibwi. Cwale mualafi yo muñwi u fumana butuku bo mu kula, kono za mi taluseza ka za butuku bo li taata ku li lumela. Kana mu ka nyemela mualafi yo? Batili! Niha ka mi taluseza kuli mu tokwa ku pazulwa, mu ka lumela ku pazulwa ka sepo ya kuli mu ka tuseha. Mi haiba mualafi a mi sitatalisa ka mwa mi taluseza butuku bo mu kula, ha mu na ku hana ku eza za mi bulelela. Kamukwaoswana, mu si ke mwa hana ku teeleza kwa maeluda kabakala mo ba mi eleleza, kakuli ba konwa ku itusiswa ki Jehova ni Jesu kuli ba mi taluseze mo mu kona ku ituseza kuli mu eze zwelopili mwa niti kamba ku bukeleza bulikani bwa mina ni Jehova.

Mu Itumele ku Jehova Kabakala Maeluda ba mi File

19, 20. Mu kona ku bonisa cwañi buitumelo bwa mina kwa baana ba ba li “limpo”?

¹⁹ Mu kona ku ezañi haiba mu fiwa mpo ye lukiselizwe mina? Kana mu ka bonisa buitumelo bwa mina ka ku itusisa yona? Jehova u mi file baana ba ba li “limpo” ka Jesu Kreste. Ye ñwi ya linzila ze mu kona ku bonisa ka zona buitumelo bwa mina ki ka ku teeleza ka tokomelo kwa lingambolo ze ba fanga maeluda ni ku sebelisa lisupo ze ba bulela. Hape mwa kona ku bonisa buitumelo bwa mina ka ku fa likabo ze nde kwa mikopano. Mu tusange mwa misebezi ye ba etelela maeluda, ye cwale ka musebezi wa ku kutaza. Haiba ne mu tusizwe ki kelezo ya naa mi file eluda yo muñwi, mu mu taluseze mo ne mu tuselizwe. Mi mwa kona ku bonisa buitumelo bwa mina kwa mabasi a maeluda. Kakuli eluda ha nzaa sebeleza puteho ka taata, lubasi lwa hae lu itombola nako ye lu swanela ku ina ni yena.

²⁰ Kaniti lwa swanela ku itumela kwa maeluda ba ba sebeza ka taata mwahalaa luna, ba ba lu zamaisa, ni ku lu eleza. Batu bao kaniti ni limpo ze zwa ku Jehova ya lilato!

[Litaluso za kwatasi]

Kana Mwa Hupula?

• Ki kabakalañi Bakreste ba mwa Tesalonika ha ne ba swanela ku itumela ku be ne ba etelela mwahalaa bona?

• Maeluda ba mwa puteho ya mina ba mi sebeleza cwañi?

• Mu tusiwa cwañi ki maeluda ba ba mi zamaisa?

• Mu lukela ku hupulañi ha mu elezwa ki eluda?

[Lipuzo za Tuto]

[Siswaniso se si fa likepe 27]

Kana mwa itumela kwa maeluda kabakala mo ba liseza puteho?