Kom̦win Kanooj Kautiej Ro Rej Jerbal Ippemi
Kom̦win Kanooj Kautiej Ro Rej Jerbal Ippemi
“Komin kanuij kautiej ro rej jerbal ibbemi, bwe Iroij ear kãlet ir bwe ren tel kom im kabilõk [ak kauwe] kom.”—1 TE. 5:12, UBS.
1, 2. (a) Ta eo ear wal̦o̦k ñan congregation eo ilo Tessalonika ke Paul ear je lõta eo an kein kajuon ñan er? (b) Ta eo Paul ear rõjañ er ñan kõm̦m̦ane?
ANTONEL̦O̦K am̦ pãd ilo iien ko an rijjelõk ro im kwõj uwaan congregation eo ilo Tessalonika. Ej juon iaan congregation ko rar jino jutak ilo aelõñ in Europe. Eto an kar rijjelõk Paul pãd ippãn ri tõmak ro ilo jikin in ñan kakajoor er. Emaroñ kar jitõñ l̦õm̦aro ro rerũtto ilo tõmak ñan tõl jerbal ko ilo congregation eo ãinwõt ear kõm̦m̦ane ilo congregation ko jet. (Jrb. 14:23) Bõtab ãlikin an kar jutak congregation eo, ri Ju ro rar kajutak juon kumi in ri nana ro ñan kadiwõjl̦o̦k Paul im Sailas jãn jikin in. Ri tõmak ro ilo Tessalonika remaroñ kar mijak ke Paul im Sailas rar jako jãn itureer.
2 Ãlikin an kar Paul ilo̦k jãn Tessalonika, ear inepata kõn congregation eo ekããl ilo ijin. Ear kajjioñ in bar jepl̦aak ak “Setan ear bõbrae” an etal. Kõn men in, ear jilkinl̦o̦k Timote bwe en kakajoor ro ilo congregation eo. (1 Te. 2:18; 3:2) Ke Timote ear kwal̦o̦k ñan Paul kõn wõnm̦aanl̦o̦k ko rej wal̦o̦k ijo, joñan an kar Paul m̦õn̦õn̦õ ear je juon lõta ñan congregation eo ilo Tessalonika. Ilo lõta eo an, ear rõjañ er bwe ren ‘kanooj kautiej ro rej tõl’ jerbal ko ilo congregation eo aer.—1 Tessalonika 5:12, 13, UBS.
3. Etke ro ilo congregation eo ilo Tessalonika rar aikuj kwal̦o̦k aer kam̦m̦oolole elder ro?
3 Ro im rar tõl jerbal ko ilo congregation eo ilo Tessalonika rar kããl ñan jerbal in. Rar jab ãinwõt Paul im ro rar itoitak ippãn ekoba elder ro ilo Jerusalem me etto aer pãd ilo m̦ool eo. Ejañin kij juon iiõ ke kar kajutak congregation eo ilo Tessalonika! Mekarta, ro ilo congregation eo rar aikuj kwal̦o̦k aer kam̦m̦oolol l̦õm̦arein kõn aer kate er ñan “jerbal,” lel̦o̦k naan in kauwe ko ñan er im “tel” jerbal ko ilo congregation eo. Ear juon men ejim̦we ñan aer “kanuij kautiej ir im yokwe ir ilo mol.” Ãlikin an kar Paul ba naan kein ear jiroñ er bwe ren “ainemmõn ñõn dron.” El̦aññe kwaar pãd ilo Tessalonika ilo tõre eo, kwõn kar ke kwal̦o̦k am kam̦m̦oolol kõn jerbal ko an elder ro? Anij ear kajerbal Jijej ñan letok juon “menin letok” ñan kõj. Ta in? Ej elder ro. Ewi wãween kwõj watõk elder ro ilo congregation eo am̦?—Ep. 4:8, UBS.
Rej Kate Er ñan “Jerbal”
4, 5. Etke elder ro ilo raan ko an Paul rar aikuj kate er ñan katakin congregation eo, im etke ej bareinwõt ãindein ippãn elder ro rainin?
4 Ãlikin wõt an kar Paul im Sailas etal ñan Beria, elder ro ilo Tessalonika rar kate er ñan “jerbal” ilo congregation eo. Ta eo rar kõm̦m̦ane? Rar kajjioñe Paul im katakin congregation eo ikijjeen aer kajerbal Baibõl̦ eo. Bõlen kwõmaroñ l̦õmn̦ak, ‘Ri Kũrjin ro ilo Tessalonika rar ke kõn̦aan katak Baibõl̦?’ Kwõmaroñ bõk l̦õmn̦ak in kõnke Baibõl̦ eo ej ba bwe ri Beria ro rar ‘em̦m̦an jãn ro ilo Tessalonika, kõnke rar pukot Jeje ko raan otemjej.’ (Jrb. 17:11) Bõtab, ri Tessalonika ro me eoon in ej kõnono kake ej jitõñl̦o̦k ñan ri Ju ro ilo Tessalonika im jab Kũrjin ro ie. Ro im rar erom Kũrjin ilo Tessalonika rar m̦õn̦õn̦õ in ‘bõk naan in Anij, jab ãinwõt naan in armej, ak ãinwõt naan in Anij.’ (1 Te. 2:13) Innem elder ro ijin rar aikuj lukkuun kate er ñan kajejjet aikuj in an ri Kũrjin rein me rar kõn̦aan katak Baibõl̦.
5 Rainin, kumi in ri karejar eo etiljek im mãlõtlõt ej katakin armej ro doon Anij kõn katak ko ilo Baibõl̦ eo “ilo iien em̦m̦an.” (Matu 24:45) Elder ro ilo congregation ko rej l̦oor naan in tõl ko jãn ri karejar eo etiljek im mãlõtlõt. Rej kate er ñan katakin ro jeer im jatier kõn Baibõl̦ eo. Emaroñ lõñ an ro ilo congregation eo bok ko me rej pedped ioon Baibõl̦ eo. Ñan waanjoñak, ilo jet kajin ko ewõr bok in Index kõn aolep katak ko ilo bok ko ad, im CD eo kõn l̦ãibrãre in bok ko. Im ilo kajin Majel, Imõniaroñroñ ko an allõñ in Tijemba rej kwal̦o̦k kõn taitõl̦ in katak ko jãn Imõniaroñroñ ko l̦o̦k. Ñan katakin ro ilo congregation eo kõn Baibõl̦ eo, elder ro rej jol̦o̦k el̦ap iien ñan kõm̦m̦ani katak ko aer ñan iien kweilo̦k ko. Rej kõm̦m̦ane men in bwe ren maroñ kwal̦o̦k katak ko aer ilo juon wãween em̦m̦an im jejjet. Kwõnañin ke l̦õmn̦ak kõn ewi toõn an elder ro kapoji katak ko aer ñan iien kweilo̦k ko ekoba iien kweilo̦k ko rel̦ap?
6, 7. (a) Ewi wãween an kar Paul likũt juon joñak em̦m̦an ñan elder ro ilo Tessalonika? (b) Etke emaroñ pen ñan an elder ro rainin kajjioñe Paul?
6 Elder ro ilo Tessalonika rar keememej joñak eo em̦m̦an an Paul kõn wãween an kar lale ro uwaan congregation eo. Ear lol̦o̦k ro jein im jatin kõnke ear yokwe er im ear kõn̦aan jipañ er im jab kõnke ear aikuj kõm̦m̦ane men in. Ãinwõt an kar katak eo l̦o̦k kõmel̦el̦e kake, Paul ear “joij . . . einwõt an juõn jinen joij ñõn ro nejin.” (Riit 1 Tessalonika 2:7, 8, UBS.) Ear bareinwõt m̦õn̦õn̦õ in ‘lel̦o̦k mour eo an’ ñan er! Elder ro rar aikuj kajjioñe Paul ilo aer lale ro uwaan congregation eo.
7 Elder ro rainin rej bareinwõt kajjioñe Paul ilo aer yokwe im kaorõk ro uwaan congregation eo. Bõtab, emaroñ wõr jet ro jeer im jatier ilo congregation eo im rejjab jouj im epen kepaake er. Mekarta, elder ro rej kate er ñan kajjioñ in mel̦el̦e kõn eñjake im l̦õmn̦ak ko an ro jeer im jatier im pukot wõt men ko rem̦m̦an kõn er. Kõnke elder ro bareinwõt rejjab weeppãn, jet iien emaroñ pen ñan aer kallimjek wõt men ko rem̦m̦an kõn ro uwaan congregation eo. Bõtab rej kate er ñan kwal̦o̦k wõt jouj ñan aolep. Eñin unin jej aikuj nõbar im kwal̦o̦k ad kam̦m̦oolol er kõn aer kate er ñan l̦oor tõl eo an Kũraij.
8, 9. Ta jet iaan wãween ko elder ro rainin ‘rej kõjparok ad mour im rejjab kakkije’?
8 Ewõr unin ad aikuj kõttãik kõj ñan elder ro. Etke? Kõnke Paul ear je: “Rej kejbarok ami mour im jab kakkije.” (Hi. 13:17, UBS) Naan kein rej kakeememej kõj kõn ro im rej lale jiip ko. Jet iien, ri lale jiip rein rejjab kiki kõnke rej aikuj kõjparok jiip ko. Ilo ejja wãween in wõt, jet iien ejabwe an elder ro kiki kõnke rej lale aikuj ko an ro renañinmej, ro rebũrom̦õj, ak ro epen aer l̦oor naan in kakapilõk ko jãn Baibõl̦. Ñan waanjoñak, ewõr juon kumi ak Kamiti in elder ro me rej kõmel̦el̦e ñan taktõ ro kõn jab bõk bõtõktõk. Jet iien, rej aikuj etal ñan aujpitõl̦ meñe elukwõn boñ bwe ren jipañ juon jeid im jatid. El̦ap ad kam̦m̦oolol rein kõn jerbal ko aer el̦aptata ñe jej iione men in!
9 Bareinwõt, ewõr juon kumi ak Kamiti in elder ro im rej loloorjake jerbal in ekkal ko. Ebar wõr juon Kamiti me ej jipañ ro jeid im jatid ñe jorrããn ko rel̦ap rej jelõt jikin ko rej pãd ie. Jej aikuj rejetake rein! Ñan waanjoñak, kumi in ear jipañ ro jeid im jatid ilo aelõñ in Myanmar ke ear taibuun ilo iiõ eo 2008. Kumi eo rar kõn̦aan jipañ ro jeid im jatid ilo Bothingone Congregation ilo bukwõn eo etan Irrawaddy Delta me el̦ap an kar jorrããn. Ñan tõpare er, kumi eo rar aikuj ettõr bul̦õn armej ro remej. Ke ro jeid im jatid ijo rar lo kumi in ekoba circuit overseer eo aer, rar lam̦õj im ba: “Lale m̦õk! Circuit overseer eo ad en̦! Jeova ej lo̦mo̦o̦ren kõj!” Jej aikuj kaorõk im kwal̦o̦k ad kam̦m̦oolol elder ro kõn aer kate er im jerbal raan im boñ. Bareinwõt, ñe ej wal̦o̦k juon apañ ippãn juon ilo congregation eo, kajjojo iien elder ro renaaj kããlõt jilu iaaer ñan kajjioñ jipañ e. Elder ro rejjab kemjãje kõn men ko rar katõpraki, bõtab ro im rar bõk tokjãn jãn jerbal ko aer rej kwal̦o̦k aer lukkuun kam̦m̦oolol er.—Matu 6:2-4.
10. Ta jet iaan jerbal ko an elder ro im el̦õñ rejjab lukkuun jel̦ã kaki?
10 Elõñ elder ro rainin rej kõm̦m̦ani jerbal ko jet me elõñ rejjab lukkuun jel̦ã kaki. Ñan waanjoñak, elder eo im ej karõk jerbal ko an elder ro, ej karõk wõn ro renaaj kwal̦o̦k katak ko ilo kweilo̦k ko kajjojo wiik. Secretary eo an congregation eo ej bõk ripoot ko ad kajjojo allõñ ñan bwini innem jilkinl̦o̦k ñan ra eo. Bareinwõt, ilo allõñ in Okõj ej kobaik aolep ripoot ko an allõñ ko l̦o̦k ñan bwini innem bar jilkinl̦o̦k. Elder eo me ej lale jikuul̦ in kwal̦o̦k naan eo ej lukkuun etale im kõl̦mãnl̦o̦kjen̦ kõn kajjojo katak ko kar karõki ñan ro jeid im jatid. L̦akũn jilu allõñ, elder ro rej kããlõt juon bwe en etale ripoot in bõnbõn eo an congregation eo. Bareinwõt, elder ro rej riit lõta ko jãn ra eo innem l̦oor naan in tõl ko ie me ej jipañ aolep bwe ren ‘juon wõt ilo tõmak.’ (Ep. 4:3, 13) Kõnke elder ro rej kate er ñan jerbal, ‘men otemjej rej wal̦o̦k ilo ekkar im ilo laajrak.’—1 Ko. 14:40.
Rej “Tel” Jerbal ko ilo Congregation
11, 12. Wõn ro rej tõl jerbal ko ilo congregation eo, im men in ej kitibuj aer ta?
11 Paul ear ba bwe elder ro ilo Tessalonika rej “tel” jerbal ko ilo congregation eo. (1 Te. 5:12, UBS) Ear ba bwe elder rein rej kate er ñan “jerbal.” Ke ear ba naan kein, ear kõnono kõn aolep elder ro ilo congregation eo im jab juon wõt. Rainin, enañin aolep elder ro rej tõl jerbal ko ilo congregation eo im rej kõm̦m̦ani katak ko ilo iien kweilo̦k ko. Meñe ewõr juon elder me ej karõk jerbal ko an elder ro ak aolepeir rej joñan wõt juon.
12 Elder ro im rej “tel” jerbal ko ilo congregation eo rejjab baj katakin wõt ro jeer im jatier. Paul ear ba bwe juon elder ej aikuj “jelã karõk nukin eo an, im ajiri ro nejin ren bokake e im kautiej e.” (1 Ti. 3:4, UBS) Naan kein “jel̦ã karõk nukin” ejjab baj kitibuj an elder eo katakin ajri ro nejin ak ej bareinwõt tõl baam̦le eo an im ‘ajiri ro nejin rej bokake e im kautiej e.’ Ilo ejja wãween in wõt, elder ro rej tõl jerbal ko ilo congregation eo ilo aer jipañ aolep bwe ren pokake im kautiej Jeova.—1 Ti. 3:5, UBS.
13. Ñe elder ro rej kõm̦m̦an pepe ko, etke men in emaroñ bõk el̦ap iien?
13 Bar juon iaan jerbal ko an elder ro ej ñan lale aikuj ko an congregation eo. Rej kweilo̦k ippãn doon ñan etale aikuj ko an congregation eo im kõn wãween eo em̦m̦antata remaroñ jipañ er. Em̦ool emaroñ m̦õkaj ñe juon wõt elder ej kõm̦m̦ani aolep pepe ko. Bõtab, elder ro rainin rej l̦oor joñak eo an kumi eo ear loloorjake congregation ko ilo iien ko an rijjelõk ro. Eñin unin rej kwal̦o̦k l̦õmn̦ak ko aer im kõnono ippãn doon kaki im rej pukot naan in tõl ko jãn Baibõl̦ eo. Mejãnkajjik eo aer ej ñan kajerbali naan in tõl ko jãn Baibõl̦ eo ñan kajejjeti aikuj ko an congregation eo. Enaaj l̦ap aer jipañ congregation eo el̦aññe kajjojo iaaer rej kõppojakl̦o̦k im̦aan ñan iien kweilo̦k ko an elder ro. Ñe rej kõppojakl̦o̦k im̦aan rej aikuj pukot eoon ko im naan in tõl ko jãn ri karejar eo etiljek im mãlõtlõt. Ejjel̦o̦k pere enaaj bõk el̦ap iien ñan aer kõm̦m̦ane men in. Jet iien, l̦õmn̦ak ko an elder ro remaroñ oktak jañ doon. Men in ear ãindein ippãn kumi eo ear loloorjake congregation ko ilo iien ko an rijjelõk ro ke rar etale apañ eo kõn m̦wijm̦wij. Ñe men in ej wal̦o̦k, elder ro remaroñ aikuj bar iien ñan pukot mel̦el̦e ko jet me enaaj tõll̦o̦k er ñan juon wõt pepe ekkar ñan Baibõl̦ eo.—Jrb. 15:2, 6, 7, 12-14, 28.
14. El̦ap ke am̦ kam̦m̦oolol elder ro kõn aer bõrokuk ippãn doon? Etke?
14 Ak ta el̦aññe juon iaan elder ro em̦akoko in ukot l̦õmn̦ak eo an ak ej iuuni elder ro jet bwe ren l̦oore l̦õmn̦ak eo an make? Ak ta el̦aññe juon ej kõm̦m̦an jepel ikõtaan elder ro ãinwõt kar Diotrepis ilo iien ko an rijjelõk ro? (3 Jon 9, 10) Men in enaaj jelõt aolep ro ilo congregation eo. El̦aññe Setan ear kajjioñ in kõm̦m̦an poktak ko ilo congregation ko ilo iien ko an rijjelõk ro, ejjel̦o̦k pere bwe ekõn̦aan bar ko̦kkure aenõm̦m̦an eo ikõtaan ro jeid im jatid rainin. Emaroñ pidodo an kõm̦m̦ane men el̦aññe ewõr ippãn juon kõn̦aan eo ñan utiejl̦o̦k jãn ro jet. Eñin unin elder ro rej aikuj kate er ñan kõttãik wõt er im bõrokuk ippãn doon. El̦ap ad kam̦m̦oolol elder ro im rej kõttãik wõt er im bõrokuk ippãn doon!
Rej Lel̦o̦k Naan in Kauwe Ko
15. Ta unin elder ro rej lel̦o̦k naan in kauwe ko ñan ro jeer im jatier?
15 Paul ear wõnm̦aanl̦o̦k wõt im kwal̦o̦k bar juon jerbal an elder ro. Jerbal in epen ak el̦ap an aorõk. Ta jerbal in? Ej ñan lel̦o̦k naan in kauwe ko ñan ro uwaan congregation eo. Ilo Jeje ko ilo kajin Grik, rijjelõk Paul wõt ear kajerbal juon naan ilo kajin Grik im rar ukote ñan naan eo “kauwe.” Bõtab juon eo im ej kauwe bar juon ejjab kõm̦m̦ane men in ilo juon wãween elej. (Jrb. 20:31; 2 Te. 3:15) Ñan waanjoñak, Paul ear je ñan ri Korint ro im ba: “I jab jeje men kein bwe in [kajook] kom̦, a ãinwõt ro nejiõ jitõnbõro ij kauwe kom̦.” (1 Ko. 4:14) Paul ear lel̦o̦k naan in kauwe ko ñan er kõnke ear yokwe er.
16. Ñe elder ro rej lel̦o̦k naan in kauwe ko, ta eo rej aikuj keememeje?
16 Elder ro rej keememej bwe ñe rej lel̦o̦k naan in kauwe ko ñan ro jet rej aikuj kõm̦m̦ane ilo juon wãween ejouj. Rej kate er ñan kajjioñe Paul ilo aer kwal̦o̦k jouj im yokwe im pukot kilen ñan jipañ ro jet. (Riit 1 Tessalonika 2:11, 12.) Bõtab rej bareinwõt ‘dãpij wõt naan e m̦ool, bwe ren maroñ in katakin armej kõn naan in katak e jim̦we.’—Tai. 1:5-9.
17, 18. Ta eo kwõj aikuj keememeje el̦aññe juon elder ej lewõj naan in kauwe ko?
17 Elder ro rejjab weeppãn. Kõn men in, jet iien remaroñ ba men ko me tokãlik remaroñ ajl̦o̦k kake. (1 Kiñ 8:46; Jem. 3:8) Bareinwõt elder ro rejel̦ã bwe ro jeer im jatier ‘re jab m̦õn̦õn̦õ, ak rebũrom̦õj’ ñe rej aikuj lel̦o̦k naan in kauwe ko ñan er. (Hi. 12:11) Kõn men in, m̦okta jãn an juon elder lel̦o̦k naan in kauwe ko, ej lukkuun kõl̦mãnl̦o̦kjen̦ kõn apañ eo im jar kake. El̦aññe kwaar bõk naan in kauwe ko jãn juon elder, kwõj ke kile an elder in lukkuun yokwe eok?
18 Ñan waanjoñak, jen ba bwe ewõr juon am̦ nañinmej ak taktõ ro rejjab lo nañinmej eo am̦. Bõtab tokãlik juon taktõ ej lo nañinmej eo am̦ im el̦ap am̦ bũrom̦õj ke ej ba ñan eok. Kwõnaaj ke illu ippãn taktõ eo? Jaab! Kwõnaaj kar m̦õn̦õn̦õ in bõk jipañ jãn e. El̦aññe taktõ eo ej ba bwe kwõj aikuj m̦wijm̦wij kwõnaaj kar roñjake kõnke kwõjel̦ã bwe men in emaroñ kõm̦adm̦õde nañinmej eo. Bõlen kwõmaroñ jab m̦õn̦õn̦õ kõn wãween an kar taktõ eo jiroñ eok kõn nañinmej eo am̦. Bõtab kwõnaaj ke kõtl̦o̦k bwe men in en bõbraik eok jãn am̦ kajjioñ in kõm̦adm̦õde nañinmej eo? Ejjel̦o̦k pere, kwoban kar. Ãindeinl̦o̦k wõt, bõlen kwõmaroñ jab m̦õn̦õn̦õ kõn wãween an juon elder lewõj naan in kauwe ko ñan eok. Bõtab jab kõtl̦o̦k bwe men in en bõbraik eok jãn am̦ roñjake er. Jeova im Jijej rej kajerbal rein ñan kwal̦o̦k ñan eok kõn wãween ko me kwõmaroñ kõjparok jem̦jerã eo am̦ ippãn Jeova.
Kwal̦o̦k Am̦ Kam̦m̦oolol kõn Menin Letok eo an Jeova
19, 20. Ewi wãween kwõmaroñ kwal̦o̦k am̦ kam̦m̦oolole elder ro?
19 El̦aññe juon armej ear lewõj juon menin lewõj ñan kwe, kwõnaaj ke kwal̦o̦k am̦ kam̦m̦oolol kõn men eo im kortokjãn? Jeova ear kajerbal Jijej ñan lewõj elder ro ãinwõt juon ‘menin lewõj’ ñan eok. Juon wãween kwõmaroñ kwal̦o̦k am̦ kam̦m̦oolol kõn men in ej ilo am̦ kanooj roñjake katak ko an elder ro im kajjioñ in jerbale ilo mour eo am̦. Bar juon wãween ej ilo am̦ uwaak jãn bũruom̦ ilo kweilo̦k ko. Bareinwõt ilo am̦ rejetake elder ro ilo jerbal ko me rej kõm̦m̦ani ilo congregation eo ãinwõt jerbal in kwal̦o̦k naan. El̦aññe juon elder ear lewõj naan in kauwe ko im kwõj lo tokjãn ko rem̦m̦an kõn am̦ kar jerbali, kwõmaroñ kam̦m̦oolole elder eo. Kwõmaroñ bareinwõt kwal̦o̦k am̦ kam̦m̦oolol baam̦le ko an elder ro. Etke? Kõnke baam̦le ko an elder ro rej m̦õn̦õn̦õ in kaarmejjete iien ko aer ippãer bwe elder rein ren maroñ kajejjet jerbal ko aer ilo congregation eo.
20 Ewõr un ko ñan ad kam̦m̦oolole elder ro. Rein rej kate er ñan jerbal im rej letok naan in kauwe ko ñan kõj. Bareinwõt rej tõl jerbal ko ilo congregation eo. Jeova ej kalikkar an yokwe kõj ikijjeen an kar letok elder ro. Rein rej juon “menin letok” jãn Jeova!
Kwõj Keememej Ke?
• Etke ro ilo congregation eo ilo Tessalonika rar aikuj kwal̦o̦k aer kam̦m̦oolole elder ro?
• Elder ro ilo congregation eo am̦ rej kate er ñan jerbal. Ta men ko rej kõm̦m̦ani?
• Ta tokjãn ko rem̦m̦an kwõj loi kõn an elder ro tõl jerbal ko im lale congregation eo?
• Ta eo kwõj aikuj keememeje el̦aññe juon elder ej lewõj naan in kauwe ko ñan eok?
[Kajitõk ko ñan katak]
[Pija ilo peij 26]
Kwõj ke kam̦m̦oolol elder ro kõn men ko rej kõm̦m̦ani ñan lale congregation eo?