“Lemekai Boba Baputumina mu Mīngilo Umbukata Mwenu”

“Lemekai boba baputumina mu mīngilo umbukata mwenu, bakwimulelela mudi Mfumwetu, ne kwimudingila madingi.”—1 TES. 5:12.

1, 2. (a) Le kipwilo kya mu Tesalonika kyādi mu ngikadilo’ka kitatyi kyēbalembele Polo mukanda wandi umbajinji? (b) Lelo Polo wākankamikile Bene Tesalonika balonge bika?

LANGA’PO shi wādi’ko mu kipwilo kya mu Tesalonika kya mu myaka katwa kabajinji, kimo kya mu bipwilo bibajinjibajinji kushimikwa mu Bulaya. Mutumibwa Polo wāpityije’ko kitatyi kivule ukankamika banabetu. Ye uno wātongele’ko ne bakulumpe ba kutangidila, na mwaādi ulongela mu bipwilo bikwabo. (Bil. 14:23) Ino kipwilo pa kupwa’tu kushimikwa, Bayuda batununa kibumbo mwanda wa kupanga ba Polo ne Shilasa mu kibundi. Bene Kidishitu bāshele i bano baivwene bulanda, padi ne kukwatwa moyo.

² Monka mobyendele, Polo pa kutamba mu Tesalonika, wādi ulangalanga pa kino kipwilo kikishilulashilula. Wādi usaka kujokela’ko, ino ‘Satana wēbakankaja.’ Penepo wātuma Temote kukakankamika kipwilo’kya. (1 Tes. 2:18; 3:2) Temote paājokele na myanda milumbuluke, Polo wākunkwa mutyima alembele Bene Tesalonika mukanda. Mu bintu byāebalembele, Polo wēbakankamikile’mo ne ‘kulēmeka boba baputumina mu mīngilo umbukata mwabo.’—Tanga 1 Tesalonika 5:12, 13.

3. Lelo Bene Kidishitu ba mu Tesalonika bādi na bubinga’ka bwa kutumbika pakatampe pene bakulumpe?

³ Batutu bādi batangidile Bene Kidishitu ba mu Tesalonika kebādipo na bwino na bwa Polo ne bapwani nandi bobādi bendakana nabo; kadi bādi kebayukile bivule pamo  bwa bakulumpe ba mu Yelusalema. Bidi na buluji, kipwilo kyādi kekyabwenye nansha mwaka umo mwine! Nansha nabya, boba ba mu kipwilo bādi na bubinga bwa kufwija’ko bakulumpe babo, bādi “baputumina mu mīngilo” ne ‘kulela’ kipwilo ne ‘kudingila madingi’ banababo. Bine, bādi na bubinga bwa ‘kutumbika bakulumpe pakatampe pene mu buswe.’ Pa kupwa, Polo wābweja’ko madingi amba: “Pwanai ne bānwe bene na bene.” Shi nobe wādi mu Tesalonika, le wādi wa kufwija’ko mpata bakulumpe pa mwingilo wabo? Le umonanga namani “byabuntu ku bantu” bimupele Leza kupityila kudi Kidishitu mu kyenu kipwilo?—Ef. 4:8.

“Baputumina mu Mīngilo”

4, 5. Mwanda waka kufundija kipwilo wādi mwingilo mukomo ku bakulumpe ba mu kitatyi kya Polo, ne mwanda waka kidi muswelo umo ne dyalelo?

⁴ Pa kupwa kutuma Polo ne Shilasa ku Belea, le bakulumpe ba mu Tesalonika bādi “baputumina mu mīngilo” namani? Bine bādi beula Polo, bafundija kipwilo na kwingidija Bisonekwa. Padi ukeipangula’mba, ‘Le Bene Kidishitu ba mu Tesalonika bādi balēmekele Kinenwa kya Leza?’ Bible unena’mba Bene Belea “bo bēne batabukile buleme boba ba mu Tesalonika . . . ke basakesake mu bisonekwa mafuku onso mo bukila.” (Bil. 17:11) Inoko, pano badingakanyanga na Bene Tesalonika Bayuda mu kikonge, ke na Bene Kidishitupo. Boba bāitabije ‘bātambwile mwanda wa Leza, kepamo na mwanda wa bantupo, ehe, i na mwanda wa Leza.’ (1 Tes. 2:13) Bakulumpe bādi baputumina mu mingilo pa kudisha bano bantu ku mushipiditu.

⁵ Dyalelo, kabumbo ka umpika wa binebine, udi na manwa kaletelanga luombe lwa Leza bidibwa “pa kitungo kya mwaka po kitungilwe.” (Mat. 24:45) Na bwendeji bwa umpika, bakulumpe pa bipwilo baputuminanga mu mingilo pa kudisha banababo ku mushipiditu. Boba badi mu kipwilo bakokeja kwikala na mabuku mangi emanine pa Bible, kadi mu ndimi imo badi na bingidilwa pamo bwa Index des publications Watch Tower ne madishike a Watchtower Library. Pa kuvuija bisakibwa ku mushipiditu bya bipwilo, bakulumpe bapityijanga masaa mavule bateakanya bipindi mwa kupityijija’byo mu muswelo muyampe. Le nobe kodi mulanguluke pa kitatyi kipityijanga bakulumpe pobateakanya bipindi byabo bya ku kupwila, ku kubungakana, ne ku bitango?

6, 7. (a) Le bakulumpe ba mu Tesalonika bāiwile kimfwa’ka kya Polo? (b) Mwanda waka dyalelo bikokeja kwikala bikomo bakulumpe kwiula Polo?

⁶ Bakulumpe ba mu Tesalonika bāvulukile kimfwa kilumbuluke kyāshile Polo mu kukumba luombe. Kādipo’tu upempulañana bitupubitupu nansha bya kajilwilo. Enka motwesambile’kyo mu kishinte kibadikile, Polo ‘wādi ke mukōkele pamo bwa inamuntu udi na bana ba ku kyadi.’ (Tanga 1 Tesalonika 2:7, 8.) Wādi uloelelwe ‘kwibapa ne muya wandi mwine’! Kitatyi kyobakumba, bakulumpe bādi banenwe kwikala bwa aye.

⁷ Dyalelo bakumbi Bene Kidishitu beulanga Polo na kusanswa luombe. Mungya kipangila, mikōko imo keikalangapo na kyanga ne kwiibidila na bantu. Inoko, bakulumpe baloñanga bukomo bwa kuta mutyima wa ‘kutana biyampe’ bidi mu ino mikōko. (Nk. 16:20) Mukulumpe byadi muntu wakubulwa kubwaninina, nandi ubwanya kukolelwa kwikala na mumweno mwendele’mo pa mukōko ne mukōko. Ebiya, shi wielela’ko kwikala biyampe na bonso, mwene ufwaninwe kufwijibwa’ko pa bukomo bwalonga kwikala mukumbi muyampe munshi mwa Kidishitu?

8, 9. Lelo bakulumpe ba mu ano etu mafuku ‘batengele ponka pa mityima yetu’ namani?

⁸ Batwe bonso tudi na bubinga bwa ‘kukōkelelela’ bakulumpe. Enka mwālembele Polo, ‘batengele ponka pa mityima yetu.’ (Bah. 13:17) Uno muneneno wituvuluja mukumbi wa bimunanwa uleka kulāla mwanda wa kulama luombe lwandi. Ne bakulumpe nabo, dyalelo besuminwanga tulo kyaba kimo mwanda wa kuvuija bisakibwa bya boba babela ku ngitu, mu malango nansha ku mushipiditu. Kimfwa,  batutu bengila mu Komite Utala Myanda ya Lupitalo bebalangulanga ne bufuku amba bakatale wabela mu kitulumukila. Bine, potutanwa mu ngikadilo ya uno muswelo, ketubulwangapo kufwija’ko pa mingilo yabo!

⁹ Bakulumpe badi mu Komite wa Lūbako lwa mu Mwaba ne komite wa bukwashi baputuminanga mu kukwasha banababo. Bine tufwaninwe kwibakwatakanya na mutyima onso! Tala bukomo bwalongelwe pa kuleta bukwashi pa kupwa kimpumpu kya Nargis kyatetukile mu Birmani mu 2008. Pa kukafika ku kipwilo kya Bothingone mu ntanda yatetwilwe bininge idi ku mulupu wa munonga wa Irrawaddy, kisumpi kya bukwashi kyaendele lwendo mu ntanda yadi ilēle’mo imbidi ya bantu ntala-ntala. Batutu ba kokwa pobamwene kisumpi kibajinji kya bukwashi kibafika mu Bothingone mwadi ne wadi mutadi wabo wa kipindi, ke banena na diwi dikatampe amba: “Talai! Ne mutadi wetu wa kipindi! Yehova wetupandija!” Lelo nobe ufwijanga’ko pa mingilo iputumina’mo bakulumpe dyuba ne bufuku? Bakulumpe bamo batoñwanga kwingila mu makomite a pa bula a kutyiba myanda mikutakane. Bano bakulumpe kebetendelangapo pa byobalonga; inoko boba bamwena mu mingilo yabo bafwijanga’ko mpata.—Mat. 6:2-4.

10. Le i mingilo’ka keitumbilepo ingilanga bakulumpe?

¹⁰ Dyalelo bakulumpe bavule badi na mingilo ya kulembalemba. Kimfwa, mukwatakani wa kitango kya bakulumpe uteakanyanga mpangiko ya kupwila kwa yenga ne yenga. Mulembi wa kipwilo nandi udiñanga malapolo a mwingilo wa kweji ne kweji ne a mwaka mutuntulu. Pa kupwa kwa makweji asatu, babandaulanga lubalo lwa kipwilo. Bakulumpe batañanga mikanda itamba ku bilo bya musambo ne kulonda bulombodi bukwasha kulama “bumo bwa kwitabija.” (Ef. 4:3, 13) Kupityila ku bukomo bwa bano bakulumpe baputumina mu mingilo, ‘bintu bonsololo bilongibwanga monka mo byendele biyampe ne mobikadile.’—1 Kod. 14:40.

“Bakwimulelela”

11, 12. Le i bāni balelele kipwilo, ne kulela kwine kulomba bika ne bika?

¹¹ Polo wāshintulwile kuputumina mu mingilo kwa bakulumpe ba mu Tesalonika bu ‘kulela’ kipwilo. Mu ndimi imbajinjibajinji, kino kishima kidi na buluji bwa “kwimana kumeso” kadi kikokeja kwalamunwa bu “kwendeja; kutangidila mu.” (1 Tes. 5:12) Polo wānene’nka pa bano bakulumpe amba i “baputumina mu mīngilo.” Kādipo wisambila enka pa “mutadi mwimaniji,” ino i pa bakulumpe bonso mu kipwilo. Dyalelo, bakulumpe bavule bemananga ku meso a kipwilo ne kwendeja kupwila. Kushinta kwa panopano kwa kwingidija mwityilo “mukwatakani wa kitango kya bakulumpe” kwitukwasha tumone bakulumpe bonso bu bantu babundile kitango kimo.

¹² ‘Kulela’ kipwilo ke enkapo kufundija. Kishima kimo kyonka i kingidijibwe mu 1 Temote 3:4. Polo wānene’mba mutadi ufwaninwe kwikala muntu “wakulela kipango kyandi biyampe byonka, ne bāna bandi bonka bakumukōkela, ne buleme ponka.” I bimweke amba, pano kishima “wakulela” kekilombolapo enka kufundija bandi bana, ino i ne kutangidila kisaka amba bandi bana bekale “bakumukōkela.” Bine, Bakulumpe batangidilanga kipwilo, bakwasha bonso bakōkelelele Yehova.—1 Tem. 3:5.

13. Mwanda waka bibwanya kulomba kitatyi pa kukwata butyibi mu mīsambo ya bakulumpe?

¹³ Pa kutangidila biyampe luombe, bakulumpe besambanga abo bene na bene mwa kuvuijija senene bisakibwa bya kipwilo. Byadi bikokejika kupēla kutabuka shi byadi amba mukulumpe umo ye ukwata butyibi bonso. Ino byobalonda kimfwa kya kitango kyendeji kya mu myaka katwa kabajinji, bitango bya bakulumpe bya mu ano mafuku besambanga pamo myanda pampikwa kafinda, bakimba buludiki mu Bisonekwa. Kitungo kyabo i kulonda misoñanya ya mu Bisonekwa mungya bisakibwa bya kipwilo kyabo. Bikalanga biyampe kutabuka shi mukulumpe ne mukulumpe  uteakanya misambo ya bakulumpe, ubandaula Bisonekwa ne misoñanya itamba kudi kabumbo ka umpika wa binebine, udi na manwa. Na bubine, bilombanga kitatyi. Shi kubaikala milangwe palapala, na mobyāikadile mu mwanda utala disao wādi ubandaulwa na kitango kyendeji kya mu myaka katwa kabajinji, bikalomba kubweja’ko kitatyi ne bukimbi pa kukwata butyibi mwa kimo bukwatañene na Bisonekwa.—Bil. 15:2, 6, 7, 12-14, 28.

14. Le nobe usangelanga bingila pamo kitango kya bakulumpe kidi umbumo? Mwanda waka?

¹⁴ Le bikekala namani shi mukulumpe umo ūminine na byandi nansha kubingija enka milangwe yandi? Kadi, bikekala namani shi muntu umo—pamo bwa Deotefese wa mu myaka katwa kabajinji—ulengeja lupotopoto? (3 Yoa. 9, 10) Nankyo kipwilo kyonso kikasusukanga bya binebine. Shi Satana wāsakile kuvutakanya kipwilo kya mu myaka katwa kabajinji, nanshi tuyukei amba usakanga ne kuvutakanya ndoe idi mu kipwilo kya dyalelo. Ukokeja kukankamika mushipiditu wa bumuntu wa kwisakila, kimfwa kufwila bukata. O mwanda, i biyampe bakulumpe batamije kwityepeja ne kwingidila pamo bu kitango kidi umbumo. Bine, tusangelanga kwityepeja kwa bakulumpe bengidila pamo mu kitango kyabo!

“Kwimudingila Madingi”

15. Le i kika kitononanga bakulumpe badingile tutu nansha kaka kansangwa?

¹⁵ Kupwa Polo wālombwele mwingilo mukomo ao’ko wa mvubu udi na bakulumpe: kudingila luombe. Mu Bisonekwa bya Kingidiki bya Bwine Kidishitu, enka Polo kete ye wāingidije kishima kya Kingidiki kyalamwinwe bu “kudingila.” Kikokeja kufunkila pa madingi makomo ino ke buñumaumapo. (Bil. 20:31;  2 Tes. 3:15) Kimfwa, Polo wāsonekele Bene Kodinda amba: “Nkimusonekelepo bino’bi kwimufwija bumvu, ehe, i kwimudingila madingi, pamo’nka na bāna bami baswebwe.” (1 Kod. 4:14) Kine kyaādi wibadingidila i mwanda wādi wibatele mutyima na buswe.

16. Le i biyampe bakulumpe balame bika mu ñeni kitatyi kyobadingila bakwabo?

¹⁶ Bakulumpe balamine mu ñeni mvubu ya muswelo obadingila bakwabo. Baloñanga bukomo bwa kwiula Polo na kwikala biyampe, na buswe, ne kukwashañana. (Tanga 1 Tesalonika 2:11, 12.) Bine, bakulumpe ‘bōmininanga monka mu mwanda wa binebine amba bamone mwa kufundijija lufundijo lukomo.’—Tet. 1:5-9.

17, 18. I bika byofwaninwe kulama mu ñeni kitatyi kyotambula madingi atamba kudi mukulumpe?

¹⁷ Shako, bakulumpe nabo i bampikwa kubwaninina ne bakokeja kunena bintu kupwa ke bealakanya’byo. (1 Bal. 8:46; Yak. 3:8) Kadi, bakulumpe bayukile’mba ku batutu ne bakaka ba ku mushipiditu, divule kudingilwa ‘kekusangajangapo mutyima, mhm.’ (Bah. 12:11) O mwanda shi mukulumpe kakesambe na muntu binenwa bya kumudingila, ubadikilanga bidi kubandaula senene mwanda’wa ne kulombela ponka. Shi abakudingila, lelo ufwijanga’ko pa kuta kukutele bakulumpe mutyima?

¹⁸ Langa’po shi wadi na misongo mikomo kushintulula mu kiñanga. Penepo muñanga wajingulula musongo mwine, ino bibakukomena kwitabija byaakulombola. Le usa kufītyilwa uno muñanga? Mhm! Ino, nansha shi wanena’mba usa kupasulwa, uketabija uno mundapilo, mwanda ukulupile’mba bo bukomo bobe. Muswelo ukulombola muñanga myanda’ya ukokeja kutenga mwiivwanino obe, ino le ukaleka kino kishinte butyibi bobe? Padi kukashintapo. Mo monka, kokaleka muswelo ukudingilwa ukulengeje uleke kuteja boba babwanya kwingidijibwa na Yehova ne Yesu mwanda wa kukulombola uyuke mwa kwikwashisha ne kwilama ku mushipiditu.

Fwija’ko Yehova pa Kutūla’ko Bakulumpe

19, 20. I muswelo’ka okalombola kufwija’ko pa bino “byabuntu ku bantu”?

¹⁹ Lelo i bika byokalonga shi ubatambula kyabuntu kikupelwe abe? Lelo ubulwe kufwija’ko na kwikingidija? Yehova, kupityila kudi Yesu Kidishitu, i mukupe “byabuntu ku bantu.” Muswelo umo okalombola kufwija’ko pa bino byabuntu i na kuteja na katentekeji mīsambo inenwa na bakulumpe ne kwingidija mu būmi myanda yobanena’mo. Ukalombola kadi kufwija’ko kobe na kuleta bilondololwa byūbaka ku kupwila. Kwatakanya mingilo itangidilwe na bakulumpe, kimfwa mwingilo wa budimi. Shi kodi mumwene mu madingi owatambwile kudi mukulumpe kampanda, wabulwapo kumusekunwina? Kadi, mwene ubwanya kufwija’ko bisaka bya bakulumpe? Vuluka’mba, pa kusaka mukulumpe aputumine mu mingilo ya mu kipwilo, kisaka kyandi kimushilanga kitatyi kyaadi wa kushikata nabo pamo.

²⁰ I bine, tudi na bubinga bwa kulombola kufwija’ko bakulumpe, baputuminanga mu mingilo umbukata mwetu, betulelele, ne kwitudingila madingi. Bino “byabuntu ku bantu” bine, i mpangiko ya buswe itamba kudi Yehova!

Lelo Ukivulukile?

• Le i bubinga’ka bwādi na Bene Kidishitu ba mu Tesalonika bwa kufwijija’ko boba bādi bebatangidile umbukata mwabo?

• Le bakulumpe ba mu kyenu kipwilo baputuminanga mu mingilo muswelo’ka?

• I bika byomwenanga mu buledi bukulelele bakulumpe?

• Shi mukulumpe kampanda wakudingila, i bika byofwaninwe kuvuluka?

[Bipangujo bya Kifundwa]

[Kifwatulo pa paje 31]

Le ufwijanga’ko pa miswelo palapala ikumbanga bakulumpe kipwilo?