«Kakamaxkitit kakni tiku lhuwa skujkgo kmilakgstipankan»
«Kakamaxkitit kakni tiku lhuwa skujkgo kmilakgstipankan»
«Kakamaxkitit kakni tiku lhuwa skujkgo kmilakgstipankan, chu tiku kapulalinan kxtaskujut kiMalanakan chu kastakyawakgoyan.» (1 TES. 5:12, NM)
1, 2. 1) ¿La xmakgkatsikgo natalan xalak Tesalónica akxni Pablo kamalakgachnilh xapulana carta? 2) ¿Tuku tastakyaw kamaxkilh apóstol?
KALICHUWINAW tuku tilalh kxapulana siglo. Kalakpuwaw pi wilaw kcongregación xalak Tesalónica, nema na aku xlakatsukunit kʼEuropa. Apóstol Pablo lhuwa kilhtamaku kamatliwakglhli natalan. Chu max chuna la xtlawa kʼatanu congregaciones, kTesalónica na laksakli lakgkgolotsin xlakata xkuentatlawakgolh xkachikin Dios (Hech. 14:23). Pero akxni xwija congregación, judíos tlawakgolh pi Pablo chu Silas xkamaxtuka kkachikin. Natalan tiku tamakgxtakgkgolh kTesalónica max lakpuwankgolh pi nialhti xʼama kamakgtaya, chu max asta xpekuankgonit.
2 Xlakata uma congregación aku xtsukunit, Pablo lu xkamakgtayaputun. Asta xtaspitputumpara kkachikin, pero Satanás «lakgapaxtokgli». Wa xlakata malakgachalh Timoteo xlakata nakamatliwakglha natalan (1 Tes. 2: 18; 3:2). Akxni Timoteo taspitli lu tlan lichuwinalh natalan chu Pablo kamalakgachanilh maktum carta nema kalimatliwakglhli. Chu kxcarta kawanilh uma tastakyaw: «Kakamaxkitit kakni [...] tiku kapulalinan» (kalikgalhtawakga 1 Tesalonicenses 5:12, 13, NM).
3. ¿Tuku xlakata xtalakaskin pi natalan xalak Tesalónica “lhuwa xkapaxkikgolh” lakgkgolotsin?
3 Xlikana pi tiku xpulalinkgo congregación xalak Tesalónica ni xtachuna xkatsinikgo la Pablo chu xcompañeros tiku lhuwata kata kskujnanikgonit Dios chu chuna la lakgkgolotsin xalak Jerusalén. Chu congregación kajku akgtum kata xlakatsukunit. Maski ni lu xkatsinikgo, apóstol kawanilh pulaktutu tuku xlakata nakapaxtikatsinikgo tiku xkapulalinkgo akxni kawanilh: «[Xlakan] lhuwa skujkgo kmilakgstipankan, chu tiku kapulalinan [...] chu kastakyawakgoyan». Na kawanilh, «lhuwa napaxkikgoyatit». Chu alistalh kawanilh: «Kalakgalhinitit ntapaxuwan nchatunu amakgapitsin». Komo wix anta xtawilapi kTesalónica, ¿lu xpaxtikatsini xtaskujutkan lakgkgolotsin? Chu la uku, ¿kapaxtikatsiniya xtaskujut lakgkgolotsin xalak mincongregación? ¿Kakxilha pi Dios “kinkamaxkinitan [umakgolh] lakchixkuwin” xpalakata Cristo? (Efe. 4:8.)
«Lhuwa skujkgo»
4, 5. ¿Tuku xlakata Pablo wa pi lakgkgolotsin tiku xlamakgolh ama kilhtamaku lhuwa kskujmakgolh, chu tuku xlakata tlan nawanaw pi lakgkgolotsin xala uku nachuna skujmakgolh?
4 Chuna la akxilhnitawa, ¿tuku xtlawamakgolh lakgkgolotsin akxni Pablo chu Silas kamaxtuka kTesalónica chu ankgolh kBerea? Lhuwa kskujmakgolh. Xliskujmakgolh nakamasiyanikgo natalan tuku wan Biblia chuna la xakxilhkgonit pi xtlawa apóstol. Pero Biblia wan pi tiku xalak Berea «tlakg tlan xkatsikgoy wa yuma, ni xawa wa nti xwilakgo kTesalónica, xampi xlipaks xtapaxuwankan ntimakgamakglhtinankgolh xtachuwin Dios, chali chali xlakputsakgoy» (Hech. 17:11). ¿Xwamputun uma pi kstalaninanin Cristo xalak Tesalónica ni xlakaskinka xʼakxilhkgo xTachuwin Dios? Ni. Pablo ni wa xkalichuwinama natalan xalak Tesalónica, wa xkalichuwinama judíos tiku xwilakgolh kʼama kachikin. Pablo kawanilh: «Akxni makgamakglhtinantit xtachuwin Dios, ntu nkintikakgaxpatnitit, ni xtachuna xtachuwin chixkuwin ntilimakgamakglhtinantit wampi wantu xtachuwin Dios» (1 Tes. 2:13). Xlikana, pi lakgkgolotsin xalak congregación lu lhuwa xkamasiyanikgo xlakata Dios tiku aku xkanajlamakgolh.
5 La uku «skujni xalipaw chu xaskgalala», «kxkilhtamaku nakamaxki tuku nawakgo» xkachikin Dios (Mat. 24:45, NM). Na tlawakgo likgalhtawakga kʼlhuwa tachuwin, la Índice de las publicaciones Watch Tower chu CD-ROM Watchtower Library. Lakgkgolotsin xalak congregaciones kgalhakgaxmatkgo skujni xalipaw chu lhuwa skujkgo xlakata nakamatliwakglhnikgo xtakanajlakan natalan. Xlakata tlan nakamakgtayakgo natalan, liwana lakkaxwilikgo xtaʼakgchuwinkan. Chu makgapitsi kalakgayawakan namatitaxtikgo taʼakgchuwin klaklanka tamakxtumit. ¿Lakpuwanitawa la xlilhuwa kilhtamaku limaxtukgo?
6, 7. 1) ¿Tukuya liʼakxilhtit kamaxkilh Pablo lakgkgolotsin xalak Tesalónica? 2) ¿Tuku xlakata max tuwa makgkatsikgo makgapitsi lakgkgolotsin nachuna natlawakgo la Pablo?
6 Akxni xkastakyawakgo natalan, lakgkgolotsin xalak Tesalónica liwana xlakapastakkgo tuku nawankgo la xtlawa Pablo. Pablo ni kaj xkalakgapaxialhnan natalan xlakata kaj chuna xlismaninit o kaj nalimakgantaxti xtaskujut. Kʼartículo nema akxilhwi apóstol lu tlan xkalikatsini natalan «xtachuna nchatum mpuskat nti lakgkatsan wa nti lu wa xlakgskgatan» (kalikgalhtawakga 1 Tesalonicenses 2:7, 8). Asta xliputum xtamakamasta xlakata xkamakgtayalh congregación. Nachuna xlitlawatkan xwanit lakgkgolotsin xalak Tesalónica akxni xkuentajtlawakgolh congregación.
7 La uku lakgkgolotsin nakuentajtlawakgo chu nakapaxkikgo xkachikin Jehová chuna la xtlawa Pablo. Makgapitsi natalan tlan likatsikgo chu tunkun kgalhakgaxmatnankgo nixawa amakgapitsin pero kgolotsin tiku xaskgalala putsa tuku tlan tlawamakgolh (Pro. 16:20). Xlikana xlakata lakgkgolotsin na makglakgalhinanin nila lakxtum nakapaxkikgo natalan. Pero maski chuna liskujkgo xlakata nalikatsikgo la Xatlan Mapuchwayanina chu kapaxkikgo natalan. ¿Ni xlikana pi nakapaxtikatsiniyaw pi lu lhuwa skujkgo?
8, 9. ¿La pulaklhuwa «kuentajtlawamakgolh kilatamatkan» lakgkgolotsin?
8 Lu xlakaskinka pi putum kstalaninanin Cristo natlawakgo uma tastakyaw: «Kakakgalhakgaxmattit» tiku kapulaliman. ¿Tuku xlakata? Chuna la wan Pablo «kuentajtlawamakgolh kilatamatkan» (Heb. 13:17, NM). Chuna la chatum xkuentajtlawana borrego min kilhtamaku ni lhtatakgo xlakata kuentajtlawakgo xborregos, nachuna lakgkgolotsin ni sokg lhtatakgo kaj xlakata nakamakgtayakgo tiku nitlan wi xtakanajlakan, kxtalakapastaknikan o tatatlakgo. La akxni tiku lakgayakgolh Comités de Enlace con los Hospitales takikgo makgat tsisni xlakata naʼankgo niku talakaskima. ¡Lu kapaxtikatsiniyaw pi anta tawilakgo akxni kamaklakaskinaw!
9 Na lu kaminini nakamakgtayayaw lakgkgolotsin tiku lakkaxwilikgo la nakatlawakan Pukgalhtawakga xla xTatayananin Jehová chu tiku skujkgo kcomités de socorro. Kalilakapastakwi la makgtayanankgolh kMyanmar (nema xwanikan Birmania) kata 2008 akxni milh lanka un chu sen nema wanika Nargis. Niku tlakg nitlan tuku lalh, anta niku kgalhsputa kgalhtuchokgo Irauadi, niku wi akgtum congregación xalak Pothigon. Xlakata xkamakgtayaka natalan, makgapitsi xalak comités de socorro titaxtukgolh niku lhuwa ninin xmakgolh. Chatum superintendente tiku xkalakgapaxialhnan congregación na pulana chalh. Akxni natalan akxilhkgolh lu xatapaxuwan wankgolh: «¡Kaʼakxilhtit kisuperintendentejkan xla circuito! ¡Jehová kinkalakgmaxtun!». Chuna la tlawakgolh umakgolh natalan, ¿kapaxtikatsiniyaw xtaskujutkan lakgkgolotsin? Na kakalakapastakwi makgapitsin lakgkgolotsin tiku ni tlanka kamakgkatsikan maski kalakgayawakanit nalakkaxtlawakgo xalaktuwa taʼakglhuwit (Mat. 6:2-4). Tiku kamakgtayakan lu paxtikatsininankgo.
10. ¿Tuku atanu taskujut na tlawakgo lakgkgolotsin?
10 Nachuna wilakgolh lhuwa lakgkgolotsin tiku tlawakgo atanu taskujut. Kgolotsin tiku kamakgtaya nalakkaxwilikgo xtaskujutkan amakgapitsi lakgkgolotsin tlawa programas xla tamakxtumit. Secretario, kaskini natalan informes xlakata namalakgacha akgatunu papaʼ chu akgatunu kata. Tiku pulalin la nalichuwinankan Dios kcongregación, liwana lakkaxwili asignaciones. Makgapitsi natalan akxilhkgo cuentas xalak congregación akgatutun papaʼ. Nachuna putum lakgkgolotsin xlikgalhtawakgatkan cartas nema malakgacha sucursal chu natlawakgo tuku kawanikan xlakata «watiya ntipatum ntakanajla» nakgalhiyaw (Efe. 4:3, 13). Uma tuku tlawakgo makgtayanan xlakata “lakatitum nalitatlawa xlipaks, chu na wa ntu aktanks” o chuna la xlilat (1 Cor. 14:40).
«Tiku kapulalinan»
11, 12. ¿Tiku pulalinankgo congregación chu tuku xlitlawatkan?
11 Carta nema kamalakgachanilh natalan xalak Tesalónica, Pablo kawanilh pi lakgkgolotsin xalak congregación «kapulalinan». Uma tachuwin xagriego wamputun «tiku yakgolh klakatin» chu na tlan tamatitaxti kʼatanu tachuwin «tiku pulalinankgo» (1 Tes. 5:12, NM; nota). Kaʼakxilhwi pi umakgolh lakgkgolotsin na watiya nema apóstol xwanit pi «lhuwa skujkgo». Wa xlakata xputumkan pulalinkgo congregación chu nikaj chatum. La uku lhuwa lakgkgolotsin «tiku yakgolh klakatin» xnatalan xlakata namatitaxtikgo tamakxtumit. Xlakata nialh wankan «kgolotsin tiku pulalin congregación» wata wankan «kgolotsin tiku kamakgtaya nalakkaxwilikgo xtaskujutkan amakgapitsi lakgkgolotsin» kinkamakgtayayan nakaʼakxilhaw pi akxtum skujkgo.
12 Nachuna, pulalinkan congregación ni kajwatiya masiyakan. Pablo limaklakaskilh tachuwin nema wi 1 Timoteo 3:4 akxni wa pi tiku pulalinan «ntlan namapakgsinan kxchik, chu nalimapakgsikgoy xkaman mpi wa ntu lakatitum [...] namaxkikgoy nkakni». Xlikana tlan pulalinankan ni kaj watiya tlan nakamasiyanikan kamanan, na wamputun «namaxkikgoy nkakni» chu napulalin putum familia. Nachuna, lakgkgolotsin tiku pulalinkgo congregación nakamakgtayakgo natalan akgstitum nakgalhakgaxmatkgo Jehová (1 Tim. 3:5).
13. ¿Tuku xlakata min kilhtamaku ni lakapala lakkaxtlawakgo tuku natlawakgo lakgkgolotsin kcongregación?
13 Xlakata tlan napulalinkgo congregación, lakgkgolotsin akxtum xliʼakxilhatkan tuku xlitlawat congregación chu la nakamakgtayakgo. Max lakpuwanaw pi tlakg tlan xwa kaj chatum tiku nawan tuku natatlawa. Pero tiku pulalinkgo congregación la uku chuna tlawamakgolh la xtlawakgo lakgkgolotsin kxapulana siglo. Akxni tamakxtumikgo kgaxmatkgo putum tuku wankgo amakgapitsi lakgkgolotsin chu limaklakaskinkgo Biblia xlakata natekgskgo textos nema nakamakgtaya natalan xalak congregación. Xlakata tlan nakitaxtu tamakxtumit, chatunu chatunu pulana likgalhtawakgakgo xTachuwin Dios chu tuku masiya skujni xalipaw. Xlikana, uma lin kilhtamaku. Chu chuna lalh kxapulana siglo, akxni xlitakglhuwimakgolh circunsición, min kilhtamaku makgapitsi lakgkgolotsin ni akxtum lakapastaknankgo. Akxni chuna kaʼakgspula chuntiya akxtum akxilhkgo tukuya tastakyaw xalak Biblia nakamakgtaya (Hech. 15:2, 6, 7, 12-14, 28).
14. ¿Tuku xlakata kapaxtikatsiniyaw lakgkgolotsin akxni akxtum skujkgo?
14 ¿Tuku xlalh komo kaj chatum kgolotsin xwa tuku lakaskin katatlawalh kcongregación, o kaj xtamaknulh taʼakglhuwit chuna la tlawalh Diótrefes kxapulana siglo? (3 Juan 9, 10.) Putum congregación nitlan xkitaxtulh. Chuna la Satanás xtlawaputun pi nitlan xlatalalilh kstalaninanin Cristo nachuna tlawama la uku. ¿La tlawa? Pulaktum akxni chatum tala tlakg lanka litaxtuputun. Wa xlakata, lakgkgolotsin liskujkgo ni tlankajwa nalikatsikgo chu akxtum naskujkgo. Congregación kapaxtikatsini lakgkgolotsin pi akxtum skujkgo.
«Kastakyawakgoyan»
15. ¿Tuku xlakata lakgkgolotsin kastakyawakgo xnatalan?
15 Xlipulaktutu, Pablo makglhuwa lichuwinalh tuku lu tuwa xlitatlawat pero lu xlakaskinka: nakastakyawakan congregación. Anta kTatsokgni xaGriego xla Kstalaninanin Cristo, kajwatiya apóstol tiku tsokgli uma tachuwin «kastakyawakgoyan». Uma tachuwin wamputun xalakatitum nakawanikan pero nakalimasiyanikan pi kapaxkikan (Hech. 20:31; 2 Tes. 3:15). Chuna, Pablo kawanilh Corintios: «Ni wa klitsokga yuma mpala nakkamamaxaniyan, wampi kaj nakkalistakyawayan xtachuna xatapaxkin nkilakgskgatan» (1 Cor. 4:14). Chuna la akxilhaw Pablo xkastakyawa xnatalan xlakata xkapaxki chu xlakaskin pi tlan natawilakgo.
16. ¿Tuku liwana xlikatsit chatum kgolotsin akxni nakastakyawa xnatalan?
16 Akxni wi tiku nastakyawakgo, putum lakgkgolotsin nakuentajtlawakgo la nakawanikgo. Chuna la xtlawa Pablo, xliʼakxilhat pi akxni nastakyawanan xlitakgaxmatat pi paxkinan chu lu namakgtaya tuku nawani tiku stakyawama (kalikgalhtawakga 1 Tesalonicenses 2:11, 12). Chu na talakaskin «ntlan nalistakyawanan [...] tlan tamasiyun, chu na namakgatakgsnikgoy» tuku wan xTachuwin Dios (Tito 1:5-9).
17, 18. ¿Tuku kililakapastakatkan komo chatum kgolotsin nakinkastakyawayan?
17 Lakgkgolotsin katsikgo pi lakgalhinanin chu min kilhtamaku wankgo tuku alistalh nitlan limakgkatsikgo (1 Rey. 8:46; Sant. 3:8). Na katsikgo pi akxni chatum tala xalak kcongregación stakyawakan ni «nkatilipaxuwalh tunkan, wampi wata kaj nalilipuwan» (Heb. 12:11). Wa xlakata akxni chatum kgolotsin wi tiku nastakyawa, limaxtu lhuwa kilhtamaku xlakata nalakapastaka tuku nawan chu tlawa oración. Wa xlakata komo chatum kgolotsin kinkastakyawayan, kalakpuwaw pi chuna tlawama xlakata kinkapaxkiyan.
18 Kalakpuwaw pi kgalhiyaw akgtum tajatat pero ni katsiyaw tukuya tajatat. Alistalh tekgsaw chatum makuchina tiku kinkawaniyan tukuya tajatat kgalhiyaw, pero ni lakgatiyaw la kinkamakuchiputunan. ¿Nasitsiniyaw? Ni. Pero komo nakinkawaniyan pi talakaskin nakinkachukukanan. Xlakata kilitlankan, max namastayaw talakaskin nakinkachukukanan. Pero ¿tuku nala komo nakinkakilhniyan? Max pulana nitlan nalimakgkatsiyaw pero namastayaw talakaskin nakinkamakuchiyan. Nachuna akxni lakgkgolotsin nakinkastakyawakgoyan, maski nitlan limakgkatsiyaw chuntiya kakakgaxmatniw. Kalakapastakwi pi max Jehová chu Jesús kalimaklakaskima xlakata nakinkamakgtayakgoyan o tlan natawila kintakanajlakan.
Lakgkgolotsin xtamaskiwin Jehová
19, 20. ¿La limasiyayaw pi kapaxtikatsiyaw lakgkgolotsin?
19 Komo wi tuku nakinkamaskiwikanan, ¿la napaxtikatsiniyaw? Nalimasiyayaw pi paxtikatsininanaw akxni maklakaskinaw. Jehová “kinkamaxkinitan lakchixkuwin” uma wamputun lakgkgolotsin xalak kcongregación, akgtum lu tlan tamaskiwin. ¿La nalimasiyaniyaw pi paxtikatsiniyaw? Akxni naʼakgchuwinankgo liwana kakakgaxmatniw chu katlawaw tuku wankgo. Akxni kinkaskinikgoyan akgtum takgalhtin xatapaxuwan kamastaw. Chu kakamakgtayaw akxni wi tuku lakkaxwilikgo, la akxni talichuwinan xlakata Dios. Nachuna kakawaniw la kinkamakgtayakgon tastakyaw nema kinkamaxkikgon. Na kapaxtikatsiniyaw xfamiliajkan xlakata mastakgo talakaskin nakamakgtayakgo amakgapitsi natalan xalak congregación.
20 ¡Lu paxtikatsininanaw xlakata wilakgolh lakgkgolotsin tiku lhuwa skujkgo, kinkapulalinkgoyan chu kinkastakyawakgoyan! Xlikana Jehová “kinkamaxkinitan lakchixkuwin” chu umakgolh lu tlan tamaskiwin.
¿Lakapastaka?
• ¿Tuku xlakata xtalakaskin pi natalan xalak Tesalónica xmaxkikgolh kakni lakgkgolotsin?
• ¿Tuku tlawakgo lakgkgolotsin kimpalakatakan?
• ¿La kinkamakgtayayan xlakata lakgkgolotsin kinkapulalinkgoyan?
• ¿Tuku kililakapastakatkan akxni chatum kgolotsin kinkastakyawayan?
[Takgalhskinin]
[Epígrafe xla página 31]
¿Kapaxtikatsiniyaw putum tuku tlawakgo lakgkgolotsin kcongregación?
