‘A faatura i te feia e ohipa puai ra i rotopu ia outou’
‘A faatura i te feia e ohipa puai ra i rotopu ia outou’
“Ia faatura outou i te feia e [o]hipa [puai] ra i rotopu ia outou no te faatere atu ia outou i roto i te Fatu, ˈe no te aˈo atu ia outou.”—TES. 1, 5:12, Te Faufaa Api.
1, 2. (a) Ia Paulo i papai i ta ˈna rata matamua i to Tesalonia, eaha te huru o tera amuiraa? (b) Ua faaitoito Paulo ia ratou ia aha?
A FERURI na e e melo oe no te amuiraa no Tesalonia, hoê o te mau amuiraa matamua haamauhia i Europa i te senekele matamua. Ua rave te aposetolo Paulo i te taime rahi no te faaitoito i tera mau taeae. E mai i roto i te tahi atu mau amuiraa, ua maiti iho â paha oia i te mau matahiapo no te aratai. (Ohi. 14:23) I muri aˈe râ te haamauraahia te amuiraa, ua haaputuputu te mau ati Iuda i te hoê nahoa no te tiahi ia Paulo raua Sila i rapaeau i te oire. Peneiaˈe ua manaˈo te mau Kerisetiano i faaea i ǒ e ua faaruehia ratou e ua riaria atoa paha.
2 I to ˈna faarueraa ia Tesalonia, ua haapeapea iho â Paulo no teie amuiraa apî. Ua tamata oia i te hoˈi atu, ua ‘faaore râ Satani’ i tera opuaraa. Tono aˈera oia ia Timoteo no te faaitoito ia ratou. (Tes. 1, 2:18; 3:2) I to Timoteo faahoˈiraa mai i te faatiaraa maitai, papai ihora Paulo i te hoê rata no to Tesalonia. Ua faaitoito atoa oia ia ratou ia ‘faatura i te feia e faatere ra ia ratou.’—A taio i te Tesalonia 1, 5:12, 13. *
3. No te aha i tano ai ia rahi te faatura o te mau Kerisetiano no Tesalonia i te mau matahiapo?
3 E ere te mau taeae e aratai ra i te amuiraa no Tesalonia i te mea aravihi mai ia Paulo e to ˈna mau hoa mitionare. Mea apî atoa ratou i te faatoroaraahia ia faaauhia i te mau matahiapo no Ierusalema. Aitâ hoi i matahiti atura to teie amuiraa! Inaha, e tumu to taua amuiraa ra no te mauruuru i to ratou mau matahiapo, o te ‘ohipa puai ra’ e o “te faatere” ra i nia i te amuiraa e o “te aˈo” ra i te mau taeae. Oia mau, ua tano ïa “ia rahi roa te faatura [i te mau matahiapo] ma te aroha.” Ua aˈo atoa Paulo ia vai “hau” noa ratou. Mai te peu tei Tesalonia oe, e faaite anei oe i te mauruuru rahi no te ohipa a te mau matahiapo? Eaha to oe manaˈo i te mau ‘taata horoahia mai’ o ta oe amuiraa ta te Atua i faatoroa maoti te Mesia?—Eph. 4:8.
‘E ohipa puai ra’
4, 5. I te tau o Paulo, no te aha te mau matahiapo i ohipa puai ai no te haapii i te amuiraa, e no te aha i teie mahana atoa?
4 I muri aˈe i to Paulo e Sila tonoraahia i Berea, mea nafea te mau matahiapo no Tesalonia i te ‘ohipa-puai-raa’? Mai ia Paulo, ua faaohipa ratou i te mau Papai no te haapii i te amuiraa. ‘Ua haafaufaa anei te mau Kerisetiano no Tesalonia i te Parau a te Atua?,’ ta oe paha e ui. Te na ô ra hoi te Bibilia e “e maitai mau to [Berea] i to Tesalonia, [i] te imiraa i te parau i papaihia ra i te mau mahana atoa.” (Ohi. 17:11) Tei nia teie parau i te rahiraa ati Iuda no Berea tei farii i te parau mau ia faaauhia i to Tesalonia. Aita to Tesalonia tei riro mai ei Kerisetiano ‘i farii i te parau a te Atua ei parau na te taata, ei parau râ na te Atua.’ (Tes. 1, 2:13) E titauhia ia ohipa puai te mau matahiapo no te haapii i te amuiraa.
5 Te horoa nei te pǔpǔ o te tavini haapao maitai e te paari i te “maa i te hora mau” no te nǎnǎ a te Atua. (Mat. 24:45) Arataihia e teie tavini, te ohipa puai nei te mau matahiapo no te haapii i to ratou mau taeae. Mea rahi te papai Bibilia ta te mau melo o te amuiraa e nehenehe e faaohipa, e i roto i te tahi mau reo te vai ra te Index des publications, te CD-ROM Watchtower Library aore ra te tapura tumu parau no Te Pare Tiairaa i roto i ta tatou Pare Tiairaa no Titema. No te haamâha i te mau hinaaro pae varua o te amuiraa, te rave ra te mau matahiapo tau hora no te faaineine i te mau tuhaa o te putuputuraa no te vauvau i te reira ma te manuïa. Ua feruri anei oe ehia rahiraa hora e faaineine ai te mau matahiapo i ta ratou tuhaa i te mau putuputuraa e tairururaa?
6, 7. (a) Eaha te hiˈoraa ta Paulo i vaiiho no te mau matahiapo no Tesalonia? (b) No te aha mea fifi ai no te mau matahiapo i teie mahana ia pee i te hiˈoraa o Paulo?
6 Ua haamanaˈo te mau matahiapo no Tesalonia i te hiˈoraa maitai o Paulo i te tiairaa i te nǎnǎ. E ere te reira i te ohipa faatia ture noa. Mai tei parauhia i to na mua ˈtu tumu parau, “i mǎrû noa” na Paulo “mai te [m]etua i poihere i ta ˈna ra tamarii.” (A taio i te Tesalonia 1, 2:7, 8.) Ua ineine atoa oia i ‘te horoa i to ˈna iho ora’! Ei tiai, ia riro te mau matahiapo mai ia ˈna.
7 Te pee nei te mau tiai Kerisetiano i te hiˈoraa o Paulo ma te poihere i te nǎnǎ. E ere iho â paha vetahi mamoe i te mea mǎrû e te mea ohie ia tapiri atu. E tamata râ te mau matahiapo i te haroaroa i te mea maitai i roto ia ratou. Oia mau, no to ˈna huru tia ore, mea fifi paha no te hoê matahiapo ia hiˈo i te huru maitai o te hoê taata. Ia tamata râ oia i te faaite i te mǎrû i nia i te taatoaraa, eiaha anei tatou e haamauruuru ia ˈna no ta ˈna mau tutavaraa no te riro ei tiai mamoe maitai arataihia e te Mesia?
8, 9. E nafea te mau matahiapo i teie mahana e “tiai” ai ia tatou?
8 E “auraro” paatoa anaˈe i te mau matahiapo, “te tiai nei hoi ratou” ia tatou, ta Paulo ïa i papai. (Heb. 13:17, Te Faufaa Api) Te haamanaˈo mai ra teie parau i te tiai mamoe e faaitoito ra i te vai ara noa no te paruru i ta ˈna nǎnǎ. Oia atoa i teie mahana, te ara nei te mau matahiapo i te maororaa po no te haapao i te mau hinaaro o te feia tei maˈihia, tei fifihia i te pae aau, aore ra tei fifi i te faaohipa i te mau ture aveia Bibilia. A hiˈo na i te mau taeae o te tomite tuatiraa e te fare maˈi. E tia-atoa-ratou i te po no te hoê rapaauraa ru. Eaha râ tatou i te mauruuru no ta ratou e rave o tatou anaˈe te fifihia!
9 Te ohipa puai nei te mau matahiapo o te mau tomite paturaa no te fenua e tomite tauturu no te mau taeae i roto i te ati. E au ia ratou to tatou turu ma te aau atoa! A hiˈo na i te ohipa tauturu i muri aˈe i te mataˈi rorofai Nargis tei tairi ia Birmanie i 2008. No te tapae atu i te amuiraa no Bothingone, i te mau vahi o te muriavai no Irraouaddi tei tairi-maitai-hia, ua na roto te pǔpǔ tauturu i te hoê tuhaa fenua vavahihia. Ua apapa noa te tino pohe i reira. I to te mau taeae o te amuiraa no Bothingone iteraa i to ratou tiaau haaati tahito i roto i te pǔpǔ tauturu matamua, pii hua aˈera ratou: “A hiˈo na! O to tatou tiaau haaati teie! Ua faaora Iehova ia tatou!” Te haafaufaa ra anei oe i te ohipa puai a te mau matahiapo i te po e te ao? Ua maitihia vetahi mau matahiapo no te tavini i roto i te mau tomite taa ê e haapao ra i te mau fifi i te pae o te ture. Aita teie mau matahiapo e faateitei ra ia ratou no ta ratou i rave. Te mauruuru mau nei râ te feia e fanaˈo ra i to ratou tauturu.—Mat. 6:2-4.
10. Eaha te mau ohipa matau-ore-hia a te mau matahiapo?
10 Mea rahi atoa te matahiapo i teie mahana te haapao ra i te mau papie a te amuiraa. Ei hiˈoraa, e faaineine te tiaau o te tino matahiapo i te porotarama o te mau putuputuraa tahebedoma. E haapao te papai parau o te amuiraa i te mau tapura taviniraa o te avaˈe e o te matahiti. E hiˈopoa maite te tiaau no te haapiiraa i te porotarama no te haapiiraa Kerisetiano. I te mau toru avaˈe atoa, e hiˈopoahia te tapura faufaa moni a te amuiraa. E taio te mau matahiapo i te mau rata a te amaa e e pee i tera aratairaa o te tauturu ia tapea “i te faaroo hoê.” (Eph. 4:3, 13) Maoti te mau tutavaraa a teie mau matahiapo e ohipa puai ra ‘e ravehia ˈi te mau mea atoa ma te tia e te nehenehe.’—Kor. 1, 14:40.
‘E faatere i nia ia outou’
11, 12. O vai te faatere i nia i te amuiraa, e eaha te auraa?
11 Ua faataa Paulo i te mau matahiapo ohipa puai no Tesalonia mai tei “faatere” i nia i te amuiraa. (Tes. 1, 5:12, Te Faufaa Api) I roto i te reo tumu Heleni, o te “tiaraa i mua” te auraa atoa o teie taˈo. Te faahiti ra Paulo i taua noâ mau matahiapo e “ohipa puai ra.” O te taatoaraa ïa o te mau matahiapo o te amuiraa ta ˈna e parau ra. I teie mahana, o te rahiraa o te mau matahiapo te tia ra i mua i te amuiraa e te faatere ra i te mau putuputuraa. Te tauturu mai ra te faatanoraa apî ia faaohipahia i teie nei te parau “tiaau o te tino matahiapo” ia hiˈo i te mau matahiapo atoa mai te mau melo o te hoê tino.
12 ‘E faatere’ i nia i te amuiraa, e ere noa ïa i te haapiiraa ˈtu. Te faaohipa ra te Timoteo 1, 3:4 (Te Faufaa Api) i te hoê â parau. Ua na ô hoi Paulo e ia riro te hoê matahiapo ei “taata e faatere maitai i tôna iho ra utuafare ˈe te auraro-maitai-hia e tâna mau tamarii ma te tura.” Papu maitai ïa e e ere te taˈo “faatere” i te haapii-noa-raa ˈtu i ta ˈna mau tamarii, o te aratai-atoa-raa râ i te utuafare ia “auraro-maitai-hia [oia] e tâna mau tamarii.” Oia mau, e aratai te mau matahiapo i te amuiraa ma te tauturu i te taatoaraa ia auraro ia Iehova.—Tim. 1, 3:5.
13. No te aha e titauhia ˈi te taime ia rave te mau matahiapo i te hoê faaotiraa a putuputu ai ratou?
13 No te faatere maitai i nia i te nǎnǎ, e tauaparau te mau matahiapo no nia i te mau ravea e mâha ˈi te mau hinaaro o te amuiraa. Mea maitai aˈe iho â paha e na te hoê matahiapo e rave i te mau faaotiraa atoa. Teie râ, ia au i te hiˈoraa o te tino aratai o te senekele matamua, e tauaparau te mau tino matahiapo ma te huna ore e ma te imi i te aratairaa a te mau Papai. Ta ratou fa, o te faaohiparaa ïa i te mau faaueraa tumu Bibilia no te mau hinaaro o ta ratou amuiraa. E manuïa aˈe te reira ia faaineine te matahiapo taitahi ia ˈna no ta ratou putuputuraa ma te hiˈopoa i te mau Papai e te mau faaueraa o te pǔpǔ o te tavini haapao maitai e te paari. E rave iho â te reira i te taime. Ia ore te manaˈo e tu, mai tei tupu i te senekele matamua a hiˈopoa ˈi te tino aratai i te tumu parau o te peritomeraa, e titauhia paha te taime e te maimiraa hau ia farii te taatoaraa i te faaotiraa niuhia i nia i te mau Papai.—Ohi. 15:2, 6, 7, 12-14, 28.
14. Mea au anei na oe ia haa te tino matahiapo ma te auhoê? No te aha?
14 Eaha te tupu ia onoono te hoê matahiapo ia fariihia to ˈna iho manaˈo? Aore ra eaha te faahopearaa ia tamata hoê i te faaamahamaha, mai ia Dioterephe i te senekele matamua? (Ioa. 3, 9, 10) O te amuiraa iho â ïa te ati. I te mea e ua tamata Satani i te haafifi i te amuiraa o te senekele matamua, mea papu e te hinaaro ra oia e haafifi i te hau o te amuiraa i teie mahana. E faaohipa oia i te hinaaro miimii o te taata mai te titauraa i te tiaraa. Ia faahotu ïa te mau matahiapo i te haehaa e ia haa amui ratou ei tino hoê. Auê hoi te au ia na reira te mau matahiapo!
‘E aˈo ra ia outou’
15. No te aha te mau matahiapo e aˈo ai i te hoê taeae aore ra te hoê tuahine?
15 I muri iho, ua haamataratara Paulo i te hoê tuhaa ohipa fifi, faufaa râ, a te mau matahiapo: te aˈoraa i te nǎnǎ. I roto i te mau Papai Heleni Kerisetiano, o ˈna anaˈe tei faaohipa i te taˈo Heleni hurihia ei “aˈo.” O te aˈoraa etaeta te reira e ere râ i te inoino. (Ohi. 20:31; Tes. 2, 3:15) Ei hiˈoraa, ua papai Paulo i to Korinetia: “Aore au i papai i teie nei mau parau ia haama outou, te aˈo atu nei râ vau ia outou, i tau mau tamarii here na.” (Kor. 1, 4:14) E aˈo atu oia no to ˈna tapitapi î i te here ia vetahi ê.
16. Mea maitai ia haamanaˈo te mau matahiapo i te aha a aˈo ai ia vetahi atu?
16 E haamanaˈo te mau matahiapo i te faufaaraa o ta ratou huru aˈoraa. E tutava ratou i te pee i te hiˈoraa o Paulo ma te tauturu atu e te faaite atu i te mǎrû e te here. (A taio i te Tesalonia 1, 2:11, 12.) ‘E tapea maite iho â te mau matahiapo i te parau mau ia tia ia ratou ia haapii i te parau ora.’—Tito 1:5-9.
17, 18. Ia haamanaˈo oe i te aha ia aˈohia oe e te hoê matahiapo?
17 Mea tia ore te mau matahiapo e e nehenehe ratou e parau i te mau mea ta ratou e tatarahapa i muri aˈe. (Arii 1, 8:46; Iak. 3:8) Ua ite atoa ratou e no te mau taeae e tuahine pae varua e ere iho â te aˈoraa i ‘te mea oaoa e mea oto râ.’ (Heb. 12:11) No reira, hou te hoê matahiapo e aˈo atu ai i te hoê, e feruri maitai oia i ta ˈna e parau a pure atu ai. Ia aˈohia mai oe, e mauruuru anei oe no te tapitapi î i te here a te matahiapo?
18 A feruri na e e maˈi to oe aita râ e taahia ra eaha. Ite maitai aˈera te hoê taote eaha te fifi. E ere râ i te mea ohie ia farii i ta ˈna i faataa mai. E inoino anei oe i tera taote? Eita! Noa ˈtu e e titauhia ia tâpûhia oe, e farii iho â oe i tera ravea rapaauraa. Ua ite iho â oe e no to oe iho maitai te reira. E huru ê iho â paha oe i te huru paraparau a te taote. E ohipa anei râ te reira i nia i ta oe faaotiraa? Eita paha. Oia atoa, eiaha e haapao i te huru raveraa ia aˈohia oe. A faaroo râ i te feia ta Iehova raua Iesu e faaohipa nei ia ite oe e nafea ia haere i mua i roto i te parau mau aore ra ia paruru i to oe mau taairaa e o Iehova.
A mauruuru i te mau matahiapo ta Iehova i faanaho
19, 20. E nafea ia faaite i to oe mauruuru i te mau ‘taata horoahia mai’?
19 Eaha ta oe e rave ia horoahia mai te hoê ô hamani-taa-ê-hia no oe? E faaite oe i to oe mauruuru ma te faaohipa i te reira, e ere anei? O te mau ‘taata horoahia mai’ ta Iehova i ho mai no oe maoti Iesu Mesia. Hoê ravea no te faaite i to oe mauruuru no teie mau ô, o te faaroo-maitai-raa ïa i te mau oreroraa parau a te mau matahiapo e te tutavaraa i te faaohipa i te mau manaˈo faahitihia. E nehenehe atoa oe i te mau putuputuraa e horoa i te mau pahonoraa o te faaitoito. A turu i te ohipa ta te mau matahiapo e aratai ra, mai te pororaa. Mai te peu e ua maitaihia oe i te aˈoraa a te tahi matahiapo, e nehenehe oe e faaite atu ia ˈna. Hau atu â, no te aha e ore ai e faaite i to oe mauruuru no te mau utuafare o te mau matahiapo? A haamanaˈo, ia ohipa puai te hoê matahiapo i roto i te amuiraa, e haapae to ˈna utuafare i te taime e o ˈna.
20 Oia mau, mea rahi te tumu e faaite ai tatou i te mauruuru i te mau matahiapo o te ohipa puai ra i rotopu ia tatou, o te faatere ra i nia ia tatou e o te aˈo ra ia tatou. E faanahoraa î i te here mau teie mau ‘taata horoahia mai’ no ǒ mai ia Iehova!
[Nota i raro i te api]
^ Tesalonia 1, 5:12: “E te mau taeae e, te ani atu nei au ia faatura outou i te feia e [o]hipa [puai] ra i rotopu ia outou no te faatere atu ia outou i roto i te Fatu, ˈe no te aˈo atu ia outou.”—Te Faufaa Api.
Te haamanaˈo ra anei outou?
• No te aha te mau Kerisetiano no Tesalonia i mauruuru ai i tei aratai ia ratou?
• E nafea te mau matahiapo o ta oe amuiraa e ohipa puai ai no oe?
• E nafea oe e maitaihia ˈi i te mau matahiapo e faatere ra i nia ia oe?
• Ia haamanaˈo oe i te aha ia aˈohia oe e te hoê matahiapo?
[Uiraa haapiiraa]
[Hohoˈa i te api 26]
Te taa ra anei ia oe te ravea rau e tiai ai te mau matahiapo i te amuiraa?
