“Respeto Yo Iramay Mansasagpot ed Limog Yo”

“Respeto yo iramay mansasagpot ed limog yo tan mangidadaulo ed sikayo ed kimey na Katawan tan manisimbawa ed sikayo.”​—1 TES. 5:12.

1, 2. (a) Antoy situasyon na kongregasyon ed Tesalonica sanen ginawa nen Pablo so unonan sulat tod sikara? (b) Antoy impaseseg nen Pablo a gawaen na saray agagi ed Tesalonica?

IMADYIN mo pan kabiangan ka na kongregasyon ed Tesalonica nen inmunan siglo. Sakey itan ed saray sankaunaan a kongregasyon diad Europa. Nambayag ditan si apostol Pablo pian pabiskegen iray agagi. Nayarin sikatoy anuro na mangidaulon mamatatken, a singa ginawa to met ed arum a kongregasyon. (Gawa 14:23) Balet asabi panaon, saray Judio et anugyop na grupon manggulo ed syudad tan pinaalis day Pablo tan Silas. Nayarin inisip na saray Kristiano diman a bukbukor da la, tan ompan natatakot ni ra ingen.

² Seguradon mapagpagay Pablo ed ataynan ton balobalon kongregasyon diad Tesalonica. Sinali toy ompawil, balet “sinaraan nen Satanas so dalan” to. Kanian imbaki toy Timoteo pian pabiskegen so kongregasyon. (1 Tes. 2:18; 3:2) Sanen impasabi nen Timoteo so maong a balita nipaakar ed saray agagi, apakiwas si Pablo a sulatan ira. Diad satan a sulat et pinaseseg to ran ‘respetoen da iramay mangidadaulo ed sikara.’​—Basaen so 1 Tesalonica 5:12, 13.

3. Akin et manepeg ya ipanengneng na saray agagid Tesalonica so mas aralem a panamabli ed saray mamatatken?

³ Saray mangidadaulo ed kongregasyon na Tesalonica et aliwa nin eksperiensyado a singa si Pablo tan saray kaiba ton ombibisita. Tan aliwa  ran singa saramay mamatatken ed Jerusalem ya abayag lad katuaan. Sakey ni, agni ataonan iyan kongregasyon! Balet, manepeg labat ya apresyaen na saray agagi ditan irayan mamatatken a “mansasagpot,” “mangidadaulo,” tan “manisimbawa” ed sikara. On, nepeg dan ‘ipanengneng so mas aralem a panamabli tan panangaro’ ed saray mamatatken. Insan ira binilin nen Pablo ya ‘pansiansiaen day kareenan ed sakey tan sakey.’ No sakey kad saray agagi ed Tesalonica nensaman, pabpablien mo met kasi sagpot na saray mamatatken? Antoy panmoriam ed saray “langkap a lalaki” ya inter na Dios ed kongregasyon yo panamegley nen Kristo?​—Efe. 4:8.

“Mansasagpot ed Limog Yo”

4, 5. Akin et nibagan nansagpot iray mamatatken ed Tesalonica, tan akin ya baleg met so sagpot na saray elder natan?

⁴ Kaalis nen Pablo tan Silas ed Tesalonica, linma rad Berea. Panon a ‘nansagpot’ iray tinaynan dan mamatatken? Seguradon inalig day Pablo, ya imbangat day kongregasyon panamegley na Kasulatan. Balet nayarin nitepet mo, ‘Inapresya kasi na saray agagid Tesalonica so Salita na Dios?’ Walay ibabaga na Biblia a saray taga Berea et “magmaong so kanonotan [da] nen saramay walad Tesalonica, . . . a maalwar dan uusisaen so Kasulatan ya inagew-agew.” (Gawa 17:11) Say tutukoyen balet na sayan teksto et saray kaslakan ya Judion tagad Tesalonica, aliwan saramay Kristiano la, ta sarayan nagmaliw a mananisia et angawat ed Kasulatan “bilang salita na Dios, aliwan salita na totoo.” (1 Tes. 2:13) Seguradon nansagpot iray mamatatken pian nibangat irayan agagi.

⁵ Diad panaon tayo, say matoor tan makabat ya aripen et mangitataryay ‘naakan diad dugan panaon’ parad pulok na Dios. (Mat. 24:45) Diad panangidaulo na sayan aripen, mansasagpot iray elder ed kada kongregasyon pian napakan ed espiritual iray agagi. Dakel so naaawat tayon literatura ya base ed Biblia, tan diad arum a lenguahe et walay nausar ya Watch Tower Publications Index tan Watchtower Library a walad CD-ROM. Pian naasikasoy espiritual a pankaukolan na kongregasyon, pigaran oras ya manpaparaan iray elder na saray parte rad aral pian marakep tan epektibo so pangipresenta da. Naisip mo la kasi karakel na panaon ya uusaren na saray elder pian niparaan iray parte dad aral, asemblea, tan kombension?

6, 7. (a) Anton alimbawa nen Pablo so anengneng na saray mamatatken ed Tesalonica? (b) Akin et nayarin aliwan mainomay parad saray elder natan so pangalig ed si Pablo?

⁶ Sankanonot na saray mamatatken ed Tesalonica so maabig ya alimbawa nen Pablo diad panagpastol ed pulok. Agto itan ginawa lapud pormalidad odino obligasyon labat. Singa naaralan tayod imbeneg ya artikulo, si Pablo et “nagmaliw [a] mauyamo . . . , a singa sakey a manpapasuson ina a maar-aro ed dilin ananak to.” (Basaen so 1 Tesalonica 2:7, 8.) Sikatoy akaparaan ni ingen ya ‘inabang so dilin bilay to’! Nepeg ya aligen na saray elder so alimbawa to diad panagpastol.

⁷ Nagawaan itan na saray elder natan diad pangar-aro rad pulok. Walaray agagin aliwan sipor ya maasingger tan makaaro. Ingen, nipanengneng na saray elder a makatalos ira no say nengnengen da et say kamaongan na kada agi. Balet, lapud agmet perpekto iray elder, nayarin aliwan mainomay parad sikara ya gawaen itan. Kanian agta manepeg a komendaan iray elder ya manggugunaet a maabig so pidedeneng dad amin lapud labay day magmaliw a maong a pastol?

8, 9. Antoray pigaran paraan ya saray elder natan et “babantayan da iray kamarerwa” tayo?

⁸ Manepeg labat ya “mapasakop” itayod saray elder. Singa insulat nen Pablo, “babantayan da iray kamarerwa” tayo. (Heb. 13:17) Ipanonot na satan so literal a managpastol ya anggano ag-onugip pian naprotektaan toy pulok to. Ontan met natan, walaray pankanawnawan ag-onugip iray elder pian natulongan iray agagin mansasakit, walaay problema ed emosyon, odino mankaukolay tulong ed espiritual.  Singa bilang, saray membro na Hospital Liaison Committee et akaparaan ya ontulong ed saramay mankaukolan na serbisyo ra, anggan pegley labi. Talagan naap-apresya tayo iratan a sagpot da!

⁹ Mansasagpot met iray elder a mangaasikaso ed Kingdom Hall construction tan kabiangan na relief committee pian natulongan iray agagi. Manepeg labat ya mabulos tayo ran suportaan! Ikonsidera pa so intulong ed saray agagi kayari na maksil a bagyon Nargis diad Myanmar nen 2008. Apektadon maong so lugar na Irrawaddy Delta, a kawalaay kongregasyon na Bothingone. Pian makasabi ditan so relief team, kaukolan day ondalan ed aderalderal iran karsada ya ataytayak so bangkay. Sanen anengneng na agagi ya samay datin manangasikaso na sirkito da et kaibad relief team ya akaunan sinmabi, oniay inyeyag da: “Ni, wadiay C.O. tayo! Ag-itayo pinaulyan nen Jehova!” Kasin aapresyaen mo so pansasagpot na saray elder diad agew tan labi? Arum ed sikara et kabiangay espisyal iran committee parad mairap iran hudisyal a problema. Ag-ipapasirayew na sarayan elder so nagagawaan da. Ingen ta talagan misalsalamat iray agagin natutulongan da.​—Mat. 6:2-4.

10. Anto ni ray arum ya kimey na saray elder?

¹⁰ Dakel ni arum a kimey na saray elder. Singa bilang, ipaparaan na coordinator na ulop na mamatatken so eskedyul na sinimban aral. Say sekretaryo na kongregasyon so manggagaway rekord na binulan tan tinaon a report ed serbisyo. Iisipen a maong na manangasikasoy Teokratikon Eskuelaan so pangiyasain to na saray parte. Kada taloy bulan, kaukolan ya i-audit so account na kongregasyon. Babasaen na saray elder iray sulat ya nanlapud sangan opisina tan uunoren da iray instruksion ditan pian napansiansiay “pankakasakey ed pananisia.” (Efe. 4:3, 13) Lapud pansasagpot na sarayan makukulin elder, ‘amin a bengatla et nagagawan masimpit tan diad mauksoy a paraan.’​—1 Cor. 14:40.

“Mangidadaulo ed Sikayo”

11, 12. Sioparay mangidadaulo ed kongregasyon, tan antoy kaibad sayan kimey?

¹¹ Imbaga nen Pablo a saramay makukulin mamatatken diad Tesalonica et “mangidadaulo” ed kongregasyon. Diad orihinal a lenguahe, satan a salita et mankabaliksay “onalagey ed arap” tan nayarin ipatalos ya “mangigiya; mangasikaso.” (1 Tes. 5:12) Saraya met lanlamang ya mamatatken so indeskribe ton “mansasagpot.” Aliwan saksakey a “mangidadaulo” so tutukoyen to, noagta amin ya matatken ed kongregasyon. Diad panaon tayo, saray elder et onaalagey ed arap na kongregasyon tan ikokondukta day aral. Natan et uusaren tayo lay tawag ya “coordinator na ulop na mamatatken” imbes ya “mangidadaulon manangasikaso” (odino presiding overseer) pian nipurek ed sikatayo ya amin ya elder et kabiangan na nankakasakey ya ulop.

¹² Say lalanoren na ‘panangidaulo’ ed kongregasyon et aliwan say pambangat labat. Satan ya balikas et nabasa met ed 1 Timoteo 3:4. Imbaga nen Pablo a say sakey a manangasikaso et “lakin maabig so panangidaulo to ed dilin sankaabungan to, walaan na ananak a matulok tan makalakal.” Mapatnag ya say balikas dia a “panangidaulo” et aglabat ontutukoy ed pambangat tod ananak to noagta nepeg met ya igiya toy pamilya to, tan saray ‘ananak to et matulok.’ On, idadaulo na saray elder so kongregasyon, a tutulongan da ray agagin ontulok ed si Jehova.​—1 Tim. 3:5.

13. Akin et kaukolay panaon pian makapanpaknad sakey a desisyon iray elder?

¹³ Pian maabig so panangidaulo na saray elder ed pulok, pantotongtongan da no panon dan niiter so pankaukolan na kongregasyon. Nayarin mas maples no saksakey labat ya elder so manggaway amin a desisyon. Ingen, tutumboken da so alimbawa na mananguley ya ulop nen inmunan siglo. Kanian no walay dedesisyonan, pantotongtongan itan na ulop na mamatatken, ya paigigiya irad Kasulatan. Labay dan iyaplika iray prinsipyo na Kasulatan legan  dan aasikasoen so pankaukolan na kongregasyon. Maabig sirin no manparaan so kada elder antis iran manmiting, ya ikonsidera da so Kasulatan tan saray instruksion na matoor tan makabat ya aripen. Siempre, kaukolay panaon pian nagawaan iya. Singa agawa nen inmunan siglo sanen nantongtongan na mananguley ya ulop so isyu na panagsegat, nayarin no maminsan et nanduruma met so opinyon na saray elder. No bilang ta ontan, kaukolay mas malaem ya panaon tan pan-research pian makapanpakna rad sakey a desisyon a base ed Kasulatan.​—Gawa 15:2, 6, 7, 12-14, 28.

14. Kasin aapresyaen moy nankakasakey a pankikimey na ulop na mamatatken? Akin?

¹⁴ Antoy nagawa no walay elder ya ipilit toy labay to odino impluensyaan toy arum pian pilaan da? Panon to no walay pansengegay inkaapag-apag, a singa si Diotrefes nensaman? (3 Juan 9, 10) Seguradon naapektoay interon kongregasyon. No sinali nen Satanas ya guloen so kongregasyon nen inmunan siglo, seguradon labalabay to met ya deraley deen na kongregasyon natan. Nayarin anamoten toy makasarili iran pilalek, a singa say pagmaliw ya manunaan. Nepeg sirin ya aralen na saray elder so manpaabeba tan mantulongan bilang sakey ya ulop. Talagan aapresyaen tayoy inkamapaabeba na saray elder ya nankakasakey a mankikimey!

“Manisimbawa ed Sikayo”

15. Antoy mamapakiwas ed saray elder pian simbawaen odino bilinen da so sakey ya agi?

¹⁵ Insublay ya impabitar nen Pablo so mairap balet ta importantin kimey na mamatatken: say panimbawa ed pulok. Diad Kristianon Griegon Kasulatan, si Pablo labat so angusar ed Griegon terminon nipatalos ya “manimbawa”  odino “mamilin.” Nayarin ontutukoy iya ed mabiskeg a simbawa, balet ta ag-ipapasen na samay manisimbawa ya kabusol imay sisimbawaen odino bibilinen to. (Gawa 20:31; 2 Tes. 3:15) Singa bilang, oniay insulat nen Pablo ed saray taga Corinto: “Insulat ko iraya pian bilinen kayo a singa inad-arok ya ananak, aliwan pian pabaingan kayo.” (1 Cor. 4:14) Bibilinen to ra lapud inad-aro to ra.

16. Antoy nepeg a nonoten na saray elder sano manisimbawa ira?

¹⁶ Nepeg ya nonoten na saray elder ya importante so paraan na panimbawa da. Panggugunaetan dan aligey Pablo, ya ipalikna day aro tan panangiyansakit. (Basaen so 1 Tesalonica 2:11, 12.) Siempre, ‘tutumboken dan maong so matuan salita ta pian nayarian day mamaseseg diad panamegley na suston bangat.’​—Tito 1:5-9.

17, 18. Antoy nepeg mon nonoten no simbawaen ka na elder?

¹⁷ Lapud agperpekto iray elder, nayarin makapangibaga iray bengatlan pagbabawian da met lanlamang. (1 Ara. 8:46; Sant. 3:8) Sakey ni, natural met labat a say pangawat na simbawa et ‘agmakapaliket noagta makapaermen.’ (Heb. 12:11) Amta itan na saray elder. Kanian antis ya asinggeran na elder so sakey ya agi pian simbawaen, seguradon ninonot to nin maong tan impikasi to la itan. No bilang akaawat kay simbawa, agta naapresyam so panangiyansakit ed sika na satan ya elder?

¹⁸ Ipasen pan walay sakit mo ya agmo amtay sengegan. Insan walay doktor ya apugta toy sengegan na sakit mo, balet ta singa mairap mon awaten itan. Kasin ansakit so linawam ed saman a doktor? Siempre andi! Anggano irekomenda ton operaan ka, onabuloy ka ta antam ya pankaabigan mo. Iyan mo lan agmo agustoan so paraan na impitongtong ed sika na doktor, balet kasin satan la so pangibasiyan moy desisyon mo? Andi met seguro. Mipadpara, agmo aabuloyan ya lapud paraan na impanimbawa ed sika et agka la ondengel ed saramay uusaren nen Jehova tan Jesus pian ombiskeg tan nasalimbengay espiritualidad mo.

Apresyaen so Impangiregalo nen Jehova na Saray Elder

19, 20. Panon mon nipanengneng so panangapresyam ed saray “langkap a lalaki”?

¹⁹ Antoy gawaen mo no akaawat kay regalo ya talagan parad sika labat? Agta usaren mo pian nipanengneng moy panangapresyam? Saray “langkap a lalaki” et regalo nen Jehova ed sika panamegley nen Jesu-Kristo. Say sakey a paraan pian nipanengneng mon aapresyaen mo iyan regalo et diad idengel mon maong sano manpapaliwawa iray elder tan panggunaetan mon iyaplika iray indanet dan punto. Nipanengneng mo met so panangapresyam no iparaan mon maong iray komentom diad aral. Suportaan moy panangidaulo da, a singa diad lawak na kimeyan. No agunggonaan kad impanimbawa ed sika na sakey ya elder, agta marakep no ibagam itan ed sikato? Tan agta maabig met no ibalikas moy apresasyon mod pamilya na saray elder? Tandaan, diad pansasagpot na saray elder parad kongregasyon, ipapalugar na pamilya da so panaon ya sikaray nakaiba da komon.

²⁰ On, dakel so rason tayon misalamat ed si Jehova ta inikdan to itayo na saray elder ya mansasagpot, mangidadaulo, tan manisimbawa ed sikatayo. Petepeteg a sarayan “langkap a lalaki” et regalon nanlapud si Jehova!

Kasin Nanonotan Mo?

• Akin et manepeg ya apresyaen na saray agagid Tesalonica iray mangidadaulo ed sikara?

• Panon a mansasagpot iray elder ed kongregasyon yo parad sika?

• Panon kan nagugunggonaan ed panangidaulo na saray elder?

• Antoy nepeg mon nonoten no simbawaen ka na elder?

[Tepetepet Parad Panagaral]

[Litrato ed pahina 27]

Kasin aapresyaen moy nanduruman paraan ya papastolan na saray elder so kongregasyon?