‘Intte Giddon Minnidi Oottiyaageeta Bonchite’

“Intte giddon oottiyaageeta, inttena kaalettanaunne zoranau Godai dooridoogeeta, intte bonchchana mala, inttena woossoos.”—1 TAS. 5:12.

1, 2. (a) PHauloosi koyro dabddaabbiya etau xaafiyo wode, Tasalonqqe gubaaˈee ay mala hanotan deˈii? (b) PHauloosi Tasalonqqe gubaaˈiyaa yameti ay oottanaadan minttettidee?

AWUROOPPAN koyro eqqida gubaaˈetuppe issuwaa gidida, koyro xeetu layttan deˈida Tasalonqqe gubaaˈiyaa yamedan inttena qoppite. Kiitettida PHauloosi yan deˈiya ishantta minttettanau daro wodiyaa goˈettiis. Hara gubaaˈetun deˈiyaageeta sunttidoogaadan, sintta xeera gididi kaalettiya cimata i sunttennan aggenna. (Oos. 14:23) SHin gubaaˈee eqqi simmin, PHauloosanne Sillaasa katamaappe kessanau Ayhudati daro asaa shiishshidosona. Yan deˈiya Kiristtaaneti maaddiyay baynnabadan qoppennan, ubba yayyennan aggokkona.

² PHauloosi Tasalonqqeppe bi simmidi, ooratta eqqida gubaaˈiyaabaa qoppidoogee qoncce. I simmidi yaa baanau koyiis, shin ‘Seexaanay a diggiis.’ Yaatiyo gishshau, gubaaˈiyaa minttettanaadan Ximootiyoosa kiittiis. (1 Tas. 2:18; 3:2) Ximootiyoosi loˈˈo oduwaa ekkidi yiido wode, PHauloosi Tasalonqqe Kiristtaanetuyyo dabddaabbiyaa xaafanau koyiis. PHauloosi xaafidobaappe issoy, eti ‘banttana kaalettiyaageeta bonchanaadan’ minttettidoogaa.—1 Tasalonqqe 5:12, 13 nabbaba.

3. Tasalonqqe gubaaˈiyaa yameti cimata keehippe bochanaadan oottida gaasoti awugeetee?

³ Tasalonqqe gubaaˈiyan deˈiya cimati sunttetoosappe takkibookkona; qassi PHauloosanne aara oottiyaageetuugaadan woy Yerusalaamen deˈiya cimatuugaadan Kiristtaane gidoosappe gamˈˈibookkona. Hegaa bollikka, gubaaˈee eqqoosappe laytta kumibeenna! SHin minnidi ‘oottiya,’ gubaaˈiyaa ‘kaalettiya,’ qassi ishantta ‘zoriya’ bantta gubaaˈiyaa cimata, he gubaaˈiyan deˈiyaageeti nashshana koshshiyo gaasoy deˈees. Tumuppe eti ‘cimata keehi bonchananne siiqana’ koshshiyo loˈˈo gaasoy deˈees. PHauloosi hegaappe kaallidi, “issoi issuwaara sarotettan” deˈanaadan zoriis. Intte he wode Tasalonqqe gubaaˈiyan deˈiyaaba gidiyaakko, cimati oottiyo oosuwaa wozanappe nashshiyoogaa besuuteetii? Xoossay Kiristtoosa baggaara intte gubaaˈiyan giigissido “imota” gidida attuma asaa waatidi xeelleetii?—Efi. 4:8.

‘Minnidi Oottiyaageeta’

4, 5. PHauloosa wode gubaaˈiyaa tamaarissiyoogee cimati minnidi oottiyo ooso gididoy aybissee, ha wodiyankka hegaa mala gididoy aybissee?

⁴ PHauloosinne Sillaasee Beeriyaa bi simmin, Tasalonqqe gubaaˈiyaa cimati ‘minnidi oottidoy’ ayba ogiyaanee? PHauloosa leemisuwaa kaalliyoogan, eti Geeshsha Maxaafaa goˈettidi gubaaˈiyaa tamaarissidoogee sirissenna. ‘Tasalonqqe Kiristtaaneti Xoossaa Qaalaa nashshidonaa?’ giidi qoppana danddayeeta. Geeshsha Maxaafay, “Beeriyaa asati Tasalonqqen de7iya asatuppekka aadhdhiya akeekanchcha gidido gishshau, . . . ubba gallassi Xoossaa maxaafata” akeekan pilggidoogaa yootees. (Oos. 17:11) SHin ha geeddarssoy, Tasalonqqen deˈiya Ayhudatuurappe attin Kiristtaanetuura gidenna. Kiristtaane gididaageeti, ‘Xoossaa qaalaa Xoossaa kiitadan ekkidoogaappe attin, asa kiitadan ekkibookkona.’ (1 Tas. 2:13) Cimati hegaa mala asata ayyaanaaban mizanau minni oottana koshshiis.

⁵ Ha wodiyan, ammanettida wozannaama ashkkaray Xoossaa wudiyau “qumaa koshshiyo  wodiyan” giigissees. (Maa. 24:45) Ammanettida wozannaama ashkkaraa kaaletuwan, gubaaˈiyaa cimati bantta ishantta ayyaanaaban mizanau minnidi oottoosona. Gubaaˈiyan deˈiyaageetuyyo Geeshsha Maxaafan baasettida xuufeti, qassi issi issi doonatun Wachi Tawer Pabilikeshin Indekisee, siidiyan giigida Wachi Tawer Laybirereenne hegaa malabay deˈana danddayees. Cimati ayyaanaaban gubaaˈiyaa loytti mizanau, daro saatiyaa goˈettidi giigettoosona; yaatiyoogan loytti tamaarissana danddayoosona. Cimati gubaaˈiyaaninne gita shiiqotun banttau imettida kifiliyaa giigettanau ay keena wodiyaa goˈettiyaakko qoppi ereetii?

6, 7. (a) Tasalonqqen deˈiya cimati kaallido, PHauloosa leemisoy aybee? (b) PHauloosa leemisuwaa kaalliyoogee ha wodiyan deˈiya cimata metana danddayiyoy aybissee?

⁶ Tasalonqqe gubaaˈiyaa cimati PHauloosi wudiyaa heemmiyoogan kaallana bessiya loˈˈo leemiso gidiyoogaa hassayidosona. Hegee, i eta saxau oychidoogaa bessiyaaba gidenna. Hagaappe kasetiya huuphe yohuwan beˈidoogaadan, PHauloosi, xanttiya ‘aayyiyaa ba naata dichiyoogaadan eta giddon ashkke gidiis.’ (1 Tasalonqqe 2:7, 8 nabbaba.) Ubba i ‘ba deˈuwaakka immanau’ giigi uttiis! Wudiyaa heemmiyo wode, cimati aagaadan oottana koshshiis.

⁷ Ha wodiyan deˈiya gubaaˈe cimatikka wudiyaa heemmiyoogan PHauloosa leemisuwaa kaalloosona. Issi issi dorssay meretan pashkki geennaagaa, qassi haratuura laggetennaagaa gidana danddayees. Gidikkokka, cimati eta zoranaunne etan ‘loˈˈobaa demmanau’ baaxetoosona. (Lee. 16:20) Polo gidenna gishshau, issi cimay ubbaa loˈˈo ayfiyan xeellanau baaxetana danddayiyoogee tuma. Gidikkokka, i ubbau ashkke gidanau baassi danddayettida ubbabaa oottiyo wode, Kiristtoosappe garssaara heemmiya loˈˈo henttancha gidanau oottiyoobau a galatana koshshennee?

8, 9. Ha wodiyan deˈiya cimati ‘nu shemppuwaa mintti naagiyo’ issi issi ogeti awugeetee?

⁸ Nuuni ubbay cimati ‘azaziyoogaa oottana’ koshshiyo gaasoy deˈees. PHauloosi yootidoogaadan, ‘eti nu shemppuwaa mintti naagoosona.’ (Ibr. 13:17) Ha qonccissoy, beni wode ba dorssaa wudiyaa naaganau xiskkennan aqiya, dorssaa heemmiya uraa hassayissees. Hegaara issi mala hanotan, cimati ha wodiyan sahettiyaageetuyyo woykko qofan woy ayyaanaaban metootiyaageetuyyo qoppiiddi issi issitoo xiskkennan aqana danddayoosona. Leemisuwau, Hosppitaaletuura Gattiya Komitiyan oottiya ishata akkaamuwaara gayttida issi issi metuwau xiskkuwaappe denttiyoogaa koshshana danddayees. SHin, nuna hegaa malabay gakkiyo wode, eta oosuwau eta keehippe galatoos.

⁹ Kawotettaa Addaraashaa keexxiya citan oottiya cimatinne wolqqaama metoy gakkidoogeeta maaddiya komitiyan oottiya cimati ishata maaddanau minnidi oottoosona. Eta nuuni wozanappe kaafana koshshees. Saykilon Nargis giyo gotee denddidi, 2008n Maynmaare biittaa qohi simmin, maaddanau oosettidabaa qoppite. He gotiyan keehi qohettida, Irawadi Deltta giyo heeran deˈiya, Botingon geetettiya gubaaˈee deˈiyo heeraa gakkanau, wolqqaama metoy gakkidoogeeta maaddiyaageeti ahay kumido heeraa kanttidi biidosona. Maaddiya koyro citay Botingone gakkiyo wode, he citaa giddon eta gubaaˈiyaa kase geeddiya, woradaa bollaara xeelliyaagee deˈiyoogaa beˈidi, yan deˈiya ishati, “Beˈite! Hegee nu woradaa bollaara geeddiyaagaa! Yihooway nuna ashshiis!” yaagidosona. Cimati gallassinne qammi minnidi oottiyo oosuwaa nashsheetii? Issi issi cimati issi metiya pirdda allaalliyaa xeellanaadan issi dumma komitiyan oottanaadan doorettoosona. He cimati bantta polidoban otorettokkona; shin eti oottidoban goˈettidaageeti eta wozanappe galatoosona.—Maa. 6:2-4.

10. Cimati oottiyo, harati akeekenna oosoy aybee?

¹⁰ Ha wodiyan daro cimatuyyo xaafiyoobaara gayttida oosoykka deˈees. Leemisuwau, cimata shiishshiya ishay saamintta giddon shiiqiyo shiiqotu prograamiyaa giigissees. Gubaaˈiyaa xaafee aginaanne layttaa haggaazo irpporttiyaa giigissees. Tiˈokraase timirtte keettaa kaalettiyaagee timirtte keettaa prograamiyaa loytti qoppidi giigissees. Cimati heezzu aginan issitoo gubaaˈiyaa hisaabiyaa mazggafaa pilggoosona. ‘Ammanuwan issippe’ gidanaadan maaddiya, macara biiruwaappe yiida dabddaabbiyaa  cimati nabbabidi he kaaletuwaa oosuwan peeshshoosona. (Efi. 4:3, 13) Minnidi oottiyo hegaa mala oosuwan, cimati “ubbabaikka wogaaninne maaran” hananaadan oottoosona.—1 Qor. 14:40.

‘Inttena Kaalettiyaageeta’

11, 12. Gubaaˈiyan kaalettiyaageeti oonee, hegee ay gujjii?

¹¹ PHauloosi Tasalonqqe gubaaˈiyan minnidi oottiya cimata ‘kaalettiyaageeta’ giidi qonccissiis. Koyro xaafettido doonan, ha qaalay ‘sinttan eqqiyaageeta’ giyoogaa; hegee ‘kaalettiyaageeta, sintta xeera gididi oottiyaageeta’ giyoogaara issi mala gidana danddayees. (1 Tas. 5:12) PHauloosi he cimata ‘minnidi oottiyaageeta’ giidikka qonccissiis. I hegaadan giidoy, gubaaˈiyan deˈiya ubba cimata. Ha wodiyan, cimatuppe dariya baggay gubaaˈiyaa sinttan eqqidi, shiiquwaa kaalettees. Mata wode “cimata shiishshiyaagaa” geetettida giigissoy, ubba cimati issippetettan oottiyaageeta gidiyoogaa nuuni akeekanaadan maaddees.

¹² Gubaaˈiyan ‘kaalettiyoogee’ tamaarissiyoogaappe aadhiyaabaa gujjees. Hegaara issi mala qonccissoy, 1 Ximootiyoosa 3:4n deˈees. PHauloosi, issi cimay “naati ayyo azazettiyoogaanne bonchchiyoogaa, qassi ba keettaa aissanau danddayiyaagaa gidanau” bessiyoogaa yootiis. ‘Ayssiyaagaa’ giya qonccissoy, ba naata tamaarissiyoogaa xalla gidennan, ba keettaa asaa sintta xeera gididi kaalettiyoogaanne ‘naati ayyo azazettiyaageeta’ gidiyoogaa gujjiyoogee qoncce. Ee, ubbay Yihoowayyo haarettana mala maaddiyoogan, cimati sintta xeera gididi gubaaˈiyan kaalettoosona.—1 Xim. 3:5.

13. Cimati shiiqiyo wode, issi allaalliyaa kuuyiyoogee daro wodiyaa ekkana danddayiyoy aybissee?

¹³ Wudiyaa loytti kaalettanau, gubaaˈiyau koshshiyaabaanne hegaa gubaaˈiyaa maaddiya ogiyan waati shiishshanaakko cimati issippe tobboosona. Issi cimay ubba kuushshaa kuuyiyoogee issibaa sohuwaara polanau maaddana danddayees. SHin ha wodiyan deˈiya cimati, koyro xeetu layttan deˈida, bollaara heemmiyaagaa leemisuwaa kaalliyoogan, issi allaalliyaara gayttidabaa tobboosona; qassi Geeshsha Maxaafaappe kaaletuwaa koyoosona. Eta halchoy, gubaaˈiyau koshshiyaabau Geeshsha Maxaafaa baaso siraataa oosuwan peeshshiyoogaa. Ubba cimatikka Geeshsha Maxaafaa qofaanne ammanettida wozannaama ashkkaraa kaaletuwaa akeekidi loytti giigettiyo wode, cimatu shiiqoy keehippe goˈˈiyaagaa gidees. Hegau wodiyaa koshshiyoogee tuma. Koyro xeetu layttan, qaxxaraa xeelliyaagan bollaara heemmiyaagee tobbiyo wode hanidoogaadan, issi allaalle xeelliyaagan cimatussi dumma dumma qofay deˈiyo wode daro saatiyaanne pilggiyoogaa koshshana danddayees.—Oos. 15:2, 6, 7, 12-14, 28.

14. Cimati issippetettan oottiyoogaa nashshay? Neeyyo hegaadan siyettiyoy aybissee?

¹⁴ Issi cimay i koyiyoobay polettanaadan woykko harati a qofaa kaallanaadan sugiyaaba gidikko, aybi hanana danddayii? Woykko, issi uri koyro xeetu layttan deˈida, Diyotirefeesa mala shaahotettaa medhiyaagaa gidikkoshin? (3 Yoh. 9, 10) Kumetta gubaaˈee keehippe qohettees. Seexaanay koyro xeetu layttan deˈiya gubaaˈiyan meto medhanau malidaba gidikko, i ha wodiyan deˈiya gubaaˈiyaa sarotettaakka mooranau koyiyoogee erettidaagaa. I hegaadan oottanau, xoqqa sohuwaa koyiyoogaa mala, asay ba huuphiyaa siiqiyo koshshaa denttettana danddayees. Yaatiyo gishshau, cimati kaseegaappe aaruwan ashkke gidanaunne issi bolladan issippetettan oottanau koshshees. Cimati ashkketettan issi bolladan hashetidi oottiyoobaa keehippe nashshoos.

‘Inttena Zoriyaageeta’

15. Cimati issi ishaa woy michiyo zoranaadan denttettiyaabi aybee?

¹⁵ Kaallidi PHauloosi, metiyaaba gidikkokka, keehippe koshshiya cimati oottiyo oosuwaa, giishin wudiyaa zoriyoogaa yootiis. “Zoriyoogaa” geetettidi birshshettida Giriiketto qaalaa Kiristtaane Giriike Geeshsha Maxaafaa xuufetun goˈettiday PHauloosa xalaa. Hegee wolqqaama seeraa bessiyaaba gidana danddayikkonne morkkedan xeelliyoogaa bessenna. (Oos. 20:31; 2 Tas. 3:15) Leemisuwau, PHauloosi Qoronttoosa Kiristtaanetuyyo, “Taani ta siiqiyo naatudan, inttena seeranau hagaa xaafaisippe attin, yeellayanau xaafikke” yaagiis. (1 Qor. 4:14) I zoranaadan  denttettiday haratussi siiquwan qoppiyoogaa.

16. Cimati harata zoriyo wode aybaa loytti akeekiyoonaa?

¹⁶ Cimati harata zoriyo wode, zoriyo ogiyaabaa qoppana koshshiyoogaa akeekoosona. Eti keha, siiqiyaageetanne maaddiyaageeta gidiyoogan PHauloosa leemisuwaa kaallanau baaxetoosona. (1 Tasalonqqe 2:11, 12 nabbaba.) Cimati ‘tumu ammanuwaa tamaarissiyoogan zoranau ammanttiya timirttiyaa qaalaa mintti oyqqiyoogee’ erettidaba.—Tii. 1:5-9.

17, 18. Issi cimay nena zoriyo wode, neeni ay hassayana koshshii?

¹⁷ Polo gidenna gishshau, cimati guyyeppe zilˈˈettiyoobaa haasayana danddayiyoogee tuma. (1 Kaw. 8:46; Yaaq. 3:8) Ishatanne michota zoriyo wode, hegee eta ‘ufayssiyaaba gidennan yiilloyiyaaba’ gidiyoogaakka cimati eroosona. (Ibr. 12:11) Hegaa gishshau, issi cimay issi ura zoranaappe kase, hegaa xeelliyaagan loytti qoppananne woossana danddayees. Issi cimay inttena zoriyaaba gidikko, he cimay intteyyo siiquwan qoppiyoogaa nashsheetii?

¹⁸ Leemisuwau, haakimiyaukka erettennaba milatiya harggiyaa intte harggiyaabadan qoppite. Guyyeppe issi haakimee intte harggee aybakko eriis; shin akkamettiyo ogee waayissiyaagaa gidana danddayees. Intte he dottoriyau lanccanee? CHii! I intte shuhettanaadan azaziyaaba gidikkokka, hegee intte goˈˈaassa gidiyoogaa eridi, i giido akkamuwaa akkamettiyoogee erettidaagaa. Dottoree intteyyo yootido ogee inttena daganttana danddayees; shin hegee intte akkamettiyoogaa agganaadan oottii? Oottennan aggana danddayees. Hegaara issi mala hanotan, cimati zoriyo ogee intte he zoriyaa siyennaadan oottana mala paqqadoppite; intte ayyaanaaban waanidi maadettana woy naagettana danddayiyaakko eranaadan, Yihoowaynne Yesuusi eta goˈettoosona.

 Yihooway Cimati Deˈanaadan Oottido Giigissuwaa Nashshite

19, 20. “Imota” gidida attuma asaa nashshiyoogaa ayba ogiyan bessana danddayay?

¹⁹ Inttessi qoppidi giigissido imotaa issi uri immikko, waatuuteetii? Hegaa goˈettiyoogan nashshiyoogaa besseetii? “Imota” gidida attuma asay, Yesuus Kiristtoosa baggaara Yihooway intteyyo giigissidoba. He imotau galatiyoogaa intte bessiyo issi ogee, cimati shiishshiyo haasayaa wozanappe ezggiyoogaananne eti yootidobaa oosuwan peeshshanau baaxetiyoogaana. SHiiquwan loˈˈo qofaa immiyoogankka nashshiyoogaa bessana danddayeeta. Haggaazuwaa mala, cimati sintta xeera gididi kaalettiyo oosuwaa kaafite. Issi cimay zorido zoriyan goˈettidaba gidikko, hegaa aybissi ayyo yootekketii? Hegaa bollikka, gubaaˈiyaa cimaa keettaa asaakka nashshiyoogaa bessite. Issi cimay gubaaˈiyau minnidi oottanaadan, a soo asay aara issippe aattiyo wodiyaa yarshshiyoogaa hassayite.

²⁰ Ee, nu giddon minnidi oottiya, nuna kaalettiyaanne zoriya gubaaˈiyaa cimata galatana bessiyo daro gaasoy deˈees. “Imota” gidida attuma asay, Yihooway tumuppe siiquwan giigissidoba!

Hassayay?

• Tasalonqqe Kiristtaaneti bantta giddon sintta xeera gididi oottiyaageeta nashshiyo ayba gaasoy deˈii?

• Intte gubaaˈiyaa cimati intteyyo minnidi oottiyoy ayba ogiyaanee?

• Inttena kaalettiya cimatun intte goˈettiyoy ayba ogiyaanee?

• Issi cimay inttena zoriyo wode, intte ay hassayana koshshii?

[Oyshata]

[Sinttaa 29n deʼiya misiliyaa qonccissuwaa]

Cimati gubaaˈiyaa heemmiyo dumma dumma ogeta nashshay?