“Le Hlomphe Bao ba Šomago ka Thata Gare ga Lena”
“Le Hlomphe Bao ba Šomago ka Thata Gare ga Lena”
“Le hlomphe bao ba šomago ka thata gare ga lena gomme ba le okametše Moreneng e bile ba le eletša.”—1 BATHES. 5:12.
1, 2. (a) Boemo e be e le bofe phuthegong ya Thesalonika ge Paulo a be a ba ngwalela lengwalo la gagwe la pele? (b) Ke’ng seo Paulo a ilego a kgothaletša Bathesalonika go se dira?
INAGANE o le setho sa phuthego ya Thesalonika ya lekgolong la pele la nywaga, e lego e nngwe ya diphuthego tša pele tšeo di ilego tša hlongwa kua Yuropa. Moapostola Paulo o feditše nako e ntšinyana a aga bana babo rena moo. Go ka direga gore o be a kgethile banna ba bagolo gore ba etelele pele, go etša ge a dirile bjalo diphuthegong tše dingwe. (Dit. 14:23) Eupša ka morago ga gore phuthego e hlongwe, Bajuda ba ile ba kgoboketša lešaba la bahlolampherefere gore le ntšhe Paulo le Silase moo motseng. Bakriste bao ba bego ba šetše moo ba ka ba ba ile ba ikwa ba lahlilwe, mohlomongwe e bile ba tšhogile.
2 Go a kwagala gore ka morago ga gore Paulo a tloge moo Thesalonika, o ile a tshwenyega ka phuthego yeo e mpsha. O ile a leka go boela, eupša “Sathane a thiba” tsela ya gagwe. Ka gona o ile a romela Timotheo gore a kgothatše phuthego yeo. (1 Bathes. 2:18; 3:2) Eitše ge Timotheo a boa le pego e thabišago, Paulo o ile a šušumeletšega go ngwalela Bathesalonika lengwalo. Gare ga dilo tše dingwe tšeo a ba boditšego tšona, Paulo o ile a ba kgothaletša gore ‘ba hlomphe bao ba šomago ka thata gare ga bona.’—Bala 1 Bathesalonika 5:12, 13.
3. Ke mabaka afe ao Bakriste ba Thesalonika ba bego ba na le ona a gore ba bontšhe banna ba bagolo kgodišo e fetago e tlwaelegilego?
3 Bana babo rena bao ba bego ba eteletše pele gare ga Bakriste ba Thesalonika ba be ba se na phihlelo e swanago le ya Paulo le ya bao ba bego ba sepela le yena; e bile ba be ba se na bagolo bao ba hlanketšego nako e telele go swana le bao ba bego ba le Jerusalema. Ge e le gabotse, phuthego yeo e be e se na ngwaga e hlomilwe! Lega go le bjalo, bao ba bego ba le phuthegong yeo ba be ba na lebaka le le kwagalago la gore ba leboge banna bao ba bona ba bagolo, e lego bao ba bego ba ‘šoma ka thata’ e bile ba “okametše” phuthego le go “eletša” bana babo bona. Ruri ba be ba na le lebaka le le kwagalago la go “bontšha [bagolo bao] kgodišo e fetago e tlwaelegilego ka lerato.” Kgopelo ye e ile ya latelwa ke keletšo ya Paulo ya gore: “Ebang le khutšo seng sa lena.” Ge e ba o be o le moo Thesalonika, na o be o tla leboga mošomo wa bagolo ka pelo ka moka? O lebelela bjang “dimpho tšeo e lego banna” bao Modimo a ba neilego phuthego ya geno a diriša Kriste?—Baef. 4:8.
“Ba Šomago ka Thata”
4, 5. Ke ka baka la’ng e be e le mošomo o thata go bagolo ba mehleng ya Paulo go ruta phuthego, gomme ke ka baka la’ng seo se le bjalo le lehono?
4 Ka morago ga gore banna ba bagolo ba Thesalonika ba romele Paulo le Silase kua Berea, ba ile ba ‘šoma bjang ka thata’? Ga go pelaelo gore ba ile ba ekiša Paulo tabeng ya go ruta phuthego ba diriša Mangwalo. Mohlomongwe o ka ba o ipotšiša gore: ‘Na Bakriste ba Thesalonika ba be ba tšeela Lentšu la Modimo godimo?’ Ge e le gabotse, Beibele e re Baberea “e be e le ba ba bulegilego monaganong kudu go feta Bathesalonika, . . . ba hlahloba Mangwalo ka kelohloko letšatši le letšatši.” (Dit. 17:11) Lega go le bjalo, mo go be go bapetšwa Bajuda ba Thesalonika ka kakaretšo, e sego Bakriste ka moka. Bao ba ilego ba fetoga badumedi ‘ba ile ba amogela lentšu la Modimo kamoo le lego ka gona, e sego e le lentšu la batho.’ (1 Bathes. 2:13) Go bonagala banna ba bagolo ba ile ba šoma ka thata go fepa batho ba bjalo moyeng.
5 Lehono mohlanka yo a botegago le wa temogo o nea mohlape wa Modimo “dijo . . . ka nako e swanetšego.” (Mat. 24:45) Ba hlahlwa ke mohlanka yo, bagolo kae le kae ba šoma ka thata go fepa bana babo bona moyeng. Bao ba lego phuthegong ba ka ba ba na le dikgatišo tše dintši tše di theilwego Beibeleng, e bile malemeng a mangwe didirišwa tše bjalo ka Watch Tower Publications Index le Watchtower Library go CD-ROM di a hwetšagala. E le gore ba kgotsofatše dinyakwa tša moya tša phuthego, bagolo ba fetša diiri tše dintši ba lokišetša dipolelo tša diboka e le gore ba ka fetišetša ka katlego tsebišo yeo ba e abetšwego. Na o kile wa naganišiša ka nako yeo bagolo ba e fetšago ba lokišetša dipolelo tša diboka le tša dikopano tše dinyenyane le tše dikgolo?
6, 7. (a) Banna ba bagolo ba Thesalonika ba ile ba ithuta mohlala ofe go Paulo? (b) Ke ka baka la’ng e ka ba tlhohlo gore bagolo lehono ba ekiše Paulo?
6 Banna ba bagolo kua Thesalonika ba ile ba gopola mohlala o mobotse woo Paulo a o beilego tabeng ya go diša mohlape. O be a sa fo ba etela ka go ithola kgwara goba go fo phetha molao. Go etša ge re ahlaahlile seo kgaolong e fetilego, Paulo o “bile bonolo . . . , go etša ge mma yo a amušago a babalela bana ba gagwe.” (Bala 1 Bathesalonika 2:7, 8.) O be a bile a ikemišeditše ‘go fetišetša moya wa gagwe go bona’! Banna ba bagolo ba be ba swanetše go ba bjalo ka yena ge ba dira modiro wa bodiši.
7 Badiši ba Bakriste lehono ba ekiša Paulo ka go babalela mohlape. Tše dingwe tša dinku ka tlhago di ka ba di se borutho e bile di se na bogwera. Lega go le bjalo, bagolo ba leka go diriša temogo le go “hwetša tše botse” go bona. (Die. 16:20) Ke therešo gore ka ge mogolo a se a phethagala, a ka thatafalelwa ke go ba le pono e botse ka nku e nngwe le e nngwe. Lega go le bjalo, ge a dutše a leka ka sohle seo se lego matleng a gagwe gore a be bonolo go bohle, na ga se a swanela go retwa ka baka la maiteko a gagwe a gore e be modiši yo mobotse yo a šomago ka tlase ga Kriste?
8, 9. Ke ditsela dife tše dingwe tšeo bagolo ba mehleng yeno ‘ba hlokomelago meoya ya rena’?
8 Ka moka ga rena re na le lebaka la gore re ‘ikokobeletše’ bagolo. Go etša ge Paulo a ngwadile, “ba hlokomela meoya ya [rena].” (Baheb. 13:17) Mantšu ao a re gopotša modiši wa kgonthe yoo a felelwago ke boroko e le gore a šireletše mohlape. Ka mo go swanago, bagolo lehono ba ka upša ba se robale e le gore ba hlokomele dinyakwa tša bao ba sa phelago gabotse mmeleng goba ba nago le mathata maikwelong goba moyeng. Ka mohlala, bana babo rena bao ba lego Dikomiting tša go Hloma Kwano le Dipetlele ba ile ba tsošwa borokong gore ba thuše bao ba lego mathateng a tša kalafo. Eupša ge re lebane le maemo a bjalo, re tloga re leboga kudu tirelo ya bona!
9 Bagolo bao ba lego Dikomiting tša Meago tša Tikologo le dikomiting tša tlhakodišo ba šoma ka thata go thuša bana babo rena. Ruri re swanetše go ba thekga ka pelo ka moka! Nagana ka maiteko a tlhakodišo a ka morago ga Ledimo le legolo le bitšwago Nargis leo le fetilego Myanmar ka 2008. E le gore sehlopha sa tlhakodišo se fihle Phuthegong ya Bothingone tikologong ya Irrawaddy Delta e sentšwego o šoro ke ledimo leo, se ile sa phatša lefelo le le senyegilego wa go šiiša leo le bego le tletše ka ditopo. Ge bana babo rena ba lefelong leo ba bona gore sehlopheng sa pele sa tlhakodišo seo se fihlilego moo Bothingone go be go na le yoo e kilego ya ba molebeledi wa bona wa tikologo, ba ile ba goeletša ka gore: “Bonang! Ke molebeledi wa rena wa tikologo! Jehofa o re phološitše!” Na o tšeela godimo mošomo o mogolo woo bagolo ba o dirago mosegare le bošego? Bagolo ba bangwe ba kgethwa gore ba hlankele dikomiting tše di kgethegilego tša boahlodi gore ba swaragane le ditaba tše di raraganego tša boahlodi. Bagolo ba ga ba ikgantšhe ka seo ba se fihleletšego; eupša bao ba holwago ke tirelo ya bona ba tloga ba leboga e le ruri.—Mat. 6:2-4.
10. Ke mediro efe yeo re sa e bonego yeo bagolo ba e dirago?
10 Bagolo ba bantši lehono ba bile ba swanetše go dira mošomo wa go tlatšwa ga dipampiri. Ka mohlala, molomaganyi wa sehlopha sa bagolo o lokišetša mananeo a diboka tša beke le beke. Mongwaledi wa phuthego o kgoboketša pego ya kgwedi le kgwedi ya tirelo ya tšhemo gotee le pego ya ngwaga le ngwaga. Molebeledi wa sekolo o naganišiša ka šedi ge a dira lenaneo la sekolo. Dikgweding tše dingwe le tše dingwe tše tharo, go hlahlobja pego ya phuthego ya tša ditšhelete. Bagolo ba bala mangwalo a tšwago ofising ya lekala gomme ba latela tlhahlo yeo e thušago gore go be le “botee bja tumelo.” (Baef. 4:3, 13) Ka baka la maiteko a bjalo a bagolo bao ba šomago ka thata, “dilo ka moka di [dirwa] ka bothakga le ka thulaganyo.”—1 Bakor. 14:40.
‘Bao ba le Okametšego’
11, 12. Ke bomang bao ba okamelago phuthego, gomme seo se akaretša’ng?
11 Paulo o hlalositše banna ba bagolo ba šomago ka thata ba Thesalonika e le bao ba ‘okametšego’ phuthego. Lentšu la leleme la setlogo le ka bolela “go ema pele ga selo” gomme le ka fetolelwa e le “go lebiša; go etelela pele gare ga.” (1 Bathes. 5:12; mongwalo wa ka tlase wa Reference Bible.) Paulo o boletše ka bona bagolo bao gore “ba [šoma] ka thata.” O be a sa bolele ka ‘molebeledi o tee yo a okamelago,’ eupša o be a bolela ka banna ka moka ba bagolo ba phuthego. Lehono, bagolo ba bantši ba ema pele ga phuthego gomme ba swara diboka. Phetogo ya morago bjale ya gore go dirišwe polelwana “molomaganyi wa sehlopha sa bagolo” e re thuša go lebelela bagolo ka moka e le ditho tša mmele o tee.
12 ‘Go okamela’ phuthego go akaretša se se fetago go fo ruta. Polelwana e swanago e dirišwa go 1 Timotheo 3:4. Paulo o boletše gore molebeledi e swanetše go ba “motho yo a okamelago ba lapa la gagwe ka mokgwa o mobotse, a na le bana ba ikokobetšago bao ba sa tšeego dilo gabohwefo le gatee.” Mo go molaleng gore lentšu “okamelago” ga le akaretše feela go ruta bana ba gagwe eupša le akaretša go etelela pele ka lapeng le go ba le “bana ba ikokobetšago.” Ee, bagolo ba etelela pele ka phuthegong, e bile ba thuša bohle gore ba ikokobeletše Jehofa.—1 Tim. 3:5.
13. Ke ka baka la’ng go ka tšea nako pele go fihlelelwa phetho sebokeng sa bagolo?
13 E le gore bagolo ba okamele mohlape gabotse, ba ahlaahla ditaba seng sa bona kamoo ba ka swaraganago le dinyakwa tša phuthego. E ka no ba mo go lekanego gore mogolo o tee a dire diphetho ka moka. Eupša ka go latela mohlala wa sehlopha se bušago sa lekgolong la pele la nywaga, dihlopha tša bagolo tša mehleng yeno di ahlaahla ditaba ka bolokologi, di nyaka tlhahlo e tšwago ka Mangwalong. Pakane ya tšona ke go diriša melao ya motheo ya Mangwalo ka go dumelelana le dinyakwa tša phuthego. Se se atlega kudu ge e ba mogolo yo mongwe le yo mongwe a lokišetša diboka tša bagolo, a hlahloba Mangwalo le tlhahlo e tšwago go sehlopha sa mohlanka yo a botegago le wa temogo. Therešo ke gore se se nyaka nako. Ge e ba go eba le go se dumelelane ka dikgopolo, go etša ge go ile gwa ba bjalo nakong ya ge sehlopha se bušago sa lekgolong la pele la nywaga se be se ahlaahla taba ya lebollo, go ka nyakega nako e oketšegilego le nyakišišo e le gore go fihlelelwe phetho e tee yeo e theilwego Mangwalong.—Dit. 15:2, 6, 7, 12-14, 28.
14. Na o tloga o leboga gore sehlopha sa bagolo se šoma ka botee? Ke ka baka la’ng o ikwa ka tsela yeo?
14 Go ka direga’ng ge mogolo yo mongwe a phegelela gore go latelwe tsela ya gagwe goba a leka go phagamiša dikgopolo tša gagwe? Goba go ka thwe’ng ge motho yo mongwe—go swana le Dioterefe wa lekgolong la pele la nywaga—a bjala peu ya gore go se be le botee? (3 Joh. 9, 10) Ka ntle le pelaelo phuthego e tlo tlaišega. Ge e ba Sathane a lekile go šarakanya phuthego ya lekgolong la pele la nywaga, re ka kgodišega gore o nyaka go senya khutšo ya phuthego lehono. A ka gogela batho ka mekgwa ya boithati, e bjalo ka go kganyoga maemo. Ka gona, bagolo ba swanetše go hlagolela boikokobetšo gomme ba šome mmogo e le sehlopha se tee. Re tloga re leboga boikokobetšo bja bagolo bao ba šomago gotee e le sehlopha!
“Ba le Eletša”
15. Bagolo ba na le maikemišetšo afe ge ba eletša ngwanabo rena goba kgaetšedi?
15 Paulo o ile a ba a bolela ka modiro o mongwe o thata eupša o le bohlokwa wa banna ba bagolo: go eletša mohlape. Ka Mangwalong a Bakriste a Segerika, ke Paulo feela yo a dirišitšego lentšu la Segerika leo le fetoletšwego e le “eletša.” Le ka šupa go keletšo e matla eupša ga le bontšhe gore go na le bonaba. (Dit. 20:31; 2 Bathes. 3:15) Ka mohlala, Paulo o ngwaletše Bakorinthe gore: “Ke ngwala dilo tše, e sego go le hlabiša dihlong, eupša go le lemoša le le bana ba ka ba ba rategago.” (1 Bakor. 4:14) Maikemišetšo a gagwe a go eletša e be e le ka ge a tshwenyega ka ba bangwe.
16. Ke’ng seo bagolo ba dirago gabotse go se gopola ge ba eletša ba bangwe?
16 Bagolo ba dula ba gopola bohlokwa bja mokgwa woo ba o dirišago go eletša ba bangwe. Ba katanela go ekiša Paulo ka go ba botho, go ba le lerato le go ba ba thušago. (Bala 1 Bathesalonika 2:11, 12.) Ka kgonthe, bagolo ba ‘swarelela ka go tia lentšung le le botegago e le gore ba kgone go eletša ka thuto e phelago.’—Tito 1:5-9.
17, 18. O swanetše go dula o gopola’ng ge mogolo a go eletša?
17 Go ba gona, bagolo ga se ba phethagala gomme ba ka bolela dilo tšeo ba ka itsholelago tšona ka morago. (1 Dikg. 8:46; Jak. 3:8) Le gona bagolo ba a tseba gore gantši ga go ‘thabiše, eupša go bohloko’ go bana babo bona le dikgaetšedi ba moya go amogela keletšo. (Baheb. 12:11) Ka gona ge mogolo a batamela motho yo a itšego gore a mo eletše, gantši o dira seo ka morago ga ge a naganišišitše ka kelohloko ka taba yeo e bile a rapetše ka yona. Ge e ba o kile wa eletšwa, na o tšeela godimo go tshwenyega moo mogolo yoo a go bontšhitšego?
18 A re re mohlomongwe o be o na le bolwetši bjoo go bego go bonagala dingaka di ka se kgone go bo hlalosa. Ke moka ngaka e nngwe e go botša gore bolwetši bjoo ke bofe, eupša tsela yeo a fihleletšego phetho yeo wa hwetša e le thata go e amogela. Na o be o tla kgopišwa ke ngaka yeo? Aowa! Le ge a be a ka šišinya gore o ye go buiwa, go ka direga gore o tla dumela go alafša ka tsela yeo, o holofela gore o tla thušega. Tsela yeo ngaka yeo e go boditšego seo o swanetšego go se dira e ka go kgoma gampe maikwelong, eupša na o tla dumelela gore seo se laole phetho ya gago? Mohlomongwe go ka se be bjalo. Ka mo go swanago, o se ke wa dumelela tsela yeo o eletšwago ka yona e go thibela gore o theetše bao Jehofa le Jesu ba ka bago ba ba diriša go go botša kamoo o ka ikholago goba wa itšhireletša moyeng.
Leboga Tokišetšo ya Jehofa ya Bagolo
19, 20. O ka bontšha bjang gore o leboga “dimpho tšeo e lego banna”?
19 O be o ka dira’ng ge e ba o ka newa mpho yeo e bego e diretšwe wena ka go lebanya? Na o be o tla bontšha gore o a e leboga ka gore o e diriše? Jehofa o go neile “dimpho tšeo e lego banna” a diriša Jesu Kriste. Tsela e nngwe yeo o ka bontšhago gore o leboga dimpho tše ke ka gore o theetše ka kelohloko dipolelo tšeo di newago ke bagolo gomme o leke go diriša dintlha tšeo ba di tšweletšago. Le gona o ka bontšha gore o a leboga ka gore o nee dikarabo tše di agago dibokeng. Thekga modiro woo bagolo ba eteletšego pele go o dira, o bjalo ka wa bodiredi bja tšhemo. Ge e ba o ile wa holwa ke tayo yeo o e hweditšego go mogolo yo a itšego, go ka ba bjang ge o ka mmotša seo? Godimo ga moo, go ka ba bjang ge o ka bontšha gore o leboga malapa a bagolo? Gopola gore ge e ba mogolo a tla šoma ka thata ka phuthegong, lapa la gagwe le gafa nako yeo le bego le swanetše go e fetša le yena.
20 Ee, re na le mabaka a kwagalago a go leboga bagolo, e lego bao ba šomago ka thata gare ga rena, bao ba re okametšego e bile ba re eletšago. “Dimpho [tše] tšeo e lego banna” e tloga e le tokišetšo e lerato e tšwago go Jehofa!
Na o a Gopola?
• Ke mabaka afe ao Bakriste ba Thesalonika ba bego ba na le ona a gore ba tšeele godimo bao ba bego ba etelela pele gare ga bona?
• Bagolo ba phuthego ya geno ba šoma bjang ka thata go go hola?
• O holwa bjang ke taba ya gore bagolo ba go okametše?
• Ke’ng seo o swanetšego go dula o se gopola ge mogolo a go eletša?
[Dipotšišo tša Thuto]
[Seswantšho go letlakala 27]
Na o lemoga ditsela tše dintši tšeo bagolo ba dišago phuthego ka tšona?