Чи уӕм фыдӕбон кӕны, уыдоны нымайут

«Чи уӕм фыдӕбон кӕны, Хицауы хъуыддаджы уын разамынд чи дӕтты ӕмӕ уын зонд чи амоны, уыдоны нымайут» (1 ФЕС. 5:12).

1, 2. а) Павел Фессалоникӕйы ӕмбырдмӕ йӕ фыццаг фыстӕг куы ныффыста, уӕд цы уавӕры уыдысты? ӕ) Павел фессалоникаг чырыстӕтты цӕмӕ разӕнгард кодта?

ЗӔГЪӔМ, ды дӕр дӕ фыццаг ӕнусы Фессалоникӕйы ӕмбырды. Уый уыд Европӕйы фыццаг ӕмбырдтӕй иу. Апостол Павел Фессалоникӕйы аззад дзӕвгар рӕстӕг, цӕмӕй ӕфсымӕртӕн баххуыс кодтаид. Ӕвӕццӕгӕн, хистӕр нӕлгоймӕгты уыцы ӕмбырды дӕр ӕмӕ ӕндӕр ӕмбырдты дӕр уый сӕвӕрдта (Хъуыд. 14:23). Фӕлӕ уыцы ӕмбырд куы фӕзынд, уӕд горӕты цӕрӕг дзуттӕгтӕ ӕрӕмбырд сты, ӕмӕ Павел ӕмӕ Силӕйы горӕтӕй ратардтой. Ӕмӕ, горӕты чи баззад, уыцы чырыстӕттӕ, ӕвӕццӕгӕн, хъуыды кодтой, ныр цы кӕндзыстӕм, зӕгъгӕ. Стӕй сӕ, ӕвӕццӕгӕн, тас дӕр бацыд.

² Павел Фессалоникӕйӕ куы ацыд, уӕд уыцы ног ӕмбырдмӕ йӕ зӕрдӕ ӕхсайдта. Фӕндыди йӕ фӕстӕмӕ ӕрцӕуын, фӕлӕ йӕ «Сайтан бакъуылымпы кодта». Уӕд сӕм Тимофейы арвыста, цӕмӕй сын сӕ ныфсыл ныфс бафтыдтаид (1 Фес. 2:18; 3:2). Ӕмӕ фӕстӕмӕ Павелмӕ куы ’рбаздӕхти, уӕд ын хорз хабӕрттӕ ӕрбахаста, ӕмӕ уӕд Павел фессалоникӕгтӕм фыстӕг ныффыста. Цы сӕм ныффыста, уымӕй уӕлдай ма сӕ разӕнгард кодта, цӕмӕй сын разамынд чи лӕвӕрдта, уыдоны нымадтаиккой. (Бакӕс 1 Фессалоникӕгтӕм 5:12, 13.)

3. Фессалоникаг чырыстӕттӕ се ’мбырды хистӕр нӕлгоймӕгтӕн цӕмӕн хъуамӕ аргъ кодтаиккой?

 ³ Фессалоникӕйы ӕмбырды цы бӕрнон ӕфсымӕртӕ уыди, уыдон Павел ӕмӕ йе ’мбӕлццонты хуызӕн фӕлтӕрдджын нӕ уыдысты. Стӕй, Иерусалимы чи цард, уыцы хистӕр нӕлгоймӕгтау сӕм бирӕ зонындзинӕдтӕ нӕ уыд. Фессалоникӕйы ӕмбырдыл иу аз дӕр нӕма цыд. Фӕлӕ уӕддӕр хотӕ ӕмӕ ӕфсымӕртӕ сӕ хистӕр нӕлгоймӕгтӕй хъуамӕ бузныг уыдаиккой, уыдоны тыххӕй кӕй фыдӕбон кодтой, разамынд сын кӕй лӕвӕрдтой ӕмӕ сын зонд кӕй амыдтой, уый тыххӕй. Стӕй сын хъуамӕ «сӕ фыдӕбоны тыххӕй... стыр аргъ кодтаиккой ӕмӕ сӕ уарзтаиккой». Павел ма сын афтӕ кӕй загъта, «уӕ кӕрӕдзиимӕ хӕларӕй цӕрут», зӕгъгӕ, уыцы уынаффӕмӕ дӕр хъуамӕ хъуыстаиккой. Ды дӕр Фессалоникӕйы ӕмбырды куы уыдаис, уӕд хистӕр нӕлгоймӕгты фыдӕбонӕн нӕ аргъ кодтаис? Хуыцау уе ’мбырдӕн Чырыстийы уылты цы «лӕвӕрттӕ – адӕймӕгтӕ» радта, уыдонмӕ цы цӕстӕй кӕсыс? (Еф. 4:8).

«Фыдӕбон кӕнынц»

4, 5. Павелы рӕстӕг хистӕр нӕлгоймӕгтӕ ӕмбырды тыххӕй куыд фыдӕбон кодтой ӕмӕ абон дӕр хистӕр нӕлгоймӕгтӕ куыд фыдӕбон кӕнынц?

⁴ Фессалоникаг хистӕр нӕлгоймӕгтӕ Павел ӕмӕ Силӕйы Веримӕ куы ахизын кодтой, уӕд цымӕ уыцы хистӕр нӕлгоймӕгтӕ ӕмбырды тыххӕй куыд «фыдӕбон кодтой»? Уыдон дӕр Павелау ӕмбырд ахуыр кодтой Фыстады фӕрцы. Фӕлӕ, чи зоны, хъуыды кӕныс: «Цымӕ фессалоникаг чырыстӕттӕ Хуыцауы Ныхасӕн аргъ кодтой?» Библийы иу ран фыст ис, зӕгъгӕ, вериӕгтӕ «фессалоникӕгтӕй хуыздӕр зондыл хӕст уыдысты: уыдон... алы бон дӕр Фыстад лӕмбынӕг иртӕстой» (Хъуыд. 17:11). Зӕгъын хъӕуы уый, ӕмӕ вериӕгты абарстой Фессалоникӕйы цӕрӕг чырыстӕттимӕ нӕ, фӕлӕ дзы цы дзуттӕгтӕ цард, уыдонимӕ. Уырнджытӕ чи систы, уыдон «Хуыцауы ныхас куы фехъуыстой, уӕд ӕй адӕймаджы ныхасыл нӕ банымадтой, фӕлӕ... Хуыцауы ныхасыл» (1 Фес. 2:13). Ӕвӕццӕгӕн, хистӕр нӕлгоймӕгтӕ бирӕ фыдӕбон кодтой, цӕмӕй се ’мбырд фидар уыдаид.

⁵ Абон ӕууӕнкджын ӕмӕ зондджын цагъары къорд Хуыцауы дзугӕн «хӕринаг афоныл дӕтты» (Матф. 24:45). Цагъары разамынды фӕрцы ӕмбырдты хистӕр нӕлгоймӕгтӕ фыдӕбон кӕнынц, цӕмӕй хоты ӕмӕ ӕфсымӕрты уырнындзинад фидар уа. Ӕмбырдты бирӕтӕм парахатӕй ис, Библи чи ӕмбарын кӕны, ахӕм публикацитӕ. Иуӕй-иу ӕвзӕгтыл ма ис «Хъахъхъӕнӕн мӕсыджы уагъд литературӕйы индекс» кӕнӕ «Хъахъхъӕнӕн мӕсыджы библиотекӕ» компакт-дискыл. Цӕмӕй хистӕр нӕлгоймӕгтӕ ӕмбырды уырнындзинад фидар кӕной, уый тыххӕй сӕ бахъӕуы бирӕ рӕстӕг фембӕлдтӕм цӕттӕ кӕнынӕн. Искуы хъуыды кодтай, хистӕр нӕлгоймӕгтӕ цас рӕстӕг бахардз кӕнынц, цӕмӕй фембӕлдтӕм ӕмӕ конгресстӕм сӕ раныхӕстӕ бацӕттӕ кӕной?

6, 7. а) Фессалоникаг хистӕр нӕлгоймӕгтӕ Павелы куыд фӕзмыдтой? ӕ) Хистӕр нӕлгоймӕгтӕн Павелы фӕзмын зын цӕмӕн вӕййы?

⁶ Павел Хуыцауы дзугыл куыд узӕлыд, уымӕй фессалоникаг хистӕр нӕлгоймӕгтӕн ныууагъта диссаджы цӕвиттон. Павел йе ’муырнджытыл зӕрдиагӕй аудыдта ӕмӕ сын йӕ уд нӕ хӕлӕг кодта. Ӕмӕ амӕй размӕйы статьяйы куыд дзырдтам, афтӕмӕй сӕ Павел «рӕвдыдта, дзидзидарӕг мад йӕ хъӕбулты куыд фӕрӕвдауы, афтӕ». (Бакӕс 1 Фессалоникӕгтӕм 2:7, 8.) Цӕттӕ уыд суанг йӕ уд раттынмӕ дӕр! Ӕмӕ йӕ хистӕр нӕлгоймӕгтӕ дӕр фӕзмыдтой.

⁷ Абон дӕр хистӕр нӕлгоймӕгтӕ фӕзмынц Павелы. Раст ӕй куы зӕгъӕм, уӕд фыстӕ иууылдӕр иухуызон не сты – иутӕ дзы иннӕты хуызон цингӕнаг ӕмӕ хӕларзӕрдӕ не сты. Фӕлӕ уӕддӕр хистӕр нӕлгоймӕгтӕ архайынц, цӕмӕй уой ӕмбаргӕ ӕмӕ сын сӕ хорз миниуджытӕ уыной (Ӕмб. 16:20). Хистӕр нӕлгоймӕгтӕ ӕнӕххӕст кӕй сты, уымӕ гӕсгӕ хъуамӕ ӕппӕт тыхтӕй архайой, цӕмӕй алкӕмӕдӕр раст цӕстӕй кӕсой. Чырыстийы ӕвзӕрст фыййӕуттӕ тынг архайынц, цӕмӕй алкӕимӕ дӕр фӕлмӕнзӕрдӕ уой. Ӕмӕ уый тыххӕй раппӕлинаг не сты?

8, 9. Абон ныл хистӕр нӕлгоймӕгтӕ цавӕр хъуыддӕгты тыхсынц?

⁸ Мах хъуамӕ хистӕр нӕлгоймӕгты «коммӕ кӕсӕм», уымӕн ӕмӕ, Павел куыд ныффыста, афтӕмӕй «уыдон ӕдзухдӕр махыл тыхсынц» (Дзут. 13:17). Ацы ныхӕстӕ кӕсгӕйӕ нӕ  цӕстытыл ауайы, йӕ дзуг бахъахъхъӕныны тыххӕй бирӕ хатт ӕхсӕв фынӕй дӕр чи нӕ бакӕны, ахӕм фыййау. Афтӕ абон дӕр хистӕр нӕлгоймӕгтӕ арвитынц ӕгъуыссӕг ӕхсӕвтӕ, цӕмӕй, рынчын чи у, йӕхимӕ чи ныхъхъуыста кӕнӕ йӕ уырнындзинад кӕмӕн ӕрлӕмӕгъ, уыдонӕн истӕмӕй баххуыс кӕной. Дзырдӕн, рынчындӕттимӕ бастдзинады комитеты цы ’фсымӕртӕ ис, уыдон хатт ӕхсӕв дӕр сыстынц, цӕмӕй, се ’муырнджытӕй чи фӕтыхст, уымӕн йӕ фарсмӕ балӕууой. Уӕдӕ нын хистӕр нӕлгоймӕгтӕ афтӕ кӕй ӕххуыс кӕнынц, уый тыххӕй сӕ бузныг куыннӕ хъуамӕ уӕм!

⁹ Регионалон арӕзтадон комитетты ӕмӕ ӕххуысы комитетты чи ис, уыцы хистӕр нӕлгоймӕгтӕ дӕр се ’фсымӕрты тыххӕй сӕхиуыл нӕ ауӕрдынц. Уыдон уый аккаг сты, цӕмӕй сын ӕппӕт зӕрдӕйӕ ӕххуыс кӕнӕм! Ӕркӕсӕм-ма иу хабармӕ. 2008 азы Мьянмӕйы рацыд циклон «Наргис». Уыцы циклон стыр зиан ӕрхаста Иравадийы цӕугӕдон кӕуылты кӕлы, уыцы регионӕн. Ӕххуысы комитет кӕйдӕрты ӕххуысмӕ арвыста уыцы регионы иу хъӕумӕ, Ботингонмӕ, зӕгъгӕ. Уыдоны бахъуыди цӕуын, циклон стыр зиӕнттӕ кӕм ӕрхаста ӕмӕ алырдыгӕй мӕрдтӕ кӕм уыди, ахӕм ран. Ӕххуысгӕнджыты фыццаг къорд Ботингонмӕ куы бахӕццӕ ӕмӕ сӕ бынӕттон ӕфсымӕртӕ куы федтой, стӕй ма сын се ’хсӕн сӕ раздӕры районон цӕстдарӕджы дӕр куы суыдтой, уӕд ныхъхъӕр кодтой: «Уӕртӕ-ма нӕ районон цӕстдарӕг! Йегъовӕ нӕ фервӕзын кодта!» Хистӕр нӕлгоймӕгтӕ ӕхсӕвӕй-бонӕй кӕй фыдӕбон кӕнынц, уымӕн аргъ кӕныс? Иуӕй-иу хистӕр нӕлгоймӕгтӕ нысангонд сты, цӕмӕй вазыгджын юридикон хъуыддӕгтӕ ӕвзарой. Ӕмӕ сын исты куы бантысы, уӕд сӕхицӕй нӕ ныббуц вӕййынц. Сӕ лӕггадӕй пайда кӕмӕн ӕрхӕссынц, уыдон сӕ зӕрдиагӕй бузныг вӕййынц (Матф. 6:2–4).

10. Хистӕр нӕлгоймӕгтӕ ма цавӕр куыст фӕкӕнынц?

¹⁰ Бирӕ хистӕр нӕлгоймӕгты ма фӕхъӕуы гӕххӕттытимӕ архайын дӕр. Зӕгъӕм, хистӕр нӕлгоймӕгты советы координатор ӕфсымӕртӕн алы къуырийӕн дӕр хӕслӕвӕрдтӕ байуары. Ӕмбырды секретарь банымайы уацамындон хыгъдтӕ алы мӕйы кӕрон дӕр ӕмӕ афӕдзы кӕрон дӕр. Скъолайы цӕстдарӕг та рагацау лӕмбынӕг фӕхъуыды кӕны, кӕмӕн цы хӕслӕвӕрд ратта, ууыл. Хистӕр нӕлгоймӕгтӕ ма алы ӕртӕ мӕй дӕр ӕхцайы хыгъдтӕм ӕркӕсынц ӕмӕ сӕ банымайынц. Стӕй ма бакӕсынц, филиалӕй цы писмотӕ райсынц, уыдон ӕмӕ дзы цы амындтӕ вӕййы, уыдонмӕ гӕсгӕ фӕархайынц, цӕмӕй «уырнындзинады... не ’ппӕт дӕр иу зондыл» хӕст уӕм (Еф. 4:3, 13). Афтӕ кӕй фыдӕбон кӕнынц, уый фӕрцы «алцыдӕр у уаг ӕмӕ ӕгъдауыл» (1 Кор. 14:40).

«Разамынд... дӕттынц»

11, 12. Ӕмбырдӕн разамынд чи дӕтты ӕмӕ уыцы разамындмӕ цы хауы?

¹¹ Павел фессалоникаг хистӕр нӕлгоймӕгтӕй загъта, зӕгъгӕ, уыдон фыдӕбон кӕнынц ӕмӕ ӕмбырдӕн «разамынд... дӕттынц» (1 Фес. 5:12). Павел ӕрмӕст иу хистӕр нӕлгоймаджы кой нӕ кодта, фӕлӕ ӕмбырды алы хистӕр нӕлгоймаджы кой дӕр. Абон хистӕр нӕлгоймӕгтӕй бирӕтӕ хотӕн ӕмӕ ӕфсымӕртӕн разамынд дӕттынц ӕмбырды фембӕлдтӕ уадзгӕйӕ. Ӕмӕ ӕрӕджы цы ивындзинад ӕрцыд, ома ӕмбырдты сӕрдариуӕггӕнӕг цӕстдарджытӕ кӕй нал уыдзӕн, фӕлӕ хистӕр нӕлгоймӕгты советы координатортӕ, уымӕ гӕсгӕ хистӕр нӕлгоймӕгтӕм хъуамӕ кӕсӕм, ӕмгуыст чи кӕны, ахӕм къордмӕ.

¹² Разамынд дӕттын ӕрмӕст уый нӕ нысан кӕны, ӕмӕ ӕмбырд ахуыр кӕнай. 1 Тимофеймӕ 3:4 цы дзырд ӕмбӕлы, «уынаффӕгӕнӕг», зӕгъгӕ, уымӕн дӕр йӕ нысаниуӕг ахӕм у. Павел загъта, зӕгъгӕ, цӕстдарӕг хъуамӕ «йӕ бинонтӕн уа хорз уынаффӕгӕнӕг, йӕ сывӕллӕттӕ уой коммӕгӕс ӕмӕ уӕззау зондыл хӕст». Дзырд «уынаффӕгӕнӕг»-ӕн ам йӕ хъуыды ӕрмӕст сывӕллӕтты ахуыр кӕнын нӕу, фӕлӕ ма бинонтӕн разамынд дӕттын дӕр, цӕмӕй «сывӕллӕттӕ уой коммӕгӕс». О, хистӕр нӕлгоймӕгтӕ ӕмбырдӕн разамынд дӕттынц ӕмӕ алкӕмӕндӕр ӕххуыс кӕнынц, цӕмӕй Йегъовӕйы коммӕ кӕсой (1 Тим. 3:5).

13. Хистӕр нӕлгоймӕгты цавӕрдӕр хъуыддаджы фӕдыл иу хъуыдымӕ ӕрцӕуынӕн фылдӕр рӕстӕг цӕмӕн бахъӕуы?

¹³ Цӕмӕй хистӕр нӕлгоймӕгтӕ Хуыцауы дзугӕн хорз разамынд дӕттой, уый тыххӕй ӕмбырды хъуыддӕгтӕ хъуамӕ иумӕ ӕвзарой.  Чи зоны, афтӕ зына, ӕмӕ ӕппӕт уынаффӕтӕ дӕр иу хистӕр нӕлгоймаг куы хӕсса, уӕд хуыздӕр уыдзӕн. Фӕлӕ абон хистӕр нӕлгоймӕгты советтӕ рагон разамонӕг советы кӕй фӕзмынц, уымӕ гӕсгӕ, куы ӕрӕмбырд вӕййынц, уӕд иууылдӕр сӕ хъуыдытӕ фӕдзурынц сӕрибарӕй ӕмӕ разамынд фӕагурынц Фыстады. Сӕ нысан вӕййы, цӕмӕй Библийы уагӕвӕрдтӕ се ’мбырдӕн пайда ӕрхӕссой. Ӕмӕ-иу уый сӕ къухы бафтдзӕн, алчидӕр-иу сӕ йӕхи уыцы фембӕлдмӕ куы цӕттӕ кӕна, уӕд: куы-иу ӕркӕса Библимӕ ӕмӕ ӕууӕнкджын цагъары къорды амындтӕм. Уый тыххӕй та хъӕуы рӕстӕг. Цавӕрдӕр хъуыддаджы фӕдыл сӕм алыхуызон хъуыдытӕ куы уа, уӕд сӕ уыцы хъуыддаг хуыздӕр раиртасынӕн, чи зоны, бахъӕуа фылдӕр рӕстӕг, цӕмӕй Фыстадмӕ гӕсгӕ иу хъуыдымӕ ӕрцӕуой. Афтӕ бакодта фыццаг ӕнусы разамонӕг совет, чырыстӕттӕм сунӕт кӕныны фӕдыл алыхуызон хъуыдытӕ куы уыди, уӕд (Хъуыд. 15:2, 6, 7, 12–14, 28).

14. Хистӕр нӕлгоймӕгтӕ ӕмгуыст кӕй кӕнынц, уымӕн аргъ кӕныс? Цӕмӕн?

¹⁴ Фӕлӕ хистӕр нӕлгоймӕгтӕй исчи йӕхи ныхас куы кӕна, уӕд та? Кӕнӕ исчи фыццаг ӕнусы цӕрӕг Диотрефау иуты иннӕты ныхмӕ куы кӕна? (3 Иоан. 9, 10). Уӕд уый ӕнӕхъӕн ӕмбырдыл ӕвзӕрырдӕм фӕзындзӕн. Кӕд Хӕйрӕг фыццаг ӕнусы чырыстӕтты змӕста, уӕд абон дӕр ӕмбырды фарн халдзӕн. Хӕйрӕг, гӕнӕн ис, ӕмӕ спайда кӕна адӕймаджы хиуарзондзинадӕй, зӕгъӕм, цӕмӕй йын иннӕты цӕсты кад уа, уымӕй. Фӕлӕ хистӕр нӕлгоймӕгтӕ хъуамӕ сӕ удыхъӕды фидар кӕной сӕрныллӕгдзинад ӕмӕ кӕрӕдзиимӕ ӕмгуыст кӕной. Куыд тынг аргъ кӕнӕм, сӕрныллӕгӕй ӕмгуыст чи кӕны, уыцы хистӕр нӕлгоймӕгтӕн!

«Зонд... амонынц»

15. Хистӕр нӕлгоймӕгтӕ хотӕн ӕмӕ ӕфсымӕртӕн зонд цӕмӕн фӕамонынц?

¹⁵ Павел ма хистӕр нӕлгоймӕгтӕн бафӕдзӕхста иу зын, фӕлӕ ахсджиаг хъуыддаг –  ӕмбырдӕн зонд амонын. Чырыстон Грекъаг Фыстыты ӕрмӕстдӕр Павел спайда кодта дзырдбаст «зонд амонын»-ӕй. Ацы дзырдбаст амоны адӕймагӕн комкоммӕ уынаффӕ раттынмӕ, знаджы цӕстӕй йӕм кӕсынмӕ нӕ, фӕлӕ (2 Фес. 3:15). Зӕгъӕм, Павел йӕ фыстӕджы Коринфӕгтӕм ныффыста: «Адӕттӕ уӕм уый тыххӕй нӕ фыссын, цӕмӕй уӕм худинаг ӕркӕса, фӕлӕ уын мӕ уарзон хъӕбултау зонд амонын» (1 Кор. 4:14). Павел сын зонд уый тыххӕй амыдта, ӕмӕ сыл йӕ зӕрдӕ рысти.

16. Хистӕр нӕлгоймӕгтӕ иннӕтӕн зонд куы фӕамонынц, уӕд сӕ хъуыдыйы цы хъуамӕ дарой?

¹⁶ Хистӕр нӕлгоймӕгтӕ хъуамӕ алы хатт дӕр хъуыды кӕной, иннӕтӕн зонд куыд фӕамонынц, ууыл. Уыдон дӕр фӕзмынц Павелы, ӕмӕ архайынц, цӕмӕй уой фӕлмӕн, хӕларзӕрдӕ ӕмӕ сӕ уд иннӕтӕн ма хӕлӕг кӕной. (Бакӕс 1 Фессалоникӕгтӕм 2:11, 12.) Хистӕр нӕлгоймӕгтӕ «иннӕты ахуыргӕнгӕйӕ фидар хӕцынц, ӕууӕндӕн кӕуыл ис, уыцы ныхасыл, цӕмӕй сӕ бон уа раст ахуырады фӕрцы зонд амонын» (Тит. 1:5–9).

17, 18. Хистӕр нӕлгоймаг дын уынаффӕ куы ратта, уӕд дӕ зӕрдыл цы хъуамӕ дарай?

¹⁷ Кӕй зӕгъын ӕй хъӕуы, хистӕр нӕлгоймӕгтӕ дӕр ӕнӕххӕст сты, ӕмӕ цы фӕзӕгъынц, ууыл хатт фӕсмон дӕр фӕкӕнынц (1 Пад. 8:46; Иак. 3:8). Стӕй ӕмбарынц, хойӕн кӕнӕ ӕфсымӕрӕн уынаффӕ куы раттынц, уӕд ын уый алы хатт «ӕхсызгон нӕ вӕййы – хъыг ӕм фӕкӕсы» (Дзут. 12:11). Уӕдӕ хистӕр нӕлгоймаджы куы фӕнда искӕмӕн уынаффӕ раттын, уӕд хъуамӕ уыцы хъуыддагыл раздӕр лӕмбынӕг ахъуыды кӕна ӕмӕ скува. Кӕд дын хистӕр нӕлгоймаг уынаффӕ радта, уӕд дзы бузныг дӕ?

¹⁸ Зӕгъӕм, фӕрынчын дӕ. Дохтырмӕ бацыдтӕ, басгӕрста дӕ, ӕмӕ дын дӕ низыхатт сбӕрӕг кодта. Фӕлӕ дын ӕй куы загъта, уӕд арвыцӕфау фӕдӕ. Уӕд, мыййаг, дохтырмӕ смӕсты уыдзынӕ? Нӕ, не смӕсты уыдзынӕ. Афтӕ дын куы зӕгъа, зӕгъгӕ дӕ операци скӕнын хъӕуы, уӕд, ӕвӕццӕгӕн, ууыл дӕр сразы уыдзынӕ, уымӕн ӕмӕ афтӕмӕй дӕ низӕй фервӕздзынӕ. Дохтыр дын дӕ низы тыххӕй куыдфӕнды ма зӕгъа, уӕддӕр цымӕ дӕ фӕнд аивдзынӕ? Ӕвӕццӕгӕн, нӕ. Хистӕр нӕлгоймаг дӕр дын уынаффӕ куыдфӕнды ма ратта, уӕддӕр-иу ӕм байхъус. Уымӕн ӕмӕ нын Йегъовӕ ӕмӕ Йесо уыдоны уылты ӕмбарын кӕнынц, нӕ уырнындзинад бахъахъхъӕнын нӕ бон куыд у, уый.

Йегъовӕ нын цы «лӕвӕрттӕ» радта, уыдонӕн аргъ кӕнӕм

19, 20. Хистӕр нӕлгоймӕгтӕн кӕй аргъ кӕныс, уый дӕ бон куыд у равдисын?

¹⁹ Исчи дын исты куы балӕвар кӕна, уӕд дын ӕхсызгон нӕ уыдзӕн? Нӕ дзы пайда кӕндзынӕ? Махӕн Йегъовӕ Йесо Чырыстийы уылты радта «лӕвӕрттӕ – адӕймӕгтӕ». Ӕмӕ сын кӕй аргъ кӕнӕм, уый нӕ бон у равдисын, сӕ раныхӕстӕм сын лӕмбынӕг куы хъусӕм ӕмӕ цы фӕдзурынц, уымӕй царды куы пайда кӕнӕм, уӕд. Кӕй сын аргъ кӕныс, уый ма дӕ бон равдисын у, ӕмбырды фембӕлдты арфхъуыдыджын дзуаппытӕ куы дӕттай, уымӕй. Ӕххуыс кӕн, разамынд цы хъуыддагӕн дӕттынц, уымӕн – хъусын кӕныны хъуыддагӕн. Кӕд дын хистӕр нӕлгоймӕгтӕй искӕй уынаффӕ пайда ӕрхаста, уӕд хорз нӕ уаид, куы йӕм бацӕуис ӕмӕ йын куы раарфӕ кӕнис? Хистӕр нӕлгоймӕгтӕн ӕмбырды хъуыддӕгтыл цы рӕстӕг ацӕуы, уый сӕ бинонтӕй раскъуынынц, ӕмӕ уый тыххӕй сӕ бинонтӕй бузныг хъуамӕ ма уӕм?

²⁰ Хистӕр нӕлгоймӕгтӕ мах тыххӕй бирӕ кӕй фыдӕбон кӕнынц, разамынд нын кӕй дӕттынц ӕмӕ нын зонд кӕй амонынц, уый тыххӕй сын нӕ зӕрдӕбын арфӕйы ныхӕстӕ хъуамӕ ма ӕвгъау кӕнӕм. Хистӕр нӕлгоймӕгтӕ сты нӕ уарзӕгой Хуыцау Йегъовӕйы «лӕвӕрттӕ»!

Бахъуыды кодтай?

• Фессалоникӕйы цӕрӕг чырыстӕттӕ сӕ хистӕр нӕлгоймӕгтӕй бузныг цӕй тыххӕй уыдысты?

• Не ’мбырды хистӕр нӕлгоймӕгтӕ мах тыххӕй куыд фыдӕбон кӕнынц?

• Уе ’мбырдӕн хистӕр нӕлгоймӕгтӕ разамынд кӕй дӕттынц, уый уын цы пайда хӕссы?

• Хистӕр нӕлгоймаг дын зонд куы амона, уӕд дӕ зӕрдыл цы хъуамӕ дарай?

[Фарстатӕ ахуыр кӕнынӕн]

[Ныв 27 фарсыл]

Хистӕр нӕлгоймӕгты фыдӕбонӕн аргъ кӕныс?