Bushe Nkatalabapo ne Nsansa?
Bushe Nkatalabapo ne Nsansa?
“BUSHE nkatalabapo ne nsansa?” Abantu abengi balaipusha ici cipusho. Ku ca bulanda, te mulandu ne fyo abantu batontonkanya pa bumi bwabo, abengi batwalilila fye ukumfwa nga filya dokota Viktor E. Frankl alandile ukuti abantu “baba fye aba nkumbabulili, tababa ne nsansa.”
Mulandu nshi abantu abengi bashabela ne nsansa? Cimo icilenga ca kuti balacula icine cine. Lyonse fye balacula ku malwele, ubupiina, ubunkalwe, no mutitikisha. Nge fyo Yobo uwaliko kale sana alandile, ubumi bwabo “bwaisulamo amacushi.” (Yobo 14:1) Cila bushiku babombela ifya kuti balye ubo bwine fye ubushiku.
Lelo abantu bambi balikwata sana ifyuma kabili balekala bwino. Cimoneka kwati balikwata fyonse ifyo bakabila mu bumi bwabo. Na lyo line, abengi tabakwata insansa. Mulandu nshi? Pantu libili libili, balaponenwa na “mafya ne fya kukalipwa,” balalusa ifyuma mu kupumikisha nelyo balaponenwa na macushi, pamo nga ukufwilwa umwana. Ifi fyonse filenga ukuti baleba aba nkumbabulili.—Amalumbo 90:10.
Kwaliba na cimbi icilenga abantu ukuba ‘aba nkumbabulili, ababula insansa.’ Cinshi ico cine? Ca kuti ubumi bwa muntu bwalipipisha. Abengi cilabapapusha, pantu umuntu uwingacita ifipapwa e wikala fye inshiku ishinono. Balafilwa ukumfwa umulandu ifintu fyabipila umusango yu: Nangu cingati te kuti tuponenwepo no busanso nelyo akayofi, imfwa yena te kuti tuibutuke.—Lukala Milandu 3:19, 20.
Bushe Tukatwalilila Ukukanaba ne Nsansa?
Imfumu Solomone iya bena Israele yalyaswike bwino sana ici cipusho. Solomone alimwene uko abantu mu nshiku shakwe balebombesha pa kulima, ukubyala, ukukuula, no kusakamana indupwa shabo, nge fyo tucita na lelo. Afwile aleipusha ukuti, ‘Bushe ifi fyonse fikabalenga ukuba ne nsansa?’ Lyena asondwelele ukuti fyonse ifyo abantu bacita “fya fye kabili kuuma fye umwela.”—Lukala Milandu 2:17.
Bushe Imfumu Solomone yasumine ukuti fyonse ifyo abantu bakulacita fikatwalilila fye ukuba “ifya fye kabili ukuuma fye umwela”? Awe nakalya. Alelanda fye pa ficitika muli cino calo icaisulamo abantu ababembu. Lelo Icebo ca kwa Lesa kuti camwafwa ukucetekela ukuti ifintu tafyakatwalilile ukuba ifi!
Cinshi cingamwafwa ukuba ne ci citetekelo? Mukwai belengeni ifipande fyakonkapo fibili. Kuti fyamwafwa ukwishiba umulandu tushabela ne nsansa, ifyo ubu bwafya bukapwa, ne fyo mwingacita pa kuti mube ne nsansa na pali nomba.
