‘Qankuna ukhupi llankʼaqkunata respetaychis’
‘Qankuna ukhupi llank’aqkunata respetaychis’
‘Qankuna ukhupi llank’aqkunata respetaychis. Paykunan Señorwan kawsayniykichispi umallispa pusasunkichis yuyaychasunkichis.’ (1 TES. 5:12.)
1, 2. a) ¿Imaynapin tarikusharqanku Tesalónica llaqtapi iñiqkuna Pablo cartata apachishaqtin? b) ¿Imatan cartanpi yuyaycharqan?
APOSTOLKUNAQ tiemponman kutisun. Chay tiempopaqqa Tesalónica iñiq t’aqallan haqay Europa ladopiqa karqan. Chaypi iñiqkunatan Pablo unay tiempoña iñiyninkupi kallpachasharqan. Yaqapaschá huk llaqtakunapi hina chaypipas umalliqkunata akllanman karqan (Hech. 14:23). Ichaqa chaypi tiyaq runakunan paytawan Silastawan llaqtamanta qarqomurqanku. Chay llaqtapi tiyaq cristianokunaqa sapankuchá rikukapurqanku manchasqataqchá qheparqankupas.
2 Pabloqa llakisqan kasharqan chay llaqtapi chayllaraq qallariq iñiq t’aqamanta. Ichaqa kutiyta munaqtinmi ‘Satanás sapa kutilla hark’arqan’. Chaymi Timoteota kacharqan paykunata kallpachananpaq (1 Tes. 2:18; 3:2). Timoteoqa allin willakuykunawanmi Pabloman kutirqan, chaymi chay cristianokunaman ñawpaq kaq cartata apachirqan. Chay cartapin kayta yuyaycharqan: ‘Respetaychis [...] umallispa pusaqniykichista’, nispa (leey 1 Tesalonicenses 5:12, 13).
3. ¿Imaraykun umallikunata ‘allinta rikunanchis, anchatataq munakunanchispas’?
3 Tesalónica llaqtapi umallikunaqa manan Pablo nitaq viajaqmasinkuna hinachu experienciayoq karqanku, nitaq Jerusalenpi umallikuna hinachu unayña iñiq karqanku. Chay llaqtapi iñiq t’aqaqa chayraqmi huk wata kasharqan. Chaywanpas Pablon iñiqkunata nirqan imarayku umallikunamanta agradecido kanankuta, nirqanmi: ‘[Anchatan] llank’anku, [...] umallispan pusasunkichis, yuyaychasunkichistaqmi’, nispa. Nirqantaqmi: “Allintan rikunaykichis, anchatataq munakunaykichispas”, nispa. Qhepatataq nirqan: “Qankunapura sumaqta kawsaychis”, nispa. Chay tiempopi kawsawaq karqan chayri, ¿ancha chaninpaqchu qhawariwaq karqan umallikunaq llank’asqanta? ¿Munakunkichu umalliqniykikunata? ¿Jesucristowan Diospa ‘qosqanta’ hinachu qhawarinki? (Efe. 4:8.)
Anchatan ‘llank’anku’
4, 5. ¿Imaraykun Pablo rimarqan umallikuna anchata llank’asqankumanta? ¿Imaynatan llank’ashanku kay tiempopi umallikuna?
4 ¿Imatan Tesalónica llaqtapi umallikuna ruwasharqanku Pablowan Silaswan Berea llaqtaman pasapuqtinku? Anchatan llank’asharqanku. Arí, Pablota qatikuspan iñiq t’aqata yachachiypi anchata llank’asharqanku. Ichaqa Biblian willan ‘Berea llaqtapi kaqkuna Tesalónica llaqtapi kaqkunamantaqa aswan sumaq sonqo runakuna kasqankuta. [...] Diospa Simin Qelqakunata sapa p’unchay t’aqwisqankurayku’ (Hech. 17:11). Chhaynaqa, ¿manachu Tesalónica llaqtapi cristianokuna Diospa Siminta allinpaq qhawarirqanku? Manan, chay llaqtapi tiyaq yaqa llapa judiokunamantan Pabloqa rimasharqan. Aswanmi nirqan paykunaqa ‘Diospa siminta [...] uyarispa Diospa siminta hinapuni chaskikusqankuta, manataq runakunaq siminta hinallachu’ (1 Tes. 2:13). Umallikunaqa anchatachá kallpachakurqanku Diosman kutirikuq runakunata Bibliamanta yachachinankupaq.
5 Kunanpas ‘allin yuyayniyoq hunt’aq kamachin [...] tiempollanpi [Diospa] kamachinkunaman mikhunata qoshan’ (Mat. 24:45). Paykunaq umallisqanmi llapa umallikuna iñiqmasinkuman espiritual mikhunata qoypi anchata llank’ashanku. Askha rimaykunapi qelqakunawanmi yanapachikushanku, wakinqa kashan Índice de las publicaciones Watch Tower nisqa libro, hinallataq Watchtower Library CD nisqapi. Iñiqmasinkuta yanapanankuraykun unaypi allin discursokunata preparanku. Wakinqa hatun huñunakuykunapin discursokunata qonku. ¿Yuyaykurqanchischu imaymana ruwasqankupi?
6, 7. a) ¿Imayna umalli kaytan Pablo Tesalónica llaqtapi umallikunaman qhawarichirqan? b) ¿Imaraykun mayninqa umallikunapaq sasa kanman Pablota qatikuy?
6 Tesalónica llaqtapi umallikunaqa Pabloq imaynatachus iñiqkunata qhawarisqanpin yuyaykuqku. Payqa manan “visitaruniñan” ninanraykullachu iñiqmasinkunata visitaq. Ñawpaq estudiopi yachasqanchis hina, Pabloqa ‘imaynan mamaqa ñuñuq wawanta sumaqta uywan hinatan’ iñiqmasinkunata munakuywan rikuq (leey 1 Tesalonicenses 2:7, 8). Payqa kawsayninta imaraqmi iñiqmasinkunarayku qoyta munarqan. Chhaynatan chay umallikunapas iñiqkunata qhawarinanku karqan.
7 Kunanpas umallikunaqa Pablo hinan sumaq sonqowan iñiqkunata qhawarinanku. Manaña llapa iñiqkunachu allin uyarikuq munakuq kanku chaypas, sapankankupin allinkunata maskhanku (Pro. 13:15). Mayninqa, pantaq runa kayninkupi yaqapaschá mayqen iñiqtapas mana allintachu qhawarinqaku. Chaywanpas Allin Michiqta qatikuspan kallpachakunqaku llapallankuta munakunankupaq. Chay umallikunaq kallpachakusqankuqa agradecekunapaqmi.
8, 9. ¿Imakunapi llank’aspan umallikuna ‘michishallawanchispuni’?
8 Llapa cristianokunan umallikunata ‘kasukunanchis’ paykuna ‘michishallawasqanchisrayku’ (Heb. 13:17). Imaynan michiqpas tutakuna imaraq ovejankunata qhawan, chhaynatan umallikunapas tutata p’unchaychasparaq iñiqmasinkuta yanapanku sasachakuykunapi kaqtinku otaq iñiyninkupi chiriyapuqtinku. Comités de Enlace con los Hospitales nisqapi yanapakuq cristianokunapas kuska tutakunatan hatarinku mayqen iñiqmasipas hospitalpi grave tarikuqtin. ¡Anchatan agradecekunchis necesitasqanchis rato yanapawasqanchismanta!
9 Huñunakuna wasikunata hatarichikunanpaq, comités de socorro nisqakunapi llank’aq umallikunatapas anchatan agradecekunanchis. Yuyarisun 2008 watapi Myanmar (ñawpaqqa Birmania) nisqa nacionpi hatun wayra Nargis sutiyoq chayaqtin sucedesqanta. Irauadi mayuq qayllapi llaqtan aswan afectasqa karqan chaypitaqmi kasharqan Pothigon nisqa iñiq t’aqa. Wawqe-panakunata yanapanankuraykun iñiqmasikuna wañusqakunaq hawanta pasaspa sasata chay llaqtaman chayarqanku. Paykunawan kuskan iñiq t’aqata watukuq umalli chayarqan. Payta rikuspan kusikuymanta nirqanku: “¡Qhawariychis watukuq umallinchis! ¡Jehová Diosmi qespichiwasun!”, nispa. ¿Paykuna hinachu ancha chaniyoqpaq qhawarinchis tuta p’unchay umalliqninchiskunaq llank’asqanta? Kallantaqmi mana hukkunaq yachasqan sasa juzgana kaqkunata apariq umallikunapas (Mat. 6:2-4).
10. ¿Ima llank’aykunatan umallikuna ruwallankutaq?
10 Chaymantapas askha umallikunan Diospa llaqtanpi imaymana llank’aykunata aparinku. Umallikunaq llank’ayninpi yanapaq umallin sapa semana huñunakuypaq programata ruwan. Secretarion llapa iñiqkunaq sapa killa, sapa wata llank’asqankuta huñun. Escuelata umalliqmi listata ruwan pikunachus discurso qonankupaq. Hinaspapas sapa kinsa killan contribución churasqankumanta umallikuna cuentata qhawarinku. Chaymantapas llapa umallikunan sucursalpa apachisqan cartakunata leenku, chayman hinataqmi imatapas ruwananku chhaynapi ‘iñiypi huk-nisqalla-kayman’ aypanapaq (Efe. 4:3, 13). Chaykunataqa ruwanku ‘tukuy imapas chaninninpi ruwakunanpaqmi, maychus ruwanaman hinapuni’ (1 Cor. 14:40).
“Umallispa pusasunkichis”
11, 12. ¿Pikunan iñiq t’aqata umallispa pusanku? ¿Imatawanmi ruwananku?
11 Tesalónica llaqtapi iñiqkunaman carta apachisqanpin Pablo nillarqantaq umalliqkuna ‘pusaqninku’ kasqanta. ‘Pusaq’ nisqa simiqa griego rimaypi “ñawpaqpi sayaq”, “apariq”, “ñawpariq” ninanta nin (1 Tes. 5:12). Anchata ‘llank’aq’ umallikunallamantataqmi Pabloqa chaypi rimasharqan. Chaypin yachanchis llapallan umallikunamanta rimashasqanta. Kunanpas yaqa llapa umallikunan iñiqmasinkuq “ñawpanpi sayanku” huñunakuykunata aparispa. “Superintendente presidente” nisqa suti “umallikunaq llank’ayninpi yanapaq umalli” nisqaman cambiakusqanmi rikuchiwanchis llapankupas huk cuerpo hinalla llank’asqankuta, mana mayqenninkupas aswan allin qhawarisqa kanapaqchu kasqankutapas.
12 Ichaqa umallispa pusaychis nispaqa manan yachachinallankumantachu rimashan. 1 Timoteo 3:4 textopin taytakunamanta nin: “Paymi kanan wasinpi kaqkunata allinta kamachiq, wawankunatapas kasukuqta, respetakuqta yachachiq”, nispa. Kamachiq nispaqa manan wawakunata yachachillaymantachu nishan, aswanpas ‘kasukuq’ kayta yachachiymantawanmi. Chhaynatan umallikunapas iñiqkunata pusarinanku yanapanankutaqmi Jehová Dios kasukuyta yachanankupaq (1 Tim. 3:5).
13. ¿Imaraykun mayninpi iñiq t’aqapi umallikuna sasata imatapas decidinku?
13 Iñiq t’aqata allinta umallinankupaqqa huñunakuspan qhawarinanku imakunachus necesitakusqanta, chaypaq imakuna ruwanankutapas. Yaqapaschá tapukusunman: “¿Manachu aswanpas huklla chaykunata decidinman?” nispa. Ichaqa apostolkunaq tiemponpi ruwasqankutan umalliqkunaqa qatikunku. Huñunakusqankupin llapanku rimarinku, Diospa nisqanman hina imatapas ruwanankupaqtaq Bibliata t’aqwirinku. Sapankankun ñawpaqmantaña Bibliata, hunt’aq kamachiq nisqantawan qhawarinku chaypi tarisqankuwantaq yanapakunku. Chaykunata ruwayqa tiempopaqmi. Mayninpiqa apostolkunaq tiemponpi qhari kaynin qaracha señalakuymanta churanakusqankuta hinan yuyaykusqankuta mana tupachinkuchu. Chaykuna kaqtinqa Bibliaq nisqanman hinan allichanku (Hech. 15:2, 6, 7, 12-14, 28).
14. ¿Imaraykun agradecekunanchis umalliqkuna huk sonqolla llank’asqankumanta?
14 ¿Iman sucedenman huk umalli yuyaykusqanman hinalla imapas ruwakunanta munaqtin otaq apostolkunaq tiemponpi Diótrefes hina hap’inakuyta hatarichiqtin? (3 Juan 9, 10.) Llapa iñiqkunaq mana allinninpaqmi kanman. Satanasqa ñawpaq cristianokunata hinan kunanpas cristianokunata t’aqanachiyta munan. Chaypaqqa hukkunamanta aswan allin kaytan sonqopi paqarichin. Chaymi umallikunaqa huch’uyyaykukuq kananku, huk sonqollataqmi llank’anankupas. Llapanchismi agradecekunchis huk hinalla huch’uyyaykukuspa llank’asqankumanta.
“Yuyaychasunkichis”
15. ¿Imaraykun umalliqkuna iñiqmasinkuta yuyaychanku?
15 Pabloqa umalliqkunatan nillarqantaq iñiqkunata yuyaychanankupaq. Griego Rimay Qelqakunapiqa apóstol Pablollan “yuyaychasunkichis” nisqa simita qelqarqan. Chay simiqa ama k’irispalla atiywan rimapayaspa anyaymi (Hech. 20:31; 2 Tes. 3:15). Corinto cristianokunatan Pablo nirqan: “Manan qankunata p’enqachinaypaqchu chay hinata qelqamuykichis, aswanpas munasqa wawaykunata hina qankunata yuyaychanaypaqmi”, nispa (1 Cor. 4:14). Chaypi nisqan hina, Pabloqa paykunata munakuspan yuyaychaq.
16. ¿Imakunatan umallikuna yuyarinanku pitapas yuyaychananku kaqtin?
16 Umalliqkunaqa pitapas yuyaychaspaqa allin yuyaywanmi rimananku. Pablo hinan necesitasqankuman hina munakuywan llamp’u sonqowan yuyaychananku (leey 1 Tesalonicenses 2:11, 12). Hinaspapas ‘cheqaq yachachikuytan hap’ikunanku, ahinapi cheqaq yachachikuyta yachachinankupaq’ (Tito 1:5-9).
17, 18. ¿Imatan yuyarinanchis huk umalli yuyaychawaqtinchis?
17 Umallikunaqa yachankun pantaq runa kasqankuta chaymi mayninqa imatapas mana allinta ruwaruspa otaq rimaruspa pesapakunku (1 Rey. 8:46; Sant. 3:8). Yachankun ‘manapuni mayqen wanachikuypas kaq ratoqa kusikunapaq hinachu [kasqanta], aswanpas nanaykuchikusqanta’ (Heb. 12:11). Chaymi pitapas anyananku kaqtinqa ñawpaqta Diosmanta mañakunku allintataqmi yuyaykunku ima rimanankutapas. Sichus huk umalli yuyaychawanchis chayqa, munakuspa yuyaychawasqanchistan qhawarinanchis.
18 Kaypi yuyaykusun: mana reqsisqa onqoymi hap’iwashanchis, hinaspan doctorman riqtinchis, chay doctor tarirqon grave onqoy hap’iwasqanchista. ¿Phiñakusunchu chay willawasqanchismanta? Manapunichá. ¿“Operakunaykin” niwaqtinchisri? Allinninchispaq kaqtinqa operachikusunchá. K’arak sonqowan chaykunata willawasunman chayri, ¿phiñasqachu pasapusunman? Yaqapaschá phiñakusun, ichaqa hampichikusunpunin. Chhaynataña huk umalliq yuyaychawasunman chaypas uyarikunanchismi. Kaytan yuyarinanchis: Jehová Diosmi Jesuspiwan payta kachamushanman yanapawananchispaq otaq ima mana allinmantapas pakaykuwananchispaq.
Umallikunaqa Diospa qosqanmi
19, 20. ¿Imaynatan rikuchisunman Diospa regalo ‘qosqanmanta’ agradecido kasqanchista?
19 ¿Imaynatan agradecekusunman pipas huk regalota qowaqtinchis? Chay regalota utilizaspan. Jehová Diosmi Jesucristowan umallikunata “qorqan”. ¿Imaynatan rikuchisunman chay umallikunata chaninpaq qhawarisqanchista? Discurso qosqankuta allinta uyarispa, chayman hina kawsaspan. Ñawpaqmanta imatapas tapumuqtinku allinta kutichispa, predicacionpi huk ruwaykunapipas yanapakuspa. Hinaspapas willanchismi yuyaychawasqanchis imaynata yanapawasqanchista. Agradecekunchistaqmi familiantapas ñoqanchisrayku paykunawan pisi tiempolla kasqankumanta.
20 ¡Ancha agradecesqan kashanchis umallikuna anchata llank’asqankumanta, pusawasqanchismanta, yuyaychawasqanchismantapas! Arí, umallikunaqa Jehová Diospa ‘qosqanmi’.
¿Yuyashankichu?
• ¿Imaraykun Tesalónica llaqtapi cristianokuna umallikunata respetananku karqan?
• ¿Imakunapin umallikuna anchata llank’anku?
• ¿Imakunapin yanapawanchis umallikunaq pusawasqanchis?
• ¿Imatan yuyarinanchis huk umalli yuyaychawaqtinchis?
[Tapuykuna]
[27 paginapi foto]
¿Ancha chaninpaqchu qhawarinchis umallikuna Diospa llaqtanpi tukuy ruwasqankuta?