“Ke Āva Koutou ki te Kau Faigaluega”

“Ke āva koutou ki te kau faigaluega a te ekalesia, ko latou konā ne filifilia ne te Aliki o takitaki kae fakatonu ki a koutou.”—1 TESALONIA 5:​12.

1, 2. (a) Se a te tulaga o te fakapotopotoga i Tesalonia i te taimi ne tusi atu ei te tusi muamua a Paulo ki a latou? (e) Se a te fakamalosiga a Paulo ne fai atu ki te kau Tesalonia?

MA FAUFAU la māfai koe se tokotasi i te fakapotopotopoga i Tesalonia i te senitenali muamua, se fakapotopotoga e tasi telā ne fakatu i Eulopa. E uke a taimi ne fakamāumāu ne te apositolo ko Paulo i te fakamalosi atu o taina i konā. Ne mafai o filifili ne ia a toeaina ke fai ne latou te takitakiga, e pelā mo te mea ne tupu i nisi fakapotopotoga. (Galuega 14:23) Kae i te otiga ne fakatu te fakapotopotoga, ne fakamaopoopo ne te kau Iutaia se vaitino ke ave keatea a Paulo mo Sila mai te fa‵kai. A Kelisiano kolā ne ‵toe i konā e mafai o mafau‵fau i a latou ko tiakina, io me kāti e ma‵taku.

² E manino ‵lei, me i te taimi ne tiakina ei a Tesalonia, ne manavase eiloa a Paulo ki te fakapotopotoga telā ne fatoa fakatu aka. Ne taumafai a ia o toe foki, kae ko “fakalavelave mai Satani” ki tena auala. Tela la ne uga ne ia a Timoteo ke fakamalosi a te fakapotopotoga. (1 Tesalonia 2:​18; 3:2) I te taimi ne foki atu ei a Timoteo mo se lipoti ‵lei, ne gasuesue eiloa a Paulo ke tusi atu ne ia se tusi ki te kau Tesalonia. I tafa o nisi mea, ne fakamalosi atu a Paulo ke ‘āva ki a latou kolā ne filifili ke fai mo takitaki.’​​—Faitau te 1 Tesalonia 5:​12, 13.

3. Ne a pogai ne ‵tau ei o fakaasi atu ne Kelisiano i Tesalonia a te āva lasi ki toeaina?

³ A taina kolā ne fai ne latou te takitakiga o Kelisiano i Tesalonia e se lasi te lotou atamai e pelā mo Paulo mo ana taugasoa faima‵laga; e seki ma‵tua ‵lei latou i te feitu faka-te-agaga e pelā mo toeaina i Ielusalema. E se gata i ei, e seki kātoa te tausaga ne fakatu ei te fakapotopotoga! Kae ne isi eiloa se pogai ne ‵tau ei mo tino i te fakapotopotoga o loto fakafetai ki toeaina, kolā e fai e pelā me ne “kau faigaluega,” ne “takitaki,” kae “fakatonu” ne latou a taina i te fakapotopotoga. E tonu, e isi se pogai ‵lei ke atafai latou [ki toeaina] “i te agaga o te āva lasi mo te alofa.” A te fakamolemole tenei ne soko atu eiloa ki te polopolokiga a Paulo ke “‵nofo filemu” te suā tino ki te suā tino. Kafai ne nofo atu koe i Tesalonia, e mata, e fakaasi atu ne koe a te loto fakafetai mō galuega a toeaina? E pefea tau kilokiloga ki “meaalofa . . . tino” kolā ne tuku mai ne te Atua e auala i a Keliso ki tau fakapotopotoga?​​—Efeso 4:8.

Ga‵lue Malosi e Pelā me ne “Kau Faigaluega”

4, 5. Kaia ne faigata ei mō toeaina i aso o Paulo ke akoako atu ne latou te fakapotopotoga, kae kaia foki e fai penā i aso nei?

⁴ I te otiga ne uga atu a Paulo mo Sila ki Pelea, ne ‘ga‵lue malosi’ pefea a toeaina i Tesalonia? Mai te fakaakoako ki a Paulo, ne akoako ne latou mo te mautinoa a te fakapotopotoga, mai te fakaaogaga o te Tusi Tapu. E mafai o mafaufau koe me ‘e mata, ne fia‵fia a Kelisiano i Tesalonia ki te Muna a te Atua?’ Mai mea katoa, e fai mai te Tusi Tapu me i tino Pelea e “sili atu a tino i konā i te ala olotou mafaufau . . . i lō tino Tesalonia. . . . Ne sukesuke malosi foki latou ki muna mai te Tusi i aso takitasi.” (Galuega 17:11) Kae e fakatusa eiloa ki te tokoukega o tino Iutaia i Tesalonia, kae e se ko Kelisiano. A latou kolā ne fai pelā me ne tino tali‵tonu ne ‘talia ne latou te muna a te Atua, e se ona ko te mea se muna mai tagata, kae ko te muna eiloa a te Atua.’ (1 Tesalonia 2:​13) Ne ‵tau eiloa o ga‵lue malosi a toeaina ke fagai a vaegā tino penā i te feitu faka-te-agaga.

⁵ I aso nei, e fakatoka ne te tavini fakamaoni kae poto a “meakai i te taimi tonu” ki te lafu a te Atua.a (Mataio 24:45) Mai lalo o te takitakiga a te tavini, e ga‵lue malosi a toeaina ke fagai olotou taina i te feitu faka-te-agaga. E mafai o uke a tusi faka-te-Tusi Tapu a tino i te fakapotopotoga, kae ko avanoa foki a nisi mea faigaluega e pelā mo te Watch Tower Publications Index mo te Watchtower Library i te CD-ROM i nisi ‵gana. Ke fakama‵lie a manakoga faka-te-agaga o te fakapotopotoga, e fakamāumāu ne toeaina a itula e uke ke fakatoka olotou tofiga i fakatasiga ko te mea ke mafai o fakamatala atu ne latou i se auala aoga. E mata, kai mafaufau koe ki te aofaki o taimi e fakamāumāu ne toeaina ke fakatoka olotou tofiga mō fakatasiga, fono i fenua, mo fono i atufenua?

6, 7. (a) Se a te fakaakoakoga ne maua ne toeaina i Tesalonia mai i a Paulo? (e) Kaia e mafai ei o faigata ki toeaina i aso nei ke fakaakoako ki a Paulo?

⁶ Ne masaua ne toeaina i Tesalonia a te fakaakoakoga ‵lei a Paulo i te tausiga o te lafu. E faka‵mafa mai i ei me i te tausi atu ki te lafu e aofia i ei a te tausi atu ki manakoga o te fakapotopotoga i se auala alofa kae atafai, kae e se fai fua e pelā me se tiute. E pelā mo te mea ne sau‵tala ki ei i te mataupu muamua, ne loto alofa eiloa a Paulo “e pelā eiloa mo te alofa o te mātua manafai e tausi ana tama‵liki.” (Faitau te 1 Tesalonia 2:​7, 8.) Ne loto fiafia foki a ia ke ‘tuku atu tena ola’! Kafai e tausi atu ki mamoe, e ‵tau o fakaakoako atu a toeaina ki a Paulo.

⁷ E fakaakoako eiloa a tausi mamoe Kelisiano i aso nei ki a Paulo mai te fakatāua ne latou a te lafu. E pelā mo te masani, a nisi mamoe e mafai o sē a‵lofa kae se fia fai taugasoa. Kae e taumafai eiloa a toeaina ke fakaasi atu te malamalama kae ‘sala atu ki te ‵lei’ i a latou. (Faataoto 16:20) E tonu, ona ko te tulaga sē ‵lei katoatoa, e taumafai malosi se toeaina ke maua ne ia se kilokiloga ‵lei ki tino taki tokotasi. Kae i te taimi e taumafai malosi a ia ke atafai kae alofa ki tino katoa, e mata, e se ‵tau o fakamālō atu ki a ia mō ana taumafaiga ke fai pelā me se tausi mamoe ‵lei mai lalo i a Keliso?

8, 9. Ne a nisi auala e fakaaoga ne toeaina i aso nei ke ‘tausi ei ‵tou agaga’?

⁸ E isi eiloa ne pogai ke “faka‵logo” tatou ki toeaina. E pelā mo te mea ne tusi mai ne Paulo, e ‘tausi mai eiloa latou ki ‵tou agaga.’ (Epelu 13:17) E fakamasaua mai ne te tugapati tenei ki a tatou a te tausi mamoe tonu telā e se moe ko te mea ke puipui tena lafu. I se auala tai ‵pau, e mafai o se ‵moe a toeaina i aso nei ona ko te lotou ‵saga atu ki manakoga o tino kolā e ma‵saki malosi io me ko fakalavelave i mea tau lagonaga mo te feitu faka-te-agaga. E pelā me se fakaakoakoga, e se mafai eiloa o ‵moe a taina kolā e aofia i te Hospital Liaison Committees ko te mea ke fakafesagai atu latou ki se fakalavelave ki togafiti fakatokita. Kae kafai e fakafesagai atu tatou ki se vaegā tulaga penā, e loto fakafetai eiloa tatou mō olotou galuega!

⁹ E ga‵lue malosi eiloa a toeaina o te Komiti Fakatu‵tu mo te komiti telā e onoono ki fakalavelave ‵tupu fakafuasei ke fesoasoani atu ki ‵tou taina. E ma‵nako latou ki te ‵lago katoatoa atu o tatou! Mafaufau la ki te lasi o te fesoasoani mai tua o te afā ko te Nargis telā ne poko i Myan­mar i te 2008. Ko te mea ke oko atu ki te fakapotopotoga i Bothingone i te kogā tai o Irrawaddy, ne faima‵laga atu a te potukau tenei i se kogā laukele telā ne fakamasei valevale kae ‵fonu i foitino ‵mate. I te taimi ne lavea ei ne taina i konā me i te potukau muamua telā ne oko atu ki Bothingone e aofia i ei te lotou ovasia muamua o te fenua, ne ‵tagi latou, penei: “Oi! Te ‵tou ovasia o te fenua! Ko faka‵sao eiloa ne Ieova tatou!” E mata, e loto fakafetai koe ki te ga‵lue malosi o toeaina i ao mo po? A nisi toeaina ne filifili ke aofia i komiti fakapito ke faka‵lei ne latou a fakalavelave e uiga ki fakamasinoga faiga‵ta. E se fakamata‵mata eiloa a toeaina konei e uiga ki mea ne fai ne latou; kae e fia‵fia tonu eiloa a tino kolā e maua ne latou a mea aoga mai olotou galuega.​​—Mataio 6:​2-4.

10. Ne a nisi galuega e fai ne toeaina?

¹⁰ E fai foki ne toeaina e tokouke i aso nei a nisi galuega. E pelā mo te fakatoka ne te ovasia tausi o te kau toeaina a fakasologa o fakatasiga i vaiaso. E fakatoka ne te failautusi o te fakapotopotoga a lipoti o te galuega talai i masina mo tausaga. E fai a manatu o te ovasia o te akoga ki te fakasologa o te akoga. I takitolu masina, e suke faeloa a tupe a te fakapotopotoga. E fai‵tau ne toeaina a tusi mai te ofisa lagolago kae fakagalue a te fakatakitakiga telā e fesoasoani atu ke fakatumau te “tasi o tatou i te ‵tou fakatuanaki.” (Efeso 4:​3, 13) E auala i taumafaiga a toeaina kolā e ga‵lue malosi, “e fai a mea katoa ke fanofano ‵lei kae ‵gali i taimi o tapuakiga.”​​—1 Kolinito 14:40.

Ke “Takitaki” ei Koutou

11, 12. Ko oi e takitaki ne latou te fakapotopotoga, kae ne a mea e aofia i ei?

¹¹ Ne fakamatala mai ne Paulo a te ga‵lue malosi o toeaina i Tesalonia e pelā me ne “takitaki” o te fakapotopotoga. (1 Tesalonia 5:​12) Ne fakasino atu a Paulo ki toeaina eiloa konā e pelā me ne “kau faigaluega.” Ne seki faipati a ia ki se “ovasia tausi” e tokotasi, kae ki toeaina katoa i te fakapotopotoga. I aso nei, e ‵tu atu a toeaina e tokouke i mua o te fakapotopotoga kae fai ne latou a fakatasiga. A te fakamafuliga fakamuli ke fakaaoga a te tofi ko te “ovasia tausi o te kau toeaina” e fesoasoani mai ke ‵kilo atu tatou ki toeaina katoa e pelā se foitino e tasi.

¹² A te “takitaki” atu o te fakapotopotoga e uke a mea e aofia i ei i lō te akoako atu fua. Ne fai mai a Paulo i te 1 Timoteo 3:4 me i te ovasia e ‵tau se tagata telā e “iloa o pulepule faka‵lei tona kāiga, ka ke fai ne ia ana tama‵liki ke faka‵logo ki a ia i mea katoa.” E manino ‵lei eiloa me i te tugapati ke “pulepule faka‵lei” e se aofia fua i ei a te akoako atu o ana tama‵liki kae ke fai foki ne ia te takitakiga i te kāiga kae “fai ne ia ana tama‵liki ke faka‵logo ki a ia.” Ao, e fai ne toeaina a te takitakiga i te fakapotopotoga, mai te fesoasoani atu ki tino katoa ke faka‵logo ki a Ieova.​​—1 Timoteo 3:5.

13. Kaia e e uke ei a taimi e manakogina ke fai se fakaikuga i te fono a toeaina?

¹³ Ko te mea ke tausi faka‵lei atu ki te lafu, e sau‵tala fakatasi a toeaina ki manakoga o te fakapotopotoga. Kāti e faigofie atu māfai e fai ne se toeaina a fakaikuga katoa. Kae mai te tau‵tali ki te fakaakoakoga a te potukau pule i te senitenali muamua, e sau‵tala fakatasi eiloa a te kau toeaina ki fakalavelave konā, kae ‵sala atu ki te fakatakitakiga mai te Tusi Tapu. A te lotou fakamoemoega ko te fakagalue ne latou a fakatakitakiga i te Tusi Tapu ki manakoga o te fakapotopotoga. E magoi ‵ki eiloa te mea tenei māfai e fakatoka a toeaina taki tokotasi ki fono a toeaina, onoono ki te Tusi Tapu mo fakatakitakiga mai te tavini fakamaoni kae poto. E tonu, e uke a taimi e manakogina i konei. Kafai e kese‵kese a manatu, e pelā eiloa mo te mea ne sae aka i te taimi ne sau‵tala ei te potukau pule i te senitenali muamua ki te mataupu e uiga ki te pilitome, e manakogina a taimi mo sukesukega ko te mea ke maua se ikuga telā e fakavae ki te Tusi Tapu.​​—Galuega 15:​2, 6, 7, 12-​14, 28.

14. E mata, e loto fakafetai koe me e ga‵lue fakatasi a te kau toeaina i te fealofani? E pefea ou lagonaga i te feitu tenā?

¹⁴ Se a te mea e mafai o tupu māfai e tautali se toeaina i ana auala io me taumafai ke fakaaoga ana manatu totino? Kae e a foki māfai se tino​​—e pelā mo Siofilisi i te senitenali muamua​​—telā ne ‵toki ne ia a fuataga o kinauga? (3 Ioane 9, 10) Ka logo‵mae eiloa a te fakapotopotoga kātoa. Kafai ne taumafai a Satani o fakafanoanoa a te fakapotopotoga i te senitenali muamua, e mafai o mautinoa i a tatou me e manako a ia o fakamakosu a te filemu o te fakapotopotoga i aso nei. E mafai o fakamalosi ne ia a manakoga kaimanako, e pelā mo te manako ki se tulaga maluga. Tela la, e ‵tau o ati aka ne toeaina a te loto maulalo kae ga‵lue fakatasi e pelā me se foitino e tasi. Ko oko eiloa ‵tou loto fakafetai ki te loto maulalo o toeaina kolā e ga‵lue fakatasi e pelā me se foitino!

“Fakatonu ki a Koutou”

15. Se a te lagona telā e maua ne toeaina māfai ko fakatonu io me fakamalosi ne latou se taina io me se tuagane?

¹⁵ Kae ne faka‵mafa mai ne Paulo se galuega faigata kae tāua e fai ne toeaina: ko te fakatonu io me fakamalosi atu a te lafu. A te fakatonu io  me ko te fakamalosi atu e se fakaasi atu i ei a te kaitaua. (Galuega 20:31; 2 Tesalonia 3:​15) E pelā me se fakaakoakoga, ne tusi atu a Paulo ki te kau Kolinito: “Ko tusi atu au penei ki a koutou, e se ko tona uiga i a au e loto o fakamasiasi koutou. Ko fai ne au penei o akoako atu ei koutou e pelā eiloa mo ne aku tama fagasele.” (1 Kolinito 4:14) A te lagonaga tonu i tafa o ana fakamalosiga ko tena alofa mō nisi tino.

16. Se a te mea e ‵tau o masaua ne toeaina māfai ko fakatonu io me fakamalosi atu ki nisi tino?

¹⁶ E masaua eiloa ne toeaina a te tāua o te auala e fakamalosi ne latou a nisi tino. E taumafai ke fakaakoako atu latou ki a Paulo mai te atafai, alofa, kae fesoasoani. (Faitau te 1 Tesalonia 2:​11, 12.) E tonu, e taofi ‵mau a toeaina ‘ki te muna tonu, ko te mea ke mafai ne latou o akoako atu akoakoga ‵tonu.’​​—Tito 1:​5-9.

17, 18. Se a te mea e ‵tau o masaua ne koe māfai ko maua ne koe a fakamalosiga mai se toeaina?

¹⁷ E tonu, a toeaina e sē ‵lei katoatoa kae mafai o fai atu ne latou a pati kolā e mafai o sala‵mo fakamuli latou i ei. (1 Tupu 8:​46; Iakopo 3:8) Kae e iloa foki ne toeaina me i polopolokiga kolā e maua ne taina mo tuagane faka-te-agaga, e mafai o fai ei latou ke ‘fanoa‵noa kae sē fia‵fia.’ (Epelu 12:11) Tela la kafai e faipati atu se toeaina ki se tino i pati fakamalosi, e fai eiloa ne ia māfai ko oti ne sau‵tala kae ‵talo fakatasi e uiga ki ei. Kafai ne fakamalosigina koe, e mata, e loto fakafetai koe ki te lasi o te alofa atafai o te toeaina tenā ki a koe?

¹⁸ Kāti e maua ne koe se masaki telā e se mafai o fakamatala. Kae ne mafai o maua ne se tokita te fakalavelave ki a koe, kae tai faigata eiloa ke talia ne koe te mea tenā. E mata, e kaitaua koe ki te tokita tenā? Ikai! Kae kafai foki ne filifili ne ia ke fai se ‵tipiga, kāti ka talia ne koe te togafiti tenā, mai te talitonu me e aoga eiloa ki a koe. A te auala ne fakaasi atu ei ne te tokita a fakamatalaga e mafai o pokotia i ei ou lagonaga, kae e mata, ka talia ne koe a te lagonaga tenā ke fakaiku aka ei tau filifiliga? E se penā eiloa. I se auala tai ‵pau, ke mo a ma talia ne koe te aualane fakamalosi ei koeke taofi ne ia koe mai te fakalogo ki tino kolā e mafai o fakaaoga ne Ieova mo Iesu ke fakailoa atu ki a koe a te auala e mafai o puipui ne koe a koe eiloa i te feitu faka-te-agaga.

Ke Loto Fakafetai ki te Fakatokaga a Ieova ki Toeaina

19, 20. E mafai pefea o fakaasi atu ne koe tou loto fakafetai mō “meaalofa . . . tino” konei?

¹⁹ Ne a au mea e mafai o fai māfai ne maua ne koe se meaalofa telā ne fakatoka eiloa mō koe? E mata, e fakaasi atu tou loto fakafetai mai te fakaaoga ne koe? A “meaalofa . . . tino” ne fakatoka eiloa ne Ieova mō koe e auala i a Iesu Keliso. A te auala e tasi e mafai o fakaasi atu tou loto fakafetai mō meaalofa konei ko te fakalogologo faka‵lei ki lauga kolā e tuku mai ne toeaina kae taumafai o fakagalue a manatu kolā e fakaasi mai ne latou. E mafai foki o fakaasi atu ne koe te loto fakafetai mai te faiga o tali aoga i fakatasiga. Ke ‵lago atu ki te galuega telā e takitakigina ne toeaina, e pelā mo te galuega talai. Kafai ne maua ne koe a mea aoga mai fakatakitakiga kolā ne maua ne koe mai se toeaina, kaia e se fai atu ne koe ki a ia? E se gata i ei, kaia e se fakaasi atu ei tou loto fakafetai ki kāiga o te toeaina? Masaua, ko te mea ke galue malosi te toeaina i te fakapotopotoga, e fakaavanoa eiloa ne te kāiga a taimi kolā e fakamāumāu fakatasi ne latou mo ia.

²⁰ E tonu, e uke ‵ki eiloa a pogai ke fakaasi atu ‵tou loto fakafetai ki toeaina, kolā e ga‵lue malosi mo tatou, o tausi kae fakamalosi tatou. A “meaalofa . . . tino” konei se fakatokaga alofa eiloa mai i a Ieova!

E Mata, e Masaua ne Koe?

• Ne a pogai ne ‵tau ei o loto fakafetai a Kelisiano i Tesalonia ki a latou kolā e fai ne latou te takitakiga?

• E ga‵lue malosi pefea a toeaina i tau fakapotopotoga mō koe?

• E maua pefea ne koe a mea aoga mai toeaina kolā e takitaki ne latou koe?

• Kafai e tuku mai ne se toeaina a fakamalosiga, se a te mea e ‵tau o mausaua ne koe?

[Fesili mo te Sukesukega]

 [Ata i te itulau e 26]

E mata, e loto fakafetai koe ki auala e uke kolā e tausi ei ne toeaina a te fakapotopotoga?