Eski lavi i vreman annan en sans?
Eski lavi i vreman annan en sans?
“ESKI lavi i annan en sans?” Bokou dimoun in demann sa kestyon. Malerezman, malgre zot diferan pwennvi lo lavi, bokou i ariv lo menm konklizyon avek Viktor Frankl, en spesyalis sorti Lotris ki ti dir ki lavi “pa fer sans e i vid.”
Akoz bokou i santi koumsa? Premyerman, plizyer milyon dimoun dan lemonn antye i viv dan bann sityasyon deplorab ki fer lapenn. Sak zour, zot bezwen viv dan lapovrete, maladi, vyolans ek labi. Zot lavi i vreman “ranpli avek problenm,” parey Zob ti dir konsernan soufrans bann imen. (Zob 14:1) Zot zis anvi viv sak zour a la fwa.
Plizyer milyon lezot i annan plis larzan ek sekirite. I konmsi zot annan tou sa ki zot bezwen pour annan en lavi vreman satisfezan. Me, pour bokou i pa le ka. Akoz? Parski, zour apre zour, zot eksperyans “plis maler ek keksoz fer mal.” Problenm ekonomik ek maler parey lanmor en zanfan i briz zot lespwar ek rev.—Psonm 90:10.
I annan en lot fakter ki fer zot santi ki zot lavi “pa fer sans e i vid.” Kwa sa? Lavi ki vreman kourt. Pour bokou dimoun, i zis pa fer sans ki bann imen, ki annan sitan kantite abilite, i viv zis pour en ptigin letan. Zot pa kapab konpran sa realite ki nou tou nou bezwen fer fas avek. Menm si nou pa eksperyans bann maler pli terib, to ou tar lanmor pou pran tou avek nou.—Eklezyast 3:19, 20.
Eski lavi pou touzour paret napa en sans?
Lerwa Salomon dan letan lontan Izrael ti rezim byen sa sityasyon. I ti vwar ki mannyer dimoun ti travay dir par servi zot talan ek abilite pour plante, konstri e pran swen avek zot fanmir zis parey nou fer ozordi. Anfet, i ti demande: ‘Kot tou sa la pou anmennen?’ I ti tonm lo sa konklizyon ki tou sa ki bann dimoun i fer i “vid e tay deryer divan.”—Eklezyast 2:17, The New English Bible.
Me eski Lerwa Salomon ti krwar ki tou sa ki zonm i fer ti pou touzour “vid e tay deryer divan”? Non. I ti pe zis eksprim son pwennvi lo lafason ki lavi dan sa lemonn enparfe i terminen. Toudmenm, Parol Bondye, Labib, i kapab donn ou konfyans ki keksoz pa pou touzour koumsa!
Ki mannyer nou kapab annan sa konfyans? Silvouple lir sa de lezot lartik ki swiv. Zot kapab ed ou pour konpran akoz lavi i paret pa fer sans, ki mannyer sityasyon pou ganny aranze e ki mannyer ou lavi i kapab fer sans la konmela.
