‘Lemeshenu Akalakalaña Chikupu Mukachi Kenu’

‘Lemeshenu akalakalaña mukachi kenu, ayilombolaña mudi Mwanta nakuyifumba.’—1 TESA. 5:12.

1, 2. (a) Yumanyi yamwekeneña muchipompelu chamuTesalonika hampinji yayisonekeleliyi Pawulu mukanda watachi? (b) Chumanyi Pawulu chayikolesheliyi Atesalonika kwila?

 DIFWIKIJENU nenu mudi muchipompelu chamuTesalonika chamuyaaka nkulakaji yatachi, chekala hakachi kayipompelu yatachikiluwu kutuña muEurope. Kapostolu Pawulu washakaminuku mpinji yayilehi nakukolesha amana kwetu. Watela watondeli akulumpi akulombola, neyi chochelileñawu muyipompelu yikwawu. (Yil. 14:23) Ilaña chelili anatuñi dehi chipompelu, aYudeya apompesheli izanvu dawantu kulonda ayihañi aPawulu naSilasi mumusumba. AkwaKristu ashalili atela amweni nawu ayumbili chisayikila, hadaha atiyili niwoma.

² Eñañi, chelili Pawulu yafumi kuTesalonika, wakameneni muloña chipompelu chachidiña chachiha. Wakeñeleña kufunta, ilaña ‘Satana wamufuntishilumu.’ Dichi wamutemesheli Timotewu kuya nakukolesha chipompelu. (1 Tesa. 2:18; 3:2) Chelili Timotewu yaleti mujimbu wawuwahi, chamusañumwini Pawulu kuyisonekela Atesalonika mukanda. Yuma yikwawu yayisonekeleliyi, Pawulu wayikonkomweneni ‘kulemesha ayilombweleña mukachi kawu.’—Tañenu 1 Atesalonika 5:12, 13.

3. Muloñadi akwaKristu muTesalonika chateleleluwu kuyifuukula kulema nankashi akulumpi?

³ Amana kwetu alombweleña hadi akwaKristu amuTesalonika hiyadiña akuluka yitembi neyi chadiñayi Pawulu nialundanindi mwendeleleñawuku; nawa adiña kanda apami kuspiritu neyi chadiñawu aeluda amuYerusalema. Cheñi nawa, chipompelu chadiña kanda chimanishi nichaaka chimu. Hela chochu, antu amuchipompelu ateleleli kuzañalala muloña adiña nawakulumpi, ‘akalakeleña nañovu’ ‘nikulombola’ chipompelu ‘nikuyifumba’ amana kwetu. Eñañi, ateleleli ‘kuyifuukula [aeluda] kulema nankashi mukukeña.’ Kuhiñahu  cheñi Pawulu wayifumbili nindi “shakamenu chawunda mukachi kenu.” Neyi mwadiña muTesalonika, komana mwadi kuhameka nyidimu yakalakeleñawu aeluda? Indi ‘yamukunkulu mudi antu’ ahanayi Nzambi kuhitila mudi Kristu muchipompelu chenu mwayimonaña ñahi?—Efwes. 4:8.

‘Akalakalaña Chikupu’

4, 5. Muloñadi akulumpi amumafuku aPawulu chateleleluwu kukalakala chikupu hakutañisha antu muchipompelu, nawa muloñadi chatela kukalakalawu chikupu nimakonu?

⁴ Hanyima yakutemesha aPawulu naSilasi kuBereya, indi akulumpi muTesalonika ‘akalakeleña ñahi nañovu’? Chakadi nikujina, amwimbujoleli Pawulu, kuhitila mukuzatisha Nsona hakutañisha muchipompelu. Munateli kutoñojoka nenu: ‘Komana akwaKristu amuTesalonika alemesheli Izu daNzambi?’ Muloña Bayibolu yahoshaña nawu Abereya ‘abadikili amuTesalonika kalemesha, . . . Adiña nakutalatala muNyikanda yajila hefuku hefuku.’ (Yil. 17:11) Dichi, ayesekejeli nawaYudeya akuTesalonika ejima, bayi akwaKristuku. Antu ekalili akwakwitiya ‘atambwilili izu dansañu yaNzambi, hiyaditambwili neyi nsañu yawantuku, ilaña chochidekala izu daNzambi.’ (1 Tesa. 2:13) Akulumpi atela akalakeleña chikupu hakutañisha antu muchipompelu.

⁵ Makonu, izanvu danduñu wamaana nikashinshi daloñesheleña anyikoku yaNzambi ‘yakudya yahampinji yatelela.’ (Mat. 24:45) Hakulondela wunlomboli wanduñu, aeluda ahachipompelu chenu akalakalaña chikupu kulonda kudisha amana kwawu yakudya yakuspiritu. Amana kwetu niahela muchipompelu akweti nyikanda yayivulu yashindamena haBayibolu, nawa mumadimi amakwawu akweti nyikanda yidi neyi Watch Tower Publications Index niWatchtower Library haCD-ROM niWatch Tower Publications Index yidi muKaposhi Kakutalila kaDecember. Hakwila nawu adiishi chipompelu yakudya yakuspiritu, aeluda azatishaña maora amavulu hakuloñesha mpanji jahakupompa kulonda ahani mpanji munjila yayiwahi. Komana mweluka mpinji yazatishañawu aeluda hakuloñesha mpanji yahakupompa kwachipompelu, kwanyanya nikwamaneni?

6, 7. (a) Indi akulumpi akuTesalonika embujoleli ñahi chakutalilahu chaPawulu? (b) Muloñadi aeluda makonu chichatela kuyikalila kwimbujola chakutalilahu chaPawulu?

⁶ Akulumpi amuTesalonika anukileña chakutalilahu chachiwahi chemikiliyi Pawulu hakubiña anyikoku. Adiña nakubiña anyikoku chachiwahi nikuyakamena. Neyi chitwahanjeka muchibaaba chinafumuhu, Pawulu ‘wadiñi wamwovu . . . , neyi chalelañayi nleli anyanindi yomweni.’ (Tañenu 1 Atesalonika 2:7, 8.) Pawulu wadihanini kuyinka niwumi windi yomweni! Hakubiña anyikoku, akulumpi niwena ateleleli kumwimbujola.

⁷ Atubiña akwaKristu makonu amwimbujolaña Pawulu kuhitila mukulemesha anyikoku. Anyikoku amakwawu hiyanateli kwikala naluwi nikudikunda nawakwawuku. Hela chochu, aeluda afwilaña kumwekesha kashinshi ‘nikuwana yayiwahi’ mudi wena. (Yish. 16:20) Eñañi, hamuloña wakubula kuwanina, chinateli kumukalila eluda kuwana kakawahi mudi muntu wejima. Ilaña, neyi yafwilaña kwikala wamwovu kudi antu ejima, komana kwila tumuhameka hakukalakala nañovu chikupu kulonda yekali kabiña wamuwahi muwunlomboli waKristu nehi?

8, 9. Njilanyi jikwawu aeluda ‘mwahembelañawu nyichima yetu’ makonu?

⁸ Wejima wetu twatela ‘kwovwahila’ aeluda. Pawulu wasonekeli nindi, ‘muloña ahembaña nyichima yetu.’ (Heb. 13:17) Awa mazu anatwanukishi hadi kabiña wachishaña nakutona kulonda yakiñi anyikoku indi. Chochimu, aeluda makonu anateli kuchisha nakutona kulonda akameni antu akata, adi nakukala, hela anakukañanya kuzatisha kufumba kwamuBayibolu. Chakutalilahu, amana kwetu ekala muJikomiti Jatiyañanaña naYipatela ayihindwishaña mukachi kawufuku kulonda atali  kukala kunamwekani. Dichi, neyi tuholokela mukukala kwamuchidiwu, twayihamekaña chikupu hanyidimu yawu yakalakalañawu.

⁹ Aeluda azataña muJikomiti Jakutuña ninyidimu yakukwasha anakankili, azataña nañovu kulonda kukwasha amana kwetu. Twatela kuyikwasha namuchima wumu. Toñojokenu hamudimu wakalakeluwu wakukwasha antu adiña mukukankila hanyima yavula yeneni yatenañawu nawu Cyclone Nargis chiyakisañeni iluña daMyanmar mu 2008. Hakwila nawu izanvu datwalileña wukwashu dihanuki muchinekineki chaIrrawaddy mwaholokeleli iwu wubanji nakushika kuChipompelu chakuBothingone, izanvu datwalileña wukwashu dahitili mwiluña mwenzeli nyijimba yawantu afwa. Amana kwetu amunidi iluña chamweniwu izanvu dawakwakutwala wukwashu dishiki muBothingone nawa hakachi kawu hadiña nimana kwetu wadiña nkoñi yawu wañinza, ahosheli nawu: “Talenu ninkoñi yetu wañinza nenzi! Yehova natupulwishi!” Komana mwahamekaña nyidimu yakalakalañawu chikupu aeluda mwaana niwufuku? Aeluda amakwawu ayinkaña mudimu wakuzatila mujikomiti jasompaña nyiloña yakala. Awa aeluda hiyadisambaña hanyidimu yazatañawuku; ilaña antu akwashañawu azañalalaña chikupu.—Mat. 6:2-4.

10. Nyidimwinyi yitwabula kwilukisha yakalakalañawu aeluda?

¹⁰ Aeluda amavulu makonu akweti nyidimu yayivulu yakusoneka. Chakutalilahu, nloñeshi wezanvu dawaeluda wasonekaña jindandanda jakupompa mulungu nimulungu. Nsoneki wachipompelu wasonekaña malipoti amumudimu wamwiha ahakakweji nihachaaka. Nkoñi washikola niyena washaña maana chikupu kundandanda yashikola. Chimwahita tukweji tusatu, kwekala kuhituluka munyikanda yachipompelu mwasonekañawu nsañu jamali. Aeluda atañaña nyikanda yafumaña kukasanji kamutayi nikuzatisha wunlomboli watukwashaña kutwalekahu “mukunuñañana kwakwitiya kwakukuhwelela.” (Efwes. 4:3, 13) ‘Yuma yejima ayilaña chakutela nakuloña,’ kuhitila mudi aeluda akalakalaña chikupu.—1 Kor. 14:40.

“Ayilombolaña”

11, 12. Anyi alombolaña muchipompelu, nawa azataña nyidimwinyi yikwawu?

¹¹ Pawulu walumbulwili akulumpi akalakeleña chikupu amuTesalonika nindi ‘alombweleña’ muchipompelu. (1 Tesa. 5:12) Pawulu wateneni aeluda wowamu nindi ‘akalakeleña chikupu.’ Pawulu hateneneña hohu “nkoñi wumu walombolañaku,” ilaña wateneneña akulumpi ejima muchipompelu. Makonu, aeluda amavulu emanaña kumbidi yachipompelu nakulombola kupompa. Kuhimpa kwakatataka kwakuzatisha ijina dakwila nawu “nloñeshi wezanvu dawaeluda” kunatukwashi kwiluka netu aeluda ejima ekala mwizanvu dimu danuñañana.

¹² ‘Kulombola’ chipompelu kwabombelamu nyidimu yayivulu bayi kutañisha hohuku. Mazu adifwanaku ayizatisha niha 1 Timotewu 3:4. Pawulu wahosheli nindi nkoñi watela kwikala “muntu wayulaña chachiwahi mwitala dindi yomweni, wukweti anyanindi amwovwahilaña nakalemesha kalala.” Mazu akwila nawu ‘wayulaña chachiwahi hela walombolaña’ abombelamu kutañisha anyanindi nikulombola muchisaka ‘nikwikala nawanyana amwovwahilaña.’ Eñañi, aeluda alombolaña muchipompelu, nikukwasha antu ejima amwovwahileña Yehova.—1 Tim. 3:5.

13. Hamitiñi yawaeluda, muloñadi chihahitilaña mpinji yeneni hakwila nawu afuukuluhu?

¹³ Hakwila nawu alomboleña chachiwahi anyikoku, aeluda ahanjekaña hakachi kawu chatela kukwashawu chipompelu. Chinateli kuwaha neyi eluda wumu yafuukula yuma yejima. Ilaña, kulondela chakutalilahu chezanvu dalombweleña muyaaka nkulakaji yatachi, mazanvu awaeluda makonu ahanjekaña hansañu mukukasunuka, nikulondela wunlomboli wamuNsona. Chikonkwanyi chawu chekala chakuzatisha nshimbi jamuNsona kuyuma yinakankili chipompelu chawu. Kuhanjeka  kwawu kwendaña chachiwahi neyi aeluda ejima adiloñesha henohu kanda ayi mumitiñi yawaeluda, kutaña jiNsona ninshimbi jaloñeshañawu kudi izanvu danduñu wamaana nikashinshi. Hela chochu, chakeñekaña kwikala nampinji yeneni. Neyi akañanya kuditeja, neyi chamwekeni kudi izaza dalombweleña muyaaka nkulakaji yatachi hampinji yahanjekeleñawu hansañu yakwalamisha, chakeñekaña kwikala nampinji nikusandujola nsañu kulonda wejima wawu aditeji kushindamena haNsona.—Yil. 15:2, 6, 7, 12-14, 28.

14. Komana mwahamekaña izanvu dawaeluda azatilaña hamu mukunuñañana? Muloñadi?

¹⁴ Chumanyi chatela kumwekana neyi eluda wumu yadikaña nindi chiña alondeli munafuukuliyi hela munatoñojokiyi? Indi neyi muntu wudi neyi Diyotefwesi wadiñaku muyaaka nkulakaji yakusambila, yaleta maana akuditadikisha? (3 Yow. 9, 10) Chipompelu chejima chikumona kukala. Neyi Satana wakeñeleña kuluwañesha chipompelu chamuyaaka nkulakaji yakusambila, tuneluki chikupu netu nimakonu nateli kuluwañesha kuwunda muchipompelu. Nateli kuzatisha chaaku chekala nawantu, chakufwila kutiyakana mpuhu. Dichi, aeluda atela kwikala adizoza nikuzatila hamu neyi izanvu danuñañana. Twahamekaña nankashi izanvu dawaeluda adizoza nawa azatilaña hamu.

‘Ayifumbaña’

15. Chumanyi chaleñelaña aeluda afumbi mana kwetu hela muhela?

¹⁵ Kuhiñahu Pawulu washimwini mudimu wukwawu wakala ilaña walema wazatañawu akulumpi: wakufumba anyikoku. Munyikanda yachiGriki yawakwaKristu, Pawulu diwazatishili hohu izu dachiGriki dabalumunawu nawu “kufumba.” Dinateli kutalisha kukufumba  chikupu, ilaña hidatalisha kukuhela muntuku. (Yil. 20:31; 2 Tesa. 3:15) Chakutalilahu, Pawulu wayisonekeleli akwaKorinda nindi: “Iyi yuma yinayisonekeli, hinayisonekeli nami niyitiyishi nachu nsonyuku, nalondi kuyikonkomwena, nanichi chimuneli muyanyanami nakeña.” (1 Kor. 4:14) Wafumbileña akwawu muloña wakuyakamena.

16. Chumanyi chatela kwilukawu aeluda hakufumba akwawu?

¹⁶ Aeluda elukaña chichalemena kufumba akwawu munjila yayiwahi. Afwilaña kumwimbujola Pawulu kuhitila mukumwekesha luwi, kukeña, nikukwashana. (Tañenu 1 Atesalonika 2:11, 12.) Eñañi, aeluda ‘akakelaña kumazu atela kwitiya, kulonda atweshi kukonkomwena antu mwaya kuleja kwalala.’—Tit. 1:5-9.

17, 18. Chumanyi chimwatela kwiluka neyi eluda nakuyifumba?

¹⁷ Eñañi, aeluda hiyawaninaku nawa anateli kuhosha yuma yinateli kuyileñela kuditoñesha. (1 Anya. 8:46; Yak. 3:8) Cheñi nawa, aeluda eluka nawu hakwila nawu amana kwetu niahela amuchipompelu, atambwili kufumba ‘hikwayitiyishaña kuwahaku, kwayineñeshaña.’ (Heb. 12:11) Dichi, hakwila nawu eluda yafumbi muntu, wasambilaña kutoñojokahu chikupu nikulombelahu. Neyi ayifumba, komana mwahamekaña kukeña kwamwekeshañayi eluda?

¹⁸ Twili netu mudi nachikatu chimunakutoñojoka nenu hiyanateli kuyuukaku. Dichi ndotolu yayileja kukala kumukweti, ilaña enu chinayikalili kwiteja chikatu chinayilejuwu. Komana munateli kumuhembela ndotolu nkunyi kumuchima? Inehi! Hela neyi yashimuna nindi ayiladiki, munateli kwiteja ayuuki, nakukuhwelela nenu mukukola. Njila yikuyilejelamu ndotolu kukala kumukweti hadaha yinateli kuyitiyisha woma, komana chikuyileñela mubuli kufuukulahu chiwahi? Inehi. Chochimu, bayi mwiteja njila yakuyifumbilamu yiyikañesha kutiyilila antu anakuzatishawu kudi Yehova niYesu kulonda ayileji chimwatela kuyilaku hambidi hela kukiña wuspiritu wenuku.

Musakililenu Yehova Hakutwinka Aeluda

19, 20. Munateli kuhameka ñahi awa amayala atwinkawu neyi ‘yamukunkulu mudi antu’?

¹⁹ Chumanyi chimwatela kwila neyi mutambwila chawana chinayitemesheluwu? Komana mukuchizatisha kulonda mumwekeshi kusakilila? Yehova wayinka ‘yamukunkulu mudi antu’ kuhitila mudi Yesu Kristu. Njila yimu yimwatela kumwekesha kusakilila haniyi yamukunkulu yayinkawu yidi yakutiyilila chikupu kumpanji jahanañawu aeluda nikufwila kuzatisha yikuma yashimunañawu. Munateli cheñi kumwekesha kusakilila kuhitila mukwakulahu chachiwahi hakupompa. Zatenuku mudimu walombolañawu aeluda, chidi neyi mudimu wakushimwina. Neyi kufumba kwayifumbiluwu kudi eluda kwayikwashili, komana kwila mumuleja nehi? Kubombelahu, komana kwila muhameka yisaka yawaeluda nehi? Ilukenu nenu, hakwila nawu eluda yakalakaleña chikupu muchipompelu, chisaka chindi chadihanaña kulonda mpinji yatela kwikalawu hamu yayizatishi kunyidimu yachipompelu.

²⁰ Eñañi, twatela kuyisakilila aeluda, anakukalakala chikupu hakachi ketu, atulombolaña, nikutufumba. Eñañi Yehova diyi watwinka awa amayala ekala ‘yamukunkulu mudi antu.’

Munakwanuka?

• Muloñadi akwaKristu akuTesalonika chateleleluwu kuhameka antu alombweleña mukachi kawu?

• Aeluda muchipompelu chenu ayikalakelaña ñahi chikupu?

• Mwahetelañamu ñahi munyidimu yalombolañawu aeluda?

• Chumanyi chimwatela kwiluka, neyi ayifumba kudi eluda?

[Malwihu aKuzatisha haKudiza]

[Mwevulu wudi hefu 27]

Komana mwahamekaña njila jajivulu mwabiñilañawu aeluda chipompelu?