‘Ala ne azo so ayeke sara kua ngangu na popo ti ala’
‘Ala ne azo so ayeke sara kua ngangu na popo ti ala’
‘Ala ne azo so ayeke sara kua ngangu na popo ti ala, so ayeke fa lege na ala na yâ ti kusala ti Seigneur nga so ayeke gboto mê ti ala.’—1 ATHES. 5:12.
1, 2. (a) Dutingo ti congrégation ti Thessalonique ayeke lani tongana nyen na ngoi so Paul asû kozo mbeti ti lo na ala? (b) Nyen la Paul awa aita ti Thessalonique ti sara?
TARA ti bâ so mo yeke membre ti congrégation ti akozo Chrétien so ayeke lani na kodoro ti Thessalonique, oko ti akozo congrégation so a zia gere ni na Poto. Bazengele Paul amû lani angoi mingi ti kpengba aita so ayeke kâ. Lo soro peut-être a-ancien ti mû li ni tongana ti so a yeke sara na yâ ti tanga ti acongrégation (Kus. 14:23). Me na pekoni so a zia gere ti congrégation ni na sese, aJuif abungbi gbâ ti azo ala ga ala tomba Paul na Silas na yâ ti gbata ni. A-Chrétien so angbâ kâ alingbi ti bâ so ala yeke gi ala oko, peut-être mbeto ahon même ndo ti ala.
2 Tâ tënë, na pekoni so Paul azia Thessalonique, lo gi bê ti lo mingi ndali ti congrégation so abâ gigi ade ti ninga pëpe so. Lo tara ti kiri kâ, me “Satan akanga lege” na lo. Ni la, lo tokua Timothée ti gue ti kpengba congrégation ni (1 aThes. 2:18; 3:2). Tongana Timothée akiri na lo sara nzoni tënë ti aita ni, a pusu Paul ti sara lettre na aChrétien ti Thessalonique. Na popo ti aye so Paul asara tënë ni, lo wa ala ti ‘ne azo so ayeke fa lege na ala’.—Diko 1 aThessalonicien 5:12, 13.
3. Araison wa aChrétien ti Thessalonique ayeke na ni ti ne a-ancien mingi mingi?
3 Aita so ayeke mû lani li ni na popo ti aChrétien ti Thessalonique aninga pëpe na yâ ti kusala ni tongana Paul na amba ti lo so ayeke sara kusala na tere ti lo. Na mbage, ala ga aChrétien aninga tongana ti a-ancien ti Jérusalem pëpe. Ti tâ tënë ni, congrégation ni abâ gigi ade ti sara ngu oko pëpe. Me, a yeke na lege ni ti tene azo ti congrégation ni akiri singila ndali ti a-ancien ti ala so ayeke “sara kua ngangu”, ayeke “fa lege na” congrégation ni nga ayeke “gboto mê” ti aita. Biani, ala yeke na nzoni raison ti tene “na lege ti ndoye, ala ne [a-ancien] so mingi mingi”. Na pekoni so Paul ahunda na ala ti ne azo ni so, lo wa ala ti “duti na siriri na popo ti ala.” Tongana mo yeke lani na Thessalonique, mo yeke bâ na nene ni mingi kusala ti a-ancien so? Na lege ti Christ, Nzapa ‘amû akoli tongana amatabisi’ na yâ ti congrégation. Mo yeke bâ ala tongana nyen?—aÉph. 4:8.
A-ancien “ayeke sara kua ngangu”
4, 5. Ngbanga ti nyen a hunda ti tene a-ancien ti ngoi ti Paul asara kua ngangu ti fa ye na congrégation? Ngbanga ti nyen a yeke nga tongaso laso?
4 Na pekoni so a tokua Paul na Silas na Bérée, tongana nyen la a-ancien ti Thessalonique ‘asara kua ngangu’? Ala mû tapande ti Paul nga kite ayeke dä pëpe so ala sara kua na Mbeti ti Nzapa ti fa ye na congrégation ni. Peut-être mo hunda tere ti mo mo tene: ‘A-Chrétien ti Thessalonique abâ lani Mbeti ti Nzapa na nene ni?’ Na ndo ni, Bible atene so azo ti Bérée ayeke “azo so bibe ti ala ayeke nzoni ahon ti ala ti Thessalonique, . . . lâ na lâ ala yeke gi nda ti Mbeti ti Nzapa nzoni”. (Kus. 17:11). Me, hakango ye so andu aJuif mingi ti Bérée so ayeda na tâ tënë nga na aJuif mingi ti Thessalonique so ayeda pëpe na tâ tënë. A-Juif ti Thessalonique so aga aChrétien ‘ayamba tënë ti Nzapa tongana tënë so alondo na azo pëpe, me tongana tënë ti Nzapa’. (1 aThes. 2:13). Ti mû kobe ti yingo na mara ti azo tongaso ahunda na a-ancien ti sara kua ngangu.
5 Laso, “ngbâa be-ta-zo so ayeke sara ye na ndara” ayeke mû ‘kobe na ngoi ni so alingbi’ na angasangbaga ti Nzapa (Mat. 24:45). Na gbe ti fango lege ti ngbâa ni so, a-ancien ti congrégation oko oko ayeke sara kua ngangu ti mû kobe ti yingo na aita ti ala. Aita so ayeke na yâ ti congrégation alingbi ti duti na gbâ ti ambeti so azi nda ti Bible, nga na yanga ti ambeni kodoro ala yeke na aye tongana Index des publications de la Société Watch Tower wala Watchtower Library so a zia na ndo ti CD-ROM. Ti kaï nzara ti congrégation na lege ti yingo, a-ancien ayeke mû ngoi mingi ti leke ambage ti bungbi so a mû na ala tongaso si ala fa ni na mbeni lege so ayeke nzoni. Mo gbu li na ndo ti angoi mingi so a-ancien ayeke mû ti leke na ambage so a mû na ala ti sara na ngoi ti abungbi wala akota bungbi?
6, 7. (a) Tapande wa Paul azia na a-ancien ti Thessalonique? (b) Ngbanga ti nyen a lingbi ti duti ngangu na a-ancien laso ti mû tapande ti Paul?
6 A-ancien ti Thessalonique adabe ti ala lakue na pendere tapande so Paul azia na ndo ti tënë ti batango angasangbaga. A yeke mbeni kusala so a hunda ti sara ni na ndoye nga na nzoni bê, me pëpe ti sara ni gi ndali ti so a hunda ti sara ni. Tongana ti so e bâ na yâ ti article so ahon, Paul ‘asara ye na nzoni bê tongana mbeni mama so ayeke mû me na amolenge ti lo na lo bata ala nzoni.’ (Diko 1 aThessalonicien 2:7, 8.) Lo yeke même nduru ti ‘mû âme ti lo’ ndali ti ala! Na ngoi so a-ancien ayeke bata angasangbaga, a lingbi ala sara ye tongana ti lo.
7 A-ancien ti laso ayeke mû tapande ti Paul na lege so ala ndoye angasangbaga ni. Ambeni ngasangbaga ni aye ka ti sara songo na mba pëpe. Me, a-ancien ayeke gi ti zia tere ti ala na place ti angasangbaga ni so na ti gi ti bâ gi nzoni ti ala. Tâ tënë, teti so e yeke awasiokpari, a lingbi ti duti ngangu na mbeni ancien ti duti na nzoni bango ndo na ndo ti zo oko oko kue. Me, na ngoi so lo yeke sara ngangu ti sara ye na nzoni bê na mbage ti azo kue, a yeke nzoni ti gonda lo ndali ti ngangu so lo yeke sara ti duti mbeni nzoni berger na gbe ti Christ.
8, 9. Na ambeni lege wa a-ancien ti laso ayeke “bâ ndo na ndo ti âme ti e”?
8 E kue e yeke na mbeni raison ti “woko tere” ti e na gbe ti a-ancien. Tongana ti so Paul atene, ‘ala yeke bâ ndo na ndo ti âme ti e’. (aHéb. 13:17). Tënë so adabe ti e na mbeni berger so ayeke ke ti lango tongaso si lo bata anyama ti lo. Legeoko nga, a-ancien ti laso alingbi ti ke ti lango tongaso si ala bâ lege ti azo so ayeke na kpale ti seni wala so ayeke na bezoin ti mungo maboko na lege ti yingo. Na tapande, aita so ayeke na yâ ti Komite so ayeke bâ lege ti songo na ada-nganga ayeke fâ lango na lê ti ala ti gue ti mû maboko na aita so ayeke na kpale ti seni. E kiri singila mingi ndali ti kusala so ala sara ndali ti e na ngoi so e yeke na yâ ti mara ti kpale so.
9 A-ancien so ayeke na yâ ti aKomite ti lekengo ada ti bungbi ti e nga na akomite ti mungo maboko na ngoi ti aye ti vundu ayeke sara kua ngangu ti mû maboko na aita. Ala lingbi biani ti tene e mû maboko na ala na bê ti e kue! Gbu li na ndo ti ngangu so a sara ti mû maboko na aita na peko ti kota ngu so apika na pupu lani na kodoro ti Myanmar na ngu 2008. Ti si na congrégation ti Bothingone so ayeke na ndo so kota pupu so abuba aye dä mingi, aita ti komite ti mungo maboko ahon na ando so aye abuba dä mingi nga ala hon na popo ti akuâ so ayeke na sese. Na ngoi so aita ti ndo ni abâ so ngbene surveillant ti circonscription ti ala ayeke na yâ ti kozo groupe ti azo ti mungo maboko so asi na Bothingone, ala dekongo atene: “Bâ surveillant ti circonscription ti e! Jéhovah asö e awe!” Mo yeke kiri singila ndali ti ngangu kua so a-ancien ayeke sara bï na lâ so? A soro ambeni ancien ti sara kusala na yâ ti akomite spécial so ayeke bâ lege ti angangu tënë. A-ancien so ayeke pika kate pëpe na ndo ti aye so ala sara; me azo so abâ nzoni na lege ti kusala ti ala akiri singila mingi ndali ni.—Mat. 6:2-4.
10. Akua wa a-ancien ayeke sara so azo ahinga ni mingi pëpe?
10 Laso, a-ancien mingi ayeke sara nga ambeni kusala nde. Na tapande, coordinateur ti bungbi ti a-ancien ayeke leke akapa ti bungbi teti yenga oko oko. Secrétaire ti congrégation ayeke bungbi atondo ti kusala ti fango tënë ti nze oko oko nga na ti ngu oko oko. Surveillant ti ekole ayeke gbu li nzoni ti leke kapa ti ekole. Fani oko na yâ ti nze ota, a yeke gi ti bâ ambeti ti compte ti congrégation. A-ancien ayeke diko alettre so filiale atokua, na ala yeke sara ye alingbi na ni ti bata “beoko ti yingo”. (aÉph. 4:3, 13). Grâce na ngangu kua ti a-ancien so, “ye kue atambela na lege ni nga na yâ ti wusuwusu pëpe.”—1 aCor. 14:40.
A-ancien “ayeke fa lege na ala”
11, 12. Azo wa la ayeke fa lege na congrégation na yâ ti kusala? Ti fa lege andu nga aye wa?
11 Paul asara tënë ti a-ancien ti Thessalonique so ayeke sara kua ngangu tongana azo so ayeke “fa lege” na congrégation na yâ ti kusala (1 aThes. 5:12). A yeke a-oko ancien so la Paul asara tënë ti ala lo tene ala yeke “sara kua ngangu”. Paul ayeke sara lani tënë ti a-ancien kue ti yâ ti congrégation. Laso, mingi ti a-ancien ayeke luti na gbele congrégation na ala yeke mû li ni na ngoi ti abungbi. Fini iri so a mû na “surveillant président” ayeke “coordinateur ti bungbi ti a-ancien”. Iri so amû maboko na e ti bâ a-ancien kue tongana amembre ti tere oko.
12 Ti “fa lege” na congrégation andu aye mingi ahon gi fango ye. A sara kusala na oko tënë so na 1 Timothée 3:4. Paul atene so a lingbi zo ti bango ndo na ndo ti congrégation aduti “zo so afa lege nzoni na azo ti da ti lo, amolenge ti lo ayeke woko tere na gbe ti lo na bê ti ala kue.” Ge tënë ‘fa lege’ andu gi pëpe fango ye na amolenge ti lo me nga mungo li ni na yâ ti sewa nga ti tene “amolenge ti lo ayeke woko tere na gbe ti lo”. Ni la, a-ancien ayeke mû li ni na yâ ti congrégation ti mû maboko na azo kue ti woko tere na gbe ti Jéhovah.—1 Tim. 3:5.
13. Ngbanga ti nyen a lingbi ti hunda ngoi mingi ti mû mbeni desizion na ngoi ti bungbi ti a-ancien?
13 Ti tene a-ancien afa lege nzoni na angasangbaga, ala yeke sara lisoro na popo ti ala ti bâ abezoin ti congrégation nga tongana nyen ti mû maboko nzoni na congrégation ni. A lingbi ti bâ so tongana mbeni ancien oko la amû adesizion kue, kua ni ayeke gue hio. Me, na mungo tapande ti bebungbi ti ngoi ti akozo Chrétien, bungbi ti a-ancien ti laso ayeke sara lisoro polele na ndo ti tënë ni nga ala gi fango lege ti Mbeti ti Nzapa. Ye so ala yeke gi ayeke ti sara kua na aye so Mbeti ti Nzapa afa ti lingbi na bezoin ti congrégation ni. A yeke duti nzoni mingi tongana ancien oko oko aleke tere ti lo kozoni ndali ti bungbi so ala a-ancien ni ayeke sara, lo gbu li ti lo na ndo ti aversê ti Bible nga lo gi fango lege ti ngbâa be-ta-zo so ayeke sara ye na ndara. Tâ tënë, ti sara ye so ahunda ngoi. Tongana bango ndo ti ala ayeke nde nde tongana ti so asi lani na ngoi ti akozo Chrétien na ngoi so bebungbi ayeke gbu li na ndo ti tënë ti fango ganza, ala yeke peut-être na bezoin ti mû ngoi mingi ti gi nda ti ye na ndo ti tënë ni tongaso si ala mû mbeni desizion so aluti na ndo ti Bible.—Kus. 15:2, 6, 7, 12-14, 28.
14. So bungbi ti a-ancien asara kusala maboko na maboko na yâ ti mango tere anzere na mo? Ngbanga ti nyen anzere na mo?
14 Nyen la alingbi ti si tongana mbeni ancien aluti nganganga gi na ndo ti abibe ti lo wala lo ye ti tene a sara ye gi tongana ti so lo pensé? Nyen la ayeke si tongana mbeni zo, na tapande ti Diotrèphe na ngoi ti akozo Chrétien, asara si mango tere ayeke dä pëpe? (3 Jean 9, 10). Congrégation ni kue ayeke bâ pasi biani. Tongana ti so Satan agi lani ti buba yâ ti congrégation na ngoi ti akozo Chrétien, zia e hinga so lo ye nga ti buba yâ ti siriri ti congrégation laso. Lo lingbi ti sara kusala na abibe ti mitele so zo ayeke na ni, na tapande nzara ti warango kota ndo. Ni la, a lingbi a-ancien agi ti sara tere ti ala kete nga ala sara kusala maboko na maboko tongana amembre ti tere oko. E yeke na ngia mingi ndali ti a-ancien so ayeke na tâ be-ti-molenge nga so ayeke sara kusala maboko na maboko tongana amembre ti tere oko!
A-ancien “ayeke gboto mê ti ala”
15. Nyen la apusu a-ancien ti gboto mê ti aita?
15 Na pekoni Paul afa mbeni kua ti a-ancien so ayeke kota mingi nga so akpengba: gbotongo mê ti angasangbaga. Na yâ ti mbage ti Mbeti ti Nzapa so aChrétien asû ândö na Grec, gi Paul la asara kusala na mbupa ti Grec so a kiri pekoni na “gboto mê.” A lingbi ti ndu mbeni ngangu wango me aye pëpe ti tene so a ke zo ni (Kus. 20:31; 2 aThes. 3:15). Na tapande, Paul asû mbeti na aita ti Corinthe lo tene: “Mbi sû aye so na mbeti na ala ti zia kamene na lê ti ala pëpe, me ti gboto mê ti ala tongana amolenge ti mbi so mbi ndoye ala mingi.” (1 aCor. 4:14). Ndoye ti lo teti ala la apusu lo ti gboto mê ti ala.
16. Ye wa a yeke nzoni a-ancien agirisa pëpe na ngoi so ala yeke gboto mê ti aita?
16 A-ancien agirisa pëpe so lege so ala yeke gboto na mê ti azo ayeke kota mingi. Ala yeke sara ngangu ti mû tapande ti Paul so asara ye na nzoni bê, na ndoye nga lo yeke mû maboko na zo. (Diko 1 aThessalonicien 2:11, 12.) Biani, a-ancien ayeke ‘ngbâ gi na ndo ti tënë so ayeke tâ tënë, si ala lingbi ti wa azo na lege ti nzoni fango ye ti ala’.—Tite 1:5-9.
17, 18. Ye wa a lingbi mo girisa ni pëpe tongana mbeni ancien agboto mê ti mo?
17 Tâ tënë, a-ancien ayeke awasiokpari na ala lingbi ti tene mbeni tënë so ala ye fade ti tene ni pëpe (1 aGbia 8:46; Jacq. 3:8). A-ancien ahinga nga so tongana a mû wango na aita, mingi ni wango ni ‘amû ngia na ala pëpe, me amû vundu.’ (aHéb. 12:11). Tongaso, na ngoi so mbeni ancien aga nduru na mbeni ita na lo gboto mê ti lo, peut-être ancien ni agbu li na ndo ni fani mingi nga lo sambela ndali ni kozoni. Tongana mbeni ancien agboto mê ti mo, mo yeke kiri singila na lo ndali ti so na ndoye lo bi bê ti lo na mo?
18 Bâ so mo yeke na mbeni kobela so awanganga ahinga li ti ala na ni pëpe. Na pekoni, mbeni docteur awara kobela ni, me a yeke ngangu na mo ti yeda so mo yeke na kobela ni so. Mo yeke bata docteur ni na bê? Ên-ën! Même tongana lo hunda ti tene a opéré mo, mo yeke yeda ndali ti so mo hinga so a yeke ndali ti nzoni ti mo. Fason so docteur ni afa na aye ni na mo alingbi peut-être ti son bê ti mo. Me mo yeke zia si sarango tënë ti lo ni akanga lege na mo ti mû nzoni desizion? Oko pëpe. Legeoko nga, zia pëpe si fason so a gboto na mê ti mo akanga lege na mo ti mä azo so Jéhovah na Jésus ayeke sara kusala na ala ti mû maboko na mo ti maï na yâ ti tâ tënë wala ti bata songo ti mo na Jéhovah.
Kiri singila ndali ti a-ancien so Jéhovah amû na mo
19, 20. Tongana nyen la mo lingbi ti fa so mo kiri singila ndali ti ‘akoli so a mû ala tongana amatabisi’?
19 Mo yeke sara nyen tongana mo wara mbeni matabisi so a leke ni tâ gi ndali ti mo? Mo yeke fa so mo bâ ni na nene ni na lege so mo yeke sara kusala na ni. ‘Akoli so a mû ala tongana amatabisi’ ayeke azo so na lege ti Jésus Christ Jéhovah amû ala ndali ti mo. Mbeni ye so mo lingbi ti sara ti kiri singila ndali ti amatabisi so ayeke ti dengi mê nzoni na adiskur so a-ancien ayeke mû nga ti gi ti sara ye alingbi na aye so ala fa. Mo lingbi nga ti fa so mo kiri singila na lege so mo yeke mû anzoni commentaire na ngoi ti abungbi. Mû mbage na yâ ti akusala so a-ancien ayeke mû li ni dä, na tapande kusala ti fango tënë. Tongana mo bâ nzoni na lege ti wango ti mbeni ancien, ngbanga ti nyen mo sara tënë ni na lo pëpe? Nga, ngbanga ti nyen mo kiri singila pëpe na asewa ti a-ancien? Girisa pëpe so, ti tene mbeni ancien asara kua ngangu na yâ ti congrégation, a yeke grâce na sewa ti lo so ayeda ti sara sacrifice na ndo ti tënë ti ngoi so lo lingbi fade ti mû ndali ti sewa ni.
20 Biani, e yeke na araison ti kiri singila na a-ancien so ayeke sara kua ngangu na popo ti e, so ayeke fa lege na e na yâ ti kusala nga so ayeke gboto mê ti e. ‘Akoli so a mû ala tongana amatabisi’ ayeke biani azo so ndoye apusu Jéhovah ti mû ala na e!
Mo dabe ti mo na ni?
• Araison wa apusu aChrétien ti Thessalonique ti bâ na nene ni azo so ayeke mû li ni na popo ti ala?
• Aye wa a-ancien ti congrégation ti mo asara so afa so ala sara kua ngangu ndali ti mo?
• Tongana nyen la mo bâ nzoni na lege ti a-ancien so ayeke fa lege na mo?
• Tongana mbeni ancien agboto mê ti mo, ye wa a yeke nzoni mo girisa pëpe?
[Ahundango tënë ti manda na ye]
[Foto na lembeti 31]
Mo yeke bâ na nene ni gbâ ti aye so a-ancien ayeke sara ti fa lege na congrégation?