Nte Uwem Emi Osụk Enyene Ufọn?
Nte Uwem Emi Osụk Enyene Ufọn?
“NTE uwem emi osụk enyene ufọn?” Ekese owo ẹsibụp mbụme emi. Ndien ediwak owo ẹkụt ke ekpededi ida uwem didie, ke uwem osụk etie “ukpọk ukpọk inyụn̄ inyeneke ufọn” kpa nte Viktor E. Frankl, ataifiọk owo Austria, ọdọhọde.
Ntak etiede ata ediwak owo ntem ke idem? Ntak kiet edi ke mme owo ke kpukpru itie ke ererimbot ẹbọ ufen etieti. Ediwak mmọ ẹdi ọkpọikpọi ubuene ẹnyụn̄ ẹdu utọ uwem emi inua mîkemeke nditịn̄. Mmọ ẹsụk ẹtak ke ubuene, udọn̄ọ, afai, ye ufịk kpukpru usen. Mmọ ‘ẹyụhọ ukụt’ kpa nte Job okoyụhọde ke eset. (Job 14:1) Mmọ ẹkụt ukụt tutu ẹdikam ẹkere nte ikpodude uwem isiere eyo.
Edi ata ediwak owo idiọn̄ọke-diọn̄ọ se ẹkotde ukụt. Mmọ ẹnyene kpukpru se ikpanamde mmọ ẹkop inem uwem. Edi ata ediwak ke otu mmọ isụk ikopke inem uwem. Ntak-a? Koro ediwak ini, “afanikọn̄ ye ọkpọsọn̄ ubiak”—utọ nte mbubehe owo ndiduọ ke ata unana idotenyịn, m̀mê unọmọ ndisịm owo, nte eyen owo ndikpa—esinam idotenyịn owo akpa mfụhọ.—Psalm 90:10.
Edi enyene n̄kpọ en̄wen emi esidiọn̄de-diọn̄ anam uwem etie ‘ukpọk ukpọk okûnyụn̄ enyene ufọn.’ Nso idi oro? Uwem omụhọ akaha; ndien ediwak owo ẹkere ke iwụtke ifiọk uwem owo ndimụhọ ntem sia owo akam enyene ifiọk akan ke otu edibotn̄kpọ emi ẹdude ke isọn̄. In̄wan̄ake owo ntak emi esidide ikpọbọbọhọ mme mfịna eken emi ẹsisịmde ubonowo, ebebịghi m̀mê awawara, nnyịn ikemeke ndibọhọ n̄kpa.—Ecclesiastes 3:19, 20.
Ndi Uwem Edisụk Itie Ntem?
Solomon, edidem Israel eset, ama etịn̄ n̄kpọ aban̄a se isụk inemede emi. Enye ama okụt nte mbon eyo esie ẹnen̄erede ẹsịn idem ẹnam utom, utọ nte ediwet mbuwed, editọ in̄wan̄, edibọp ufọk, ye edise mban̄a mme ubon mmọ, ukem nte isinyụn̄ inamde mfịn. Ndien enye ama obụp m̀mê nso idi ufọn ofụri n̄kpọ emi. Ekem ọbọrọ ke kpukpru ẹdi “ikpîkpu ye edifehe mbịne ofụm.”—Ecclesiastes 2:17.
Edi ndi Edidem Solomon ekekere ke ofụri se owo anamde edisụk idi “ikpîkpu ye edifehe mbịne ofụm”? Baba! Enye eketịn̄ nte uwem etiede ke idiọk ererimbot emi. Ndien Ikọ Abasi emi ẹkedade spirit Abasi ẹwet anam ifiọk ke n̄kpọ iditiehe ntem ke nsinsi!
Nso ke akpanam man etiene okụt ini emi n̄kpọ edifọnde? Mbọk kot ibuotikọ iba oro ẹtienede. Edieke anamde oro, afo oyokụt ntak emi etiede nte uwem inyeneke ufọn, nte ẹdisiode mme n̄kpọ oro ẹnamde ẹtie nte uwem emi inyeneke ufọn, ye nte ekemede ndidu uwem emi enyenede ufọn idem idahaemi.
