“Lumun Nen Mbara Mba Ve Eren Tom Her A Ven Sha Gbashima” la
“Lumun Nen Mbara Mba Ve Eren Tom Her A Ven Sha Gbashima” la
“Lumun nen mbara mba ve eren tom her a ven sha gbashima mba ve hemen ne ken Ter shi ve we ne kwagh kpaa la.”—1 TES. 5:12.
1, 2. (a) Ka mlu u nyi tiônnongo u ken Tesalonika la lu ker shighe u Paulu nger ve washika laa? (b) Paulu yange taver Mbatesalonika ishima ér ve er nyi?
TÔÔ wer yange u lu môm ken tiônnongo u ken Tesalonika, u̱ lu môm ken atôônanongo a i hii veren ken veghertar u Yuropa, ken derianyom u hiihii la. Apostoli Paulu tôô shighe kpishi u taver anmgbianev mba hen tiônnongo la asema shi maan ve ken jijingi. Alaghga a tsua mbatamen a ver ér ve hemen, er ken atôônanongo agen kpa vande eren nahan. (Aer. 14:23) Kpa mba veren tiônnongo la cii yô, Mbayuda kpishi za zua imôngo sha u zendan Paulu man Shila ken gar la kera. Alaghga á lu Mbakristu mba ve shi her la er i undu ve nahan, shi mciem je kpa ma a gba ve iyol.
2 Shighe u Paulu undu Tesalonika la, ishima za un iyol sha kwagh u tiônnongo u sember za veren ker la, man taver u fan er hii ve kwagh lu nahan ga. Tsô a nôngo ér una hide her, kpa “Satan yange” un. Nahan a tindi Timoteu ér a za taver tiônnongo la ishima. (1 Tes. 2:18; 3:2) Timoteu hidi a ibaver i dedoo yô, kwagh la mgbegha Paulu u ngeren Mbatesalonika washika. Môm ken akaa a yange wa ve ken washika la yô ér, ve ‘lumun mbara mba ve eren tom her a ve la.’—Ôr 1 Mbatesalonika 5:12, 13.
3. Mbakristu mba ken Tesalonika mbara lu a atôakyaa a nyi a wan mbatamen ikyo kpishi je?
3 Mbatamen mba ve lu hemen ken tiônnongo u ken Tesalonika la yange ve lu a mfe tsor tsor er Paulu man mba ve zenden vea na la nahan ga, shi ve tsa ken mimi kpishi er mbatamen mba ken Yerusalem mbara nahan kpaa ga. Kera ga je kpa, tiônnongo la lu a tsa i kuma inyom i môm ga! Nahan cii kpa, mba ve lu ken tiônnongo la lu a ityôkyaa i lun a iwuese hen mbatamen “mba ve eren tom . . . sha gbashima” shi ve “hemen” tiônnongo shi ve ‘waan’ anmgbianev “kwagh” la. Sha kpôô yô, yange ve lu a ityôkyaa i injaa i vea “waan [mbatamen] ikyo kpishi je sha dooshima” yô. Paulu ôron kwagh ne been yô, maa a wa ve kwagh ér ve ‘lu bem bem ayol a ve.’ Yange wea lu ken Tesalonika nahan, ma u lu a iwuese kpishi sha tom u mbatamen eren la kpa? U nengen “ior mba i ne ve lu uiyua,” mba a Aôndo a ver ken tiônnongo wou sha ikyev i Kristu la nena?—Ef. 4:8, NW.
‘Mba Eren Tom sha Gbashima’
4, 5. Er nan ve tom u tesen tiônnongo sha ayange a Paulu la lu mbatamen zege tomo, man er nan ve nyian kpa i lu nahana?
4 Mbatamen mba ken Tesalonika mba ne Paulu man Shila gbenda ér ve yem ken Berea yô, ve hide ve lu ‘eren tom sha gbashima’ nena? Yange ve lu tesen tiônnongo ken Ruamabera er Paulu nahan, je ka u henen a hen ga. Kpa alaghga u pine wer, ‘Mbakristu mba ken Tesalonika mbara yange ve lu a iwuese sha Mkaanem ma Aôndo je he?’ Kera ga je kpa, Bibilo kaa ér Mbakristu mba ken Berea mbara “hemba ior i Tesalonika inja i mimi . . . ve lu timen ken icighanruamabera ayange ayange.” (Aer. 17:11) Nahan kpa, lu Mbakristu mba ken Tesalonika Paulu lu tôôn ve karen sha mba ken Berea ga, kpa lu Mbayuda mba ken Tesalonika jimin cii lu karen ve sha ior i Berea ye. Mba ve hingir mbananjighjigh la ve ‘lumun Mkaanem ma Aôndo er ka kwaghôron u ior ga, kpa er ka kwaghôron u Aôndo’ nahan. (1 Tes. 2:13) A̱ shi nan kpa, mbatamen mbara yange ve er tom kpoghuloo u tesen tiônnongo.
5 Nyian ne, wanakiriki u jighjigh man u fan kwagh ngu nan ikyumuile i Aôndo “kwaghyan sha ashighe ashighe.” (Mat. 24:45) Mbatamen mba ken tiônnongo ka ve er tom taveraa sha u koson anmgbianev vev ken jijingi, sha iniezwa i wanakiriki la. Alaghga mba ken tiônnongo vea lu a ityakerada i pasen Bibilo kpishi, shi ikyav mbi tomov, anza er takerada u i yer ér Watch Tower Publications Index la man tser u Watchtower Library on CD-ROM nahan, mbi ken ijô igen. Mbatamen ka ve tôô shighe kpishi ve wa iyol sha akaaôron a ken mbamkombo sha er vea na akaaôron ne sha gbenda u injaa, shi aa kure mbamgbe mba ken jijingi mba tiônnongo la yô. I lu nahan u hen sha kwagh u shighe u mbatamen ka ve vihi sha u wan iyol sha akaaôron a ken mbamkombo man mbamkohol mba kiriki kua mba vesen la vee?
6, 7. (a) Paulu yange ver mbatamen mba ken Tesalonika mbara ikyav i nyi? (b) Er nan ve alaghga a lu mbatamen ican nyian u dondon ikyav i Paulu?
6 Mbatamen mba ken Tesalonika yange ve umbur ikyav i dedoo i Paulu ver ve sha kwagh u kuran ikyumuile la. Yange lu di kwagh u za sôron ikyumuile sha ci u gba kpee u una eren nahan ga. Er se hen ken ngeren u karen la nahan, Paulu “lu eren sha uee . . . er ngô ka a uve sha ônov nav nahan.” (Ôr 1 Mbatesalonika 2:7, 8.) Yange kegh iyol u ‘nan uma na je kpaa’! Shi yange gba u mbatamen vea dondo ikyav na la shighe u ve lu sôron anmgbianev yô.
7 Mbakuran mba ken Kristu nyian mba kaven Paulu sha u wan ikyumuile ikyo. Alaghga sha marami u iyôngo igen je, ia eren kwagh a ior kundu kundu ga, shi ia biishi a ior keng ga. Nahan cii kpa, mbatamen ka ve er kwagh sha kwaghfan, shi ve ker ér vea “zua a kwaghdoon” ken a ve. (Anz. 16:20) Ka mimi, er mbatamen kpa ve yen yô, alaghga ortamen nana nôngo kwagh ve nana nengen hanma or cii sha gbenda u vough ye. Nahan kpa, er nan lu nôngon sha afatyô u nan cii ér nana eren kwagh a hanma or kundu kundu la yô, doo u a wuese nan sha iniôngon i nan lu nôngon ér nana lu orkuran u dedoo sha ikyev i Kristu la ga he?
8, 9. Ka sha igbenda igen i nyi nahan mbatamen mba sha ayange ne ve lu ‘kuran uuma aseva’?
8 Se cii se mba a ityôkyaa i ‘hiden a ayol a ase ijime’ hen mbatamen. Er Paulu nger nahan, ‘mba kuran uuma asev.’ (Heb. 13:17) Ishember ne umbur se kwagh u orkuranilev kpôô kpôô, u ka nan tsa per sha er nana kura ilev mbi nan la. Kape nyian kpa, mbatamen vea fatyô u nan shighe u ma ve lu yaven la sha u nengen sha mbamgbe mba ior mba ve lu uange, shin mba ishima i yen ve shin mba ve lu kanen shio u dondon akaawan a ken Bibilo je la. U tesen ikyav yô, ka i nder anmgbianev mba ken Kômatii u Wasen sha Kwagh u Iyouci ér ve za na iwasen sha ma angev mbu mbu ker or yô. Kpa ka vea na se iwasen shighe u se tagher a imba mzeyol la nahan, i doo se kpishi!
9 Mbatamen mba nengen sha m-maa u maan Ayou a Tartor man kômatii u wasen mba aahe a er ve la ka ve er tom taveraa sha u wasen anmgbianev. Ve kuma u se sue ve a ishima yase cii! Nengen ase tom u wasen mba ijeverahumbe i bo i i yer ér Cyclone Nargis la yange i va ta sha tar u Myanmar ken inyom i 2008, i̱ vihi ve akaa kpishi la. Yange gba u anmgbianev mba wasen mba aahe a er ve la vea kar hen haregh u ijeverahumbe vihi un caver caver shi akom a ior kpa jalegh hen inya la ve, vea za ar hen tiônnongo u i yer ér Bothingone, u a lu hen mngerem ma i yer ér Irrawaddy, ape ijeverahumbe la er tahav yum la ye. Anmgbianev mba hen ijiir la mba za nengen a ortamen u sôron atôônanongo ve u tse vea anmgbianev mba ve va sha u nan iwasen imôngo yô, ve genger amo ér: “Nenge! Ka ortamen wase u sôron atôônanongo! Yehova yima se ve!” U ngu a iwuese sha tom u mbatamen ve eren tugh man atetan la kpa? Ka i tsua mbatamen mbagenev ér ve lu ken ukômatii mbagenev, sha u ôron ajir a cimin man a taver kpaa. Mbatamen mban mba te ihyagh sha kwagh u ve kercio u eren la ga, kpa mba ve zough a iwasen sha tom ve ne yô, ka ve lu a iwuese kpishi.—Mat. 6:2-4.
10. Ka ityom i nyi mbatamen ve eren ken tiônnongo, kpa ior kpishi ve fe kwagh u í yum ga?
10 Shi mbatamen nyian kpishi mba a tom u ngeren akaa sha ikyatakerada. U tesen ikyav yô, ortamen u wasen mzough u mbatamen tom ka a na anmgbianev akaaôron sha aaven a ken mbamkombo hanma kasua. Akawe u tiônnongo di ka a nger ibaver i kwaghpasen hanma uwer man sha mbee u hanma inyom. Ortamen u hemen makeranta ka a ver ishima sha akaaôron a ken makeranta man ior mba vea na a la kpaa. Hanma iwer itiar yô, ka i gba ceke i ikpanyar i tiônnongo. Mbatamen ka ve ôr uwashika mba afishi a branci a nger la shi ve dondo kwagh u i tese ker, u ka a wase tiônnongo cii a za hemen u lun ken “mzough u ken Jijingi” la. (Ef. 4:3, 13) Sha iniôngon i mbatamen mba ve eren tom taveraa mban yô, se mba “eren akaa cii tsembelee je, sha inja sha inja.”—1 Kor. 14:40.
Mba “Hemen Ne”
11, 12. Ka unô ve hemen ken tiônnongo, man tom la wa nyi kere?
11 Paulu ôr kwagh u mbatamen mba ve eren tom taveraa ken Tesalonika ér ka mba ve “hemen” ken tiônnongo yô. (1 Tes. 5:12) Paulu shi ôr kwagh u mbatamen mba shon ér mba ‘eren tom sha gbashima.’ Lu ôron kwagh u “ortamen u hemen” môm tseegh ga, kpa lu ôron kwagh u mbatamen mba ken tiônnongo cii. Nyian ne, mbatamen kpishi ka ve hemen ken mbamkombo mba tiônnongo. Ishember i í gem yilan ainge ér “ortamen u wasen mzough u mbatamen tom” la, wase se u nengen mbatamen cii ser mba ken mzough.
12 U hemen ken tiônnongo la hemba di u tesen tseegh tsô la. Paulu kaa ken 1 Timoteu 3:4 ér orkuran nana̱ lu “or u nengen sha ya u nan dedoo, nana̱ nengen sha ônov mba nan ve̱ tema sha inja sha inja.” Ikyav tese wang ér ishember i í gem heen ér “nengen sha ya u nan” la ka di u tesen ônov tseegh ga, kpa kua u hemen hen tsombor u nan shi wasen mbayev ér “ve̱ lu mbaungwan kwagh.” Sha mimi yô, mbatamen mba hemen ken tiônnongo, sha u wasen ior cii u ungwan imo i Yehova.—1 Tim. 3:5.
13. Kanyi ia na ve alaghga a tôô mbatamen shighe u tsuan kwagh u vea er shighe u ve nyer mkombo u mbatamen la?
13 Mbatamen ka ve tume idyu imôngo sha mbamgbe mba tiônnongo, sha er vea fa gbenda u hemban doon u vea kure mbamgbe mba shon, man er vea hemen ikyumuile tsembelee la kpaa. Aluer ka ortamen môm tseegh nan tsough akaa a mbatamen vea eren yô, alaghga tom ua kôvor. Nahan cii kpa, mbamzough mba mbatamen nyian mba dondon ikyav i mbahemenev mba shin tine mba sha derianyom u hiihii la, sha u lamen sha akaa gbar gbar shi keren u dondon kwagh u Ruamabera a tese la. Awashima ve yô, ka u dondon kwaghwan u Ruamabera sha u kuren mbamgbe mba tiônnongo. Zum u hanma ortamen nan we iyol sha mbamkombo mba mbatamen, nan time sha akaawan a Ruamabera man a wanakiriki u jighjigh man u fan kwagh a ne la yô, kwagh ka a hemba zan doon cii. Sha kpôô yô, kwagh ne ka a tôô shighe. Zum u mbamnenge vev ve kaha sha ma ikyaa, er shighe u mbahemenev mba shin tine mba sha derianyom u hiihii la nenge sha ikyaa i icôngo ve lu nahan la yô, ka i seer shighe sha er a za seer tôvon sha ikyaa la, er a va kure i sha gbenda u ú zough sha kwagh u Ruamabera a tese yô.—Aer. 15:2, 6, 7, 12-14, 28.
14. Doo ú er mbatamen ve eren tom imôngo ken mzough nahan kpa? Ka i doo u sha ci u nyi?
14 Aluer ortamen môm hanger ér i er kwagh sha ishima i nan shin i dondo mbamhen mba nan yô, a lu nyi ia ere? Shin aluer or nan va lôô ivor i mpav, er Diotrefe u sha derianyom u hiihii la nahan di ye? (3 Yoh. 9, 10) Tiônnongo jimin cii una ya ican kpee je. Aluer Satan yange nôngo ér una num tiônnongo u sha derianyom u hiihii la yô, nyian kpa una soo u van a ayôôso ken tiônnongo sha er bem una kera lu ker ga yô. Alaghga una kende a isharen i iyolough ken or la, er isharen i duen iti nahan. Sha nahan yô, doo u mbatamen vea hide a ayol a ve ijime shi vea er tom imôngo ken mzough. Iyol i hiden a mi ijime i mbatamen mba ve eren tom ken mzough la doo se kpen kpen!
Mba “We Ne Kwagh”
15. Kanyi ka i na ve mbatamen ve wa anmgbian u nomso shin u kwase kwagha?
15 Paulu maa shi pase tom ugen u taver u mbatamen ve eren yô: ka u wan ikyumuile kwagh. Ken Ruamabera u ken zwa Grika la cii, ka Paulu tseegh a ter ishember i í gem ér “we . . . kwagh” la ye. Ishember ne ia fatyô u pasen kwagh u kwaghwan u i we or je i lam a nan i tsughur ishigh sha yô, kpa i̱ gema i̱ tese tuvihin ga. (Aer. 20:31; 2 Tes. 3:15) U tesen ikyav yô, Paulu nger Mbakorinte washika kaa ér: “M nger ne akaa ne ka u van ne ahenge ga, kpa m ngu wan ne kwagh er ônov av mba doon mo ishima nahan.” (1 Kor. 4:14) Kwagh u yange na ve wa ve kwagh nahan yô, lu dooshima u lu a mi sha a ve la.
16. Kanyi i doo u mbatamen vea umbur shighe u ve lu wan mbagenev kwagh laa?
16 Mbatamen ka ve umbur er gbenda u ve we mbagenev kwagh la kpa u lu hange hange yô. Ka ve nôngo ér vea dondo ikyav i Paulu la sha u eren a ve kundu kundu shi tesen ve dooshima shi wasen ve kpaa. (Ôr 1 Mbatesalonika 2:11, 12.) Sha kpôô yô, mbatamen ka ve ‘kôr ave taveraa sha kwaghôron u jighjigh sha er vea fatyô u wan ior kwagh sha inja i ityesen i dedoo’ yô.—Titu 1:5-9.
17, 18. Kanyi i doo u ú lu a mi ken ishima shighe u ma ortamen nan we u kwagh laa?
17 Nahan cii kpa, mbatamen yina, nahan alaghga vea ôr akaa a vea vaa afanyô sha mi ken hemen yô. (1 Utor 8:46; Yak. 3:8) Shi mbatamen fa ér kwaghwan lun anmgbianev “kwagh u iember ga, kpa [ka] i lu kwagh u ijungwen.” (Heb. 12:11) Nahan shighe u ortamen nan te ibalegh a or sha u wan nan kwagh yô, a̱ shi nan kpa, nan vande henen sha kwagh la tsembelee shi nan er msen sha mi kpaa. Aluer ma ortamen wa u kwagh nahan, u lu a iwuese iko i nan tese ér nan wa u la kpa?
18 Tôô wer u ngu a angev mbu i kar ken iyouci kpa i fe mbu ga yô. Maa ortwer ugen va pase u angev mbura vough, kpa gema taver we u lumun wer u ngu a angev mbu shon. U wa kwagh ishima a ortwer laa? Ei! Aluer nan wa u a wa ipyaven je kpa, u lumun u eren twer la, u tôô je wer ka sha ci u mkpeyol wou. Alaghga gbenda u ortwer la nana ôr u kwagh shon la ua doo u ga, kpa u de wer ishimavihin i na u er kwagh kpee? Alaghga u er nahan ga. Sha nahan yô, de deen wer gbenda u i we u kwagh la u yange u u̱ ungwan imo i ior mba adooga Yehova man Yesu vea lu eren tom a ve u wasen we ér u fa er u wase iyol you shin u kura ikyaryan you vea Yehova la ga.
Lu a Iwuese sha Mne u Yehova A Ne Se Mbatamen La
19, 20. U tese iwuese you sha “ior mba i ne ve lu uiyua” la nena?
19 Aluer u ngohol iyua i í er i sha ci u wou vough nahan u er nena? U er tom a mi sha u tesen wer u wuese iyua la kpa? “Ior mba i ne ve lu uiyua” la, mba kwagh u Yehova a ne u sha ikyev i Yesu Kristu yô. Gbenda môm u ú tese iwuese you sha uiyua mban yô, ka sha u keghen ato a akaaôron a ve ne la zulee, shi nôngon u eren tom sha atôakaa a ve dugh a mi ken akaaôron shon la. Shi u fatyô u tesen iwuese you sha u wan zwa ken mbamkombo tsembelee. Suen tom u mbatamen ve lu hemen la, inja er u duen kwaghpasen nahan. Aluer kwaghwan u ma ortamen wase u yô, er nan u pase nan ga? Heela tseegh ga, er nan u tese iwuese you hen tsombor u ortamen la ga? Umbur wer, aluer ortamen ngu eren tom kpoghuloo ken tiônnongo yô, tsombor u nan ngu den ér nana vihi shighe u ma nan lu a u la vea we.
20 Sha kpôô yô, se mba a ityôkyaa i vesen i tesen iwuese yase hen mbatamen mba ve lu eren tom hen a vese sha gbashima, shi ve lu hemen se shi ve lu wan se kwagh la. Sha mimi yô, “ior mba i ne ve lu uiyua” ne, mba kwagh u Yehova a ne se sha dooshima yô!
Baver We Kpa?
• Ka atôakyaa a nyi Mbakristu mba ken Tesalonika mbara lu a mi u lun a iwuese hen mba ve hemen hen atô ve laa?
• Mbatamen mba ken tiônnongo wou mba eren tom taveraa sha ci wou nena?
• U zua a iwasen sha hemen u mbatamen nena?
• Aluer ma ortamen wa u kwagh yô, kanyi i doo u ú umburu?
[Mbampin mba ngeren u henen]
[Foto u sha peeji 27]
U wuese igbenda kpishi i mbatamen ve kuran tiônnongo la kpa?