?E o mɛn’n nun sa ngbɛn?

“?Ɔ LE like kun ti mɔ e o mɛn’n nun ɔn?” Sran kpanngban kpa be usɛ i sɔ kosan’n. Kɛ sran’m be nian wafa nga be fa di mɛn’n, maan be yo i sɛ be yo i sɛ be wun i kɛ ndɛ nga Viktor Frankl m’ɔ fin nvle nga flɛ i Autriche, m’ɔ ti dɔɔtrɔ bian’n kannin’n i su sa yɛ be wun i ɔ. I waan sran’m be “wunman like nga ti yɛ be o mɛn’n nun’n i wlɛ.”

?Ngue ti yɛ sran’m be bu i sɔ ɔ? Asiɛ wunmuan’n su’n, afɛ nga be flɛ i afɛ’n yɛ sran akpinngbin kpanngban’n be wun i ɔ. Kɛ be o be liɛ’n sa’n, like nga be si i’n yɛle yalɛ’n nin tukpacɛ’n ɔ nin nzaje sa mun yɛ mianmianlɛ’n. Nanwlɛ, kɛ nga laa Zɔbu fa kokoli i ɲrɛnnɛn m’ɔ wunnin i’n su sa’n, sran sɔ’m be nguan’n “ti afɛ ngunmin.” (Zɔb 14:1) Kɛ ɔ ko yo naan ainman aliɛ liɛ’n w’a cɛn be’n, yɛ ɔ ti be cinnjin ɔn.

Sran akpinngbin kpanngban uflɛ be liɛ’n, be ɲan fawlɛ kan. Like kwlaa nga be ko ɲɛn i’n naan b’a di aklunjuɛ’n, ɔ bo sin yia be. Sanngɛ be nun sunman be te o afɛ nun. ?Ngue ti ɔ? Afin ninnge wie’m be fa “afɛ nin nyrɛnnɛn” be yi be su. Ninnge sɔ mun yɛle be sika m’ɔ kwla fi be sa kpɛ kunngba’n, ɔ nin sanvuɛsa kɛ be wa m’ɔ kwla wu’n sa. I kwlaa sɔ’n ti’n, ninnge nga be sunnzunnin’n kwlaa ka lɛ tɔ nzue nun.—Jue Mun 90:10.

Like kun ekun yo maan sran kpanngban be “wunman like nga ti yɛ be o mɛn’n nun’n i wlɛ.” ?Ngue yɛle i sɔ’n? Yɛle e nguan m’ɔ sin ndɛndɛ’n. Sran sunman be waan ɔ nin i fataman kɛ klɔ sran mɔ be kwla yo ninnge dandan mun’n, be wu ndɛndɛ sɔ. Be wunman ɲrɛnnɛn sa ng’ɔ o e kwlaa e ɲrun’n i wlɛ. Yɛle kɛ kannzɛ y’a wunman ɲrɛnnɛn ngboko’n, sanngɛ ɔ́ cɛ́ lele ɔ́ cɛ́ ngbɛn, saan wie’n kún e.—Akunndanfuɛ’n 3:19, 20.

?Afɛ’n nun yɛ é ká sa trilili ɔ?

Laa Izraɛli Famiɛn Salomɔn kannin afɛ ng’ɔ o klɔ sran’m be su’n i ndɛ klanman kpa. Ɔ wunnin wafa nga i blɛ sufuɛ’m be tu be klun be di fie mɔ be kplan sua’n, mɔ be nian be awlobofuɛ’m be lika kɛ nga e fa yo i andɛ’n sa’n. Ɔ maan  e kwla se kɛ ɔ usɛli i wun kɛ: ‘?I kwlaa nga sran’m be yo i lɛ’n, ngue like kpa yɛ be ɲɛn i nun ɔn?’ Ɔ guɛli i ndɛ’n i bo kɛ, like kwlaa nga sran’m be yo’n, ɔ “ti afɛ ngbɛn. Ɔ ti kɛ sran kun waan ɔ́ fúan aunngban’n naan ɔ́ kó trɛ́ i sa.”—Akunndanfuɛ’n 2:17.

?Ɔ maan Famiɛn Salomɔn buli i kɛ like nga sran’m be yo’n, ɔ́ yó “afɛ ngbɛn” sa tititi? Cɛcɛ. Sa nga be ju sran’m be su mɛn tɛ yɛ’n nun’n m’ɔ wunnin be’n, be ndɛ yɛ ɔ kan ɔn. Sanngɛ Ɲanmiɛn Ndɛ’n kwla yo maan amun lafi su kɛ nán kɛ ɔ́ yó sɔ tititi ɔ!

?Ngue yɛ amun kwla yo naan amun a lafi i sɔ’n su ɔ? Maan amun kanngan ndɛ nɲɔn nga bé bá lɛ’n be nun. Bé wá úka amun naan amun a wun like nga ti yɛ ɔ yo e kɛ ninnge kwlaa nga e yo be’n be ti afɛ ngbɛn’n. Kpɛkun bé úka amun naan amun a si wafa nga lika’n káci’n, ɔ nin wafa nga amun mɛn dilɛ’n kwla yo kpa dɔ nga su bɔbɔ’n.