“Halo ó-nia dalan sai susesu”—Oinsá?

“SUSESU”—Ida-neʼe buat neʼebé ema barak hakarak! Ema balu hetan ona susesu tanba hetan ona pozisaun boot iha sira-nia serbisu-fatin, hetan naran-boot, ka sai riku. Ema seluk mehi kona-ba susesu iha sira-nia moris maibé la hetan.

Tuir loloos, atu hetan susesu, ida-neʼe depende ba saida mak importante liu iha ita-nia moris. Susesu mós depende ba buat rua tan neʼebé importante, neʼe mak oinsá ita uza ita-nia tempu no forsa, no ita-nia hakaʼas-an.

Ema kristaun barak neʼebé hola parte beibeik iha serbisu haklaken sente katak halo serbisu neʼe mak lori haksolok ba sira. Nuneʼe, joven no ferik-katuas barak sente katak sira hetan susesu hodi uza sira-nia moris atu halo serbisu tempu-tomak ba Maromak. Maibé, ema balu karik sente baruk atu halo serbisu haklaken, no tan neʼe sira la tau serbisu neʼe uluk iha sira-nia moris no buka atu halo planu seluk. Tanbasá mak ida-neʼe akontese? Saida mak ita presiza halo hodi bele hanoin kona-ba buat neʼebé importante liu? No oinsá mak ita bele ‘halo ita-nia dalan sai susesu’?—Jos 1:8.

Atividade neʼebé halaʼo iha oras neʼebé laʼós eskola nian

Joven kristaun sira presiza tetu didiʼak kona-ba serbí Maromak neʼebé loos no kona-ba hola parte iha atividade seluk. Sira neʼebé halo ida-neʼe mak hetan susesu iha sira-nia moris, no tan neʼe diʼak atu ita gaba sira ho laran.

Maibé, joven kristaun balu fó tempu demais ba atividade neʼebé sira halaʼo iha oras neʼebé laʼós eskola nian. Atividade sira-neʼe karik la kontra Bíblia. Maibé, joven kristaun sira tenke husu sira-nia an: ‘Atividade sira-neʼe sei han tempu hira? Haʼu sei ransu ho ema oinsá? Kuandu halaʼo atividade sira-neʼe, ema seluk nia hahalok bele book haʼu atu halo saida? No haʼu sei husik buat sira-neʼe sai importante liu iha haʼu-nia moris ka lae?’ Karik ita hatene ona katak fó tempu demais ba atividade sira-neʼe bele halo ita atu ladún iha tempu ka forsa atu nafatin haburas relasaun diʼak ho Maromak. Tan neʼe, presiza duni tau uluk buat neʼebé importante liu iha ita-nia moris.—Ef 5:15-17.

Hanoin toʼok kona-ba saida mak akontese ho Wiktor. * Nia hatete: “Kuandu haʼu tinan 12, haʼu tama iha ekipa ida atu joga voleiból. Lakleur, haʼu manán prémiu barak. Haʼu iha oportunidade atu hetan naran-boot.” Ikusmai, Wiktor komesa sente laran-susar tanba desportu neʼe hanetik nia atu serbí Maromak. Loron ida, nia lee hela Bíblia no nia sai dukur. Nia mós ladún sente haksolok ona atu halo serbisu haklaken. Nia hatete: “Desportu neʼe hadau haʼu-nia forsa hotu, no lakleur haʼu sente katak desportu neʼe mós hadau haʼu-nia laran-manas atu serbí Maromak. Haʼu hatene katak haʼu la halo ona buat neʼebé haʼu presiza halo.”

Presiza eskola boot ka lae?

Ema kristaun iha responsabilidade husi Bíblia atu tau matan ba ninia família, no ida-neʼe inklui fó ai-han, sasán, no buat seluk tan neʼebé sira presiza. (1 Tim 5:8) Maibé, atubele halo ida-neʼe presiza bá universidade ka lae?

Diʼak atu hanoin kona-ba oinsá mak buka eskola boot bele hanetik ita-nia relasaun ho Maromak Jeová. Mai ita haree ezemplu ida husi Bíblia neʼebé hatudu ida-neʼe.

Baruc serbí nuʼudar sekretáriu ba profeta Jeremias. Maibé loron ida, duké hafolin ninia knaar espesiál atu serbí Jeová, Baruc komesa  atu hanoin kona-ba oinsá atu buka buat boot ba ninia an. Jeová haree ida-neʼe no fó avizu ba nia liuhusi Jeremias, hodi dehan: “Ó buka nafatin buat boot sira ba ó-nia an. Labele buka nafatin.”—Jer 45:5.

Saida mak “buat boot sira” neʼebé Baruc buka nafatin? Karik nia buka atu hetan naran-boot iha nasaun Israel ka atu sai riku. Ita la hatene, maibé nia la hanoin ona kona-ba buat neʼebé importante liu, hanesan buat neʼebé ajuda nia atu besik nafatin ba Jeová. (Flp 1:10) Ikusmai Baruc rona ba Jeová nia avizu liuhusi Jeremias, no tan neʼe nia la mate kuandu Jerusalém naksobu.—Jer 43:6.

Saida mak ita bele aprende husi istória neʼe? Konsellu neʼebé Baruc simu hatudu katak nia iha hanoin neʼebé la loos. Neʼe mak nia hanoin atu buka buat boot sira ba ninia an. Se ita iha ona serbisu atu buka moris, ita presiza ka lae atu gasta tempu no osan atu buka eskola boot hodi halo kontente ita-nia an ka ita-nia inan-aman?

Hanoin toʼok kona-ba saida mak akontese ba Grzegorz, neʼebé halo serbisu hodi uza komputadór. Tanba rona ba ninia kolega serbisu, nia foti kursu neʼebé han tempu barak hodi simu treinu espesiál. Lakleur, nia la iha ona tempu ba atividade espirituál nian. Nia hatete: “Haʼu sente la hakmatek. Haʼu-nia laran fó-sala mai haʼu tanba haʼu la bele halo tuir haʼu-nia planu sira kona-ba serbí Jeová.”

Fó tempu demais ba serbisu

Maromak nia Liafuan fó konsellu ba ema kristaun loos atu serbisu ho badinas no atu sai serbisu-naʼin ka patraun neʼebé ema seluk bele tau fiar. Apóstolu Paulo hatete: “Buat hotu neʼebé imi halo, halo ho laran hanesan imi halo tuir Maromak nia hakarak, laʼós ema nia hakarak.” (Kol 3:22, 23) Maski importante atu serbisu ho badinas, maibé iha buat seluk neʼebé importante liu, neʼe mak ita-nia relasaun diʼak ho ita-nia Kriadór. (Ecle 12:13) Se ema kristaun ida fó tempu demais ba ninia serbisu, buat neʼebé bele akontese mak nia la tau uluk ona atividade espirituál nian iha ninia moris.

Fó tempu demais ba serbisu bele halo ema kristaun ida sente kole demais atu bele hametin ninia relasaun ho Jeová no atu ajuda ninia família. Liurai Salomão hatete katak “liman rua neʼebé nakonu ho serbisu makaʼas” dala ruma bele sai hanesan “hakaʼas an atu duni tuir anin”. Se ema kristaun ida fó tempu demais ba ninia serbisu, nia bele sai atan ba serbisu, no bele hetan estrese neʼebé makaʼas toʼo lakon ninia forsa hotu. Se nuneʼe, nia bele “haksolok ho buat diʼak husi ninia serbisu makaʼas hotu” ka lae? (Ecle 3:12, 13; 4:6) Tan neʼe, buat neʼebé importante liu mak atu nia iha forsa atu kaer ninia responsabilidade atu tau matan ba ninia família no atu hola parte iha atividade espirituál nian.

 Irmaun Janusz, neʼebé moris iha Europa Leste, komesa atu fó tempu demais ba ninia serbisu nuʼudar badain atu tau matan ba jardín. Nia hatete: “Ema barak gosta haʼu tanba haʼu badinas no sempre halo hotu haʼu-nia serbisu. Maibé, haʼu-nia relasaun ho Jeová sai fraku, no haʼu para halo serbisu haklaken. Lakleur, haʼu mós para tuir reuniaun sira. Haʼu sai foti-an no la simu katuas sira-nia konsellu, no neineik-neineik haʼu hadook an husi kongregasaun.”

Ita bele halo ita-nia moris sai susesu

Ita koʼalia ona kona-ba buat tolu neʼebé bele halo ema kristaun ida lakon ninia relasaun ho Jeová se nia fó tempu demais ba buat sira-neʼe. Ita mós fó tempu demais ba sira-neʼe ida ka lae? Se nuneʼe, pergunta, eskritura, no komentáriu  sira tuirmai, bele ajuda ita atu hatene se ita sei hetan duni susesu ka lae.

Atividade neʼebé halaʼo iha oras neʼebé laʼós eskola nian: Ita fó tempu demais ba atividade sira-neʼe ka lae? Atividade sira-neʼe han tempu neʼebé ita uluk uza ba atividade espirituál nian ka lae? Ita sente katak ita ladún haksolok ona atu ransu hamutuk ho maluk fiar-naʼin sira ka lae? Se nuneʼe, diʼak atu halo tuir Liurai David, neʼebé husu Jeová: “Halo haʼu hatene dalan neʼebé haʼu presiza laʼo.”—Sal 143:8.

Katuas ida neʼebé iha knaar atu vizita kongregasaun ajuda Wiktor, neʼebé temi uluk. Katuas neʼe hatete ba Wiktor: “Ó koʼalia ho laran-manas kona-ba joga voleiból.” Wiktor hatete: “Liafuan neʼe hanesan fanu haʼu. Halo haʼu haree katak haʼu envolve an demais iha desportu neʼe. Lakleur, haʼu para ransu malu ho maluk sira iha ekipa no haʼu buka fali kolega sira iha kongregasaun laran.” Ohin loron, Wiktor serbí Jeová ho laran-manas iha ninia kongregasaun. Nia fó konsellu: “Husu ita-nia maluk sira, ita-nia inan-aman, ka katuas sira iha kongregasaun se sira haree katak ita-nia atividade eskola nian halo ita hakbesik liután ba Jeová ka hadook ita husi nia.”

Diʼak atu fó-hatene katuas sira iha ita-nia kongregasaun katak ita prontu atu hetan knaar oioin atu serbí Maromak. Karik ita bele ajuda ferik-katuas sira hodi vizita sira ka bá sosa sasán ba sira ka halo serbisu ruma iha sira-nia uma. Maski ita joven ka idade ona, karik ita bele hola parte iha serbisu haklaken tempu-tomak hodi bele fahe lia-loos ba ema seluk.

Eskola boot: Jesus fó avizu atu labele ‘buka ita rasik nia glória’. (Joao 7:18) Se ita atu foti desizaun kona-ba hetan eskola boot, ita hanoin didiʼak ona kona-ba ‘buat neʼebé diʼak liu’ ka importante liu ka lae?—Flp 1:9, 10.

Irmaun Grzegorz, neʼebé temi uluk, nia mós halo mudansa balu iha ninia moris. Nia hatete: “Haʼu simu ho didiʼak konsellu husi katuas sira, no haʼu halo haʼu-nia moris sai simples liu. Haʼu haree katak tuir loloos haʼu la presiza tan atu tuir eskola boot. Ida-neʼe halo haʼu lakon tempu no forsa.” Nuneʼe, Grzegorz fó tempu liután ba atividade kongregasaun nian. Lakleur, nia tuir Eskola Bíblia nian ba Irmaun sira-neʼebé Laiha Kaben (uluk naran Eskola Treinu Atan Kristaun). Sin, nia uza didiʼak ninia tempu atu simu hanorin liután husi Maromak.—Kol 4:5.

Serbisu atu manán osan: Ita fó tempu demais ba ita-nia serbisu no la tau uluk ona atividade espirituál nian iha ita-nia moris ka lae? Ita fó tempu atu koʼalia hamutuk ho ita-nia família ka lae? Iha kongregasaun, ita hakaʼas an atu halo diʼak liután ita-nia knaar ka diskursu sira ka lae? Ita mós koʼalia kona-ba buat neʼebé fó laran-manas ba ita-nia maluk sira ka lae? Hodi “taʼuk ba Maromak neʼebé loos no halo tuir ninia mandamentu sira”, ita sei simu bensaun barak husi Jeová no sei ‘haree buat neʼebé diʼak husi ita-nia serbisu makaʼas’.—Ecle 2:24; 12:13.

Irmaun Janusz, neʼebé temi uluk, nia la hetan susesu iha ninia serbisu nuʼudar badain atu tau matan ba jardín. Tanba nia la iha ona osan no iha tusan barak, nia komesa hanoin fali Jeová. Irmaun Janusz hadiʼa ninia moris no agora nia serbí nuʼudar pioneiru regulár no nuʼudar katuas iha kongregasaun. Nia hatete: “Kuandu haʼu kontente ho moris neʼebé simples no fó tempu ba atividade espirituál nian, haʼu sente dame iha laran no laran-hakmatek.”—Flp 4:6, 7.

Diʼak atu ita hanoin didiʼak kona-ba saida mak ita hakarak tau uluk iha ita-nia moris no tanbasá mak ita hakarak halo ida-neʼe. Serbí Jeová mak dalan atu hetan susesu iha ita-nia moris tomak. Ida-neʼe mak buat neʼebé importante liu iha ita-nia moris.

Atu ita bele fiar katak “buat neʼebé Maromak hakarak” mak sei lori rezultadu diʼak, ita presiza halo mudansa balu iha ita-nia moris, hanesan husik buat ruma neʼebé ladún importante. (Rom 12:2) Tan neʼe, hodi serbí Maromak ho laran tomak ita bele duni ‘halo ita-nia dalan sai susesu’.

[Nota–rodapé]

[Kaixa/Dezeñu iha pájina 31]

Oinsá mak ita bele halo ita-nia dalan sai susesu?

Iha buat barak neʼebé bele hadau ita-nia tempu. Nuneʼe, oinsá mak ita bele hanoin nafatin kona-ba buat neʼebé importante liu? Diʼak atu fó tempu atu hanoin didiʼak kona-ba neʼe no kona-ba tansá mak ita hakarak halo ida-neʼe, hodi uza pergunta sira tuirmai:

ATIVIDADE NEʼEBÉ HALAʼO IHA ORAS NEʼEBÉ LAʼÓS ESKOLA NIAN

▪ Kuandu halaʼo atividade sira-neʼe, ema seluk nia hahalok bele book ita atu halo saida?

▪ Atividade sira-neʼe han tempu hira?

▪ Ita husik atividade sira-neʼe atu sai importante liu iha ita-nia moris ka lae?

▪ Atividade sira-neʼe han tempu neʼebé ita uluk uza ba atividade espirituál nian ka lae?

▪ Hodi halo atividade sira-neʼe, ita ransu ho ema oinsá?

▪ Ita sente katak ransu malu hamutuk ho ema sira-neʼe diʼak liu fali ho maluk fiar-naʼin sira ka lae?

ESKOLA BOOT

▪ Se ita iha ona serbisu atu buka moris, ita presiza ka lae atu gasta tempu no osan atu buka eskola boot?

▪ Atu buka moris, ita presiza ka lae atu bá universidade?

▪ Hodi bá universidade, ida-neʼe sei hanetik ita atu tuir reuniaun sira ka lae?

▪ Ita hanoin didiʼak ona kona-ba ‘buat neʼebé diʼak liu’ ka importante liu ka lae?

▪ Ita presiza hametin ita-nia fiar ba Jeová nia kbiit atu tau matan ba ita ka lae?

SERBISU ATU MANÁN OSAN

▪ Ita-nia serbisu fó tempu ba ita atu bele ‘haksolok ho buat diʼak husi ita-nia serbisu makaʼas’ ka lae?

▪ Ita iha forsa atu kaer ita-nia responsabilidade atu tau matan ba ita-nia família no atu hola parte iha atividade espirituál nian ka lae?

▪ Ita fó tempu atu koʼalia hamutuk ho ita-nia família ka lae?

▪ Ita fó tempu demais ba ita-nia serbisu no la tau uluk atividade espirituál nian iha ita-nia moris ka lae?

▪ Ita-nia serbisu hanetik ita atu prepara didiʼak ita-nia knaar ka diskursu sira ka lae?

[Dezeñu iha pájina 30]

Jeová fó avizu ba Baruc atu labele buka buat boot sira