Oni Berẽpa “Agu Yo Namanga Nyanyaki Sunge Dagba Roni Yo”

“Oni íni agu yo namanga nyanyaki sunge dagba roni yo, ki du ri roni rogo Gbia kini rugu roni.”​—1 TESA. 5:12.

1, 2. (a) Ginipai nadu tipa gu dungurati nadu Tesaronike yo ho Pauro ake gako bambata waraga ni? (b) Ginipai Pauro angarasi aTesaroniko i nimangihe?

ONI berẽnga gupai nga oni adu rogo gu dungurati nadu Tesaronike yo rogo bambata sa kama agarã. Gu mokedi nangia Pauro aima dia gbanga regbo koyo ka nyakasa awirina. Ko amoi kura awirina a ni abaakumba i naangbembatayo, a wa si adu rogo kura adungurati. (Amo. 14:23) Ono fuo sigirayo gu dungurati re, aYuda azingisi aboro i do aPauro na Sira kusayo bakporo yo. Agu aKristano nanye yo aima rungo gbe tipa aPauro, isoke i aima tona ka gunde a.

² Fuo guari Pauro Tesaronike yo, ko aabaka bangiriko abaka tipa gu dungurati nadu kindi nifogoho re. Ko akpinyemu ka ndu koyo berewe, ono “Satana ki nidingisa” ko adingisa. Si du ko akedi Timoteo ti ni koyo ko ndu ka ngarasa awirina. (1 Tesa. 2:18; 3:2) Ho Timoteo ayeni na wene pangbanga fu Pauro, si asa Pauro ko ke gako bambata waraga fu aTesaroniko. Pai sa dagba agu apai ko akehe nga, ko angarasiyo i niberẽpa ‘aguyo namanga nyanyaki sunge dagbayó kidu riyo.’​—Oni gedi 1 ATesaroniko 5:12, 13.

3. Gini nduapai agu aKristano nadu Tesaronike yo adu nani kaa irisa abaakumba bakere gbe?

³ Agu awirina naangbembatayo dagba agu aKristano nadu Tesaronike yo aadunga na inohe wa Pauro gbiati gu kura amokedi ko anaata naayó te; na i aaimanga kurogo rengo yo wa agu abaakumba nadu Yerusarema yo te. Kurigure berewe, gu dungurati re aamanganga  kandara garã sa ti gu regbo re te! Ono wa si avura duwo, agu aboro nadu rogo dungurati aduadu na ndupai beyo kadu na tambuahe tipa abaakumba, ‘naamangasunge nyanyakii’ na ‘kidu riyo’ na kini ‘ruguyo.’ Nirengo, wene ndupai adu kinaho si aidi ti ni i “niirisi yo bakere gbe ni nyemuse.” Fuo gumba Pauro gipai re, ko afu rugute ki yaa: “Oni du na zereda dagba roni yo.” Ka si adu nga oni adu Tesaronike yo, ka oni ayugu gaoni tambuahe tipa gu sunge abaakumba amangaha? Wai oni abi agu ‘agamahe’ nga abaakumba Mbori nafuhe fu dungurati rogo Kristo yo?​—Ef. 4:8.

‘Mangasunge Nyanyakii’

4, 5. Tipagine si adu ti ni nibakere sunge fu agu abaakumba nadu ti rago Pauro i naayugopai fu dungurati, na tipagine duhe ti ni areme wo a?

⁴ Fuo keda yó aPauro na Sira ku Beroya yo, wai agu abaakumba nadu Tesaronike yo ‘aamangasunge nyanyakii’? I aayugopai ayugo kindi fu dungurati nimangayo sunge na Ziazia Kekeapai, a wa Pauro anaamangaha. Ono oni rengbe ka sanahe nga: ‘Ya mo agu aKristano nadu Tesaronike yo aduna tambuahe tipa Fugo Mbori’? Si rengbe ka kpakara bangironi a mbiko gupai nga, Ziazia Kekeapai nayawee aboro Beroya ‘nangba ti aguyo nadu Tesaronike yo, . . . niwisigi Ziazia Kekeapai na aʹuru dunduko.’ (Amo. 17:11) Gupai si aida oni inihe nga, agu aTesaroniko Pauro ape payo re angianga aguyo nangia aKristano te, ono agu aYuda nadu Tesaronike yo dunduko. Aguyo nada ni aidipase ‘adi ga Mbori pai kugume nikina ga Mbori pai, angianga ga aboro pai ya.’ (1 Tesa. 2:13) Nirengo, agu abaakumba nadu yo aima mangasunge nyanyakii tipa ka riga agu aboro re rogo toro yo.

⁵ Areme, ruru kangara moyambu nafu riahe fu ga Mbori rimbasa akandoro “ti ragoho.” (Mt. 24:45) Agu aboro du rogo dungurati gu duadu na agu awaraga beyo du mburuhe rii Ziazia Kekeapai na agu awaraga nayugobara apai kurogo kura awaraga, wa agu nga Watch Tower Publications Index na Watchtower Library. Na rogo agu aNgbaõbambu Sinziri nga ga Banduru, tangaratangara riiapai i naakehe yo ninaayugo bara agu apai i akehe rogo agu aNgbaõbambu Sinziri nga ga gu garã re. Na kurigure, agu abaakumba du rogo adungurati namangasunge tiibe gu rugapai nga ga kangara moyambu tipa kaa riga awirinayo rogo toro yo. Tipa ka mbiisa aboro rogo toro yo, abaakumba naadia dungu asaa kuti mbakada adunguratise tipa wa ka i mangihe ngba gu gene nika undo awirina aundo. Ya mo oni aberẽnga pa bakio gu regbo abaakumba adiaha kaa mbakada adunguratise na kikindigi adunguratise?

6, 7. (a) Gini wene kpiapai agu abaakumba nadu Tesaronike yo adihe be Pauro? (b) Tipagine rengbehe kadu ti ni nikpakarapai ti kura aregbo fu abaakumba i wiriki Pauro?

⁶ Agu abaakumba nadu Tesaronike yo aima tingidapa gu wene kpiapai Pauro amoihe fuyó nibipa ngerafuo akandoro. Pauro anaamanganga gako sunge gbua kpakpasiraa te. A wa ani abihe rogo gu kekeapai ye mbata fu gere, Pauro ‘adu nibayee ko, a wa de naamanga pa awiriri.’ (Oni gedi 1 ATesaroniko 2:7, 8.) Ko aima kpinyemu ka ‘fu mbisimoko’ a tipa yó! Si aidi abaakumba du wakina ko wa i angerafuo akandoro.

⁷ Agu aKristano nga abaakumba areme nawirika Pauro ningerayo wenengai fuo akandoro. Kura akandoro kinaho awasanga na aboro ya. Ono abaakumba naʹasadatiyo aʹasada ka rugatiyo na gayó pai na ka bi gu wenepai du rogoyo yo. Wangia abaakumba kpakpa aboro, kura regbo kinaho rengbehe kadu nikpakarapai fu bakumba ko duna wene bipai tipa boro. Ono tie, ka ko aʹasadatiko kadu nibayee ko fu aboro, si naida ani tambuako atambua mbiko ko naʹasadatiko kadu niga Kristo wene babanda akandoro.

8, 9. Gini bete agene agu abaakumba du areme ‘angera tipa mbisimorani’ ngbaha?

⁸ Ani dunduko duadu na wene nduapai berani tipa ka ‘rafu’ abaakumba. A wa Pauro akehe, ‘i nangera tipa pa mbisimorani.’ (Eb. 13:17) Gu fugo re natingida rani naapa wai babanda akandoro naazanga rame tipa ka  banda gani akandoro. Wakina gure a, agu abaakumba du areme naazanga rame azanga ti kura aregbo tipa ka ngerafuo gu boro nga boro-wokote, guni duna bakere gberarago, watadu guni duna gu kaza nga ga toro. Nikpiapai, agu awirina du rogo agu aRondo Du Tipa Sakapai na Amunganga naazinga azinga rameyo yuru ho tunguotunguopai nagbia wirina ni. Ani nafu bakere tambuahe tipa gu gayó sunge re!

⁹ Agu abaakumba du rogo gu rondo nangerakuriipa meka arago, gbiati aguyo nabipa fu undo ti regbo gberãngbi, i namangasunge amanga nyanyakii tipa ka undo awirina. I rẽarẽ ani naasongodayo na ngbaduraniyo dũ! Oni bingo wai awirina amangipai ho bakere bakamikami akuadi rago ni Myanmar yo rogo 2008. Tipa ka da rogo kura dungurati sa, agu awirina du rogo gu riigbu nga ga fu undo andu gbanga nunguro dagba kuadikuadi arago na dagba akangba. Ho agu awirina nadu rogo gu dungurati re abi gayó kuru babi rimbasa ni dagba agu awirina nandu re, i akpari ki yaa: “Oni bi! Gaani babi rimbasa! Yekova ima batasa rani!” Ya mo oni na tambuahe tipa gu nyanyaki sunge abaakumba amangaha uru na yuru? Kura abaakumba kinaho i naasiayo i sari nyanyaki angbanga. Agi abaakumba re naatanga ngbaduyó tipa agu apai rengbeyó ka mangaha te; ono agu aboro ninaagbia undo beyo, i nidu adu na tambuahe.​—Mt. 6:2-4.

10. Gini asunge duho abaakumba amangaha aboro ainongo paha gbe ya?

¹⁰ Dungu agu abaakumba du areme namanga agu asunge nga ga kekaapai. Nikpiapai, barii gu gbuu nga ga abaakumba naambakada gu ringbisapai du tipa manga adunguratise. Gu bakeapai nga ga dungurati ko naadungura agu aripoti nga ga adiwi na ga agarã kurogo ba sa. Gu babiapai nga ga sukuru ko naawisigo pa ringbisa manga sukuru wenengai na kini keke rimo awirina tipaha. Rogo adiwi biata dunduko, dungurati naawisigo pa gu marã duho. Abaakumba naageda agu awaraga be-basunge akedaha na kini mangi agu apai si apehe tipa ‘kadu sa rogo idapase yo.’ (Ef. 4:3, 13) Gu ome abaakumba amangaha re nasa gupai nga ‘apai mangi dunduko nzunzu nitangaratangaraha.’​—Kor. 14:40.

“Du Ri Roni”

11, 12. Ada du kurii dungurati, na gini apai dukurii dungurati akodaha?

¹¹ Pauro aringbisipa agu abaakumba nadu Tesaronike yo ki yawee i ‘du kurii’ dungurati. Gu fugo re nayugo gupai nga i naangbembatayo rogo apai yo, kini rugu apai. (1 Tesa. 5:12) Pauro afura tipa agu abaakumba re a ki yawee i ‘aamangasunge nyanyakii.’ Ko aafuranga tipa bangisa bakumba te, ono tipa agu abaakumba dũ nadu rogo gu dungurati re. Areme, badungu abaakumba naru barabangiri dungurati tipa kaa nungusa adunguratise. Gu ariapai i amangihe bambeda kusayo nga kaa ya “barii gu gbuu nga ga abaakumba,” si naundo rani ani naabi abaakumba dunduko ni agu aboro du rogo gbuu sa.

¹² Anga ‘du kurii’ dungurati nga kaa yugo kina pai sa fu dungurati te. Kina ngbatunga gu fugo re du rogo 1 Timoteo 3:4. Pauro ayawee si naida babiapai du nigu boro “nazoga kpuni tigani wenengai, nizogo awirini ni zera.” Ane, gu fugo nga “nazoga,” si ayugongo kina pa yugopai fu agude sa te, ono si nayugopa ngbe mbatayo a rogo agu apai nga ga kporo na kini zogo agude wenengai. Sidu, abaakumba nangbembatayo rogo dungurati na kini undo aboro i rafu Yekova.​—1 Tim. 3:5.

13. Tipagine rengbehe ka dia gbanga regbo adia ti ni tipa ka manga wene diaberã ba gu dunguratise yo nga ga abaakumba?

¹³ Tipa ka ngerakurii dungurati wenengai, abaakumba naasakapai asaka tipa agu azingo nga ga dungurati na gupai rengbeyó ka mangaha tipaha. Si rengbe kadu nga ka bangisa bakumba mangi diaberã, apai nduandu niipo wenengai. Ono abaakumba napekafuo gu kpiapai nga ga gu riigbu bipasunge nadu rogo bambata sa kama agarã, nga ka sungo asungo  sa ka sakapai ringbisihe kuti agu apai du rogo Ziazia Kekeapai. Gayó sásá nga ka mangasunge na agu arugute du rogo Ziazia Kekeapai ka undo dungurati. Gipai re ningba angba gbe ho abaakumba dunduko nibasasa naambakadatiyo ambakada ni tipa gu dunguratise nga ga abaakumba, kini wisigi averesi na agu arugute naye be gu riko nga ga ruru kangara moyambu. Gipai re nadia regbo adia. Ho i asakapai ni i ki kuru na kina kparakakparaka aberãpai, a wa si adu rogo bambata sa kama agarã, i nadia regbo adia berewe ka wetekaapai tipa ka manga wene diaberã ringbisihe kuti Ziazia Kekeapai.​—Amo. 15:2, 6, 7, 12-14, 28.

14. Ya mo oni na tambuahe mbiko gupai nga abaakumba namangasunge nikpamiakpamiayo? Tipagine gumba oni he ti ni wo?

¹⁴ Ginipai rengbe ka manga ka si du nga bakumba sa naida akurako ndu kina kuti gako pai? Watadu ka boro agianga tiní na akurani ya, a wa Dioturepe adu? (3 Yo. 9, 10) Dungurati mbuambu naabaha. Satana naida ka gberesapa gu zereda du rogo adungurati areme, a wa ko aidi ka mangaha rogo bambata sa kama agarã. Ko rengbe ka mangasunge na kina gu nyemupai du rogo boro yo, wa gu nga nyemu worimo. Si du si aida gupai ti ni nga abaakumba duna umbasitise na kini mangipai sa nikpamiakpamiayo. Ani nafu tambuahe fu agu abaakumba namangapai sa nikpamiakpamiayo!

“Kini Rugu Roni”

15. Ginipai ninaasa abaakumba i fu rugute fu kandoro?

¹⁵ Pauro agumbapa kura nyanyaki sunge berewe abaakumba amangaha, nga kaa ruga rimbasa akandoro. Anga ruga boro nga ka manga ní iigiraa watadu gbagaragbagara te.  (Amo. 20:31; 2 Tesa. 3:15) Nikpiapai, Pauro akepai fu aKorindo ki yaa: “Mi ake nga agi apai re ka ba zee ti roni te, ono ka ruga roni wa du oni ni awire mi nakpi nyemu roni.” (1 Kor. 4:14) Gupai nasako ko fu rugute fuyó nga nyemuyo.

16. Ginipai si aida si du berã abaakumba yo ho i aruga aboro ni?

¹⁶ Abaakumba naʹasadatiyo kaa ruga aboro ngba wene gene. I naʹasadatiyo kadu wa Pauro, nadu na weneringise, nyemuse, na kini idi ka fu undo ho ko aruga aboro ni. (Oni gedi 1 ATesaroniko 2:11, 12.) Ono abaakumba ‘nakakuti irarengo pai, ya i rengbe ka zungadi boro niruru yugopai.’​—Tito 1:5-9.

17, 18. Ginipai si aida oni tingidihe ka bakumba fu rugute furoni?

¹⁷ Kina rengo du ngaha nga, abaakumba nga kina kpakpa aboro a na i rengbe arengba ka gumba gupai i nika bira tiyo abira ti ni kusa. (1 Aba. 8:46; Yak. 3:8) Na berewe a, abaakumba ini gupai nga dungu aboro adianga rugute ‘ningbarago te, ono nikina rungo.’ (Eb. 12:11) Sidu, ho bakumba andu ni ka fu rugute fu boro, ko namangaha wo ko naima berã mbata wenengai na ki kpari fu Yekova a riipaha. Ka si du nga bakumba afu rugute foro, ya mo mo adihe kugume kidu na tambuahe tipaha?

¹⁸ Ka si du nga mo na kere kaza tiro, munganga ki ini gu kaza ngaha, ono si kidu nimbumbuhe foro mo idi i husi ro ngba gu gene munganga nagumbaha, ya mo mo kpipai kuti gu munganga re? Wagusa te! Ka si vura du nga ko yawee i gbaro agba, mo idi aida i gbaro, bambiko si rengbe ka undo ro. Ka si vura du nga gu gene gu munganga re nifura foro ngbaha naangbanga tiro te, ya mo si sa ro ka mo idinga i gbaro ya? Wagusa te. Wakina gure a, ka si vura du nga bakumba fu rugute foro ngba gu gene angbanga ya, si aidanga si sa ro mo he gia gupai ní napehe te, mo aino wari Yekova na Yesu Kristo du namangasunge na ní ka undo ro watadu ka banda ro rogo toro yo.

Oni Duna Tambuahe Tipa gu Gamahe Nga Abaakumba

19, 20. Wai rengbe oni ka yugo gaoni tambuahe tipa abaakumba?

¹⁹ Ka mo gbia gu gamahe i ambakadihe tipa kina ro, ginipai ka mo mangihe? Ya mo mo yugu gamo tambuahe tipaha nimanga mo sunge nani? Abaakumba nga gu gamahe Yekova nafuhe furani rogo Yesu Kristo yo. Gene sa rengbe oni ka yugo gaoni tambuahe ngbaha tipa gi gamahe re nga nidega oni turoni ka gia agu agumbapai abaakumba amangaha na oni ki mangi agu apai i nagumbaha rogoho. Oni rengbe ka yugo gaoni tambuahe a nifu oni wene akaragapai ba adunguratise yo. Oni songodi gu sunge abaakumba angbembatayo rogoho, wa gu nga sunge tungusapai. Ka si du nga oni agbia undo be gu rugute bakumba afuhe furoni, si ngbaangba oni gumbaha fuko wo. Kurigure, si ngbaangba oni yugu gaoni tambuahe tipa agu aborokporo nga ga abaakumba yó. Oni tingidi gupai nga, tipa bakumba nimangi agu asunge nga ga dungurati nyanyakii, gako aborokporo nambu regbo ambu fuko.

²⁰ Nirengo, wene nduapai kina berani ani duna tambuahe tipa abaakumba, nga aguyo namangasunge nyanyakii dagbarani, kini ngere kurirani, na kini rugu rani. Abaakumba nga wene gamahe be Yekova nzunzu!

Oni Natingidaha?

• Gini nduapai nadu be agu aKristano nadu Tesaronike yo i duna tambuahe tipa agu aboro naangbembatayo dagbayó?

• Wai agu abaakumba du rogo gaoni dungurati amangasunge nyanyakii tipa roni?

• Wai oni agbia undo mbiko gupai nga abaakumba nangera kurironi?

• Ka bakumba fu rugute furoni, ginipai si aida oni tingidihe?

[Asanahe nga ga wisigopai]

[Gu sura du ti kpewaraga 31]

Ya mo oni na tambuahe tipa gu dungu agene abaakumba ambu ti dungurati ngbaha?