„Abi lespeki gi den sma di e wroko tranga na un mindri”

„Abi lespeki gi den sma di e wroko tranga na un mindri èn di e teki fesi na un mindri na ini a wroko fu Masra, èn di e frumane unu.”​—1 TES. 5:12.

1, 2. (a) Na ini sortu situwâsi a gemeente Tesalonika ben de di Paulus skrifi a fosi brifi gi den? (b) San Paulus ben taigi den Tesalonikasma fu du?

KON meki wi taki dati yu ben de wan memre fu a fosi yarihondro gemeente na ini Tesalonika. A gemeente disi ben de wan fu den fosiwan di ben seti na ini Europa. Na apostel Paulus ben gebroiki furu ten fu gi den brada drape deki-ati. A kan taki a ben poti owruman fu teki fesi, neleki fa a ben du dati na ini tra gemeente (Tori. 14:23). Ma baka di a gemeente ben seti, dan wan grupu Dyu yagi Paulus nanga Silas puru na ini a foto. A kan taki den Kresten di ben tan na baka, ben e firi leki den de den wawan, èn kande den ben e frede srefi.

² A no de fu taki dati Paulus ben e broko en ede nanga a nyun gemeente baka di a gowe libi Tesalonika. A ben du muiti fu drai go baka, ma „Satan ben tapu pasi” gi en. Dati meki a seni Timoteyus go fu gi a gemeente deki-ati (1 Tes. 2:18; 3:2). Di Timoteyus ben drai kon baka nanga wan bun boskopu, dan dati gi Paulus deki-ati fu skrifi wan brifi gi den Tesalonikasma. Wan fu den sani di a skrifi, na taki a gi den deki-ati fu ’abi lespeki gi den sma di ben e teki fesi na den mindri’.​—Leisi 1 Tesalonikasma 5:12, 13.

3. Fu san ede a fiti taki Kresten na ini Tesalonika e sori bigi warderi gi owruman?

³ Den brada di ben e teki fesi na mindri den Kresten fu Tesalonika no ben abi ondrofeni leki  Paulus nanga den tra brada di ben e teki waka nanga en. Tra fasi leki den owruman na ini Yerusalem, den brada na ini Tesalonika no ben de Kresten so langa ete. Fu taki en leti, a gemeente no ben seti wán yari ete! Toku a ben fiti taki den wan na ini a gemeente ben e sori warderi gi den owruman, fu di den ben e „wroko tranga”, fu di den ben e „teki fesi” na ini a gemeente, èn fu di den ben e „frumane” den brada. Iya, a ben fiti taki den ben ’abi bigi lespeki gi den owruman fu a wroko di den ben e du èn den ben musu du dati nanga lobi’. Paulus ben aksi den a sani disi, baka di a ben gi den a rai fu „libi na ini vrede nanga makandra”. Efu yu ben de drape na ini Tesalonika, yu ben o sori bigi warderi gi a wroko di den owruman ben e du? Fa yu e si den ’libisma di Gado gi a gemeente fu yu leki presenti’, nanga yepi fu Krestes?​—Ef. 4:8.

Den e „wroko tranga”

4, 5. Fu san ede den owruman na ini a ten fu Paulus ben musu wroko tranga fu gi a gemeente leri, èn fu san ede a de so tu na ini a ten disi?

⁴ Fa den owruman na ini Tesalonika ben e „wroko tranga”, baka di den brada ben seni Paulus nanga Silas go na Berea? A no de fu taki dati neleki Paulus, den ben e gi a gemeente leri nanga yepi fu den Santa Buku fu Bijbel. Kande yu e aksi yusrefi: ’Den Kresten na ini Tesalonika ben abi warderi gi a Wortu fu Gado?’ Fu taki en leti, Bijbel e sori taki „tra fasi leki den sma fu Tesalonika, den sma fu Berea ben de klariklari fu teki leri, . . . èn den ben e ondrosuku Gado Buku finifini ibri dei” (Tori. 17:11). Paulus no ben e taki fu den Kresten, ma a ben e taki fu den tra Dyu na ini Tesalonika. Den wan di ben tron Kresten ’no ben teki a wortu leki a wortu fu libisma, ma leki a wortu fu Gado’ (1 Tes. 2:13). A no de fu taki dati den owruman ben e wroko tranga fu gi den Kresten dati leri.

⁵ Na ini a ten disi, a getrow èn koni srafu e gi na ipi fu Gado „nyanyan na a reti ten” (Mat. 24:45). Ondro a tiri fu a srafu-grupu, den owruman na ini den gemeente e wroko tranga fu gi den Kresten brada nanga sisa leri. Furu gemeente abi bogobogo Bijbel publikâsi, èn na ini son tongo na Index van Wachttoren-publikaties nanga a Watchtower Library tapu CD-ROM de fu kisi. Fu man gi a gemeente a leri di den abi fanowdu, den owruman e gebroiki furu ten fu sreka den prati di den musu hori na den konmakandra, so taki den kan hori den prati fu den na wan fasi di sa tyari wini kon gi a gemeente. Oiti yu prakseri omeni ten den owruman e gebroiki fu sreka den prati di den musu hori na den gemeente konmakandra, na den kongres, èn na den tra bigi konmakandra?

6, 7. (a) Fa Paulus ben de wan eksempre gi den owruman na ini Tesalonika? (b) Fu san ede a kan muilek gi owruman na ini a ten disi fu teki na eksempre fu Paulus?

⁶ Den owruman na ini Tesalonika ben memre a moi eksempre di Paulus ben gi den na ini a fasi fa a ben e luku den skapu. Paulus no ben e si a frantwortu dati leki wan plekti nomo. Soleki fa wi si na ini na artikel na fesi, dan Paulus ben ’e handri na wan switi fasi neleki te wan mama e gi den pikin fu en bobi èn e sorgu gi den’. (Leisi 1 Tesalonikasma 2:7, 8.) A ben de klariklari fu ’gi en eigi libi’! Den owruman ben musu teki na eksempre fu Paulus, te den ben e luku a gemeente.

⁷ Neleki Paulus, Kresten owruman na ini a ten disi lobi den skapu tu. A kan taki son skapu no sabi fa fu sori switifasi. Toku den owruman e pruberi fu frustan den sortu sma dati, èn den e „feni bun” na ini den (Odo 16:20). A tru taki fu di wan owruman na wan sondu sma, meki a kan muilek gi en fu abi wan bun denki fu ibri skapu. Ma efu a e du muiti fu sori switifasi gi ala sma, dan yu no feni taki wi musu prèise en gi a muiti di a e meki fu de wan bun skapuman ondro a tiri fu Krestes?

8, 9. San na wan tu fasi fa owruman na ini a ten disi e ’sorgu gi wi’?

⁸ A de fanowdu taki wi alamala e ’saka wisrefi’ na ondro den owruman. Soleki fa Paulus ben skrifi, dan ’den e sorgu gi wi’ (Hebr. 13:17). Den wortu dati e meki wi prakseri fa wan trutru skapuman e lasi sribi soso fu man kibri den  skapu fu en. Na so a de tu taki den owruman na ini a ten disi e lasi sribi fu man sorgu gi den wan di siki, den wan di e firi brokosaka, noso den wan di abi yepi fanowdu fu fiti Bijbel gronprakseri. Fu eksempre, den brada fu na Ati-oso Kontakti Komte ben musu wiki te neti fu man yepi wan sma di abi datrayepi fanowdu. A no de fu taki dati wi abi furu warderi gi a yepi di den e gi wi na ini den situwâsi dati!

⁹ Owruman fu Bowkomte nanga komte di e yepi sma di de na nowtu e wroko tranga fu yepi den Kresten brada nanga sisa. A fiti taki wi e horibaka gi den nanga wi heri ati! Luku fa den komte dati yepi den Kresten brada nanga sisa, baka di a bigi draiwinti di nen Nargis, tyari pori kon na ini Myanmar, na ini 2008. Fu man doro Gemeente Bothingone di ben de na ini na Irrawaddy Delta kontren di ben kisi bigi pori, dan a grupu ben musu pasa na ini wan kontren pe dedeskin ben e didon na ala sei. Di den brada nanga sisa fu a kontren dati si taki a kring-opziener fu den ben de na ini a fosi grupu di doro na ini Bothingone fu yepi sma, dan den bari: „Luku! Na a kring-opziener fu wi! Yehovah frulusu wi!” Yu abi warderi gi a tranga wroko di den owruman e du dei nanga neti? Son owruman abi a frantwortu fu dini na ini spesrutu komte di musu poti prakseri na muilek krutu afersi. Den owruman disi no e meki bigi fu den sani di den ben man du. Ma den sma di den owruman yepi, de nanga tangi trutru taki den kisi a yepi dati.​—Mat. 6:2-4.

10. Sortu wroko owruman e du aladi furu sma no sabi dati?

¹⁰ Furu owruman na ini ten disi musu du papirawroko tu. Fu eksempre, ibri mun nanga ibri wiki a fesiman fu den owruman musu poti tapu papira suma sa hori den difrenti prati na den konmakandra. Ibri mun nanga ibri yari, a sekretarsi fu a gemeente e meki a preikiwroko raportu fu a heri gemeente. A skoro-opziener e sorgu taki a skoro e hori na wan yoisti fasi. Baka ibri dri mun, wan owruman e luku den moni afersi fu a gemeente. Den owruman e leisi den brifi di a bijkantoro seni kon, èn den e fiti den rai di e yepi a gemeente fu „de wán na ini a bribi” (Ef. 4:3, 13). Fu di den owruman e wroko so tranga, meki ’ala sani e pasa na wan fasi di fiti èn soleki fa sani seti’.​—1 Kor. 14:40.

Den e „teki fesi na un mindri”

11, 12. Suma e teki fesi na ini gemeente, èn san dati wani taki?

¹¹ Paulus ben taki dati den owruman fu Tesalonika di ben e wroko tranga, ben e „teki fesi” na ini a gemeente (1 Tes. 5:12). Paulus ben taki tu dati den owruman dati ben e „wroko tranga”. A no ben e taki fu wán owruman nomo di ben e teki fesi, ma a ben e taki fu ala den owruman na ini a gemeente. Na ini a ten disi, furu fu den owruman e teki fesi na den gemeente konmakandra. No so langa pasa, a nen „fesiman-opziener” kenki kon tron „fesiman fu a skin fu owruman”, èn disi e yepi wi fu kon frustan taki ala den owruman e wroko makandra leki wán skin.

¹² Te wan owruman e „teki fesi” na ini a gemeente noso e tiri a gemeente, dan dati no wani taki nomo dati a e gi leri. Na ini 1 Timoteyus 3:4 a srefi wortu dati skrifi. Paulus ben taki dati wan owruman musu de „wan man di e tiri en osofamiri na wan bun fasi èn di abi pikin di e saka densrefi na en ondro na wan seryusu fasi”. A de krin taki na ini a tekst disi a wortu „tiri” no abi fu du nomo nanga a leri di wan brada musu gi den pikin fu en, ma a abi fu du tu nanga a teki di a musu teki fesi na ini na osofamiri. Boiti dati, a musu sorgu taki ’den pikin fu en e saka densrefi na en ondro’. Iya, den owruman e teki fesi na ini a gemeente. Na so den e yepi ala sma fu saka densrefi na ondro Yehovah.​—1 Tim. 3:5.

13. Fu san ede a e teki ten son leisi fosi owruman kan teki wan bosroiti na den owruman konmakandra?

¹³ Fu man teki fesi bun na ini a gemeente, den owruman e taki nanga makandra san na den problema fu a gemeente èn fa den kan yepi a gemeente. Kande a ben o moro makriki efu wan owruman ben e teki ala bosroiti. Ma neleki fa a ben de nanga a tiri skin fu a fosi yarihondro, na so den skin fu owruman e taki fri nanga  makandra, èn den gebroiki Bijbel fu kon sabi sortu bosroiti den musu teki. Den wani hori densrefi na Bijbel gronprakseri fu yepi a gemeente fu den. Disi e tyari furu wini kon te ibri owruman e sreka ensrefi gi den owruman konmakandra, te den e luku san Bijbel nanga den rai fu a getrow èn koni srafu e taki fu wan spesrutu tori. A no de fu taki dati disi e teki ten. Te den owruman no e agri nanga makandra fu wan tori, dan kande den sa abi moro ten fanowdu fu ondrosuku sani so taki den kan teki wan bosroiti di e kruderi nanga Bijbel. Na dati ben pasa tu di a tiri skin fu a fosi yarihondro ben e poti prakseri na a besnijdenis tori.​—Tori. 15:2, 6, 7, 12-14, 28.

14. Yu de nanga tangi gi den owruman di e wroko makandra na ini wánfasi? Fu san ede yu de nanga tangi?

¹⁴ San kan pasa efu wan owruman de nomonomo taki sani musu waka soleki fa en wani, noso efu a e pruberi fu panya en eigi denki na ini a gemeente? Noso fa a ben o de te wan sma ben o suku fu tyari pratifasi kon, neleki fa Diotrefes ben du dati na ini a fosi yarihondro? (3 Yoh. 9, 10) A no de fu taki dati disi ben o tyari pori kon na ini a gemeente. Efu Satan ben e pruberi fu tyari bruya kon na ini a gemeente fu a fosi yarihondro, dan wi kan de seiker taki a wani pori a vrede na ini a gemeente na ini a ten disi. Kande a kan gi sma deki-ati fu plisi den sondu firi fu den. Iya, kande den sma disi sa kisi na angri fu suku biginen. Fu dati ede, owruman musu kweki sakafasi èn den musu wroko makandra leki wán skin. Iya, wi abi warderi gi den owruman di abi sakafasi èn di e wroko makandra leki wán skin!

Den e „frumane unu”

15. Fu san ede owruman e frumane wan brada noso wan sisa?

¹⁵ Paulus ben poti prakseri na wan tra prenspari  frantwortu di owruman abi, èn di no makriki srefisrefi. A ben taki dati den musu frumane na ipi. Na ini den Kresten Griki Buku fu Bijbel, Paulus wawan gebroiki a Griki wortu di vertaal nanga „frumane”. A wortu disi kan abi fu du nanga krakti rai, ma dati no wani taki dati a rai disi e gi nanga atibron (Tori. 20:31; 2 Tes. 3:15). Fu eksempre, Paulus ben skrifi disi gi den Korentesma: „Mi no e skrifi den sani disi fu gi unu syen, ma fu frumane unu leki lobi pikin fu mi” (1 Kor. 4:14). Paulus ben gi den a rai disi fu di a ben lobi den, èn fu di a ben e broko en ede nanga den.

16. San owruman musu hori na prakseri te den e frumane trawan?

¹⁶ Den owruman e hori na prakseri taki a fasi fa den e frumane trawan prenspari trutru. Den e du tranga muiti fu teki na eksempre fu Paulus di ben sori switifasi nanga lobi, èn di ben e yepi tra sma. (Leisi 1 Tesalonika 2:11, 12.) A no de fu taki, dati den owruman ’e hori densrefi tranga na a wortu di tru, so taki den kan frumane sma nanga a bun leri’.​—Tit. 1:5-9.

17, 18. San yu musu hori na prakseri te wan owruman e frumane yu?

¹⁷ A tru taki owruman abi swakifasi, èn son leisi den ben kan taki sani di sa hati den bakaten (1 Kow. 8:46; Yak. 3:8). Owruman sabi tu taki te den e gi Kresten brada nanga sisa rai, dan nofo tron a ’no de wan prisiri sani gi den, ma wan sari sani’ (Hebr. 12:11). Sobun, te wan owruman e frumane wan sma, dan nofo tron a prakseri bun san a o taki, èn a begi Yehovah tu fu yepi en. Efu wan owruman frumane yu, dan yu man si taki a du dati fu di a e broko en ede nanga yu?

¹⁸ Kon meki wi taki dati yu abi wan siki, ma yu no sabi soifri san e du yu. Ne wan datra e sori yu krin sortu siki yu abi, ma a muilek gi yu fu bribi a tori dati. Yu ben o mandi nanga a datra? Kwetikweti! Awinsi a ben taigi yu taki yu musu du wan oparâsi, toku yu ben o teki a rai fu en, fu di yu sabi taki a de fu yu eigi bun. Kande yu no lobi a fasi fa a datra taigi yu san e du yu, ma yu ben o meki a sani dati tapu yu fu du na oparâsi? Nôno, yu no ben o du dati. Sobun, no meki a fasi fa yu kisi rai tapu yu fu arki den wan di Yehovah nanga Yesus e gebroiki fu yepi yu fu go na fesi, noso fu tan abi wan bun matifasi nanga Yehovah.

Abi warderi gi den owruman di Yehovah poti na ini a gemeente

19, 20. Fa wi kan sori warderi gi den ’libisma di gi leki presenti’?

¹⁹ San yu ben o du te yu ben o kisi wan presenti di meki spesrutu gi yu? Yu ben o gebroiki en fu sori taki yu de nanga tangi? Nanga yepi fu Yesus Krestes, Yehovah gi „libisma leki presenti” fu yepi yu. Wan fasi fa yu kan sori warderi gi den presenti disi, na te yu e arki bun te den owruman e hori lezing èn te yu e pruberi fu fiti den sani di yu e leri. Yu kan sori warderi tu te yu e gi bun piki na den konmakandra. Horibaka gi den owruman te den e teki fesi na ini a preikiwroko, èn na ini tra sani di abi fu du nanga na anbegi. Efu yu kisi wini fu a rai di wan owruman gi yu, dan fu san ede yu no e taigi en dati? Boiti dati, fu san ede yu no e sori warderi gi den osofamiri fu den owruman? Hori na prakseri taki a ten di wan owruman e teki fu wroko tranga na ini a gemeente, na ten di a ben kan gebroiki gi en osofamiri.

²⁰ Iya, a fiti srefisrefi taki wi e sori warderi gi den owruman di e wroko tranga fu yepi wi, di e tiri wi, èn di e frumane wi. Den ’libisma disi di gi leki presenti’ trutru de wan seti fu Yehovah!

Yu e memre disi ete?

• Fu san ede a ben fiti taki den Kresten na ini Tesalonika ben sori warderi gi den wan di ben e teki fesi na den mindri?

• Fa den owruman na ini a gemeente fu yu e wroko tranga fu a bun fu yu?

• Fa yu e kisi wini fu den owruman di e teki fesi na ini a gemeente?

• San yu musu hori na prakseri te wan owruman e frumane yu?

[Aksi fu a tori disi]

[Prenki na tapu bladzijde 27]

Yu abi warderi gi den someni difrenti fasi fa den owruman e teki fesi na ini a gemeente?