Tika Ada Tyen Lok Mo me Kwo Tye?

“TIKA ada tyen lok mo me kwo tye?” Dano mapol dong gupenye ki lapeny meno. Ento tye me cwercwiny ni kadi bed gutam pi kwo, pol pa dano pe gibwot ki i lok ma dokto mo me Australia, Viktor E. Frankl otito ni “dano ginongo ni pe tye tyen lok me kwo dok giwinyo ni gin mo tye orem” i kwogi.

Pingo dano mapol gitamo kumeno? Pien dano milion mapol i twok lobo-ni lung gitye i kwo matek kacel ki cwercwiny malit. Nino ducu, jo magi gicoo ma nongo gitye i can, two, tim gero, kacel ki dic. Ada, kwogi “opong ki ayelayela” kit ma Yubu owinyo kwede yam con ma lubbe ki deno can. (Yubu 14:1) Gin ma pire tek aye me kato ki i nino moni donyo i nino mukene.

Dano milion madwong mukene gitye ki kwo mayot kacel ki jami muromo. Ginen calo jo ma gitye ki jami ducu ma mitte me nongo yengo i kwo. Ento dano mapol pud gipe ki jami magi. Pingo? Pienni kare ki kare “can ki ayelayela”​—peko ma bino ma pe guyubbe pire calo me cente nyo peko malit atika, calo to pa latin​—balo gengi ki yub ma pire tek ma gitye kwede woko.​—Jabuli 90:10.

Tye gin mukene ma oweko “dano ginongo ni pe tye tyen lok me kwo dok giwinyo ni gin mo oryem“ i kwogi. Meno obedo gin ango? Obedo cek pa kwo. Bot jo mapol, man obedo gin ma niang iye tek, ni dano ma tye ki kero me timo jami mapol-li, kwo pi kare manok keken. Pe giniang gin marac ma wan ducu wakemme kwede: Kadi bed wabwot ki i pekki madongo i kare me kwowa, to mayo jami ducu ma watye kwede.​—Latitlok 3:19, 20.

Kwo Mono Binen Calo Tyen Lokke Pe Kare Ducu?

Kabaka Solomon ma okwo con i Icrael-li odolo te lok man maber adada. En oneno kit ma dano i karene ca gitiyo matek ki ngecgi kacel ki kerogi i pito jami, pur, gedo, ki dong gwoko jo me odigi kit ma watimo kwede  i kare-ni. En openyo ni, ‘Ngo maber ma jami magi ducu bikelo i agikkine?’ En ogiko ni jami ducu ma dano gitimo, “konygi pe dok obedo calo ryemo kor yamo.”​—Latitlok 2:17, The New English Bible.

Ento Kabaka Solomon mono onongo yeni jami ducu ma dano gitimo kare ducu bibedo gin ma ‘konygi pe dok gubedo calo ryemo kor yamo’? Pe kumeno. En onongo tye ka lok i kom neno mupore ma lubbe ki gin ma timme i kwo. Kitungcel, Lok pa Lubanga romo mini gen ni jami pe bibedo kuman kare ducu!

In itwero nongo gen ma kit meno nining? Tim ber kwan pwony aryo ma gilubo man. Giromo konyi me niang gin mumiyo tyen lok me kwo nen calo pe, kit ma kiromo yubone kwede, ki kit ma iromo weko kwoni bedo ki tyen lok mo i kare-ni.